1-2. (a) Harnak kan ton tikah zeicah kan khuaruah a har lo? (b) Hi capar ah zei kong dah kan i ruah hna lai?

 JEHOVAH miphun nih harnak kan ton tikah kan khuaruah a har lo. Baibal nih hitin a ti: “Pathian Pennak chung luh awkah hin harnak tampi kan ton a hau.” (Lam. 14:22) ‘Thihnak, ngaihchiatnak, ṭahnak le fahnak hna a um lai lonak,’ Pathian vawlei thar i kan um hlan tiang kan tonmi harnak cheukhat cu an um rih ko lai ti kha kan hngalh.—Biat. 21:4.

² Jehovah nih harnak in a kan kilveng lo. Asinain inkhawhnak ngeih awkah a kan bawmh. Lamkaltu Paul nih Rom khua ah a ummi Khrihfa hna sin a chimmi bia hi i cinken. Amah le unau pawl nih an tonmi harnak kong kha a langhter hmasa. Mah hnuah hitin a ṭial: “A kan dawtu thawngin kannih cu teitu kan si.” (Rom 8:35-37) Mah cu harnak na ton lio hmanhah Jehovah nih hlawhtlinnak aan hmuhter khawh tinak a si. Hlawhtlinnak hmuh awkah Jehovah nih Josef zeitindah a bawmh ti le kannih zong zeitindah a kan bawmh khawh ti kha zohmanh hna u sih.

3. Josef nunnak cu ruahlopi in zeitindah aa thlen?

³ Jakob nih a fapa Josef a dawt tukmi kha hlangfang tein a rak langhter. (Gen. 37:3, 4) Mah ruangah a fapa upalei pawl nih Josef kha an nahchuah. Caanṭha an hmuh tikah Josef kha Midian mi chawlettu hna sinah an zuar. Mah chawlettu hna nih Josef kha meng tampi aa hlatnak Izipt ram ah an kalpi i  Faraoh inncawngtu bawi a simi Potifar sinah an zuar ṭhan. Josef nunnak cu a pa nih a dawt tukmi fapa pakhat in a niammi Izipt sal pakhat ah khulrang in a hun i thleng!—Gen. 39:1.

4. Josef nih a tonmi zuamcawhnak phun kha zeitindah kan ton khawh ve?

⁴ Baibal nih “thilṭhalo cu mikip cungah a tlung” tiah a ti. (Pct. 9:11, Holy Bible—Easy-to-Read Version) “Midang zong nih an in cio tawnmi,” mikip nih an tonmi harnak kha a caan ah kan tong ve. (1 Kor. 10:13) Asiloah Jesuh zultu kan si ruangah harnak kan tong men lai. Tahchunhnak ah, kan zumhnak ruangah nihsawhnak, ralchanhnak asiloah hremnak hmanh kan tong men lai. (2 Tim. 3:12) Zei bantuk harnak na ton hmanhah Jehovah nih hlawhtlinnak aan hmuhter khawh. Josef kha zeitindah cutin a rak hmuhter?

5. Josef hlawhtlinnak he aa tlaiin Potifar nih zeitindah a ruah? (Genesis 39:2-6)

⁵ Genesis 39:2-6 rel. Potifar nih Josef cu thiamnak a ngeimi le rian aa zuammi mino pakhat a si ti kha a hngalh. Cutin a sinak a ruang zong a hngalh. “[Josef nih] zei a tuahnak hmanhah BAWIPA nih a tlam a tlinter” ti kha Potifar nih a hmuh.” b A donghnak ah, mah Izipt mipa nih Josef cu amah bawmtu in rian a pek. Cun a inn chung thilri vialte zohkhenhtu in rian a pek. A phichuak cu zeidah a si? Potifar cu hlawhtlinnak a hmu.

