1-2. (a) Taano ta dai kita nagngangalas na napapaatubang kita sa mga pagbalo? (b) Ano an pag-uulayan ta sa artikulong ini?

 BILANG mga lingkod ni Jehova, dai na kita nagngangalas pag napapaatubang kita sa mga pagbalo. Aram ta na, arog kan sinasabi sa Bibliya, “sa paglaog niyato sa Kahadian nin Diyos, kaipuhan kitang umagi nin dakul na kasakitan.” (Gibo 14:22) Aram ta man na an nagkapira sa satong mga problema dai lubos na masosolusyunan sagkod na mayo pa kita sa bagong kinaban nin Diyos, kun sain “an kagadanan mawawara na. Dai na man magkakaigwa nin pagmundo, o nin pagtangis, o nin kulog.”—Kap. 21:4.

² Dai kita ilinilikay ni Jehova sa mga pagbalo. Pero, tinatabangan niya kita na matagalan an mga iyan. Mangnuhon an sinabi ni apostol Pablo sa mga Kristiyano na nakaistar sa Roma. Sinambit niya nguna an nagkapirang pagbalo na inaagihan niya asin kan saiyang mga tugang. Dangan isinurat niya: “Lubos man giraray kitang nanggagana paagi sa saiya na namumuot sa satuya.” (Roma 8:35-37) Nangangahulugan ini na puwedeng pangyarihon ni Jehova na magin mapanggana ka dawa nasa kasagsagan ka nin pagbalo. Aramon ta kun paano tinabangan ni Jehova si Jose na magin mapanggana asin kun paano ka Niya puwedeng tabangan.

3. Anong biglang pagbabago an nangyari sa buhay ni Jose?

³ Risang-risa na namumutan na marhay kan patriyarkang si Jacob an saiyang aking lalaki na si Jose. (Gen. 37:3, 4) Huli kaiyan, an mas matuang mga aking lalaki ni Jacob nauri sa saindang tugang. Kan magkaigwa sinda nin oportunidad, ipinabakal ninda si Jose sa sarong grupo nin mga negosyanteng Midianita. Dinara kan mga negosyanteng idto si Jose sa Ehipto na ginatos na kilometro an rayo, kun sain ipinabakal siya giraray—sa pagkakataon na ini ki Potifar, an pamayo kan mga guwardiya ni Faraon. Madalion  nanggad na nagbago an buhay ni Jose, hali sa pagigin namumutan na marhay na aki kan saiyang ama pasiring sa pagigin sarong hamak na uripon nin sarong Ehipsiyo!—Gen. 39:1.

4. Paano kita puwedeng mapaatubang sa sarong kasakitan na kapareho kan inatubang ni Jose?

⁴ Sinasabi kan Bibliya na “an maraot na mga bagay nangyayari sa gabos.” (Ecl. 9:11, Holy Bible—Easy-to-Read Version) Nakakaeksperyensiya kita kun minsan nin mga kasakitan na inaatubang man kan “ibang mga tawo”—an buot sabihon, mga pagbalo na naeeksperyensiyahan kan gabos na tawo. (1 Cor. 10:13) O puwedeng nagsasakit kita dahil man sana ta mga disipulo kita ni Jesus. Halimbawa, tibaad tuya-tuyaon kita, kontrahon, o persegiron pa ngani huli kan satong pagtubod. (2 Tim. 3:12) Ano man na pagbalo an mapaatubang sa saimo, puwedeng pangyarihon ni Jehova na magin mapanggana ka. Paano niya iyan ginibo ki Jose?

5. Ano an naisip ni Potifar manungod sa pagigin mapanggana ni Jose? (Genesis 39:2-6)

⁵ Basahon an Genesis 39:2-6. Narisa ni Potifar na si Jose sarong may kakayahan na hoben na lalaki saka mahigos. Asin aram niya kun taano. Nahiling ni Potifar na ‘pinangyayari ni Jehova na magin marahay an resulta kan gabos na ginigibo ni Jose.’ b Pag-abot nin panahon, itinalaga kan Ehipsiyong iyan si Jose na magin saiyang pinagkakatiwalaan na lingkod. Itinalaga niya man si Jose na magin tagapamahala kan saiyang bilog na harong. Ano an resulta? Nagin mas marahay an buhay ni Potifar.

