1-2. Wat nao iumi mas gohed duim bihaen iumi baptaes? Explainim.

 TINGIM hao iumi savve klinim olowe haos blo iumi. Maet firstaem iumi muv in lo haos, iumi barava klinim gud. Bat hao sapos iumi klinim lo datfala taem nomoa and iumi no klinim moa enitaem bihaen? Iumi savve, kwiktaem nomoa bae haos hem dirty moa. So for keepim haos klin and tidy, iumi need for klinim olowe.

² Iumi mas gohed waka hard tu for duim sem samting witim tingting and wei blo iumi. Bifor iumi baptaes, iumi waka hard for mekem samfala change lo laef wea iumi need for duim for mekem iumi klin lo ‘body and tingting blo iumi.’ (2 Cor. 7:1) And tu, iumi mas obeyim kaonsel blo aposol Paul for “gohed . . . garem wanfala niu tingting.” (Eph. 4:23) Why nao iumi need for duim datwan? Bikos nogud wei blo disfala world savve kwiktaem for mekem iumi no klin front lo Jehovah. For mekem Jehovah hapi lo iumi, iumi mas gohed chekim gud tingting, wei, and feeling blo iumi.

3. Wat nao hem minim for “changem tingting” blo iumi? (Rome 12:2)

³ Wat nao iumi need for duim for changem tingting blo iumi? (Readim Rome 12:2.) Lo Greek languis, nara wei for talem datfala toktok “changem tingting” hem for “renovatim  tingting blo iu.” For renovatim wanfala samting hem no minim for decoratem nomoa. So for changem tingting, hem no minim for just duim samfala gud samting nomoa. Bat iumi mas lukluk gud lo iumiseleva and changem eni samting wea iumi need for changem, for fitim olketa standard blo Jehovah. So iumi shud gohed for duim diswan evritaem, no wanfala taem nomoa.

4. Wat nao iumi need for duim for no letem wei blo disfala nogud world for affectim iumi?

⁴ Taem iumi kamap perfect, iumi bae fit for duim evri samting wea Jehovah hapi lo hem. Bat distaem, iumi need for gohed waka hard for duim datwan. Tingim, lo Rome 12:2 Paul sei iumi mas changem tingting blo iumi mekem iumi luksavve lo wanem God laekem iumi for duim. So for iumi no letem wei blo disfala nogud world for affectim iumi, iumi mas lukluk gud lo iumiseleva for luksavve sapos iumi followim tingting blo God or tingting blo world taem iumi markem olketa goal and mekem olketa disison.

5. Taem iumi tingim hao day blo Jehovah hem klosap, why nao hem gud for lukluk gud lo iumiseleva? (Lukim piksa.)

⁵ Tingim disfala example. Jehovah laekem iumi for “tingim evritaem datfala day bilong [Hem].” (2 Pet. 3:12) Hem gud for each wan lo iumi tingim olketa kwestin hia: ‘Waswe, laef blo mi showimaot mi luksavve hao end blo disfala world hem klosap? Waswe, disison blo mi abaotem waka for selen or for go lo university showimaot worship blo mi for Jehovah nao barava important lo laef blo mi? Waswe, mi trustim Jehovah for provaedem need blo mi and famili, or mi wari evritaem abaotem olketa material samting?’ Tingim, Jehovah hapi tumas taem  iumi traem best for duim evri samting wea fitim wanem hem laekem.​—Matt. 6:25-27, 33; Phil. 4:12, 13.

6. Wat nao iumi need for gohed duim?

⁶ Iumi need for chekim evritaem tingting blo iumi mekem iumi luksavve sapos iumi need for changem samting lo laef blo iumi. Paul sei: “Gohed for lukluk gud long iufala seleva for savve sapos iufala followim yet olketa tru teaching.” (2 Cor. 13:5) For followim “olketa tru teaching,” iumi need for evritaem attendim meeting and for duim preaching waka. Bat important samting nao, hem wanem iumi tingting abaotem, feeling blo iumi, and reason why iumi duim samting. So for gohed changem tingting blo iumi, iumi need for readim Bible for savve hao Jehovah ting abaotem samting, and then traem best blo iumi for duim samting wea hem hapi lo hem.​—1 Cor. 2:14-16.

7. Olsem Ephesus 4:31, 32 storyim, wat nao iumi need for duim, and why nao maet datwan hem no isi?

⁷ Readim Ephesus 4:31, 32. Nara samting wea iumi need for duim, hem for “garem niufala wei.” (Eph. 4:24) Diswan minim iumi mas duim samting. Iumi mas waka hard for changem samfala nogud wei blo iumi olsem for feel nogud, laek pei bak, and for kros. Diswan hem no isi bikos iumi evriwan savve faendem hem barava hard for changem samfala nogud wei blo iumi. For example, Bible sei samfala pipol olketa “man fo kros.” (Provebs 29:22, SIPB) Samfala wea garem olketa wei olsem bae need for gohed traem best blo olketa for change nomata bihaen olketa baptaes, olsem experience lo next paragraf showimaot.

