1-2. (a) Ka wabewang’ara ku peko i kwo mwa, pirang’o lembene wang’u iwa ngo? (b) Wabiweco iwi lembang’o i thiwiwec maeni?

 WA JURUTIC pa Yehova, iwa wang’ ungo ka wabenwang’ara ku peko i kwo mwa. Calu ma Biblia uyero, wang’eyo nia “wacikara nimondo i Ker pa Mungu nikadhu kud i masendi dupa.” (Tic. 14:22) Wang’eyo bende nia peko moko ma wabenwang’ara ko tin bithum ungo nitundo ma wabimondo i ng’om ma nyen pa Mungu, kaka ma “tho bibedo nuti kendo ngo, kadok lembcan, kadi nduru, kadok remokum de bibedo nuti kendo ngo.”—Nyu. 21:4.

² Yehova ubecero ngo nia peko kud unwang’wa. Ento ebekonyowa kara wacirgi. Poy i kum lembe ma jakwenda Paulo ukiewo ni Jukristu mi Roma. Ku kwong’a elar ekwanu peko ma en kud umego pare gibino nwang’iri ko. I ng’eye edok ekiewo kumae: “Wabenwang’u aloci ni kum ng’atu m’umaruwa.” (Rum. 8:35-37) Eno ubenyutho nia Yehova copo ketho lembe uwoth iri miero kadok nwang’u asu fodi peko peri ubemedere. I thiwiwec maeni wabineno kite ma Yehova ukonyo ko Yosefu kara lembe ubed ire miero man kite m’eromo konyo ko wan bende.

3. Lembe ulokere nenedi pio pio i kwo pa Yosefu?

³ Yakobo ugam unyutho kamaleng’ nia emaru wode ma Yosefu lee mandha. (Tha. 37:3, 4) Lembene uketho kumira ucaku nego awiya ma dongo pa Yakobo i kum umeggi. E kinde ma kaka unen igi, gilworo Yosefu ni ungu moko mi jukuloka mi Midian. Jukuloka eno giting’o Yosefu gicidho kude i Misiri, i borpiny mi kilometre dak ma lee, kuca giwok gilwore ni Potifar ma tie jadit mi jukur kum Farao. Lembe ulokere pio pio i kwo pa Yosefu: Ebino  nyathin ma won umaru lee, re kawoni edoko ni ng’eca pa Jamisiri!—Tha. 39:1.

4. Waromo nwang’ara ku kit peko ma kani ma tung’ tung’?

⁴ Biblia uwacu nia “ng’atuman bedo ku nindo pare man gagi ma podho ire.” (Ekl. 9:11) Saa moko wanwang’ara kud ayi peko “ma jumange [de] ginwang’iri ko.” (1 Kor. 10:13) Kunoke wacopo nwang’ara ku peko kende kende pilembe watie julub pa Yesu. Ku lapor, jucopo cayuwa, jujai iwa, kunoke junyayu ragedo i kumwa pi yiyoyic mwa. (2 Tim. 3:12) Kadok ibenweng’iri ku peko ma rukani de, Yehova copo ketho lembe bedo iri miero. Etimo lembuno nenedi ni Yosefu?

5. Potifar unyang’ i kum lembang’o pi lembe m’ubino miero ni Yosefu? (Thangambere 39:2-6)

⁵ Som Thangambere 39:2-6. Potifar uneno nia Yosefu utie jalawobi ma riek man ma timo tic ku tego. Eng’eyo thelembene pi kum enyang’ nia ‘Yehova uketho gin ceke [ma Yosefu utimo] ubedo miero.’ b Lembuno ucwalu Jamisiri niketho Yosefu ubed ng’atu ma dit iwi ot pare. Ekethe bende enen wi lembe ceke m’i ot pare. Adwogine ubedo ang’o? Piny pa Potifar unyay.

