1-2. Tokony hanao ino avao tsika ndre fa vita batisa aza? Hazavao.

 IMPIRY iha ro manadio trano? Mety niezaky nanadio soa vasa iha tamy iha vo nifindra tao voalohany. Fe hanao akory laha tsy de nidaridary fanadiova sasy iha tafarani-zay? Mazava ho azy fa tsielatsiela avao le fa haloto ndraiky ty ao. Laha teanao hilamy soa avao zany ty an-tranonao ao, le mila manadio tsy tapaky iha.

² Manahaky ani-zay koa ty tokony hataontsika amy ty toe-tsaintsika noho ty toetsintsika. Tokony hiezaky hanasoa ani-raha reo avao tsika. Mazava ho azy hoe fa niezaky mafy nanao ze fanovà ilà tsika talohani-nanaova batisa antsika, amy zay mba “halio ty vatantsika ho afaky amy ze raha iaby mandoto ty vata noho ty say.” (2 Kor. 7:1) Fe ndre fa vita batisa aza tsika, le mbo mila manoriky ani-torohevitsini-apostoly Paoly iny koa ka ‘manavao ty toe-tsaintsika avao.’ (Efes. 4:23) Manino tsika ro tokony hiezaky hanao ani-zay avao? Satria tsy ambiambintsika avao, le mety hahavy antsika haloto ty raha raty amy tontolo toy eto. Ka mba hahavy antsika hampifalifaly ani-Jehovah avao, le tsy maintsy dinihintsika matetiky hoe manao akory ty toe-tsaintsika, ty toetsintsika, noho ty faniriantsika.

3. Ino ty dikani-hoe ‘manavao ty saintsika’? (Romanina 12:2)

³ Ino ty tokony hataontsika mba hahafahantsika manavao ty saintsika, zany hoe mba hanovà ty raha eritseretintsika? (Vakio Romanina 12:2.) Tsy ampy ty hoe manao raha soa kelikely  avao lafa tsika ‘manavao ty saintsika.’ Tsy maintsy mandiniky laliky ty am-pontsika ao tsika, bakeo manova ze tokony hovà mba hahafahantsika manaraky ty fitsipikini-Jehovah. Tsy indraiky avao ty tokony hanaovantsika ani-zay, fa mila ezaky mitohy.

4. Ino ty azontsika atao mba tsy hanahaky ty ani-tontolo toy ty toe-tsaintsika?

⁴ Lafa lasa lavorary tsika, le ho afaky hanao raha mampifalifaly ani-Jehovah avao amy ze raha iaby ataontsika. Fe zisiky hiaviani-zay, le mila miezaky mafy tsika mba hanao raha mampifalifaly ani-Jehovah avao. Henteo fa nivola Paoly amy Romanina 12:2 io hoe mila manavao ty saintsika tsika mba hahaizantsika ty sitrapo-Ndranahary. Tsy tokony hengantsika hisy vokany amintsika zany ty raha raty amy tontolo toy eto. Soa tsika laha mandiniky ty vatantsika tse mba hahaizantsika hoe ty hevitsi-Ndranahary va ro engantsika hisy vokany amy ty raha kendrentsika noho ty fanapahan-kevitsy rambesintsika, sa ty hevitsini-tontolo toy.

5. Fa marìny ty androni-Jehovah ka mila mandiniky ty toe-tsaintsika tsika, akory ty anaovantsika ani-zay? (Henteo sary io.)

⁵ Toy misy ohatsy. Teani-Jehovah tsika laha “manao an-tsay avao ty fiaviani-androni-Jehovah.” (2 Pet. 3:12) Eritsereto amy zay zao: ‘Hita amy fomba fiainako va fa mino aho hoe tena fa marìny ho rava tontolo toy? Hita amy fanapahan-kevitsy ataoko mikasiky fianara noho asa va hoe ty fanompoa ani-Jehovah ro tena vatan-draha amiko? Matoky va aho hoe hikarakara ahy noho ty fianakaviako Jehovah, sa zaho miasa loha marè amy ty raha ilànay?’ Tiarovo fa tena ho falifaly Jehovah lafa hitany hoe miezaky manao ty sitrapony tsika amy ze kila raha ataontsika.​—Mat. 6:25-27, 33; Fil. 4:12, 13.