8-9. Hao nao example blo Stephen showimaot iumi need for waka hard for lusim old wei blo iumi?

⁸ Wanfala brata wea nem blo hem Stephen faendem hard for kontrolem kros blo hem. Hem sei: “Nomata bihaen mi baptaes, mi gohed traem best for kontrolem kros blo mi. For example, wantaem wea mifala go preaching, mi ronem wanfala man wea stealim radio lo car blo mi. Taem mi klosap kasem hem, hem dropim datfala radio and ranawe. Mi storyim lo olketa narawan hao mi tekem bak datfala radio, and wanfala elder wea mifala preach tugeta sei lo mi, ‘Stephen, if iu ran and kasem hem, wat nao bae iu duim?’ Datfala kwestin mekem mi for luksavve hao mi need for change and for kontrolem wei blo mi for kros.” b

⁹ Example blo Stephen showimaot hao nomata iumi tingse iumi lusim finis wanfala nogud wei blo iumi, seknomoa iumi savve foldaon moa lo datfala old wei. If datwan happen lo iu, no discourage and tingse iu wanfala nogud Christian. Nomata aposol Paul tu sei: “Taem mi laek duim samting wea stret, tingting for duim samting wea nogud tu hem stap.” (Rome 7:21-23) Olsem haos wea savve kwiktaem dirty moa sapos iumi no klinim, olketa nogud wei blo iumi tu savve kam bak moa bikos iumi no perfect. So iumi need for waka hard for gohed garem gudfala wei. Hao nao iumi savve duim datwan?

10. Wat nao iumi savve duim for lusim eni nogud wei blo iumi? (1 John 5:14, 15)

¹⁰ Prea lo Jehovah abaotem eni nogud wei wea iumi stragol for lusim, and iumi sure Jehovah bae herem and helpem iumi. (Readim 1 John 5:14, 15.) Jehovah bae no duim mirakol for iumi, bat bae hem  strongim iumi for no foldaon moa lo wanfala old wei blo iumi. (1 Pet. 5:10) So duim samting followim prea blo iumi and stay aot from eni samting wea bae mekem iumi foldaon moa lo datfala old wei. For example, careful lo olketa movie, television program, or olketa buk wea mekhae lo olketa nogud wei wea iumi traem best for lusim. And no tingting abaotem olketa samting wea no stret.​—Phil. 4:8; Col. 3:2.

11. Wat nao iumi savve duim for gohed garem niufala wei?

¹¹ Nomata iumi lusim old wei blo iumi, hem important for gohed garem niufala wei. Hao nao iumi savve duim datwan? Taem iumi lane abaotem olketa wei blo Jehovah, traem best for followim example blo hem. (Eph. 5:1, 2) For example, taem iu readim wanfala story lo Bible abaotem forgiveness blo Jehovah, tingim diswan, ‘Waswe, mi forgivim olketa narawan?’ Taem iumi readim lo Bible hao Jehovah kaen lo pipol wea poor, tingim diswan, ‘Waswe, mi followim example blo Jehovah for kaen lo olketa brata and sista wea garem need, and mi showimaot datwan lo wanem mi duim?’ Gohed for changem tingting blo iumi taem iumi gohed for garem niufala wei, and patient taem iumi duim olsem.

12. Hao nao Bible helpem Stephen for change?

¹² Stephen, wea iumi storyim finis, hem isisi lusim old wei blo hem and garem niufala wei. Hem sei: “Bihaen mi baptaes, mi feisim samfala situation wea mi mas kontrolem kros blo mi. Taem samwan trae for mekem mi kros, mi luksavve mi mas go from hem or duim samting for mekem situation for no kamap worse. Waef blo mi and olketa narawan savve praisem mi bikos mi duim stret samting lo olketa taem hia. Mi bat sapraes lo miseleva tu! Nomata olsem, mi luksavve paoa wea Bible garem nao hem changem mi.”

13. Wat nao bae helpem iumi for faet againstim feeling for laek duim samting wea no stret? (Galatia 5:16)

¹³ Readim Galatia 5:16. Jehovah givim holy spirit blo hem for strongim iumi for duim stret samting. Taem iumi studyim Bible, iumi letem holy spirit for leadim iumi. Taem iumi attendim meeting, iumi savve kasem holy spirit, and iumi savve associate witim olketa brata and sista wea waka hard tu for duim stret samting. Datwan savve barava encouragem iumi. (Heb. 10:24, 25; 13:7) Taem iumi prea lo Jehovah from heart for helpem iumi witim wanfala wik point, hem bae givim holy spirit for strongim iumi for no givap. Hem tru, feeling for laek duim samting wea no stret bae no finis, bat for studyim Bible, attendim meeting and for prea savve helpem iumi for faet againstim olketa feeling hia. Olsem Galatia 5:16 sei, ‘olketa wea gohed followim spirit bae olketa no duim eni nogud samting.’

