1-2. Ngera kired el melemolem el meruul er ngii er a uriul er a demetecholb? Mosaod.

 KAU, ngtela el taem el mongetmokl er a blim? Uchei er a omsiseb er a blim e ke locha kmal mle ungil clean er ngii. Engdi ngmekerang a lemlak mluut el clean? Kede medengei el kmo ngmo mechudel a hokori me a dechudech. Me a lolemolem el kltmokl a blid e ngkired el mo blechoel el clean er ngii.

² A osisiu el tekoi a usbechall el kirel a uldesued me a blekerdeled. E uaisei, el uchei er a demetecholb e kede mle meringel loureor el melodech er a klengar er kid me “de kikidid er a ikel mengikiongel a bedenged ma rengud.” (2 Ko. 7:1) Engdi chelechang e ngkired el lotirakl er a omellach er a Paulus el mo “melemolem lomekbeches” a uldesued me a blekerdeled. (Efe. 4:23, NW) Ngera uchul me ngkired el melemolem el meruul er tiang? E le hokori me a dechudech er tia el beluulechad a sebechel mechudel er a chelsed. Me a dolemolem el clean er a osengel a Jehovah e dodeuir a rengul, e ngkired el blechoel el merriter er a uldesued, blekerdeled, me aike el tekoi el dengibes el kirel.

3. Ngera belkul a dukbeches a uldesued? (Rom 12:2, NW)

³ Ngera uchul me ngkired el melodech er kid loeak a domekbeches er a uldesued, el belkul a kmo kede melodech er a rolel a domdasu? (Monguiu er a Rom 12:2, NW. b) A tekoi er a Grik el moiuid el “mukbeches a uldesuiu,” a sebechel moiuid  el “em renovate er a uldesuiu.” Me a leuaisei e ngdiak el sebeched el di omesiich er a klengar er kid loeak sel doruul a bebil ungil tekoi. Ngkired el merriter er ngike el mera el chad er a chelsed e meruul aike el kirel ruoll me bo lsebechel a klengar er kid el mo oltirakl a llechul a Jehovah el mo er sel tkurrebab el sebeched. Tia diak doruul er ngii el di ta el taem e ngbai kired el blechoel el meruul er ngii.

4. Ngmekera lak debecherei tia el beluulechad me lomekrael er a uldesued?

⁴ Sel bo demecherrungel e kede mo odeuir a rengul a Jehovah er a rokui el tekoi el doruul. Engdi chelecha el taem e ngkired el meringel loureor el mo odeuir a rengul. Mutebengii el kmo a Paulus a dmu el ngar er a Rom 12:2 (NW) el kmo ngkired el mekbeches a uldesued e seikid e ngsebeched el mo medengelii a soal a Dios a doruul er ngii. Ngdiak el soad el mecherei tia el beluulechad me lomekrael er kid, e ngbai kired el kot e kede merriter er kid el kmo, kede omechei er a uldesuel a Dios me ngomekrael a turrekong me a omelilt er kid, el diak el beluulechad.

5. Ngmekera sebeched el merriter er a uldesued el kirel a kmeda el sils er a Jehovah? (Momes er a siasing.)

⁵ Molatk er tiang. A Jehovah soal a ‘dongiil lorreched er sel Sils er a Dios el mei.’ (2 Pe. 3:12) Di lekau el oker: ‘A rolel a klengar er ngak, ngochotii el kmo ak mera el mtebengii el kmo a ulebongel er tia el mekngit el blekeradel a kmedang? A omelilt er ngak el kirel a skuul me a ureor ngochotii el kmo a kot el klou a ultutelel el tekoi er a klengar er ngak a mesiou er a Jehovah? A kuumerang el kmo a Jehovah mo meskak ngak me a telungalek er ngak aike el ki mousbech, me a lechub ak di bekikl el kirel a klalo er tia el beluulechad?’ Molatk er a deuil a rengul a Jehovah sel lomes er kau el meruul a soal er a bek el tekoi el moruul.​—Mt. 6:25-27, 33; Fil. 4:12, 13.