6. Ano an tibaad namati ni Jose sa saiyang sitwasyon?

⁶ Imahinara kun ano an namati ni Jose. Ano daw an pinakagustong mangyari ni Jose? Iyan daw an marisa siya ni Potifar asin tawan nin balos? Posibleng marhay na an gusto ni Jose iyo na makatalingkas siya para makabalik siya sa saiyang ama. Kun sabagay, sa ibong kan gabos na pribilehiyo ni Jose sa harong ni Potifar, uripon pa man giraray siya nin sarong paganong kagurangnan. Dai pinangyari ni Jehova na patalingkason ni Potifar si Jose. Asin mas magrabe pa an sitwasyon ni Jose.

7. Sa anong paagi mas naggrabe pa an sitwasyon ni Jose? (Genesis 39:14, 15)

⁷ Arog kan pagkasaysay sa Genesis kapitulo 39,  nagkagusto ki Jose an agom ni Potifar asin pauruutro kaining inakit siya. Sa kada pagkakataon, pirming nagsasayuma sa saiya si Jose. Sa bandang huri, naanggot na marhay siya ki Jose kaya inakusaran niya ini na gusto siyang lupigan. (Basahon an Genesis 39:14, 15.) Kan madangog iyan ni Potifar, ipinapreso niya si Jose, asin nagdanay siya duman nin nagkapirang taon. (Gen. 39:19, 20) Ano an itsura kan presuhan? An Hebreong tataramon na ginamit ni Jose para sa “presuhan” puwedeng mangahulugan na “kalot na istakan nin tubig,” o “kalot,” na nagpaparisa na madiklom an palibot ni Jose asin na nakamati siya nin kawaran nin paglaom. (Gen. 40:15; nota sa ibaba) Ipinaparisa man kan Bibliya na may panahon na an mga bitis ni Jose kinadenahan asin an liog niya linagan nin pambaliog na lansang. (Sal. 105:17, 18) An sitwasyon ni Jose lalo pang naggrabe. Hali sa pagigin pinagkakatiwalaan na uripon nagin siyang sarong hamak na preso.

8. Dawa pa maggrabe an pagbalo, sa ano kita makakasigurado?

⁸ Namugtak ka na daw sa sarong makamumundong sitwasyon na sa ibong kan saimong udok na mga pamibi lalo pang naggrabe an sitwasyon? Puwede iyan mangyari. Dai kita ilinilikay ni Jehova sa mga pagbalo sa kinaban na ini na pinapamahalaan ni Satanas. (1 Juan 5:19) Pero, makakasigurado ka sa bagay na ini: Aram na marhay ni Jehova kun ano an inaagihan mo, asin nagmamakulog siya sa saimo. (Mat. 10:29-31; 1 Ped. 5:6, 7) Apuwera kaiyan, nanuga siya: “Dai taka nuarin man babayaan, asin dai taka nuarin man papabayaan.” (Heb. 13:5) Puwede kang tabangan ni Jehova na makatagal dawa pa an saimong sitwasyon garo baga mayo nang paglaom. Aramon ta kun paano iyan nagin totoo sa sitwasyon ni Jose.

9. Ano an nagpapatunay na si Jehova nasa kaibanan ni Jose kan siya nasa presuhan? (Genesis 39:21-23)

⁹ Basahon an Genesis 39:21-23. Dawa sa masakit na panahon na iyan nin pagkapreso, pinangyari ni Jehova na magin mapanggana si Jose. Paano? Pag-abot nin panahon, nakua ni Jose an tiwala asin respeto kan namamayong opisyal, arog kan nagibo niya ki Potifar. Dai nahaloy, ipinagkatiwala kan namamayong opisyal ki Jose an pamamahala sa iba pang mga preso. Sa katunayan, sinasabi kan Bibliya na “an namamayong opisyal sa presuhan dai na nakikiaram sa mga inaasikaso ni Jose.” Kadakul na ngunyan nin kapaki-pakinabang na gibuhon si Jose. Pambihira nanggad iyan na pagbabago! Paano natawan nin arog kaiyan na pinagtitiwalaan na katungdan an sarong preso na inakusaran na nagpurbar na manglupig sa agom nin sarong opisyal kan palasyo? May saro sanang paliwanag. Arog kan sinasabi sa Genesis 39:23, “si Jehova nasa kaibanan ni Jose asin pinangyari ni Jehova na magin marahay an resulta kan ano man na ginigibo niya.”

