1-2. (a) Akoz nou pa sirprann ki nou annan problenm? (b) Ki nou pou vwar dan sa lartik?

 KONMAN pep Zeova, nou pa sirprann ler nou fer fas avek problenm. Labib i dir ki “nou bezwen pas dan en kantite difikilte pour antre dan Rwayonm Bondye.” (Akt 14:22) Nou osi konnen ki serten nou bann problenm pa pou ganny rezourd ziska ki nou antre dan nouvo lemonn Bondye, kot “i pou nepli annan ni lanmor, ni dey, ni leokri, ni douler ankor.”​—Rev. 21:4.

² Zeova pa anpes nou ganny bann problenm. Me i ed nou pour ki nou kapab andire. Remark sa ki zapot Pol ti dir bann Kretyen ki ti reste dan lavil Ronm. I ti premyerman koz lo bann problenm ki li ek son bann frer ti pe fer fas avek. Apre sa i ti dir: “Nou pe sorti konpletman venker gras a sa enn ki kontan nou.” (Rom. 8:35-37) Sa i vedir ki Zeova i kapab fer ou reisi menm ler ou pe pas dan en problenm. Annou vwar ki mannyer Zeova ti ed Zozef pour li reisi e ki mannyer Zeova i kapab ed ou.

3. Ki mannyer lavi Zozef ti’n sanze en sel kou?

³ Zakob ti montre ki i ti kontan son garson Zozef en kantite. (Zen. 37:3, 4) Sa ti fer bann gran frer Zozef zalou. Ler zot ti ganny en loportinite, zot ti vann Zozef avek bann marsan Madyanit. Sa bann marsan ti anmenn Zozef, Lezip, ki ti plizyer santenn kilomet avek kot Zozef ti reste. Laba zot ti vann li avek Potifar, ki ti sef gard Faraon. Lavi Zozef ti’n sanz en sel kou. I ti nepli kot son papa ki ti kontan li en kantite me i ti’n vin lesklav en Ezipsyen!​—Zen. 39:1.

4. Ki kalite problenm nou kapab fer fas avek ki en pe parey avek sa ki Zozef ti fer fas avek?

 ⁴ Labib i dir ki “bann move keksoz i ariv avek tou dimoun.” (Ekle. 9:11, Holy Bible​—Easy-to-Read Version) Parfwa nou fer fas avek bann problenm ki lezot osi in gannyen. (1 Kor. 10:13) Ouswa i kapab ki nou soufer zis akoz nou en disip Zezi. Par egzanp, dimoun i kapab sikann nou, opoz nou ouswa menm persekit nou akoz nou lafwa. (2 Tim. 3:12) Me nenport ki problenm ou pe fer fas avek, Zeova i kapab fer ou reisi. Ki mannyer i ti fer Zozef reisi?

5. Ki Potifar ti krwar konsernan rezon akoz Zozef ti pe reisi? (Zenez 39:2-6)

⁵ Lir Zenez 39:2-6. Potifar ti remarke ki Zozef ti entelizan e ki i ti travay dir. I ti osi konnen akoz Zozef ti koumsa. Potifar ti vwar ki “Zeova ti pe fer [Zozef] reisi dan tou sa ki i ti pe fer.” b Avek letan, sa Ezipsyen ti fer Zozef vin son serviter personnel. I ti osi met Zozef ansarz son lakaz e tou sa ki i ti annan. Ki ti arive apre? Potifar ti prospere.

6. Ki mannyer Zozef ti’n kapab santi konsernan son sityasyon?

⁶ Esey imazinen ki mannyer Zozef ti santi. Ki Zozef ti pli anvi? Eski i ti anvi ki Potifar i remark li e rekonpans li? I tre probab ki Zozef ti anvi ganny libere pour li kapab retourn kot son papa. Menm si Zozef ti annan en kantite responsabilite dan lakour Potifar, Zozef ti ankor en lesklav e son met pa ti ador Zeova. Zeova pa ti fer Potifar liber Zozef. An plis ki sa, sityasyon Zozef ti pe al vin pli pir.

7. Ki mannyer sityasyon Zozef ti vin pli pir? (Zenez 39:14, 15)

⁷ Dan Zenez sapit 39, nou vwar ki madanm Potifar ti dakor avek Zozef e plizyer fwa i ti esey fer Zozef dormi avek li. Me sak fwa ki i ti fer sa, Zozef ti refize. Finalman, i ti sitan ankoler avek Zozef ki i ti dir ki Zozef ti pe esey vyol li.  (Lir Zenez 39:14, 15.) Ler Potifar ti tann sa, i ti fer met Zozef dan prizon e Zozef ti reste dan prizon pour plizyer lannen. (Zen. 39:19, 20) Ki mannyer lavi ti ete dan prizon? Sa mo Ebre ki Zozef in servi ki’n ganny tradwir konman prizon i kapab vedir “pwi” ouswa “trou.” Sa i fer nou konpran ki sa landrwa kot i ti ete ti fernwanr e ki i ti santi ki i pa kapab fer nanryen pour amelyor son sityasyon. (Zen. 40:15) Labib i osi dir ki ler Zozef ti dan prizon, pour en serten letan zot ti atas lipye Zozef avek lasenn e met feray otour son likou. (Ps. 105:17, 18) Pli ale sityasyon Zozef ti pe vin pli pir. Oparavan, i ti en lesklav ki son met ti annan konfyans ladan me aprezan i ti zis en prizonnyen.

