1, 2. (1) ¿Kʼãrẽa kʼawuapanʉ bedʼea zroma ũdudaita? (2) ¿Kʼãrẽta kʼawuadai naʉ̃ artikulodera?

 DAYIRÃRA Jeowa pʉwʉrʉ baera kʼawuapanʉ bedʼea zromara erpanaita akʉza kʼawuapanʉ Daizeze Bedʼeaba jarabʉra wãrĩnuta: «Ne biodʼe zuburiai bara dazhi edʼa wãĩrã Daizezeta Nokʼota bʼʉ maẽ» (Hech. 14:22). Akʉza kʼawuapanʉ idi dayirãba bedʼea zroma erpanʉra jõita ẽjũã kĩrãwãreãnẽbʉrʉ, mamara «beira wuara neẽbayi so zʉbʉriaira, zʉbʉria bedʼeaira neẽbayi pʉa nãã ũdubadara neẽbayi» (Apoc. 21:4).

² Jeowabara iduaribibʉ dayirãra zʉbʉriamarẽã, mamina iya kʼarebabʉ maʉ̃ awuantaita. Apostol Pabloba kristianora Romanebemara bʉsi iyita akʉza mebẽrã sãwũã zʉbʉria berabarida ʉ̃rʉ, mõbe naʉ̃ta jarasi: «Ẽdrʉsida naʉ̃ bedʼea zroma jõmaʉ̃nẽba» (Rom. 8:35-37). Naʉ̃ba jarakĩrãbʉ Jeowaba kʼarebaseabʉta bia wãmarẽã bedʼea zroma ũdubʉmina. Akʉdaya sãwũã Jeowaba kʼarebasita Joséra akʉza bʉta sãwũã kʼarebaseabʉta.

3. ¿Sãwũã José bebʉra atiaʉde awuara besi?

³ Jacobʼbara ũdubisi mejãcha kãgabʉta Joséra (Gén. 37:3, 4). Maʉ̃ta José mebẽrãbara kãga ẽ basi. Maʉ̃ kʼarea ãyara Joséra ne nẽdobari Madiánʼnebemara  nẽdo bʉesida. Maʉ̃ra ne nẽdomiarabara jĩga edesida Egiptoma, mama nẽdo bʉesida Potifarʼa, maʉ̃ra paraon gorogorora nokʼobasi. Mawũã José bebʉra atiaʉde awuara besi. Ewari abaʉde iyi dedabasi, nrʉemane Egipto nezokʼabasi (Gén. 39:1).

4. ¿Kʼãrẽba zʉbʉriabiseabʉ dayirãra José kĩrãkʼa?

⁴ Daizeze Bedʼeabara jarabʉ: «Jõmaʉ̃ta edaʉde ewari kayirua erpanʉ» (Ecl. 9:11). Edaʉde dayirãbara ũdupanʉ bedʼea zroma jõmaʉ̃ba ũdupanʉta (1 Cor. 10:13). Mawũã ẽ bʉrʉ zʉbʉriapanʉ dayirãra Jesu kʼaidubema baera. Bari jaraita dayirã pẽwãpanʉ, dayirã ʉ̃rʉ ipidapanʉ (2 Tim. 3:12). Dayirãra badu bedʼea zroma erpanʉbʉsida Jeowaba kʼarebaseabʉ bia wãmarẽã. ¿Sãwũã kʼarebasi Jeowabara Joséra?

5. ¿Kʼãrẽta krĩchasi Potifarbara José berabaridadebara? (Génesis 39:2-6).

⁵ (Akʉra Génesis 39:2-6). Potifarba ũdusi Joséra buru biata akʉza trajamiata. Adewara Potifarbara kʼawuabasi Jeowaba kʼarebabʉ baera «iya jõma obʉra bia berabaribibasita». b Portifarbara iyi kʼarebabari babisi akʉza jarasi iyi dedabʉta jõma akʉmarẽã. ¿Kʼãrẽ biata ũdusi Potifarbara? Iyira bia wãsi.

6. ¿Joséra sãwũã sentibasibaibara iya bedʼea zroma erbada kʼarea?

⁶ Krĩchara José sãwũã sentibadata. ¿Kʼãrẽta berabarimarẽã kãgabasi iyara? ¿Kãgabasika Potifarba iyita bia akʉmarẽã? Mawũã ẽ. Joséra ewarade bakĩrãbasibaibara yi zezema wãita. Iyira bia wãsimina wabida Potifar yi nezokʼabasi akʉza Potifarʼra Daizeze Jeowa yiwidʼi ẽ basi. Jeowabara Joséra Potifarʼra ẽdrʉbi ẽ basi maʉ̃ba iyara wuabʉrʉ bedʼea zromata ũdusi.

