1-2. (a) Engkai maka la ateta mamang sanga siadapi kesusahen? (b) Kai kari sibahas bas artikel enda?

 SELAKU umat Jahwe, la ateta mamang sanga siadapi kesusahen. Siteh maka enggo ikataken Pustaka, “gelah banci kita masuk ku Kerajan Dibata, arus siadapi lebe melala kiniseran.” (Perb. 14:22) Siteh ka maka piga-piga masalahta bas doni si mbaru ngenca banci dung. I je, “lanai pagi lit kematen ras ceda ate. Tangis ntah pe si mesui lanai pagi lit.”​—Ket. 21:4.

² Labo ilindungi Jahwe kita arah kesusahen, tapi isampatiNa kita gelah ngasup ngadapisa. Cuba perdiateken kai nina Rasul Paulus man kalak Kristen i Roma. Tangtangna, ituliskenna piga-piga kesusahen si adapina ras siadapi turang seninana. Kenca si e, itulisna bagenda, “Perban penampat Kristus si engkelengi kita, tuhu-tuhu menang kita ngadapi si e kerina.” (Rom. 8:35-37) Enda ertina banci sampati Jahwe kita berhasil amin pe sangana ngadapi kesusahen. Mari sinen uga Jahwe nampati Jusup gelah berhasil, ras uga Jahwe nampati kita.

3. Perubahen kai si rempet terjadi man Jusup?

³ Teridah kel ban Jakup maka keleng kel atena Jusup. (Kej. 37:3, 4) Akibatna, cian ate abang-abangna man Jusup. Sanga lit kesempaten, idayaken kalak e Jusup man  sada kelompok perbinaga bangsa Midian. Jusup ibaba ratusen kilometer dauhna ku Mesir. I je, idayaken ia man Potipar, sekalak kepala pengawal istana raja Mesir. Rempet berubah kegeluhen Jusup. Mbarenda ia anak kesayangen bapakna, gundari enggo jadi budak bas Mesir.​—Kej. 39:1.

4. Kesusahen kai si banci saja terjadi man banta?

⁴ Ikataken Pustaka maka “kerina kalak ipengaruhi waktu ras kejadin si la isangka-sangka.” (Peng. 9:11) Mon-mon siadapi kesusahen si “biasa adapi kerina kalak.” (1 Kor. 10:13) Banci jadi siadapi kesusahen perban kita murid Jesus. Misalna, banci saja kita itokoh-tokohi, itentang, ntah pe ianiaya perban kinitekenta. (2 Tim. 3:12) La soal kai pe kesusahenta pasti isampati Jahwe kita gelah ngasup ngadapisa. Uga Jahwe nampati Jusup gelah ngasup ngadapi kesusahen?

5. Kai si isimpulken Potipar sanga idahna Jusup berhasil? (Kejadin 39:2-6)

⁵ Baca Kejadin 39:2-6. Iperdiateken Potipar maka Jusup e anak muda si rajin ras beluh bas dahinna. Tehna maka “iban Jahwe kerina si idahikenna berhasil.” b Dungna, iban Potipar Jusup jadi pelayan pribadina ras si ngawasi kerina isi rumahna. Hasilna, Potipar jadi makmur.

6. Banci saja uga nge perasan Jusup sanga ngelayani bas rumah Potipar?

⁶ Cuba bayangken perasan Jusup. Kai nge si pentingna kel akapna? Merhat nge ia iperdiateken ras iupahi Potipar? Mbelin kemungkinenna, merhat Jusup bebas gelah banci jumpa ras bapakna. Amin pe Jusup jadi kalak si terteki bas rumah Potipar, arus denga layanina tuanna si la nembah Jahwe. Labo iban Jahwe gelah bebasken Potipar Jusup. La ndekah kenca si e, reh parahna situasi Jusup.

7. Kai saja nge si erban situasi Jusup reh parahna? (Kejadin 39:14, 15)

⁷ Bagi si ituriken bas Kejadin pasal 39, ngena ate diberu Potipar man Jusup,  janah mulih-ulih igodana ia. Tiap igodana Jusup, mis itulak Jusup. Dungna, merawa kel ia janah ikatakenna maka iperkosa Jusup atena ia. (Baca Kejadin 39:14, 15.) Sanga begi Potipar kerna si e, itamana Jusup ku penjara. I je me ia piga-piga tahun dekahna. (Kej. 39:19, 20) Uga kin situasi penjara e? Bas bahasa Heber kata “penjara” si ipake man Jusup e ertina ingan nimpan lau i teruh taneh ntah pe lubang. E mbuktiken maka gelap kel penjara e janah lanai tempa lit arapen Jusup. (Kej. 40:15) Ikataken bas Pustaka maka nahe Jusup sempat igari janah kerahungna iiket alu rante besi. (Ms. 105:17, 18) Situasi Jusup enggo reh parahna. Mbarenda ia budak si terteki, dungna jadi sekalak tahanen.

