1-2. (1) Tahalifa to sapalifet i, hano cowa ko fafahkaˈen kita hani? (2) Onini a lalakaw mamilengo to maanan?

 O MALO finawlan ni Yihofa, mafanaˈay kita o tatahalifa to sapalifet, samanen o sowal no Fangcalay Cudad: ‘ˈAyaw no hamamicomod kita to Hongti Kitakit no Kawas i, o tatahalifa to adihayay a pades.’ (Dmak 14:22) Mafanaˈayho kita, o roma a pasangar irato ko faelohay hekal ngaˈ masongilaˈto a masaysay, samanen itiya ‘caayto ka patay, caayto ka somad, tomangic, adada.’—Paˈarawan 21:4.

² Soˈlin cowa ko papalasawaden ni Yihofa ko macadaay ita a sapalifet, kawra o papadama Cingra kitaanan padadotoc mihadidi. Sinanoten ko nano sowal no tarokos ci Pawlo to i Lomaay a Krisciyang. Salakat masowalay ningra ko masiˈayaway no niyah ato romaroma salikaka a sapalifet, dotoc sanay ko sowal ningra: ‘Mitadiˈec kita toya maolahay kitaanan, pakalowidayto nohatini.’ (Loma 8:35-37) Tatodong nonini, soˈlin kamayanho kiso tahalifa to sapalifet, padamaay ci Yihofa tisowanan malaˈosi ko demak. Dotoc, mamilengo kita samaanay ci Yihofa padama ci Yosifan malaˈosi ko demak, milengoho sasamaan ci Yihofa padama tisowanan.

3. Mafekaday ko maanan taˈangayay a kafalic no kaˈorip ni Yosif hani?

³ Ci Yakop tada mikiriwiˈay ko kaolah ci Yosifan, hato maˈinapay ko kakakaka ci Yosifan. (Satapangan 37:3, 4) Oranto i, miˈametay cangra to cecay tatokian, pacakayan ci Yosif to misasingdiay no Mitiyan tamdaw. Mialaan noya misasingdiay ci Yosif patayra i Icip, pinaay soˈot a kongli ko karaay, ikor pacakayan  haca ci Potifaran, o tapang no misimaway ci Falawan cingra. Tada taˈangayay ko kafalic no kaˈorip ni Yosif, talifahal sa nao kaolahan no wama a wawa malo koliayto no Icip a tamdaw.—Satapangan 39:1.

4. Mamalifa ita ko maanan a sapalifet hani?

⁴ Sowal no Fangcalay Cudad, o kahacecay tamdaw tatahalifa to tatiihay a demak alatek. (Patnakay 9:11) Nolatekay, o malifaay ita a pasangar ‘nao malifaay no romaroma tamdaw,’ tatodong i o mahaenay a pasangar o mamalifa no kahacecay a tamdaw alatek. (1 Korinto 10:13) Kawra nolatekay mapasemsem kita, samanen o Krisciyang kita, tinakoen pakayni i pihakelongan tahacadaay kita to salikaf, safelit anca sapalak. (2 Timoti 3:12) Ano o mananto ko malifaay iso a sapalifet, wa ngaˈay ci Yihofa palaˈosi tisowanan. Nengnengen ita samaanay Cingra padama ci Yosifan.

5. Samanen malaˈosiay ko kihcod a demak ni Yosif, mahapinangay ni Potifar ko maanan hani? (Satapangan 39:2-6)

⁵ ˈOsien ko Satapangan 39:2-6. Cowa ko pisinanot aca ni Potifar to kainaneng ato kalalok no kaemangay a Yosif, mafanaˈayho to hano tada mikiriwiˈ ci Yosif. Mahapinangay ni Potifar, o ‘ci Yihofa ko palaˈosiay to kihcod a demak ni Yosif.’ b Oranto i, paitinian ni Potifar ci Yosif itatihi ningra malo dama, papisimawan ci Yosif to kihcod no lomaˈ. Samanayto ko teloc hani? Macowat macowatay ko paro no lomaˈ ni Potifar.

6. Pakayni kaˈorip no niyah samaanay ko harateng ni Yosif hani?

⁶ Tanamen tano pinengneng ni Yosif a minengneng to kaˈorip ningra itiya. O manan ko sakakaay misaalian ningra hani? Milifok to pisaareteng ni Potifar ato sapalifon han? Sakakaay misaalian ni Yosif maedeng sapilifokaw to pasalat, minokay tayni i tatihi no wama, kawra cowa ka papitedalen ni Yihofa ci Potifar ci Yosifan. Soˈlin itini lomaˈ ni Potifar misaaretengan a misaka dademak ci Yosif, kawra kamayan o koli cingra, hanaca o tawki ningra o cowa pidoko ci Yihofaan a ˈalafang tamdaw. Dotoc, o kaˈorip ni Yosif malingaday ko tatiih no demak.