6. Ngera kired el melemolem el meruul er ngii?

 ⁶ Ngkired el blechoel el merriter er a uldesued e meruul a omelodech el dousbech. A Paulus a dilu er a rechad er a Korinth el kmo: “Di le kemiu el merriter er kemiu el kmo, kom ngara kloumerang ngdiak.” (2 Ko. 13:5, BT) A bo de “ngara kloumerang” e ngdiak di sel dengar er a miting e domerk er a klumech. Ngdirrek luldimukl er a rolel a domdasu, tekoi el soad, me a uchul e kede meruul a tekoi. Me ngkired el melemolem el omekbeches er a uldesued loeak sel donguiu er a Tekingel a Dios, e dosuub el mo medengelii a rolel a lomdasu, e mo meruul aike el rokui el kired el meruul me bo doltirakl er a soal a Jehovah.​—1 Ko. 2:14-16.

7. A doltirakl er a Efesus 4:31, 32, e ngera dirrek el kired el meruul er ngii, e ngera uchul me tia sebechel mo meringel?

⁷ Monguiu er a Efesus 4:31, 32. Ngdiak di dolodech er a uldesued ngdirrek el kired el “moubail er ngikel beches el chad.” (Efe. 4:24, BT) Ngkired el meringel loureor el meruul er tiang. A bebil er a tekoi el kired el meringel loureor el kirel a omedobed a rokui el kngtil a rengud, cheldechuderreng, me a ngasecherreng. Ngera uchul me tia sebechel mo meringel? E le bebil blekeradel a delalem er a rengud. El ua tiang, a Biblia melekoi el kmo a rebebil er a rechad a “bekongesengasech” a rengrir. (Osi. 29:22) A chad el olab chouaika el blekeradel a kirel meringel loureor el melodech a blekerdelel el mo lmuut er a uriul er a techolb, el ua bo desang er tia el experience.

8-9. Ngmekera experience er a Stephen e ochotii el kmo ngkired el meringel loureor el omedobed er ngike el mechut el chad?

⁸ A odam el Stephen a mle meringel er ngii orreked er a ngesechel a rengul. Ngkmo: “Mo lmuut er a uriul er ak metecholb me ngmle kirek el dirk meringel loureor el kirel. El ua tiang, a ta el taem er aki moldingel obliil, e ak mlo oltoir er a chad el rirecherechii a razio er a mlik. Sera bocha kkeed er ngii e ngchilitii a razio e chiliis. Sera kuuchais er tirke el bebil er a rolel ak liluut el nguu a razio er ngak, e a ta er a remechuodel el ulebengkemam uleker er ngak el kmo, ‘Stephen, omko ke mildechemii e ke milekerang?’ Tia el ker a rirellak el mo omdasu e millisiich er ngak el mo meringel loureor el mo chad er a budech.” c

⁹ Ngua desa er a experience er a Stephen, ngsebechel diak er a rengud e mo olecholt aika el mekngit el blekeradel, el mo lmuut er a uriul er a domdasu el kmo kede mla mo mesisiich er ngii. A lsekum e tia duubech el mo er kau e lak bo lemechitechut a rengum me a lechub e momdasu el kmo ke mekngit el Kristiano. Mo lmuut er a apostol Paulus me ngdilu el kmo: “Le soak el meruul a ungil, me ngii a di mekngit a bo kngiltii el meruul er ngii.” (Rom 7:21-23) Rokui el diak lemecherrungel el Kristiano a ngar ngii a mekngit el blekerdelir el di me duum el ua hokori me a dechudech el di mo er ngii er a blid. Me ngkired el meringel loureor me dolemolem el clean er a osengel a Jehovah. Ngmekera sebeched el meruul er tiang?

10. Ngmekera sebeched el loldechelakl a mekngit el blekerdeled? (1 Johanes 5:14, 15)

¹⁰ Moluluuch el mora Jehovah el kirel a mekngit el blekerdelem el meringel er kau a melodech er ngii, lulterekokl a rengum el kmo ngmo rongesau e ngosukau. (Monguiu 1 Johanes 5:14, 15.) Alta Jehovah diak bo lengedechii a blekerdelem engdi ngsebechel smisichau me lak bo molecholt er ngii. (1 Pe. 5:10) E moureor loltirakl a nglunguchem loeak sel  lak moruul aike el tekoi el rullau el mo oubail er ngike el mechut el chad. El ua tiang, bom kerekikl a show el momes me a lechub e ngtekoi el monguiu el ngii a rullii tia el mekngit el blekerdelem el mo ua lekora ungil tekoi. E lak becherei a uldesuem me bo lolatk a diak lungil tekoi.​—Fil. 4:8; Kol. 3:2.

