STADI 3
Jehova i Stap Halpem Yu Blong Evri Samting i Go Gud
“Jehova i stap wetem Josef . . . , i stap mekem evri samting we Josef i mekem oli go gud.”—JEN. 39:2, 3.
SINGSING 30 Papa Blong Mi, God Blong Mi, Fren Blong Mi
BIGFALA TINGTING a
1-2. (1) ?From wanem yumi no sapraes taem yumi kasem trabol? (2) ?Bambae yumi tokbaot wanem long stadi ya?
YUMI ol man blong Jehova, yumi no sapraes taem yumi kasem trabol. Olsem we Baebol i talem, “yumi mas gotru long plante trabol, blong yumi save go insaed long Kingdom blong God.” (Wok 14:22) Mo tu, yumi save se sam long ol problem blong yumi bambae oli no finis go kasem we yumi laef long niufala wol blong God, we “bambae i no moa gat man i ded, mo bambae man i no moa sore, mo bambae i no moa gat man i krae, mo bambae man i no moa harem nogud long bodi blong hem.”—Rev. 21:4.
2 Jehova i no protektem yumi fulwan blong ol trabol oli no kasem yumi. Be hem i halpem yumi blong stanap strong. Makem samting we aposol Pol i talem long ol Kristin we oli laef long Rom. Fastaem, hem i tokbaot ol trabol we hem mo ol brata mo sista oli stap fesem. Biaen hem i raetem se: “Man ya we i lavem yumi, hem i mekem se yumi kamaot long olgeta samting ya, yumi win olgeta.” (Rom 8:35-37) Hemia i min se Jehova i save halpem yu blong ol samting oli go gud, nating se yu stap fesem wan trabol. Naoia bambae yumi luk olsem wanem Jehova i mekem ol samting we Josef i mekem oli go gud, mo olsem wanem hem i save halpem yu tu.
TAEM OL SAMTING I JENIS KWIKTAEM NOMO
3. ?Olsem wanem laef blong Josef i jenis kwiktaem nomo?
3 Jekob i soemaot se hem i lavem tumas boe blong hem Josef. (Jen. 37:3, 4) Mo from samting ya, ol bigfala boe blong Jekob oli stat blong jalus long brata blong olgeta. Taem oli luk se oli gat wan janis, oli salem Josef i go long wan grup blong ol bisnesman blong Midian. Ol bisnesman ya oli tekem Josef i go longwe long Ijip, mo long ples ya oli salem hem bakegen long Potifa, we i lida blong ol gad blong Fero. Laef blong Josef i jenis kwiktaem nomo, bifo hem i wan boe we papa blong hem i lavem hem tumas, be naoia hem i kam slef blong wan man Ijip.—Jen. 39:1.
4. ?Wanem sam problem we yumi fesem, we i klosap sem mak olsem blong Josef?
4 Baebol i talem se “ol nogud samting oli stap hapen long evri man.” (Pri. 9:11, Holy Bible—Easy-to-Read Version) Samtaem yumi kasem ol problem we oli sem mak nomo long ol samting we oli stap traem “olgeta man.” (1 Kor. 10:13) O maet yumi safa from we yumi ol disaepol blong Jisas. Eksampol, maet ol man oli tok nogud long yumi, oli agensem yumi, o oli ronem mo kilim yumi from bilif blong yumi. (2 Tim. 3:12) Nomata wanem problem yu stap fesem, be Jehova i save halpem yu blong ol samting oli go gud. ?Olsem wanem hem i bin mekem samting ya long Josef?
Jehova i halpem Josef blong ol samting oli go gud, nating se oli salem hem blong i kam slef blong Potifa long Ijip (Haf 5)
5. ?Olsem wanem Potifa i save se Jehova i stap halpem Josef? (Jenesis 39:2-6)
5 Ridim Jenesis 39:2-6. Potifa i makem se Josef i wan yang man we i waes mo i wok had. Mo hem i save from wanem i olsem. Potifa i luk se “Jehova i stap mekem evri samting we Josef i mekem oli go gud.” b Mo samtaem biaen, hem i mekem Josef i kam man blong givhan long hem. Mo tu, hem i putumap Josef blong i lukaot long evri samting long haos blong hem. ?Wanem i kamaot from? Potifa i win gud long laef blong hem.
6. ?Josef i save gat wanem tingting long situesen blong hem?
