1, 2. ¿Ambechi jatsiski para úni engachi na itsï atakuarhiakia ka andi?

 ¿NAJTSÏ xáni someni limpiarisïni chaari kʼumanchikuani? Jamberijtsï ante de jima irekani kánikuajtsï sési limpiaripka. ¿Peru ambe úkuarhipirini engajtsï nóteru limpiaripiringia? Eskachi na míteka, sóntku no sési jándepirindi ka tʼupuri ambe japirindi. Ísï jimbo, paraka kʼumanchikua ma uaaka méntkisï sési xarharani uétarhisïndi pauani pauani limpiarini.

² Ka sáno májkueni, uétarhisïndi eskachi méntku jánguarhintani jauaka mójtakuni na engachi eratsejka ka na engachi jásï kʼuiripueka. Ísïisti, ante dechi itsï atakuarhini jánguarhintaskachi mójtakuni juchaari irekuani ka pímbinhasïntani “para iámindu indeni no sési jásï ambe jingoni enga kuerpu újka ka enga mintsita tamapu eratsejka” (2 Kor. 7:1). Peruchi ístu iásï jatsiska para ísï úni eska apostoli Pablu na uandapka: jatsiskajtsï para seguiriini jarhani ‘jimbanherantani chaari eratsekuechani’ (Efes. 4:23). ¿Andisï xáni jukaparhakue eskachi jánguarhintaaka úni ini ambe? Jimboka ambe engaksï i parhakpinirhu anapuecha újka úpirindi úni eskajtsïni Tata Diosï Jeoba nóteru pímbinhasï exepiringia. Ka parachi no indeni ambe úkuarhinchani ka seguiriini jaiapanherantani Tata Diosïni, jatsiskachi para someni exekuarhini ambe engachi eratsejka, na engachi jámajka ka ambe engachi tsitijka.

3. ¿Ambe arhikuekasïni mójtakuni juchaari eratsekuani? (Romanos 12:2, TNM).

³ ¿Ambechi uaa úni parachi seguiriini mójtakuni juchaari eratsekuani? (Arhinta je Romanos 12:2, TNM). No solu uétarhisïndi eskachi máru ambejku sési uaaka. Sánderu sési, uétarhisïndi eskachi exekuarhiaka na engachi meru jásïika ka mójtakuni máru ambe juchaari irekuarhu parakachi kurhajchauaka Tata Diosï Jeobaeri juramukuechani xáni eskachi xáni uaaka. Ka no solu ma  ueltajkuchisï jatsika para ísï úni, sino méntku ísï úni jarhani.

4. ¿Ambechi jatsiski para úni parachi no májkueni eratseni eska i parhakpini anapuecha?

⁴ Engachi perfektueuakia, uaakachi méntkisï jaiapanherantani Tata Diosï Jeobani iámindu ambe jimbo. Peru enga jamberi niáraaka inde jurhiatikua, jatsiskachi para jánguarhintani iásï jaiapanherantani Tata Diosï Jeobani. Romanos 12:2 jimbo, apostoli Pablu uandaspti eska uétarhisïnga mójtakuni juchaari eratsekuani parachi úni míteni ambe enga Tata Diosï uéjka. Enbesi dechi májkueni eratseni eska i parhakpini anapuecha, uétarhisïndi eskachi exeaka na engachi xáni kuenta újka Tata Diosïni engachi meteechani jatsikukuarhiani jarhajka ka engachi erakuni jámaaka úni ambe ma.

5. ¿Ambejtsïni jarhuata míteni sinchi axuterku exexakiia Tata Diosï Jeobaeri jurhiatikuani? (Exea je imajeniichani).

⁵ Pori ejemplu, juchaari Tata Diosï Jeoba uékasïndi eskachi jingontku jauaka “erontani [Tata] Diosïiri jurhiatikuani” (2 Ped. 3:12). Ísï jimbo, ju je kurhamarhikuarhini: “¿Na engani irekaka xarhatasïni eskani kurhangusïnga eska nóteru ióni jimbo i parhakpini kʼamajkunhaakia? ¿Ambe engani erakujka eskueleeri ka ánchikuarhiteeri ambe, xarhatasïni eskani sánderu jukaparharasïnga Tata Diosï Jeobani marhuakuni? ¿Mintsikasïni eskarini Tata Diosï Jeoba kuidariuaka jíndeni ka ístu juchiiti familiani, o méntkuni uandanhiani jarhasïni jatsikuarhekua ambe jimbo?”. Tata Diosï Jeoba kánikua sési pʼikuarherasïndi enga exejka eskachi jánguarhintasïnga ísï irekani eska ima na uéjka (Mat. 6:25-27, 33; Filip. 4:12; 4:13, TNM).

