1, 2. a) ¿Chucoch la cujilʌch chaʼan mi caj lac ñusan wocol tac? b) ¿Chuqui mi caj laj qʼuel ti ili estudio?

 JIÑI i wiñiconbʌla Jehová la cujil chaʼan mucʼʌch caj lac ñusan wocol come jiñi Biblia miʼ yʌl: «Yom mi lac ñusan cabʌl wocol chaʼan mi la cochel tiʼ Yumʌntel Dios» (Hech. 14:22). Cheʼ jaʼel, la cujil chaʼan an lac wocol tac yaʼto bʌ mi caj i junyajl tojʼan cheʼ bʌ mi lac chumtʌl yaʼ ti tsijiʼ bʌ pañimil (mulawil), baqui «maʼañix miʼ cajel chʌmel, mi muqʼuicto i cajel chʼijyemlel, uqʼuel yicʼot cʼuxyajiyel» (Apoc. 21:4).

² Jehová maʼañic miʼ mʌctan chaʼan maʼañic mi lac ñusan wocol tac, pero mucʼʌch i coltañonla lac lʌtʼ. Laʼcu lac ñaʼtan jiñi tsaʼ bʌ i sube jiñi apóstol Pablo jiñi xñoptʼañob añoʼ bʌ ti Roma. Cheʼ bʌ Pablo tsaʼix ujti i yʌl tsaʼ bʌ i ñusa yicʼot jiñi hermanojob, tiʼ tsʼijbubeyob: «Wocolix i yʌlʌ jiñi tsaʼ bʌ i cʼuxbiyonla, tsaʼ lac mʌlbe pejtelel iliyi» (Rom. 8:35-37). Ili yom i yʌl chaʼan Jehová mucʼʌch i mejlel i coltañonla chaʼan wen miʼ loqʼuel chuqui mi lac mel anquese woli (choncol) lac ñusan wocol. Laʼ laj qʼuel chuqui tsiʼ mele (chaʼle) Jehová chaʼan miʼ coltan José chaʼan weñʌch miʼ loqʼuel pejtelel chuqui tsiʼ mele yicʼot bajcheʼ miʼ mejlel i coltañonla ili ora.

3. ¿Bajcheʼ tsaʼ waʼ qʼuextʌyi i cuxtʌlel José?

³ Wen tsiquil chaʼan Jacob tsiʼ wen cʼuxbi José, jiñi i yalobil (Gn. 37:3, 4). Jin chaʼan, jiñi i yuscuñob tsaʼ caji i tsʼaʼleñob. I tsaʼ cʼoti i yorajlel tsiʼ chombeyob jiñi madianitajob. Ili wiñicob tsiʼ pʌyʌyob majlel José ti Egipto, wen ñajt bʌ an. I cheʼ bʌ tsaʼ cʼotiyob yaʼi, tsiʼ chombeyob Potifar, i yum bʌ i soldadojob faraón. Ti orajach tsaʼ qʼuextʌyi i cuxtʌlel José. Ti ñaxan miʼ wen cʼuxbintel tiʼ tat, i wʌle juntiquilix xyaj eʼtel (troñel) ti Egipto (Gn. 39:1).

4. ¿Chuqui tac ti wocol miʼ mejlel lac ñusan cheʼ bajcheʼ José?

⁴ Jiñi Biblia miʼ yʌl: «Maʼanic majqui yujil baqui ora mi caj i chujquel ti wocol» (Ec. 9:11, 12). An i tajol mi lac ñusan jiñi muʼ bʌ i ñusan yambʌ lac piʼʌlob (1 Cor. 10:13). O tajol mi lac wajlentel, mi lac tsʼaʼlentel o mi lac ticʼlʌntel tiʼ caj xcʌntʼañonla i chaʼan Jesús (2 Tim. 3:12). Pero Jehová mucʼʌch i mejlel i coltañonla. Laʼ laj qʼuel bajcheʼ tsiʼ colta José.

5. ¿Chuqui tsiʼ qʼuele Potifar? (Génesis 39:2-6).

⁵ (Pejcan Génesis 39:2-6). Potifar tsiʼ qʼuele chaʼan José juntiquil wem bʌ wiñic yicʼot chaʼan wen yujil eʼtel. I tsaʼʌch i ñaʼta chucoch cheʼ yilal bajcheʼ jiñi. Tsiʼ qʼuele chaʼan «an lac Yum yicʼot. Lac Yum tsiʼ wen colta tiʼ pejtelel chuqui tsiʼ mele». b Ti wiʼil, Potifar tsiʼ yotsa bajcheʼ i yaj coltaya i tsiʼ yʌqʼue tiʼ wenta i yotot. Jin chaʼan Potifar tsiʼ wen taja bendición.