11. Ngera sebeched el meruul me dolemolem loubail er ngike el beches el chad?

¹¹ Alta ngmla mo diak moubail er ngike el mechut el chad engdi ngkirem el mo omekbail er kau er ngike el beches el chad. Ngmekera omoruul er tiang? Mrellii a turrekong er kau el mo oukerebai er a Jehovah sel mosuub el kirel a blekerdelel. (Efe. 5:1, 2) El ua tiang, sel monguiu a cheldecheduch er a Biblia el mesaod er a Jehovah lousubes, e di lekau el oker, ‘Ngak a kuusubes er a rechad?’ Sel monguiu el kirel a klechubechub er a Jehovah el mora remechebuul, e di lekau el oker, ‘Ngak ak dirrek el uaisei a uldesuek el kirir a rudam me a rudos er ngak el mechebuul, e ochotii loeak omerellek?’ Molemolem lomekbeches er a uldesuem loeak sel moubail er ngike el beches el chad, e moba kllourreng el kirem el meruul er ngii.

12. Ngmilekera Stephen e chormii a klisichel a Biblia el melodech er a rechad?

¹² A Stephen el dulsaod er ngii er a uchei, a milsa el kmo ngmle sebechel mekokil moubail er ngike el beches el chad. Ngkmo: “Sera kmetecholb el mei er chelechang e ak mla mo chobangel a blekeradel el mle kirek lorreked er a ngesechel a renguk. Ak silubii el kmo ngkirek el di merael el mo cheroid er a rechad el sorir el lolengasech er a renguk me a lechub ak stob er a blekeradel me lak lluut el mo klou. A rebetok el chad, luldimukl er a bechik, a chemat er ngak le ngmillemolem el chelellakl a renguk er a chelsel aika el blekeradel. Ngdirrek el kmal mechas a renguk er ngak! Engdi ak medengei el kmo ngdiak el ngak. A kuumerang el kmo tia olechotel a kmo a Biblia mera el sebechel ngodechii a chad.”

13. Ngera mo ngosukid el mo soad el meruul a llemalt? (Galatia 5:16)

¹³ Monguiu er a Galatia 5:16. A Jehovah meskid a chedaol reng el lolengeseu er kid el mo meruul a llemalt. Sel dosuub er a Tekingel a Dios e kede mecherei a chedaol reng me ngoureor er kid. Kede dirrek el nguu a chedaol reng sel debora miting. Ngar aika el ongdibel er a Rekristiano e kede mengoit a taem lobengterir a rudam me a rudos el tir a uaikid el meringel loureor el meruul er a llemalt, e tia kmal melisiich er kid. (Heb. 10:24, 25; 13:7) E sel doluluuch lolengit er a Jehovah me lengesukid er a chelitechetud e ngmeskid a chedaol reng er ngii, el ngii a ngosukid loldechelakl er ngii. Alta aika el tekoi a diak bo lecheridii a mekngit el ngelbesel a rengud, engdi ngosukid me ngdiak bo doruul er ngii. A Galatia 5:16 a kmo, tirke el mechere reng me ngomtebechel er a klengar er tir a “[diak] bo . . . el oltirakl a ngibes er a klechad.”

14. Ngera uchul me ngkmal klou a ultutelel a dolemolem el omekeroul er a urunguled el soad el meruul a llemalt?

¹⁴ Sel deketmeklii a ungil schedule er kid el meruul aike el tekoi luchul e ngmo er ngii a ungil deleuill er kid me a Jehovah, e ngkmal klou a ultutelel a dolemolem loltirakl er ngii e dolemolem lomekeroul er a urunguled el soad el meruul a llemalt. E ngerang? E le ngngar ngii a cherroued el diak lemechiuaiu. Ngika el cheraro a sel urunguled el soad el meruul a mekngit. Mo lmuut er a uriul er a techolb me kede locha mo metik el kmo ngsoad aike el tekoi el kired el mengeroid er kid er ngii el ua gambling, imis lomelim el rrom, me a lechub e  ngsiasing er a remeau. (Efe. 5:3, 4) A ngeasek lodam a di bleketakl el melekoi el kmo: “A ta er a tekoi el kmal meringel loldechelakl er ngii, a ngak el soak a resechal. A kulemdasu el kmo a cherengel a taem e ngmo diak feel el uaisei, engdi tia kmal dirk oldechelakl er a renguk.” Ngera sebechel ngosukau a lsekum e ngkmal mesisiich a mekngit el ngelbesel a rengum?

15. Ngera uchul me ngmelisiich er kid sel dodengei el kmo a mekngit el ngibes a sebechel duubech el mora “ngii di le chad”? (Momes er a siasing.)