6. ¿Ambechi jatsiski para seguiriini úni jarhani?

⁶ Jatsiskachi para someni exekuarhini jarhani na engachi eratsejka ka jánguarhintani mójtakuni ambe enga xáni uétarhiaka. Pablu ini ambe arhiaspti Korintu anapu kristianuechani: “Eratsenta je chájkumindu siengajtsï sési jimbo jakajkuni jaka [Tata Diosïni] ka  tsʼéjkukuarhi je chájkumindu” (2 Kor. 13:5). “Jakajkuni” Tata Diosïni, sánderu ambe arhikuekasïndi eska tánguarhikuecharhu nirani o ménichantkisï nirani aianhpini. Ístu jindeesti ambe engachi eratsejka, ambe engachi tsitijka ka ambe engachi jimbo újka ambe ma. Ísï jimbosï uétarhijti eskachi méntku seguiriini jauaka mójtakuni juchaari eratsekuani arhintaparini Tata Diosïiri Uandakuani, jorhenguarhiparini ísï eratseni eska ima ka tátsekua mójtakuni ambe enga xáni uétarhiaka parachi jaiapanherantani (1 Kor. 2:14-16).

7. Eska na arhijka Efesu 4:31, 32, ¿ambe máteru ambechi jatsiski para úni ka andisï úkua juka ísï úni?

⁷ (Arhinta je Efesu 4:31, 32). No solu uétarhisïndi mójtakuni na engachi eratsejka, ístuchi jatsiska para “jimbanhi kʼuiripu máeni” (Efes. 4:24, TNM). Ka parachi jimbanhi kʼuiripu máeni, jatsiskachi para úni ambe ma. Pori ejemplu, jatsiskachi para kánikua jánguarhintani parachi nóteru májkueni jámania eskachi ióntki na jámeenga, komu jatanhetspini ka uinhamu ikiani. ¿Joperu andisï úkua juka nóteru ísï jámania? Jimbokachi pʼindeskia úni máru ambe enga no sési jaka ka no fásiliisti jurajkuni indeni ambe. Biblia uandasïndi ima kʼuiripuecheeri ‘engaksï sóntku ikiajka’ ka imeecheeri engaksï “sáno méntkisï uinhamu ikiajka” (Prov. 29:22). Engachi útasï ísï jámajka eska ióntki, jamberichi jatsiaka para seguiriini mójtakurhini ísï tátsekua engachi na itsï atakuarhiakia. Ju je exeni eksperiensia ma enga xarhatajka eska i ambe ísïiska.

8, 9. ¿Néna xarhatasïni Stepheniiri ejemplu eska jukaparhakueska seguiriini jarhani mójtakukuarhini?

⁸ Erachi ma enga Stephen arhinhajka kánikua úkua jukanchasïreendi pʼíngukuarhini para no uinhamu ikiani. Ima uandantasïndi: “Engani itsï atakuarhipkia, útasïni jánguarhintasïreenga pʼíngukuarhini. Pori ejemplu, ma jurhiatikua engachi aianhpini jámani japka, niraspka andanguni nemani engareni karrueri radiuni sïpacheni japka. Engani jupikani japkia, ima kʼuanikuspti radiuni ka seguiriispti uiriini. Engani aianguapka máteruechani ambe engani úkuarhinchapka, erachirini ma arhispti: ‘¿Amberi úpirini engari jupikapiringa?’. Engareni indeni ambe kurhamarhipka, kuenta íntskukuarhespka eskani jatsispka para seguiriini mójtakukuarhini”. b