6 Traem tingbaot filing blong Josef. ?Wanem nao hem i wantem moa? ?Blong Potifa i makem ol gudfala wok we hem i mekem mo i glad long hem from? Ating samting we Josef i wantem moa, hemia blong hem i kam fri mo i save gobak long papa blong hem. Nating se Josef i gat plante privilej long haos blong Potifa, be hem i stap yet olsem wan slef blong wan masta we i no wosipim Jehova. Jehova i no mekem wan samting blong Potifa i letem Josef i go fri. Mo situesen blong Josef i stap kam mowas.
TAEM SITUESEN I KAM MOWAS
7. ?Olsem wanem situesen blong Josef i kam mowas? (Jenesis 39:14, 15)
7 Olsem we Jenesis japta 39 i soem, waef blong Potifa i laekem Josef tumas mo i stap traem blong pulum Josef blong i slip wetem hem. Be oltaem Josef i talem no long hem. Nao wan dei, hem i kros tumas mo i giaman se Josef i traem blong repem hem. (Ridim Jenesis 39:14, 15.) Taem Potifa i harem samting ya, hem i putum Josef long kalabus mo hem i stap long ples ya blong sam yia. (Jen. 39:19, 20) ?Laef long kalabus i olsem wanem? Hibru tok we Josef i yusum blong tokbaot “kalabus” i minim “wan ples aninit long graon,” o “wan hol,” hemia i soemaot se ples we hem i stap long hem i tudak mo hem i harem se hem i no gat hop. (Jen. 40:15; fut.) Mo tu, Baebol i tokbaot se blong smoltaem, oli fasemtaet leg blong Josef long ol jen mo oli putum nek blong hem long ol aean. (Sam 105:17, 18) Situesen blong Josef i stap kam mowas. Bifo, hem i wan slef we masta blong hem i trastem hem, be naoia hem i wan prisena we i nating nomo.
8. ?Nating se wan trabol i kam mowas, be yumi save sua long wanem samting?
8 ?Yu yu bin stap long wan situesen finis we, nating se yu prea strong long Jehova blong i halpem yu, be ol samting oli kam mowas? Hemia i save hapen. Jehova i no save protektem yumi fulwan long ol trabol we yumi stap kasem long wol ya we Setan nao i rula blong hem. (1 Jon 5:19) Be yu save sua se Jehova i luk evri samting we yu stap gotru long hem, mo hem i kea long yu. (Mat. 10:29-31; 1 Pita 5:6, 7) Antap long hemia, hem i promes se: “Bambae mi mi neva lego yu, mo bambae mi neva livim yu yu stap yu wan.” (Hib. 13:5) Jehova i save halpem yu blong stanap strong, nating we yu harem se yu no gat hop. I gud yumi luk olsem wanem Jehova i mekem samting ya long Josef.
Jehova i stap wetem Josef nating se hem i stap long kalabus, mo oli putumap hem blong i lukaot long ol narafala prisena (Haf 9)
9. ?Wanem i soemaot se Jehova i stap wetem Josef, taem hem i stap long kalabus? (Jenesis 39:21-23)
9 Ridim Jenesis 39:21-23. Nating se Josef i fesem hadtaem taem hem i stap long kalabus, be Jehova i gohed blong mekem se evri samting we Josef i mekem oli go gud. ?Hem i mekem samting ya olsem wanem? Afta we sam taem i pas, jif ofisa blong kalabus i stat blong trastem mo respektem Josef, sem mak olsem we Potifa i bin mekem. Biaen, jif ofisa ya i putumap Josef blong i lukaot long ol narafala prisena. Baebol i talem se “jif ofisa blong kalabus i no moa lukaot long wan samting we i stap long han blong Josef.” Naoia Josef i gat sam wok blong mekem, blong hem i stap bisi. !Hemia i wan nambawan jenis! ?Olsem wanem oli save trastem wan prisena we oli talem se hem i traem repem waef blong wan haeman, blong i mekem wan wok olsem? I gat wan eksplenesen nomo blong samting ya. Jenesis 39:23 i talem se “Jehova i stap wetem Josef, mo Jehova i mekem se evri samting we Josef i mekem oli go gud.”
