1-2. Mila manohy man̈ino atsika ndray efa vita batisa? Hazavà.

 EFA impiry anao zay nan̈adio tran̈onao? Talohany anao hifindra amy tran̈o io, anao mety efa nan̈adio izio mare. Akory ndraiky izikoa tafaranizen̈y anao efa tsy nan̈adio eky? Hainao tsara fa haloto mare ndreky ho feno laposiera ndraiky tran̈o io. Ke baka tran̈onao hadio fo, anao mila man̈adio izio matetiky.

² Karaha zen̈y koa, atsika mila tsy voly man̈itsy eritreritrintsika ndreky toetrintsika. Marin̈y ndraiky fa talohany atsika nan̈ano batisa, atsika efa nifen̈y mare niova ke ‘nan̈adio ain̈intsika, baka atsika ho afaka amy raha jiaby mandoto nofotro ndreky sain̈y.’ (2 Kor. 7:1) Fa zioty ndraiky, atsika mila man̈araka torohevitry apostoly Paoly man̈iraka atsika ‘tsy voly han̈avao toetsain̈intsika.’ (Efes. 4:23) Nan̈ino atsika mila manohy man̈ano zen̈y? Fotony betibetiky fo atsika mety efa ho feno laposiera ndreky lotony donia ty. Ke baka atsika ho hitany Jehovah madio fo, mila dinihintsika matetiky toetsain̈intsika, toetrintsika avio fan̈irian̈antsika.

3. Ino ma dikany ‘man̈avao sain̈y’ zen̈y? (Romanina 12:2)

³ Atsika mila man̈avao sain̈intsika. Karakory ma zen̈y? Mila ivoantsika toetsain̈intsika. (Vakia Romanina 12:2.) Ino raha  mila atao baka hahavitan̈a zen̈y? ‘Man̈avao sain̈intsika’ zen̈y tsy vitany man̈ano raha tsara vitsivitsy fo, fa mila dinihintsika tsarabe toetrintsika, avio ivoantsika lan̈iany raha mila ivoan̈a. Zen̈y han̈ampy atsika han̈araka fitsipiky Jehovah tsarabe. Tsy indraiky fo atsika mila man̈ano zen̈y, fa atao mitohy.

4. Ino raha tokony hataontsika baka atsika tsy hifindrany toetsain̈iny donia ty?

⁴ Lera atsika lavorary, ho vitantsika fo han̈ano raha mamparavoravo Jehovah amy raha jiaby ataontsika. Fa parapaviany zen̈y, atsika tsy maintsy mifen̈y angovo jiaby vo mahavita zen̈y. Aleva onon̈o fa amy Romanina 12:2, Paoly nivolan̈a fa atsika mila man̈avao sain̈intsika baka atsika mahay ino raha takiny Jehovah amintsika. Ke baka atsika tsy hifindrany toetsain̈iny donia ty, atsika antsendriky mila mandiniten̈a. Ohatra, lera atsika man̈apetraka tanjon̈o ndreky mangala fanapahankevitry, atsika mety man̈ontany: Fomba fisain̈any Jehovah sa toetsain̈iny donia ty ny ten̈a mibeko zaho?

5. Akory ahaizantsika asa atsika ten̈a mino fa efa marikitry ankitin̈y andrany Jehovah? (Zahava sary.)

⁵ Diniha baka ty: Atsika tiany Jehovah ‘tsy han̈adoso an̈aty sain̈intsika faviany andrany Jehovah.’ (2 Pet. 3:12) Ke man̈ontania ten̈a karaha ty: ‘Hita amy fomba fiain̈ananaka ma fa zaho mino fa efa ten̈a marikitry hifaran̈a donia ty? Hita amy fanapahankevitry ataoko momba fianaran̈a ndreky asa ma fa fanompoan̈a Jehovah ny raha ten̈a maventy aminaka? Mino ma zaho fa vitany Jehovah han̈amia raha ilaiko ndreky niny fianakavian̈anaka? Sa zaho tsy voly miasaloha amy fanan̈ana?’ Iritrireta haravoan̈any Jehovah koa fa mahita atsika man̈ano sitraponany amy raha jiaby ataontsika.​—Mat. 6:25-27, 33; Fil. 4:12, 13.

6. Mila tsy voly man̈ino atsika?

 ⁶ Atsika mila mandiniten̈a matetiky avio man̈itsy raha tokony hahitsy. Paoly nivolan̈a karaha ty tamindro Korintianin̈y aby io: “Mandiniha ten̈a fo baka ho hitanaro na anaro mbala an̈aty finoan̈a na tsy an̈atiny, baka io diniha fo man̈ano akory ain̈inaro.” (2 Kor. 13:5) “An̈aty finoan̈a” zen̈y tsy vitany mandeha mivory ndreky mitory tsindraikindraiky fo. Tafiditry amizio koa raha iritriretintsika, raha irintsika, avio antony mahavy atsika man̈ano raha. Ke zen̈y mahavy atsika mila tsy voly man̈avao sain̈intsika. Karakory atao man̈ano zen̈y? Mamaky Volan̈a Zan̈ahary, mifen̈y hanan̈a fomba fihevitrinany, avio mifen̈y man̈ano sitraponany.​—1 Kor. 2:14-16.

