1, 2. Σο πρέπει τι συνεχίνας τι κεράς σοράν κατά μπολντιπέ; Εξηγίνεν.

 ΚΑΖΟΜ συχνά καθαρίνενα τουμαρό κχερ; Μπέκιμ κάνα ακχαρντέν-τουμέν οτθέ, κερντέν-λες τι λελ-πες. Αλλά σο κα αβέλας-πες σοράν άμα κα παρατίνενας-λες; Σαρ τζανένα, η σκόνη ντα η μελ μπορίνενα τι γκιντίντιβεν σουγκό. Για τι ατσσικιαρέν ο κχερ πάκι, πρέπει τι καθαρίνεν-λες συνέχεια.

² Εκ ασακί προσπάθεια χρειαζίντιβελα τι κεράς για τι λατσσαράς συνέχεια ο τρόπος σο σκεφτίνασα ντα αμαρό χαρακτήρας. Σίγουρα, πριν τι μπολντιάς, μαρντάμ-αμέν για τι κεράς ο αλλαγές σο χρειαζίντιβενα αμαρέ ζωγιάτε για «τι καθαρίνας αμαρό νεαυτός κάθε πραγμάσταρ σο μαγαρίνελα αμαρό σώμας ντα αμαρί γκοντί». (2 Κορ. 7:1) Ακανά όμως χρειαζίντιβελα τι κεράς ι συμβουλή ι απόστολε Παυλόσκι τι “συνεχίνας τι αλλάνας”. (Εφεσ. 4:​23) Σόσκε χρειαζίντιβελα συνέχεια προσπάθεια; Επειδή η σκόνη ντα η μελ ανταλέ ντουνιάσκι μπορίνενα τι γκιντίντιβεν σουγκό αντρ’ αμέντε. Για μα τι αβέλ-πες ανταβά ντα τι ατσσάς πάκι κο γιακχά κι Ιεχωβάσκε, πρέπει τι ντικχάς συνέχεια ο τρόπος σο σκεφτίνασα, αμαρό χαρακτήρας ντα οντουλά σο μανγκάσα.

3. Σο μανγκέλα τι βακερέλ «τι τσσουβέν νεβέ πράγματα τουμαρέ γκοντιάτε»; (Ρωμαίους 12:2)

³ Σο πρέπει τι κεράς για τι τσσουβάς νεβέ πράγματα αμαρέ γκοντιάτε, δηλαδή τι αλλάνας αμαρό τρόπος σκέψης; (Διαβάνεν Ρωμαίους 12:2) Για “τι τσσουβάς νεβέ πράγματα αμαρέ γκοντιάτε”, να ερεσέλα σάντε τι ζουζίνας αμαρί ζωή χάνικ λατσσέ  πραγματέντζαρ. Πρέπει τι σκεφτίνας σο τζενέ ισινάμ μπαγιά αντρ’ αμέντε ντα τι κεράς σο-ντα αλλαγές χρειαζίντιβενα για τι ντας καν κο κανόνες κι Ιεχωβάσκε καζόμ πο λατσσές αβέλα-πες. Ανταβά πρέπει τι κεράς-λες, όχι σάντε εκ φαρ, αλλά συνέχεια.

4. Σο πρέπει τι κεράς για μα τι μουκχάς ανταλέ ντουνιάς τι επηρεάνελ αμαρό τρόπος σκέψης;

⁴ Κάνα κα ερεσάς κο σημείος τι αβάς τέλειοι, κα κεράς πάντα ο γκι ι Ιεχωβάσκο σαρέ κο πράγματα. Μέχρι αζομάν όμως, πρέπει τι μαράς-αμέν για τι κεράς-λες ανταβά. Ντικχέν ότι κο Ρωμαίους 12:2, ο Παύλος βακερέλα ότι χρειαζίντιβελα τι τσσουβάς νεβέ πράγματα αμαρέ γκοντιάτε για τι αγαβάς σο μανγκέλα ο Ιεχωβά αμένταρ τι κεράς. Αντίς τι μουκχάς ανταλέ πφιρνέ ντουνιάστε τι επηρεάνελ-αμέν, πρέπει πρώτα τι ντικχάς αμαρό νεαυτός για τι αγαβάς άμα μουκχάσα κο τρόπος σο σκεφτίνελα ο Ντεβέλ​—ντα όχι ο ντουνιάς—​τι επηρεάνελ αμαρέ στόχους ντα αποφάσεις.

