1, 2. Bautizashgana caycarpis, ¿imatataj jinala ruraycashwan y imanir?

 WASIQUITA pichapacurga, ¿cada cadalacu ruranqui? Chaycho tiyanayquipäga shumajrächi cuchun cuchunyaj pichapacushcanqui ¿au? Ichanga ¿imaraj pasanman nircur manana pichapacuptiquega? Raslachi pisupis o chaycho ima caycashgancunapis ganratacanman. Chaura cada cadala pichapacuptinchiraj wasinchipis limpio caycanga.

² Chaynolami yarpayninchicunawan y imano cashganchiwanpis rurananchi. Manaraj bautizacurga lapanchi calpachacushcanchi cawayninchita cambianapaj, jina ‘cuerpunchitapis espiritunchitapis ganrataj’ ruraycunata jaguirishcanchi (2 Cor. 7:1). Ichanga canan apóstol Pablo consejashgantaga cäsucunanchipämi caycan, payga nergan: “Lutan yarpangayquicunata jaguiriycur ali yarpaycunatana yarpäpäcunquiman” (Efes. 4:23, AP). ¿Imanirtaj alapa ali caycan chayta ruranapaj? Öraga cuentata mana gocuptinchi cay munducho mana ali cajcuna yarpayninchita y shongunchitapis ganratanmanmi. Chaura Jehovapa ricaynincho ali cayta munarga, cada cadalami shumaj tantiarcushwan yarpayninchicuna imano caycashganta y ima munashganchipis Jehová munashgannochush caycan o manachu.

3. ¿Ima ninantaj jucnona yarpänapaj? (Romanos 12:2).

³ ¿Imatataj rurashwan jucnona yarpänapaj? (Leiriy Romanos 12:2). Cayga manami ninanchu juc ishcay ali ruraycunalata  ruranapaj cawayninchi ali cananpaj. Chaypa trucanga, shongunchicho y yarpayninchicho imano cashganchita ricacunanchi, nircur cambiucunata rurashwan Jehová munashganno cawacunapaj. Ichanga caytaga manami juc ishcay cutilatachu rurashwan, sinoga cada cadalami.

4. ¿Imatataj rurashwan cay munducho cajcuna yarpayninchita mana pantachinanpaj?

⁴ Juchaynaj captinchega, Jehovata lapancho cushichishun. Ichanga chay wichan chämunanyaj jinala calpachacuycäshun Jehovata cushichinapaj. Ricärishun imatataj apóstol Pablo niytataj munargan Romanos 12:2 textucho “jucnuyna yarpäpäcuy” y ‘Dios munashganno cawapäcuy’ niptin. Ama jaguishunchu cay munducho cajcuna pantachimänanchipaj o guelanächimänanchipäpis. Chaymi alapa ali caycan yarpachacunapaj rurayninchicuna y munashganchicunapis Jehová yarpashgannochush caycan o manachu.

5. ¿Imanopataj musyachicunchi Jehovapa juzganan junaj caylachona cashganta yarpaycashganchita? (Fotucunata ricay).

⁵ Taytalanchi Jehovaga munan alcabu caycänapaj ‘Tayta Dios juzganan junajpita’ (2 Ped. 3:12). Chaymi tapucunanchi: “¿Cawaynëcho rasunpa ricachicö tantiashgäpita cay mundupa ushacaynin caylachona caycashganta? ¿Imataj estudianäpaj o maycho arunäpaj acrashgäga ricächicun Jehovata sirvishgämi más ali cashganta? ¿Yäracö Jehová nogata y familiätapis cuidananpaj o alapa yarpachacö imaycayoj canäpaj?”. Jehovaga cushicunmi ricaptin calpachacuycashganchita pay munashganno cawanapaj (Mat. 6:25-27, 33; Filip. 4:12, 13).

6. ¿Imatataj jinala ruraycashwan?

