1-2. (a) Nganong dili ta angayng matingala kon makaagi tag mga pagsulay? (b) Unsay atong hisgotan niining artikuloha?

 INGONG katawhan ni Jehova, dili na ta matingala kon makaatubang tag mga pagsulay. Nahibalo ta ana, kay ang Bibliya nag-ingon nga “kita kinahanglang mosulod sa Gingharian sa Diyos pinaagi sa daghang kasakitan.” (Buh. 14:22) Nahibalo pod ta nga ang uban natong problema bug-os lang masulbad sa bag-ong kalibotan sa Diyos, diin “ang kamatayon mawala na, ug wala na unyay pagbangotan, pagtiyabaw, ug kasakit.”​—Pin. 21:4.

² Dili pugngan ni Jehova ang mga pagsulay nga mahitabo nato. Pero tabangan ta niya nga makalahutay. Matikdi ang giingon ni apostol Pablo sa mga Kristohanon sa Roma. Gisulti una niya ang mga pagsulay nga naagian niya ug sa mga igsoon. Dayon siya misulat: “Sa tabang Niya nga nahigugma kanato, kita bug-os nga nagmadaogon.” (Roma 8:35-37) Nagpasabot na nga tabangan ka ni Jehova nga magmalamposon bisag nagpadayon pa ang imong pagsulay. Atong tan-awon kon giunsa pagtabang ni Jehova si Jose nga magmalamposon ug kon unsaon pod ka Niya pagtabang.

3. Sa unsang paagi kalit nga nausab ang kinabuhi ni Jose?

³ Paborito kaayo ni Jacob ang iyang anak nga si Jose. (Gen. 37:3, 4) Tungod ana, ang mas magulang nga mga anak ni Jacob nasina sa ilang igsoon. Dihang naay kahigayonan, ilang  gibaligya si Jose ngadto sa mga negosyante nga taga-Midian. Gidala sa mga negosyante si Jose ngadto sa Ehipto, nga gatosan ka kilometro ang gilay-on. Pag-abot didto, gibaligya na pod siya kang Potipar, ang pangulo sa mga bantay sa Paraon. Kalit kaayong nausab ang kinabuhi ni Jose, gikan sa pagkahimong paboritong anak sa iyang amahan ngadto sa pagkahimong ubos nga ulipon sa usa ka Ehiptohanon!​—Gen. 39:1.

4. Unsa tingali ang mahitabo nato nga parehas sa naeksperyensiyahan ni Jose?

⁴ Ang Bibliya nag-ingon nga “ang daotang mga butang mahitabo sa tanan.” (Eccl. 9:11, Holy Bible​—Easy-to-Read Version) Usahay makaagi tag mga kalisdanan nga “sagad sa mga tawo”​—sa ato pa, mga pagsulay nga maeksperyensiyahan sa tanan. (1 Cor. 10:13) O mag-antos tingali ta tungod lang kay mga tinun-an ta ni Jesus. Usahay biaybiayon tingali ta, supakon, o lutoson pa gani tungod sa atong pagtuo. (2 Tim. 3:12) Bisan unsa pang pagsulay ang imong maeksperyensiyahan, tabangan ka ni Jehova nga magmalamposon. Giunsa na niya paghimo kang Jose?

5. Unsay nakita ni Potipar nga rason nga nagmalamposon si Jose? (Genesis 39:2-6)

⁵ Basaha ang Genesis 39:2-6. Namatikdan ni Potipar nga si Jose hawod kaayo ug kugihan. Nahibalo pod siya kon ngano. Nakita ni Potipar nga ‘si Jehova nagpalampos sa tanang gibuhat ni Jose.’ b Sa ngadtongadto, iyang gihimo si Jose nga iyang personal nga tig-alagad. Gitudlo sab niya si Jose ingong tigdumala sa tibuok niyang panimalay. Unsay resulta? Miuswag ang panimalay ni Potipar.

