1-2. Ke ku no dibi di kontinua fasi dipus di batismu? Bu pudi splika.

 KANTU bias ku bu ta limpa bu kau? Talves purmeru bias ku bu munda pa la, bu limpal diritu. Ma ke ku na kontisi si bu ka limpal mas? Suma ku bu sibi, puera ku susidadi ta toma konta di kau rapidu. Pa pudi manti bu kau na un bon kondison, bu dibi di limpal sempri.

² No dibi di kontinua tambi kuriẑi no pensamentu ku no manera di pensa. Na bardadi, antis di no batisa, no fasi sforsu garandi pa fasi mudansas ki pirsis na vida pa “limpa di tudu susidadi di kurpu ku di spiritu”. (2 Kor 7:​1) Ma, no pirsisa di obdisi konsiju di apostolu Paulu di kontinua sedu “arnobadu”. (Ef 4:23) Pabia ku no pirsisa di kontinua kuriẑi no kabesa? Pabia puera ku susidadi des mundu pudi toma konta di nos rapidu. Pa pudi kontinua kontenta Jeova, no dibi di jubi sempri no manera di pensa, no manera di sedu ku no diseẑus.

3. Ke ku ‘arnoba bu pensamentu’ signifika? (Romanus 12:​2)

³ Ke ku no pirsisa di fasi pa arnoba no pensamentu, ku sedu, muda no manera di pensa? (Lei Romanus 12:​2.)  Arnoba un kusa i mas di ki so fasi mudansas pa fora. Pur isemplu, dikora un kasa ka signifika arnobal. Di mesmu manera, dikora no vida so ku un bokadu di bon tarbajus ka signifika di kuma no arnoba no pensamentu. Pa fasi es, no dibi jubi kal tipu di algin ku no sedu pa dentru, i fasi kualker mudansas ki pirsis na no vida, pa pudi fasi tudu ku no pudi pa obdisi normas di Jeova. No ka dibi di fasi es so un bias, ma no dibi di kontinua fasil.

4. Kuma ku no pudi ivita pa no pensamentu ka lebanu na fasi kusas suma ku mundu ta fasi?

⁴ Ora ku no sedu perfeitu, no na konsigi sempri kontenta Jeova na tudu ke ku no na fasi. Nkuantu ki dia ka ciga, no pirsisa di sforsa ciu pa kontenta Jeova. Nota kuma na Romanus 12:​2, Paulu fala di kuma, no pirsisa di arnoba no pensamentu pa pudi sibi ke ku Deus misti pa no fasi. En ves di disa pa es mundu mau influensianu, purmeru no dibi di jubi no kabesa pa sibi te kal pontu ku no sta na disa pa pensamentu di Deus influensia no objetivus ku no disisons.

5. Kuma ku no pudi jubi no manera di pensa aserka di dia di Jeova ku sta pertu? (Jubi foto.)

⁵ Jubi un isemplu. Jeova misti pa no “fasi forsa pa ki dia ciga dipresa”. (2 Ped 3:12) Punta bu kabesa: ‘Sera ki ña manera di pensa ta mostra di ki N ntindi di kuma, es mundu mau pertu kaba? Sera ki ña disisons aserka di bai universidadi o aserka di kal tarbaju ku N na fasi ta mostra di kuma, sirbi Jeova i kusa mas importanti na ña vida? Sera ki N tene fe di kuma Jeova na kuida di mi ku ña familia, o sera ki N ta preokupa ciu ku kusas material?’ Jeova ta  ­kontenti dimas di ojanu tenta fasi si vontadi na tudu ku no ta fasi. — Mat 6:​25-​27, 33; Fil 4:​12, 13.

6. Ke ku no pirsisa di kontinua fasi?

⁶ No pirsisa di jubi sempri no pensamentu i dipus fasi kualker mudansas ki pirsis. Paulu fala sin pa Koríntius: “Bo jubi bo kabesa, bo julga si bo na vivi na fe inda.” (2 Kor 13:​5) “Vivi na fe” signifika di kuma no pirsisa di fasi mas di ki so mati runions i prega di un tempu pa utru. I ta nvolvi tambi no pensamentu, no diseẑus ku no motivasons. Pa kila, no pirsisa di kontinua arnoba no pensamentu ora ku no na lei Palabra di Deus, aprindi pensa suma el i dipus fasi kualker kusa ki pirsis pa kontenta Jeova. — 1 Kor 2:​14-16.

7. Di akordu ku Efésius 4:​31, 32, ke mas ku no pirsisa di fasi, i pabia ki pudi sedu difisil?

⁷ Lei Efésius 4:​31, 32. Utru mudansa importanti ku no pirsisa di fasi i “bisti nobu naturesa”. (Ef 4:24) No pirsisa di manga di sforsu pa fasil. Entri utrus kusas, no dibi di sforsa ciu pa disa mau mañas suma, amargura, brabesa ku raiba. Pabia ki pudi sedu difisil? Pabia i pudi sedu difisil dimas muda alguns mañas. Pur isemplu, Biblia fala kuma ‘korson di omi ta jingi sempri pa mal, disna di si mininesa.’ (Kum 8:21) Algin ku tene mau mañas na pirsisa di kontinua sforsa ciu pa fasi mudansas mesmu dipus ki batisa. I es ku no na bin oja nes spriensia.

