1-2. (a) Pwata sise máirú atun sia kúna sóssót? (b) Met sipwe káé lón ei lesen?

 POKITEN kich néún Jiowa aramas, iwe sise máirú atun sia kúna sóssót. Sia mirititi met ewe Paipel a apasa pwe “sipwe tolong lon Mwün Kot ren riaföü mi chomong.” (Föf. 14:22) Sia pwal silei pwe ekkóch ach kewe osukosuk resap unusen tawe tori sipwe nóm lón án Kot we fénúfan séfé, ikewe “esap chüen wor mäla ika letipeta ika kechü ika cheuch.”​—Pwär. 21:4.

² Jiowa esap eppeti án sóssót epwe torikich. Iwe nge, a álisikich le likiitú faar. Ekieki met aposel Paulus a ereni ekkewe Chón Kraist lón Rom. Akkomw, a eiteitaatiw fitu sóssót iir me chiechian kewe Chón Kraist ra kúkkúna. Mwirin, a makkeei: “Sia fakkun pworachofochofoch ngeni ekkeei mettoch meinisin ren ewe mi tongeikich.” (Rom 8:35-37, Testament mi Fö) A wewe ngeni pwe Jiowa a tongeni asopwéchuk inaamwo ika ka nónnóm lón eú osukosuk. Sipwe ppii ifa usun Jiowa a álisi Josef pwe epwe sópwéch, me ifa usun a pwal tongeni álisuk.

3. Ifa ewe mettóch mi weiweitá a fis lón manawen Josef?

³ A fókkun pwápwááló pwe Jakop a wesen tongei néún we Josef. (Ken. 37:3, 4) Pokiten ena, néún kewe watte ra lólówóiti pwiir na. Atun a suuk ngeniir fansoun ar repwe kirikiringaw ngeni, ra améméló ngeni eú kúmien chón business seni  Mitian. Chókkana ra uwealó Josef ngeni Isip fitepúkú mwail seni imwan we. Me ikena ie, ra pwal améméló Josef ngeni Potifar, néún Farao we meilapen mwichen soufiu. A ifa me weiweitáán siwililóón manawen Josef, i néún seman we mi fókkun áchengicheng, nge iei epwele néún chón Isip slave!​—Ken. 39:1.

4. Ifa usun sia tongeni kúna sóssót usun chék ekkewe sóssót Josef a kúna?

⁴ Ewe Paipel a erá pwe “minne mi ngaw a fis ngeni meinisin.” (SalAf. 9: 11, Holy Bible—Easy-to-Read Version) Fán ekkóch, a fis ngenikich ekkewe osukosuk iir “sosotun aramas,” weween ekkewe sóssót aramas meinisin ra kúkkúna. (1 Kor. 10:13) Are eli sia kúna riáfféú pokiten chék kich néún Jesus chón káé. Áwewe chék, eli aramas ra turunufasakich, ú ngenikich, are pwal mwo nge eriáfféúúkich pokiten ach lúkú. (2 Tim. 3:12) Ese lifilifil met sókkun sóssót ka kúkkúna, nge Jiowa a tongeni asópwéchuk. Ifa usun a féri ena ngeni Josef?

5. Met Potifar a esilla usun sópwéchún Josef? (Keneses 39:2-6)

⁵ Álleani Keneses 39:2-6. Potifar a esilla pwe Josef, i emén alúwél mi fókkun sipeéch me chófó lón an angang. Potifar a pwal silei pwata. A kúna pwe Jiowa a asopwéchú meinisin met Josef a féri. b Ló, ló, ló, ena re Isip a néúni Josef chón mas. A pwal seikaatá pwe epwe túmúnú unusen imwan we. Iwe met a fis? Potifar a pisekisekiló.

6. Eli met meefien Josef usun nónnómun?

⁶ Anchangei meefien Josef. Met a kon mochen seni meinisin? An epwe sill me ren Potifar me an epwe ngeni feiéchún? Ese mwáál, Josef a mochen an epwe musowu pwe epwe tongeni liwiniti seman we. Pwe inaamwo ika a watte wisen Josef lón imwen Potifar we, nge i chúen emén slave ngeni emén masta ese angang ngeni Jiowa. Jiowa ese efisi án Potifar epwe omusaawu Josef, me nónnómun Josef epwele fen pwal weiresiló.

