1-2. Waut mott wie emma wada doonen no onse Doop? Laj daut ut.

 WOO foaken moakst du dien Hus rein? Veleicht muakst du daut gaunz rein, ea du doa nenntrokst. Oba waut wudd passieren, wan du daut nu kjeenmol mea rein muakst? Na daut wudd boolt wada gaunz schwiensch sennen. Daut daut Hus ordentlich blift, mott eena daut emma wada reinmoaken.

² Biejlikj soo mott wie doa uk aun schaufen, wan daut om onse Jedanken un onse Natua jeit. Ea wie ons deepen leeten, hab wie secha sea doaraun jeschauft, ons “von aules [to] reinjen waut Kjarpa un Jeist besudelt” (2. Kor. 7:1). Un nu mott wie dän Apostel Paulus sienen Rot nokomen, un “wieda nie jemoakt woaren” (Efs. 4:23, NW). Wuarom mott wie wieda doaraun schaufen? Wiels de Welt ons gaunz leicht wada schwiensch moaken kaun ver Jehova. Om daut väatobieejen un daut wie Jehova wieda jefaulen kjennen, mott wie emma wada unjasieekjen, woo wie denkjen, woo wie sent un waut ons jankat.

3. Waut meent daut, “eene niee Enstalunk to kjrieen”? (Reema 12:2).

³ Waut mott wie doonen, om wieda eene niee Enstalunk to kjrieen, aulsoo ons denkjen to endren? (Läs Reema 12:2, NW.) Wan daut opp griechisch doavon rät, “eene niee Enstalunk to kjrieen”, meent daut, ons denkjen nie moaken. Daut rieekjt nich too, wan wie bloos bieaun mol  waut goodet doonen. Daut wudd väl mea halpen, wan wie doaräwa nodochten, woo wie deep en ons bennen sent. Dan kjenn wie aules endren, waut needich es, daut wie soo goot aus mäajlich soo läwen kjennen, aus Jehova daut fa rajcht talt. Daut mott wie nich bloos eemol doonen, oba emma wada.

4. Waut kjenn wie doonen, daut de Welt ons denkjen nich formen deit?

⁴ Wan wie ieescht volkomen sent, woa wie Gott emma en aules jefaulen kjennen. Oba bat daut bat doa es, mott wie sea doaropp schaufen, Jehova to jefaulen. Soo aus Paulus en Reema 12:2 sajcht, mott wie onse Enstalunk endren, om to weeten, waut Gott von ons velangt. Wie wellen nich eefach tooloten, daut ons dise schlajchte Welt formen deit. Wie wellen ons leewa goot unjasieekjen, aus wie ons von Jehova sien denkjen formen loten. Daut sull aun onse Entscheidungen un waut wie ons väanämen to seenen sennen.

5. Woo kjenn wie daut unjasieekjen, woo wie doaräwa denkjen, woo dicht bie Jehova sien Dach aul es? (See daut Bilt.)

⁵ See wie mol een Biespel. Jehova well, daut wie daut Doasennen von Jehova sienen Dach “faust em Denkj hoolen” (2. Pet. 3:12, NW). Denkj mol äwa no: “Wies ekj en mien Läwen, daut ekj vestonen kaun, daut et met dise beese Welt boolt woat een Enj haben? Wiesen miene Entscheidungen, wan daut om Oabeit un utlieren loten jeit, daut Jehova deenen fa mie daut wichtichste em Läwen es? Jleew ekj faust doaraun, daut Jehova fa mie un miene Famielje sorjen woat? Ooda moak ekj mie daut emma wada met tietelje Sachen schwoa?” Denkj doaraun, woo sea Jehova daut jefelt, wan hee sitt, daut wie en aules proowen, sienen Wellen to doonen (Mat. 6:25-27, 33; Filip. 4:12; 4:13, NW).