7. ¿Sãwũã wuabʉrʉ bedʼea zroma ũdusi Josébara? (Génesis 39:14, 15).

⁷ Génesis kapitulo 39ba jarabʉ kĩrãkʼa, Potifar kimabara kãgasi Joséta akʉza iyiʉ̃me kʼãĩmarẽã kãgabasi.  Mamina Joséba ĩjã ẽ basi baera iya jarabʉta, kĩrʉ kʼãrãpe jarasi Josébara iyira wawa okĩrãbasita (akʉra Génesis 39:14, 15). Potifarba maʉ̃ta kʼawuaside Joséra karselde bʉesi. Mama poaga biobayeda besi (Gén. 39:19, 20). ¿Sãwũã basiba maʉ̃ karseldera? Joséba bedʼea ebreode karsel jaradabara, jarakĩrãbasi pozota. Mawũã ũdubita iyibʉmae audura paisosoanʉmʉ kĩrãkʼabasita akʉza iya kʼãrẽ nebia jʉ̃ã ẽãta (Gén. 40:15; nota). Adewara Daizeze Bedʼeabara jarabʉ iyi ochidauta akʉza juwata kadenaba tajʉ̃basita (Sal. 105:17, 18). Josébara wuabʉrʉ bedʼea zromata ũdu wãsi iyira nokʼo nezokʼa badata tẽã karselde eda basi.

8. ¿Kʼãrẽ ʉ̃rʉ ĩjãibara dayirãba bedʼea zroma erbʉta wua wãbʉrʉ?

⁸ ¿Bʉ mejãcha yiwidʼibʉmina bʉa bedʼea zroma erbʉra wuabʉrʉ wãbarika? Maʉ̃ra mawũã berabariseabʉ. Naʉ̃ drʉara Diaruba zokʼabʉ baera, Jeowabara idi dayirãba bedʼea zroma erbʉdeba ẽdrʉbibe ẽ (1 Juan 5:19). Mawũãsidu naʉ̃ta ĩjãra, Jeowabara biʼia kʼawuabʉ bʉa kʼãrẽ bedʼea zroma erbʉra akʉza bʉta krĩchabʉ (Mat. 10:29-31; 1 Ped. 5:6, 7). Adewara Jeowaba jarabʉ: «Mʉ̃a bʉra amae ẽ bayi akʉza ewari jõmaʉ̃nẽ bʉ kʼawabayi» (Heb. 13:5). Dayirãba bedʼea zroma erbʉde krĩchabʉde samare ẽdrʉi neẽãta, maʉ̃ne Jeowaba kʼarebayi awuantamarẽã. Atia akʉdayi José sãwũã mawũã berabarisita.

9. ¿Kʼãrẽba ũdubisi Jeowara Joséʉ̃mebasita iyi karseldebaside? (Génesis 39:21-23).

⁹ (Akʉra Génesis 39:21-23). José karseldebasimina Jeowaba kʼarebasi iyi bia wãmarẽã. ¿Sãwũã kʼarebasi? Ewari berabari wãne karseldebema nokoʼa yi ũdukʼawuabisi akʉza iyi ʉ̃rʉ ĩjãbisi, Potifarba iyi ʉ̃rʉ ĩjãna kĩrãkʼa. Maʉ̃ kʼarea karseldebema nokʼobara Joséʼa akʉbisi wuabema ẽbẽra karselde bʉrata. Daizeze Bedʼeabara jarabʉ karseldebema nokʼora krĩcha zroma oẽ basita Joséba akʉbʉ baera wuabema ẽbẽra karselde bʉrata. Mawũẽra Josébara kʼãrẽ ʉ̃rʉ krĩchaita erbasi, iya kʼãrẽ oita erbasi baera. ¿Sãwũã trajo biata diasida ẽbẽra abaʉʼa nokʼo kimata wawa osi adapeadara? Maʉ̃ra bia berabarisi Génesis 39:23​ba jarabʉ kʼarea, «Jeowara Joséʉ̃mebasi baera akʉza Jeowabara jõma bia wãbisi».