6. Copere Yosefu ubino winjere nenedi pi lembe m’ebino nwang’ere i iye?

⁶ Kepim nineno kite ma Yosefu uwinjere ko. Lembang’o m’ebino mito nisagu zoo? Nyo ebino mito nia Potifar unene man umii ire sukulia? Copere nia egam emito ebed agonya kara edok i bang’ won. Kadok nwang’u ebino ku rwom ma dit i ot pa Potifar de, re asu ebino ng’eca m’utie i the loc pa ng’atu ma woro ngo Yehova. Yehova ucwalu ngo Potifar ugony Yosefu. Bende, i ng’eye lembe pa Yosefu ulund udoko rac nisagu.

7. Lembe pa Yosefu udoko rac magwei nenedi? (Thangambere 39:14, 15)

⁷ Calu ma jukoro i Thangambere thek 39, Yosefu umaku wang’ dhaku pa Potifar kum ebino leng’, man wang’ ma pol dhakune ubed uii nibidhe. Yosefu ubed ukwero abidhene ceke. Tokcenne,  ng’eicwiny umake i kum Yosefu man eloko lembe i wiye nia emito make kara evut kude. (Som Thangambere 39:14, 15.) Kinde ma Potifar uwinjo pi lembene, e ebolo Yosefu i kol, kaka m’ebedo i iye pi oro ma dupa. (Tha. 39:19, 20) Otkolne ubino nenedi? Wec mi dhu Juebrania ma Yosefu uyero ma juloko nia “otkol” thelembene moko tie “vur pii,” kunoke “vur.” Eno ubenyutho nia Yosefu ubino kaka ma col bii man ka ma genogen umbe i iye. (Tha. 40:15) Bende, Biblia unyutho nia pi saa moko juroyo tiende i kongo man ng’ute ke jutwiyo ku nyoro. (Zab. 105:17, 18) Saa maeno lembe pa Yosefu udoko rac magwei: Ebino ng’eca ma cuu ma jugeno, re kawoni edoko ni jakol ma ka kite mbe.

8. Kadok lembe mwa udoko rac magwei de, re lembang’o m’ukwayu wang’ey?

⁸ Nyo in de idaru nweng’iri i lembe mir ang’abacwiny m’uwotho medere nidoko rac magwei kadok ibino rwo pire ku cwinyi ceke de? Lembuno copo timere. Yehova ugoyo ngo gang’ i kumwa kara peko kud unwang’wa i ng’om maeni ma Sitani ubebimo wiye. (1 Yoh. 5:19) Re gin m’ukwayu ing’ey ni e: Yehova ung’eyo cuu mandha lembe m’ibekadhu kud i iye, man ebedieng’ piri. (Mat. 10:29-31; 1 Pet. 5:6, 7) M’umedo maeno, eng’olo kumae: “Abiweki ki ngo, man kadok akuna de abikuni ki ngo.” (Ebr. 13:5) Yehova copo konyi niciro peko peri kadok ubenen nia genogen umbe i lembene de. Wakenenu kite m’ekonyo ko Yosefu.

9. Ang’o m’unyutho nia Yehova ubino ku Yosefu kinde m’en’i koli? (Thangambere 39:21-23)

⁹ Som Thangambere 39:21-23. Kadok i kol saa ma lembe ubino rac ni Yosefu, re asu Yehova uketho lembe ubedo ire miero. Nenedi? Saa maeno Yosefu unwang’u bero i wang’ jadit mi otkol, tap calu m’egam enwang’u i wang’ Potifar. E jaditne uketho Yosefu ubed ng’atu ma dit iwi jukol mange ceke. Biblia uwacu nia “jakur otkol uneno ba gin moko ki ngo ma ni the cing’ [Yosefu]”. Kawoni Yosefu unwang’ere ku tic m’ecopo timo ma cego nyinge. Eno ubino alokaloka m’uwok mbwang’! Ang’o m’uketho ng’atu ma jutwiyo i kol nia uvuto ku dhaku pa jadit mir askari ma kuro kum ubimo udok unwang’u rwom ma dit rukeno? Dwokowang’ lembene utie acel kende. Thangambere 39:23 uwacu nia “kum Yehova ni kude; man gin m’etimo, Yehova ketho ebedo miero.”