6. Waut mott wie emma wada doonen?

 ⁶ Wie motten emma wada unjasieekjen, woo wie denkjen un dan aules endren, waut needich es. Paulus säd to de Korinta: “Unjasieekjt junt selfst, auf jie em Gloowen stonen. Prooft daut selfst ut!” (2. Kor. 13:5). Doa es mea met en, wan daut sajcht, “em Gloowen stonen”, aus bloos hanewada no de Toopkomes wanken ooda em Deenst metmoaken. Doa es met en, äwa waut wie nodenkjen, waut ons jankat un wuarom wie waut doonen. Wan wie eene niee Enstalunk kjrieen wellen, dan mott wie Gott sien Wuat läsen un lieren, soo to denkjen, aus hee denkjt. Un dan mott wie uk aules doonen, waut needich es, om Jehova to jefaulen (1. Kor. 2:14-16).

7. Waut mott wie no Efeesa 4:31-32 no noch doonen, un wuarom kaun daut schwoa sennen?

⁷ Läs Efeesa 4:31-32. Noch waut sea wichtjet, waut wie endren motten, es, daut wie ons “de niee Natua auntrakjen” (Efs. 4:24, NW). Doa es met en, daut wie waut doonen motten. Wie motten uk sea doaraun schaufen, schlajchte Ieejenschoften loostowoaren, soo aus vebettat sennen, sikj oajren un Wutt. Wuarom kaun soont schwoa sennen? Wiels eenje schlajchte Ieejenschoften sea deep en ons enjewartelt sent. Biejlikj sajcht de Schreft, daut eenje Menschen leicht oajalich un hetskopich sent (Spr. 29:22). Doawäajen motten deejanje, waut soone Ieejenschoften haben, veleicht wieda sea aun sikj schaufen, wan dee uk aul jedeept sent, soo aus wie nu en eene Erfoarunk seenen woaren.

8-9. Woo wiest Stephen siene Jeschicht, daut wie wieda de oole Natua auflajen motten?

⁸ Een Brooda, waut Stephen heet, haud Trubbel doamet, sienen Oaja to kontrollen. Hee sajcht: “Wan ekj uk aul jedeept wia, must ekj wieda doaraun schaufen, mienen Oaja to kontrollen. Biejlikj opp eene Sauz, aus wie von Hus to Hus em Deenst wieren, haud een Stäla mien Rädio jestolen ut de Koa. Aus ekj dän meist no wia, leet hee dän Rädio faulen un rand wajch. Aus ekj de aundre dan säd, woo ekj mien Rädio haud trigjjekjräajen, fruach een Eltesta ut de Grupp mie: ‘Stephen, waut wurscht du jedonen haben, wan du dän hautst tohoolen jekjräajen?’ Daut hee mie dit fruach, brocht mie bat doa, wieda doaraun to schaufen, frädlich to sennen.” b

⁹ Soo aus Stephen siene Jeschicht wiest, kjennen schlajchte Ieejenschoften onverhofs wada oppkomen, mau rajcht wan eena uk denkjt, daut eena dee unja Kontroll haft. Wan daut bie die soo es, dan woa nich mootloos un denkj nich, daut du nich een gooda Christ best. Mau rajcht de Apostel Paulus stunt too: “Ekj mucht daut goode doonen oba daut beese es noch en mie” (Reem. 7:21-23). Aule Christen sent onvolkomen un motten jäajen schlajchte Ieejenschoften schaufen, waut emma wada oppkomen – krakjt soo aus een Hus, waut emma wada schwiensch woat. Wie motten wieda doaraun schaufen, rein to bliewen. Woo kjenn wie daut doonen?

10. Woo kaust du jäajen Ieejenschoften schaufen, dee du nich haben west? (1. Johanes 5:14-15).

¹⁰ Bäd to Jehova äwa daut, waut die schwoa es un vetru doaropp, daut hee die hieet un die halpen woat (läs 1. Johanes 5:14-15). Wan Jehova die daut uk nich woat derch een Wunda wajchnämen, woat hee die oba stoakjen, soo daut du nich brukst oppjäwen (1. Pet. 5:10). Schauf  uk doaropp han, om waut du jebät hast, un doo nich soont, wuaderch de oole Natua wada verendach kjemt. Pauss biejlikj opp, waut fa Films ooda Tellewizhen-Programs du kjikjst ooda uk, waut du läst. Kjikj ooda läs nich soont, wua soone Ieejenschoften fa goot jetalt woaren, wua du jäajen schaufst. Lot daut uk nich too, daut du äwa schlajchte Wenschen nodenkjst (Filip. 4:8; Kol. 3:2).