10. Ipaliwanag kun paano posibleng namati ni Jose na dai siya nagin mapanggana sa gabos na bagay.

¹⁰ Imahinara giraray kun ano an namati ni Jose. Pagkatapos na putik na akusaran asin mapreso, sa hiling mo namati niya daw na mapanggana siya sa gabos na bagay? Ano daw an pinakagustong mangyari ni Jose? Iyan daw an makua an pabor kan namamayong opisyal sa presuhan? Posibleng marhay na gusto ni Jose na makaluwas siya sa presuhan. Pinakiulayan niya pa ngani an saro pang preso na madali nang paluwason na kaulayon si Faraon para sa saiya tanganing makaluwas na siya sa mamundong presuhan na idto. (Gen. 40:14) Pero, dai tulos iyan nasabi ki Faraon kan lalaking idto. Huli kaiyan, nagdanay si Jose nin duwa pang taon sa presuhan na idto. (Gen. 40:23; 41:1, 14) Sa ibong kaiyan, padagos na pinangyari ni Jehova na magin mapanggana siya. Paano?

11. Anong espesyal na kakayahan an itinao ni Jehova ki Jose, asin paano ini nakatabang sa kautuban kan katuyuhan ni Jehova?

¹¹ Mantang nakapreso si Jose, pinangyari ni Jehova na magkaigwa nin duwang nakakapurisaw  na pangaturugan an hadi kan Ehipto. Gustong-gusto ni Faraon na maaraman kun ano an kahulugan kan mga iyan. Kan maaraman kan hadi na igwa nin kakayahan si Jose na mag-interpretar nin mga pangaturugan, ipinaapod niya siya. Sa tabang ni Jehova, nagibo ni Jose na iinterpretar an mga pangaturugan asin napahanga si Faraon sa praktikal na suhestiyon na itinao niya sa saiya. Huling nahiling ni Faraon na si Jehova nasa kaibanan kan hoben na lalaking si Jose, ninombrahan niya ini na magin tagapamahala nin pagkakan para sa bilog na Ehipto. (Gen. 41:38, 41-44) Dai nahaloy nagkaigwa nin grabeng taggutom na nakaapektar bako sana sa Ehipto kundi pati man sa Canaan, an daga kun sain nakaistar an pamilya ni Jose. Nasa kamugtakan na ngunyan si Jose para iligtas an saiyang pamilya asin sa siring maiingatan an linya na gigikanan kan Mesiyas.

12. Sa anong mga paagi pinangyari ni Jehova na magin mapanggana si Jose?

¹² Isip-isipon an pambihirang mga pangyayari sa buhay ni Jose. Siisay an nagpangyari para tawan nin espesyal na atensiyon ni Potifar si Jose, na sarong uripon man sana? Siisay an nagpangyari para pahilingan nin pabor kan namamayong opisyal kan presuhan si Jose, na sarong hamak na preso? Siisay an nagpangyari para magkaigwa nin nakakapurisaw na mga pangaturugan si Faraon asin nagtao ki Jose kan kakayahan na iinterpretar an mga iyan? Siisay an nasa likod kan pagnombra ki Jose bilang tagapamahala kan pagkakan sa Ehipto? (Gen. 45:5) Malinaw na si Jehova an nagpangyari na magin mapanggana an gabos na ginibo ni Jose. Kan huri, pinangyari ni Jehova na an daing hirak na pakana kan mga tugang ni Jose magin paagi para mautob Niya an Saiyang kabutan.

13. Nag-iinterbenir daw si Jehova sa lambang sitwasyon na inaatubang ta? Ipaliwanag.

¹³ Ano an manunudan ta sa mga nangyari sa buhay ni Jose? Nag-iinterbenir daw si Jehova sa lambang sitwasyon na inaatubang ta? Minamaniobra niya daw an lambang pangyayari sa satong buhay tanganing magkaigwa nin marahay na dahilan an gabos na maraot na bagay na nangyayari sa sato? Dai, an Bibliya mayong itinutukdo na arog kaiyan. (Ecl. 8:9; 9:11) Minsan siring, ini an aram ta: Pag napapaatubang kita sa pagbalo, aram iyan ni Jehova asin dinadangog niya an paghagad ta nin tabang. (Sal. 34:15; 55:22; Isa.  59:1) Urog pa diyan, matatabangan kita ni Jehova na mapangganang matagalan an mga kasakitan. Paano?

