1-2. (a) Ninkoddela nni otikina nigagumanana dhorutxa? (b) Txini enasunzihu mwari mwa nsunzo ntti?

 NINGA nlogo na Mulugu, kanintikina nigagumanana dhorutxa. Bibilia onloga, “enofuneya otabuwela venjene ovolowa mumweneni mwa Mulugu.” (Mer. 14:22) Iyo ninoziwa wi makattamiho mena angumanihuna ovanene, anagome nigavolowa mwilaboni eswa ya Mulugu, venevo “kunakale vina okwa, kutho, obulela, segedho.”—Ovuh. 21:4.

² Yehova kannibarela mwa dhoweha dhotene dhingumanihuna, mbwenye, iyene ononikamihedha ovilela. Koona elogile murumiwi Paulo mwaha wa Akristu akala o Roma. Voroma iyene ohiloga makattamiho agumaniliyena vina agumanilena abali ena. Iyene ohileba: “Mwetemwene-mpo, ninopemberhamo vopitha na guru dha Ole onikwelile.” (Rom. 8:35-37) Eji entapulela wi Yehova onowukamihedha ovilela makattamiho. Ndowe none mukalelo omukamihedhile Yehova José okwaranya makattamiho, vina mukalelo onawukamihedhiye.

3. Matxinjo gani apadduwile momaguva mwigumini mwa José?

³ Jakob wannimukwela venjene mwanaye José. (Wita 37:3, 4) Sabwa ya ejuwene, ana a Jakob anddimuwaya ahidha omwidda mbalawa. Yodhelavoya, vakanilani gari ahimuguliha José na anyamarhondda akadda Midia. Anyamarhondda  aba aheedda na José kilometuru zana mpaka w’Ejipitu, venevo José wahigulihiwa dila ya nawili—dila eji wagulihedhiwe Putifar wali munddimuwa wa ang’aneli a Faraó. Egumi ya José yahitxinja momaguva, iyene wahittiya okala mwana wokweleya wa babe, bakala mudhari w’Ejipitu!—Wita 39:1.

4. Makattamiho angumanihuna masaka abano anladdana dhavi na agumanilena José?

⁴ Bibilia onologa wi dhilobo dhabure dhinowapadduwela attu otene. (Koh. 9:11) Masaka mena iyo ninofwanyiwa makattamiho angumanana attu otene. (1 Kor. 10:13) Obe iyo txino ninodhaga otabuwa sabwa ya okala anamafwara a Yezu. Motagiha, iyo ninobeddiwa, attu ena anokodda ovuruwana dhinlogihu, obe ninofwarafwariwa sabwa ya nroromelo nehu. (2 Tim. 3:12) Kintanala makattamiho anagumanihuna, Yehova onele onikamihedha opemberha. Yehova omukamihedhile dhavi José?

5. Okoddela wa mabasa attidda José omuttukuleli Putifar okana ebaribari gani? (Wita 39:2-6)

⁵ Kengesa Wita 39:2-6. Putifar wahoona wi José wali mulobwana wa eziwelo vina kali muwara. Iyene wanziwa sabwaya. Putifar wahoona wi “[Yehova] wali na José, wankoddeliha mabasa otene athiddiye.” b Putifar wahimuttoma José okala mwimeleli waye. Vasogorhova wahinvaha José dhotene dha vatakulu vaye wi eddihege. Yodhelavoya? Putifar wahifuma.

6. José wewamo dhavi na makattamiho agumaniyena?

⁶ Kobuwela mukalelo waviwamo José. Elobo gani yina egafuniliye? Iyene wanfuna woniwa ninga muttu wapama vina ovahiwa mareliho na Putifar? Yafuna José ja ofuruliwa vina wiyelela oli babe. Masiki akanaga dhotedhene, iyene wamulabela muttu wahamwebedha Yehova. Yehova kamuttukuleli Putifar onfurula José. Nanda makattamiho a José agahidha ottabwavi.

7. Egumi ya José edhile dhavi otxinja? (Wita 39:14, 15)

⁷ Dhahene ninga munlogela Wita kapitulu 39, mwadhi Putifar wahidha oziveliwa na José, vina wanfuna wi José agone na  iyene. Mudhidhi wotene José wannimukodda. Sabwa ya ejuwene iyene wahidha osilidhiwa na José, wahimmagedha wi watamela ogona na iyene. (Kengesa Wita 39:14, 15.) Vewale Putifar ejuwene wahinfugeliha José, bakala mukamburha mwa vyaka dhinjidhene. (Wita 39:19, 20) Kamburaya yali dhavi? Nzu nilabihedhile José na Hebráiko wila atonye “kamburhaya” ninotapulela “nttolo,” obe “ntxela” muli eddima vina iyene kana njedhelo. (Wita 40:15) Sabwani vavolowile-wene José mukamburha, nyeddo dhaye dhahimagiwa na pingwi, nikotti naye nahekiwa mujila. (Masal. 105:17, 18) José wahitabuwa vaddiddi. Iyene wahittiya okala mudhari ororomeliwa badha okala munyaperhezu.