⁹ Stepheniiri ejemplujtsïni xarhatachesïndi eskachi úpiringa ménderu ísï jámani eskachi ióntki na jámeenga, nájkirukachi jucha eratseenga eskachi nóteru méni ísï jámapiringia. Engachi niáraska ini ambe úkuarhinchani, ju je no chkétakukuarhini nijtuchi eratseni eskachi noambakiti kristianu máeska. Asta apostoli Pablu jiókuarhispti: “Engani uékani jarhajka úni ambakiti ambe, [...] no sési jásï ambe jarhas[ti] juchiiti mintsitarhu” (Rom. 7:21-23). Jimbokachi no perfektueska, iámindu kristianuechachi ménichani niárasïnga ménderu imani ambe úni engachi ióntki ueenga ka enga ísïijka komueska tʼupuri enga kʼumanchikuarhu ma ménderu tánguarhijka. Ísï jimbo, jatsiskachi para jánguarhintani méntkisï pímbinhasï jarhani. ¿Ambejtsïni jarhuataa?

10. ¿Ambechi uaa úni parachi jánguarhintani jurajkuni imani ambe engachi ióntki ueenga? (1 Juanu 5:14, 15).

¹⁰ Ju je aiangukuarhini Tata Diosï Jeobani ima ambeeri engachi no úni jaka jurajkuni, mintsikaparini eskajtsïni ima kurhajchaaka ka eskajtsïni jarhuataaka (arhinta je 1 Juanu 5:14, 15). Ísïisti, Tata Diosï Jeoba no uaati milagru ma parajtsïni mójtakuni, perujtsïni íntskuati uinhapikua parakajtsïni inde ambe no andaaka (1 Ped. 5:10). ¿Nénachi uaa úni ambe engachi uandajka juchaari kómarhikuecharhu? Uétarhisïndi eskachi jánguarhintaaka no imani ambe úni enga uaaka eskachi májkueni jámaaka eska ióntki. Pori ejemplu, no sési japirindi eskachi  exeapiringa pelikulechani, programeeri telebisionichani o arhintani imani ambe enga ísï xarhatajka eska no no sési jarhaska ima ambe engachi uékani jaka jurajkuni. Ka ju je no jámani eratseni imani ambe enga no sési jaka (Filip. 4:8; Kol. 3:2).

11. ¿Ambechi uaa úni parachi seguiriini jarhani jimbanhi kʼuiripu máeni?

¹¹ Uétarhisïndi eskachi nóteru ísï jámaakia eska ióntki, joperu ístu jukaparhakuesti jimbanhi kʼuiripu máeni. ¿Nénachi uaa ísï úni? Ju je jánguarhintani parachi sánderu sési míteni Tata Diosï Jeobani, imeeri kualidadichani ka májkueni úni eska ima (Efes. 5:1, 2). Pori ejemplu, engachi Bibliarhu arhintaaka ambe ma enga xarhatajka na enga xáni puátspentajka Tata Diosï Jeoba, ju je kurhamarhikuarhini: “¿Ji puákuantasïni máteruechani?”. O, engachi arhintaaka na enga Tata Diosï Jeoba pʼamojperakua xarhatakuajka imeechani engaksï no sési nitamakuarhini jarhajka, ju je kurhamarhikuarhini: “¿Jíjtuni uandanhiasïni erachiichani jimbo engaksï uétarhinchani jaka ambe ma, ka jarhuataasïni?”. Ju je jánguarhintani parachi jimbanhi kʼuiripu máeni ka ísïchi uaaka mójtakuni juchaari eratsekuani, ka ju je no kuatantani engachi jánguarhintani jauaka ísï úni.

12. ¿Stepheniiri ejemplu néna xarhatasïni eska Biblia uinhapikua jatsiska para mójtakuani kʼuiripuechani?

¹² Stephen, engachi párrafu 8 jimbo uandaka, úspti sánhani arhini jimbanhi kʼuiripu máeni. Ima uandantasïndi: “Desde engani itsï atakuarhika, útasïni úkua jukanchasïnga pʼíngukuarhini parani no uinhamu ikiani. Ambe engani újka jindeesti kéndikukuarhini parani no arhijperani máteruechani jingoni o jánguarhintasïnga úni ambe ma paraka no sánderu kʼéri ambe úkuarhiaka. Uánikua kʼuiripuecha ka juchiiti uarhiiti jamberi arhisptijtsïni eskani kánikua sési úxapka, ka jíjtuni ískuni pakarasïnga indeni ambe jimbo. Ji eratsesïnga eskani jandiajku no úpiringa úni ini ambe, sánderu sési, ji uandasïnga eska Biblia uinhapikua jatsiska para mójtakuni kʼuiripuni ma”.