5. Σαρ κα ντικχάς άμα αγαβάσα ότι ο ντιβές ι Ιεχωβάσκο ισί πασέ; (Ντικχέν ι φωτογραφία)

⁵ Ντικχέν εκ παράδειγμας. Ο Ιεχωβά μανγκέλα τι “τθεράς συνέχεια αμαρέ γκοντιάτε ο ντιβές ι Ιεχωβάσκο”. (2 Πέτρ. 3:​12) Πουτσέν-τουμέν: “Σικαβέλα ο τρόπος σο τζουβντιάβα ότι αγαβάβα καζόμ πασέ ισινάμ κο τέλος ανταλέ πφιρνέ ντουνιάσκο; Σικαβένα μο αποφάσεις σο τθερένα τι κερέν με το πανεπιστήμιος ντα ι μπουτιάσαρ ότι η υπηρεσία ι Ιεχωβάσκι ισί ο πο σημαντικός πράγμας μι ζωγιάτε; Πακιάβα ότι ο Ιεχωβά κα ντελ μάντε ντα μι φαμιλιάτε οντουλά σο χρειαζίντιβασα ή μήπως συνέχεια τσσουβάβα μι γκίστε ι υλικέ πραγματένγκε;” Σκεφτίνεν καζόμ χαιρίνελα ο Ιεχωβά κάνα ντικχέλα-αμέν τι κεράς αμαρέ ζωγιάτε οντουβά σο μανγκέλα.​—Ματθ. 6:​25-27, 33· Φιλιπ. 4:​12, 13.

6. Σο χρειαζίντιβελα τι κεράς πάντα;

⁶ Χρειαζίντιβελα τι εξετάνας μπουτ φαρ αμαρό τρόπος σκέψης ντα σοράν τι κεράς  σο-ντα αλλαγή χρειαζίντιβελα. Ο Παύλος βακερντάς κο Κορίνθιοι: «Τι δοκιμάνεν τουμαρό νεαυτός για τι ντικχέν άμα ισινέν κι πίστη· τι σικαβέν τουμαρέ νεαυτόσκε σο ισινέν». (2 Κορ. 13:5) Τι αβάς «κι πίστη» να μανγκέλα τι βακερέλ σάντε τι τζας μπάζιμα κο συναθροίσεις ντα κο έργος. Αλλά εμ οντουλά σο σκεφτίνασα, σο μανγκάσα ντα ο λόγος σο κεράσα κάτι, κα σικαβέν άμα ισινάμ κι πίστη. Άρα, χρειαζίντιβελα τι τσσουβάς νεβέ πράγματα αμαρέ γκοντιάτε καζόμ διαβάνασα ο Λάφι ι Ντεβλέσκο, σικλιάσα τι σκεφτίνας σαρ σκεφτίνελα ο Ντεβέλ ντα σοράν κεράσα σο-ντα χρειαζίντιβελα για τι αβάς αντικάς σαρ μανγκέλα ο Ιεχωβά.​—1 Κορ. 2:​14-16.

7. Σο γιαβέρ χρειαζίντιβελα τι κεράς, ντα σόσκε μπέκιμ τι αβέλ δύσκολος ανταβά, σαρ σικαβένα ο εδάφια Εφεσίους 4:​31, 32;

⁷ Διαβάνεν Εφεσίους 4:​31, 32. Εκ γιαβέρ σημαντική αλλαγή σο πρέπει τι κεράς ισί τι ιριάς «ο νεβό χαρακτήρας». (Εφεσ. 4:​24) Ανταβά να αβέλα-πες κορκορό. Πρέπει τι κεράς μπουτ μπουτί για τι νασκιαράς ο μπέτι πράγματα κατά χαρακτήρας αμαρό, σαρ ισί ο κερκιπέ σο τθεράσα κο γκι, η χολί ντα ο νεύρα. Σόσκε μπέκιμ τι αβέλ δύσκολος ανταβά; Επειδή μερικά μπέτι χούγια ασταρντέ ρίζες αντρ’ αμέντε. Για παράδειγμας, η Γραφή βακερέλα ότι ισί τζενέ σο νευριάνενα εύκολα ντα χολιάνενα. (Παρ. 29:​22) Για τι κεράς κουμάντος ο χούγια σο ασταρντέ ρίζες αντρ’ αμέντε, χρειαζίντιβελα τι συνεχίνας τι μαράς-αμέν, ατζέ-ντα σοράν κατά μπολντιπέ, σαρ σικαβέλα η εμπειρία σο ισί πο τελέ.