⁶ Cada cadalami yarpachacushwan yarpayninchicuna imano cashganta y imalachopis mejoranapaj captenga jucla rurashwanmi. Corinto cristianucunata Pablo cayno  consejaycurgan: “Quiquiquicuna imanuy cangayquitapis tantiyacäriy. Rasunpa yäracäringayquita o mana yäracäringayquita yarpachracäriy” (2 Cor. 13:5, AP). ‘Rasunpa yäracushganchega’ manami ninanchu reuniuncunalaman aywanapaj o puediptinchila predicaciunman yargunapaj. Sinoga imaman yarpashganchicuna ima munashganchicunacho y rurayninchicunachopis ricacämunman. Chauraga calpachacuycäshun yarpayninchita cambianapaj, chaypäga Diospa Palabranta leinanchi, pay yarpashganno yarpar yachacushwan y corrigicushwanpis payta cushichinapaj (1 Cor. 2:14-16).

7. Efesios 4:31, 32 nishganno, ¿ima mastataj rurashwan y imanirtaj chayta ruranapäga sasami canman?

⁷ (Leiriy Efesios 4:31, 32). Yarpayninchicunata cambiashganchina captinpis calpachacushunraj “mushoj runanöna” cawanapaj (Efes. 4:24). Chayno cananpäga ama shuyarashwanchu chaycuna jinaylapita cananpaj. Tantiarinapaj, alapa calpachacushunmi unaycho imano cashganchita jaguirinapaj, chayga caycan jagayashgala mana caycänapaj, pitapis mana nanapäranapaj o jucla mana piñacunapäpis. Ichanga chaycuna noganchicho juc costumbrino captenga, öraga sasami canman jaguirinapaj. Bibliapis nin “runaga wamra cashanpita-pachami mana allita rurar goyan” (Gen. 8:21). Chauraga unaycho imano cashganchita controlanapäga bautizashgana caycarpis jinala calpachacuycäshunmi. Ricärishun waquincuna imano chayta rurashganta. 

8, 9. Stephen cristianuta pasashganga, ¿imanotaj ricächimanchi unaycho imano cashganchicunata jaguirinapäga calpachacushunraj?

⁸ Stephen jutiyoj cristianuga luchaycarganshi geniunta controlananpaj. Payga wilacun: “Bautizashgana caycaptëpis geniüta jinala controlanämi cargan. Juc junajcho wasin wasin predicarcaycaptë ricargä juc suwacoj carrüpa radiunta apacuycashganta, chaura jinan hora guepanta charinapaj aywargä. Y charircunapäna caycaptë radiuta jitarcur gueshpir aywacurgan. Chaycho caycajcunata wilaptë radiüraycur ima rurashgäta, juc pogushga cristiano cayno tapupämargan: ‘¿Imataj ruranquiman cargan payta chariptiquega?’. Pay tapupämashganga yarpächimargan calpachacunäpäraj caycashganta unay imano cashgäta jaguirinäpaj”. b

⁹ Stephen cristianuta pasashganga yarpächimanchi unay imano cashganchega yapay ilajpita yurimunmanmi, y chayga canman öraga controlashgana cashganta yarpaptinchipis. Chayno pasamaptinchega guelanäcushwanchu, ni mana ali cristiano cashganchitapis yarpashwanchu. Quiquin apóstol Pablupis nergan: “Alita rurayta munarpis mana alitami rurä” (Rom. 7:21-23). Imano juc wasita mana pichapacuptinchi tiempuwan ganratacanman, chaynolami juchasapa cashganchiraycur unaycho imano cashganchi yapay yurimunmanmi. Chaymi calpachacushunraj alita ruraj y alita yarpaj runa canapaj. ¿Chaypäga imataj yanapämäshun?

10. ¿Imatataj rurashwan unay imano cashganchiwan luchanapaj? (1 Juan 5:14, 15).

¹⁰ Mañacuyninchicho Jehovata wilashun imacunawan luchaycashganchita, payga wiyamäshunmi y yanapämäshunpis (leiriy 1 Juan 5:14, 15). Imawan luchaycashganchita Jehová jucla mana ushacächiptinpis, payga calpata gomäshun chaycuna mana vencimänanchipaj (1 Ped. 5:10). Chaycamaga mana imatapis rurashunchu guepaman cutinapaj, chaynopa  unay imano cashganchi yapay mana yurimunanpaj. Tantiarinapaj, shumaj acrashwan ima peliculacunata o televisiuncho programacunata ricänapaj o imata leinapäpis. Öraga chaycuna imawan luchaycashganchita alitanomi ricächicun, ichanga manami yanapämanchichu. Jina cuidacunanchi mana ali ruraycunaman mana yarparänapaj (Filip. 4:8; Col. 3:2).

