1-2. (a) Pouki i pa ka sipwi nou lè nou ka èspéyansé pwoblenm? (b) Kisa nou kay konsidiwé an atik sala?

 KON pèp Jéhova i pa ka sipwi nou lè nou ka èspéyansé pwoblenm, paski Bib-la di “[nou ni pou] pasé an chay twaka an lavi sala pou nou jwenn tout sé bon bagay-la Bondyé ja pwonmèt sé moun-an i ka kondwi-a.” (Twav. 14:22) Osi, nou sav adan sé pwoblenm-lan nou ka èspéyansé apwézan pa kay doubout jistan nou ka viv an pawadi-a, paski Bib-la pwonmèt, a lè sala “la pa kay ni lanmò ankò. La pa kay ni lapenn ében pléwé ében soufwans ankò”.​—Wév. 21:4.

² An lòt bagay nou sav sé sa, Jéhova pa ka pwotéjé nou hòd tout pwoblenm. Mé, i ka toujou édé nou andiwé anba népòt pwoblenm nou pé èspéyansé. Pou ègzanp zapòt Pòl épi adan sé fwè-a té ka èspéyansé an chay pwoblenm. Noté sa i di sé Kwityen-an an Ronm. I di yo: “Jézi ki ni lanmityé pou nou-an fèʼy posib pou nou sa ni laviktwa nèt anho tout bagay.” (Ronm 8:35-37) Mé kisa sa vlé di? Ében sa vlé di, Jéhova sa édéʼw éwisi lèʼw ka èspéyansé an pwoblenm. An atik sala, nou kay konsidiwé mannyè Jéhova té édé Jozèf éwisi, èk mannyè Jéhova sa édéʼw éwisi.

3. Ki mannyè lavi Jozèf té chanjé sibitman?

³ Tout moun an fanmi Jakòb té byen konnèt i té enmen gasonʼy Jozèf an chay. (Jen. 37:3, 4) Èk pou wézon sala, sé pli gwan fwè Jozèf-la té jalouʼy. Alò, lè yo twapé chans-lan, yo vann Jozèf kon yon èslav bay an gwoup machann ki té sòti péyi Midiyann. Sé machann sala pwan Jozèf èk yo mennenʼy an péyi Éjip. Sa sété plizyè san lyé hòd plas li. Lè sé machann-lan wivé Éjip, yo vann Jozèf bay an nonm ki té ka twavay bay Féro, nonʼy sété Pòtifa, èk sé li ki té chèf gad Féro. Imajiné sa, Jozèf té lakay papaʼy, èk papaʼy té enmenʼy an chay. Mé laviʼy chanjé sibitman, djòs kon sa i vini yon èslav lakay on Éjipsyen!—Jen. 39:1.

4. Ki pwoblenm nou pé èspéyansé?

⁴ Bib-la di ‘tout moun ka èspéyansé pwoblenm.ʼ (Éklé. 9:11, Holy Bible​—Easy-to-Read Version) Délè nou pé èspéyansé sé menm pwoblenm-lan “lòt moun” ka èspéyansé. (1 Kòr. 10:13) Osi nou pé èspéyansé pwoblenm paski nou sé disip Jézi. Pou ègzanp, moun pé pwan nou sèvi widitjil, yo pé opozé nou, ében yo pé jis pèsikité nou paski nou ni lafwa an Jézi. (2 Tim. 3:12) Mé népòt pwoblenm ou ka èspéyansé, Jéhova sa fèʼw éwisi. Alò, ki mannyè Jéhova té édé Jozèf éwisi?

5. Ki moun Pòtifa té wéyalizé ki té ka édé Jozèf éwisi? (Jennésis 39:2-6)

⁵ Li Jennésis 39:2-6. Pòtifa òbzòvé Jozèf sété an jenn nonm ki té ni ladwès, èk i té ka twavay wèd. Pòtifa té osi konnèt wézon-an, paski i wéyalizé sété ‘Jéhova ki té ka benni tout sa Jozèf té ka fè.ʼ b Konsa apwé an tan, Pòtifa té fèʼy vini sèvant pèsonnèl li. Épi i osi mété Jozèf wèskonsab tout kay li. A kòz di sa, Jéhova benni Pòtifa.

6. Ki mannyè ou kwè Jozèf té ka santi an sitiwasyon-an i té yé-a?

⁶ Annou imajiné mannyè Jozèf té ka santi an sitiwasyon-an i té yé-a. Kisa ou kwè Jozèf té vwéman vlé? Ès ou kwè sa ki té pli enpòtan pou li sété pou plè Pòtifa? Mé non! San dout, Jozèf té vlé yo libéwéʼy pouʼy té sa viwé jwenn papaʼy. Magwé i té ni an gwo pozisyon an kay Pòtifa, Jozèf sété yon èslav. Èvèk mèt li sété an nonm ki pa té ka adowé Jéhova. Mé Jéhova pa té pousé Pòtifa pou libéwé Jozèf. Èk malèwèzman, Jozèf té kay èspéyansé pwoblenm ki té kay otan pli mové pasé sa i té ja èspéyansé.