8, 9. Σαρ σικαβέλα η εμπειρία ι πφραλέσκι Στίβεν ότι χρειαζίντιβελα πάντα τι νασκιαράς ο πουρανό χαρακτήρας;

⁸ Εκ πφραλ, ο Στίβεν, δυσκολίντιβελας τι κερέλ κουμάντος πι χολί. Βοβ βακερέλα: «Ατζέ-ντα σοράν μι μπολντιμάσταρ, έπρεπε τι συνεχίναβ τι κεράβ κουμάντος μι χολί. Για παράδειγμας, εκ φαρ σο τζάβας κο έργος κχερ κχερέστε, κουλαντιντόμ εκχέ τσορές σο μόλις τσορντάας ο ραδιόφωνος μι κουρσάκο. Καζόμ ερεσάβας πασέ λέστε, βοβ φουρτιντάς-λες ντα νασλό. Κάνα βακερντόμ κο γιαβερά σο ισινέ μάντζαρ, σαρ λιντόμ παλάλ μο ραδιόφωνος, εκ πρεσβύτερος πουτσλάς-μαν: “Στίβεν, σο κα κερέας άμα κα ερεσαβέας-λες;” Ανταγιά ερώτηση κερντάς-μαν τι σκεφτίναβ ντα τσσιντιντάς-μαν τι συνεχίναβ τι μαράβ-μαν τι αβάβ ειρηνικός». b

⁹ Σαρ σικαβέλα μπουτ λατσσές η εμπειρία ι πφραλέσκι Στίβεν, εκ μπέτι χούι σο τθεράσα μπέκιμ τι νικιόλ οτθέ σο να μπεκλεντίνασα-λες, ατζέ-ντα άμα αμντίνασα ότι κερντάμ-λες κουμάντος. Άμα κα αβέλ-πες τουμένγκε ανταβά, μα χασαρέν τουμαρί ζορ ντα μα αμντίνεν ότι να ισινέν λατσσό Χριστιανός. Ατζέ-ντα ο απόστολος Παύλος βακερντάς: «Κάνα μανγκάβα τι κεράβ ο σωστός, ο κακός ισί ανγκλά-μάντε». (Ρωμ. 7:​21-23) Σαρέ ο ατελείς Χριστιανοί πρέπει τι κερέν κουμάντος πουμαρέ μπέτι χούγια σο αβένα πάλι ντα πάλι, σαρ ισί η σκόνη ντα η μελ σο γκιντίντιβενα αμαρέ κχερέστε. Χρειαζίντιβελα μα τι τσσιναβάς τι μαράς-αμέν για τι ατσσάς πάκι. Σαρ μπορίνασα τι κεράς-λες ανταβά;

10. Σαρ μπορίνασα τι κεράς κουμάντος ο μπέτι χούγια; (1 Ιωάννη 5:​14, 15)

¹⁰ Προσευχίντιβεν κο Ιεχωβά οντουλέσκε σο δυσκολίντιβενα τι νασκιαρέν ντα τι αβέν σίγουροι ότι βοβ κα ασουνέλ-τουμέν ντα κα βοηθίνελ-τουμέν. (Διαβάνεν 1 Ιωάννη 5:​14, 15) Παρόλο σο ο Ιεχωβά να κα νασκιαρέλ εκχέ θαυμάσαρ ανταβά χούι, κα ντελ-τουμέν ι ζορ για τι νακχαβέν ανταβά μπέτι χούι σο ισί αντρέ τουμέντε. (1 Πέτρ. 5:​10)  Αλλά να ερεσέλα ανταβά, πρέπει τουμέν-ντα τι κερέν πράγματα σο συμφωνίνενα τουμαρέ προσευχιέντζαρ, δηλαδή μα τι κερέν κάτι σο κα τζανγκαβέλ τουμαρό πουρανό χαρακτήρας. Για παράδειγμας, υπαρχίντιβενα πράγματα σο μαρένα-τουμέν τι νασκιαρέν. Τι προσοχίνεν ο σιναμάδες, ο πράγματα σο ντικχένα κι τηλεόραση ή διαβάνενα, σο σικαβένα ότι ισί σωστός τι κερέν ανταλά γκεραλέ πράγματα. Ντα μα μουκχέν τουμαρί γκοντί τι ατσσόλ κο μπέτι πράγματα σο μανγκένα.​—Φιλιπ. 4:8· Κολ. 3:2.