13. ¿Ambejtsïni jarhuataa imani ambe úni enga sési jaka? (Galasia 5:16).

¹³ (Arhinta je Galasia 5:16). Tata Diosï Jeoba intsïmpitiisti ka íntskusïndijtsïni imeeri espiritu santu parajtsïni jarhuatani imani ambe úni enga sési jaka. Engachi jorhenguarhijka Tata Diosïiri Uandakuani, jurajkusïngachi eskajtsïni Tata Diosïiri espiritu jarhuataaka. Ístu, engachi tánguarhikuecharhu nirajka intsïnhasïngachi espiritu santu. Ka jima úsïngachi juchaari erachiicha jingoni jarhani, engaksï májkueni eska jucha, jánguarhintani jaka paraksï ambakiti ambe úni ka inde ambejtsïni uinhaperantasïndi (Ebr. 10:24, 25; 13:7). Ka engachi mintsita jingoni kómarhijka Tata Diosï Jeobani ka kurhakunchi eskajtsïni jarhuataaka jurajkuni ambe ma enga no sési jaka, imajtsïni íntskusïndi imeeri espiritu santu parajtsïni uinhaperantani ka únchi orhepani uérani. Ísïisti, jamberi inde ambe no uaati eskachi nóteru tsitiakia no sési ambe, joperujtsïni íntskuati uinhapikua parachi no niátania indeni ambe. Ísï eska na uandajka Galasia 5:16, imeecha engaksï ísï jámajka eska espiritu santu na uandajka nóksï uaati “eska mintsita tamapu na uékajka”.

14. ¿Andisï xáni jukaparhakue seguiriini jánguarhintani imani ambe úni enga sési jaka?

¹⁴ Engachi ueenakia imani ambe úni engajtsïni jarhuataaka parachi sési pájperakua ma jatsini Tata Diosï Jeoba jingoni, kánikua jukaparhakuesti eskachi no jurajkuaka úni indeni ambe ka eskachi seguiriuaka jánguarhintani imani ambe úni enga sési jaka. ¿Andi? Jimbokachi méntkisï tsitisïnga imani ambe úni enga no sési jaka. Ístu, nájkirukachi itsï atakuarhiakia jamberichi útasï tsitiaka imani ambe úni engachi jucha míteka eska no sési jarhaska komu chʼanani sentabu jimbo, kánikua alkoli arhani o pornografia ambe  exeni (Efes. 5:3, 4). Tumbi ma enga Jeobaeri testigueka uandasïndi: “Ma ambe engani sánderuni úkua jukanchajka jindeesti eskani tsitiasïnga máteru tatakeechani. Ji eratsesïreenga eskani ma tiempujkusïni ísï pʼikuarherapiringa, peruni ménisï útasï ísï pʼikuarherasïnga”. ¿Ambejtsïni uaa jarhuatani engachi kánikua tsitini jauaka imani ambe úni engachi jucha míteka eska no sési jarhaska?

15. ¿Andijtsïnisï uinhaperantajki míteni eskaksï máteruechajtu májkueni jánguarhintaxaka paraksï no úni imani ambe enga no sési jaka? (Exe je imajenini).

¹⁵ Engachi jánguarhintani jaka pʼíngukuarhini parachi no úni imani ambe enga no sési jaka, ju je miáni eskachi no jandiajku jarhaska. Biblia uandasïndi: “Chájtsï no ménderueni tsʼéjkunhaxaka, sino májku jásï eska iámindu kʼuiripuecha” (1 Kor. 10:13a). Máteru Biblia ísï tradusirisïndi íni bersikuluni: “Chájtsï imani mismu tsʼéjkukuechani jatsiaska eska iámindu máteruecha”. I uandakuechaksï jindeespti para Korintu anapuecha. Ka máru imeecha ísku jándikua ambeksï niátaspti, omoseksualisptiksï ka kauicheenksï (1 Kor. 6:9-11). Engaksï ima kristianuecha itsï atakuarhipkia, ¿nóteruksï méni tsitispia indeni ambe úni? Jamberiksï útasï tsitiendi. Ísïisti, iámindu ima kristianuechaksï erakukateespti, joperuksï útasï imperfektuespti. Ísï jimbo, ménichanksï jatsiendi para jánguarhintani no úni imani ambe enga no sési jaka. Míteni ini ambe uinhaperantasïndijtsïni, jimbokajtsïni xarhatachesïnga eskaksï máteruechajtu májkueni ambe nitamakuarhiska eska jucha ka eskaksï úska orhepani uérani. Ísï jimbo, uaakachi mintsikani Tata Diosïni “míteparini eskaksï májku jásï tekaantaxaka [juchaari] ermanuecha iápuru parhakpinirhu” (1 Ped. 5:9).