10. Nyo Yosefu uwinjere nia lembe ceke ubino wotho ire miero? Kekor.

¹⁰ Kepim niparu kendo kite ma Yosefu uwinjere ko. Kinde ma juloko lembe i wiye man jutwiye, nyo iparu nia ewinjere nia lembe ceke ubino wotho ire miero? Lembang’o ma Yosefu ubino mito nisagu zoo? Nyo ebino mito enwang’ bero i wang’ jadit mi otkoli? Copere nia Yosefu ubino mito jugonye. Ekwayu kadok jakol wadi ma jugonyo nia uwec pire ni Farao kara en de jugonye cen kud otkol m’ebeneno can i iye. (Tha. 40:14) Ento saa maeca wi ng’atune uwil ninyutho pire ni Farao. Lembuno uketho Yosefu udok ubedo asu i kol pi oro ario. (Tha. 40:23; 41:1, 14) Re Yehova umedere niketho lembe ubed miero ire. Nenedi?

11. Copo ma kani ma segi ma Yehova umiyo ni Yosefu, man rwom ma kani m’enwang’u mi pong’o lembakeca pa Yehova?

¹¹ Kinde ma fodi Yosefu n’i kol, Yehova uketho ubimo mi Misiri uleko lek ario ma lembene nyotho wijo. Farao usayu  kpe nia thelembe mi lekne utie ang’o. Kinde m’ewinjo nia Yosefu utie ku copo mi koro the lek, e eoro jucidh juwodhe. Ku kony pa Yehova, Yosefu ukoro the lekne ni Farao man juk m’edok emiyo ire pi lembene uwang’u iye lee. Farao uneno kamaleng’ nia Yehova ni karacelo ku Yosefu, man ekethe ebedo ng’atu ma dit ma neno wi dero mi cam pi ng’om Misiri ceke. (Tha. 41:38, 41-44) I ng’eye ndru ma dit udok upodho, i ng’om Misiri kende ngo ento bende i ng’om Kanan kaka ma jupagi Yosefu ubino kwo i iye. Kawoni Yosefu utie ku dito ma dit m’ecopo bodho ko jupagi man mi gwoko anyoli ma Masiya biwok kud i iye.

12. Yehova uketho lembe uwotho miero nenedi ni Yosefu?

¹² Kepar pi lembe ma Yosefu unwang’ere ko ma niai con de fodi uwok ungo ire. Ng’a m’uketho Yosefu utelo nen pa Potifar ma ke ebino ng’eca? Ng’a m’uketho jadit mi otkol unyutho bero ni Yosefu ma tie jakol ma kabang’e mbe? Ng’a m’uketho Farao uleko lek ma lembene nyotho wijo man m’umiyo ni Yosefu copo mi koro the lekne? Ng’a m’uketho Farao ung’iyo Yosefu ubed ng’atu ma dit ma neno wi dero mi cam i Misiri zoo? (Tha. 45:5) M’umbe jiji, tie Yehova re m’uketho lembe ceke ubedo miero ni Yosefu. Kadok umego pa Yosefu gigam gimito gineg Yosefu de, re Yehova uloko lembene udoko ni yo ma kara epong’ ko lembakeca pare.

13. Nyo Yehova mondo i lembe ceke ma wabenwang’ara ko i kwo mwa? Kekor.

¹³ Lembe ma jukoro pi kwo pa Yosefu, ubemiyo iwa ponji ma kani? Nyo Yehova mondo i lembe ceke ma wabenwang’ara ko i kwo mwa? Nyo etelo wi lembe moko ci mi kwo mwa kara lembe ceke ma rac m’ubetimere ubed ku thelembe ma cuu? Ungo, Biblia uyero ngo lembuno. (Ekl. 8:9; 9:11) Ento gin ma wang’eyo ni e: Ka wabenwang’ara ku peko Yehova ng’eyo lembene, man ewinjo wak ma wawak ko i bang’e. (Zab. 34:15; 55:22; Isa. 59:1)  M’usagu maeno, Yehova copo konyowa kara wacir peko mwa cuu mandha. Nenedi?