11. Waut kjenn wie doonen, om wieda eene niee Enstalunk to kjrieen?

¹¹ Wan eena sikj de oole Natua uk utjetrocken haft, es daut oba sea wichtich, sikj auntostrenjen, no de niee to läwen. Woo kaun eena daut doonen? Näm die väa, Jehova notodoonen, wan du von siene Ieejenschoften lieescht (Efs. 5:1-2). Biejlikj wan du en de Schreft äwa Jehova sien Vejäwen läst, dan kaust doaräwa nodenkjen: “Sie ekj uk soo wellich reed, aundre to vejäwen?” Ooda wan du läst, woo Jehova met de Oame metfeelt, kaust du äwa nodenkjen: “Hab ekj krakjt soon Metjefeel fa miene Gloowesbreeda, waut daut aun Help fält, un wies ekj daut met Woakjen?” Schauf wieda doaraun, eene niee Enstalunk to kjrieen un sie to deeselwje Tiet uk jeduldich met die selfst.

12. Woo späad Stephen, daut de Bibel am veendad?

¹² Stephen, von dän wie ea aul räden, wort en, daut hee sikj soo bie sacht de niee Natua auntrock. Hee sajcht: “Von dan aus ekj mie deepen leet, sie ekj ieremol en eene Loag jewast, wua ekj miene Wutt kontrollen must. Ekj hab jelieet, daut ekj kaun von Menschen wajchgonen, dee mie veuasoaken, ooda de Sach to Enj brinjen, ea dee noch oaja woat. Väl Menschen, un mau rajcht miene Fru, haben mie sea doafäa jeloft, woo ekj aun dise Sachen naunjinkj. Ekj wia mau rajcht äwa mie selfst vewundat! Daut kunn ekj nich ut mie selfst, oba daut es een Bewies, daut de Schreft Menschen endren kaun.”

13. Waut woat ons halpen, aun goode Wenschen to schaufen? (Galata 5:16).

¹³ Läs Galata 5:16. Jehova jeft ons wellich sienen heiljen Jeist, om ons to halpen, daut rajchte to doonen. Wan wie Gott sien Wuat studieren, dan lot wie sienen heiljen Jeist en ons wirkjen. Wie kjrieen uk disen Jeist, wan wie bie de Toopkomes sent. En dise Toopkomes sent wie met Breeda un Sestren toop, waut krakjt soo aus wie sea doaropp schaufen, daut rajchte to doonen, un daut muntat ons opp (Heb. 10:24-25; 13:7). Wan wie iernstlich to Jehova bäden un am doano froagen, ons met onse Schwakheiten to halpen, woat hee ons sienen heiljen Jeist jäwen un ons stoakjen, daut wie wieda doajäajen schaufen kjennen. Wan derch aul dise Sachen de schlajchte Wenschen uk nich woaren veschwinjen, woat ons daut oba halpen, daut nich to doonen, waut wie ons wenschen. Soo aus Galata 5:16 sajcht, woaren dee, waut em Jeist waundlen, “daut nich doonen, wuano daut Fleesch jelesten deit”.

14. Wuarom es daut needich, daut wie wieda no goode Wenschen hanoabeiden?

¹⁴ Wan wie daut aul bat doa haben, daut wie goode jeistelje Jewanheiten haben, dan es daut sea wichtich, daut wie dee hoolen, un daut wie wieda opp goode Wenschen hanoabeiden. Wuarom? Wiels eena von onse Fiend schlapt kjeenmol. Dis Fient es de Vesieekjunk, waut schlajchtet to doonen. Mau rajcht no onse Doop intressieet ons veleicht waut, waut wie sellen utem Stich gonen. Daut kaun sennen opp Jelt spälen, too väl Stoakjet drinkjen ooda  schwiensche Bilda kjikjen (Efs. 5:3-4). Een junga Brooda sajcht: “Wua ekj daut dolste met kjamfen mott, es, daut mie Mana intressieren. Ekj docht emma, daut dise Jefeelen met de Tiet wudden wajchgonen, oba dee ploagen mie noch emma.” Waut kaun die halpen, wan een schlajchta Wensch sea stoakj es?

15. Wuarom stoakjt ons daut to weeten, daut daut gaunz jeweenlich es, daut Menschen schlajchte Wenschen haben? (See daut Bilt.)