6. Unsa tingali gibati ni Jose sa iyang situwasyon?

⁶ Imadyina kon unsay gibati ni Jose. Unsa ba gyoy iyang gusto? Gusto ba niya nga mamatikdan ug gantihan siya ni Potipar? Posible nga ang gusto gyod ni Jose mao nga makabalik na siya sa iyang amahan. Kay kon buot hunahunaon, bisag sinaligan na siya sa panimalay ni Potipar, ulipon gihapon siya ug ang iyang agalon dili alagad ni Jehova. Wala ipahinabo ni Jehova nga hatagan ni Potipar ug kagawasan si Jose. Gani, misamot pa ka lisod ang kahimtang ni Jose.

7. Sa unsang paagi misamot ka lisod ang kahimtang ni Jose? (Genesis 39:14, 15)

⁷ Sumala sa Genesis kapitulo 39, ang asawa ni Potipar naibog kang Jose ug balikbalik niya kining gitental. Matag higayon nga tentalon niya si Jose, mobalibad gyod si Jose. Sa ulahi, nasuko kaayo siya maong iyang gipasanginlan si Jose; miingon siya nga gusto kuno siyang lugoson niini. (Basaha ang Genesis 39:14, 15.) Pagkadungog ni Potipar bahin niini, iyang gipapriso si Jose, ug nabilanggo si Jose ug pipila ka tuig. (Gen. 39:19, 20) Unsay kahimtang didto sa prisohan? Ang Hebreohanong pulong nga gigamit ni Jose para sa ‘bilanggoan’ puwedeng magpasabot ug “gahong,” nga nagpakita nga ang iyang palibot ngitngit ug morag wala nay solusyon ang iyang kahimtang. (Gen. 40:15; footnote) Gipakita pod sa Bibliya nga dihay panahon nga gikadenahan ang iyang mga tiil ug gibutangag puthaw nga kadena ang iyang liog. (Sal. 105:17, 18) Busa misamot ka lisod ang kahimtang ni Jose​—gikan sa pagkahimong sinaligang ulipon ngadto sa pagkahimong ubos nga piniriso.

8. Bisag mograbe ang imong pagsulay, sa unsa ka makaseguro?

⁸ Nakasulay na ba ka nga misamot hinuon ka lisod ang imong kahimtang bisag puwerte na nimong ampo? Puwede nang mahitabo. Dili ta panalipdan ni Jehova gikan sa tanang pagsulay niining kalibotan nga gimandoan ni Satanas. (1 Juan 5:19) Pero makaseguro ka ani: Nahibalo kaayo si Jehova sa imong kahimtang, ug gimahal ka niya. (Mat. 10:29-31; 1 Ped. 5:6, 7) Nagsaad pod siya: “Dili gyod ka nako biyaan, ug dili gyod ka nako talikdan.” (Heb. 13:5) Tabangan ka ni Jehova nga makalahutay bisag morag wala nay paglaom ang imong kahimtang. Atong tan-awon kon giunsa niya pagtabang si Jose.

9. Nganong makaingon ta nga si Jehova nag-uban kang Jose bisag napriso siya? (Genesis 39:21-23)

⁹ Basaha ang Genesis 39:21-23. Bisan pa sa lisod nga kahimtang ni Jose dihang napriso siya, gitabangan siya ni Jehova nga magmalamposon. Sa unsang paagi? Sa ngadtongadto, nakuha ni Jose ang pagsalig ug pagtahod sa pangulong opisyal sa bilanggoan, sama nga nakuha pod niya kaniadto ang pagsalig ni Potipar. Wala madugay, ang tanang binilanggo gisalig na sa pangulong opisyal kang Jose. Gani, ang Bibliya nag-ingon nga “ang pangulong opisyal sa bilanggoan wala mabalaka sa tanang butang nga iyang gipaatiman kang Jose.” Busa karon dili na laay ang iyang kinabuhi​—naa na siyay buluhaton. Wala gyod to damha! Morag imposible kaayo nga mahimong sinaligan ang piniriso nga giakusahan nga misulay paglugos sa asawa sa opisyal sa palasyo. Usa ra gyoy hinungdan ana. Sumala sa Genesis 39:23, “si Jehova nag-uban kang Jose ug gipalampos ni Jehova ang tanan niyang gibuhat.”