14. Why nao hem important for iumi strong for duim stret samting?

¹⁴ If iumi garem wanfala schedule for duim olketa spiritual samting, hem important for gohed followim datfala schedule and strong for duim stret samting. Why nao olsem? Bikos wanfala enemy hem no stop for faet againstim iumi. Datfala enemy nao hem temptation for laek duim samting wea no stret. For example, nomata bihaen iumi baptaes, maet iumi still laek for gambol, drinkim tumas alcohol, or for lukluk lo pornography. (Eph. 5:3, 4) Wanfala young brata sei: “Wanfala samting wea mi barava stragol witim,  hem feeling for laekem olketa man. Mi tingse gogo bae mi lusim datfala feeling, bat mi still stragol yet witim.” Wat nao savve helpem iumi if iumi garem strong feeling for duim samting wea no stret?

15. Taem iumi savve olketa narawan tu stragol witim feeling for laek duim samting wea no stret, why nao datwan encouragem iumi? (Lukim piksa.)

¹⁵ If iu faendem hard for kontrolem feeling for laek duim samting wea no stret, hem no iuseleva nomoa feel olsem. Bible sei: “Eni samting wea switim iufala for duim samting wea no stret hem kasem olketa nara man tu.” (1 Cor. 10:13a) Nara Bible transleison transleitim datfala verse olsem: “Eni temptation wea kasem iufala, hem semkaen temptation wea savve kasem eni human being.” Paul talem datfala toktok for olketa Christian lo Corinth. Bifor olketa baptaes, samfala lo olketa duim adultery, homosexual, and savve drunk tumas. (1 Cor. 6:9-11) Hao, iu tingse bihaen olketa baptaes, no enitaem bae olketa garem feeling nao for duim samting wea no stret? Nomoa. Hem tru, evriwan anointed Christian, bat olketa man nomoa wea no perfect. So olketa stragol tu samfala taem witim feeling for laek duim samting wea no stret. Datwan encouragem iumi bikos diswan showimaot if iumi stragol witim wanfala wik point, samwan winim finis datfala wik point. Tru nao, iumi savve ‘garem strongfala faith, from iumi savve olketa brata bilong iumi evriwea long world tu safa long olketa sem samting wea iumi safa long hem.’​—1 Pet. 5:9.

16. Wat kaen tingting nao iumi shud no garem, and why nao olsem?

¹⁶ If iumi feisim eni challenge, no tingse no eniwan minim datwan. Kaen tingting olsem savve mekem iumi for tingse iumi no wei nao and hem hard nao for iumi winim datwan. Bat Bible sei: “God hem  keepim olketa promis bilong hem and hem bae no letem samting for switim iufala wea iufala no fit for winim. Bae hem helpem iufala for winim datwan mekem iufala no givap.” (1 Cor. 10:13b) So nomata iumi stragol witim feeling for laek duim samting wea no stret, iumi savve winim datwan, bikos witim help blo Jehovah, iumi bae no duim samting wea no stret.

17. Nomata feeling for laek duim samting wea no stret savve kamap, wat nao iumi savve duim?

¹⁷ Tingim diswan: From iumi no perfect, feeling for laek duim samting wea no stret savve kamap samfala taem. Bat taem datwan happen, iumi savve kwiktaem rejectim datfala feeling, olsem Joseph wea stretawe ranawe from waef blo Potiphar. (Gen. 39:12) Iumi no need for followim datfala feeling for duim wanem hem no stret!

18-19. Taem iumi gohed waka hard for changem tingting blo iumi, wat nao samfala kwestin wea iumi savve ting raonem?

¹⁸ Iumi need for gohed waka hard for changem tingting blo iumi and for duim samting wea Jehovah hapi lo hem. So iumi shud lukluk gud lo iumiseleva and ting raonem diswan: ‘Waswe, wanem mi duim showimaot mi luksavve end hem klosap? Waswe, mi waka hard for garem niufala wei? Waswe, mi letem holy spirit blo Jehovah for leadim mi mekem mi no followim feeling for laek duim samting wea no stret?’

¹⁹ So taem iumi lukluk gud lo iumiseleva, no expectim for iumi perfect lo evri samting bat hapi lo olketa samting wea iumi impruv lo hem. If iumi luksavve iumi need for impruv lo samfala samting, no discourage. Bat followim Philippi 3:16 wea sei: “Nomata iumi kamap strong finis, iumi mas gohed for followim sem wei wea iumi followim kam kasem distaem.” Taem iumi duim olsem, iumi sure Jehovah bae blessim iumi taem iumi gohed waka hard for changem tingting blo iumi.