1, 2. a) Ka uagu maweiridun tubéi wanigi dan le liabin óuchawaguni sódini? b) Kaba uagu wayanuha lidan aturiahani le?

 WAGÍA keisi lubúeingu Heowá, maweiriduntu wanigi dan le liabin óuchawaguni sódini. Subudi wamuti le tariñagubei Bíbülia: “Lunti lan wasufurirun saragu lun gayara lan webelurun lidoun larúeihan Bungiu” (Adü. 14:22). Subudi wamuti giñe lagumuchuba lan lídangiñe waturobulin sunsuinagubei danme le wawinwandun lidan iseri ubóu, le ñeinba lubéi úaali lanme “óunweni ni ayahuni ni íruni ni igarigu” (Aruf. 21:4).

² Magida lumuti Heowá óuchawaguni wawéi, íderaguarügü lumutiwa lun wawanduni. Teni wamá lun le lariñagubei apostolu Pábulu houn kristiánugu ha awinwandubaña Roma. Lárigiñe líriduni óuchawaguni le lásügürübei dandu ligía kei líbirigu, abürühati: “Lidan sun katei le, sügütiwa hau agañeirutiña lídangiñe le hínsiñehabubei woun” (Rom. 8:35-37). Mini lan lira gayara lan ladügün Heowá lun buidu lan lidin woun íbini wásügürüña lan lídangiñe óuchawaguni. Ariha waméi le ladügübei Heowá lun buidu lan lidin lun Hosé lidan sun katei luma ida luba lan líderaguniwa uguñe weyu.

3. Ida liña lasansirun libagari Hosé lau lóufudagun?

³ Subudiwati hínsiñetimati lan Hosé lun Hakobu (Agu. 37:3, 4). Ligía aba lubéi hagumeserun líbugañanu Hosé agimugarei. Ani dan le gachansin habéi, aba haluguruni houn madianna. Ábati hanügüni wügüriña madianna hagía Hosé lun Ehiptun le dísebei saragu kilometuru luéi le ñein lubéi meha lawinwanda.  Ñein ábaya haluguruni, guentó lun Potifárü le hábutibei lisudaranigu faraón. Sánsiti libagari Hosé lau lóufudagun; lúmagiñe aban lan meha irahü hínsiñewati aba liabin lun ábanhali lan meha idamuni Ehiptu (Agu. 39:1).

4. Ka lénrengunga lenege le lásügürübei Hosé gayaraabei wásügürüni?

⁴ Ariñagatu Bíbülia: “Chülüti dan luma sügǘ le magurabunti houn sun gürigia” (Apur. 9:11, TNM). Anihein dan gagibuguatiwa luma katei kamaniti le úmabei hagagibudagua sun gürigia, mini lan lira, turobuli le úmabei lagagibudagua furumiñeguarügü gürigia (1 Ko. 10:13). Másiñati ladügǘniwa bula wau, wéibaahoun o ladügüdarun wawagu ladügarügü lani wamá Hesusu disipulugu (2 Tim. 3:12). Lidan furumiñeguarügü kesi, gayaraati ladügün Heowá lun buidu lan lidin woun. Ariha waméi ida liña lan líderaguni Heowá Hosé.

5. Ka adügübei lun líchugun Potifárü fe anihein lan Heowá luma Hosé? (Agumesehani 39:2-6).

⁵ (Aliiha huméi Agumesehani 39:2-6). Arihati Potifárü aban lan nibureinti benefati Hosé ani aban lan nadagimeinti buiti. Ani gunfuranda lumuti ka lan uagu ítara lubéi. Aba líchugun fe ‘anihein lan Heowá luma Hosé, ani adüga lan giñe Heowá lun buidu lan lidin lun lidan sun katei’. b Dan lárigiñe, aba líchuguni Potifárü Hosé lun letenirun lun sun katei le lúbiñebei. Kei le aubei warihei ibihati wügüri ehiptuna le saragu abiniruni.

6. Ida liña meha lasandiragun Hosé lungua?

⁶ Houcha wamá wíchaagun woungua lidoun lilugaarun Hosé. Ka meha san katei labusenruntimabei ladügün? Láfaagun san lun buidu lan larihini Potifárü lun líchugun afayeiruahaü lun? Chóuruti létima lan labusenrubei láfuridun Ehiptugiñe lun lagiribudun lúbiñoun lúguchi. Lugundun íbini buidu lan lidin lun, ani ibihati saragu dasi, ábanmemegili meha idamuni lun aban wügüri le áhuduragubei houn amu búngiugu. Madügünti Heowá lun lígiragüdüni Potifárü Hosé. Ani lanwoun lira laribatimaba meha katei saragu.