14. Paano kita tinatabangan ni Jehova sa panahon nin kasakitan?

¹⁴ An sarong paagi na tinatabangan kita ni Jehova iyo an pagtao sato nin karangahan asin pampakusog nin buot sa tamang panahon. (2 Cor. 1:3, 4) Iyan an nangyari ki Eziz, sarong brother na taga Turkmenistan na nasentensiyahan nin duwang taon na pagkapreso huli sa saiyang pagtubod. “Sa aldaw nin pagbista sako,” an sabi niya, “ipinahiling sako kan sarong brother an Isaias 30:15, na an sabi: ‘An saindong kusog yaon sa pagdanay na kalmado asin pagpahiling nin tiwala.’ An bersikulong ini pirming nakatabang sako na magdanay na kalmado asin magtiwala ki Jehova sa gabos na bagay. An paghurop-hurop sa bersikulong ini nakatabang sako sa bilog na panahon na nakapreso ako.” May maiisip ka daw na pangyayari sa saimong buhay kun sain tinabangan ka ni Jehova paagi sa pagtao saimo nin karangahan asin pampakusog nin buot sa panahon na kinaipuhan mo iyan na marhay?

15-16. Ano an manunudan mo sa eksperyensiya ni Tori?

¹⁵ Sa parati, saka ta sana nahihiling kun paano kita tinabangan ni Jehova na mapangganahan an sarong kasakitan pag ginigirumdom ta na iyan. Nagin totoo iyan sa sister na si Tori. An saiyang aking lalaki na si Mason, nakipaglaban sa kanser sa laog nin anom na taon sagkod na magadan ini. Siyempre, namundong marhay kaiyan si Tori. Sabi niya, “sa hiling ko bilang sarong ina, mayo na nin mas makulog pa kisa digdi.” Sinabi pa niya, “siguradong mauyon an ibang mga magurang na mas makulog na mahiling na nagsasakit an saimong aki kisa sa ika mismo an nagsasakit.”

¹⁶ Dawa ngani nakakapangluya nin biyo an pagbalong idto, hinurop-hurop ni Tori kan huri kun paano siya tinabangan ni Jehova na makatagal. “Pag ginigirumdom ko an panahon na idto,” an  sabi niya, “nahihiling ko kun paano ako tinabangan kan mamumuton na kamot ni Jehova sa bilog na panahon na naghihilang an sakuyang aki. Halimbawa, dawa kan mga panahon na dai puwedeng bisitahon si Mason huli sa masakit na kamugtakan niya, nagbibiyahe pa man giraray an mga tugang nin duwang oras pasiring sa ospital. Pirming may tugang sa waiting room na andam na magtao nin suporta. May mga tugang man na nag-aasikaso kan samong materyal na mga pangangaipo. Dawa sa pinakamasakit na mga panahon, dai kami nawaran kan samong mga pangangaipo.” Itinao ni Jehova ki Tori an kinakaipuhan kaini para makatagal, asin ginibo niya man iyan ki Mason.—Hilingon an kahon na “ Itinao ni Jehova sa Samo Kun Ano Mismo an Kaipuhan Mi.”

17-18. Ano an makakatabang sa sato para mahiling asin maapresyar an suporta ni Jehova sa mga panahon nin pagbalo? (Salmo 40:5)

¹⁷ Basahon an Salmo 40:5. An pasuhan nin sarong mountain climber iyo an makaabot sa alituktok. Pero, mantang patukad siya, may mga lugar diyan na puwede siyang magpundo asin iapresyar an magayon na tanawon. Sa kaparehong paagi, pirming magtao nin panahon na magpundo nguna asin isip-isipon kun paano ginigibo ni Jehova na magin mapanggana ka dawa pag nagtatagal ka nin kasakitan. Sa pagtatapos kan kada aldaw, haputon an sadiri: ‘Sa paanong paagi ako binendisyunan ni Jehova ngunyan na aldaw? Dawa may pagbalo pa akong inaatubang, paano ako tinatabangan ni Jehova na makatagal?’ Hilingon kun may masasabi kang kisiyera sarong bendisyon hali ki Jehova na nagpangyari saimo na magin mapanggana.

¹⁸ Iyo, posibleng ipinapamibi mo na matapos na an pagbalo sa saimo. Natural sana iyan asin angay na gibuhon. (Fil. 4:6) Pero dapat man na naririsa ta an mga bendisyon na igwa kita ngunyan. Tutal, nanunuga si Jehova na papakusugon kita asin tatabangan na makatagal. Kaya nungkang paglingawan na magpasalamat na sinusuportaran ka ni Jehova. Dangan mahihiling mo kun paano ka tinatabangan ni Jehova para magin mapanggana, arog kan ginibo niya ki Jose, dawa sa mga panahon nin pagbalo.—Gen. 41:51, 52.