7. Ki mannyè sitiwasyon Jozèf té vini pli mové pasé i té yé avan? (Jennésis 39:14, 15)

⁷ Jennésis chapit 39 ka moutwé, madanm Pòtifa té vlé Jozèf. Anfen, plizyè fwa i té ka éséyé pou fè Jozèf kouché épiʼy. Mé chak fwa, Jozèf té ka diʼy non. Finalman, madanm Pòtifa vini tèlman faché épi Jozèf, i manti asouʼy èk i di Jozèf té vlé anvyoléʼy. (Li Jennésis 39:14, 15.) Lè Pòtifa tann sa, i voyé Jozèf an pwizon, èk Jozèf wèsté an pwizon pou plizyè lanné. (Jen. 39:19, 20) Ki mannyè lavi Jozèf té yé an pwizon? Mo pawòl-la Jozèf sèvi pou “pwizon” an langaj Hibrou vlé di, “an pi”, ében “an tou”. Sa ka di nou, pwizon-an sété an plas ki té nwè, èk Jozèf té ka santi dékonpòté. (Jen. 40:15) Osi, Bib-la ka moutwé, yo té anchenné Jozèf an dé pyéʼy èk an kouʼy padan i té an pwizon. (Sam 105:17, 18) Wi, sitiwasyon Jozèf té vini otan pli mové pasé i té yé avan. Chonjé, an ti tan avan sa, Jozèf sété yon èslav, èk mèt li té ka konfyéʼy. Mé apwézan i sé an pwizonnyé adan an ti tou nwè.

8. Si an pwoblenm ou ka èspéyansé ka vini pli mové, ki asiwans ou sa ni?

⁸ Ès ou janmen èspéyansé an pwoblenm, èvèk ou ka kontiné pwédyé ofon tjèʼw mé andji pou bagay vini pli mèyè, i ka vini pli mové? Wi, sa pé fèt. Pas chonjé, nou ka viv an latè sala ki anba kondwit Satan, èvèk Jéhova pa ka pwotéjé nou hòd tout pwoblenm. (1 Jan 5:19) Mé magwé sa, ou sa asiwé ou ni an chay valè an zyé Jéhova. I konnèt tout bagay ou ka èspéyansé èvèk i ka gadé apwéʼw. (Maf. 10:29-31; 1 Pita 5:6, 7) Osi chonjé sa Jéhova pwonmèt: “Mwen pa kay janmen [kitéʼw], mwen pa kay janmen tounen do mwen [anlèʼw].” (Hib. 13:5) Konsa, Jéhova sa édéʼw tjébé fò menm si ou ka èspéyansé pwoblenm ki byen téwib. Annou konsidiwé mannyè Jéhova té édé Jozèf tjébé fò lèʼy té ka èspéyansé pwoblenm ki té byen mové.

9. Ki mannyè nou sav Jéhova té épi Jozèf lèʼy té an pwizon? (Jennésis 39:21-23)

⁹ Li Jennésis 39:21-23. Magwé bagay té vini pli mové pou Jozèf lèʼy té an pwizon, Jéhova té édéʼy éwisi. An ki mannyè i té fè sa? Ében apwé an tan, chèf pwizon-an koumansé konfyé èk wèspèkté Jozèf, menm kon Pòtifa té ka fè. Konsa i mété Jozèf wèskonsab pou tout sé pwizonnyé-a. Anfen Bib-la di: ‘Chèf pwizon-an pa té ka gadé anyen Jozèf té wèskonsab pou.ʼ Apwézan Jozèf té ni bon twavay pou fè, konsa, sa té kay tiwé lidéʼy asou pwoblenm li. Sa sé an chanjman Jozèf pa té ka èspéyé! Ki mannyè an nonm ki té an pwizon paski yo di, i té éséyé anvyolé madanm yon ofisyé wa Féro, té sa twapé kalté pozisyon sala? La ni an sèl wépons pou kwèsyon sala. Kon Jennésis 39:23 di: ‘Jéhova té épi Jozèf èk Jéhova té ka benni tout sa Jozèf té ka fè.ʼ