6. Mila manao ino avao tsika?

 ⁶ Mila mandiniky matetiky ty toe-tsaintsika tsika, le bakeo manova ze tokony hovà. Nivola tamy Kristiana ta Korinto any rey Paoly hoe: “Miezaha handini-tena avao mba hahità laha amy finoa ao nareo na tsy ao, le anovo hay soa avao hoe manao akory ty vatanareo.” (2 Kor. 13:5) Ty hoe “amy finoa ao”, le tsy midika avao hoe mazoto mivory noho mitory. Tafilitsy amy zay koa ty raha eritseretintsika, ty faniriantsika, noho ty antony manosiky antsika hanao raha. Mila manavao ty saintsika avao zany tsika ka tokony hamaky ty Safà-Ndranahary, hiezaky hitovy hevitsy aminy, noho hanao ze fara herintsika mba hampifalifalea azy.​—1 Kor. 2:14-16.

7. Laha hentea ty Efesianina 4:31, 32, ino koa ty raha hafa mila ataontsika, le manino raha zay ro mety ho sarotsy?

⁷ Vakio Efesianina 4:31, 32. Laha teantsika ty hanova ty raha eritseretintsika, le mila ‘misiky ty toetsy vaovao’ tsika. (Efes. 4:24) Tsy maintsy miezaky mafy tsika mba hahavitantsika ani-zay. Ankoatsini-zay, tokony hiezaky mafy hiala amy toetsy raty tsika, ohatsy hoe lolompo, heloky, noho siaky. Fe mety ho sarotsy ty manao ani-zay. Ino ty antony? Satria misy toetsy raty sisany fa latsaky vahatsy anatintsika ao. Mivola, ohatsy, ty Baiboly hoe “mora meloky” ty olo sisany sady “malaky misondrotsy.” (Ohab. 29:22) Mila miezaky mafy avao ty olo mana toetsy raty manahaky ani-reo, ndre lafa vita batisa aza. Mampiseho ani-zay tantara manaraky toy.

8-9. Manino ty tantarani-Stephen ro mampiseho hoe mila miezaky avao tsika mba hiala amy ty toetsy taloha?

⁸ Tena nisarotsy tamy rahalahy mana anara Stephen zay ty nitanjaky ty helokiny. Nivola ie hoe: “Ndre fa nivita batisa aza aho, le mbo niezaky mafy mba hahay hitanjaky ty heloko. Lafa nandeha nitory santrano, ohatsy, aho ndraiky zay, le nisy olo zay nangalatsy radio tamy tomobiliko iny. Nihianiko amy zay ie. Lafa narìny azy aho, le natorany radio iny sady nilay avao ie. Lafa nitantaraniko tamy mpitory rey ty fomba nahazoako ani-radioko iny, le nanontany ahy anti-panahy raiky niaraky aminay zay hoe: ‘Stephen e, ho nataonao akory mpangalatsy iny laha nitratsinao?’ Nampieritseritsy ahy fanontanea zay sady nandrisiky ahy hiezaky mafy mba ho tea filongoa avao.” b

⁹ Hitantsika baka amy tantarani-Stephen io fa mety tsy ho ambiambintsika avao le mety hampiseho toetsy raty tsika, ndre mieritseritsy aza tsika hoe fa nialantsika raha iny. Laha tratsini-zay iha, le ka kivy sady ka mieritseritsy hoe tsy maeva ho Kristiana iha. Ndre apostoly Paoly aza nieky hoe: “Lafa ta hanao ty soa aho, le anatiko ato avao ty raty.” (Rom. 7:21-23) Samby mana toetsy raty iaby ty Kristiana iabiaby, le mety himpoly avao raha zay manahaky loto noho lemboky tafilitsy an-tranontsika ao rey. Mila miezaky halio avao zany tsika. Akory ty hanaovantsika ani-zay?

10. Ino ty azontsika atao mba hialà amy toetsy raty? (1 Jaona 5:14, 15)

¹⁰ Mivavaha amy Jehovah laha hitanao hoe misy toetsy raty sarotsy aminao ty miala azy. Matokisa fa hijanjy anao ie sady hanampy anao. (Vakio 1 Jaona 5:14, 15.) Tsy hanao fahagagà aloha Jehovah mba hangalà ani-toetsy raty iny, fe afaky manome hery anao ie amy zay iha tsy hampiseho sasy ani-toetsy iny. (1 Pet. 5:10) Mila manao raha mifanaraky amy vavaky ataonao iny koa iha ka  tsy hanao raha mety hahavy anao hampiseho ani-toetsy taloha iny ndraiky. Mitandrema, ohatsy, mba tsy hanenty filma, fandahara amy tele, na hamaky tantara mampiseho hoe tsy manahy iha ndre mana ani-toetsy raty iezahanao ialà iny. Le ka engà hifantoky amy fanirian-draty ty sainao.​—Fil. 4:8; Kol. 3:2.