14. Yehova konyowa nenedi i saa mi peko mwa?

¹⁴ Yo acel ma Yehova konyo kowa utie jukocwiny man tielocwiny m’emiyo, ma wang’ ma pol tundo tap i saane. (2 Kor. 1:3, 4) Umego Eziz mi ng’om mi Turkménistan unwang’u nia eno tie lemandha, kinde ma jutwiye pi oro ario i kol pi yiyoyic pare. Ewacu kumae: “Kugweno moko i nindo mi kesi para, umego moko unyutho ira giragora pa Isaya 30:15 m’uwacu nia ‘tego mu bibedo nuti ni kum bedoyo man genogen.’ Saa ceke giragora eni ubed ukonya nibedo ma kuma ukwiyo man nijengara iwi Yehova i lembe ceke. Nyamu i lembe iwi giragora eni ukonya i nindo ceke m’abino i kol.” Nyo in de ibepoy pi nindo ma Yehova ukonyi nikum jukocwiny man tielocwiny m’emiyo iri tap i saa m’ibino ku yenyne?

15-16. Lembe ma Tori ukadhu kud i iye ubemiyo iri ponji ma kani?

¹⁵ Wang’ ma pol ka peko mwa uthum kadong’ waneno nia Yehova ukonyowa. Nyamego Tori unwang’u nia eno tie lemandha. Mason ma wode utwoyo kanser pi oro abusiel nitundo m’etho ko. Tori ubino ku can lee mandha i cwinye. Ewacu kumae: “Aparu ngo nia lembe moko copo bedo nuti ma lith ni dhanu ma mego nisagu maeni.” Edok emedo kumae: “Ang’eyo nia jurunyodo mange de copo yero nia etie ber timba gisendiri gin kakare nineno nyathin migi re m’usendere.”

¹⁶ Kadok Tori ubino ku can lee i cwinye kinde m’ebino neno wode ubesendere akeca, re i ng’eye edok eparu pi kite ma  Yehova ukonye ko kud i lembene. Ewacu kumae: “Kan aparu pi lembene, aneno ayi ma Yehova ukonya ko i saa mi remokum pa woda. Ku lapor, kadok saa ma remo pa Mason udoko tek lee m’eromo neno ngo ju m’ubino liewe de, re umego ku nyimego gibed giringo ku mutukari pi saa ario pi nibino i odiyath. Dhanu ubed ucok ungo i odiyath ma gitie ayika pi nikonyowa. Bende, umego ku nyimego gibed gipong’o yeny mwa mi kum. Kadok kinde ma lembe udoko rac magwei de, re wabed wakoso ngo gin ma watie ku yenyne.” Yehova umiyo tego mi cirolembe ni Tori, man ni wode ma Mason bende.—Nen sanduku “ Yehova umiyo iwa tap gin ma watie ku yenyne.”

17-18. Ang’o ma bikonyowa ning’eyo nia Yehova ubekonyowa i saa mi peko man nibedo ku foyofoc pi lembene? (Zaburi 40:5)

¹⁷ Som Zaburi 40:5. Ng’atu ma tic pare tie idho got, lembakeca pare bedo niidho malu i tatu wiye. Re kinde m’ebeidho, kaka moko bedo nuti m’ewok ecungo i iye pi nineno piny ma beco m’umoyere. I ayi ma rom eno, in de kewoth becungo thiri thiri pi niparu pi kite ma Yehova ubekonyi ko kadok kud i kind peko m’ibeciro. Kubang’ reto kunoke uthieno, penjiri kumae: ‘Tin Yehova ukonya i yo ma kani? Kadok fodi peko para uthum ungo, Yehova ubekonya nenedi niciro pekone?’ Kenen ka nyo icopo nwang’u gin acel kende ci ma Yehova utimo iri pi nikonyi.

¹⁸ Andha icopo rwo nia nwang’u peko peri uthum. Eno tie lembe ma kakare, ng’atu moko ci umaru lembuno. (Filip. 4:6) Re mito ing’ey bende pi mugisa ma wabenwang’u kawoni. Yehova ung’olo nia ebimiyo iwa tego man ebikonyowa niciro. Pieno, bed ku foyofoc saa ceke nia Yehova re m’ubekonyi. Kan itimo kumeno, ibineno kite ma Yehova ubekonyi ko kara lembe uwoth iri miero, tap calu m’etimo ni Yosefu kadok kud i kind peko.—Tha. 41:51, 52.