1-2. Panganidzai kuti tinodikana kurumbwa teciitei mumasure mekubhabhatidzwa?

 IMWIMWI munosocenesa nyumba yenyu here? Musati maenda ku nyumba yamuri kuda kugara imwimwi munotanga manyasa kuicenesa. Asi cinyi caizoitika kana imwimwi mukasamazve kucenesa nyumba yenyu? Zvezvirokwazvo iyona yaizodzara no marara uye no bukuta nokukasika. Kana tecida kugara no nyumba yakanyasa kurongeka, tinodikana kugara teciicenesa nguwa dzese.

² Kana tecida kugara no marangariro uye unhu unopfadza Djehovha atidikani kusiya kuti izvona zviitike zvega, asi tinodikana kuti tirumbwe teciseenza no simba nguwa dzese. Izvirokwazvo kuti tisati tabhabhatidzwa isusu takaita cinjo dzakakura mu upenyu kuti “tidzicenese pa zviro zvese zvinosvipisa nyama no mwiya.” (2 Ako. 7:1) Asi zvino, isusu tinodikana kuteerera zano ra muphostori Pauro rinoti “rumbwai meciita kuti marangariro enyu agare mapsva.” (Aef. 4:23) Ngei tecidikana kuita izvona? Ngekuti marara uye bukuta re mu nyika ino zvingakwanisa kudzara nokukasika mundangariro uye mu mwoyo medu. Asi kuti izvona zvisaitike uye kuti tirumbwe tecipfadza Djehovha, tinodikana kuongorora nguwa dzese marangariro edu, unhu wedu uye zvido zvedu.

3. Zvinoreyei kuita kuti “marangariro edu agare mapsva?” (Aroma 12:2)

³ Tingaita kudini kuti marangariro edu agare mapsva, kana  kuti kucinja mushobo wedu wekurangarira? (Erengai Aroma 12:2.) Soko re Cigrego rinoti “kugara no marangariro mapsva” ringaturikirhwa reciti “kucinja marangariro enyu.” Isusu atidikani kugara no maitiro akanaka basi mu upenyu wedu, asi tinodikanawo kuongorora zvatiri nge ce mukati uye kuita cinjo dzinodiikanwa kuti tipfadze Djehovha. Atidikani kuita izvona kamwe basi, asi kwenda no kwenda.

4. Tinodikana kuitei kuti marangariro edu asacinjwe nge nyika ino?

⁴ Kana isusu tikazogara anhu akakwana, ticakwanisa kupfadza Djehovha nguwa dzese. Asi dakara mu nguwa iyona, tinodikana kupeta masimba kuti tirarame nge mushobo unopfadza Mwari wedu. Pana Aroma 12:2, muphostori Pauro wakati tinodikana kucinja nzero dzedu kuti tizwisise zvinodiwa na Djehovha katiri. Atidikani kusiya kuti nyika ino iticinje. Tinodikana kumbodziongorora kuti tiziye kuti zvinangwa zvedu uye zvisananguro zvedu zvirikucinjwa ngo mushobo unorangarira Djehovha here kana kuti we nyika.

5. Mibvunzo dzipi dzatinodikana kudziita kuti tipangidze kuti tiri kuetsera zuwa ra Djehovha? (Onai mufanikiso.)

⁵ Rangaridzai zvinoteera. Bhaibheri rinotibvunza kuti tinodikana “kurumbwa tecirangarira nge zve kuguma ke zuwa ra Djehovha.” (2 Ped. 3:12) Imwimwi mungadzibvunzisa kuti: ‘Mushobo wandinorarama unopangidza kuti ndinozwisisa kuti ndiri kurarama mu mazuwa e kupedzesera e mugariro we nyika ino here? Zvisananguro zvangu zvakaringana no fundiso dze pamusoro-soro uye basa zvinopangidza here kuti kuseenzera Djehovha ndico ciro cinonyanya kukosha mu upenyu wangu? Ndinogonda kuti Djehovha acapasa mhuri yangu zvese zvatinoda pakurarama here, kana kuti ndinonetseka nguwa dzese nge zviro zvekurarama nazvo?’ Zvezvirokwazvo, Djehovha anopfara maningi paanona kuti isusu tiri kuita zviri zvese kuti timupfadze.—Mat. 6:25-27, 33; Afi. 4:12, 13.