10. Pouki Jozèf pitèt té ka kwè bagay pa té ka maché byen pou li?

¹⁰ Bon, annou éséyé pou imajiné sitiwasyon Jozèf ankò. Chonjé, yo manti asouʼy épi yo météʼy an pwizon. Konsa, ès ou kwè Jozèf té ka santi tout bagay té ka maché byen pou li? Kisa ou kwè Jozèf té vwéman vlé? Ès ou kwè sa ki té pli enpòtan pou li sété pouʼy plè chèf pwizon-an? Mé non, san dout Jozèf té vlé yo wéyalizé i pa té koupab, èk i té vlé yo ladjéʼy. Anfen, la té ni an lòt pwizonnyé yo té kay ladjé. Èvèk Jozèf jis mandé nonm sala pou palé bay Féro an favèʼy pou li menm Jozèf sa sòti an vyé pwizon nwè-a. (Jen. 40:14) Mé lè nonm-lan sòti an pwizon i pa di Féro anyen. Konsa Jozèf wété an pwizon pou dé (2) lanné ankò. (Jen. 40:23; 41:1, 14) Wonnman, Jéhova kontiné fè Jozèf éwisi. Ki mannyè?

11. Ki abilité spésyal Jéhova té bay Jozèf? Èk ki mannyè sa té kay akonpli divwa Jéhova?

¹¹ Diwan tan-an Jozèf té an pwizon, Jéhova annékòz Féro, wa péyi Éjip, pou ni dé (2) wèv. Sé wèv sala té twakasé Féro an chay, èk i té vwéman vlé konnèt kisa sé wèv-la té vlé di. Konsa, lè Féro vini konnèt Jozèf té ni abilité-a pou déchifwé wèv, i voyé pwanʼy an pwizon-an. Èvèk, épi èd Jéhova, Jozèf èspliké sé wèv-la bay Féro. Féro apwésyé bon konsèy-la Jozèf té bay-la an chay. I té sa wè a klè Jéhova té épi Jozèf, konsa i mété Jozèf wèskonsab pou tout manjé-a ki té an péyi Éjip. (Jen. 41:38, 41-44) Pli ta, la té ni an gwo lafen an péyi Éjip, èk osi an péyi Kénann, menm péyi-a koté fanmi Jozèf té ka wèsté. Kanmenm, paski Jozèf té ni an gwo pozisyon an péyi Éjip, i té sa sové fanmiʼy. Lèʼy sové fanmiʼy sa té kay akonpli divwa Jéhova, paski Jéhova té ja di, sé an moun an désandan fanmi Jozèf ki té kay vini Mèsaya-a.

12. An ki diféwan mannyè Jéhova té fè Jozèf éwisi?

¹² Katjilé asou sé bagay èstòdinè-a Jozèf té èspéyansé an laviʼy. Ki moun ou kwè ki fè Pòtifa òbzòvé Jozèf pa té annèk yon èslav? Ki moun ou kwè ki té fè mèt pwizon-an twété Jozèf byen menm si i sété on pwizonnyé? Ki moun ki bay Féro sé wèv-la i té ni-an, èk ki moun ki bay Jozèf abilité-a pou déchifwé sé wèv sala? Èk ki moun ou kwè ki pousé Féro pou mété Jozèf wèskonsab tout manjé-a ki té an péyi Éjip? (Jen. 45:5) Osi, magwé sé fwè Jozèf-la té vlé tjwéʼy, Jéhova chanjé sitiwasyon-an èk i sèvi Jozèf pou akonpli divwaʼy. An tout sé diféwan mannyè sala, Jéhova té ka fè Jozèf éwisi. Wi, i a klè, Jéhova té ka benni tout sa Jozèf té ka fè.

13. Ès Jéhova ka kontwolé tout bagay ki ka fèt an lavi nou? Èspliké.

¹³ Ki lison nou sa apwann an wakont-la konsèné Jozèf? Ès Jéhova ka mélé kòʼy an tout sitiwasyon nou ka èspéyansé? Ès Jéhova ka kontwolé tout sa ki ka fèt an lavi nou? Ès tout sé mové bagay-la nou ka èspéyansé-a ka fèt pou an bon wézon? Non, paski Bib-la pa ka enstwi sa. (Éklé. 8:9; 9:11) Mé kanmenm, nou asiwé Jéhova konnèt tout sé pwoblenm-lan nou ka èspéyansé. Osi, nou asiwé lè nou kwiyé asouʼy pou èd i ka tann lapwiyè nou. (Sam 34:15; 55:22; Izay. 59:1) Apa di sa, lè nou ka èspéyansé pwoblenm, Jéhova sa édé nou andiwé èk i sa fè nou éwisi. Ki mannyè i ka fè sa?

