1, 2. а) Бисте болуп турган ченелтелерге бис нениҥ учун кайкабай јадыс? б) Бис бу јӧрмӧлдӧ нени кӧрӧрис?

 БИС ченелтелерге табартып турганыска кайкабай јадыс. Нениҥ учун дезе Агару Бичикте айдылганыла, «бис Кудайдыҥ Каандыгына кӧп шыра ӧдӱп кирер учурлу» (Ап. ижи 14:22). Анайда ок бистиҥ кӱчтер эм тургуза бӱдӱнге јоголбос деп оҥдоп јадыс. Олор јӱк ле јаҥы телекейде «ӧлӱм де, ачу-корон до, сыгыт та, јобол до база болбос» деген сӧстӧр бӱткен кийнинде јоголор (Ачыл. 21:4).

² Иегова бисти ченелтелердеҥ корулабай да турган болзо, олорды ӧдӧргӧ болужат. Апостол Павел Римдеги христиандарга кандый сӧстӧр бичигенине ајару эдип ийектер. Озо баштап ол бойыныҥ ла ака-карындаштарыныҥ кӱчтерин тоологон, а оноҥ мындый сӧстӧр айткан: «Мыны ончозын бисти сӱӱп турган Кудайдыҥ болужыла јеҥип јадыбыс» (Рим. 8:35—37, ЈК 2003). Айдарда, Иегова биске ченелтелерди, керек дезе ченелте ӧткӧлӧк тӧ болзо, јеҥип чыгарга болужар. Је эмди Иегова Иосифке канайып болушканын ла биске канайып болужарын кӧрӱп ийектер.

3. Иосифтиҥ јӱрӱми канайып кенетийин солына берген?

³ Патриарх Иаков бойыныҥ уулын, Иосифти, сӱреен тыҥ сӱӱген (Баш. 37:3, 4). Мыныҥ учун ого акалары кӱйӱнип турала, арга боло берерде ле Мадиан јериниҥ садучыларына садып ийген. Олор дезе Иосифти канча јӱс километр ыраагында турган Египетке апарган. Анда дезе Иосифти ойто ло катап саткан — је бу јорукта фараонныҥ каруулчыктарыныҥ јаанына, Потифарга, садып ийгендер. Бот мынайып Иосифтиҥ јӱрӱми кенетийин солына берген. Бу ла јуукта ол адазыныҥ сӱӱген уулы болгон, је эмди дезе египтянныҥ кулы болуп калган (Баш. 39:1).

4. Бис недеҥ улам Иосиф чилеп шыралаардаҥ айабазыс?

 ⁴ Агару Бичикте айдылганыла, тӱбек кажы ла кижиде болордоҥ айабас (Эккл. 9:11). Кезикте бисте ончо улуста болуп турган ченелтелер болот (1 Кор. 10:13). Је кезикте Христостыҥ ӱренчиктери болуп турганы́с учун шыралайдыс. Темдектезе, бисти Кудайга бӱдӱп турганы́с учун истежердеҥ, шоодордоҥ айабас, керек дезе бисте удурлажулар да болордоҥ айабас (2 Тим. 3:12). Је ченелтелер кандый да болотон болзо, Иегова биске олорды јеҥип чыгарга болужар. Иегова Иосифке канайып болушкан?

5. Потифар Иосифти кӧрӱп турала, нени оҥдогон? (Башталганы 39:2—6).

⁵ Башталганы 39:2—6 кычырыгар. Потифар Иосифтиҥ иштеҥкейин ле албадаҥкайын кӧрӱп ийген. Оныҥ шылтагын да билер болгон. Нениҥ учун дезе «нени ле эткенде, Иегова ого [Иосифке] једим берип јат» деп кӧрӱп туратан b. Соҥында Потифар оны бойыныҥ јалчызы эдип алала, айылы-јуртын башкарзын деп тургузып салган. Мыныҥ кийнинде Иегова Потифарга алкыш берип баштаган.

6. Иосифте кандый санаалар болгон болор?

⁶ Је эмди бу учуралдарды Иосифтиҥ кӧзиле кӧрӱп ийигер. Иосиф бу ӧйдӧ эҥ ле тыҥ нени кӱӱнзеген? Потифардыҥ кӧзине јакшы кӧрӱнерге албаданган ба? Јок болбой. Ол јайымдалала, адазыдӧӧн јанарга кӱӱнзеген болор. Нениҥ учун дезе Потифар ого јаан молјулар берген де болзо, Иосиф ондо тӱҥей ле кул болуп арткан. Иегова Потифарды Иосифти божодып ийзин деп кӱӱнзетпеген. Карын Иосифти оноҥ кӱч ченелтелер сакыган.