6. Tinodikana kurumbwa teciitei?

 ⁶ Tinodikana kuongorora mushobo wedu wekurangarira nguwa dzese pedzepo toita cinjo dzinodikanwa. Pauro wakabhuya zviro zviiri zvinokosha ku Akorinti: “Rumbwai mecidziongorora kuti muno kutenda here kana kuti haiwa; rumbwai mecidziongorora kuti makaima kudini.” (2 Ako. 13:5) Kugara “no kutenda” akureyi basi kupinda misangano uye kubuda mu basa rekuparidzira nguwa dzimweni. Asi zvinobatanidza zvatinorangarira, zvatinopfarira no zviya zvinotiitisa kuti tiite ciito. Ndiyo ndaa tinodikana kucinja marangariro edu nge kuerenga Soko ra Mwari, kufundira kurangarira hingana mushobo unorangarira Djehovha uye kuita zviri zvese kuti tipfadze Djehovha.—1 Ako. 2:14-16.

7. Maererano na Aefeso 4:31, 32, ngacipizve catinodikana kuita, uye ngei kuita izvona zvingatishuphira?

⁷ Erengai Aefeso 4:31, 32. Pane kuita basi cinjo pa mushobo wedu wekurangarira, isusu tinodikanawo “kupfeka unhu upsva.” (Aef. 4:24) Asi kuita izvona zvinokumbira kupeta masimba. Pa zviro zvatinodikana kuita, tinodikana kupeta masimba kuti tisiye bundu, kunyangadzwa uye shungu. Asi kuita izvona zvingatishuphira. Ngei? Ngekuti zvinganani zvezviro izvi, zvicakakura mu mwoyo yedu. Bhaibheri rinobhuya kuti pano anhu “anotsamwa nokukasika” uye ano “shungu.” (Zvie. 29:22) Zvingabvira kuti munhu uno zvinetso izvi ungadikana kupeta masimba kuti aite cinjo dzakakura kunyazi mumasure mekubhabhatidzwa hinga zvaticaona mu muezaniso unoteera.

8-9. Muezaniso wa Stephen unopangidza kudini kukosha kazvinoita kusiya unhu wekare?

⁸ Hama imweni inozwi Stephen yainga ino cinetso panyaya yekuonerera shungu. Iyona inoti: “Kunyazi mumasure mekubhabhatidzwa, ndaidikana kupeta masimba kuti ndidzibate. Zuwa rimweni pandainga ndiri mu basa re kuparidzira, mbavha imweni yakaba radhiyo ye karu yangu uye inini ndakaigogomera. Asi pandagaguma dhuze nayo, iyona yakambwedza radhiyoyo uye yakatiza. Asi pandakapanganidzira hama dzimweni kuti ndakakwanisa kudini kugarazve no radhiyo yangu, mukuru umweni wakandibvunzisa kuti: ‘Stephen, waida kuitei kudai waibata mbavheyo?’ Zviro zvakabhuiwa no mukuru uu zvakaita kuti ndirangarire uye zvakandikohomedzesa kuti ndirumbwe ndecipeta masimba kuti ndigare munhu wakaterama.” b

⁹ Hingana zvataona no muezaniso wa Stephen, kunyazi tikaona kuti takwanisa kusiya unhu wakashata, unhuwo ungakwanisa kuuyazve pa nguwa yatisikakariri. Kana izvona zvikaitika kamuri, musadzirhye mwoyo uye musarangaridze kuti imwimwi amuripi Mukristu wakanaka. Muphostori Pauro wene wakabhuya kuti: “Pandinoedza kuita zvakanaka, zvakashata zvinotanga kundigumira.” (Aro. 7:21-23) Hingana zvataona pakutanga, kana tikatama kucenesa nyumba yedu nguwa dzese, marara no bukuta zvingahwirirazve. Ngo mushobo umwewo, ngekuti tiri anhu asikazi kukwana kakawanda kakhona unhu wakashata uya ungahwirirazve. Ndiyo ndaa, tinodikana kurumbwa tecipeta masimba kuti tiukunde. Tingazviita kudini?

10. Ngazvipi zvamungaita kuti murhwisane no marangariro akashata? (1 Juau 5:14, 15)

¹⁰ Kana imwimwi muno maitiro akashata, namatai kuna Djehovha mecikumbira rubetso kuti muakunde uye gondai kuti ayena acamubetserai. (Erengai 1 Juau 5:14, 15.) I zvirokwazvo kuti Djehovha aaseenzesi cishamiso kuti abvise unhu wakashatewo, asi ayena acamupasa simba ramunoda kuti murhwisane  nawo. (1 Ped. 5:10) Itai dii renyu ngekuita zviro maererano no zviya zvamakumbira pamunamato, uye dzidziirirei pa zviro zvinoita kuti unhu wekare uwiyezve. Ngo muezaniso, ngwarirai mafirme, maprograma e paterevhizau kana kuerenga ciro cipi haco cingaitisa kuti muedzurire unhu wakashata wamuri kurhwisana nawo kuti muusiye. Uye musadzadze ndangariro dzenyu no zviro zvakashata.—Afi. 4:8; Ako. 3:2.

