1-2. Cossa che ghemo de seitar a far anca dopo del batésimo? Spiega.

 METEMO dir che te toca ndar de star in nantra casa. Sicuro che prima de ndar de star lì, te ndarè netarla tanto ben. Ma cossa che ndaria suceder se no te la netessi mai pi? In poco tempo, la casa la restaria sporca. Alora, te toca seitar a netarla se te vol che la sìpia sempre bela.

² Anca noantri ghemo de seitar sforsarse se volemo che quel che pensemo e quel che femo asse Geovà contento. Vanti de esser batesadi, ne ga tocà cambiar tanto par fermarse de pensar e far quel che l’è sbalià. (2 Cor. 7:1) Ma anca dopo del batésimo, ghemo de far quel che Paolo el ga dito e ‘seitar a far nova la nostra maniera de pensar’. (Efe. 4:23) Parché che ne toca seitar a farlo? Parché le robe sbaliade del mondo le pol suito influensar el nostro cuor e la nostra mente. Par quela, ghemo de sempre veder se quel che pensemo, volemo e femo l’è drio assar Geovà contento.

3. Come che podemo far nova la nostra maniera de pensar? (Romani 12:2)

³ Come che podemo far nova la nostra maniera de pensar? (Ledi Romani 12:2. b) Ghemo de far de pi che sol arquante robe bone. Ne ocore vardar quel che semo par  rento e cambiar quel che ne ocore par assar Geovà contento, e ghemo de seitar a farlo.

4. Cossa che ghemo de far par no pensar compagno ale persone del mondo?

⁴ Dopo che deventemo perfeti, saremo boni de contentar a Geovà in tuto quel che femo. Ma par intanto, ghemo de sforsarse par assarlo contento. Nel testo de Romani 12:2, Paolo el ga dito che, par esser boni de far nova la nostra maniera de pensar, ghemo de capir quel che Geovà el vol. Alora, invesse de pensar come le persone del mondo, ghemo de pensar compagno a Geovà e far le nostre dessision de acordo con quel che l’è giusto par lu.

5. Che domande podemo farse par veder se semo drio pensar compagno a Geovà? (Varda la ilustrassion.)

⁵ Vedemo un esémpio che el ndarà giutarne a capir se semo drio pensar compagno a Geovà. Lu el ga dito che sempre ghemo de ricordarse che el fin l’è darente. (2 Pie. 3:12) Alora, ghemo de domandarse: ‘Sarà che la me maniera de viver la mostra che mi capisso che el fin l’è darente? La dessision de far una università o el laoro che go mostra che servir a Geovà l’è la roba pi importante dela me vita? Sarà che mi me fido che Geovà el ndarà tender dela me fameia o son sempre preocupà coi soldi e col me capital?’ Geovà el resta tanto contento quando el vede che semo drio viver come lu el vol. — Mat. 6:25-27, 33; Fil. 4:12, 13.

6. Cossa che ghemo de seitar a far?

⁶ Paolo el ga dito ai corinti che lori i gavaria de seitar a veder se i era pròpio drio far quel che i gavea imparà. (2 Cor. 13:5) Alora, noantri ghemo de seitar a veder se semo drio pensar dela maniera giusta e dopo cambiar quel che ne ocore.  Ma cossa che questo vol dir? Ghemo de far de pi che sol ndar ale riunion o ala predicassion. Ne ocore star atenti a quel che pensemo, sentimo e volemo far. Cossa che pol giutarne a farlo? Sempre leder la Bìblia. Cossita, saremo boni de imparar a pensar compagno a Geovà e far quel che ghe piase a lu. — 1 Cor. 2:14-16.

7. (a) De acordo con Efesi 4:31, 32, cossa ancora ghemo de far? (b) Parché che pol esser fadiga farlo?

⁷ Ledi Efesi 4:31, 32. c Dopo de cambiar la nostra maniera de pensar, ghemo anca de “meter su la nova personalità”. (Efe. 4:24) Sicuro che ghemo de sforsarse tanto par farlo. Par esémpio, fursi ne toca fermarse de restar cativi o inrabiadi. Pol esser che sìpia fadiga farlo parché l’è belche tanto tempo che semo cossita. E come la Bìblia la dise, ghen’è de quei che i resta ‘suito cativi’. (Pro. 29:22) Una persona cossita fursi la gavarà de seitar a sforsarse par cambiar anca dopo de esser batesada. Vedemo un esémpio.

8-9. Cossa che el esémpio de Stephen el ne insegna?