11. Σο μπορίνασα τι κεράς για τι ιριάς ο νεβό χαρακτήρας;

¹¹ Παρόλο σο νασκιαρντέν ο πουρανό χαρακτήρας, ισί σημαντικός τι κερέν μπουτί για τι τθερέν ο νεβό. Σαρ μπορίνενα τι κερέν-λες ανταβά; Τσσουβέν στόχος τι μοιάζεν κο Ιεχωβά καζόμ σικλιόνα ο ιδιότητες λέσκε. (Εφεσ. 5:1, 2) Για παράδειγμας, κάνα διαβάνενα εκ ιστορία κατά Γραφή σο σικαβέλα ότι ο Ιεχωβά συγχωρίνελα, πουτσέν-τουμέν: “Με συγχωρίναβα ι γιαβερέν;” Κάνα διαβάνενα ότι ο Ιεχωβά αγαβέλα ι ντουκχ οντουλένγκι σο τθερένα προβλήματα ι λοβέντζαρ, πουτσέν-τουμέν: “Πφαμπάβα με-ντα αντικάς μι πφραλένγκε σο τθερένα ανάγκη, ντα σικαβάβα-λες ανταβά οντουλέντζαρ σο κεράβα;” Για τι τσσουβέν νεβέ πράγματα τουμαρέ γκοντιάτε, ιρίν ο νεβό χαρακτήρας, ντα κερέν υπομονή τουμαρέ νεαυτόσαρ καζόμ κερένα ανταγιά προσπάθεια.

12. Σαρ αγαντάς ο Στίβεν ότι η Γραφή τθερέλα ι ζορ τι αλλάνελ ι τζενέν;

¹² Ο Στίβεν μπορισάλο χάνικ χάνικ τι ιρίλ ο νεβό χαρακτήρας. Βοβ βακερέλα: «Οτθάρ μπερί σο μπολντιλόμ, μπουτ φαρ αβιλέ-πες πράγματα σο δυσκολιντέ-μαν τι κεράβ κουμάντος μι χολί. Σικλιλόμ είτε τι νασάβ οντουλένταρ σο προσπαθίνενα τι χολιασκιαρέν-μαν είτε τι ηρεμίναβ ο πράγματα γιαβερέ τροπόντζαρ. Μπουτ τζενέ, ντα αντρέ ανταλέντε μι ρομνί-ντα, ισαρντέ-μαν σο συμπεριφερισάλομ αντικάς. Με-ντα ατσσιλόμ πουταρντέ μόσαρ! Να αξίναβα με ο ισαριπέ για το αλλαγές σο κερντόμ. Οκιά μπάνταρ, πακιάβα ότι ανταλά αλλαγές σικαβένα ι ζορ σο τθερέλα η Γραφή τι αλλάνελ ι τζενέν».

13. Σο κα βοηθίνελ-αμέν τι μανγκάς ο σωστά πράγματα; (Γαλάτες 5:16)

¹³ Διαβάνεν Γαλάτες 5:​16. Καζόμ προσπαθίνασα τι κεράς ο σωστός ισί σαρ τι αβάς εκχέ τζενγκίστε, ντα ο Ιεχωβά ντέλα-αμέν πο άγιος πνεύμας για τι βοηθίνελ-αμέν τι νικίνας. Κάνα σικλιαράσα-αμέν λέσκε Λαφίσταρ, μουκχάσα ι Ντεβλέσκο πνεύμας τι επηρεάνελ-αμέν. Επίσης, λάσα άγιος πνεύμας κάνα τζάσα αμαρέ συναθροισιέντε. Οτθέ μπορίνασα τι κεράς παρέα πφραλέντζαρ ντα πφενίντζαρ σο, σαρ αμέν, μαρένα-πες για τι κερέν ο σωστός, ντα ανταβά ντέλα-αμέν ζορ. (Εβρ. 10:​24, 25· 13:7) Ντα κάνα προσευχίντιβασα κο Ιεχωβά αντράλ αμαρέ γκίσταρ ντα μολίνασα-λες τι βοηθίνελ-αμέν οτθέ σο ισινάμ μπίζουρανε, βοβ ντέλα-αμέν πο άγιος πνεύμας για τι κερέλ-αμέν ζουρανέ ντα τι συνεχίνας ο αγώνας. Ατζέ-ντα άμα κεράσα-λεν σαρέ ανταλά, μπέκιμ ο μπέτι πράγματα σο μανγκάσα να κα νασέν, αλλά κα βοηθίντιβας μα τι κεράς-λεν αμαρέ ζωγιάτε. Σαρ βακερέλα ο εδάφιος Γαλάτες 5:​16, οντουλά σο πφιρένα αντικάς σαρ σικαβέλα ο πνεύμας «να κα κερέν καέκ πράγμας σο μανγκέλα ο σώμας».