7. Koa zahan̈a Efesianina 4:31, 32, ino koa raha mila ataontsika, avio nan̈ino raha zen̈y tsy mora?

⁷ Vakia Efesianina 4:31, 32. Ankoatrany man̈ova toetsain̈intsika, misy raha maventy hafa koa mila ataontsika. Tsy ino zen̈y fa ‘misikiny toetry vaovao.’ (Efes. 4:24) Mila mifen̈y atsika vo hahavita zen̈y. Tafiditry amy zen̈y, man̈adoso toetry ratsintsika, karaha ataony lolompô, hinihiny, avio heloko mare. Kanefa tsy mora miala amy toetry ratsy sasany. Mivolan̈a, ohatra, Baiboly fa misy olo “mora meloko” ndreky “mora man̈ajima.” (Ohab. 29:22) Ke ndray efa vita batisa olo araiky, mety mbala mila miezaka fo izy miala amy toetry karaha zen̈y. Zen̈y raha ho hitantsika amy tantaranolo man̈araka ty.

8-9. Nan̈ino tantarany Stephen man̈aboaka fa atsika mila tsy voly man̈adoso toetrintsika taloha?

⁸ Sarotro tamy rahalahy araiky nifehy helokonany. Stephen an̈arany rahalahy io. Hoizy: “ Ndray tafarany batisanaka, mbala niady mare zaho vo nahavita nitana helokonaka. Tandraraiky, ohatra, tamy zahay nitory isaka tran̈o, nisy olo nangalatra radiony tomabilinaka. Nian̈iko pangalatra io. Koa fa narikitry ho takako izy, natsipiny tan̈y radionaka avio izy nilefa. Nitantaraiko tamindro niaraka nanompo taminaka tio akory fomba nazahoako radionaka, ke antipan̈ahy araiky tio nan̈ontany zaho karaha ty: ‘Stephen, akory eky nataonao izikoa tatranao olo in̈y?’ Fan̈ontanian̈a zen̈y nahavy zaho loso diniky mare ndreky nandrisiky zaho hifen̈y tsy ho mora meloko.” b

⁹ Tantarany Stephen in̈y nahitantsika fa mety tsy azontsika onon̈o aby himpodianany toetry ratsintsika, ndray atsika efa mieritreritry fa efa nahavita niady tamizio. Izikoa zen̈y raha mahazo anao, aza rivan̈a avio aza mieritreritry foeky fa anao efa tsy man̈eva kahian̈a Kristianin̈y. Nan̈ino? Fotony ndray apostoly Paoly fo mba niaiky karaha ty: “Zaho koa fa man̈iry han̈ano ny tsara, ny ratsy tsy afaka an̈atiny ain̈inaka ato.” (Rom. 7:21-23) Samby mbala miady amy toetry ratsy aby Kristianin̈y jiaby fotony tsy lavorary. Toetry ratsy aby io miran̈a laposiera ndreky loto avy hoazy an̈atiny tran̈ontsika. Zen̈y mahavy atsika mila mifen̈y hadio fo. Akory hahavitantsika zen̈y?

10. Akory fomba iadivantsika amy toetry ratsintsika? (1 Jaona 5:14, 15)

¹⁰ Mivavaha amy Jehovah koa hitanao sarotro aminao miala amy toetry ratsy sasany. Matokisa fa izy hitandren̈y anao sady han̈ampy anao. (Vakia 1 Jaona 5:14, 15.) Marin̈y ndraiky fa Jehovah tsy han̈ano fahagagan̈a han̈adosoan̈a toetry ratsinao, fa izy han̈amia angovo anao baka anao tsy ho rivan̈a fa hifen̈y hiady amizio fo. (1 Pet. 5:10) Ke man̈anaova raha mifan̈araka amy vavakanao. Karakory ma zen̈y? Iariva raha mety hampipody toetrinao taloha io. Ohatra, mitandrema  tsao karaha mankatsara toetry iadivanao io boky vakinao ndreky filma na fandaharan̈a amy tele zahavanao. Ankoatranizen̈y, aza ambela hidoko an̈atiny jerinao foeky fan̈irian̈a ratsy.​—Fil. 4:8; Kol. 3:2.

