1-2. Yini lokufanele sichubeke siyenta ngemuva kwekubhajatiswa? Chaza.

 UVAME kuyihlanta kangakhi indlu yakho? Mhlawumbe ngaphambi kwekutsi uhlale kuyo wayihlantisisa. Kodvwa bekungentekani kube wagcina ngalelo langa kuyihlanta? Beyingagcwala tintfuli futsi ingcole. Kuze uyigcine ihlobile, kufanele uhlale uyihlanta.

² Ngendlela lefanako, natsi kufanele sichubeke sishintja indlela lesicabanga ngayo kanye nebuntfu betfu. Kuliciniso kutsi ngaphambi kwekutsi sibhajatiswe, senta konkhe lebesingakhona kukwenta kuze sishintje kuphila kwetfu kuze ‘sitihlante kuko konkhe kungcola kwenyama.’ (2 Khor. 7:1) Kodvwa nyalo kufanele silalele seluleko semphostoli Pawula lesitsi: “Nichubeke niyenta ibe yinsha indlela lenicabanga ngayo.” (Ef. 4:23) Kubaluleke ngani loku? Ngobe ngekushesha umoya walelive ungasenta singahlanteki embikwaJehova. Kuze sikugweme loko futsi sihlale sijabulisa Jehova, kufanele sihlale sihlola loko lesikucabangako, buntfu betfu kanye netifiso tetfu.

3. Kusho kutsini ‘kushintja ingcondvo yakho’? (KubaseRoma 12:2)

³ Yini lokufanele siyente kuze sishintje tingcondvo tetfu, lokusho kushintja indlela lesicabanga ngayo? (Fundza KubaseRoma 12:2.) Ligama lesiGriki lelihunyushwe ngekutsi “nishintje tingcondvo tenu” lingaphindze lihunyushwe ngekutsi “nilungise tingcondvo tenu.” Ngako, loku akusho kutsi kufanele sente tintfo letimbalwa nje letinhle. Kunaloko, kufanele sitihlolisise  kutsi sibantfu labanjani futsi sente lushintjo loludzingekako kuze silalele timiso taJehova. Loku kufanele singakwenti kanye nje kuphela, kepha kufanele sichubeke sikwenta.

4. Yini lesingayenta kuze singalivumeli lelive lilawule indlela lesicabanga ngayo?

⁴ Nasesite sono, sitawukhona kuhlale senta tintfo letijabulisa Jehova. Kodvwa kwanyalo, kufanele sichubeke silwa kamatima kuze sijabulise Jehova. Embhalweni waKubaseRoma 12:2, Pawula watsi kufanele sishintje tingcondvo tetfu kuze sititfolele tsine loko lokuyintsandvo yaNkulunkulu. Kunekutsi sivumele lelive lelibi lilawule indlela lesenta ngayo tintfo, kufanele sicale sitihlole kuze sibone kutsi simvumela kangakanani Nkulunkulu kutsi alawule indlela lesicabanga ngayo, imigomo yetfu netincumo tetfu, kunekutsi sivumele lelive.

5. Singayihlola njani indlela lesicabanga ngayo kuze sibone kutsi siyacondza yini kutsi lilanga laJehova selisondzele? (Buka sitfombe.)

⁵ Cabanga nganasi sibonelo. Jehova ufuna ‘sihlale sikukhumbula kuba khona kwelilanga’ lakhe. (2 Phet. 3:12) Tibute: ‘Indlela lengiphila ngayo iyakhombisa yini kutsi ngiyacondza kutsi lelive lelibi litawuphela masinyane? Tincumo lengitentako letimayelana nemfundvo nemsebenti, tiyakhombisa yini kutsi kukhonta Jehova kubaluleke kakhulu ekuphileni kwami? Ngiyakholwa yini kutsi Jehova utawunakekela mine kanye nemndeni wami, nobe ngihlale ngikhatsateka ngetintfo lengitidzingako?’ Cabanga nje kutsi Jehova ujabula kangakanani nakasibona setama kuphila ngendlela levumelana nentsandvo yakhe.​—Mat. 6:25-27, 33; Fil. 4:12, 13.