10. Jara ũrĩbira kʼãrẽa Joséra krĩcha ẽ basita iyira karseldera bia wãta

¹⁰ Akʉza jẽda krĩchara José sãwũã sentibada ʉ̃rʉ. Iyi ʉ̃rʉ sewa nebʉra jarada kʼãrãpe karselde eda bʉeda tẽãra, ¿krĩchabasika jõma bia wãita? ¿Kʼãrẽta audre kãgabasi Josébara, karseldebema nokʼoba iyita bia akʉmarẽã, mawũã ẽ bʉrʉ iyita karseldeba ẽdrʉbimarẽã? Josébara audre kãgabasibaibara iyita karseldeba ẽdrʉbidamarẽã, maʉ̃ kʼarea ẽbẽra aba karselde bʉa jarasi paraonʼa iyi ʉ̃rʉ bedʼeamarẽã, mawũã iyita karseldeba ẽdrʉbimarẽã (Gén. 40:14). Mamina naʉ̃ ẽbẽrarã mesera bedʼea ẽ basi paraonʼa iyi ʉ̃rʉ, maʉ̃ kʼarea iyira poaga ũme berabarisidu wabida karsel edabasi (Gén. 40:23; 41:1, 14). Mawũãsidu Jeowabara kʼarebasi Joséra bia wãmarẽã. ¿Sãwũã?

11. ¿Jeowabara kʼãrẽ nebiata diasi Joséʼa akʉza naʉ̃ba sãwũã kʼarebasi Jeowaba oita krĩchabʉ aripe berabarimarẽã?

 ¹¹ José wabida karselde bʉeda Jeowaba osi Egipto nokʼoba kʼãĩmokʼãrã ũme ũdumarẽã. Maʉ̃ kʼarea paraonbara kʼawuakĩrãbasi kʼãrẽta jarakĩrãbasita maʉ̃ kʼãĩmokʼãrãba. Nokʼoba kʼawuaside Joséba kʼãĩmokʼãrã jara ũrĩbiseabʉta iyita trʉ̃ bʉesi. Jeowaba kʼarebasi Joséba kʼãĩmokʼãrãta jara ũrĩbimarẽã, maʉ̃ta paraonbara ũdubʉrʉde, jidasi iyi yiko akʉbari bamarẽã Egiptode (Gén. 41:38, 41-44). Maʉ̃ tẽã jarraba zromata zesi Egiptode akʉza Canaánʼnebida, mamara basi José mebẽrãta. Idibʉrʉ Josébara kʼarebaseabasi yi mebẽrãra akʉza mawũã kʼarebaseabasi Dayirã ẽdrʉbibari mebẽrã samaʉ̃ba zeita adua ẽ marẽã.

12. ¿Sãwũã osi Jeowabara Joséra bia wãmarẽã?

¹² Krĩchara José sãwũã berabaridata. ¿Kʼaiba osi Potifarba Joséta akʉmarẽã iyira nezokʼabasimina? ¿Kʼaiba osi karseldebema nokʼota Joséare bamarẽã iyi karseldebaside? ¿Kʼaiba osi paraonta kʼãĩmokʼãrãmarẽã akʉza Joséba maʉ̃ kʼãĩmokʼãrãta jara ũrĩbimarẽã? ¿Kʼaiba osi Joséra Egiptode yiko akʉbari bamarẽã? (Gén. 45:5). Jeowaba kʼarebasi jõma Joséba obadara bia wãmarẽã. José mebẽrãba iyita beakĩrãbasimina, Jeowaba iyi bebʉra awuara babisi. Mawũã Jeowaba kãgabʉta omarẽã.

13. ¿Dayirã nekʼãrẽ berabaribʉra Jeowaba jõma obʉka? Jara ũrĩbira.

¹³ ¿Kʼãrẽta kʼawuapanʉ José yizadeba? ¿Dayirãba nekʼãrẽ obʉra Jeowaba jõma obibʉka? ¿Dayirã zʉbʉria berabaribʉra Jeowaba mawũã obʉka tẽãne dayirãta bia bamarẽã? Daizeze Bedʼeabara mawũã obʉta jara ẽ (Ecl. 8:9; 9:11). Mamina dayirãbara kʼawuapanʉ dayirã bedʼea zromane berabaribʉra Jeowaba akʉbʉta akʉza iyaʼa kʼareba widibʉdade kʼarebabʉta (Sal.  34:15; 55:22; Is. 59:1). Adewara Jeowaba kʼarebaseabʉ dayirãba bedʼea zroma awuantadamarẽã. ¿Sãwũã?

14. ¿Sãwũã kʼarebabʉ Jeowabara dayirãba bedʼea zroma erbʉ ewaride?