¹⁵ Sel omeringel loldechelakl er a mekngit el ngelbesel a rengum el kmal mesisiich, e lak mobes el kmo ngdiak di el kau el tang. A Biblia kmo: “Ng dirkak a ongarm el mla mer kemiu el dirkak le bor a ngii di le chad.” (1 Ko. 10:13a) Tia el bades a mlora resechal me a redil el Kristiano el kiliei er a Korinth. A rebebil er tir a mlara laokreng, mengutech a raod, me a redi cheltelaol er a rrom. (1 Ko. 6:9-11) Omomdasu e a uriul er a lemetecholb, e ngmlo diak a mekngit el ngelbesel a rengrir? Ngkmal diak el sebechel uaisei. Nguaisei el alta te rokui el mle ngellitel, engdi te dimlak lemecherrungel. Nglocha mla er ngii a taem loldechelakl a mekngit el ngelbesel a rengrir. Tia kirel melisiich er kid. E ngerang? E le ngochotii el kmo a ngii di el mekngit el ngibes el doldechelakl, a ngar ngii a chad el mla mo mesisiich er ngii. Nguaisei, ngmera el sebechem el melemolem el “mesisiich el oumerang . . . ele kom medengei el kmo a re bebil er kemiu el oumerang el ngar a beluulchad el rokui a dirrek el chuarm osisiu el ringel el cho mngar ngii.”​—1 Pe. 5:9.

16. Ngera el kengaol el uldasu a kired el mengeroid er kid er ngii, e ngera uchul?

¹⁶ Mongeroid er kau er a kengaol luldasu el kmo ngkmal diak a chad el understand er a tekoi el mchelebangel er ngii. Sel bo momdasu el uaisei e ngsebechel mo uchul e ke omdasu el kmo ngdiak el sebechem el mo mesisiich er a mekngit el ngelbesel a rengum. A Biblia kmo: “Dios a diak lechoit a telbilel,  me ng diak le bechikemiu me bor ongarm el mo engelakl er a klisichiu. Me sel le mer kemiu ongarm, e ng mo meskemiu a klisiich el mtekengelii, e dirrek el meskemiu a rolel e kom tuobed er ngii.” (1 Ko. 10:13b) Me ngmo lmuut me a lesal kmal mesisiich a mekngit el ngelbesel a rengud me ngsebeched el mtekengelii. Ngoeak a ngelsuil a Jehovah, e ngsebeched el diak bo doruul er a mekngit.

17. Alta ngdiak el sebeched el stob a mekngit el ngibes el soiseb er a uldesued, engdi ngngera sebeched el meruul er ngii?

¹⁷ Lak mobes er tia el tekoi: Kau a diak mcherrungel me ngdiak el sebechem el stob a mekngit el ngibes me lak lsiseb er a uldesuem. Me nguaisei engdi sel lebo er ngii a mekngit el ngelbesel a rengum e ngsebechem el di mereched lotngeklii, el ua lurruul er ngii a Josef er a lechiis er a bechil a Potifar. (Gen. 39:12) Ngkmal sebechem el diak moruul a mekngit el ngelbesel a rengum!

18-19. Ngera el ker a sebeched el di kid loker sel dolasem el omekbeches er a uldesued?

¹⁸ A domekbeches er a uldesued e ngbelkul a kmo, kede make sure el kmo a uldesued me a omerelled odeuir a rengul a Jehovah. Me ngkired el blechoel el merriter er kid, e di kid loker el kmo: ‘A omerellek ngochotii el kmo ak mtebengii el kmo ngkmal orechudel a taem el dekiei er ngii? Ngak, a kulengeriakl er a rolel a kumekbail er ngak er ngike el beches el chad? A kumechei er a chedaol reng er a Jehovah me ngomekrael er a klengar er ngak me lsebechek el mo oltngakl a mekngit el ngibes?’

¹⁹ Sel morriter er kau e lak molasem el mo perfect e bai momes a tekoi el bla molengeriakl er ngii. A lsekum ke mesa el kmo ngngar ngii a kirem loureor er ngii, e lak bo lemechitechut a rengum. E bai moltirakl er tia el ulekrael er a Filipi 3:16 (BT) el kmo: “Di dolengeriakl loltirakl er sel bla bo de siich er ngii.” Sel moruul el uaisei e bo lulterekokl a rengum el kmo, a Jehovah mo omekngeltengat er a blakerreng er kau el omekbeches er a uldesuem.