14. Σόσκε ισί σημαντικός τι συνεχίνας τι μανγκάς ο σωστά πράγματα;

¹⁴ Κάνα κα τσσουβάς εκ πρόγραμμας πνευματικέ πραγματέντζαρ, ισί σημαντικός τι ατσσικιαράς-λες ντα τι συνεχίνας τι μανγκάς ο σωστά πράγματα. Σόσκε; Επειδή εκ αμαρέ ντουσμανίνταρ να σοβέλα ποτές. Οντουβά ντουσμάνι ισί ο πειρασμός τι κεράς ο γκεραλιπέ. Ατζέ-ντα σοράν κατά μπολντιπέ, μπέκιμ  ντικχάσα ότι ταρτίνενα-αμέν ακριβώς οντουλά πράγματα σο πρέπει τι νασάς λένταρ, σαρ ισί ο παιχνίδια σο βασίντιβενα κι μπαχ, ο ματιπέ ή η πορνογραφία. (Εφεσ. 5:3, 4) Εκ τερνό πφραλ βακερέλα: «Εκ κατά πο δύσκολα πράγματα σο ουσαρντόμ λέντζαρ ισί ότι ταρτίνενα-μαν ο μουρσά. Αμντίναβας ότι οντουλά αισθήματα κα νασένας αλλά ατζέκ ατζέκ βασανίνενα-μαν». Σο κα βοηθίνελ-τουμέν άμα μανγκένα μπουτ εκ μπέτι πράγμας;

15. Σόσκε ντέλα-αμέν ζορ τι τζανάς ότι ο μπέτι πράγματα σο μανγκάσα μανγκένα-λεν «γιαβερά-ντα τζενέ»; (Ντικχέν ι φωτογραφία)

¹⁵ Εκ μπέτι πράγμας σο μανγκένα μπέκιμ τι ισί σαρ εκ μπουτ ζουρανό ντουσμάνι, αλλά μα μπιστρέν ότι να ισινέν κορκορέ. Η Γραφή βακερέλα: «Σο-ντα δοκιμασία νακχαντέν ισί δοκιμασία σο νακχένα γιαβερά-ντα τζενέ». (1 Κορ. 10:​13α) Εκ γιαβέρ μετάφραση βακερέλα-λες αντικάς: «Να αρακχλάς-τουμέν δοκιμασία σο να τθερένα-λα γιαβερά-ντα τζενέ». Ανταβά γραφίντιλο ι Χριστιανόνγκε κι Κόρινθος, μουρσένγκε ντα τζουβλίνγκε. Μερικοί ανγκλέ τζάνας γιαβερέντζαρ ενώ ισινέ παντριμέ, γιαβερά τζάνας μουρσά μουρσέντζαρ ντα τζουβλιά τζουβλίντζαρ ντα γιαβερά ματιόνας. (1 Κορ. 6:​9-11) Τουμέν, σο αμντίνενα; Να τθερένας τι ουσαρέν μπέτι πραγματέντζαρ σο μανγκένας, σοράν πουμαρέ μπολντιμάσταρ; Σίγουρα τθερένας. Σαρέ ισινέ χρισμέ Χριστιανοί, αλλά ισινέ ατελείς-ντα. Σίγουρα, βον-ντα ουσαρένας μπάζιμα μπέτι πραγματέντζαρ σο μανγκένας. Ανταβά πρέπει τι ντελ-αμέν ζορ. Σόσκε; Σόσκε σικαβέλα ότι, καλέ-ντα μπέτι πραγμάσαρ τι ουσαρένα, εκ γιαβέρ τζενό γκιλό κόντρα ανταλέσαρ. Βα, μπορίνενα “μα τι χασαρέν τουμαρί πίστη σόσκε τζανένα ότι ανταλά προβλήματα τσσίντενα-λεν σαρέ τουμαρέ πφραλά”.​—1 Πέτρ. 5:9.

