1-2. (a) Kūö yòh öi öt pingangkūö yěn yih minë kanihngen nö in hī? (b) Asuh nup min haköp hī in ngih ātiköl?

 LÖKLŌN Yāvē in lökten yěn yih minë kanihngen nö in hī, ngaich öt pingangkūö ayī-ö. Pön ngatī kinūchngö angū-ö nö imat ngam Paipöl, “lökten i kanihngen, öi kuhēthötre im pūlngö ngam Tēv.” (Inl. 14:22) Akahakūö in inrē tö minë kanihngen hī min nö keuheūt, yēḵ hī min öi teunghöt el öp tufömngöre panam. Pön “öt ōtngöre min inrē ngam kinpaha, ötrēhĕn min miṙivlōn nö umuh, öt pineūnyu, öt chanöku nö hēkngöre.”—Inm. 21:4.

² Hö-ö an ngam Tēv nö asökngöröön nup kanihngen. Yěn yih pöri anū-ö nö in hī, ngaich kētö kumlēḵ hī anga-aṅ öi la-al u. Chumkūöṙen tö ṙô Pôl nö in yik Kristīön aṅ Rōm. Urěh anga-aṅ nö vënyö nuk kanihngen cha tö yik hol ò. Ngö ṙô anga-aṅ: “Mötlö in tö tömihôiṅ in u nö ṙòkhöre lökten in Ò ngam tö hāngen tö hī.” (Rōm. 8:35-37) In e mikahkūö ayī-ö tö Yāvē nö hayööken hī el ṙētak kanihngen hòṅ hī öi mihôiṅ. Ngatī inlahen ök inrē Yôsěf. Töi ngëichkö inlahen Yāvē nö hayööken Yôsěf nö el ṙētak minë kanihngen ò. Ngaich ngatī inlahen min anga-aṅ nö hayööken hī el ṙētak nup kanihngen öi mihôiṅ tö u.

3. Sitih inlahen ang ngaich ngam tinrīken Yôsěf nö harīkngöre?

³ Hangenlōn ang Yāköp tök kūönre Yôsěf. (Ran. 37:3, 4) Lökten yik mëm Yôsěf nö ṙāinyngö tö ò. Hěng heuh ngaich cha-a nö meūkan nöng hěngtak, inyihngen ò ngaich cha-a nö in yik mi-inyiha aṅ Mitiā. Ngaich yik mi-inyiha ngaich  nö söömngen ò nö chuh Aikup. In e ngaich anga-aṅ nö yöngkūö yik amahati nö i patī Fërō ang Pòtiför. Kô-en ngaich ngam inlahen tinrīken Yôsěf nö harīkngöre, pò ò nö lālö ök yöngre kikōnyö. Ngaich pöri anga-aṅ nö yihīvö tö minë kanihngen.—Ran. 39:1.

4. Sitih inlahen nup kanihngen hī mihôiṅ nö sā inlahen nup kanihngen Yôsěf?

⁴ Ngö kinūchngö an nö imat ngam Paipöl: “Ṙētak pöri lanūngö inrē mī-in u nö ṙòkhöre.” (Mum. 9:11) Hö-ö nun në kanihngen nö tö mötlö, ṙòkhöre ayī-ö tarik öi la-al në tö ngatī kanihngen. (1 Kòr. 10:13) Pōyen pöri nup kanihngen yamih nö in hī, pò hī öi mahaköp öi in Yēsū. Tö sā inlahen hī öi hayīöliṙen, öt lēkaṙen hēk hayë inrē. (2 Tim. 3:12) Mihôiṅ pöri min ayī-ö kūö hinòlṙenre tö Yāvē, pòrô nup töng sitih kanihngen yamihen hī. Töi ngëichkö inlahen tī ò nö hayööken Yôsěf nö la-al minë kanihngenre.

5. Sitih mikahkūö ang Pòtiför tö Yôsěf nö holūṙen tö Yāvē? (Ranehlö 39:2-6)

⁵ Vë-evkūö Ranehlö 39:2-6. Chumkūöṙen ang Pòtiför nö meuk inlahen Yôsěf nö tö īnu tö mikah hēk tökalē alaha inrē yěn la-evṙen. Akahakūö inrē anga-aṅ tö “ngam Mā Tēv [Yāvē] nö vīten nup taṙòkhöre inlānen ò nö kôlô nö elti ò.” b Lökten ang Pòtiför nö kē-ěkūö ò töm la-enre, ngaich vīlöng anga-aṅ nö yöngkūö ngam patī ò. Lökten in Yôsěf minë kanôlò Pòtiför nö sīöpö kūöre.