7. Ifa usun nónnómun Josef a weiresiló? (Keneses 39:14, 15)

⁷ Usun met a mak lón Keneses sópwun 39 pwe pwúlúwen Potifar we a sani Josef me a sótun etipetipa fán fite. Nge iteitan Josef  ese etiwa. Iwe a fókkun song ren Josef, ina popun a tipi ngeni pwe itá a sótun reipei. (Álleani Keneses 39:14, 15.) Atun Potifar a rong, a atolonga Josef lón imwen fétek, me a nóm ikena ren fitu ier. (Ken. 39:19, 20) Mi fet lón ena imwen fétek? Ewe kapasen Ipru Josef a néúnéú fán iten “imwen fötek,” a tongeni wewe ngeni “chénúttu,” are “pwaang,” weween pwe a kirochoroch lón me a meefi ápilúkúngaw me lón. (Ken. 40:15) Ewe Paipel a pwal erá pwe ren och fansoun, a fééfé pechen Josef ngeni selimechá me a riri úwan ngeni selimechá. (Kölf. 105:17, 18) Nónnómun Josef a weiresiló. Akkomw i emén slave mi alúkúlúk, nge iei a emén chón fétek mi attong.

8. Met sia tongeni lúkúlúkú inaamwo ika a weiresiló eú sóssót sia nóm fan?

⁸ A fen piin fis ngonuk eú mettóch mi fókkun áweires, nge a fen pwal áweiresiló inaamwo ika ka fókkun sié ngeni Kot lón óm iótek? A tongeni fis ena. Jiowa esap eppeti senikich ekkewe sóssót lón ei fénúfan mi nóm fán nemenien Satan. (1 Joh. 5:19) Iwe nge, ka tongeni lúkú ei mettóch: Jiowa a unusen silei met a kan fiffis ngonuk, me a chúnguk. (Mat. 10:29-31; 1 Pet. 5:6, 7) Pwal och, a pwonei: “Ngang üsap fokun likituk, üsap pwal tümwününgau ngonuk.” (Ipru 13:5) Jiowa a tongeni álisuk le likiitú inaamwo ika usun itá ka meefi pwe ese wor óm ápilúkúlúk ren met a fis ngonuk. Sipwe káé ifa usun a pwal fis ngeni Josef ena.

9. Met a pwári pwe Jiowa a eti Josef atun a nóm lón ewe imwen fétek? (Keneses 39:21-23)

⁹ Álleani Keneses 39:21-23. Jiowa a asopwéchú Josef pwal mwo nge atun ekkewe fansoun mi áweires lón ewe imwen fétek. Ifa usun? Mwirin och fansoun, ewe chón nemeni ewe imwen fétek a lúkúlúkú Josef me ésúfélú usun chék pwal met Potifar a féri ngeni. Ló, ló, ló, ena chón nemeni ewe imwen fétek a atolonga ekkewe chón fétek fán túmúnúen Josef. Ewe Paipel a erá pwe “ewe chon nemeni ewe imwen fötek esap chüen ekiekin püsin tümwünü mine a fen nom fän nemenien Josef.” Iei a wor án Josef angang mi wor aúchean. A ifa me weiweitáán ena siwil! Pwata a tufich ngeni emén chón fétek mi iti ngeni eú pwóróus pwe a sótun reipei pwúlúwen emén néúwis, an epwe wiseni eú wis mi wor aúchean? A chék wor eú popun. Keneses 39:23 a apasa pwe “ewe Samol mi Lapalap a eti Josef o afeiöchü an angang meinisin.”

10. Áweweei pwata Josef a meefi pwe eli ese sópwéch lón mettóch meinisin.