7. Иосифтиҥ јӱрӱми канайып оноҥ кӱч болуп калды? (Башталганы 39:14, 15).

⁷ Башталганы деп бичиктиҥ 39-чы бажалыгын кӧрзӧӧс, Потифардыҥ ӱйи Иосифке кӧзин салган. Ол Иосифле конорго канча катап албаданган да болзо, је Иосиф оныҥ сӧзине бир де кирбеди. Иосиф болбосто, байагы ӱй  кижи коркышту тыҥ ачынала, Иосиф оны албадаарга сананган деп бурулаган. (Башталганы 39:14, 15 кычырыгар.) Потифар мыны билип ийеле, Иосифти тӱрмедӧӧн таштап ийген. Анда ол канча јыл отурган (Баш. 39:19, 20). Оныҥ отурган тӱрмези кандый болгон болор? Иосифтиҥ тӱрме керегинде айткан еврей сӧзин «суу кичеейтен јер» эмезе «оро» деп кӧчӱрерге јараар (Баш. 40:15, ЈТ сноска). Айдарда, Иосифтиҥ отурган тӱрмези коркышту караҥуй ла коркынчылу болгон. Ол бойын бу тӱрменеҥ база качан да чыкпас деп сананган болор. Анайда ок Агару Бичикле болзо, Иосиф кижендеткен де болгон (Сар. 105:17, 18). Анайып Иосифтиҥ јӱрӱми оноҥ кӱч болуп калган: кул болгон кижи тӱрмеге кирип калды.

8. Айалга там ла коомойтып та баратса, бис неде алаҥзыбас аргалу?

⁸ Иеговага тыҥ јайнап, мӱргӱп турган да болзоор, је айалгагаар там ла коомойтып бараткан учурал слерде болгон бо? Болгон ло болор. Нениҥ учун дезе Иегова Сатананыҥ телекейинде болуп турган ченелтелердеҥ бисти корулабай јат (1 Иоанн 5:19). Је слер бир де алаҥзыбас аргалу: Иегова слердиҥ кӱч айалгагаарды кӧрӱп јат ла слерге болужып јат (Матф. 10:29—31; 1 Пётр 5:6, 7). Анайда ок ол: «Сени артырбазым, сени таштабазым» — деп сӧзин берет (Евр. 13:5). Иегова слерге айалгагаар кандый да кӱч болзо, ого чындык артарга болужар. Эмди дезе Иегова Иосифке канайып болушканын кӧрӱп ийектер.

9. Иосиф тӱрмеде отурарда, Иегова оныла кожо болгон деп недеҥ кӧрӱнет? (Башталганы 39:21—23).

⁹ Башталганы 39:21—23 кычырыгар. Иосиф тӱрмеде де отурарда, Иегованыҥ болужыла оныҥ керектери једимдӱ болгон. Канайып? Иосиф Потифарга јарагандый ла чылап, тӱрмениҥ јаанына јарай берген. Кийнинде «тӱрмениҥ јааны Иосифти тӱрмеде отурган улусты башкарар эдип тургускан». Агару Бичикте айдылганыла, «Иосифтиҥ колына ончо немени берип салала, неге де санааркабай јӱрген». Эмди Иосифте каруулу иш боло берерде, ого бойыныҥ кӱчтерин сананбаска јеҥил боло берген. Иосифтиҥ јӱрӱми канай кенете солынды дезеер?! Каанныҥ јамылу ишчизиниҥ ӱйин албадаарга сананган деп бурулатканы учун тӱрмеде отурган кижи канай мындый јаан иш алган? Мында бир ле јартамал бар. Башталганы 39:23-те бичилгениле, «Иегова Иосифле кожо болгон, ол ого ӱзе ле немеде једим берген».

10. Иосиф бойын нениҥ учун једимдӱ кижи деп сананбаган болор, јартап беригер.