8. Ki ou kapab asire menm si ou sityasyon i vin pli pir?

⁸ Eski ou’n deza dan en sityasyon difisil ki ti vin pli pir menm si ou ti kontinyen priy Zeova? Sa i kapab arive parski Zeova pa anpes nou ganny bann problenm dan sa lemonn ki pe ganny dirize par Satan. (1 Zan 5:19) Me ou kapab asire ki Zeova i konnen ki ou pe pas ladan e i enterese avek ou. (Mat. 10:29-31; 1 Pyer 5:6, 7) An plis, Zeova i promet ou: “Mon pa pou zanmen kit ou e mon pa pou zanmen abandonn ou.” (Ebr. 13:5) Zeova i kapab ed ou pour andire menm ler i paret ki ou pa kapab fer nanryen pour amelyor ou sityasyon. Annou vwar ki mannyer Zeova ti ed Zozef pour andire.

9. Kwa ki montre ki Zeova ti pe ed Zozef ler Zozef ti dan prizon? (Zenez 39:21-23)

⁹ Lir Zenez 39:21-23. Menm pandan bann moman difisil ki Zozef ti pase dan prizon, Zeova ti fer Zozef reisi. Ki mannyer Zeova ti fer sa? Avek letan, Zozef ti ganny konfyans ek respe sa sef prizon zis parey i ti’n ganny konfyans ek respe Potifar. Pli tar, sef prizon ti met Zozef ansarz lezot prizonnyen. Anfet Labib i dir ki “sef prizon pa ti pe fatig li avek okenn keksoz ki ti anba responsabilite Zozef.” Aprezan Zozef ti annan en keksoz pour li konsantre lo la. I ti annan en travay pour li fer! Sa ti en sanzman drol. Ki mannyer en prizonnyen ki’n ganny akize konmkwa in esey vyol madanm en zofisye in kapab ganny en o pozisyon koumsa? I annan zis en leksplikasyon pour sa. Parey Zenez 39:23 i dir, “Zeova ti avek Zozef e Zeova ti fer li reisi dan tou sa ki i ti fer.”

10. Petet akoz Zozef pa ti santi ki i ti pe reisi dan tou sa ki i ti fer? Eksplike.

¹⁰ Esey imazinen ki mannyer Zozef ti santi. Eski ou krwar ki Zozef ti santi ki i ti’n reisi dan tou sa ki i ti fer apre ki i ti’n ganny akize pour bann keksoz ki i pa’n fer e ganny met dan prizon? Ki Zozef ti pli anvi? Eski i ti anvi ganny laprouvasyon sef prizon? I tre probab ki Zozef ti anvi ganny libere. Zozef ti demann en prizonnyen ki ti pe al ganny libere pour koz avek Faraon konsernan li pour ki i kapab sorti dan sa landrwa. (Zen. 40:14) Me sa zonm pa ti koz avek Faraon konsernan Zozef deswit. Sa ti fer ki Zozef ti reste dan prizon pour ankor de zan. (Zen. 40:23; 41:1, 14) Kantmenm sa, Zeova ti kontinyen fer Zozef reisi. Ki mannyer Zeova ti fer sa?

11. Ki abilite spesyal Zeova ti donn Zozef e ki mannyer sa ti ede pour akonpli lavolonte Zeova?

 ¹¹ Ler Zozef ti dan prizon, Zeova ti fer Faraon ganny de rev ki ti fatig li. Faraon ti vreman anvi konnen ki sinifikasyon sa bann rev. Ler lerwa ti aprann ki Zozef ti kapab enterpret rev, i ti fer al sers Zozef. Avek led Zeova, Zozef ti enterpret rev Faraon e i ti donn Faraon bann konsey ki ti enpresyonn Faraon. Ler Faraon ti vwar ki Zeova ti pe ed Zozef, i ti apwent Zozef konman administrater, setadir ki i ti ansarz sa ki annan pour fer avek manze. (Zen. 41:38, 41-44) Pli tar i ti annan en gran lafamin Lezip e dan pei Kanaan, sa landrwa kot fanmir Zozef ti pe reste. Zozef ti kapab sov son fanmir e sa i vedir ki i ti protez laliny desandans ki ti pou anmenn ver Mesi.

12. Dan ki fason Zeova ti fer Zozef reisi?

¹² Mazin bann keksoz ki ti arive dan lavi Zozef. Lekel ki ti fer Potifar remark Zozef, ki ti en senp lesklav? Lekel ki ti fer sef prizon tonm dakor avek Zozef, ki ti zis en prizonnyen? Lekel ki ti donn Faraon bann rev ki ti fatig li e lekel ki ti donn Zozef abilite pour enterpret sa bann rev? Lekel ki ti fer Faraon apwent Zozef konman administrater? (Zen. 45:5) I kler ki i ti Zeova ki ti pe fer Zozef reisi dan tou sa ki i ti fer. Menm si bann frer Zozef ti anvi touy li, Zeova ti sanz sityasyon Zozef pour li kapab akonpli Son lavolonte.