6. ¿Bajcheʼ yubil tsiʼ yubi i bʌ José?

⁶ Laʼ lac ñop lac ñaʼtan bajcheʼ yubil tsiʼ yubi i bʌ José. ¿Chuqui jiñi ñumen yom bʌ? ¿Yom ba i yʌcʼ i bʌ ti cʌjñel ti Potifar chaʼan miʼ yʌqʼuentel i majtan? Tajol jiñi ñumen yom bʌ jiñʌch cheʼ miʼ locʼsʌntel yaʼ ti cárcel i miʼ chaʼ sujtel majlel tiʼ yotot i papá. Anquese muqʼuic i yʌqʼuentel cabʌl ñuc bʌ i yeʼtel, bej xʼeʼtelʌch i chaʼan juntiquil wiñic muʼ bʌ i chʼujutesan cabʌl dios. Jehová maʼañic tsiʼ ñijcʌbe i pusicʼal Potifar chaʼan miʼ  locʼsan José ti cárcel. I muʼto caj i ñumen tsʌtsʼan jiñi i wocol.

7. ¿Chucoch miʼ mejlel la cʌl chaʼan tsaʼʌch ñumen tsʌtsʼa i wocol José? (Génesis 39:14, 15).

⁷ Cheʼ bajcheʼ miʼ yʌl Génesis capítulo 39, jiñi i yijñam Potifar tsiʼ mulaj José i mach junsujtelic jach tiʼ sube chaʼan miʼ piʼlen. Pero José maʼañic tsiʼ jacʼbe i tʼan. Tiʼ caj jiñi, jiñi xʼixic tsaʼ wen michʼa i tsiʼ yʌlʌ chaʼan José tsiʼ ñopo i ticʼlan (pejcan Génesis 39:14, 15). Cheʼ bʌ Potifar tsiʼ yubi, tsiʼ yotsa José ti cárcel (Gn. 39:19, 20). ¿Bajcheʼ yilal tsiʼ ñusa yaʼi? Jiñi tʼan hebreo tsaʼ bʌ i cʼʌñʌ José chaʼan miʼ yʌl mʌjquibʌl miʼ mejlel ti chaʼlentel ti traducir bajcheʼ «chʼen» o «cisterna». Iliyi miʼ mejlel i yʌcʼ ti ñaʼtʌntel chaʼan icʼyochʼan yaʼ baqui tsaʼ otsʌnti (Gn. 40:15, nota, TNM). Cheʼ jaʼel, jiñi Biblia miʼ yʌl chaʼan tsiʼ cʌchʌyob ti cadena (Sal. 105:17, 18). Tsaʼto i ñumen ñusa wocol come cheʼix tsaʼ caji ti mejlel bajcheʼ jiñi yambʌ xcʌjchelob.

8. ¿Chuqui miʼ mejlel lac ñop anquese miʼ ñumen tsʌtsʼan lac wocol?

⁸ ¿Am ba lac ñusa jumpʼejl wocol tsaʼ bʌ caji ti ñumen tsʌtsʼan majlel anquese tsaʼ lac wen mele oración? Mucʼʌch i mejlel ti ujtel jiñi. Jehová maʼañic miʼ mʌctan chaʼan maʼañic mi lac ñusan wocol tac tiʼ pañimil Satanás (1 Juan 5:19). Pero miʼ mejlel lac ñop chaʼan jiñi lac Tat yujil pejtelel chuqui mi lac chaʼlen yicʼot chaʼan mucʼʌch i ñaʼtañonla (Mat. 10:29-31; 1 Ped. 5:6, 7). Cheʼ jaʼel miʼ subeñonla: «Maʼañic baʼ ora mi caj j cʌyet i maʼañic baʼ ora mi caj j cʌy j coltañet» (Heb. 13:5). Tiʼ coltaya Jehová miʼ mejlel laj cuch jiñi wocol tac maʼañic bʌ mi caj i tojʼan yilal. Jiñʌch tsaʼ bʌ ujti tiʼ tojlel José.

9. ¿Bajcheʼ la cujil chaʼan Jehová maʼañic tsiʼ cʌyʌ José cheʼ bʌ yaʼan ti cárcel? (Génesis 39:21-23).