8. Amin pe situasi banci reh parahna, kerna kai nge kita tek?

⁸ Pernah nge adapindu situasi si reh parahna amin pe enggo tutus kel atendu ertoto? Si e banci terjadi perban kita nggeluh bas doni si ikuasai Setan enda. (1 Joh. 5:19) Tapi, banci kam tek kerna si enda: Amin pe la lindungi Jahwe kita arah kesusahen, tehNa kai si sangana siadapi janah ermediate Ia man banta. (Mat. 10:29-31; 1 Pet. 5:6, 7) Enggo ka Ia erjanji, “Labo ndigan pe kam Kutadingken, labo ndigan pe kam Kupediat.” (Heb. 13:5) Banci sampati Jahwe kita megenggeng amin pe situasita tempa-tempa la lit jalan keluarna. Mari sinen buktina arah pengalamen Jusup.

9. Kai buktina Jahwe nemani Jusup sanga ia bas penjara? (Kejadin 39:21-23)

⁹ Baca Kejadin 39:21-23. Sanga Jusup bas penjara pe, iban Jahwe ia berhasil. Dungna tek kepala penjara man Jusup janah iergaina ia, bali bagi Potipar mbarenda. Iban kepala penjara e Jusup ngawasi kerina kalak si ipenjaraken. Bagenda nina Pustaka, “Lanai perlu iawasi kepala penjara e kai pe si enggo percayakenna man Jusup.” Emaka enggo lit dahin Jusup amin pe ia bas penjara denga. Perubahen e la isangka-sangka. Engkai maka sekalak tahanen si ituduh mperkosa diberu kepala pengawal istana, banci ibereken tugas si bage? Jawapenna lit bas Kejadin 39:23, “Jahwe si nemani Jusup janah kai pe si dahikenna iban Jahwe berhasil.”

10. Payo nge iakap Jusup enggo berhasil ia bas kerinana? Jelasken.

¹⁰ Cuba ukuri uga perasan Jusup. Kenca ia ipitnah ras ipenjaraken, menurutndu enggo nge kapna ia berhasil bas kerinana? Kai kin situhuna sura-sura Jusup? Merhat nge ia gelah jadi ate kepala penjara ngidah ia? Mbelin kemungkinenna, merhat kel Jusup ikataken la ersalah ras ibebasken. Selain si e, gelah banci ia ibebasken arah penjara, ipindona ka man tahanen si nandangi ibebasken gelah ngerana man raja Mesir. (Kej. 40:14) Tapi, kenca tahanen e ndarat arah penjara, lupa ia man Jusup. Emaka, arus Jusup bas penjara dua tahun nari. (Kej. 40:23; 41:1, 14) Tapi, terus ban Jahwe ia berhasil. Uga carana?

11. Kengasupen kai si bere Jahwe man Jusup, janah uga e lit hubungenna ras Mesias si ijanjiken Jahwe?

¹¹ Sanga Jusup bas penjara, ibere Jahwe dua nipi man raja Mesir si erban ia lanai tenang. Merhat kel raja Mesir meteh erti nipina e. Sanga iteh raja maka Jusup banci ngertiken nipi, isuruhna ia  reh. Alu penampat Jahwe banci iertiken Jusup nipina e, janah cocok kel akap raja Mesir nasehat si mehuli arah Jusup. Perban teh raja Mesir Jahwe si nampati Jusup, ilantikna ia jadi si ngurus pangan bas Mesir. (Kej. 41:38, 41-44) La ndekah kenca si e, terjadi kelihen si mekelek bas Mesir bage pe bas Kanaan, negri ingan tading keluarga Jusup. Gundari enggo banci iselamatken Jusup keluargana arah kelihen. Alu bage, bas pudi wari banci lahir Mesias arah keturunen keluargana.

12. Kai saja si ilakoken Jahwe guna erban Jusup berhasil?

¹² Cuba ukuri kejadin si luar biasa bas kegeluhen Jusup. Ise nge si erban Potipar mperdiateken sekalak budak bagi Jusup? Ise nge si erban jadi ate kepala penjara man Jusup? Ise nge si mere nipi si erban gelisah akap raja Mesir ras si mereken kengasupen guna ngertiken nipi e man Jusup? Ise nge si ngiahken raja Mesir ngelantik Jusup guna ngurus pangan i Mesir? (Kej. 45:5) Jelas kel teridah maka Jahwe me si erban Jusup berhasil bas kerina e. Amin pe ibunuh abang-abangna atena Jusup, iubah Jahwe situasi e gelah banci terjadi sura-suraNa.