6. Sitih inlahen ök Yôsěf ik sā minë kanihngen nö lākūö ò?

⁶ Töi ngëichkö ngam inlahngen öi sā mat Yôsěf. Pōyen nun minë la-en Yôsěf nö i patī Pòtiför, lōnu hòng pöri anga-aṅ tö Pòtiför nö ngëichkö ngam kumlēḵ alaha ò nö la-evṙen ngaich reushen ò? Lohten anga-aṅ nöng hòṅ havan nö chuh patī re nö chuh in ök yöngre. Hakövö inrē anga-aṅ nö iyöng patī ngam tarik töt maha-öinyö Yāvē. Öt ṙānyen ò pöri ang Yāvē nö ṙā-ang eltī Pòtiför, ṙūöhölre pöri hēk minë kanihngen ò.

7. Sitih inlahen ngam ṙētak Yôsěf nö öt löngngöre? (Ranehlö 39:14, 15)

⁷ Vënyu nang in im Raneh tö 39 mirūlö, tö inlahen ngam pīhö Pòtiför nö hòṅ haṙöingen Yôsěf. Örheūheu anga-aṅ nö tölṙô Yôsěf nö holtöṙah ò nö haṙòh. Sō pöri ang Yôsěf,  hěngheuh ngaich anga-aṅ nö tainy nö in Yôsěf. Ngaich sūichken ò nö kilöönan. (Vë-evkūö Ranehlö 39:14, 15.) Ik hē Pòtiför ngaich nö akahalōn, kēhöt ò ngaich anga-aṅ nö el inköövö nö samyeūheuv rò-òten. (Ran. 39:19, 20) Tö sitih inlahen ök chūök Yôsěf nö haköövö? Ngam ṙô Yôsěf chēl nö i ṙô Heprāi tö ngö manah lohten angū-ö “chūök mak,” hēk “anūlö” inrē nö mihôiṅ. (Ran. 40:15) In e mikahkūö ayī-ö tö ò nö chaphötvö nö el tö sangūla chūökö, ngaich haṙivlōn anga-aṅ nö in e. Vënyu nang in inrē tö ngam Paipöl tö ò nö nyëkö hēk halökö kalröön tö nuk sayōk. (Sal. 105:17, 18) Ngaich takô nuk kanihngen ò nö harīkngöre. Tö akaha ök nö mahalanṙen, ngaich pöri anga-aṅ nöng sā yik tarik tö haköövö.

8. Asūp mihôiṅ öp ṙinatö-ellōn hī, pòrô nö ötlöng minë ṙētak hī?

⁸ Ngaich öm më-eṅ ngatī inlahen öm havëkö inyöökenre in Yāvē, höng sön pöri minë ṙētak meh nö öt löng? Mihôiṅ in öi ngatī inlahen, kūö ngam Sī-ö nö ṙömöng hayöng ngih panam, ngaich ötkô ngam Tēv nö löktö in minë pinngangkūö nö laklen hī nö ṙā-ang in minë kanihngen. (1 Yôh. 5:19) Ṙatö-ellōnre pöri ayī-ö tö ngam Tēv Yāvē nö akahakūö tö minë kanihngen hī hēk chumkūöṙen inrē anga-aṅ tö hī. (Mët. 10:29-31; 1 Pīt. 5:6, 7) Kilēḵngôre anga-aṅ nö in hī: “Öthōḵ Chin löhlö tö meh ötrēhĕn Chin min löktu ṙāngen meh.” (Hep. 13:5) Mihôiṅ Yāvē nö kētö kumlēḵ meh öm la-al minë kanihngenre, pòrô öm öt mihôiṅ la-al u tölōn re. Töi ngëichkö inlahen tī ò nö hayööken Yôsěf.