10. Eksplenem from wanem maet Josef i harem se evri samting we hem i mekem oli no go gud.
10 Traem tingbaot bakegen filing blong Josef. Afta we oli talem ol giaman tok long saed blong hem mo oli putum hem long kalabus, ?yu ting se hem i harem se evri samting we hem i mekem oli go gud? ?Wanem nao hem i wantem moa? ?Blong jif ofisa blong kalabus i glad long ol wok blong hem? Ating samting we Josef i wantem tumas, hemia blong oli fogivim hem mo letem hem i go fri. Hem i iven askem wan narafala prisena we klosap bambae hem i go fri, blong i toktok long Fero long bihaf blong hem, blong oli save letem hem i go fri. (Jen. 40:14) Be, man ya i no go toktok long Fero stret afta we hem i kamaot long kalabus. Mo from samting ya, Josef i gohed blong stap long kalabus blong tu moa yia. (Jen. 40:23; 41:1, 14) Nating se i olsem, Jehova i gohed blong mekem se evri samting we Josef i mekem oli go gud. ?Hem i mekem samting ya olsem wanem?
11. ?Jehova i halpem Josef blong i mekem wanem, mo olsem wanem hemia i givhan tu blong plan blong Jehova i kamtru?
11 Taem Josef i stap long kalabus, Jehova i mekem king blong Ijip i luk tu drim. Fero i wantem tumas blong save mining blong tufala drim ya. Taem king i faenemaot se Josef i naf blong talemaot mining blong ol drim, hem i askem blong oli go tekem hem i kam. Jehova i halpem Josef blong i talemaot mining blong ol drim ya, mo blong i talemaot samting tu we Fero i mas mekem. Hemia i mekem Fero i glad tumas. Hem i luksave se Jehova i stap wetem yangfala man ya, mo i putumap Josef blong i lukaot long olgeta kakae long Ijip. (Jen. 41:38, 41-44) Sam taem biaen, kakae i sot long ful kantri blong Ijip, be tu long Kenan, hemia ples ya we famle blong Josef i laef long hem. Naoia Josef i naf blong sevem famle blong hem, mo hemia laen ya tu we Mesaea bambae i kamaot long hem.
12. ?Olsem wanem Jehova i mekem evri samting we Josef i mekem oli go gud?
12 Traem tingbaot ol samting we oli hapen long laef blong Josef. ?Hu i pulum Potifa blong i tinghae long Josef we i wan slef nomo? ?Hu i pulum jif ofisa blong kalabus blong i glad long Josef we i wan prisena nomo? ?Hu i givim ol drim ya long Fero mo i mekem Josef i naf blong talemaot mining blong olgeta? ?Hu i pulum Fero blong i putumap Josef blong i lukaot long olgeta kakae long Ijip? (Jen. 45:5) I klia se Jehova nao i stap mekem se evri samting we Josef i mekem oli go gud. Nating se ol brata blong Josef oli wantem kilim hem i ded, be Jehova i jenisim situesen ya blong i save mekem wil blong hem i kamtru.
?OLSEM WANEM JEHOVA I HALPEM YU BLONG EVRI SAMTING I GO GUD?
13 ?Jehova i stap kontrolem evri samting we i stap hapen long laef blong yumi? Yu eksplenem.
13 ?Yumi lanem wanem long stori blong Josef? ?Jehova i tekem aksen evritaem we wan samting i hapen long laef blong yumi? ?Hem i stap kontrolem evri samting long laef blong yumi, blong ol nogud samting oli hapen from wan gudfala risen? Nogat, Baebol i no tijim samting ya. (Pri. 8:9; 9:11) Nating se i olsem, yumi save se taem yumi fesem wan trabol, Jehova i luk samting ya mo i harem taem yumi krae i go long hem blong i halpem yumi. (Sam 34:15; 55:22; Aes. 59:1) Antap long hemia, Jehova i save halpem yumi blong stanap strong tru long ol trabol, we evri samting i go gud nomo. ?Olsem wanem hem i mekem samting ya?
14. ?Olsem wanem Jehova i halpem yumi taem yumi kasem trabol?
14 Wan rod we Jehova i yusum blong halpem yumi, hemia taem i enkarejem mo i mekem yumi harem gud long stret taem. (2 Kor. 1:3, 4) Hemia nao samting we i hapen long Eziz, wan brata long Tukmenistan we i bin stap long kalabus blong tu yia from bilif blong hem. Hem i talem se: “Long moning we bambae mi pas long kot, wan brata i soem Aesea 30:15 long mi. Vas ya i talem se: ‘Yufala i save kam strong sipos yufala i stap kwaet mo yufala i soemaot se yufala i trastem God.’ Oltaem vas ya i halpem mi blong stap kwaet mo dipen long Jehova long evri samting. Taem mi tingting dip long vas ya, hemia i halpem mi long olgeta taem we mi spenem long kalabus.” ?Yu yu tingbaot wan taem long laef blong yu we Jehova i halpem yu, taem i enkarejem mo i mekem yu harem gud, long taem we yu rili nidim?