7. Ka uagu gayara lubéi lariñawagún ábatima lan laribadun le gádanbalin Hosé? (Agumesehani 39:14, 15).

⁷ Kei lafuranguagüdüni Agumesehani kapítulu 39 aba línsiñedun Hosé tun lani Potifárü  weiriou ani adariha tumuti saragu wéiyaasu. Gama lumoun súnwandan maha lan tun. Aba tagañidun saragu darí lun tíchugun duru luagu, luagu áluga lan láguragunu (aliiha huméi Agumesehani 39:14, 15). Dan le líchugunbei Potifárü fe, aba ládaruni Hosé furisunrugun, le ñein lubéi lásügüra fiu irumu (Agu. 39:19, 20). Ida liña meha san ibagari ñein furisunrugun? Dimurei ebüréu le layusurubei Hosé lun layanuhan tuagu furisun gayaraati lásügürawagüdün kei “huyu” o “welu”. Mini lan lira aban lan meha fulasu búrigati ani mesebenougati ñein (Agu. 40:15, abürüdǘni). Lanwoun lira, ariñagatu Bíbülia güragua hamuti lan lugudi Hosé lau güringüri luagu fiu dan ani murú hamuti giñe ligiina lau gürabu (Sal. 105:17, 18). Lanagangiñe lira ábatima laribadun le gádanbalin Hosé; lúmagiñe aba lan meha idamuni le afiñewati luagu lárigiñe ábanhali meha adaürǘti.

8. Ka lunbei wachoururuni lau sun aribadeinatima lan sun katei?

⁸ Sügühadiwa san lídangiñe sügǘ hénrenguti le aribadeinatimabei íbini furíei haadiwa lan saragu? Gayaraati lasuseredun aban katei ítarati. Ígirati Heowá lun wásügürün lídangiñe óuchawaguni lidan ubóu le lábugiñebei lubafu Satanási (1 Huan 5:19). Lau sun lira gayaraati wachoururuni subudi lani Wáguchi Bungiu sun le asuseredubei woun ani bereseti lan wau (Mat. 10:29-31; 1 Fe. 5:6, 7). Lanwoun lira, füramaseti woun: “Nóunigirubadibu; mígirun nubadibu” (Ebü. 13:5). Lau lídehan Heowá gayaraati wawandun lénrengunga le genegebei máranina lan. Ligiaméme asuseredubei lun Hosé.

9. Ka arufudubalin anihein lan Heowá luma Hosé sun irumu le lásügürübei furisunrugun? (Agumesehani 39:21-23).

⁹ (Aliiha huméi Agumesehani 39:21-23). Adügati Heowá lun buidu lan lidin lun Hosé íbini lidan dan hénrenguti le lásügürübei lidan libagari. Ida? Ítara kei lagañeiruni Hosé línsiñehabu Potifárü, aba lagañeiruni giñe Hosé línsiñehabu tábuti furisun ábati lafiñerun tábuti furisun luagu, ani murusun dan lárigiñe aba líchuguniña tábuti furisun sun adaürǘtiña lábugiñe laríaahan Hosé. Lanwoun lira ariñagatu Bíbülia: “Memegeiruntiha tábuti furisun lun laríaahan ni kata lídangiñe le lábugiñebei laríaahan Hosé”. Seremei lun katei lira bereseguti meha Hosé lidan katei buiti. Ma inarüni adüga lan katei le lun taweiridun wanigi rualá ubafu lun aban wügüri le ichugúbei duru luagu? Ábanrügüñein katei gayara lafuranguagüdüni katei le. Kei lariñaguni Agumesehani 39:23, “ladüga anihein Bungiu luma, ani adügati lun lasalirun sun katei lun buidu”.