9. Ik sā Yôsěf nö el chēl, kūö yòh öi mihôiṅ ngö ṙô tö Yāvē nö in ò? (Ranehlö 39:21-23)

⁹ Vë-evkūö Ranehlö 39:21-23. Pōyen kanihngen ök Yôsěf, hayöökaṙen pöri anga-aṅ tö Yāvē nö mihôiṅ nö la-al u. Nö sitih inlahen? Sā inlahen Pòtiför nö ṙatö-ellōnre nö in Yôsěf nö meuk nuk la-en ò, ngatī inlahen ngam yöng kūö ngam chēl nö ṙatö-ellōnre nö in Yôsěf nö tö akahaṙa. Unôichngöre ngaich anga-aṅ nö vīlöng nö yöngkūö më töhaköövö. Ngö ṙô an ngam Paipöl: “Öt ngahëichkuvö tö yô-òv ngam yōm kinlōngö tö nup el katòh eltīre.” Hö-ö ök Yôsěf nöng el chēl, pön īnu anga-aṅ tö la-enre. Sehkūö man tö inlahen ò nö tö sūöchka fālen nö kilöön ök pīhö ngam tarik alaha Fërō, ngaich kē-ěvkūö anga-aṅ tö minë tökiröng la-en. Ngam tö hěng lāinyngen e im Ranehlö 39:23 nö kūchi, ngam tö ngö: “Pò ngam Mā Tēv [Yāvē] nö holtöṙah ò; kôlò tī ngam Mā Tēv tö e, öp töng vahīṙen ò.”

10. Kūö yòh öi mihôiṅ ngö ṙô tö Yôsěf nö ngölōn töre nö mihôiṅ nö teungten nö in minë töng la-enre?

¹⁰ Töi kalah hēk sā mat Yôsěf öi ngëichkö ngam tahëng sinūöichlö fālen ò töp lökten ò ngaich nö chaphötvö nö el chēl. Ngö lōn hòng anga-aṅ töre nö teungten nö in minë la-enre? Asūp mufē elkuilōn Yôsěf ik hē e? Hòṅ haṙamlōn ngam yöngkūö ngam chēl hòng anga-aṅ, hòn hēk nö kē-ěvkūö tö minë la-en? Lohten anga-aṅ nö lōnu töre nö hòṅ ṙānyu nö im inlahenre nö sūöchkö fālen. Vë-ekūö ök tö sā re anga-aṅ tö haköövö nö el chēl öp tö hòṅ ṙānyu, tölṙô ò inrē anga-aṅ nö vë-eny inlahen ò nö in Fërō. Hòṅ ò min nö ṙānyu nö ṙā-ang el chēl. (Ran. 40:14) Höng vaichngö pöri ök tarik nö öt vë-eny nang Fërō, lökten hēk ang Yôsěf nö nët samyeūheu nö el chēl. (Ran. 40:23; 41:1, 14) Sön pöri ang Yāvē nö kētö mihôiṅyö ò nö inup töng sitih la-en. Nö sitih inlahen, töi mikahtökūöre.

11. (a) Asūp taneungtö inlahen Yôsěf nö löktö i inyöökenre tö Yāvē? (b) Sitih inlahen nö teungtakūö ngam kuilōn Yāvē nö löktö in e?

¹¹ Ik sā Yôsěf nö el chēl, nët nuk heūvö hameuktö Yāvē nö in Fërō. Angū-ö lāinyngen Fërō ngaich nöng fēken e. Hòṅ mikahtökūöre anga-aṅ tö manah ngam heūvö. Vënyu nang  ngaich ngam Rācha tö Yôsěf nö mihôiṅ nö vënyö manah minë heūvö, lökten ngaich anga-aṅ nö havëtu. Löktö i inyöökenre ang Yôsěf tö Yāvē nö vënyö manah minë heūvö Fërō ngaich kētö inlēnö ò inrē. Ṙamlōn ngaich ang Fërō ngaich akahakūö tö Yôsěf nö hōluṙen tö Yāvē, lökten ngaich anga-aṅ nö kētuṙen nö yöngkūö minë nya-aṅkūö nö i Aikup. (Ran. 41:38, 41-44) Unôichrit e ngam tökiröng inyaichö nö i Aikup hēk Kanā-an inrē. Iyöng Kanā-an yik mikūönö Yôsěf hē e. Ngaich pöri ang Yôsěf nö kirööngö kamngö nö hayöng ngaich mihôiṅ anga-aṅ nö hateungö minë hanakten ngam mikūönöre, lökten anga-aṅ nö havëten cha nö i Aikup. Ngatī inlahen anga-aṅ nö laklen më mak alahare ngaich laklöng ngaich ngam michaplö ngam löknyö ngam Mesayā nö yih.