7. Samaanay ko kalingad no tatiih no kaˈorip ni Yosif? (Satapangan 39:14, 15)

⁷ Maˈoningay i Satapangan 39 fedengan, maolahay ko fafahi ni Potifar ci Yosifan, kinapinaay  mikayhid cingranan, kawra sahtoay mikanaˈayan. Salikor, maketerayto cingra, pakokotay ci Yosifan to sapiˈodangaw cingranan. (ˈOsien ko Satapangan 39:14, 15.) Matengil ni Potifar ko mahaenay a sowal ningra, mipalitan ci Yosif i kapalitan, telocto pinaay miheca mapalit ci Yosif itira. (Satapangan 39:19, 20) O kitiraan ni Yosif a kapalitan o masamaanay hani? Masowal ni Yosif ko ‘kapalitan’ misaka dademakan a Hipray sowal mitoroˈan i ‘o pihopedan to nanom a lako’ anca ‘o masahefongay,’ sakoniya sowal toˈemanay ko taliyok ningra, awaayto ko hatokel sanay cingra miharateng. (Satapangan 40:15 ato roma pihongyak.) Sowal no Fangcalay Cudad, cecay liyad mapakadangay ko tosa waˈay ni Yosif, ano takolawto mafedfeday no marad. (ˈOlic 105:17, 18) Malingaday ko tatiih no kaˈorip ni Yosif, nao misaaretengan a koli isaˈayaw, malo misakahmawanto no tamdaw a mapalitay.

8. Soˈlin matongalay ko pakidem no sapalifet, wa ngaˈayho pakasoˈlin kita to maanan?

⁸ Iraay ko mahaenay a malifaay iso han? Soˈlin mikifalocoˈ kiso micangacang ci Yihofaan, kawra malingaday ko tatiih no kaˈorip. Itini mikowanan ni Satan a hekal, cowa ko papalahdawen ni Yihofa ko macadaay ita a sapalifet. (1 Yohani 5:19) Kawra ngangaˈay pakasoˈlin kiso, o malifaay iso a kihcod, ihkalay ko kafanaˈ ni Yihofa, hanaca tada ciharatengay tisowanan. (Matay 10:29-31; 1 Pitiro 5:6, 7) Roma i, mikiˈokay Cingra: ‘Caay pifalah Kako tisowanan, caay piliyas tisowanan.’ (Hipray 13:5) O kaˈorip iso soˈlin hato awaay ko hatokel nengnengen, ngangaˈay ci Yihofa padama tisowanan padadotoc mihadidi. Mihaenay Cingra padama ci Yosifan, sanay aca nengnengen ita.

9. Hano mafanaˈ kita itini kapalitan ci Yosif i, kalacafayay ci Yihofa cingranan? (Satapangan 39:21-23)

⁹ ˈOsien ko Satapangan 39:21-23. Soˈlin itini i toˈemanay a kapalitan a tatokian, padamaan ni Yihofa ci Yosif malaˈosi ko kihcod a demak. Itini ci Yosif i kapalitan cecay liyad ikor, milifokayto pakasoˈlin ato kasemer no ˈaˈideman no milaocay to kapalitan, malecad o pisaareteng ni Potifar isalakat. Ikor, papisimawan no ˈaˈideman no milaocay to kapalitan ci Yosif to romaroma a mapalitay. Sowal no Fangcalay Cudad: ‘Ano ci Yosif ko milosimetay to demak, cowato ka calemcem ko ˈaˈideman no milaocay to kapalitan.’ Nohatini ngaˈayayto ci Yosif miharateng to adihayay demak, ngaˈayto a midemak. Onini a kafalic tada kafahkaˈanto. O cecay sapiˈodangaw to fafahi no tawki ko raraw a mapalitay, ˈarawhan misaaretenganto misaka dademak! Cecayay aca ko lalangian, mahaen misowalan no Satapangan 39:23: ‘Samanen kalacafayan ni Yihofa ci Yosif, padamaan ni Yihofa cingra malaˈosi ko kihcod a demak.’