8-9. Kuma ku spiriensia di Stephen mostra di kuma no pirsisa di pui di ladu naturesa antigu?

⁸ Un ermon comadu Stephen teneba purblema di kontrola si raiba. I fala sin: “Mesmu dipus ku N batisa, N pirsisaba di kontinua kontrola ña raiba. Pur isemplu, oca N staba na prega di kasa pa kasa, N serka un ladron ku kaba di furta radiu di ña karu. Oca ku N pertu el, i larga radiu na con i kuri. Oca ku N konta utrus ku staba ku mi kuma ku N rekupera radiu, un ansion na grupu puntan: ‘Stephen, ke ku bu na fasiba si bu pañal?’ Es purgunta fasin pensa, i motivan kontinua fasi sforsu pa sedu algin ku ta buska pas.” b

⁹ Isemplu di Stephen mostranu di kuma, mau mañas pudi riba di repenti, mesmu dipus ku no pensa di kuma no kontrolal ja. Si kila kontisi, ka bu disanima i pensa di kuma bu sedu mau kriston. Te mesmu apostolu Paulu fala sin: “Nin ku N misti fasi ben, mal sta na mi.” (Rom 7:​21-​23) Tudu kristons imperfeitu tene mau mañas ku ta kontinua riba, suma puera ku susidadi ku ta toma konta di no kasa. No pirsisa di kontinua sforsa pa manti limpu. Kuma ku no pudi fasil?

10. Kuma ku no pudi luta kontra mau mañas? (1 Jon 5:​14, 15)

¹⁰ Ora Jeova aserka di mañas ki difisil muda, ku konfiansa di kuma i na obiu i judau. (Lei 1 Jon 5:​14, 15.) Jeova ka na fasi milagri pa kaba ku ki maña, ma i da dau forsa pa bu ka tene mas ki mau maña. (1 Ped 5:​10) Na mesmu tempu, sforsa pa vivi di akordu ku bu orason, pa ka fasi kusas ku pudi pui pa naturesa antigu riba mas. Pur isemplu, toma kuidadu  ku filmis ku bu na jubi, programas di televison, o storias ku bu na lei ku na mostra ki mau maña ku bu sta na tenta kaba ku el suma un kusa normal. Ka bu disa bu menti kontinua pensa na kusas ku ka bali. — Fil 4:8; Kol 3:​2.

11. Ke ku no pudi fasi pa kontinua bisti nobu naturesa?

¹¹ Bu pui ja di ladu naturesa antigu, ma mesmu asin, i importanti tene nobu naturesa. Kuma ku bu pudi fasil? Tene objetivu di kopia Jeova ora ku bu na aprindi si manera di sedu. (Ef 5:​1, 2) Pur isemplu, ora ku bu na lei testus di Biblia ku na fala di purdon di Jeova, punta bu kabesa: ‘Sera ki N ta purda utrus?’ Ora ku bu na lei aserka di pena ku Jeova ta tene pa kilis ku sedu koitadi, punta bu kabesa: ‘Sera ki N ta tene mesmu preokupason pa ña ermons ku irmas ku pirsisa di ajuda material, sera ki N ta mostra es pa ña asons?’ Kontinua arnoba bu pensamentu ora ku bu na bisti nobu naturesa, i sedu pasienti ku bu kabesa ora ku bu na fasil.

12. Kuma ku Stephen sinti puder ku Biblia tene di muda vida?

¹² Stephen, ku faladuba del na kumsada, diskubri di kuma i konsigi puku-puku bisti nobu naturesa. I fala sin: “Disna ku N batisadu, N pasaba pa situasons difisil ku puiba pa i difisil pa N kontrola ña raiba. N aprindi ivita jintis ku ta tenta provokan o para situason ku pudi pui pa kusas piora. Manga di jintis, tambi ña minjer, ngaban pa manera ku N kontinua kalmu nes situasons. Te mesmu N fika dimiradu ku ña kabesa! N ka mersi ngabadu pa es mudandas ku N fasi na ña manera di sedu. En ves di kila, N fia di kuma es ta prova di kuma, Biblia pudi muda vida di jintis.”

13. Ke ku na judanu tene bon diseẑus? (Gálatas 5:​16)

¹³ Lei Gálatas 5:16. Pa judanu vensi luta di fasi ke ki sertu, ku bondadi, Jeova danu si spiritu santu. Ora ku no studa Palabra di Deus no ta sta na disa pa spiritu di Deus influensianu. No ta risibi tambi spiritu santu ora ku no mati no runions. Na ki runions kristons, no pudi pasa tempu ku no ermons ku irmas, ku suma nos, sta na sforsa ciu pa fasi ke ki sertu, i es ta nkoraẑanu. (Eb 10:​24, 25; 13:​7) Ora ku no pertusi di Jeova na orason di tudu korson, i pidil pa i judanu vensi alguns frakesas, i na danu si spiritu santu ku na danu forsa pa kontinua luta. I pudi sedu kuma es atividadis ka na kaba ku mau diseẑus, ma mesmu asin, e na judanu risisti tentason di kai nelis. Suma ku Gálatas 5:​16 fala, kilis ku disa sedu giadu pa spiritu “ka na sigi diseẑu mau.”