¹⁴ Jeowabara dayirã zowaĩnĩgʉa diabʉ dayirãba nesidabʉ ewaride (2 Cor. 1:3, 4). Mawũã berabarisi mebẽã Ezizʼra, iyira Turkmenistánʼnebema, poaga ũmebayeda karselde eda bʉesida Jeowata ĩjãbʉ kʼarea. Iya jarasi: «Diapeda juez nãã edebʉdade mebẽã abaʉba mʉ̃a ũdubisi Isaías 30:15​ba jarabʉta: ‹marara zarea panañi aduʼapanʉbʉrʉ akʉza ĩjãbʉta ũdubidara›. Naʉ̃ testoba kʼarebasi mʉ̃ aduʼa bʼaita akʉza Jeowa ʉ̃rʉ ewari jõmaʉ̃nẽ ĩjã bʼaita. Naʉ̃ testo ʉ̃rʉ bia krĩchaiba biode kʼarebasi mʉ̃ karselde eda baside». ¿Bʉara krĩchaseabʉka Jeowaba bʉaʼa so zarea diadata bʉa nesidabasi ewaride?

15, 16. ¿Kʼãrẽta kʼawuabʉ Tori yizadeba?

¹⁵ Dayirã sãwũã bedʼea zromane berabaridata jẽda krĩchabʉrʉde akʉpanʉ Jeowaba sãwũã kʼarebadata. Mebẽã Toriba jarabʉ naʉ̃ra wãrĩnuta. Yi wau Mason 6 poagabayeda kayabasi kanserba, maʉ̃ta tẽã beisi. Maʉ̃ kʼarea Torira mejãcha sopʉabasi, iya jarabʉ: «Mʉ̃ wũãwũã beida kʼarea mʉ̃ra arigʉ sopʉabʉ, kʼawua ẽ naʉ̃ ewari sãwũãnʉmʉta maʉ̃ kʼarea krĩcha zroma obʉ baera». Akʉza iya jarabʉ: «Yibariraba ãyi wũãwũã beibʉ ũduira audre pʉ dayi zʉbʉriabʉira».

¹⁶ Tori mawũã berabarida kʼarea mejãcha zʉbʉriasimina iya tẽã krĩchasi Jeowaba sãwũã kʼarebasita. Bari jaraita: «Mʉ̃a ũdusi mʉ̃ wũãwũã kayabasieda  sãwũã Jeowaba mʉ̃ kʼarebasita. Masonʼra mejãcha kayabʉ baera iyidura akʉ jʉ̃ẽbeda ẽ basi. Mawũãsidu mebẽrãra zarea osida ora ũme wãibarabasimina ospitalʼidu jʉ̃ẽita. Maʉ̃ba ewari jõmaʉ̃nẽbasi mebẽrãra dai kʼarebakĩrapanʉta, mawũã daiba bedʼea zroma mejãcha erpanasimina jõma erbasi daiba nesidapanʉra». Jeowabara Toriba zarea nesidabadara diasi akʉza Masonʼabida diasi (akʉra rekuadro « Jeowabara diasi daiba nesidabʉta»).

17, 18. ¿Kʼãrẽba kʼarebayi kʼawuaita Jeowaba kʼarebabʉta akʉza iyaʼa biga diaita dayirã bedʼea zroma erbʉde? (Salmo 40:5).

¹⁷ (Akʉra Salmo 40:5). Krĩchara katuma wãrezemiarata, ãya mawũã obʉdera, obʉ katuma kĩbʉidu jʉ̃ẽita. Ãyi mawũã katuma kĩbʉeda wãenara ode akʉeda wã nekʼãrẽ kĩrãwãreãbʉta. Abarika ewari jʉrʉibara krĩchaita Jeowaba sãwũã kʼareba zebʉrʉta bʉ bedʼea zroma erbʉde. Ewari kibʉrʉza bʉyikʉza widira: «¿Mʉ̃aʼa sãwũã ũdusi Jeowabara idi mʉ̃ kʼarebabʉrʉta? ¿Mʉ̃ bedʼea zroma erbʉmina Jeowabara sãwũã kʼarebabʉ maʉ̃ bedʼea zroma awuantaita?». Zarea ora akʉita sãwũã kʼarebasita Jeowabara.

¹⁸ Bʉra yiwidʼibʉbaibara Jeowaʼa, iya kʼarebamarẽã bʉa bedʼea zroma erbʉta taʉbimarẽã. Bʉa widibʉra kayirua ẽ (Filip. 4:6). Mamina maʉ̃ daucha akʉdaibara Jeowaba dayirãʼa kʼãrẽ nebia dianʉmʉta. Jeowaba dayirã jarabʉ kʼarebaita bedʼea zroma zebʉrʉde awuantadamarẽã. Maʉ̃ kʼarea ewari jõmaʉ̃nẽ biga diaibara Jeowaʼa iya kʼarebabʉ baera. Mawũã obʉbʉrʉ ũduyi Jeowaba kʼarebabʉta mejãcha zʉbʉriabʉmina, José kʼarebada kĩrãkʼa (Gén. 41:51, 52).