11. ¿Imacuna rurartaj mushoj runano cawacushwan?

¹¹ Unay imano cashganchita jaguiriptinchipis, calpachacushunmi mushoj runanona cawanapaj. ¿Imanotaj chayta rurashwan? Chaypäga ali canman cada cadala Jehovata más reguinapaj, imano cashganpita yachacunapaj jina pay yarpashganno yarpänapaj (Efes. 5:1, 2). Bibliata leishganchicho Jehová perdunacoj cashganta tariptinchega, tapucushun: “¿Nogapis waquincunata perdunaycö?” nir. Jina leishganchicho nacaycajcunata Jehová cuyapar yanapashganta tarirga, tapucushun: “¿Nogapis nacaycunapaj pasashgan hermanucunapaj yarpachacö y imalawanpis yanapaycö?”. Mushoj runanona cawar yarpayninchita cambiashwan y imalatapis jucla jaguiriyta mana puedirga, quiquinchiwan pacienciacoj cananchi.

12. Stephen pasashganga, ¿imanotaj ricächimanchi Bibliaga poderyoj cashganta runacunata yanapänanpaj?

¹² Stephen cristianuga, ichic ichiclapa mushoj runanona cawacur galaycurgan, paypita 8 caj parrafucho parlashganchi. Payga nin: “Bautizacushgäpita pacha öraga sasami cargan geniüta controlanäpaj. Chaymi peliacuna caycashganpita aywacö mana jaticunapaj o imalatapis rurä rimanacuyman mana chayanapaj. Chayta ricar warmë y waquincunapis ‘alita ruraycanqui’ nimargan. Öraga nogapis almiracö cambiashgäpita, cay lapancunaga manami quiquëpitachu caycan. Sinoga cuentata gocö Bibliaga poderyoj cashganta runacunapa cawayninta cambiananpaj”.

13. ¿Imaraj yanapämäshun ali cajcunata ruranapaj? (Gálatas 5:16).

¹³ (Leiriy Gálatas 5:16). Jehová garacoj cashpanmi espiritunta gomanchi imawan luchaycashganchita vencinapaj y ali cajcunata ruranapaj. Diospa Palabranta leirga espiritun yanapämananchita jaguiycanchi. Jina reuniuncunaman aywaptinchipis espíritu santuta chasquinchi. Hermanunchicunawan parlapacurga shacyächinacunchi, paycunapis noganchino lucharcaycan ali cajcunata rurananpaj (Heb. 10:24, 25; 13:7). Jina ima debilidäcuna vencinapaj Jehovata shongupita ruwacuptinchi yanapämänanchipaj, payga espíritu santunwan calpayojyächimanchi jinala luchaycänapaj. Cay ruraycuna mana ali munayninchicunata mana ushacächiptinpis calpatami gomäshun chaycuna mana vencimänanchipaj. Bibliapis Gálatas 5:16 textucho nin: “Espíritu Santu tantiyatsishushqaykino kawapäkuy. Tsayno kawarqa manami shonquyki munashqanno jutsata rurapäkunkipaqtsu”.

14. ¿Imanirtaj alapa ali caycan mana jaguiypa calpachacunapaj munashganchicuna ali cananpaj?

¹⁴ Jehovawan ali amigo canapaj ruraycuna rurayta galaycushgana carga, chaycunata ama cacharishwanchu. Sinoga mana jaguiypa calpachacushun ali cajcunata ruranapaj. Ama gongashunchu chaycunata mana ruraptinchega ima tentaciunmanpis ishquishwanchi. Bautizashgana caycarpis capaz öraga shongunchicho munashwanmi mana ruranapaj cajcunata rurayta, chaycuna canman apuestacunapaj puclacuna, washcuta alapa upyayta o ganra ruraycunata ricayta (Efes. 5:3, 4). Juc mozularaj Jehovapa testigun  cayno nin: “Nogataga gustaman olgu masëcunami y chaywanmi pasaypa luchaycä. Yarpashgä chay pasamashgancunaga nircur ilacänanpaj, ichanga manami chaynochu cargan, jinala luchaycä”. ¿Imaraj yanapämäshun ima munashganchicuna mana ali captenga?