10. Nganong makaingon ta nga wala tingali mobati si Jose nga malamposon siya?

¹⁰ Imadyina pag-usab kon unsa kahay gibati ni Jose. Dihang giakusahan siya ug gipriso, gibati kaha niya nga malamposon siya? Unsa gyod diay ang gusto ni Jose? Kana bang mauyonan siya sa pangulong opisyal sa bilanggoan? Siyempre, ang gusto gyod ni Jose mao nga mapamatud-an nga wala siyay sala ug makagawas na siya sa prisohan. Iya pa ganing gihangyo ang hapit na pagawsong piniriso nga sultihan ang Paraon bahin niya aron makagawas na siya sa prisohan. (Gen. 40:14) Pero wala dayon na masulti sa tawo ngadto sa Paraon. Tungod ana, si Jose nagpabilin sa prisohan ug duha pa ka tuig. (Gen. 40:23; 41:1, 14) Pero padayon siyang gitabangan ni Jehova nga magmalamposon. Sa unsang paagi?

11. Unsang talagsaong abilidad ang gihatag ni Jehova kang Jose, ug sa unsang paagi nakatabang to nga matuman ang katuyoan ni Jehova?

 ¹¹ Samtang napriso si Jose, gipadamgo ni Jehova ang hari sa Ehipto. Naay duha ka damgo ang Paraon nga nakapatugaw gyod niya ug gusto niyang mahibaloan kon unsay ipasabot adto. Pagkahibalo sa hari nga makahubad si Jose ug mga damgo, iya siyang gipatawag. Sa tabang ni Jehova, nahubad ni Jose ang mga damgo ug mibilib ang Paraon sa praktikal nga tambag nga iyang gihatag. Nakita sa Paraon nga si Jehova nag-uban kang Jose, maong iyang gitudlo si Jose ingong tigdumala sa pagkaon sa tibuok Ehipto. (Gen. 41:38, 41-44) Sa ulahi, naay nahitabong grabeng gutom dili lang sa Ehipto kondili sa Canaan pod, diin nagpuyo ang pamilya ni Jose. Busa niining panahona, naa nay mahimo si Jose aron maluwas ang iyang pamilya ug maprotektahan ang linya sa kaliwat nga padulong sa Mesiyas.

12. Giunsa pagtabang ni Jehova si Jose nga magmalamposon?

¹² Hunahunaa ang talagsaong mga hitabo sa kinabuhi ni Jose. Kinsay hinungdan nga mamatikdan ni Potipar si Jose, nga usa lang ka ulipon? Kinsay hinungdan nga mauyonan sa pangulong opisyal si Jose, nga makaluluoy lang nga piniriso? Kinsay naghatag sa Paraon ug makapatugaw nga mga damgo ug nagpaposible nga mahubad kana ni Jose? Kinsay nagpahinabo nga matudlo si Jose ingong tigdumala sa pagkaon sa tibuok Ehipto? (Gen. 45:5) Klaro kaayo nga si Jehova ang nagpalampos sa tanang gibuhat ni Jose. Bisag daotan kaayo ang gihimo sa mga igsoon ni Jose, gibali ni Jehova ang kahimtang aron matuman ang Iyang kabubut-on.

13. Kontrolahon ba ni Jehova ang tanang mahitabo nato? Ipatin-aw.

¹³ Unsay atong makat-onan sa estorya bahin kang Jose? Kontrolahon ba ni Jehova ang tanang mahitabo nato? Maniobrahon ba niya ang tanang panghitabo sa atong kinabuhi maong makaingon ta nga naay maayong rason nga nahitabo ang tanang daotang mga butang? Dili. Wala mag-ingon ang Bibliya ana. (Eccl. 8:9; 9:11) Pero nahibalo ta ani: Dihang makaatubang tag pagsulay, nahibalo si  Jehova ana ug dunggon niya ang atong pagpangayog tabang kaniya. (Sal. 34:15; 55:22; Isa. 59:1) Labaw pa ana, si Jehova makatabang nato nga molampos sa paglahutay sa mga kalisdanan. Sa unsang paagi?