¹⁰ Ekiekisefáli meefien Josef. Mwirin an tikingaw ren eú pwóróus ese pwúng, iwe a kalapus, óm lúkú nge a meefi pwe a sópwéch lón mettóch meinisin? Met Josef a mochen lap seni meinisin? Itá chenin me ren ewe chón nemeni ewe imwen fétek? Ese mwáál Josef a mochen an epwe tikiéch me mus. A pwal mwo nge tingorei emén chienan chón kalapus epwele musowu, an epwe tingorei Farao pwe epwe omusaawu seni ewe imwen fétek mi áweires. (Ken. 40:14) Iwe nge, átena ese mwittir fós ngeni Farao. Ina minne, Josef a nómmótiw lón ena imwen fétek ren pwal ruu ier. (Ken. 40:23; 41:1, 14) Nge, Jiowa a chúen sópweló le asopwéchú. Ifa usun?

11. Ifa ewe tufich mi kkóló aúchean Jiowa a fang ngeni Josef, me ifa usun ena mettóch a álisatá pwénúetáán án Jiowa kókkót?

¹¹ Atun Josef a nóm lón imwen fétek, Jiowa a efisi án Farao ewe kingen Isip epwe ttana ruu ttan mi aosukosuka. I a fókkun mochen silei weween. Atun ena king a silei  pwe a wor án Josef tufichin áweweei ttan, iwe a tiiti Josef. Ren án Jiowa álillis, Josef a áweweei ekkena ttan me Farao a mwaar ren an kapasen emmwen mi álilliséch. Atun Farao a kúna pwe Jiowa a álisi ena alúwél, a seikaatá pwe epwe wisen mesemes wóón túmúnún mwéngé lón unusen Isip. (Ken. 41:38, 41-44) Mwirin, a fis eú watteen lengita esap chék lón Isip, nge pwal lón Kanaan, ikewe chón an we famili ra nóm ie. Iei a wor án Josef tufich le seláni chón an we famili, iwe repwe túmúnú ewe tettelin mwirimwir, ewe Messaia epwe feito seni.

12. Ifa usun Jiowa a asopwéchú Josef?

¹² Ekieki usun ekkewe mettóch mi amwarar mi fis lón manawen Josef. Ié a efisi án Potifar epwe áfánni Josef, emén chék slave? Ié a efisi án ewe chón nemeni ewe imwen fétek epwe efich Josef, emén chón fétek mi attong? Ié a efisi án Farao epwe ttana ekkewe ttan mi aosukosuka, me ngeni Josef ewe tufichin áweweei ekkena ttan? Ié a amwékútú Farao an epwe seikaatá Josef pwe epwe wisen mesemes wóón túmúnún mwéngé lón Isip? (Ken. 45:5) A ffat pwe Jiowa ewe a asopwéchú meinisin minne Josef a féri. Inaamwo ika pwiin Josef kewe ra mochen nieló, nge Jiowa a siwili ena ekiek pwe epwe pwénútá letipan.

13. Itá Jiowa a angolong lón iteiten met mi fis lón manawach? Áweweei.

¹³ Met sia tongeni káé seni pwóróusen Josef? Itá Jiowa a angolong lón iteiten met mi fis lón manawach? Itá a nemeni meinisin met mi fis lón manawach pwe ekkewe mettóch mi ngaw mi fis ngenikich, repwe fis ren eú popun mi éch? Aapw, ewe Paipel ese áiti ngenikich usun ena. (SalAf. 8:9; 9:11) Iwe nge, sia silei ei mettóch: Atun sia nóm lón eú sóssót, Jiowa a kúna me a rong ach sién álillis. (Kölf. 34:15; 55:22; Ais. 59:1) Nge lap seni meinisin, I a tongeni álisikich pwe sipwe sópwéch le likiitú fán ekkewe weires. Ifa usun?

14. Ifa usun Jiowa a álisikich lón fansoun weires?

¹⁴ Eú alen án Jiowa álisikich, ina ren an awora ourur me kapasen apéchékkúl, lape ngeni lón ekkewe fansoun a fókkun lamot ngenikich. (2 Kor. 1:3, 4) Ina met a fis  ngeni emén Chón Kraist mwán itan Eziz lón Turkmenistan mi kapwúngúló pwe epwe kalapus ren úkúkún ruu ier pokiten an lúkú. Iei met a apasa: “Lesossorun ai we kapwúng, emén Chón Kraist mwán a áiti ngeniei Aisea 30:15, ewe mi erá: ‘Oupwe küna pöchökül ren ämi mosonotam me ämi lükülük.’ Ena wokisin a kan álisiei le chék kinamwe me lúkúlúk wóón Jiowa lón mettóch meinisin. Ai ekilonei ena wokisin a álisiei lón unusen atun ua kalapus.” Ka pwal tongeni ekieki eú fansoun lón manawom án Jiowa álisuk ren an oururuk me apéchékkúlok lón ewe fansoun mi fókkun lamot ngonuk?