15. ¿Imanirtaj animamanchi waquin runacunapis mana ali munaynincunawan luchaycashganta musyar? (Fotuta ricay).

¹⁵ Mana ali munayninchicunawan luchaycarga ama yarpashwanchu japalanchi luchaycashganchita. Bibliaga nin: “Lapan pruëba pasashushqayki wakin runakunatapis pasanmi” (1 Cor. 10:13). Pablo nishganga Corinto marcacho caycaj olgu y warmi cristianucunapämi cargan. Waquincunaga runanta o warminta jarucojcuna, olgupura o warmipura cacärejcuna y borrachocunapis cashga cargan (1 Cor. 6:9-11). Paycuna bautizashgana caycarpis mayrächi luchaycargan mana ali munaynincunawan. Lapancuna cielupaj acrashga caycaptinpis juchasapa runacunaraj caycargan. Chaura paycunaga cada cadalachi luchaycarganraj mana ali munaynincunata mana rurananpaj. Paycuna imawan luchaycashganta vencishganta musyarga calpata gomanchi mana yamacaypa luchaycänapaj. Chauraga Jehová Diosman yäracuycäshun, “cay pachachöga manami nogallanchïchu ñacarcaycanchi. Waquin ermänunchicunapis ñacarcaycanmi” (1 Ped. 5:9).

16. ¿Imamantaj mana yarpashwanchu y imanir?

¹⁶ Imaypis ama nishwanchu ‘pipis tantiamangachu imawan luchaycashgätaga’ nir. Chayga pasaypa mana ali canman. Pipis chayno yarpaptenga öraga imawan luchaycashganpita yamacäcunmanmi y debilidäninta vencinanpaj lapan rurashganga yangala cashganta yarpanman. Ichanga Bibliaga cayno nin: “[Diosga] musyanmi maycamala awantänayquipag cagtapis. Ichanga juchäcuyman manaräpis chrayaptiquim Tayta Diosninchi yanapäshunqui juchäcunayquipag caycagpita yargunayquipag. Chaynuy yanapäshuptiqui  awantäpäcunqui” (1 Cor. 10:13, AP). Chauraga mana ali munayninchicuna pasaypa dominamänanchita munaptinpis, Jehovata cäsucuyta puedinchimi. Yanapacuyninwanga lapan mana ali munayninchicunata vencishwanmi.

17. Mana ali munayninchicuna yurimuptenga, ¿imatataj rurashwan?

¹⁷ Ama gongashunchu juchasapa cashganchiraycur mana ali munayninchicuna öraga yurimunmanmi. Chayno pasaptenga, imanomi José Potifarpa warminpita jucla gueshpicur aywacurgan chaynolami shongunchipita o yarpayninchipitapis mana ali munayninchicunata jucla jorgurishwan (Gén. 39:12). Ama jaguishunchu mana ali munayninchicuna dominamänanchipaj.

18, 19. ¿Ima tapucuycunatataj ruracunanchi yarpayninchita cambianapaj?

¹⁸ Cananga yachacushganchi “jucnona yarpapäcuy” Biblia niptenga, ninan calpachacunapaj imaman yarpashganchicuna y rurayninchicunapis Jehovata cushichinapaj. Chaymi ali canman cayno tapucuycunata ruracunanchipaj: “¿Ruraynëcunacho ricacämun cay mundupa ushacaynin caylachona caycashganta musyashgäta? ¿Calpachacuycäcu mushoj runanona cawanapaj? ¿Jehovatachu imaypis mañacö espiritunwan yanapämänanpaj mana ali munaynëcunata mana ruranäpaj?”.

¹⁹ Cay tapucuycunata ruracurga, yarpachacushun imacunacho mejorashganchita y alapaga ama juzgacushwanchu. Imalachopis mejoranapaj caycaptenga ama guelanäcushunchu. Chaypa trucanga, calpachacushun Filipenses 3:16 nishganta ruranapaj, chaycho nin: “Tayta Dios munangannuy cawayta yachracunganchinuy cawashun” (AP). Chayta ruraptinchega lapan calpachacushganchita yarpayninchita cambianapaj Jehová bendicimäshun.