⁸ Varda quel che ga sucedesto con Stephen, che l’è un fradel che el se inrabiea suito. Lu el ga dito: “Anca dopo che son stà batesà, me ga tocà sforsarme parché mi restea suito cativo. Par esémpio, un giorno, èrino drio predicar e un omo el me ga ciavà el ràdio del auto. Alora mi son ndato drio de carera par ciapar el ràdio. Quando son rivà darente de quel omo, lu lo ga trato in tera e el ga scampà via. Son tornà col ràdio in man, e go contà ai fradei cossa che mi gavea fato. Alora un ansiano el me ga domandà: ‘Cossa che te ndarissi far se te gavessi ciapà quel omo?’ Quela domanda la me ga fato capir che me tochea sforsarme de pi par cambiar.” d

⁹ El esémpio de Stephen el ne insegna una roba tanto importante. Pol esser che pensemo che semo stati boni de fermarse de far qualcossa che disgusta a Dio. Ma se no seitemo a sforsarse, una ora o l’altra, tornaremo a farla. Se una roba cossita la ga sucedesto con ti, no stà restar desanimà o pensar che no te sì pi un bravo servo de Geovà. Fin el apòstolo Paolo el ga dito: “Quando mi vui far quel che l’è giusto, rento de mi ghen’è quel che l’è sbalià.” (Rom. 7:21-23) Ricòrdate che tuti noantri semo imperfeti. Alora, cossita come ghemo de seitar a netar la nostra casa, ne ocore seitar a sforsarse par far quel che l’è giusto. Cossa che pol giutarne a farlo?

10. Cossa che ti te ghè de far? (1 Gio. 5:14, 15)

¹⁰ Prega a Geovà e domanda che el te giute a cambiar quel che te ocore, e sìpia sicuro che el ndarà giutarte. (Ledi 1 Gioani 5:14, 15. e) Geovà no’l ndarà finir fora de colpo col to problema, ma el  ndarà darte la forsa che te ocore par cambiar. (1 Pie. 5:10) Ma anca ti te ghè de sforsarte par cambiar. Par esémpio, pol esser che arquanti libri o filmi i mostra che far robe sbaliade l’è bon. Alora, no stà vardarli, e sfòrsate tanto par mai pensar in quel che l’è sbalià. — Fil. 4:8; Col. 3:2.

11. Cossa che pol giutarne a meter su la nova personalità?

¹¹ Alora, noantri ghemo de cavar via la vècia personalità. Ma cossa che pol giutarne a meter su la nova personalità? Ghemo de imparar sora le qualità de Geovà e proar far compagno a lu. (Efe. 5:1, 2) Par esémpio, se te sì drio leder la Bìblia, e te impari che Geovà el vol tanto perdonar a tuti, te pol domandarte: ‘Sarà che anca mi son bon de perdonar i altri?’ O se te sì drio leder sora come Geovà el tende dei poareti, domàndate: ‘Sarà che anca mi son drio giutar quei che i ga de bisogno?’ Alora, seita a sforsarte par cambiar quel che te pensi e quel che te fè. Ma porta passiensa parché ghe vol tempo par farlo.

12. Come che el esémpio de Stephen el mostra che la Bìblia la pol pròpio cambiar la vita de una persona?

¹² Stephen, che ghemo parlà prima, l’è stà bon de meter su la nova personalità. Lu el ga dito: “Dopo che son stà batesà, arquante volte me ga tocà sforsarme tanto par no restar inrabià. Mi go imparà a tirarme distante dele persone che le me dise su e a esser bon de restar calmo. Par quela, la me dona e altre persone le me ga lodà. L’è vera che mi resto tanto contento de veder che go cambià, ma mi sò che no saria mai bon de farlo mi sol. Invesse, son ancora pi sicuro che la Bìblia la pol pròpio cambiar la vita de una persona.”

13. Cossa che ndarà giutarne a seitar a far quel che l’è giusto? (Gàlati 5:16)

¹³ Geovà el ne giuta a seitar a far quel che l’è giusto par via del so spìrito santo. Alora, come che podemo gaverlo? Quando ledemo la Bìblia, assemo che el spìrito santo el ne mostre quel che ghemo de cambiar e el ne giute a farlo. Noantri anca ricevemo spìrito santo quando ndemo ale riunion. Restemo incoraiadi quando semo insieme ai nostri fradei parché anca lori i ze drio sforsarse par far quel che l’è giusto. (Ebr. 10:24, 25; 13:7) E quando preghemo a Geovà e ghe domandemo el so aiuto, lu el ne dà el spìrito santo e la forsa che ne ocore. Alora, ghemo de studiar la Bìblia, ndar ale riunion e pregar a Geovà. Cossita, anca se fursi ne vien voia de far quel che l’è sbalià, ‘no ndaremo drio a questa voia’. — Ledi Gàlati 5:16. f