¹⁰ Бойоорды ойто ло катап Иосифтиҥ ордына тургузып ийзеер де. Иосиф бу ончо немени ӧткӧн кийнинде — актуга ла буруладып, тӱрмеге кирген кийнинде — бойын бастыра јанынаҥ једимдӱ кижи деп сананган ба? Ол эҥ ле тыҥ нени кӱӱнзеген болор? Тӱрмениҥ јаанына јараарга ба? Јок болбой. Ол озо ло баштап оныҥ јамандаткан адын актап, тӱрменеҥ јайымдап ийзин деп кӱӱнзеген болор, керек дезе ол тӱрменеҥ чыгып јаткан кижини ол керегинде фараонло куучындажып ийзин деп сураган (Баш. 40:14). Је ол оныҥ сурагын ундып койгон. Анайып Иосиф база да эки јылга тӱрмеде отурды (Баш. 40:23; 41:1, 14). Бу да ӧйдӧ оныҥ керектери Иегованыҥ болужыла једимдӱ болгон.

11. Иегова Иосифке кандый кайкамчылу арга берген? Бу арга Иегованыҥ амадузына кандый тузазын јетирген?

¹¹ Иосиф тӱрмеде болордо, Иегова Египеттиҥ каанына эки тӱш кӧргӱскен.  Бу эки тӱшти кӧрӧлӧ, каан ал-санаага тӱшкен. Ол бу тӱштердиҥ учурын оҥдоп болбой турды. Је Иосифти тӱштердиҥ учурын јартап турган деп угуп ийеле, оны тӱрмедеҥ чыгарзын деп јакарат. Анайып Иосиф Иегованыҥ болужыла тӱштердиҥ учурын јартап берерде, каан оныҥ ойгор јӧптӧрин сӱреен тыҥ кайкаган. Каан дезе бу јиит уулла кожо Иегова Кудай деп оҥдоп ийеле, оны бастыра Египеттиҥ курсак-тамагын башкарзын деп тургузып салган (Баш. 41:38, 41—44). Кийнинде Египетте торо ӧйлӧр башталган. Андый торо Иосифтиҥ билези јаткан Ханаан јерде де болгон. Је Иосифтиҥ јамылу кижи болуп калганынаҥ улам, оныҥ билези де торолоп, ӧлӱп калбаган, Мессияныҥ чыгатан ӱйези де ӱзӱлип калбаган.

12. Иегова Иосифтиҥ керектери једимдӱ болзын деп канайып болушкан?

¹² Иосифтиҥ јӱрӱминде болгон кайкамчылу учуралдарды сананып кӧрӱгер. Кем Потифарды теп-тегин кулга ајару этсин деп кӱӱнзеткен? Кем тӱрмениҥ јаанын Иосифти тӱрмеде отурган улусты башкарзын деп тургузарга кӱӱнзеткен? Кем фараонго коркынчылу тӱштер кӧргӱскен, а Иосифке тӱштерди јартаар арга берген? Кем фараонды Египеттиҥ аш-курсагыла Иосиф башкарзын деп кӱӱнзеткен? (Баш. 45:5). Бу учуралдардыҥ ӱзезинде ле Иегованыҥ болужы болгон. Айдарда, Иосифти акалары ӧлтӱрерге сананарда, Иегова бойыныҥ табын бӱдӱрерге, айалганы солып ийген.

13. Иегова биске болужарга јӱрӱмистиҥ кажы ла айалгазына кирижип турган ба? Јартап беригер.

¹³ Иосифтиҥ јӱрӱминеҥ бис неге ӱренедис? Иегова биске болужарга, јӱрӱмистиҥ кажы ла айалгазына кирижип турган ба? Ол эмезе бистиҥ јӱрӱмисте јаман неме јаантайын ла кандый бир шылтактаҥ улам болот деп айтсаас, чын болор бо? Јок, Агару Бичик андый немеге ӱретпей јат (Эккл. 8:9; 9:11). Је бир немеде бис алаҥзыбай јадыс: Иегова бисте кандый ченелтелер болуп турганын ӱзе билер ле јайнап болуш сураганысты угуп турган (Сар. 34:15; 55:22; Иса. 59:1). Бого ло коштой ол биске  ченелтелерди једимдӱ ӧдӧргӧ болужар аргалу.

14. Кӱч ӧйдӧ Иегова канайып болужат?