6. Yini lokufanele sichubeke siyenta?

⁶ Kufanele sihlale siyihlola indlela lesicabanga ngayo futsi sente lushintjo  loludzingekako. Pawula watjela emaKhristu aseKhorinte watsi: “Chubekani nitihlola kutsi nisekukholweni yini; chubekani nihlola loko nine leningiko.” (2 Khor. 13:5) Kuba ‘sekukholweni’ kusho lokungetulu nje kwekumane siye emihlanganweni yelibandla nekwenta umsebenti wekushumayela. Kodvwa kufaka ekhatsi indlela lesicabanga ngayo, tifiso tetfu kanye netisusa tetfu. Ngako kufanele sichubeke sishintja tingcondvo tetfu ngekutsi sifundze liVi laNkulunkulu, sicabange ngendlela lacabanga ngayo, futsi sente nobe yini ledzingekile kuze simjabulise.​—1 Khor. 2:14-16.

7. Ngekusho kwembhalo waKubase-Efesu 4:31, 32, yini lenye lokufanele siyente, futsi yini lengenta kube matima kukwenta?

⁷ Fundza Kubase-Efesu 4:31, 32. Ngetulu nje kwekushintja indlela lesicabanga ngayo, kufanele ‘sigcoke buntfu lobusha.’ (Ef. 4:24) Kuze sikwente loko kufanele sisebente kamatima. Loku kufaka ekhatsi kuyekela buntfu lobubi, lobufana nenzondo, intfukutselo nelulaka. Yini lengenta kube lukhuni kukuyekela loku? Ngobe kungenteka lobunye buntfu lobubi sesinesikhatsi lesidze sinabo. Sibonelo nje, liBhayibheli litsi labanye bantfu ‘basheshe batfukutsele’ futsi ‘basheshe bakwate.’ (Taga 29:22) Umuntfu lonalobuntfu lobubi kungahle kudzingeke achubeke alwa kamatima kuze ashintje, ngisho nangemuva kwekubhajatiswa. Loku sikubona kahle kunaku lokwenteka kulomunye umzalwane.

8-9. Loko lokwenteka kuStephen kuveta njani kutsi kufanele sihlale sibukhumula buntfu lobudzala?

⁸ Lomunye umzalwane lokutsiwa nguStephen bekanenkinga yekulawula intfukutselo yakhe. Utsi: “Ngisho nangemuva kwekubhajatiswa, kwadzingeka ngichubeke ngetama kulawula intfukutselo yami. Sibonelo nje, ngalelinye lilanga nangenta umsebenti wekushumayela emtini ngemuti, ngagijimisa lesinye sigebengu lebesisandza kweba i-radio emotweni yami. Ngatsi nasengisondzela, sayijika phasi le-radio sabaleka. Ngesikhatsi ngicocela labanye kutsi ngiyitfole njani i-radio yami, lomunye lomdzala welibandla lebekakulelicembu wangibuta watsi: ‘Stephen, kube lesigebengu usibambile, bewutasentani?’ Lombuto wangenta ngacabanga futsi wangikhutsata kutsi ngichubeke ngetama kuba ngumuntfu lonekuthula.” b

⁹ Loko lokwenteka kuStephen kuyasikhombisa kutsi ngalesinye sikhatsi buntfu lobubi bungavela singakalindzeli, ngisho nobe besesicabanga kutsi sesite. Nangabe loko kwenteka kuwe, ungadvumali futsi ungacabangi kutsi usehluleki. Ngisho nemphostoli Pawula wavuma watsi: “Nangifisa kwenta lokulungile, kunalokubi kimi.” (Rom. 7:21-23) Njengobe onkhe emaKhristu anesono, kufanele ahlale alwisana nebuntfu lobubi lobuhle buvela kuhle kwetintfuli nekungcola etindlini tetfu. Kudzingeka sichubeke sisebenta kuze sihlale sihlantekile. Singakwenta njani loko?

10. Yini lesingayenta kuze silwe nebuntfu lobubi? (1 Johane 5:14, 15)

¹⁰ Thantaza kuJehova umtjele ngebuntfu lokutfola kumatima kubukhumula, wetsembe kutsi utakuva futsi akusite. (Fundza 1 Johane 5:14, 15.) Ngisho nobe Jehova angeke abususe ngalokusimangaliso lobuntfu, angakuniketa emandla kuze ukhone kubuyekela. (1 Phet. 5:10) Kwanyalo, yenta ngekuvumelana nemithantazo yakho ngekutsi ungatenti tintfo letingahle tente kutsi lobuntfu lobudzala buphindze bubuye. Sibonelo nje, wanake emafilimu lowabukelako, tinhlelo te-TV nobe  tincwadzi lotifundzako, lokwenta kubonakale shengatsi bukahle lobuntfu lowetama kubuyekela. Ungayivumeli ingcondvo yakho kutsi ihlale icabanga tintfo letimbi.​—Fil. 4:8; Khol. 3:2.