6. Josef cu a sining he aa tlaiin zeitindah a um khawh?

⁶ Thil sining kha Josef dirhmun in hmuh i zuam. Josef nih thil dang nakin zeidah a duh deuh lai? Potifar nih cohlanmi le laksawng pekmi si maw a duh lai? Josef nih a pa sinah a kir ṭhan khawh nakhnga luatnak hmuh a duh deuh tuk ko lai. Potifar inn ah tinvo sung tampi a hmu ko nain Josef cu Pathian a bia lomi bawi pakhat i a sal a si rih ko. Potifar nih Josef kha luatnak a pek nakhnga Jehovah nih a rak bawm lo. Josef sining cu a hung chia chinchin.

7. Josef nunning cu zeiti lam in dah a hun chiat chin? (Genesis 39:14, 15)

⁷ Genesis dal 39 ah a langhter bantukin Potifar nupi nih Josef kha atu le atu a  lem lengmang. A lem fatin Josef nih a al lengmang. A donghnak ah, a thin a hung tuk i tlaihhrem a ka timh tiah Josef kha sual a rak puh. (Genesis 39:14, 15 rel.) Potifar nih mah kong a theih tikah Josef kha thong a thlak i kum tampi chung thong ah a rak um. (Gen. 39:19, 20) Thonginn cu zeidah a lawh? Josef nih “thonginn” caah a hmanmi Hebru biafang cu “ti khor” asiloah “khor” timi sullam a ngei kho. Mah nih Josef umnak pawngkam cu a mui dih i ruahchannak a ngei lomi bantukin a um ti kha a langhter. (Gen. 40:15) Cun caan caankhat chung Josef cu a ke ah hreng an khenh i a hngawng ah thir hngawngkual an bunh tiah Baibal nih a langhter. (Salm 105:17, 18) Josef sining cu a hung chia chinchin. Zumhmi sal pakhat in thongtlami pakhat a hung si.

8. Kan sining cu a chiat chin hmanhah zeidah kan zumh khawh?

⁸ Lungtak tein thla na cam ko buin thil sining a chiat chinmi kha na tong bal maw? Na ton khawh ko. Satan nih a ukmi hi vawlei ah harnak ton lo dingin Jehovah nih a kan kilveng lo. (1 Johan 5:19) Asinain Jehovah nih na tonmi kha ṭha tein a hngalh i a ka zohkhenh ti kha na zumh khawh. (Matt. 10:29-31; 1 Pet. 5:6, 7) Pathian nih hitin bia a kan kamh: “Kaan kaltak bal hna lai lo i kaan hlaw bal fawn hna lai lo.” (Heb. 13:5) Ruahchannak a ngei lomi na lawh hmanhah inkhawhnak ngeih dingin Jehovah nih aan bawmh khawh. Pathian nih Josef a bawmh ning kha zohhmanh hna u sih.

9. Josef thong a tlak lioah Jehovah nih a umpi ti kha zeinihdah a langhter? (Genesis 39:21-23)

⁹ Genesis 39:21-23 rel. Josef cu thong a tlak i harnak a ton lio hmanhah Jehovah nih hlawhtlinnak a hmuhter. Zeitin in dah? A hnuah Potifar bantukin thonginn bawi sinin zumhnak le upatnak a rak hmuh. A donghnak ah thonginn bawi nih Josef cu a dang thongtla pawl uktu ah rian a pek. A tak ti ahcun Baibal nih “Josef zohkhenhmi thil a simi paoh kha cu thongbawi nih zeihmanh a zoh a herh lo” tiah a ti. Atu ah Josef cu ṭuan dingmi rian pakhat a ngei. Mah cu i ruahchan lomi thlennak a si! Siangpahrang inncawng bawi pakhat i nupi tlaihhrem a timh tiah sualpuhmi thongtla pakhat nih cu bantuk zumhmi dirhmun cu zeitindah a hmuh khawh? Mah kong he aa tlaiin fianternak pakhat lawnglawng a um. Genesis 39:23 nih hitin a ti, “BAWIPA nih khan Josef cu a umpi i a tuahmi paoh kha a tlam a tlinter.”