10. Afuranguagüda huméi ka lan uagu masandirun lubalin Hosé buidu lan lidin lun lidan sun katei?

¹⁰ Rúguaya wamá woungua lidoun lilugaarun Hosé. Samina wamá: saminati funa san buidu lan lasalirun sun katei lun lau sun furisunrügüñein lan ladüga lichugún duru luagun, luagu katei le madügün lumuti?, kátima funa san labusenrubei Hosé?, busenti meha san buidu lan léiguadun lun tábuti furisun? Chóuruti létima lan labusenrubei lun háfuridagüdüni furisunrugúgiñe. Ligía lamuriahanbei luma aban adaürǘti le lunbei láfuridun tídangiñe furisun lun layanuhan luma faraón lun lasagaruni tídangiñe tagübüri furisun tuguya (Agu. 40:14). Gama lumoun kei le ladarasanrunbei wügüri ligía saragu lun layanuhan luma faraón, mosu meha lásügürün Hosé bián irumu furisunrugu (Agu. 40:23; 41:1, 14). Lau sun lira seremei lun lídehan Heowá, buiti meha lidin lun Hosé. Ida liña meha san gayara lan lasuseredun katei le?

11. Ka iarani líchugubei Heowá lun Hosé, ani ida liña lídehan katei le lun lagunfuliruni Heowá le labusenrubei ladügün?

¹¹ Dan le meha furisunrugu lubéi Hosé, adügati Heowá lun gewenedü lan lurúeite Ehiptu  bián uénedü le adügübei lun mederaguagüdün lan lisaminan lurúeite Ehiptu. Memeniha meha lanigi faraón lun lasubudiruni lanichigu uénedü ligía. Ligíati dan le líchugunbei fe gayara lan lariñaguni Hosé lanichigu luénedü lun aba lóunaagüdün anügei. Lau lídehan Heowá, mámarügü lanichigu luénedü faraón lariñagubei Hosé lun, ariñaga lumuti giñe lun ka lan lunbei ladügüni. Adügati katei le lun taweiridun lanigi faraón. Dan le líchugunbei faraón fe luagu anihein lan lubafu Heowá luma nibureinti le, aba líchuguni lun ligía lan ariha lau sun luáguti éigini lidan sun Ehiptu (Agu. 41:38, 41-44). Fiu irumu lárigiñe, aba lagumeserun lidaani ümi ani mámarügüñein Ehiptu ñein lan ümi chülüti giñe ümi le dagá uburugu Kanán, le ñein lubéi meha hawinwanda liduheñu Hosé. Seremei lun ubaraü le ichugúbei lun Hosé, guentó gayaraahali lesefuruniña liduheñu, ha lúnbaña hagíaba lan meha ladügawagun Mesíasi lau lásügürün dan.

12. Ka ladügübei Heowá lun buidu lan lidin lun Hosé?

¹² Samina wamá luagu le asuseredubei lidan libagari Hosé. Ka adügübei lun letenirun Potifárü lun ligaburi Hosé dan le aban lubéi meha idamuni? Ka adügübei lun líchuguniña tábuti furisun sun adaürǘtiña lábugiñe laríaahan Hosé? Ka adügübei lun gewenedü lan faraón ani rulei iarani lun Hosé lun lariñaguni lanichigu luénedü lun? Ka ínchahabalin faraón lun líriduni Hosé lun ligía lan ariha lau sun luáguti éigini lidan sun Ehiptu? (Agu. 45:5). Furanguti Heowá lan adügübei lun buidu lan lidin lun Hosé lidan sun le ladügübei. Lau sun busén hama líbirigu Hosé hagumuchun lau, sansi lumuti Heowá le gádanbalin Hosé lun gayara lan lagunfuliruni lugundan.

13. Íderagua lumutiwa san Heowá lidan kada sügǘ le úmabei wagagibudagua?

¹³ Arufudati abahüdaguni luáguti libagari Hosé aban katei súdiniti woun. Íderagua lumutiwa san Heowá lidan sun sügǘ le úmabei wagagibudagua? Adundeha lumuti san Heowá sun le asuseredubei woun lun lídangiñe lan aban katei wuribati gayara lan lasaliragun aban katei buiti? Múarantu Bíbülia luma saminaü le (Apur. 8:9; 9:11). Gama lumoun, anihein katei le adügübei lun chouru wamani katei le: dan lan le wásügürüña lan lídangiñe óuchawaguni subudi lumuti Heowá sun le  wásügürübei ani aganba lumutiwa dan le wáguarun amuriaha ídemuei (Sal. 34:15; 55:22; Isa. 59:1). Ani mámarügüñein katei le ladüga Heowá. Íderagua lumutiwa giñe lun wagagibudagun luma óuchawaguni luma lun wánhiñuraguni lénrengunga. Ida liña san ladügüni Heowá katei le?