11. Yini lesingayenta kuze sichubeke sigcoka buntfu lobusha?

¹¹ Nanobe sewubukhumulile buntfu lobudzala, kubalulekile kutsi ugcoke buntfu lobusha. Ungakwenta njani loku? Tibekele umgomo wekulingisa Jehova njengobe ufundza ngebuntfu bakhe. (Ef. 5:1, 2) Nasi sibonelo, nawufundza indzaba letsite eBhayibhelini lekhuluma ngendlela Jehova lacolela ngayo, tibute: ‘Ngiyabacolela yini labanye?’ Nawufundza ngendlela Jehova labakhombisa ngayo umusa labo lababhekene netimo letimatima, tibute: ‘Nami ngiyabavela yini bazalwane bami nabodzadze nabadzinga lusito, futsi loko ngikukhombisa ngalengikwentako yini?’ Chubeka ushintja ingcondvo yakho ngekutsi ugcoke buntfu lobusha futsi ungalweli kutsi kwenteke ngaleso sikhatsi.

12. Loko lokwenteka kuStephen kukhombisa njani kutsi liBhayibheli linemandla ekushintja kuphila kwebantfu?

¹² Stephen, lesikhulume ngaye, ubonile kutsi kancane kancane ukhonile kugcoka buntfu lobusha. Utsi: “Kusukela ngabhajatiswa, tibe tinyenti timo lengibhekene nato lapho kudzingeke khona kutsi ngilawule intfukutselo yami. Ngifundze kusuka kubantfu labetama kuvusa intfukutselo yami kanye nekusebentisa letinye tindlela kuze simo singabi sibi kakhulu. Bantfu labanyenti, lokufaka ekhatsi umkami, bangincomile ngendlela lengikhone ngayo kwehlisa umoya. Nami ngiyatimangala. Angitishayi sifuba ngalolushintjo lolwentekile ekuphileni kwami. Kunaloko, lubufakazi bekutsi liBhayibheli linemandla ekushintja kuphila kwebantfu.”

13. Yini letasisita kutsi silwe netifiso letimbi? (KubaseGalathiya 5:16)

¹³ Fundza KubaseGalathiya 5:16. Kuze Jehova asisite kutsi sente lokulungile, usipha umoya wakhe longcwele. Nasidadisha liVi laNkulunkulu, sisuke sivumela umoya wakhe kutsi usisite. Siphindze sitfole umoya longcwele nasiya emihlanganweni yelibandla. Kulemihlangano, siyakhona kucitsa sikhatsi nebazalwane betfu nabodzadze, nabo labetama kamatima kwenta lokulungile, futsi loko kuyasikhutsata. (Heb. 10:24, 25; 13:7) Nasithantaza kuJehova ngalokusuka enhlitiyweni, simcele kutsi asisite silwe nebutsakatsaka betfu, utasipha umoya wakhe longcwele lotasinika emandla kuze sikhone kuchubeka silwa. Nanobe letintfo tingeke titicedze tifiso letimbi, kodvwa titasisita kutsi singakwenti lokubi lesikufisako. KubaseGalathiya 5:16 utsi labo labahamba ngemoya ‘ngeke baze bente lokufiswa yinyama.’

14. Kubaluleke ngani kuchubeka wetama kutsi ube netifiso letinhle?

¹⁴ Nasesitakhele luhlelo loluhle lolutasisita kutsi sibe nebuhlobo lobuhle naJehova, kufanele sinamatsele kulo futsi sichubeke setama kuba netifiso letinhle. Leni? Ngobe kunesitsa setfu lesingalali. Lesitsa lesi silingo sekwenta lokubi. Ngisho nangemuva kwekubhajatiswa singahle sitikhandze sikhangwa tintfo lesati kahle kutsi kufanele sitigweme, letifaka ekhatsi kugembula, kusebentisa kabi tjwala, nobe titfombe letikhombisa kungcola. (Ef. 5:3, 4) Lomunye umzalwane losemusha utsi: “Lenye intfo lematima kakhulu lengike ngalwisana nayo kukhangwa bantfu bebulili lobufana nebami. Bengicabanga kusi kwesikhashana, kodvwa nanyalo solo akupheli.” Yini lengakusita nangabe unesifiso lesibi futsi lesinemandla?