13. Eski Zeova i entervenir dan tou sityasyon ki nou fer fas avek? Eksplike.

¹³ Ki nou aprann avek sa ki ti arive dan lavi Zozef? Eski Zeova i entervenir dan tou sityasyon ki nou fer fas avek? Eski Zeova i kontrol tou keksoz dan nou lavi pour ki bann move keksoz ki arive i ariv pour en bon rezon? Non, Labib pa dir sa. (Ekle. 8:9; 9:11) Me sa ki nou konnen i ki: Ler nou fer fas avek en problenm, Zeova i konnen ki nou pe pas ladan e i tann nou ler nou demann li led. (Ps. 34:15; 55:22; Iza. 59:1) Me  plis ki sa, Zeova i kapab ed nou pour reisi ler nou pas dan bann problenm. Ki mannyer i fer sa?

14. Ki mannyer Zeova i ed nou dan bann moman difisil?

¹⁴ En fason ki Zeova i ed nou i par rekonfort nou e ankouraz nou e souvandfwa i fer sa dan sa bon moman. (2 Kor. 1:3, 4) Sanmenm ki ti arive avek Eziz, en frer ki reste Turkmenistan, ki ti ganny kondannen de-z-an prizon akoz son lafwa. Eziz i dir: “Sa zour bomaten avan ki mon ti pas ankour, en frer ti montre mwan Izai 30:15 ki dir: ‘Zot pou annan lafors si zot reste kalm e annan konfyans.’ Sa verse i toultan ed mwan pour reste kalm e pour depan lo Zeova pour tou keksoz. Ler mon ti medit lo sa verse, sa ti ed mwan pandan sa letan ki mon ti dan prizon.” Eski ou mazin en moman dan ou lavi kot Zeova ti ed ou par rekonfort e ankouraz ou dan sa moman kot ou ti pli bezwen?

15-16. Ki ou aprann avek leksperyans Tori?

¹⁵ Souvandfwa nou pa realize ki mannyer Zeova in ed nou ziska ler ki sa problenm in fini. Sanmenm sa ki en ser ki apel Tori ti realize. Son garson, Mason ti mor apre ki i ti’n soufer avek kanser pour si-z-an. Tori ti vreman sagren. I dir: “Mon pa krwar ki konman en manman i annan en keksoz pli fermal ki mwan, mon’n pas ladan.” Tori i osi dir: “Mon asire ki lezot paran pour dakor ki i pli difisil pour vwar ou zanfan soufer ki pour ou menm ou soufer.”

¹⁶ Menm si sa sityasyon ti vreman difisil, pli tar Tori ti reflesir lo fason ki Zeova ti ed li andire. Tori i dir: “Ler mon  mazin sa letan kot mon garson ti malad, mon kapab vwar ki mannyer Zeova ti ed mwan. Par egzanp, menm ler Mason ti sitan malad ki i pa ti kapab vwar bann viziter, bann frer ek ser ti dray pour de erdtan pour zot vin kot lopital. I ti toultan annan en dimoun pe espere deor e ki pare pour donn nou sipor. Osi, bann frer ek ser ti donn nou tou sa ki nou ti bezwen. Menm ler i ti vreman difisil, nou ti toultan annan sa ki nou ti bezwen.” Zeova ti donn Tori sa ki i ti bezwen pour andire e i ti fer menm parey pour Mason.​—Vwar sa bwat “ Zeova ti donn nou egzakteman sa ki nou ti bezwen.”

17-18. Kwa ki pou ed nou vwar e pour apresye led ki Zeova i donn nou dan bann moman difisil? (Psonm 40:5)

¹⁷ Lir Psonm 40:5. Ler en dimoun pe fer en hike lo en montanny, son lobzektif i pour ariv anler lo sa montanny. Me pandan ki i pe monte, i annan bann landrwa kot i kapab arete e admir bann zoli keksoz ki i vwar. Dan sa menm fason, pran letan pour arete e reflesir lo ki mannyer Zeova pe fer ou reisi menm ler ou pe fer fas avek problenm. Toulezour a lafen lazournen, demann ou lekor: ‘Ki mannyer Zeova in beni mwan ozordi? Menm si sa problenm i ankor la, ki mannyer Zeova pe ed mwan pour andire?’ Esey vwar omwen en keksoz ki Zeova in fer ki’n fer ou reisi.

¹⁸ I kapab ki ou pe priye pour ou problenm fini. Sa i normal e i en bon keksoz pour fer. (Fili. 4:6) Me nou devret osi vwar bann bon keksoz ki Zeova pe fer pour nou la konmela. Apre tou, Zeova in promet ki i pou donn nou lafors e ed nou pour andire. Alor ou devret toultan rekonesan ki Zeova pe siport ou. Sa pou fer ou vwar ki mannyer Zeova pe ed ou reisi parey i ti ed Zozef reisi menm dan bann moman difisil.​—Zen. 41:51, 52.