¹⁴ Иегова биске канайып болужат? Темдектезе, Иегова биске анчада ла тыҥ болуш керек болуп турган ӧйдӧ бисти токунадып, кӱӱнисти кӧдӱрип јат (2 Кор. 1:3, 4). Мындый учурал Туркменистанда јадып турган Эзиз деп карындашта болгон. Оны бӱдӱмјизи учун эки јылга тӱрмеге отургызып салган. Ол мынайда куучындаган: «Мени јаргылайтан кӱнде эртен тура бир ака Агару Бичиктеҥ Исайя 30:15-теги сӧстӧрди кӧргӱзип берген. Анда айдылат: „Токыналу артып, меге иженигер, ол тушта ийде-кӱчтӱ болорыгар“. Бу ӱлгер меге амыр артарга ла Иеговага иженерге болушкан. Ондогы шӱӱлтелер меге тӱрменеҥ чыкканчам ла јаан болужын јетирген». А слерде чек ле болуш керек болгон ӧйдӧ Иегова болушкан учурал болгон бо?

15, 16. Тори эјениҥ учуралынаҥ бис неге ӱренедис?

¹⁵ Иегова биске канайып болушканын бис кезикте јӱк ле ченелтени ӧткӧн кийнинде оҥдоп ийедис. Андый учурал Тори деген эједе болгон. Оныҥ уулы Мейсон алты јылдыҥ туркунына онкологический оорула тартышкан. Је учы-учында уулы тӱҥей ле рактаҥ божоп калды. Мынаҥ улам Тори эјениҥ јӱрегине коркышту ачу сыс тӱшкен. Ол айдат: «Эне кижиге мынаҥ ачу не де јок болбой. Мен сананзам, кажы ла ада-эне менле јӧпсинер: балаҥныҥ шыралап јатканын кӧргӧнчӧ, бойыҥ шыралазаҥ торт».

¹⁶ Кийнинде Тори эје Иегова ого кӱч ӧйлӧрдӧ канайып болушканын эске алынып, мындый сӧстӧр айткан: «Балам канча јылдардыҥ туркунына ооруп турарда,  Иегова јаантайын јанымда болгон. Темдектезе, качан Мейсон тыҥ ооруп турганынаҥ улам, келген ака-эјелерле куучындажып болбой турза, ака-эјелер тӱҥей ле больницадӧӧн келер болгон. Больницага јетире келерге эки саат керек болгон до болзо, тӱҥей ле приёмный покойдо јаантайын ака-эјелердиҥ кемизи-кемизи болуп туратан, керек дезе олор бистиҥ билегиске акча-манатла болушкан. Оныҥ учун эҥ ле кӱч ӧйлӧрдӧ дӧ бисте керектӱ неме ӱзе бар болгон». Иегова Тори эјеге де ӱзе ӧдӧргӧ болушкан, Мейсонды да артыргыспаган ( «Иегова биске не керектӱ болгон, оны берген» деген рамканы кӧрӱгер.)

17, 18. Кӱч ӧйлӧрдӧ Иегованыҥ болужын кӧрӱп турарга ла баалап турарга не болужар? (Сарын 40:5).

¹⁷ Сарын 40:5 кычырыгар. Альпинист бийик кырдыҥ бажына чыгып барарга амадайт, је ол барып јадала, токтой тӱжӱп, ар-бӱткенниҥ јаражын ајыктап јат. Анайып ла ок биске де токтой тӱжӱп, Иегованыҥ бистерге берип турган једимдерди јаантайын шӱӱп сананып турар керек. Оныҥ учун кажы ла кӱнниҥ учында бойыска мындый сурактар берип турактар: «Бӱгӱн Иегова меге кандый алкыш берди? Мениҥ кӱчтерим ӧткӧлӧк тӧ болзо, меге чыдажарга Иегова канайып болужат?» Бу сурактарды сананып тура, Иегованыҥ берип турган алкыштарыныҥ јӱк бирӱзин де болзо кӧрӱп ийерге албаданыгар.

¹⁸ Кӱчтерис ӧдӱп калзын деп мӱргӱӱринде јаман неме јок (Флп. 4:6). Андый да болзо, бисте эм тура кандый алкыштар барын ундыбас керек. Нениҥ учун дезе Иегова биске бастыра кӱчтерди чыдажарга болужар деп сӧзин берген, оныҥ учун ол слерге кажы ла кӱн болужып турганына быйанду болугар. Ол тушта Иегова Иосифке канайып болушкан, анайып ла слерге де кӱчтердиҥ ӧйинде канайып болужарын кӧрӱп турараар. Анайып слер једимдӱ болороор (Баш. 41:51, 52).