10. Josef nih zeizong kip ah ka hlawh a tling tiah zeicah a ruah lai lo ti kha fianter.

¹⁰ Josef dirhmun in thil sining kha hmuhthiam i zuam. A hmaan loin sualpuh le thongthlak a si hnuah zeizong vialte ah a hlawh a tling tiah na ruat maw? Josef nih zeidang vialte nakin zeidah a duh deuh lai? Thongbawi mithmai ṭha hmuh maw a duh lai? Josef nih sualnak a ngei lo ti in luatnak pek kha a duh deuh men ko lai. Lungdong awk ngai a simi thonginn in chuahter awkah amah aiawh in Faraoh sinah bia chimpiak dingin a dang thongtla pakhat hmanh kha a rak fial. (Gen. 40:14) Asinain mah pa nih Faraoh sinah a chimpiak colh lo. Mah ruangah Josef cu kumhnih chung thong a tla chap rih. (Gen. 40:23; 41:1, 14) Asinain Jehovah nih a hlawh a tlinter peng. Zeitin in dah?

11. Jehovah nih Josef kha zei a ṭha tukmi sining dah a pek, mah nih Jehovah tinhnak tlinter awkah zeitindah a bawmh?

¹¹ Josef thong a tlak lioah Jehovah nih Izipt siangpahrang kha a lung a buaitermi mang pahnih a manhter. Faraoh nih a mang sullam kha hngalh a rak duh tuk. Josef nih mang  a leh khawh ti kha siangpahrang pa nih a hngalh tikah a auhter hna. Jehovah bawmhnak thawngin Josef nih mang a leh khawh caah le a ṭhami ruahnak cheuhnak a pek caah Faraoh cu a lung a tling tuk. Jehovah nih a umpi ti kha a hngalh caah Faraoh nih Josef kha Izipt mi vialte caah rawl tlangtlatu in rian a pek. (Gen. 41:38, 41-44) A hnuah Izipt ah mangṭam fakpi in a tlung i Josef chungkhar pawl an umnak Kanaan zongah a tlung ve. Atu ah Josef cu a chungkhar khamh khotu dirhmun ah a um cang, cuticun Messiah hringsortu miphun kha a rak kilven khawh.

12. Jehovah nih Josef kha zeiti lam hna in dah a hlawh a tlinter?

¹² Josef nih a tonmi thil sining hna kha ruathmanh. Sal pakhat sawhsawh a simi Josef cungah Potifar kha aho nih dah lungthin a pekter? Thongtla pakhat a simi Josef kha aho nih dah thongbawi sinin mithmai ṭha a hmuhter? Aho nih dah Faraoh kha lung a buaitermi mang a manhter i Josef kha mang leh khawhnak a pek? Aho nih dah Faraoh kha Izipt ram rawl tlangtlatu in Josef rian pek awkah a forh? (Gen. 45:5) Josef kha zeizong vialte ah hlawhtlinnak a hmuhtertu cu Jehovah a si ti cu a fiang ko. A ule nih Josef kha thah an rak duh ko nain Jehovah nih a duhnak tlinter awkah thil sining kha a rak thlen.

13. Kan tonmi thil sining kip ah Jehovah nih a kan tawnghthampiak maw? Fianter.

¹³ Josef kong in zeidah kan cawn khawh? Kan tonmi thil sining kip ah Jehovah nih a kan tawnghthampiak maw? Thilṭhalo kan tonmi cu thilṭha kan ton nakhnga caah Pathian nih a hmanmi lam a si maw? Baibal nih cutin a kan cawnpiak lo. (Pct. 8:9; 9:11) Asinain harnak kan ton tikah Jehovah nih a hngalh i bawmhnak kan halmi a theih ti kha kan hngalh. (Salm 34:15; 55:22; Isa. 59:1) Mah lengah Jehovah nih kan tonmi harnak hna hlawhtling tein inkhawh awkah a kan bawmh khawh. Zeitin in dah?