12. Sitih inlahen ang Yāvē nö kētö mihôiṅyö Yôsěf nö inup töng la-en ò?

¹² Pōyen nup inlahen tinrīken Yôsěf nö im inlahen ò. Fēḵa man, kūö yòh ang Pòtiför nö chumkūöṙen töm töhaköövö tarik? Kūö yòh ök yöngkūö chēl nö kē-ěkūö ò töm tökiröng la-en? Achīö öp mahameukhömat Fërō tö nuk heūvö töp lāinyngen ò nöng fēken u? Achīö öp kamëtö heuneū-en Yôsěf nö vë-eny manah minë heūvö? Achīö öp chamaphöt ellōn Fërō tö Yôsěf nö anga-aṅ yöngkūö minë nya-aṅkūö? (Ran. 45:5) Hö-ö nun nöng kanahngenre. Pön höng ṙòkhöre anū-ö nö tī Yāvē. Pön kētö minhôiṅyö Yôsěf anga-aṅ nö teungten inup töng la-enre. Rö-ö yik mëm ò pön hòṅ fëlngen Yôsěf, ngaich pöri ang Yāvē nö harīkngö ngam inlahen nö hateungngen minë kuilōnre nö löktö in ò.

13. Asuh öp töt inlahen Yāvē, yěn yih minë kanihngen nö in hī? Mikahtökūö hī.

¹³ Asūp haköplö hī im inlahen Yôsěf? Yěn yih minë kanihngen nö ikui hī, ngaich ngö mufē hòng ayī-ö tö Yāvē nö kēngen u hòṅ hī min öt yaha kanihngen? Hö-ö, öt ngatī ṙô an ngam Paipöl nö vë-eny nang hī. (Mum. 8:9; 9:11) Vënyu nang pöri ayī-ö tö hī yěi kihngen, ngaich akahakūö ang Yāvē tö hī öi sitih inlahen öi la-al u ngaich yē hī pöri öi havëkö inyöökenre öi in Yāvē, ngaich hang ṙô hī anga-aṅ. (Sal. 34:15; 55:22; Isa. 59:1) Öt höng angū-ö, pön hayööken hī ang Yāvē öi la-al minë kanihngenre hòṅ hī öi mihôiṅ tö minë la-enre. Nö sitih inlahen tī anga-aṅ?

14. Sitih inlahen ang Yāvē nö hayööken hī, yěi el ṙētak minë kanihngen?

 ¹⁴ Yěn yih minë kanihngen nö in hī ngaich kētö inreuskö alaha hī Yāvē hēk hangönken hī inrē hòṅ hī öi la-al minë kanihngenre. Örheūheu an nö lööngö ṙētak tī nö hareuskö alaha hī el ṙētak hī öi lōnu tö inyöökenre. (2 Kòr. 1:3, 4) Ngatī inlahen ök ih prötör Ëchīs aṅ Turkëmënistān. Kūö ò nö hang minë inkööphöti aṅ mat ngam Paipöl lökten anga-aṅ nö nët samyeūheu nö chaphötvö nö el chēl. Ngöṙô anga-aṅ, “Ik sā chu öich vënyu sācha, hěngtak ök prötör mahameukhö mat chu tö ṙô ngam Isayā 30:15 nö vë-eny ṙô Yāvē, ‘Lām man ngaich ṙātö-ellōnre inrē öm in chu, ngaich teūngen min më-eṅ tö nganöönöre.’ Yē chu öich fēkö ṙô ngih miröökö ngaich teūngen chū-ö tö nganönöre. Ik sā chu öich römöng el chēl, īnu chū-ö töm lanāmö ngaich hayönglenre inrē öich in Yāvē.” Ōtre hòng kanöpölōn meh inuk ṙētak meh kētu inreuskö alaha tö Yāvē hēk kētu nganönö inrē el ṙētak kuilōn meh öm hòṅ hayöökaṙen?

15-16. Asūp haköplö hī in sistör Tōrī?