11. Ngazvipi zvatinodikana kuita kuti tipfeke unhu upsva?

¹¹ Mumasure mekuti imwimwi masiya unhu wekare, zvinokosha kuti musakurire unhu upsva. Mungazviita kudini? Garai no cinangwa cekufundira mawara a Djehovha uye moateedzera. (Aef. 5:1, 2) Ngo muezaniso, kana imwimwi mukaerenga nyaya ye mu Bhaibheri inopangidza mushobo unorekerera Djehovha, dzibvunzisei kuti: ‘Inini ndinorekerera amweni?’ Uye pamunoona mushobo unokoshesa Djehovha arombo, dzibvunzisei kuti: ‘Kodi inini ndinorangaridzawo kudaro here ku hama dzangu dziri kukonerhwa zvekurarama nazvo uye ndino zvipangidza no zviito?’ Hino rumbwai meciita kuti marangariro enyu agare mapsva ngekupfeka unhu upsva, uye garai no mwoyo unononoka kutsamwa. Edzurirai kuti izvona zvinotora nguwa.

12. Bhaibheri rakacinja kudini upenyu wa Stephen?

¹² Stephen, watamboreketa nge zvake, padoko no padoko iyena wakakwanisa kupfeka unhu upsva. Iyena unoti: “Kubvira pandakabhabhatidzwa, ndakabatana no migariro yakawanda yaizoita kuti ndinyangadzwe. Ndakafundira kurhwisana no migariro yakadai ngekutambira kure no aya aindiambira, kana kuita ciro cimweni kuti ndidzidziirire. Anhu akawanda, kutobatanidzawo no mukadzi wangu aindisimba nge mushobo wandaibata nyaya idzi. Cinjo dzangu dzakatondishamisawo! Inini ndinoona kuti andizi kuzvikwanisa ndega kucinja unhu wangu. Ndinotendera kuti ici cipangidzo ce simba re Bhaibheri rekucinja upenyu we anhu.”

13. Ngazvipi zvicatibetsera kuti tiite zviro zvakanaka? (Agaratiya 5:16)

¹³ Erengai Agaratiya 5:16. Kuita zviro zvakanaka kunoda kuti tipete masimba, uye kuti tikwanise kurumbwa teciita izvona, Djehovha anotipasa no mwoyo wese mwiya mucena. Patinoerenga Bhaibheri, isusu tinotendera kuti mwiya mucena uticinje. Isusu tinopaswawo mwiya mucena patinopinda misangano. Imona, isusu tinopedza nguwa no hama no hanzvadzi, kuitawo hingana isusu awona arikupeta masimba kuti aite zvakanaka uye izvona zvingatibambisa maningi. (Aheb. 10:24, 25; 13:7) Uye patinonamata kuna Djehovha no mwoyo wese tecimudeketerera kuti atibetsere kukunda patakarembera, ayena acatipasa mwiya mucena kuti utibambise uye kuti utibetsere kurumbwa tecirhwisa. Kufunda Bhaibheri, kupinda misangano uye kuita minamato azviitisi kuti unhu wekare uende, asi kuita zviro izvi kucatibetsera kuti isusu tisakundhwe no zvido zvakashata. Hinga zvinobhuiwa na Agaratiya 5:16, kana tikararama maererano no mwiya mucena wa Mwari “atizomboiti zvido zve nyama.”

14. Ngei zvecikosha kuti tirumbwe tecisakurira marangariro akacena?

¹⁴ Mumasure mekugara no urongwa wakanaka we zviro zvekunamata, zvakanaka maningi kuti tirumbwe tino urongwa iwona, uye kupeta masimba kuti tigare no marangariro akanaka. Ngekuti umwe we muzondi wedu unoseenza usiku no masikati. Muzondi uu muedzo wekuita ciro cakashata. Kunyazi mumasure mekubhabhatidzwa, tingahwirirazve kuita zviro zvatainga tisikadikani kuita, zvakaita hingana  kutamba cabutha, kumwisisa doro, kana kuona pornografiya. (Aef. 5:3, 4) Mudjaha umweni we Cikristu unoti: “Cimwe ce zviro candinorhwisa cinondishupha maningi icinetso cekuda munhu we nhengo imweyo yekubereka nayo. Inini ndairangaridza kuti cinetso ce nguwa doko, asi mazwiro aya arikurumbwa aneni.” Ngazvipi zvamungaita kana muri kurhwisa cido cakashata uye cakakura maningi?