14. Harnak kan ton caan ah Jehovah nih zeitindah a kan bawmh?

¹⁴ Jehovah nih a kan bawmhnak lamkhat cu aa tlakmi caante ah thazaang le hnemhnak a kan peknak thawngin a si. (2 Kor. 1:3, 4)  Cutin a si ti kha a zumhnak ruangah kumhnih thongthlak a simi, Turkmenistan ah a ummi unaupa Eziz kong in kan hngalh khawh. Hitin a ti: “Biaceih ka si lai ni zinglei ah unaupa pakhat nih ‘nan ṭhawng lai i him tein nan um lai’ timi Isaiah 30:15 kha a ka hmuhsak. Mah Baibal caang nih lungdai tein um peng awk le zeizong vialte ah Jehovah i bochan peng awkah a ka bawmh. Mah Baibal caang ṭha tein ruahnak nih thong ka tlak chung vialte a ka bawmh.” Na herh tuk lio caante ah Jehovah nih hnemhnak le thazaang aan pekmi kha naa cinken maw?

15-16. Tori kong in zeidah na cawn khawh?

¹⁵ Kan tonmi harnak a dih hlan tiang Jehovah nih inkhawhnak ngeih awkah a kan bawmh ning kha kan hngalthiam tawn lo. Mah cu a hmaan ti kha unaunu Tori nih a hngalh. A fapa Mason cu a thih hlan, kum ruk chung cancer in a rak zaw. Mah tikah Tori cu a ngaih a chia tuk. Hitin a ti, “Nu pakhat dirhmun in ka caah mah tlukin a fakmi thil sining a um ti lai lo tiah ka ruah. Fale nih fahnak an inmi hmuh cu kanmah nih fahnak kan inmi nakin a fak deuh tuk ti kha a dang nulepa zong an hna a tla ve ko lai.”

¹⁶ A fapa nih zawtnak a tuarmi a hmuh tikah Tori cu a ngaih a chia tuk. Asinain a hnuah Jehovah nih inkhawhnak ngeih awkah a bawmh ning kha a hun hngalh. Hitin a ti, “Mah lio caan kong ka ruah ṭhan tikah ka fapa a zawt chung vialte Jehovah nih a ka bawmh ning kha ka hun hngalh. Tahchunhnak ah, Mason a zual tuk tikah unau pawl cu suimilam pahnih chung mawṭaw an mawngh i siizung ah an rak kan zoh. Kanmah bawmh awkah timhcia tein unau pakhatkhat paoh cu an um peng. Thilri chawva lei zongin an kan bawmh. A har tuk lio caan hmanhah kan  herhmi cu kan ngei peng.” Tori nih inkhawhnak a ngeih nakhnga a herhmi kha Jehovah nih a pek i Mason zong cutin a rak bawmh ve.—“ Jehovah Nih Kan Herhmi Kha A Kan Pek” timi rinli kulh ah zoh.

17-18. Harnak ton lioah Jehovah bawmhnak hngalh awk le sunsak awkah zeinihdah aan bawmh khawh? (Salm 40:5)

¹⁷ Salm 40:5 rel. Tlang a kaimi pakhat i aa tinhnak cu tlangpar phanh kha a si. Asinain tlangpar a phanh hlanah i dinhnak hmun tampi a um i aa dawh tukmi tlangram hna zong zoh khawh a si. Mah bantukin harnak na ton lio hmanhah Jehovah nih hlawhtlinnak aan hmuhter ning kong kha a caan pe in ruat lengmang. Nikhat a liam fatin hitin i hal: ‘Tuni ah Jehovah sinin zei thluachuah dah ka hmuh? Ka tonmi harnak cu a tlau rih lo hmanhah inkhawhnak ngeih dingin Jehovah nih zeitindah a ka bawmh?’ Hlawhtlinnak aan hmuhtermi, Jehovah sinin na hmuhmi thluachuah pakhatkhat kha na chim kho lai maw?

¹⁸ Na tonmi harnak a tlau nakhnga thla na cam lai ti cu a fiang ko. Mah cu a phung a si i aa tlakmi zong a si. (Fil. 4:6) Asinain atu ah kan hmuhmi thluachuah pawl zong kan philh awk a si lo. Jehovah nih inkhawhnak ngeih awkah thazaang kaan pek hna lai i kaan bawmh hna lai tiah bia a kan kamh. Cucaah Jehovah bawmhnak cungah zungzal in i lawm peng. Mah tikah Jehovah nih harnak caan chungah Josef a bawmh bantukin aan bawmh vemi kha na hmuh lai.—Gen. 41:51, 52.