¹⁵ Hēṙu in ṙung yē minë kanihngen nö kirööngen nö in hī, ngaich öt akahakūö ayī-ö tö inlahen Yāvē nö sitih inlahen tī nö hayööken hī. Yěi unôichngöre pöri öi afēken u, ngaich akahaiṙen ayī-ö tö Yāvē nö ṙapken hī. Ngatī inlahen ök ihih sistör Tōrī. Kënsör ök kūön ò ang Mësön. Tafūöl samyeūheu rò-òten anga-aṅ nöng la-al ngam invahre ngaich ik sā ò pöri nö fënsīön höiny samyeūheu, kapah ngaich anga-aṅ. Kalēḵ ngam miṙivlōn sistör Tōrī. Ngöṙô anga-aṅ, “Öt heuveūṙô chin yěn hěngtak ngòh inyööngö kikānö nö kôta mat nö meuk chanöökö ngam kūönre, ngaich iṙôkö miṙivlōn lohten anga-aṅ. Öt hěngtak inyööngö tö lōnu tö kūönre nö ngatī inlahen chanöökö. Pòrô öp tö sitih öre inlahen kanihngen öp yöng ò sön pöri nö öt halöngten ngam kūönre nö kihngen.”

 ¹⁶ Kihngen takô ang sistör Tōrī nö meuk chanöökö ngam kūönre. Ngaich unôichngöre pöri anga-aṅ nö afēkö inlahen ök ṙētak, ngaich akahakūö anga-aṅ tö Yāvē nö sitih inlahen tī nö hayööken ò. Ngöṙô anga-aṅ, “Yěich fēkö nuk inlahenre ik ṙētak, ngaich akahaiṙen chū-ö tö Yāvē nö örheūheu nö ṙapken chu, hēk öt ṙāngen chu inrē. Ik sā ngam invah Mësön nö sīöplöre ötrēhěn nö kô nö meuk kūö yip tahëng, sön pöri yip prötör sistör nö nët kanta rô-òl kūö nö el lorī nö chöhken ai nö chuh el aṅspū. Öt ṙāngen ai më prötör sistör öi höng hěngtak. Chumkūören inrē cha-a tö nup hanakten ai. El ṙētak minë tökiröng kanihngen cha-a nö hayööken ai.” Lökten in ngam inyöökenre tö Yāvē ang Tōrī hēk Mësön inrē nö la-al minë kanihngenre, nup hanakten cha, kē-ěkūö cha ang Yāvē.—Ngëichkö ngam pòks “ Nup Hanakten Ai, Ngaich Hateūngi Tö Yāvē.”

17-18. Sitih inlahen öi el ṙētak kanihngen hòṅ hī öi akahakūö tö Yāvē nö hayööken hī ngaich hòṅ ha-öinyö ò inrē ayī-ö? (Salmai 40:5)

¹⁷ Vë-evkūö Salmai 40:5. Pōyen yip töyal nö yôn kui ṙôngö. Yěn yôn kui ngam rôngö cha-a ngaich ngëichken minë la-taseūre cha-a, tövāyö mineūkö cha-a nö sökngöre. Ngatī inlahen ayī-ö yěn yih minë kanihngen hī, ngaich mihôiṅ ayī-ö öi kēnyö ṙētakre öi fēkö inlahen tī Yāvē nö hayööken hī, ngaich sitih inlahen inrē nö kētö minhôiṅyö hī. Mihôiṅ man el manā-aṅ ṙētak ngam sakāmö öm fēkö në intöönö: ‘Sitih inlahen ang töngamuh nö kē-ěkūö chu tö inkôlò? Hö-ö nun minë kanihngen chu nö kūönngöre, sitih inlahen pöri ang Yāvē nö hayööken chu öich la-al u?’ Iṙūöhen më-eṅ öm mā-anyre öm fēkö inlahen nup inkôlòre, töp lökten meh ngaich öm mihôiṅ öm in minë la-enre.

¹⁸ Pi-a man öm lōnu töre öm mihôiṅ tö minë kanihngenre. Hö-ö ön nö tövaich. (Filip. 4:6) Fēken u pöri më-eṅ nö asuh nup inkôlò kahëtö Yāvē nö in meh. Pön kilēḵngôre anga-aṅ tö ò min nö kētö nganönö meh hēk hayööken meh inrē öm la-al minë kanihngenre. Um vaichngö tö Yāvē nö holṙen meh ngaich örheūheu më-eṅ öm ha-öinyö ò. Ngaich akahakūö min më-eṅ tö meh yěm el ṙētak kanihngen ngaich sitih inlahen ang Yāvē nö hayööken meh öm teūngten öm in minë la-anre, sā inlahen ò nö hayööken Yôsěf ngaich mihôiṅ anga-aṅ.—Ran. 41:51, 52.