8. Masiki nifwanyiwaga makattamiho ottabwa, nikuluvelo gani ninfwanyelihu okana?

⁸ Wahiromaga ogumanana makattamiho orutxa oku olobelaga na murima wotene masiki dhawene makattamihoya ottabwagavi? Eji enopadduwa. Yehova kannibarela mwa makattamiho otene angumanihuna mwilaboni mpu munlamuleliwa na Satana. (1 Jo. 5:19) Masiki dhawene okane nikuluvelo nawi: Yehova onoziwa dhotedhene dhinupadduwela, vina iyene onowuzuzumela. (Mt. 10:29-31; 1 Ped. 5:6, 7) Ottiya ejo iyene ononikuluveliha na mazu aba: “Miyo kaddinauthiye weka, kaddinaunyanyale.” (Aheb. 13:5) Yehova onowodha wukamihedha masiki buyeleliwe njedhelo. Ndowe none mukalelo omukamihedhile Yehova José.

9. Txini enlagiha wi Yehova wali na José mudhidhi wafugeliwiye mukamburha? (Wita 39:21-23)

⁹ Kengesa Wita 39:21-23. Masiki vali José mukamburha atabuwaga, Yehova wankoddeliha mabasa otene attiddiye. Dhavi? Na mudhidhiya, José wahidha okuluveliwa vina orihiwa na namattonga wa mukambura, dhahene ninga mwakosile Putifar. Mwari mwa mudhidhi mung’onovi namattonga ole wahimuttoma José ninga mwang’aneli wa afugeliwi ena. Bibilia onologa “Namathonga ole kañgana elowene mmabasani amuthiyedhileye José.” Ovano José wahikana mabasa—okosa. Aba ali matxinjo ohijedheleya! Enwodheya dhavi muttu wafugeliwe mukamburha sabwa ya omagehedhiwa ofuna ogona na mwadhi mwimeleli munddimuwa wa varuwani, ovahiwa ettomo ninga eji? Ebaribariya enfwanyeya va Wita 39:23, Yehova wali na iyene wanimukamihedha wi mabasa aye otene edde pama.

10. Katapulela sabwaya egadhile omuttukulela José wubuwela wi dhilobo dhotedhene kadhamweddela pama.

¹⁰ Kobuwela mukalelo waviwamo José. Vamaliliye omagedhiwa vina ofugeliwa mukamburha, onubuwela wi iyene woona wila dhotedhene dhanimweddela pama? Txini yafuna José? Woniwa pama na namattonga wa mukamburha? Yafuna José yali ya oburutxiwa mukamburha. Iyene wahimukumbirha nfugeliwi mmodha afuna ofuruliwa wi aloge na Faraó mwaha wa iyene wila amburutxe mukamburha. (Wita 40:14) Mulobwana ole mubudduwiliye wahidduwala ologa na Faraó. Sabwa ya ejuwene José wahikalavi mukamburha mwari mwa vyaka bili. (Wita 40:23; 41:1, 14) Yehova walivi na iyene, wankoddeliha mabasa otene attiddiye. Dhavi?

11. Ewodhelo gani ya vawoka envahile Yehova José, nanda eji ekamihedhile dhavi wakwanihedheya wa efunelo ya Yehova?

¹¹ Vali José mukamburha, Yehova wahimurowiha mwene w’Ejipitu, dhilobo bili dhopipirhiheya. Faraó wanfuna oziwa yatapulela dhoroha esile. Vaziwile mwene wi José  wahikana ewodhelo ya otapulela dhoroha, iyene wahimukuweliha. Na nikamihedho na Yehova, José wahitapulela dhoroha esile, dhimutikinihile Faraó na akumbaisa aye. Monile Faraó wi Yehova wali na muzombwe José, wahimuttoma wi ang’anele dhoja dhotene dha w’Ejipitu. (Wita 41:38, 41-44) Osogorhowa, mwahikala dala enddimuwa w’Ejipitu vina o Kanaá, elabo yakala anamudhi a José. Ovano José wahikana ewodhelo ya wakamihedha anamudhi aye wi abarele ziza mugabaliwe Mesiya.

12. Yehova okoddelihile dhavi mabasa otene a José?

¹² Kobuwela dhilobo dhowumiha milomo dhipadduwile mwigumini mwa José. Bani omukosihile Putifar omwang’ana José na oderetu oku agali mudhari? Bani omukosile namattonga a ang’aneli a mukamburha omuttomela José mabasa agali mfugeliwi? Bani omukosihile Faraó oroha dhilobo dhopipirhiheya vina bani omukamihedhile José otapulelamo dhorohadha? Bani omukosihile Faraó omuttoma José ninga mwang’aneli wa dhoja dhotedhene w’Ejipitu? (Wita 45:5) Txibarene ddi Yehova wakoddeliha mabasa otene a José. Masiki vafuna abali a José ompa Yehova wahisaddula dhilobodha wi akwanihedhe efunelo Yaye.