14. Pabia ki importanti pa no kontinua tene bon diseẑus?

¹⁴ Ora ku no kumsa fasi kusas ku na judanu tene bon amisadi ku Jeova, i importanti pa no kontinua fasil i kontinua tene bon diseẑus. Pabia di ke? Pabia i ten un di no inimigu ku ka ta durmi. Es inimigu i tentason di fasi ke ki mau. Mesmu dipus di batismu, no pudi sinti traidu pa kusas ku no dibi di ivita, suma juga diñeru, abusu di alkol o jubi pornografia. (Ef 5:​3, 4) Un ermon joven fala sin: “Un di kusas ku mas difisil pa mi i  sinti atraidu pa algin di mesmu seksu. N pensaba kuma es sentimentu i pa un tempu, ma N kontinua inda tenel.” Ke ku pudi judau si un mau diseẑu sedu forti?

15. Pabia ku no ta sinti nkoraẑadu di sibi kuma mau diseẑus “i suma di tudu jinti”? (Jubi foto.)

¹⁵ Ora ku bu sta na luta pa kontrola un mau diseẑu ku sedu forti dimas, lembra di kuma i ka abo son ku sta na luta. Biblia fala sin: “Tudu koldadi tentason ku bin pa bos i suma di tudu jinti.” (1 Kor 10:13) Es palabras faladu pa kristons macu ku femia ku sta na vivi na Korintu. Alguns delis ta kaiba cai, seduba omoseksual i camiduris. (1 Kor 6:​9-​11) Sera ki bu pensa kuma dipus di se batismu, nunka e ciga di tene mau diseẑu? Es ka pudi sedu sin. I bardadi kuma elis tudu e sedu kristons unjidu, ma e sedu inda jintis imperfeitu. Sin duvida e dibi di luta kontra mau diseẑus di un tempu pa utru. Es dibi di nkoraẑanu. Pabia di ke? Pabia i ta mostra di kuma, kualker diseẑu mau ku bu sta na luta kontra el, bu pudi vensil. Na bardadi bu pudi kontinua manti firmi na ‘fe i lembra kuma bu ermons na pasa mesmu sufrimentu.’ — 1 Ped 5:​9.

16. Kal pirigu ku no dibi di ivita, i pabia di ke?

¹⁶ Ivita pirigu di pensa kuma ningin ka pudi ntindi frakesa ku bu sta na luta kel. Pensa des manera pudi lebau na pensa di kuma bu ka tene speransa, i di kuma bu ka tene forsa di risisti kontra mau diseẑus. I ka es ku Biblia fala. I fala sin: “Deus i fiel; i ka na disa pa bo tentadu mas di ki kil ku bo pudi ku el; na ora di tentason i ta da tambi manera di kapli, pa bo pudi nguental.” (1 Kor 10:13b) Ma, mesmu ora ku un diseẑu mau sedu  forti, no pudi kontinua manti fiel pa Jeova. Ku ajuda di Jeova, no pudi ivita fasi mal.

17. Mesmu ku no ka pudi ivita tene mau diseẑus, ma ke gora ku no pudi kontrola?

¹⁷ Lembra sempri des: Suma no sedu imperfeitu, no ka pudi ivita tene mau diseẑus. Ma, ora ku no tene mau diseẑus, no pudi ivita elis logu, suma ku José fasi oca ki kuri di minjer di Potifar. (Kum 39:12) No ka pirsisa di aẑi sugundu no mau diseẑus!

18-19. Kal purguntas ku no pudi fasi no kabesa, ora ku no sta na sforsa pa arnoba no pensamentu?

¹⁸ Arnoba no pensamentu signifika, no dibi di tene sertesa di kuma no pensamentu ku asons ta kontenta Jeova. Pa kila, no dibi di jubi no kabesa sempri i punta: ‘Sera ki N ta aẑi di un manera ku ta mostra di kuma, N rukuñisi urẑensia di tempu ku no sta na vivi nel? Sera ki N sta na fasi progresu pa bisti nobu naturesa? Sera ki N ta disa pa spiritu di Jeova orienta ña vida, asin pa N pudi risisti kontra tentason di kai na mau diseẑus?’

¹⁹ Ora ku bu na jubi bu kabesa, ka bu spera sedu perfeitu, ma sta kontenti ku progresu ku bu fasi. Si bu nota di kuma bu pirsisa di minjoria, ka bu disanima. En ves di kila, sigi konsiju di Filipensis 3:​16: “Konformi lugar ku no yangasa na vida spiritual, no bai pa dianti.” Ora ku bu fasil, tene sertesa di kuma Jeova na bensua bu sforsu di kontinua arnoba bu pensamentu.