16. Καλέ παγιδάτε δεν πρέπει τι περάς, ντα σόσκε;

¹⁶ Μα περέν κι παγίδα τι αμντίνεν ότι καέκ γιαβέρ ναστί αγαβέλα οντιά δυσκολία σο νακχένα. Άμα αμντίνενα-λες ανταβά, μπέκιμ τι  πακιάν ότι ναστί ντένα-λεν πέρα ντα ότι να τθερένα ι ζορ τι τζαν κόντρα κο μπέτι πράγματα σο μανγκένα. Η Γραφή βακερέλα κάτι διαφορετικός: «Ο Ντεβέλ ισί πιστός ντα να κα μουκχέλ-τουμέν τι δοκιμάντιβεν πο μπουτ οντουλέσταρ σο αντιχίνενα, αλλά μαζί με τη δοκιμασία κα σικαβέλ τουμένγκε ο τρόπος-ντα για τι μπορίνεν τι νταϊντίνεν-λα». (1 Κορ. 10:​13β) Άρα, ατζέ-ντα άμα εκ μπέτι πράγμας σο μανγκάσα ισί ζουρανό, μπορίνασα τι ατσσάς πιστοί κο Ιεχωβά. Ι Ιεχωβάσκε βοηθειάσαρ, μπορίνασα τι ατσσάς ντουρ κατά γκεραλιπέ.

17. Παρόλο σο μπορεί τι αβέν αμαρέ γκίστε μπέτι πράγματα, σο ισί αμαρέ βαστέστε τι κεράς;

¹⁷ Ντεν-τουμέν γκοντί πάντα ακαβά: Επειδή ισινάμ ατελείς να αβέλα-πες μα τι αβέν αμαρέ γκίστε μπέτι πράγματα. Αλλά κάνα αβένα, μπορίνασα τι νασκιαράς-λεν σουγκό, σαρ κερντάς ο Ιωσήφ κάνα νασλό τθαβντιμάσαρ κατά Πετεφρίσκι ρομνί. (Γέν. 39:​12) Να χρειαζίντιβελα τι κερέν ο μπέτι πράγματα σο μανγκένα!

18, 19. Σο μπορίνασα τι πουτσάς-αμέν καζόμ μαράσα-αμέν τι τσσουβάς νεβέ πράγματα αμαρέ γκοντιάτε;

¹⁸ Για τι τσσουβάς νεβέ πράγματα αμαρέ γκοντιάτε πρέπει τι αβάς σίγουροι συνέχεια ότι οντουλά σο σκεφτίνασα ντα κεράσα κερένα ι Ιεχωβάσκο γκι. Οτθάρ, εξετάνεν τουμαρό νεαυτός ντα πουτσέν-τουμέν: “Τζουβντιάβα εκχέ τροπόσαρ σο σικαβέλα ότι αγαβάβα καζόμ πασέ ισί ο τέλος; Καζόμ νακχέλα ο βακίτι, συνεχίναβα τι ιριάβ ατζέ πο μπουτ ο νεβό χαρακτήρας; Μουκχάβα ο πνεύμας ι Ιεχωβάσκο τι οδηγίνελ-μαν για τι τζαβ κόντρα κο μπέτι πράγματα σο μανγκέλα ο σώμας ντα μα τι κεράβ-λεν;”

¹⁹ Καζόμ σκεφτίνενα ανταλά ερωτήσεις, μα μπεκλεντίνεν τι αβέν τέλειοι, αλλά τι χαιρίνεν οντουλέντζαρ σο τθερένα κερντό μέχρι ακανά. Άμα ντικχένα ότι χρειαζίντιβελα τι κερέν μερικές αλλαγές, μα χασαρέν τουμαρί ζορ. Οκιά μπάνταρ, κερέν οντουβά σο βακερέλα κο Φιλιππησίους 3:​16: «Κάι-ντα τι ερεσάσα ανταλέ ντρομέστε, τι συνεχίνας τι πφιράς σωστά κο ίδιος ντρομ». Άμα κα κερέν-λες ανταβά, τι αβέν σίγουροι ότι ο Ιεχωβά κα ευλογίνελ ο προσπάθειες σο κερένα για τι τσσουβέν νεβέ πράγματα τουμαρέ γκοντιάτε.