14. Parché che l’è importante seitar a sforsarse par pensar in quel che l’è giusto?

¹⁴ Quando scominsiemo a far le robe che le ne giuta a gaver una forte amicìssia con Geovà, ghemo de seitar a farle e sforsarse par pensar sol in quel che l’è giusto. Parché? Parché ghemo rento de noantri la voia de far quel che l’è sbalià. Fursi anca dopo de esser batesadi, gavaremo voie sbaliade, come bever massa, veder pornografia o giugar par guadagnar soldi. (Efe. 5:3, 4) Un fradel che l’è gióveno el ga dito: “Me toca sforsarme  tanto parché go tanta voia de smorosar con nantro omo. Mi pensea che dopo de un tempo no gavaria pi questi sentimenti, ma ancora li go.” Cossa che pol giutarte se te ghè voia de far una roba che la ze sbaliada?

15. Parché che l’è bon saver che altri servi de Geovà i ga bio de sforsarse par far quel che l’è giusto? (Varda la ilustrassion.)

¹⁵ Varda quel che Paolo el ga dito ai fradei de Corinto: “Le tentassion che gavé infrontà no le ze difarente de quele che i altri i infronta.” (1 Cor. 10:13a) Arquanti de quei fradei e sorele i gavea fato tante robe sbaliade vanti de cognosser a Geovà, come imoralità sessual e bever massa. (1 Cor. 6:9-11) L’è vera che lori i era drio servir a Geovà e i gavea la speransa de viver nel cielo. Ma quei fradei i era imperfeti e ghe tochea seitar a sforsarse par no far quel che l’è sbalià. L’è bon saver che altri servi de Geovà i ga bio de sforsarse tanto par far quel che l’è giusto. Parché? Parché se lori i ze stati boni de dàrghene fora cola voia de far quel che l’è sbalià, anca noantri saremo boni de farlo. Quando vedemo che fradei de tuto el mondo i ze drio infrontar i medèsimi problemi che noantri, ghemo pi forsa par seitar leai a Geovà. — 1 Pie. 5:9.

16. Cossa che no te ghè mai de pensar, e parché?

¹⁶ Se te sì drio sforsarte par dàrghene fora con una voia sbaliada, no stà mai pensar che nissun l’è bon de capirte. Pensar cossita l’è una tràpola. Parché? Parché te pol pensar che no te gavarè la forsa par far quel che l’è giusto e che mai te sarè bon de dàrghene fora con questa voia sbaliada. Invesse, ricòrdate de quel che la Bìblia la dise: “Dio no’l assarà che valtri sìpie provadi de pi che podé soportar. Ma quando vegnarà la tentassion, lu anca el ve giutarà a dàrghene fora.  Cossita, valtri saré boni de soportarla.” (1 Cor. 10:13b) Alora, anca che te gàpia tanta voia de far una roba che la ze sbaliada, te pol far quel che l’è giusto. Sicuro che col aiuto de Geovà, te sarè bon de farlo.

17. Cossa che ghemo de far se ne vien voia de far quel che l’è sbalià?

¹⁷ Pol esser che, dele volte, gavaremo voia de far quel che l’è sbalià, parché semo imperfeti. Cossa che ne toca far se ne sucede una roba cossita? Ghemo de cambiar quel che semo drio pensar. Podemo ricordarse de Giusepe, che el ga scampà via quando la dona de Potifar la ga volesto far imoralità sessual con lu. (Gén. 39:12) Alora, anca che ne vien voia de far quel che l’è sbalià, no ne ocore ndarghe drio.

18-19. Che domande ghemo de farse?

¹⁸ Come ghemo visto fin adesso, se noantri femo nova la nostra maniera de pensar, quel che femo e quel che pensemo ghe piaserà a Geovà. Par quela, ghemo de domandarse: ‘Quel che mi fao nela me vita mostra che credo pròpio che el fin l’è darente? Mi me sforso del bon par meter su la nova personalità? Son drio far quel che ghe ocore par ricever el spìrito santo de Geovà e el so aiuto par dàrghene fora cole voie de far robe sbaliade?’

¹⁹ Resta contento con quel che te sì stà belche bon de cambiar. Ricòrdate che no te sì mia perfeto, ma seita a sforsarte par far quel che l’è giusto. (Fil. 3:16) Cossita, Geovà el ndarà benedirte e te sarè bon de far nova la to maniera de pensar.