11. Ino ty azontsika atao mba hahafahantsika hana ty toetsy vaovao avao?

¹¹ Marina fa niala tamy toetsy taloha iha, fe tena ilà koa ty miezaky mba hana toetsy vaovao. Akory ty hanaovanao ani-zay? Lafa iha mianatsy ty toetsini-Jehovah, le anovo raha kendrè ty hanahaky azy. (Efes. 5:1, 2) Lafa iha, ohatsy, mamaky tantara amy Baiboly ao mampiseho hoe manenga hadisoa Jehovah, le eritsereto zao: ‘Manenga ty hadisoan’olo hafa koa va aho?’ Lafa iha mamaky mikasiky ty hasoa fanahy nasehoni-Jehovah tamin’olo niatriky raha sarotsy rey, le eritsereto zao: ‘Midary ani-rahalahy noho anabaviko mila fanampea rey koa va aho? Asehoko amy ty raha ataoko va raha zay?’ Miezaha avao hanavao ty sainao ka sikino ty toetsy vaovao, le manana fahareta lafa manao ani-zay.

12. Manino ty tantarani-Stephen ro mampiseho hoe afaky manova olo ty Baiboly?

¹² Nivola Stephen, azy niresahintsika taloha teo iny hoe nahavita nisiky tsikelikely ty toetsy vaovao ie. Hoy ty asany: “Liany nahavita batisa ahy, le nisy raha maromaro nahazo ahy ka manaly nisarotsy tamiko ty nitanjaky ty heloko. Niezaky tsy niarakaraky tamin’olo nanao raha nampeloky ahy rey aho, sady niezaky nanao raha mba tsy hiharaty raha iny. Maro ty olo nidera ahy, anatini-zay valiko, satria niezaky ho kalma avao aho. Ndre zaho koa aza ka nitseriky! Fe tsy mampirengirengy ahy raha zay. Hitako baka amy raha rey hoe tena afaky manova olo ty Baiboly.”

13. Ino ty hanampy antsika hanao raha soa avao? (Galatianina 5:16)

¹³ Vakio Galatianina 5:16. Manome antsika ty fanahiny masy Jehovah mba hanampea antsika hahavita hanao raha soa. Lafa mianatsy ty Safà-Ndranahary tsika le engantsika hitariky antsika fanahy io. Mahazo fanahy masy koa tsika lafa manatriky fivoria. Lafa tsika mivory, le tafiaraky amy rahalahy noho anabavintsika reo. Tena mampahery ty miaraky amin-drozy satria miezaky manao raha soa manahaky antsika avao koa rozy. (Heb. 10:24, 25; 13:7) Lafa tsika koa mivavaky amy Jehovah noho mangataky azy mba hanampy antsika amy ty handrantsika sisany, le hanome antsika ty fanahiny masy ie mba hahazoantsika hery hialia amy raha rey avao. Marina fa mety mbo hana fanirian-draty avao tsika, fe hanampy antsika ty fanaova ani-reo mba hifehy tena ka tsy hanatanteraky ani-faniria iny. Zay mihintsy resahini-​Galatianina 5:16 iny hoe “tsy hanatanteraky ty faniriani-nofo mihintsy” ze maneky hotarihini-fanahy.

14. Manino ro tena ilà ty miezaky avao mba haniry hanao raha soa?

¹⁴ Laha tsika fa nanomboky nanao raha manampy antsika hifandramby soa amy Jehovah, le soa laha tohizantsika avao raha zay sady miezaky avao tsika mba haniry hanao raha soa. Ino ty antony? Satria tsy mieny mihintsy ty raiky amy fahavalontsika reo fa mialy amintsika avao. Tsy ia fahavalo io fa ty fakam-panahy hanao raha raty. Ndre fa vita batisa aza tsika le mety mbo ho voasinto amy raha tsy tokony hataontsika rey avao, ohatsy hoe fanaova loka, finoman-toaky lisatsy marè, na sary tiva. (Efes. 5:3, 4) Nieky rahalahy tanora raiky zay hoe: “Lahilahy aho fe nitea lahilahy manahaky ahy avao  koa. Tena nisarotsy amiko ty nandresy ani-raha zay. Nieritseritsy aho hoe fihetseham-po mandalo avao raha zay, fe mbo tanatiko ao avao raha io.” Ino ty afaky manampy anao laha misy fanirian-draty fa latsaky vahatsy am-ponao ao?