16. ¿Ambe no sési jarhaski eskachi eratseaka, ka andi?

¹⁶ Nóchi jatsiska para eratseni eska no nema úsïnga kurhanguni ambe engachi nitamakuarhini jarhajka. No sési jarhasti ísï eratseni. Jimboka inde ambe uaati úni eskachi jakajkuaka eskachi no méni uaaka orhepani uérani ka eskachi no uaaka jurajkuni indeni ambe enga  no sési jaka. Joperu Biblia uandasïndi: “Diosï mintsinharhikuesti, ka nóksïni jurajkuati eskajtsï jukari tsʼéjkunhaaka sino xántku eskajtsï xáni uaaka tekaantani, jimboka engajtsï tsʼéjkunhani jauaka, jimajkanimindu Diosïksïni jánhastaa[ti] nani engajtsï na uaaka kuájpikuarhini”, o orhepani uérani (1 Kor. 10:13b). Ísï jimbo, nájkirukachi uinhamu tsitini jauaka imani ambe úni enga no sési jaka, uaakachi tekaantani parachi no jurajkuni Tata Diosï Jeobani. Imeeri jarhuajperata jingoni, uaakachi pʼíngukuarhini ka nóchi uaaka imani ambe enga no sési jaka.

17. Nájkirukachi no uaaka meru nóteru tsitinia imani ambe úni enga no sési jaka, ¿ambechi kʼóru uaa úni?

¹⁷ Ju je miáni eska jimbokachi no perfektueska seguiriini jauakachi imani ambe tsitini enga no sési jaka. Joperuchi jatsiska para sóntku úni ambe ma parachi no no sési ambe niátani, ísï eska José na úpka enga sïpakuarhikupka Potifariiri témbani (Gén. 39:12). Nóchi jatsiska para jurajkuni eskajtsïni andaaka ima ambe engachi tsitijka ka enga no sési jaka.

18, 19. ¿Náki kurhamarhikuechajtsïni jarhuataa seguiriini mójtakuni juchaari eratsekuani?

¹⁸ Eskachi na exekia, parachi mójtakuni juchaari eratsekuani jatsiskachi para seguiriini jánguarhintani paraka Tata Diosï Jeoba jaiapanhentaaka ambe engachi eratsejka ka ambe engachi újka. Ísï jimbochisï jatsika para méntku exekuarhini jarhani ka kurhamarhikuarhinchi: “¿Ambe engani újka xarhatasïni eskani mítetixaka eska Tata Diosï Jeobaeri jurhiatikua axuterku jarhaskia? ¿Seguirixaki jánguarhintani parani jimbanhi kʼuiripu máeni? ¿Jurajkusïni eskarini Tata Diosï Jeobaeri espiritu jarhuataaka parani no úni imani ambe engani tsitijka ka enga no sési jaka?”.

¹⁹ Engachi ini ambe kurhamarhikuarhini jauaka, ju je sési pʼikuarherani imani ambe jimbo engachi úkia mójtakuni ka ju je no erokuarhini eskachi iámindu ambe sési uaaka. Ístu ju je no chkétakukuarhini engachi exeska eskachi jatsiska para mójtakuni ambe ma. Sánderu sési, ju je ísï úni eska na arhijka Filipenses 3:16, TNM: “Joperu na uéjkichi xáni eratsekua jukariinia, ju je seguiriini jarhani sési jámani indeni xanharuni jimbo”. Engachi ísï úska, Tata Diosï Jeobajtsïni újchakuraati jimbokachi jánguarhintasïnga seguiriini mójtakuni juchaari eratsekuani.