15. Kusikhutsata njani kwati kutsi ‘nalabanye bantfu’ baba nato tifiso letimbi? (Buka sitfombe.)

 ¹⁵ Njengobe ulwisana nesifiso lesibi lesinemandla, khumbula kutsi awusiwedvwa. LiBhayibheli litsi: “Kute silingo lesinehlele lesingakake sabehlela nalabanye bantfu.” (1 Khor. 10:13a) Lelinye lihumusho litsi: “Anikefikelwa kulingwa lokwehlukile kunekwalabanye bantfu.” Lamavi bekaya kumaKhristu aseKhorinte. Labanye bawo bebake batiphatsa kabi, batitabani futsi batidzakwa. (1 Khor. 6:9-11) Ucabanga kutsi ngemuva kwekubhajatiswa kwabo besekute yini sidzingo sekutsi balwisane netifiso letimbi? Besikhona. Kuliciniso kutsi onkhe bekagcotjwe ngemoya, kodvwa bekasolo anesono. Siyaciniseka kutsi bekuhle kudzingeka alwe netifiso letimbi. Loku kufanele kusikhutsate. Sisho ngani? Ngobe kuyakhombisa kutsi ngisho nobe ulwa nasiphi sifiso lesibi, kukhona losincobile. Ngako aliciniso emavi latsi ungahlala ‘ucinile ekukholweni, wati kutsi bonkhe bazalwane babeketelela kuhlupheka lokufanako.’—1 Phet. 5:9.

16. Yini lokufanele siyigweme, futsi leni?

¹⁶ Ungacabangi kutsi kute longakhona kucondza simo lobhekene naso. Kucabanga ngalendlela kungakwenteka ucabange kutsi simo lokuso angeke silunge nekutsi angeke ukhone kulwa netifiso letimbi. LiBhayibheli lisho lokwehlukile. Litsi: “Nkulunkulu wetsembekile futsi ngeke avume kutsi nilingwe ngetulu kwaloko leningakhona kukwetfwala, kepha nanilingwa utawenta nendlela yekuphuma kuze nikhone kubeketela.” (1 Khor. 10:13b) Ngako ngisho nobe sifiso lesibi sinemandla, singakhona kumelana naso. Sisitwa nguJehova, singakhona kungakwenti lokubi.

17. Nanobe singeke sikhone kutigwema tifiso letimbi, yini lesingakhona kuyenta?

¹⁷ Hlale ukhumbula naku: Ngenca yekutsi unesono, utawuhle uba nato tifiso letimbi. Kodvwa nakwenteka uba nato, kufanele umelane  nato ngekushesha, ulingise Josefa lowambalekela ngekushesha umfati waPhotifari. (Gen. 39:12) Ungativumeli tifiso letimbi kutsi tikuncobe!

18-19. Ngumiphi imibuto lesingatibuta yona njengobe setama kushintja tingcondvo tetfu?

¹⁸ Kushintja tingcondvo tetfu kusho kutsi kufanele sichubeke siciniseka kutsi indlela lesicabanga ngayo naloko lesikwentako kuyamjabulisa Jehova. Ngako, kufanele sihlale sitihlola futsi sitibuta nayi imibuto: ‘Indlela lengenta ngayo iyakhombisa yini kutsi ngiyabona kutsi sesiphila emalangeni ekugcina? Ngiyawenta yini umetamo wekuchubeka ngigcoka buntfu lobusha? Ngiyawuvumela yini umoya waJehova kutsi ungicondzise kuze ngikhone kumelana netifiso letimbi?’

¹⁹ Njengobe utihlola, ungalindzeli kutsi angeke uwente emaphutsa, kunaloko jabula ngentfutfuko lesewuyentile. Nangabe uyabona kutsi kukhona lakudzingeka ulungise khona, ungadvumateki. Kunaloko, lalela seluleko lesisembhalweni waKubaseFiliphi 3:16 lesitsi: “Ngelizinga lesesitfutfuke ngalo, asichubekeleni embili ngendlela lefanako.” Njengobe wenta njalo, ciniseka kutsi Jehova utayibusisa imetamo loyentako yekuchubeka ushintja ingcondvo yakho.