13. Payo nge ikut campur Jahwe bas kerina si terjadi bas kegeluhenta? Jelasken.

¹³ Kai si banci sipelajari arah pengalamen Jusup? Labo ikut campur Jahwe bas tiap kesusahenta. Labo iubah Jahwe tiap kejadin bas geluhta gelah kerina si la mehuli terjadi guna tujun si mehuli. (Peng. 8:9; 9:11) Tapi, siteh maka sanga siadapi kesusahen iteh Jahwe kerna si e, janah begikenNa totota mindo penampat. (Ms. 34:15; 55:22; Jes. 59:1) Selain si e, banci isampati Jahwe kita gelah berhasil ngadapi kesusahen. Uga carana?

14. Uga cara Jahwe nampati kita ngadapi situasi si mesera?

¹⁴ Salah sada cara Jahwe nampati kita eme alu mereken pengapul ras pergegeh, biasana ibereNa e bas waktu si  tepat. (2 Kor. 1:3, 4) Bage me si igejapken Eziz, sekalak turang seninata arah Turkmenistan si ipenjaraken dua tahun perban kinitekenna. Bagenda nina, “Bas erpagi-pagi sope aku iadili, icidahken sekalak turang senina Jesaya 30:15 man bangku. I je ikataken, ‘Adi tetap kena tek janah la kena mbiar, megegeh pagi kena.’ Ayat e me si lalap nampati aku tetap tenang ras ngandalken Jahwe la soal kai si terjadi. Alu ngukuri ayat e tersampati kel aku sanga bas penjara.” Ingetndu denga nge sanga isampati Jahwe kam alu mereken pengapul ras pergegeh bas waktu si tuhu-tuhu iperlukenndu?

15-16. Kai si banci sipelajari arah pengalamen Tori?

¹⁵ Biasana, banci siteh uga cara Jahwe nampati kita megenggeng kenca enggo silewati kesusahen. Bage me si igejapken Tori. Anakna Mason arus erjuang ngadapi kanker enem tahun dekahna seh ngasa ia mate. Emaka ceda kel ukurna. Bagenda nina, “Lanai kuakap lit kesusahen si beraten asangken si kuadapi.” Nina ka, “Tek aku orang tua si deban pe pasti setuju maka ngidah anakta suin ndauh beraten asangken kita si ngenanamisa.”

¹⁶ Memang mberat kel situasi si iadapi Tori. Tapi bas pudi wari, sanga ukurina mulihi kai si enggo terjadi, bagenda nina, “Gundari kuteh maka terus sampati Jahwe aku sanga sakit anakku. Contohna, sanga lemah kel keadan Mason janah la banci idahi kalak ia, turang senina tetap denga reh amin pe dua jam perdalanen ku rumah sakit. Lit lalap turang senina si nimai bas ruang tunggu si enggo ersikap guna mereken dukungen. Selain  si e, isikapken turang senina ka keperlun kami secara materi. Amin pe mesera kel paksa si e, lalap dat kami si perluken kami.” Ibereken Jahwe man Tori kai si perlukenna gelah megenggeng. Bage ka me si lakoken Jahwe man Mason.​—Nen kotak “ Ibere Jahwe Kami Kai si Tuhu-Tuhu Iperluken Kami.”

17-18. Kai si banci nampati kita guna meteh ras ngergai pasu-pasu Jahwe sanga siadapi kesusahen? (Masmur 40:5)

¹⁷ Baca Masmur 40:5. Biasana, tujun sekalak pendaki gunung eme gelah seh ku puncak gunung. Tapi bas perdalanen lit piga-piga ingan si banci kalak e ngadi guna natap-natap pemandangen. Bage ka pe, sanga ngadapi kesusahen, banlah waktundu alu ratur guna ngukuri uga Jahwe enggo erban kam berhasil, amin pe kesusahenndu e lenga dung. Tiap berngi sungkunlah bandu: ‘Pasu-pasu kai saja si bereken Jahwe man bangku wari enda? Amin pe lit denga kesusahen, uga Jahwe nampati aku gelah megenggeng?’ Ukurilah silang-langna sada pasu-pasu si enggo bereken Jahwe si erban kam megenggeng bas wari e.

¹⁸ Banci saja enggo totokenndu gelah bene kesusahen si adapindu. Memang e wajar janah sesuai ras Pustaka. (Pil. 4:6) Tapi, arus ka siinget kerna pasu-pasu si enggo sialoken gundari. Enggo erjanji Jahwe guna mpegegehi kita ras nampati kita megenggeng. Emaka, ingetlah lalap maka Jahwe me si nampati kam sedekah enda gelah banci megenggeng. Alu bage, tehndu me maka terus isampati Jahwe kam, bagi Ia nampati Jusup. Payo, banci ibanNa kam berhasil amin pe sanga ngadapi kesusahen.​—Kej. 41:51, 52.