⁹ (Pejcan Génesis 39:21-23). Jehová tsaʼʌch i bej colta José yaʼ ti cárcel. ¿Chuqui tsaʼ ujti? Cheʼ bajcheʼ tsaʼ ujti yicʼot Potifar, jiñi jefe yaʼ ti cárcel tsiʼ mulaj bajcheʼ yilal José i tsiʼ yʌqʼue tiʼ wenta jiñi yambʌ xcʌjchelob. Jiñi Biblia miʼ yʌl chaʼan «jini xcʌnta mʌjquibʌl maʼanix tsiʼ chʌn qʼuele chuqui tac an tiʼ wenta José». Cheʼ bajcheʼ jiñi, José tsiʼ yʌcʼʌ tiʼ ñaʼtʌbal chuqui wen tac bʌ mi caj i mel. ¿Mach ba muqʼuic i toj sajtel lac pusicʼal cheʼ juntiquil wiñic tsaʼ bʌ ajli chaʼan tsiʼ ñopo i ticʼlʌben i yijñam juntiquil xyaj eʼtel yaʼ ti palacio tsaʼ aqʼuenti jumpʼejl ñuc bʌ i yeʼtel? Cheʼʌch tsaʼ ujti come Génesis 39:23 miʼ yʌl chaʼan «yaʼan lac Yum yicʼot. Tsiʼ yʌcʼʌ ti loqʼuel ti utsʼat pejtel chuqui tsiʼ mele José».

10. ¿Chucoch tajol José tsiʼ ñaʼta chaʼan mach pejtelelic chuqui miʼ mel wen miʼ loqʼuel?

¹⁰ Laʼcu lac chaʼ ñaʼtan jiñi woli (yʌquel) bʌ i ñusan José. ¿Weñʌch ba miʼ loqʼuel pejtelel chuqui miʼ mel miʼ yubin cheʼ tsaʼ otsʌnti ti cárcel tiʼ caj tsaʼ jopʼbenti i mul?, ¿chuqui jiñi ñumen yom bʌ José?, ¿jimba chaʼan wen miʼ qʼuejlel ti jiñi jefe yaʼ ti cárcel? Tajol jiñi yom bʌ jiñʌch cheʼ miʼ locʼsʌntel ti jiñi cárcel. Tsaʼto i cʼajtibe juntiquil wiñic muqʼuix bʌ caj i loqʼuel yaʼ ti cárcel chaʼan miʼ suben faraón chaʼan miʼ locʼsan ti cárcel jaʼel (Gn. 40:14). Pero jiñi wiñic maʼañic tiʼ seb sube faraón, José tsaʼto i chaʼ ñusa chaʼpʼejl jab yaʼ ti cárcel (Gn. 40:23; 41:1, 14). Pero weñʌch tsaʼ ajñi come Jehová tsiʼ bej colta. ¿Bajcheʼ an jiñi?

11. ¿Chuqui tsaʼ mejli i mel José tiʼ coltaya Jehová, i bajcheʼ tsiʼ colta iliyi chaʼan miʼ tsʼʌctiyel jiñi ñaʼtʌbil bʌ i chaʼan Jehová?

¹¹ Cheʼ bʌ José yaʼan ti cárcel, Jehová an  chuqui chaʼchajp tsiʼ yʌqʼue i ñajlen jiñi rey ti Egipto. Jiñi faraón waʼ yom jax i ñaʼtan chuqui yom i yʌl jiñi i ñajal. Jin chaʼan, cheʼ bʌ tsiʼ yubi chaʼan José miʼ mejlel i tsictesʌben i sujmlel jiñi ñajal tac, tsiʼ choco ti pʌjyel. Jehová tsiʼ colta José chaʼan miʼ tsictesan i sujmlel jiñi ñajal yicʼot chaʼan miʼ yʌl chuqui yom miʼ mejlel. Iliyi tsiʼ wen mulaj faraón. Cheʼ bʌ tsiʼ qʼuele chaʼan Jehová woliʼ coltan, tsiʼ yʌqʼue tiʼ wenta chaʼan miʼ qʼuel jiñi bʌlñʌcʼʌl tac ti Egipto (Gn. 41:38, 41-44). Ti wiʼil, tsaʼ caji wiʼñal ti Egipto yicʼot ti Canaán, baqui chumul jiñi i familia José. José an ñuc bʌ i yeʼtel, jin chaʼan tsaʼʌch mejli i coltan jiñi i familia, tsaʼ bʌ sujtiyob tiʼ ñojteʼelob jiñi Mesías.