15-16. Met ka káé seni pwóróusen Tori?

¹⁵ Lape ngeni, sise kan esilla ifa usun Jiowa a álisikich le likiitú fán ekkewe sóssót, nge sipwap fen kúna mwirin an a fen taweló. Ina met a fis ngeni emén Chón Kraist fefin itan Tori. A úri néún we át itan Mason eú kanser ren úkúkún wonu ier tori an a máló. Ewer, Tori a fókkun letipechou. A erá, “Use ekieki pwe mi pwal wor eú mettóch mi kon áweires ngeniei.” A pwal erá, “Ua lúkú pwe ekkewe ekkóch sam me in repwe tipeeú ngeni pwe ám kúna riáfféún néúm kewe, a kon fen eriáfféú seni ám kúna eú riáfféú lón pwisin manawem.”

¹⁶ Inaamwo ika Tori a fókkun letipechou ren riáfféún néún na, nge mwirin a ekieki ifa usun Jiowa a fen álisi le likiitú fán ena weires. A apasa “Atun ua ekieki met a fis lón ena fansoun, ua tongeni kúna ifa usun Jiowa a álisiei atun nei we a semmwen. Áwewe chék, chienach kewe Chón Kraist ra ssá ren úkúkún ruu awa pwe repwe etto reem lón ewe pioing inaamwo ika Mason ese péchékkúlen kúna chón etto chuuri. A chék wokkor emén lón  ewe leenien witiwit mi mmólnetá me mochen awora álillis. Pwal eú, chienach kewe Chón Kraist ra awora met a lamot ngenikem lón pekin aion. A chék wokkor met aua osupwangan, pwal mwo nge lón ekkewe fansoun mi fókkun áweires.” Jiowa a fang ngeni Tori met a lamot ngeni pwe epwe tongeni likiitú, me ina met a pwal féri ngeni Mason.​—Ppii ewe pwóór “ Jiowa A Fang Met A Wesewesen Lamot Ngenikem.”

17-18. Met epwe álisikich le esilla me aúcheani án Jiowa álillis atun fansoun weires? (Kölfel 40:5)

¹⁷ Álleani Kölfel 40:5. Emén chón tééki chuuk a achocho ngeni an epwe tikeri neungungan. Iwe nge, a chómmóng ekkewe leeni epwe kaúló ie me katol ekkewe mettóch mi ling a kúna. A pwal ina usun, kopwe akkawora fansoun ren óm kaúló me ekieki ifa usun Jiowa a asopwéchuk inaamwo ika ka nóm fán weires. Iteiten lesópwólóón eú me eú rán, pwisin eisinuk: ‘Ifa usun ua kúna án Jiowa efeiéchúei ikenái? Inaamwo ika ese mwo morolo ewe osukosuk, nge ifa usun Jiowa a álisiei le likiitú?’ Ppii ika ka tongeni esilla mwaren eú mettóch Jiowa a féri nge mi álisuk.

¹⁸ Ewer, eli ka ióteki an epwe wes ewe sóssót mi toruk. Ese wor ngawan me a fich ena. (Fil. 4:6) Nge a lamot ach sipwe pwal esilla ekkewe feiéch mi torikich iei. Pún ren enletin, Jiowa a pwonei pwe epwe apéchékkúlakich me álisikich pwe sipwe likiitú. Ina popun kosap fókkun aúcheangawa án Jiowa álisuk. Iwe, kopwe kúna ifa usun Jiowa a álisuk pwe kopwe sópwéch, usun met a féri ngeni Josef pwal mwo nge atun fansoun weires.​—Ken. 41:51, 52.