11. Ino raha mila ataontsika baka atsika hisikiny toetry vaovao fo?

¹¹ Ino raha maventy mila ataonao ankoatrany mifen̈y hiala amy toetrinao taloha? Mamboly toetry vaovao. Akory hahavitanao zen̈y? Anao koa fa mianatra momba toetriny Jehovah, ataova tanjon̈o hangala tahaka izy. (Efes. 5:1, 2) Ohatra, anao koa fa mamaky tantara amy Baiboly man̈aboaka fa Jehovah man̈ambela hadisovan̈a, man̈ontania ten̈a karaha ty: ‘Mba man̈ambela hadisovan̈anolo edy zaho?’ Na anao koa fa mamaky tantara ahitan̈a fa Jehovah mahinakinaka olo masikiny, man̈ontania ten̈a karaha ty: ‘Mba mahay mahinakinaka karaha Jehovah edy ma zaho ke man̈ano raha koa fa mahita fahasahiran̈any rahalahy ndreky ranabavy?’ Mifen̈a fo man̈avao sain̈inao ke aza voly misikiny toetry vaovao. Fa an̈atiny anao man̈ano zen̈y, anao aza mora rivan̈a aminy ain̈inao.

12. Akory nahitany Stephen fa mahavita man̈ova olo ankitin̈y Baiboly?

¹² Hitany Stephen, araiky nikoran̈intsika taloha tarỳ in̈y, fa tsy indraiky mipaka izy nahavita nisikiny toetry vaovao io fa tsihelihely. Hoizy: “Rango tamy batisanaka, naro raha nety nahavy zaho tsy hahafehy helokonaka. Fa izy fo, zaho miary koa fa misy olo mitsikitry zaho, na zaho mitady fomba handamin̈an̈a koran̈a koa fa hitako mety ho ratsy raha. Maro olo nidera zaho koa fa nahita zaho kalma fo ndray nisy raha tokony hampameloko zaho, an̈isanizen̈y vadiko. Ndray zaho koa mba gaga! Koa zaho manokan̈a edy, tsy nahavita niova. Ke hitako tsarabe fa mahavita man̈ova olo ankitin̈y Baiboly.”

13. Ino raha han̈ampy atsika han̈iry han̈ano ny tsara? (Galatianina 5:16)

¹³ Vakia Galatianina 5:16. Jehovah man̈amia atsika fan̈ahy masin̈y baka hahavitantsika han̈ano ny tsara. Atsika koa fa mianatra Baiboly, atsika man̈ambela fan̈ahy masin̈y hiasa amintsika. Mahazo fan̈ahy masin̈y koa atsika izikoa fa mivory. An̈y baka atsika miaraka amindro rahalahy ndreky anabavy mifen̈y mare man̈ano ny tsara, karaha atsika fo, ke ten̈a mankahery. (Heb. 10:24, 25; 13:7) Avio, lera atsika mivavaka amy fô jiaby ndreky miangavy Jehovah han̈ampy atsika hiady amy fahalimian̈antsika, izy han̈amia atsika fan̈ahy masin̈y, ke atsika hahazo angovo hiadivan̈a amy fahalimian̈a io. Marin̈y ndraiky fa raha aby nivolan̈intsika tio in̈y tsy han̈afoan̈a fan̈irian̈a ratsintsika, fa ndray zen̈y, iro io han̈ampy atsika tsy han̈eky han̈ano raha ratsy. Eraka raha koran̈iny Galatianina 5:16, lan̈iany olo man̈eky taritiny fan̈ahy ‘tsy han̈atanteraka fan̈irian̈any nofotro foeky.’

14. Nan̈ino anao tokony hifen̈y hanan̈a fan̈irian̈a tsara?

¹⁴ Mety efa manomboko man̈ano raha han̈ampy anao hanan̈a fifandraisan̈a tsara amy Jehovah anao amy zioty. Ke aza ivoan̈a eky fahazaran̈a tsara efa anan̈anao io avio mifen̈a hanan̈a fan̈irian̈a tsara. Nan̈ino raha zen̈y ten̈a raha maventy? Fotony araiky amindro fahavalontsika aby io tsy voly miady amintsika! Tsy ino izio fa fan̈irian̈a tihan̈ano raha ratsy. Ndray afarany batisantsika, atsika mety mbala tihan̈ano raha efa haintsika fa tsy mety, karaha ataony miloka, migiaka toaka be, na mizaha sary vetaveta. (Efes. 5:3, 4) Nisy rahalahy tanora araiky niaiky karaha ty: “Raha araiky ten̈a sarotro taminaka, zaho manan̈a fan̈irian̈a tihiaraka amy lelahy karaha zaho. Zaho nieritreritry fa raha  zen̈y raha mandalo fo, kanefa mbala tsy afaka aminaka fo fan̈irian̈a io firaka amy zioty.” Ino raha han̈ampy anao hiady amy fan̈irian̈a ten̈a ratsy sady mahery?