14. Ki mannyè Jéhova ka édé nou éwisi lè nou ka èspéyansé pwoblenm?

¹⁴ Lè nou ka èspéyansé pwoblenm, yonn an sé mannyè-a Jéhova ka édé nou pou éwisi sé lè i soulajé nou, èk ban nou ankouwajman a bon lè-a. (2 Kòr. 1:3, 4) Yon fwè hòd péyi ‘Turkmenistanʼ té èspéyansé sa. Nonʼy sé Eziz, èk yo té météʼy an pwizon pou dé (2) lanné paski i té détèminé pou wèsté fidèl pou Jéhova. Fwè-a di: “Jou bonmaten-an lè yo té kay mennen mwen lodyans, an fwè moutwé mwen Izaya 30:15 koté i di: ‘Si zò wété dous èk konfyé mwen, zòt kay ni fòs.ʼ Vèwsé sala té ka toujou édé mwen wèsté kam épi pou dépan asou Jéhova pou tout bagay. Mwen té ka toujou mèdité asou vèwsé sala èk sa té ka édé mwen diwan tout tan-an mwen té an pwizon.” Ès ou sa chonjé an lokazyon an laviʼw lè Jéhova té soulajéʼw èk baʼw ankouwajman a lè-a ou té pli bizwenʼy?

15-16. Kisa ou apwann an èspéyans sè Tori?

¹⁵ Souvan, apwé nou èspéyansé an difikilté sé lè sala nou ka wéfléchi èk nou ka wè mannyè Jéhova té édé nou. Sé sa ki té wivé yon sè yo ka kwiyé Tori. Pou sis (6) lanné gasonʼy Mason, soufè épi kansè jistan i mò. Sa kasé tjè sè-a. I di: “Kon an manman, mwen pa kwè la ni anyen ki té sa pli mové pasé sa. Èk lèʼw ka gadé ich ou soufè, sa pli mové pasé si sé ou menm ki malad. Mwen asiwé lòt pawan kay dakò épi sa.”

¹⁶ Mé menm si sitiwasyon sala té byen wèd pou sè Tori, pli ta i wéfléchi asou sé diféwan mannyè-a Jéhova té édéʼy. I di: “Lè mwen katjilé asou èspéyans sala, mwen sa wè mannyè Jéhova té édé mwen lè gason mwen té malad. Pou ègzanp, la té ni an lè Mason té tèlman malad, sé dòktè-a pa té ka pèwmité moun pou wèʼy. Mé sé fwè èk sè-a té ka drayv pou dé (2) nèditan pou vini lopital-la. La té toujou ni fwè èk sè an lopital-la èk yo té toujou pawé pou sipòté nou. Sé fwè èk sè-a osi té ka potjiwé sa nou bizwen. Menm si sitiwasyon-an té byen wèd, nou té ni tout sa nou té bizwen.” Wi, Jéhova bay sè Tori épi gasonʼy Mason, sa yo té bizwen pou andiwé.​—Gadé Bwèt-la “ Jéhova Té Ban Nou Ègzaktiman Sa Nou Té Bizwen.”

17-18. Kisa ki kay édé nou wè èk apwésyé mannyè Jéhova ka sipòté nou lè nou ka èspéyansé pwoblenm? (Sam 40:5)

¹⁷ Li Sam 40:5. Lè an moun ka maché mouté an montany, sa i vlé fè sé wivé tèt montany-lan. Mé konʼy ka maché mouté, la ni plizyè koté i sa doubout èk pwan an ti pòz pou enjwi tout sé bèl bagay-la i ka wè-a. An menm mannyè-a, lè nou ka èspéyansé an pwoblenm, sa nou vwéman vlé sé pou pwoblenm-lan fini. Mé magwé sa, i bon pouʼw pwan an ti tan pou katjilé asou tout sé diféwan mannyè-a Jéhova ka édéʼw éwisi diwan tan-an ou ka èspéyansé pwoblenm-lan. Chak jou ou sa mandé kòʼw: ‘Ki mannyè Jéhova édé mwen jòdi-a? Ében, ‘menm si mwen ka débat épi an pwoblenm, ki mannyè Jéhova ka édé mwen pou andiwé?ʼ Fè éfò pou idantifyé menm si sé yonn an sé bagay-la Jéhova ja fè pou édéʼw éwisi.

¹⁸ Lèʼw ka èspéyansé an pwoblenm, pitèt ou ka pwédyé pou pwoblenm-lan fini. Nou sa konpwann sa èk sa sé an bon bagay pouʼw fè. (Filip. 4:6) Mé sé pa pou nou janmen obliyé tout sé bennédiksyon-an nou ka enjwi apwézan. Èk chonjé, Jéhova pwonmèt pou fòtifyé nou épi pou édé nou andiwé. Konsa toujou wimèsyé Jéhova pou tout sa i ka fè pou sipòtéʼw. Siʼw fè sé bagay sala, ou kay sa wè mannyè Jéhova ka édéʼw éwisi magwé ou ka èspéyansé pwoblenm, menm kon i té fè bay Jozèf.​—Jen. 41:51, 52.