10. Cowa ka malaˈosi ko kihcod a demak no niyah hano saan ko piharateng ni Yosif hani?

¹⁰ Tanamen aca mikitini pinengneng ni Yosif a minengneng to kaˈorip ningra itiya. Mapakokot ato mapalit ikor, malaˈosiay ko kihcod a demak no niyah sanay ci Yosif miharateng han? Miharateng kiso itiya o manan ko sakakaay saali ni Yosif hani? Milifok to kasemer no ˈaˈideman no milaocay to kapalitan han? Sakakaay saali ni Yosif palasawad to raraw, miliyaw milifok to pasalat. Misaalian ningra ko cecay mamasadak i kapalitan a tamdaw patado cingranan pasowal ci Falawan, milidong cingranan paliyas to katalawan a kapalitan. (Satapangan 40:14) Nikawrira cowa ka tangsol kora tamdaw patado cingranan pasowal ci Falawan, telocto padotocayho cingra mapalit to tosa miheca. (Satapangan 40:23; 41:1, 14) Kawra, kamayan padama ci Yihofa ci Yosifan, hato malaˈosiay ko demak ningra. Samaanay ko pidemak ni Yihofa hani?

11. Pafelian ni Yihofa ci Yosif to maanan a mikiriwiˈay a inaneng? Samaanay konini padama ci Yihofaan malaˈosi ko araaw no Niyah hani?

¹¹ Itini ci Yosif i kapalitan i, tosaay ko papitiihan ni Yihofa ci Falawan. Macariraway ko  harateng ni Falaw, sakafanaˈaw to tatodong no mitiihan. Mafanaˈ cingra iraay ko inaneng ni Yosif mitadtad to mitiihan ikor, mitahidangay ci Yosifan. Itini pipadama ni Yihofa, cowa ko pitadtad aca ni Yosif to tatodong no mitiihan, mihadakayho to citanengay a sapaini ci Falawan. Mahapinangay ni Falaw kalacafayay ci Yihofa ci Yosifan, orato minilnilay ci Yosifan misimaw to polong a kakaenen no Icip. (Satapangan 41:38, 41-44) Ikor mifekaday ko pakidemay a kedal, cowa ko Icip aca ko mafiyoray, mafiyorayho ko Kanan, o kitiraan no paro no lomaˈ ni Yosif a pala. Nohatini, iraayto ko ˈicel ni Yosif milidong to paro no lomaˈ no niyah, tatodong nonini madipotayto ko ˈorip no lalitengan ni Misiya.

12. Samaanay ci Yihofa padama ci Yosifan malaˈosi ko demak?

¹² Haratengen konini a mikiriwiˈay a nalifetan ni Yosif. O cima ko papisinanotay ci Potifaran tonini a mala koliay a Yosifan hani? O cima ko mikidatay to sakasemer no ˈaˈideman no milaocay to kapalitan to misakahmawan no tamdaw a mapalitay hani? O cima ko pairaay to kafahkaˈan a mitiihan ni Falaw, ato pafeli to inaneng ci Yosifan mitadtad to tatodong no mitiihan hani? O cima ko miocoray ci Falawan minilnil ci Yosifan misimaw to polong a kakaenen no Icip hani? (Satapangan 45:5) Mahapinangay, o ci Yihofa, o Cingra ko padamaay ci Yosifan ‘malaˈosi ko kihcod a demak.’ Soˈlin mariˈang ko kakakaka ni Yosif cingranan, kawra salikorto misalofan ni Yihofa ko demak, pakayni ko pipalaˈosi to araaw no Niyah.

13. O mamicapid ci Yihofa to kahacecay a malifaay ita a demak han? Tadtaden.

¹³ Mikitini maˈoningay a demak ni Yosif mananamay ita ko maanan hani? Ano o maananto ko malifaay ita a demak, o mamicapid ci Yihofa a maemin han? Ano tahalifa kita to tatiihay a demak, sahtoay o pakayniay sapalaˈosiaw no Kawas to cecay a araaw han? Cowa, cowa kahaen ko pinengneng no Fangcalay Cudad. (Patnakay 8:9; 9:11) Nikawrira, ngaˈay pakasoˈlinen ita i, ihkalay ko kafanaˈ ni Yihofa tahalifaay kita nohatini to maanan a sapalifet, hanaca ano pasayra kita Cingranan a micangacang i, o tatengilen Ningra. (ˈOlic 34:15; 55:22; Isaya 59:1) Cowa ka hatini aca, wa ngaˈayho ci Yihofa padama kitaanan malaˈosi ko pihadidi to pasangaray. Wa samaan ko pidemak Ningra hani?