15. Manino ro mampahery ty mahay hoe “fa mpahazo ty olo avao” ty fanirian-draty? (Henteo sary io.)

¹⁵ Mialy mafy amy fanirian-draty va iha? Tiarovo fa tsy raiky iha. Mivola ty Baiboly hoe: “Tsy misy fakam-panahy mahazo anareo, laha tsy ze fa mpahazo ty olo avao.” (1 Kor. 10:13a) Nisoraty ho ani-lahilahy noho ampela kristiana nipetraky ta Korinto any rey raha io. Ty sisany amin-drozy taloha nimpandranto, lahilahy nandry amy lahilahy na ampela nandry amin’ampela, sady nimamo lava. (1 Kor. 6:9-11) Mieritseritsy va iha hoe tsy nana fanirian-draty sasy rozy tafarani-batisan-drozy? Tsy zay mihintsy. Marina fa Kristiana voahosotsy iaby rozy, fe samby mbo tsy lavorary. Azo antoky fa nialy amy fanirian-draty reo avao rozy. Tena mampahery antsika raha zay. Ino ty antony? Satria mampiseho raha zay hoe ndre ino ino ty fanirian-draty ialianao, le ho vitanao koa ty handresy azy. Tena afaky ‘hana finoa matanjaky avao iha, satria hainao fa ampijalỳ manahaky ani-zay koa ty rahalahinao iaby.’​—1 Pet. 5:9.

16. Ino ty raha tsy tokony hoeritseretintsika, le ino ty antony?

¹⁶ Ka mieritseritsy mihintsy hoe tsy misy olo mahatakatsy ty raha sarotsy mahazo anao. Manimba ty manao ani-zay, satria mety hahavy anao hieritseritsy hoe tsy misy fanantenà sasy raha mahazo anao iny sady tsy ho vitanao ty hanohitsy fanirian-draty. Mifanohitsy amy zay fa mivola ty Baiboly hoe: “Tsy mivaliky amy ty safàny Ndranahary, ka tsy hanenga anareo halaim-panahy mandilatsy ze zakanareo. Fa lafa misy fakam-panahy le hasiany lala hiboaha koa mba ho zakanareo raha  zay.” (1 Kor. 10:13b) Midika raha zay fa ndre mahery manao akory aza ty fanirian-draty am-pontsika ao, le ho vitantsika ty tsy hivaliky amy Jehovah mihintsy. Hanampy antsika ie, ka ho vitantsika ty tsy hanao raha raty.

17. Marina fa mbo mana fanirian-draty avao tsika, fe ino ty azontsika atao?

¹⁷ Tiarovo avao zao: Mbo hana fanirian-draty avao tsika satria tsy lavorary. Fe lafa miseho raha zay, le azonao atao ty mangalaky azy malaky, manahaky ty nataoni-Josefa lafa ie nilay ani-valini-Potifara iny. (Gen. 39:12) Tsy tokony hotanterahinao mihintsy fanirian-draty iny!

18-19. Ino iaby ty fanontanea tokony hoeritseretintsika lafa tsika miezaky manavao ty saintsika?

¹⁸ Laha ta hanavao ty saintsika tsika, le mila ataontsika azo antoky fa mifanaraky amy sitraponi-Jehovah ty raha eritseretintsika noho ataontsika. Tokony handini-tena matetiky zany tsika hoe: ‘Hita amy ty raha ataoko va fa mieky aho hoe tena fa marìny ty farany? Miezaky misiky ty toetsy vaovao va aho? Engàko hitariky ahy va ty fanahini-Jehovah, amy zay aho tsy ho voatariky hanatanteraky fanirian-draty?’

¹⁹ Lafa mandiniky ty vatanao iha, le ka mitamà fahalavoraria fa henteo ze ezaky fa vitanao. Ka kivy laha hitanao hoe mbo misy raha mila hasoavinao. Oriho torohevitsy amy Filipianina 3:16 ao iny hoe: “Fa misy fandrosoa vitantsika, ka ndao tsika hiezaky handroso manahaky ani-zay avao.” Laha manao ani-zay iha, le matokisa fa hotahini-Jehovah ty ezaky ataonao mba hanavaoza ty sainao.