15-16. ?Yu yu lanem wanem long ekspiriens blong Tori?
15 Plante taem, taem yumi tingtingbak long trabol we yumi kasem, bambae yumi luksave se Jehova i bin halpem yumi blong stanap strong. Wan sista nem blong hem Tori i luksave se samting ya i tru. Boe blong hem Mason, i gat kansa blong sikis yia, mo hem i ded. Long taem ya, Tori i harem nogud bitim mak. Hem i talem se: “Mi no ting se i gat wan situesen we i strong moa i bitim hemia we mi kasem. Mi sua se ol narafala perens bambae oli agri se taem yu luk pikinini blong yu i safa, hemia i moa nogud i bitim we yu wan yu safa.”
16 Nating se Tori i harem nogud tumas taem i luk we boe blong hem i safa, be samtaem biaen hem i tingbaot olsem wanem Jehova i bin halpem hem blong i stanap strong. Hem i talem se: “Taem mi tingtingbak long taem ya, mi luksave olsem wanem Jehova i halpem mi taem boe blong mi i sik. Eksampol, nating se Mason i sik tumas mo i no save luk ol man we oli kam blong visitim hem, be yet ol brata sista oli draev tu aoa blong kam long hospital. Oltaem i gat ol brata mo sista we oli stap, mo oli rere mo glad nomo blong givhan. Mo tu oli givim ol samting we mifala i nidim. Iven long ol taem we i had tumas, be oltaem mifala i gat ol samting we mifala i nidim.” Jehova i givim samting we Tori i nidim blong i stanap strong, mo hem i mekem sem mak tu long Mason.—Yu luk bokis ya “ Jehova i Givim Stret Samting We Mifala i Nidim.”
KAONTEM OL BLESING WE YU KASEM
17-18. ?Wanem bambae i halpem yumi blong luksave mo glad long ol samting we Jehova i mekem, blong sapotem yumi taem yumi kasem trabol? (Ol Sam 40:5)
17 Ridim Ol Sam 40:5. Wan man we i stap klaem long wan hil, mak blong hem i blong kasem top blong hil ya. Be taem hem i stap go, i gat plante ples we hem i save stop smol mo enjoem ol naesfala samting we hem i luk. Long sem fasin, i gud we wanwan taem yu stop mo tingbaot olsem wanem Jehova i halpem yu blong ol samting oli go gud, nating se yu stap gotru long wan trabol. Long en blong evri dei, i gud yu askem se: ‘?Wanem i soemaot se Jehova i blesem mi tede? ?Nating se problem we mi fesem i stap yet, be olsem wanem Jehova i halpem mi blong stanap strong?’ I gud yu traem makem wan samting we i soemaot se Jehova i halpem yu blong ol samting oli go gud.
18 I tru se maet yu stap prea blong ol trabol blong yu oli finis. Hemia i no rong. (Fil. 4:6) Be yumi mas luksave tu ol blesing we yumi kasem naoia. Antap long hemia Jehova i promes blong givim paoa long yumi mo help we yumi nidim blong stanap strong. Taswe oltaem yu mas soem se yu glad we Jehova i stap sapotem yu. Long rod ya, bambae yu luk olsem wanem Jehova i halpem yu blong ol samting oli go gud olsem we hem i mekem long Josef, nating se yu stap fesem trabol.—Jen. 41:51, 52.
SINGSING 32 !Yu Stanap Long Saed Blong Jehova!
a Taem yumi kasem wan strong traem, maet yumi ting se ol samting we yumi mekem bambae oli no “go gud.” Maet yumi ting se yumi save yusum tok ya nomo taem ol traem we yumi kasem oli finis. Be ol samting we oli hapen long laef blong Josef oli save tijim wan impoten lesen long yumi, hemia se Jehova i save halpem yumi blong ol samting oli go gud, nating se yumi stap kasem ol traem. Stadi ya bambae i eksplenem olsem wanem Jehova i mekem samting ya.
b I gat sam vas blong Baebol nomo we oli tokbaot ol samting we i jenis long laef blong Josef we i kam wan slef, be i luk olsem se i tekem plante yia blong ol jenis ya oli hapen.