¹⁵ Wan du jäajen een Velangen schaufst, waut sea stoakj es, dan denkj doaraun, daut du nich de eensja best, wiels de Schreft sajcht: “Bat nu haben junt noch mau menschlich bekaunde Vesieekjungen jetroffen” (1. Kor. 10:13a). Dit wia fa de Christen en Korint jeschräwen. Eenje von dee wieren ea Huara, Homoseksuelle un Drinkja jewast (1. Kor. 6:9-11). Jleefst du, daut dee no äare Doop nich mea met schlajchte Wenschen to kjamfen hauden? Oba secha hauden dee noch mol jäajen schlajchte Wenschen to kjamfen! Daut wieren je aules onvolkomne Menschen, wan daut uk true, jesaulwde Christen wieren. Daut wudd ons sellen Moot jäwen. Wuarom? Wiels daut wiest, wautemma du fa schlajchte Wenschen hast, wua du jäajen kjamfst, daut haft aul wäa äwakomen! Soo, jieda eena kaun staunthauft bliewen “met fausten Gloowen, un denkjt doaraun, daut june Breeda äwa de gaunze Welt, derch deeselwje liedens Erfoarungen gonen motten” (1. Pet. 5:9).

16. Waut fa eene Jefoa sull wie utem Stich gonen, un wuarom?

¹⁶ Denkj kjeenmol, daut kjeena die vestonen kaun, waut fa schwoaret du derchmoakst. Daut kaun mau rajcht jefäadlich sennen! Opp dee Wajch to denkjen kaun die bat doa brinjen, daut du selfst jleefst, daut du kjeene Hopninj hast un daut du nich de Krauft hast, jäajen schlajchte Wenschen to schaufen. De Bibel sajcht waut aundret: “Gott es tru, un hee woat daut  nich tooloten, daut jie schwanda vesocht woaren, aus jie Krauft haben. Hee woat fa eenen Wajch sorjen, ut de Vesieekjunk rut to komen, soo daut jie daut vedroagen kjennen” (1. Kor. 10:13b). Doawäajen: Wan een orrajchta Wensch uk stoakj es, wie kjennen dän jewennen. Met Jehova siene Help kjenn wie daut wadastonen, waut schlajchtet to doonen.

17. Wan wie daut uk nich väabieejen kjennen, daut schlajchte Wenschen en ons oppkomen, waut kjenn wie oba wadastonen?

¹⁷ Hool emma dit em Denkj: Aus onvolkomne Menschen kjenn wie daut nich väabieejen, daut schlajchte Wenschen en ons oppkomen. Oba wan daut deit, dan kjenn wie dee wadastonen, soo aus Josef deed, aus hee fuaz von Potifar siene Fru wajchrand (1. Mo. 39:12). Du brukst de schlajchte Wenschen nich nogonen!

18-19. Äwa waut kjenn wie nodenkjen, wan wie doaraun schaufen, eene niee Enstalunk to kjrieen?

¹⁸ Eene niee Enstalunk to kjrieen meent, daut wie ons wieda aunstrenjen, soo to denkjen un soone Enstalunk to kjrieen, waut Jehova jefelt. Doawäajen wudd wie ons selfst sellen unjasieekjen un äwa nodenkjen: “Wiesen miene Woakjen, daut ekj enseenen kaun, en waut fa eene Tiet wie läwen? Kom ekj doabie veraun, eene niee Natua to kjrieen? Lot ekj mie von Jehova sienen Jeist leiden, soo daut ekj daut wadastonen kaun, schlajchte Wenschen notogonen?”

¹⁹ Wan du die unjasieekjst, dan kjikj doano, daut du veraunkjemst un nich, daut du volkomen woascht. Wan du enwoaren motst, daut du die en waut vebätren motst, dan woa nich mootloos. Komm leewa dän Rot ut Filippa 3:16 (NW) no: “Krakjt endoont woo wiet wie aul sent veraunjekomen, well wie doawäajen ordentlich wieda opp dänselwjen Wajch gonen.” Wan du doaraun schaufst, eene niee Enstalunk to kjrieen, dan kaust du die secha sennen, daut Jehova diene Aunstrenjunk säajnen woat.