14. Ida liña san líderaguniwa Heowá lidan lidaani lénrengunga?

¹⁴ Ruti Heowá dǘgüdaguaü luma gurasu woun, dántima le wemegeiruni (2 Ko. 1:3, 4). Ligía larihubei Eziz lungua, aban íbiri le awinwandubei Turkmenistán le adaürǘbei luagu bián irumu ladüga lafiñen. Ariñagati: “Binaafin le naguserawagüdünbei, arufuda lumuti aban íbiri le lariñagubei Isaíasi 30:15 nun, le ariñagubei: ‘Lídanbei darangilaü luma emenigini here’. Íderagua lumutina dimurei burí le súnwandan lun darangilu nan luma lun nafiñerun luagu Heowá. Nasaminarun luagu bérusu le, ruti erei nun lidan sun dan le furisunrugu nubéi”. Haritaguatiwa san luagu somu dan lidan wabagari le ñein lubéi líchiga Heowá dǘgüdaguaü luma gurasu woun dántima le wemegeirunbalin?

15, 16. Ka wafurendeirubei lídangiñe le tásügürübei Tori?

¹⁵ Le linarün katei míchutiwa fe ida liña lan líderaguniwa Heowá dan le lídanñadiwa lan óuchawaguni darí dan le sügühali. Chouru tumuti aban íbiri gíritu Tori ítara liña lan katei le. Hilati tisaani le gíribei Mason, lárigiñe ladagarun kánserü luagu, ani sísiñein irumu lau ageindagua luma sandi le. Ani hírugüda lumutu sügǘ le Tori. Ariñagatu: “Mafiñentina yebe gayara lan tásügürün aban úguchuru lídangiñe sügǘ gáriti luéi le”. Ani ariñagatu giñe: “Chouru numuti húaraduba lan ha híbiri agübürigu numa luagu gáritima lan warihini lasufurirun aban wasaani sügǘ lau wasufurirun wagía keisi agübürigu”.

¹⁶ Lau sun weiri lan ligari sügǘ le, dan lárigiñe,  ráramaguatu Tori asaminara luagu sun katei le ladügübei Heowá lun líderagunu. Ariñagatu: “Dan le nasaminarun luagu dan ligía, gayaraati narihini ida liña lan lágüdahanina Heowá lau ínsiñeni lidan sun dan le sandi lubéi Mason le niráü. Haritaguatina íbini dan meha le wéirihali lubéi lidebilin nisaani lun leresibirun bisida, aweiyasuhatiña meha íbirigu bián oura lun hachülürün háspitalirugun. Súnwandan meha ñein lan aban gürigia agurabaha aranseñu lun líchugun ídemuei woun. Ani íderagua hamutiwa giñe lau híchugun seinsu woun. Íbini lidan dan le hénrengutimabei súnwandan wibihini le wemegeirubei”. Ru lumuti Heowá dandu tun Tori kei lun Mason le hemegeirubei lun hawandun (ariha huméi rekuáduru “ Ru lumuti Heowá le meni wemegeirubei woun”).

17, 18. Kaba íderaguawa arihei luma lun wíchugun seremei luagu ídemuei le líchugubei Heowá woun dan wásügürün lídangiñe óuchawaguni? (Sálumu 40:5).

¹⁷ (Aliiha huméi Sálumu 40:5). Le labusenrubei aban gürigia le awarirubei wübü lachülürün lábulugun wübü. Gama lumoun dan le amudeireina lan gayaraati lararamagun aríaguei lubuidun burí katei le geyegubei lau. Ítarameme, lunti gabügürügua lan wararamagun asaminara ida liña lan líderaguniwa Heowá agagibudagua luma óuchawaguni. Dan le lásügürün turobuli, gayaraati wálügüdagun woungua: “Ka abiniruni lúmagiñe Heowá neresibirubei uguñe? Lau sun magumugili lan óuchawaguni, Ka ladügübei Heowá lun líderaguniwa awanda?”. Houcha wamá lun wasaminarun sagü weyu luagu ábarügü abiniruni lúmagiñeti Heowá.

¹⁸ Maribanti wamuriahan luma Heowá lun lagumuchun lau óuchawaguni le wásügürübei (Fili. 4:6). Gama lumoun madireira waméi warihin luéi abiniruni le wámabei. Lanwoun lira füramaseti Heowá líchuguba lan erei woun ani líderagubadiwa lan awanda. Ligíati súnwandan lubéi níchugun seremei lun luagu ídemuei le líchugubei woun. Anhein wadüga ítara, warihibei líderaguñadiwa lan Heowá lun buidu lan lidin woun íbini laganagua óuchawaguni, ítara kei líderaguni Hosé (Agu. 41:51, 52).