15. Ngei zvakanaka kuziya kuti anhu amweni anorhwisanawo no “zvido zvimwezvo zvakashata” zvatiri kurhwisana nazvo? (Onai mufanikiso.)

¹⁵ Kana imwimwi muri kurhwisana no cido cakashata cakakura maningi, edzurirai kuti amuripi mwega. Bhaibheri rinoti: “Apana muedzo wamuri kusongana nawo wakasiyana no muedzo uri kusongana no anhu ese.” (1 Ako. 10:13a) Citurikirhwa cimweni ce Bhaibheri cinoti: “Miyedzo dzamuri kurhwisana nawo ndidzoo dzirikurhwisana no anhu ese.” Masoko aya akatarirhwa ku hama no hanzvadzi dze ku ungano ye ku Korinti. Amweni akhona ainga ari anhu aiita upombwe, anhu aida munhu we nhengo imweyo yekubereka nayo, uye zvidhakwa. (1 Ako. 6:9-11) Asi imwimwi munorangarira here kuti mumasure mekubhabhatidzwa, awona aazi kumbogara no cido cekuita izvona? I zvirokwazvo kuti awona ainga ari Akristu akadzodzwa. Asi ngekuti ainga ari anhu asikazi kukwana, nguwa dzimweni aikwanisa kugara no zvido zvakashata. Kuziya izvona zvingatibetsera. Ngei? Ngekuti zvinotibetsera kuona kuti azvinei no cido cakashata catiri kurhwisana naco, ariyo akakwanisa kucikunda. Tingakwanisa kurumbwa “takabamba pakutenda, teciziya kuti matambudziko atiri kusongana nawo ari kusonganawo no hama dzedu dzese dziri mu nyika yese.”—1 Ped. 5:9.

16. Atidikani kuwira pa murau upi, uye ngei?

¹⁶ Musawire pa murau wekurangaridza kuti apana unozwisisa zvamuri kubatana nazvo. Kurangaridza kudaro zvingaita kuti imwimwi murangaridze kuti apacina camungaita uye kuti amuna simba rekukunda zvido zvakashata. Asi onai basi zvatinofundiswa no Bhaibheri. Irona  rinobhuya kuti: “Mwari akatendeka, uye aazosii kuti muedzwe dakara pamusikakwanisi kushingirira, asi kana pakauya muyedzo, ayena anomupasai simba kuti mukwanise kushingirira.” (1 Ako. 10:13b) Izvi zvinoreya kuti, kunyazi mukabatana no cido cakashata uye cakakura maningi, imwimwi mungakwanisa kucikunda. No rubetso ra Djehovha, isusu tingakwanisa kukunda muyedzo wekuita cakashata.

17. Kunyazi tisikakwanisi kuita kuti tisagare no cido cakashata, ngazvipi zvatinodikana kuita?

¹⁷ Rumbwai meciedzurira nguwa dzese kuti: Tiri anhu asikazi kukwana. Ngokudaro, atikwanisi nguwa dzese kudzidziirira pacido cekuita zvakashata. Asi kana imwimwi mukagara no cido cekuita cakashata, mungakwanisa kuciramba ciripo-ripoco kuitawo hingana Zuzee paakatiza mukadzi wa Potifari. (Gen. 39:12) Imwimwi amudikani kusiya kuti cido cenyu cakashata cimuite kuti muite citema!

18-19. Patinopeta masimba kuti marangariro edu agare mapsva, tinodikana kudziita mibvunzo dzipi?

¹⁸ Kucinja marangariro edu kunobatanidza kupeta masimba nguwa dzese kuti marangariro edu uye zviito zvedu zvipfadze Djehovha. Kuti izvona zviitike, tinodikana kudziongorora nguwa dzese uye todzibvunzisa kuti: ‘Zviito zvangu zvinopangidza here kuti ndinotendera kuti ndiri kurarama mu mazuwa ekupedzesera? Ndiri kukwanisa here kupfeka unhu upsva? Ndiri kutendera here kuti mwiya mucena wa Djehovha undibetsere pakukunda zvido zvakashata uye kutama kuita citema?’

¹⁹ Pamunonga mecidziongorora, musaetsere kuti mugare munhu wakakwana. Asi pfarai ngekubudirira kamaita. Kana imwimwi mukaona kuti zviripo zvamunodikana kugadzirisa, musadzirhye mwoyo. Pane kuita izvona, teererai zano riri pana Afiripi 3:16 rinoti: “Azvinei nokuhambira mberi kataita, tinodikana kurumbwa tecihamba zvakanaka mu gwanza iri.” Kana mukaita izvona, garai no rugondo rekuti Djehovha acakomborera kupeta masimba kamuri kuita kuti mugare no marangariro mapsva.