14. Tahalifa kita to sapalifet i, samaanay ci Yihofa padama kitaanan?

 ¹⁴ O cecay pakayraan ni Yihofa padama kitaanan i, pafeliay to sahinom ato sapakalalok kitaanan, hanaca marariday Cingra itini matatodongay a tatokian mihaen to demak. (2 Korinto 1:3, 4) Faˈinayan salikaka ci Acice iraay ko mahaenay a nalifetan. Itiniay Tokoman ko kitiraan ningra, pakayni pihakelongan misawkitan to tosa miheca a mapalit. Sanay cingra: “Katayraan ako i hoing a papacem, paˈarawan no cecay salikaka kako to Isaya 30:15, sanay ko sinael: ‘Aka marawraw, sarocoden mitadiˈec Kako, o caciˈicel kamo.’ Onini a sinael padamaay takowanan caka rawraw ko harateng, itini kihcod a demak mitadiˈec ci Yihofaan. Itini kapalitan a tatokian, padotocay kako midotim tonini a sinael, mikitini milifok to ˈicel.” Wa ngaˈay maharateng iso itini pisaalian iso a tatokian na pafeliay ci Yihofa to sahinom ato sapakalalok tisowanan, padama tisowanan milifok to ˈicel han?

15-16. Mikitini nalifetan ni Toli mananam iso ko maanan?

¹⁵ Tocerid mataˈlifto ko sapalifet ikor ngaˈ mahapinangay samaanay ci Yihofa padama kitaanan. Fafahiyan salikaka ci Toli iraay ko mahaenay a harateng. O faˈinayan a wawa ningra ci Misen enemay miheca milood to ekang ikor mapatayay, tada pakasomaday ci Tolian konini, sanay cingra: “Pakaynien i malo winaay, awaay ko mikikakaay tonini ko kasomad. Polong malo wama winaay makahiay misemsem ko niyah, caay kakahi maˈaraw ko pisemsem no wawa no niyah.”

¹⁶ O demak no wawa soˈlin pakasomaday ci Tolian, kawra ikor misongilaˈay ci Toli miharateng samaanay ci Yihofa padama cingranan milakowit toya pasangaray a tatokian. Sanay cingra: “Tikolen miharateng ko salakatay a demak, mahapinangay ako itini kaadadaan no wawa a tatokian, padotocay ci Yihofa padama tamiyanan. Tinakoen, pakidem ko adada ni Misen i,  awaay ko pakayraan miˈaraw to milisoˈay cingranan a tamdaw, kawra o salikaka kamayan tosa ko toki parakat to tosiya tayni i paisingan. Itini pitalaan a kitiraan iraayto ko salikaka, ngaˈayay tangsol mihadak to sapadama. Roma i, itini sakaˈorip midimokosay cangra tamiyanan. Soˈlin itini sapasangaray a tatokian, awaay ko kacangoˈotan niyam.” Pafelian ni Yihofa ci Toli to kihcod a misaalian, hato ngaˈayay cingra padadotoc a mihadidi, ano ci Misento mihaenan ni Yihofa a padama.—Nengnengen ko sapatongal lalakaw “ Pafelian ni Yihofa Kami to Kihcod a Misaalian.”

17-18. Ano pasangaray ko kaˈorip i, samaan ko pidemak ngaˈay mahapinang to padamaay ci Yihofa kitaanan, pakayni ko piakoˈid Cingranan? (ˈOlic 40:5)

¹⁷ ˈOsien ko ˈOlic 40:5. O patosokan no macokacokay i lotok tahira i fafekangay a taporo, kawra itini i fatad no lalan adihayay a kitiraan, ngangaˈay cingra pahanhan misongilaˈ minengneng to makapahay a pinaloma. Malecaday, o mamararid kita pahanhan to hawang, misongilaˈ miharateng itini pihadidian ita to pasangaray a tatokian i, samaanay ci Yihofa padama kitaanan malaˈosi ko demak. Maharerek ko kahacecay romiˈad i ngaˈayay a licayen ko niyah: “Anini mahapinangay ako samaanay ci Yihofa palemed takowanan hani? Soˈlin cowaho ka hererek ko sapalifet, kawra samaanay ci Yihofa padama takowanan padadotoc mihadidi hani?” Sapadamaaw tisowanan malaˈosi ko demak, adihayay ko sapafeli ni Yihofa a sapalemed tisowanan, ngaˈayay tanamen iso mikilim ko cecay sapalemed han?

¹⁸ Micangacangay kiso nohatini ci Yihofaan kahnay maharerek ko macadaay iso a sapalifet alatek. Mihaen ko harateng o matatodongay. (Filipi 4:6) Kawra o sasaadihayen ita miharateng ko malifokay no niyah a sapalemed nohatini. Aka mapawan, mikiˈokay ci Yihofa pafeli to ˈicel kitaanan, padama kitaanan padotoc a mihadidi. Midamaay ci Yihofa nohatini tisowanan, aka a mapawan miakoˈid Cingranan. Mihaen o mamahapinangto iso, soˈlin pasangaray ko kaˈorip iso, kawra malecaday to pipadama ni Yihofa ci Yosifan, padama tisowanan malaˈosi ko demak.—Satapangan 41:51, 52.