14. Sa unsang paagi motabang nato si Jehova panahon sa kalisdanan?

¹⁴ Ang usa ka paagi nga si Jehova nagtabang nato mao ang iyang paghupay ug pagdasig, sagad sa panahon nga kinahanglan nato ni. (2 Cor. 1:3, 4) Mao nay nahitabo kang Eziz, brader sa Turkmenistan nga gisentensiyahan ug duha ka tuig nga pagkapriso tungod sa iyang pagtuo. Siya miingon: “Pagkabuntag sa adlaw sa akong husay, naay brader nga nagpabasa nako sa Isaias 30:15 nga nag-ingon: ‘Mahimo mong kusgan kon magpabilin mong kalmado ug mosalig mo.’ Kini nga teksto nakatabang gyod nako nga magpabiling kalmado ug isalig kang Jehova ang tanan. Ang pagpamalandong niini nga teksto nakatabang nako sa tibuok panahon nga napriso ko.” Mahinumdom ba ka sa dihang gihupay ug gidasig ka ni Jehova sa panahon nga kinahanglan kaayo ni nimo?

15-16. Unsay imong makat-onan sa eksperyensiya ni Tori?

¹⁵ Sagad, makita lang nato kon giunsa ta pagtabang ni Jehova nga makalahutay dihang human na ang pagsulay. Ingon ana ang nahitabo sa sister nga si Tori. Ang iyang anak nga si Mason unom ka tuig nga nagsakit ug kanser hangtod nga namatay kini. Siyempre, naguol kaayo si Tori. Siya miingon, “Mao gyod to ang pinakasakit nga akong naeksperyensiyahan ingong inahan.” Miingon pod siya, “Seguradong mouyon ang ubang ginikanan nga mas sakit nga makita ang imong anak nga nag-antos kay sa ikaw mismo ang nag-antos.”

¹⁶ Bisag grabe ang pagsulay ni Tori, iyang gipamalandong sa ulahi kon giunsa siya pagtabang  ni Jehova nga makalahutay. Siya miingon, “Dihang maghunahuna ko adto, makita nako ang tabang ni Jehova sa tibuok panahon nga nagsakit ang akong anak. Pananglitan, bisag naay panahon nga dili puwedeng duawon si Mason sa ospital, ang mga igsoon mobiyahe gihapog duha ka oras aron mobisita. Pirme gyong naay igsoon sa waiting room nga andam motabang. Gitabangan pod mi sa mga igsoon sa among materyal nga panginahanglan. Bisan pa sa lisod kaayo nga situwasyon, wala gyod mi makulangi sa among panginahanglan.” Gitabangan ni Jehova si Tori nga makalahutay, ug mao poy iyang gihimo kang Mason.​—Tan-awa ang kahong “ Gihatag Gyod ni Jehova kon Unsay Among Gikinahanglan.”

17-18. Unsay makatabang nato nga makita ug maapresyar ang tabang ni Jehova panahon sa mga pagsulay? (Salmo 40:5)

¹⁷ Basaha ang Salmo 40:5. Gusto gyod sa mountain climber nga maabot niya ang tumoy sa bukid. Pero daghan siyag maagian diin puwede siyang mohunong ug motan-aw sa nindot nga view. Sa samang paagi, paggahin kanunay ug panahon nga mohunong ug maghunahuna, sa ato pa, mamalandong kon giunsa ka pagtabang ni Jehova nga magmalamposon bisag nag-atubang kag kalisdanan. Kada adlaw, pangutan-a ang imong kaugalingon: ‘Sa unsang paagi gipanalanginan ko ni Jehova karong adlawa? Bisag naa gihapon koy pagsulay, giunsa ko pagtabang ni Jehova nga makalahutay?’ Paghunahuna ug bisan usa ka panalangin gikan kang Jehova nga nakatabang nimo nga magmalamposon.

¹⁸ Tinuod, mag-ampo tingali ka nga matapos na ang imong pagsulay. Normal ra na ug dili na sayop. (Filip. 4:6) Pero kinahanglang makita pod nato ang mga panalangin samtang nag-atubang tag pagsulay, kay si Jehova nagsaad nga iya tang palig-onon ug tabangan nga makalahutay. Busa ayaw gyod wad-a ang imong apresasyon sa tabang ni Jehova. Nianang paagiha makita nimo kon giunsa ka pagtabang ni Jehova nga magmalamposon bisan panahon sa mga pagsulay, sama sa iyang gihimo kang Jose.​—Gen. 41:51, 52.