13. Ddi Yehova oneddiha dhilobo dhotedhene dhimpadduwa mwigumini mwehu? Katapulela.

¹³ Txini ensunza iyo na epadduwile mwigumini mwa José? Ddi Yehova oneddiha dhetedhene dhinnipadduwela? Ddi Iyene oneddiha dhilobo dhotedhene dhabure dhimpadduwa mwigumini mwehu wi omamalelowa nipurelemo? Kahiye mwenemo, Bibilia kankamihedha moonelo obu. (Koh. 8:9; 9:11) Ninziwa dhavi ejuwene: Iyo nigapattiwa makattamiho Yehova onoziwa vina iyene onovuruwana nigatamelaga nikamihedho. (Masal. 34:15; 55:22; Iza. 59:1) Ottiya ejuwenevi Yehova ononikamihedha ovilela makattamihoya. Dhavi?

14. Yehova onnikamihedha dhavi mudhidhi worutxa?

¹⁴ Mukalelo mmodha wa Yehova onikamihedha ku onilibiha vina onipangarhaza mudhidhi onfunihu. (2 Kor. 1:3, 4) Jijuwene empadduweli Eziz, mbali wo Turquenistão  ofugeliwe mukamburha vyaka bili mwaha wa nroromelo naye. Iyene ohiloga, “Omembesi wafunimi ottongiwa mbali mmodha ohiddilagiha Izaiya 30:15, enloga: ‘Guru dhenyu dhinda mugakala ofwaseyene vina mugaroromela.’ Versu eji ehiddikamihedha omukuluvela Yehova mwa dhotedhene vina okala ofwaseyene. Otanalela mwaha wa versu eji ehiddikamihedha mudhidhi walimi mukamburha.” Onowubuwela nikamihedho nuvahile Yehova mudhidhi wafuniwe nikamihedho vina nipangarhazo?

15-16. Txini esunziliwe na empadduwele Tori?

¹⁵ Masaka menjene ninona wi Yehova ohinikamihedha makattamihoya agamala ovira. Murogora onkuweliwa Tori ohona wi ejo ebaribari. Mwanaye onkuweliwa, Mason, watabuwa na eredda ya kanseri mwari mwa vyaka tanu na modha omamalelowa wahikwa. Tori wali okumuwene. Iyene ohiloga, “Ninga mambali kaddobuwela wi ddigahipattiwa na makattamiho ninga aba.” Iyene ohenjedhedha, “Ddinoziwa wi amambali ena agahidha oviwamo dhahene ninga eviwilemo miyo, agamoona mwaniwa atabuwaga.”

¹⁶ Masiki Tori vakubanyiye venjene sabwa ya omoona mwanaye atabuwaga wahiwodha ovilela na nikamihedho na Yehova. Iyene ohiloga dhahi: “Ddigobuwela epadduwile nsaka nttile, ddinowodha wona nlada n’okwela na Yehova mudhidhi wali mwanaga muredda. Motagiha, masiki Mason valiye muredda vaddiddi se owodha wawona attu adha omoona, abali na arogora aneedda na karo mawora meeli wi adhe osipitale. Mudhidhi wotene va sala de espera—vankala muttu womala-nawale wi anikamihedhe. Ottiya ejo abali na arogora annivaha  nikamihedho. Masiki makattamiho vattabwilani, mudhidhi wotene nankana dhilobo dhanijombela.” Yehova ohinvaha Tori nikamihedho nafuniye wi awodhe ovilela, vina ohikosa yakene na mwanaye Mason.—Kang’ana kasha “ Yehova Ohinivaha Dhafunihu.”

17-18. Txini enanikamihedhe ozinddiyela vina otamalela nikamihedho ninnivaha Yehova mudhidhi wa makattamiho? (Masalmo 40:6)

¹⁷ Kengesa Masalmo 40:6 [Masal. 40:5 NM]. Yogana ya namawela myango (alpinista) ja ofiya vamutompiyoniva. Ejo bilivi, mudhidhi onweliye akala munromiye wimela, baroma wang’ana okoddela wa esile dhinoniye. Na mukalelo wakakene, jofuneya mudhidhi na mudhidhi oroma otanalela nikamihedho ninnivaha Yehova wi dha mwigumini mwehu dhidhowege vasogorho oku nidhowagavi nivilelaga makattamiho. Omagomo wa siku-siku kavivuze: ‘Nikamihedho gani niddivahile Yehova ddabuno? Masiki makattamiho baliwo, Yehova onddikamihedha dhavi odhowavi ddivilelaga?’ Kaleba lista na mareliho anuvaha Yehova anukamihedha odhowavi ovilelaga.

¹⁸ Ebaribari wi weyo onolobelela ogoma wa makattamiho anupatta. Ejo japama vina jofuneya. (Fil. 4:6) Masiki dhawene ninofwanyela ovaha ttima mareliho anihu ovanene. Ottiya ejo, Yehova ohipikirhela onivaha guru vina nikamihedho wi niwodhe ovilela. Nona mudhidhi wotene katamalelaga nikamihedho ninuvaha Yehova. Dhawene panawodhe weyo woona mareliho anuvaha Yehova wi egumi yawo edhowege vasogorho, dhahene ninga ekosiliye na José, masiki mudhidhi wa makattamiho.—Wita 41:51, 52.