15. Nan̈ino mankahery atsika mahay fa fan̈irian̈a ratsy io “pahazo olo”? (Zahava sary.)

¹⁵ Izikoa anao miady mare hifehy fan̈irian̈a ratsy araiky ten̈a mahery, tsarova fa tsy anao zaraiky tatrany zen̈y. Baiboly mivolan̈a fa ‘fitsapan̈a pahazo olo jiaby fo avoa anao io.’ (1 Kor. 10:13a) Misy fandikanteny hafa mandika andininy io karaha ty: “Tsisy amy fitsapan̈a mahazo anaro ke tsiary favoa olo.” Nandeha tamindro Kristianin̈y lelahy ndreky man̈angy tamy fiangonan̈a ta Korinto volan̈a aby io. Sasany tamindro baka taloha nandiadia vady, lelahy manambady lelahy, na man̈angy manambady man̈angy, na mamolava. (1 Kor. 6:9-11) Anao ma mieritreritry fa iro tsiary ndraiky nisy fan̈irian̈a ratsy tafarany batisandro? Tsy zen̈y foeky. Marin̈y fa iro jiaby samby Kristianin̈y voahosotro, fa ndray zen̈y, iro mbala olombelon̈o tsy lavorary. Ke azo antoko fa tsy maintsy mbala niady tamy fan̈irian̈a ratsy fo iro, ndraikindraiky. Tsy hitanao mankahery atsika raha zen̈y? Ke na ino na ino fan̈irian̈a ratsy iadivanao, aleva onon̈o fa efa nisy namantsika nahavita tsy nan̈ano izio. Ke anao afaka ho ‘fatatra finoan̈a fo, fotony hainao tsarabe fa tsy anao zaraiky mijaly karaha io fa rahalahinao amy tany jiaby koa.’​—1 Pet. 5:9.

16. Ino fandriky mila tandremantsika, avio nan̈ino?

¹⁶ Ho voafandriky anao izikoa mieritreritry fa tsisy olo mahatsapa raha mahazo anao. Nan̈ino? Fotony anao koa tsy voly mieritreritry karaha zen̈y, farany anao hieritreritry fa anao tsy azo avotan̈a eky, ke tsy ho hisy angovo hiadivan̈a amy ratsy io. Kanefa Baiboly mivolan̈a karaha ty: “Zan̈ahary tsy mivadiky amy raha efa nivolan̈iny, ke izy tsy mety han̈ambela anaro hitsapain̈y mandilatra raha tondranaro, fa izikoa fa misy fitsapan̈a, mbala  hasiany lalan̈a koa hiboahanaro, baka anaro mahatondra izio.” (1 Kor. 10:13b) Ke ndray mafy karakory fan̈irian̈a ratsy an̈atintsika ao, afaka tsy hivadiky amy Jehovah fo atsika. Izy han̈ampy atsika ke ho vitantsika fo tsy han̈ano raha ratsy.

17. Ino raha azonao atao, ndray iô fan̈irian̈a ratsinao?

¹⁷ Ty raha tsy mila adin̈antsika: Atsika tsy lavorary ke fan̈irian̈a ratsy tsy miala amintsika. Fa izikoa izio miboaka, anao afaka manohitry izio direkty. Efa zen̈y edy raha nataony Josefa taminizy nilomoay nilefa vadiny Potifara in̈y. (Gen. 39:12) Anao tsy voatery han̈atanteraka fan̈irian̈a ratsinao.

18-19. Izikoa atsika mifen̈a man̈avao sain̈intsika, ino aby fan̈ontanian̈a mila apetrakantsika aminy ain̈intsika?

¹⁸ Dikany man̈avao sain̈intsika zen̈y, mifen̈y fo baka eritreritrintsika ndreky raha ataontsika mamparavoravo Jehovah. Ke atsika mila mandiniten̈a matetiky karaha ty: ‘Hita amy raha ataoko ma fa ikeko fa efa marikitry ankitin̈y farany donia ty? Zaho ma efa mifen̈y misikiny toetry vaovao? Zaho ma man̈ambela fan̈ahy masin̈y hitariky zaho baka ho vitako hanohitry fan̈irian̈any nofotro?’

¹⁹ Anao koa fa mandiniten̈a, diniha ezaka vitanao ke miravoravoa amy zen̈y, fa aza mitaky raha lavorary. Aza kivy izikoa hitanao fa mbala misy raha mila iezahanao. Fa areha torohevitry amy Filipianina 3:16 ty: “Ke na ino na ino fandrosoan̈a efa vitantsika, atsika mbala mila miezaka mandroso karaha zen̈y fo.” Anao koa man̈ano zen̈y, matokisa fa Jehovah hitahy ezaka jiaby ataonao tsy voly man̈avao sain̈inao.