12. ¿Chuqui tsiʼ mele Jehová chaʼan wen miʼ loqʼuel pejtelel chuqui miʼ mel José?

¹² Laʼcu lac ñaʼtan pejtelel tsaʼ bʌ ujti tiʼ tojlel José. ¿Majqui tsiʼ yʌcʼʌ chaʼan Potifar miʼ yʌqʼuen tiʼ wenta i yotot cheʼ bʌ juntiquil jach xyaj eʼtel? ¿Majqui tsiʼ yʌcʼʌ chaʼan jiñi jefe yaʼ ti cárcel miʼ yʌqʼuen tiʼ wenta jiñi yambʌ xcʌjchelob? ¿Majqui tsiʼ yʌcʼʌ ti ñajal faraón i tsiʼ colta José chaʼan miʼ tsictesʌben jiñi i sujmlel? ¿Majqui tsiʼ colta chaʼan miʼ yʌqʼuentel tiʼ wenta i qʼuel jiñi bʌlñʌcʼʌl ti Egipto? (Gn. 45:5). Tsiquil chaʼan Jehová jiñʌch tsaʼ bʌ i colta José chaʼan wen miʼ loqʼuel pejtelel chuqui miʼ mel. Jehová tsiʼ cʼʌñʌ tsaʼ bʌ i meleyob jiñi i yerañob José chaʼan miʼ tsʼʌctesan jiñi ñaʼtʌbil bʌ i chaʼan.

13. ¿Muʼ ba i yotsan i bʌ Jehová ti jujunchajp chuqui mi lac ñusan?

¹³ Jiñi relato chaʼan bʌ José an chuqui junchajp ñuc bʌ i cʼʌjñibal miʼ pʌsbeñonla. ¿Muʼ ba i yotsan i bʌ Jehová ti jujunchajp chuqui mi lac ñusan? ¿Am ba chuqui miʼ mel chaʼan miʼ loqʼuel chuqui wem bʌ tiʼ pejtelel jiñi woli bʌ lac ñusan? Jiñi Biblia mach cheʼic miʼ yʌl (Ec. 8:9; 9:11, 12). Pero an junchajp muʼ bʌ i mejlel lac ñop: Jehová miʼ qʼuel jiñi muʼ bʌ lac ñusan i miʼ yubin cheʼ bʌ mi laj cʼajtiben i coltaya cheʼ bʌ mi lac ñusan jumpʼejl wocol (Sal. 34:15; 55:22; Is. 59:1). I cheʼ jaʼel miʼ coltañonla lac ñusan jiñi wocol tac. ¿Bajcheʼ miʼ mel?

14. ¿Bajcheʼ miʼ coltañonla Jehová cheʼ bʌ wocol jax mi lac ñusan?

 ¹⁴ Jehová miʼ tijicñesañonla yicʼot miʼ ñuqʼuesan lac pusicʼal cheʼ bʌ i cʼʌjñibal lac chaʼan (2 Cor. 1:3, 4). Cheʼʌch tsiʼ qʼuele jiñi hermano Eziz, ti Turkmenistán, tsaʼ bʌ otsʌnti chaʼpʼejl jab ti cárcel tiʼ caj i ñopbal. Miʼ yʌl: «Cheʼ bʌ miʼ cajel jiñi meloñel, juntiquil hermano tsiʼ pʌsbeyon muʼ bʌ i yʌl Isaías 30:15: ‹Ñopox c tʼan. Cheʼ jini ñʌchʼʌl mi caj a wajñel. Mi caj a taj a pʼʌtʌlel yicʼot i xucʼtilel a pusicʼal›. Iliyi tsiʼ coltayon chaʼan tijicña mi cajñel yicʼot chaʼan mic ñop ti Jehová. Cheʼ bʌ tsaʼ c wen ñaʼta ili versículo tsiʼ yʌqʼueyon c pʼʌtʌlel yaʼ ti cárcel». ¿Muʼ ba i tilel ti lac jol baqui ora tsiʼ ñuqʼuesa lac pusicʼal Jehová cheʼ bʌ ñumen i cʼʌjñibal lac chaʼan?

15, 16. ¿Chuqui mi laj cʌn tiʼ tojlel Tori?

¹⁵ An i tajol maʼañic mi lac taj laj qʼuel bajcheʼ tsiʼ coltayonla Jehová, jinto cheʼ tsaʼix ñumi jiñi wocol. Cheʼʌch tsiʼ qʼuele juntiquil hermana i cʼabaʼ Tori. Jiñi i yalobil i cʼabaʼ Mason tsaʼ chʌmi (sajti) tiʼ caj jumpʼejl cáncer tsaʼ bʌ i ticʼla 6 jab. Tori wen cʼux tsiʼ yubi. Miʼ yʌl: «Mi cʌl maʼañic chuqui yambʌ ñumen cʼux bʌ miʼ mejlel i ñusan juntiquil ñaʼʌl». I miʼ bej al: «Mi cʌl pejtelel jiñi tatʌlob cheʼʌch miʼ ñaʼtañob bajcheʼ joñon, chaʼan ñumen wen cheʼ joñon lojon mi lon c ñusan wocol i mach jiñic jiñi lon calobilob».

¹⁶ Anquese wen tsʌtsʌch tsaʼ bʌ i ñusa Tori, ti wiʼil tsaʼ caji i ñaʼtan pejtelel tsaʼ bʌ i mele Jehová chaʼan miʼ coltan. Miʼ yʌl: «Cheʼ bʌ mic ñaʼtan jiñi tsaʼ bʌ c ñusa, mic taj j qʼuel chaʼan Jehová tsaʼʌch i coltayon cheʼ bʌ cʼam jiñi calobil. Cʼajal c chaʼan chaʼan cheʼ bʌ Mason maʼañix i pʼʌtʌlel chaʼan miʼ julaʼtʌntel,  jiñi hermanojob tsiʼ chaʼleyob xʌmbal chaʼpʼejl hora chaʼan miʼ cʼotelob yaʼ ti hospital. Tiʼ pejtelel ora añʌch majqui yaʼan ti hospital chaʼan miʼ coltañon lojon. I cheʼ jaʼel, tsiʼ coltayoñob lon ti taqʼuin. Tsaʼʌch lon c taja jiñi i cʼʌjñibal bʌ lon c chaʼan cheʼ bʌ ñumen wocolto woli lon c ñusan». Jehová tsiʼ colta Tori yicʼot Mason chaʼan miʼ lʌtʼob jiñi wocol (qʼuele jiñi recuadro « Jehová tsiʼ coltayon lojon cheʼ bʌ i cʼʌjñibal lon c chaʼan»).

17, 18. ¿Chuqui mi caj i coltañonla laj qʼuel yicʼot la cʌqʼuen wocolix i yʌlʌ Jehová chaʼan jiñi i coltaya muʼ bʌ i yʌqʼueñonla cheʼ bʌ mi lac ñusan jumpʼejl wocol? (Salmo 40:5).

¹⁷ (Pejcan Salmo 40:5). Cheʼ bʌ an majqui miʼ letsel ti wits, baqui yom cʼotel yaʼʌch tiʼ pam jiñi wits. Pero yaʼ ti bij cabʌl chuqui utsʼatax bʌ miʼ mejlel waʼtʌl i qʼuel. Cheʼ jaʼel, miʼ mejlel lac chʌcʌ ñaʼtan bajcheʼ woliʼ coltañonla Jehová chaʼan mi lac ñusan jumpʼejl wocol. Cheʼ tiʼ yujtibal jiñi qʼuin, laʼ laj cʼajtiben lac bʌ: «¿Chuqui ti bendición tac tsiʼ yʌqʼueyon Jehová ili qʼuin? Anquese maxto jilemic jiñi wocol, ¿chuqui woliʼ mel chaʼan miʼ coltañon?». Ti jujumpʼejl qʼuin, laʼ lac ñop laj qʼuel jumpʼejl bendición tsaʼ bʌ i yʌqʼueyonla Jehová.

¹⁸ Weñʌch cheʼ mi laj cʼajtiben Jehová chaʼan miʼ jisan jiñi lac wocol (Filip. 4:6). Pero mach yomic miʼ ñajʌyel lac chaʼan jiñi bendición tac am bʌ lac chaʼan ili ora. Jehová miʼ yʌl chaʼan mi caj i yʌqʼueñonla lac pʼʌtʌlel yicʼot mi caj i coltañonla laj cuch. Jin chaʼan, laʼ lac chʌn aqʼuen wocolix i yʌlʌ chaʼan jiñi i coltaya. Mi mucʼʌch lac mel, mi caj laj qʼuel bajcheʼ miʼ coltañonla chaʼan wen miʼ loqʼuel chuqui mi lac mel cheʼ bʌ mi lac ñusan wocol tac, cheʼ bajcheʼ tsiʼ colta José (Gn. 41:51, 52).