1-2. (a) Saide a nai foondoo u taki tesi e miti u? (b) San wo luku aini a artikel ya?

 ENKE a foluku fu Yehofa u sabi taki tesi o go e miti u, bika Beibel taki: ‘Wo miti anga omen banowtu fosi u go aini a Kownukondee fu Gadu’ (Toli 14:22). U sabi taki a te a nyun goontapu doo fosi son sani naw miti u moo. A ten de ‘dede naw de moo, nawan sama o tyali moo, sama naw kee moo, pen seefi naw de moo’.​—Openb. 21:4.

² Yehofa nai kibii u fu tesi á miti u. Ma ai yeepi u fu holidoo te tesi e miti u. Luku san apostel Pawlesi taki fu den Kelesten fu Rome. A kai omen tesi di be e miti en anga den baala anga sisa ya, baka dati neen a taki: ‘Wo wini, bika a sama di lobi u, e holibaka gi u’ (Rom. 8:35-37). A sani ya e soi taki Yehofa e yeepi u a pisiten di wan tesi e miti u. Kow luku fa Yehofa be yeepi Yowsefu di tesi be e miti en, anga fa a sa yeepi u tu.

3. Fa Yowsefu libi kengi wanboowanboo?

³ A fasi fa Yakopu be e libi anga Yowsefu be e soi taki aa be e meke sipowtu anga en (Gen. 37:3, 4). Ná pikin dyalusu den baala fi en be e dyalusu anga en. Di den fende a okasi, neen den seli en gi wantu Midiyansama. Di den sama ya bai Yowsefu, den tyai en go te a Egepte  go seli. Den seli en gi Potifar, a edeman fu den wakitiman fu Farao. En hii libi kengi wanboowanboo. Neen a be a boi di en dda be moo lobi, ma now a toon wan saafu fu wan man fu Egepte.​—Gen. 39:1.

4. San a wantu sani di sa miti u di de enke den sani di be miti Yowsefu?

⁴ Beibel taki ‘ogii e miti ala sama’ (Peleik. 9:11). Son yuu sani e miti u di e ‘miti taa sama’ (1 Kor. 10:13). Son yuu tesi e miti u tu fu di wa Yesesi bakaman. Kande sama e kosi u, efuso du moo gaan ogii anga u fu a biibi fu wi ede (2 Tim. 3:12). Winsi san e miti i, holi a pakisei taki Yehofa poi yeepi i fu sani waka bun anga i. Fa a du a sani ya gi Yowsefu?

5. San Potifar be kon fusutan di a si fa sani be e waka anga Yowsefu? (Genesesi 39:2-6)

⁵ Leisi Genesesi 39:2-6. Potifar be kon si taki Yowsefu a wan koni yonkuman di be e wooko taanga. A be fusutan tu saide Yowsefu be de so. A be kon si taki a Yehofa be e meke ‘ala sani waka bun gi Yowsefu’. b Bakaten Potifar poti Yowsefu fu luku ala den sani di a be abi. Neen a be poti fu luku a hii osu fi en tu. Di Potifar du a sani ya, ala sani be e go bun aini en osu anga den wooko fi en.

6. Fa Yowsefu be sai fii di a be de a Egepte?

⁶ Pakisei fa Yowsefu be sai fii di a be de a Egepte. San a be sa wani tuutuu? I si enke a wani a be wani Potifar gi en moo faantiwowtu? Kande a sani di Yowsefu be wani tuutuu, a be fu daai go a osu neen dda baka. Winsi fa a be abi wan hei posisi aini Potifar osu, a be de wan saafu ete. A masaa fi en á be e dini Yehofa tu. Boiti dati, Yehofa á du wan sani fu meke Potifar sende Yowsefu go a osu baka. Bakaten, sani be kon moo ogii gi en.

7. Fa sani be kon moo ogii gi Yowsefu? (Genesesi 39:14, 15)

⁷ Tei leisi Genesesi kapitel 39, da we si  taki a omen leisi a uman fu Potifar be e kai Yowsefu fu siibi anga en. Ala yuu te a be akisi Yowsefu, a be e taigi en taki nono. Wan leisi en ati boon a Yowsefu te, neen a lei gi en taki a be wani suwa anga en. (Leisi Genesesi 39:14, 15.) Di Potifar yee a taki ya, a poti en omen yali a sitaafu-osu (Gen. 39:19, 20). Fa a sitaafu-osu be de? A Hebrew wowtu fu ‘sitaafu-osu’ di Yowsefu koboloiki ya, wani taki ‘peti’ tu. A gei enke a sitaafu-osu ya be dunguu. Kande a be e fii enke aa be o komoto ape noiti moo (Gen. 40:15). Beibel e soi taki den be keti Yowsefu futu. Den be fasi wan ayee keti neen neki tu (Ps. 105:17, 18). Sani be kon moo ogii gi Yowsefu. Potifar be e fitoow en di a be e wooko enke saafu gi en, ma now a kisi enseefi te aini sitaafu-osu.

8. San u sa biibi winsi sani kon moo ogii?

⁸ Wan sani miti i kaba di be kon moo ogii winsi fa i begi Yehofa? A sani ya sa pasa, bika a Saatan e tii a goontapu ya. Yehofa nai kibii u fu tesi á miti u tu (1 Yoh. 5:19). Ma i sa biibi a sani ya: Yehofa sabi sai miti i. Ai booko en ede anga i (Mat. 10:29-31; 1 Peit. 5:6, 7). Boiti dati, a paamisi i taki: ‘Mi naw gwe fika i. Noiti mio fika i wawan’ (Heb. 13:5). Winsi ye fii enke sani naw kengi, toku Yehofa poi yeepi i fu holidoo. Kow luku fa Yehofa be yeepi Yowsefu fu holidoo.

9. Sai soi taki Yehofa be de anga Yowsefu di a be de a sitaafu-osu? (Genesesi 39:21-23)

⁹ Leisi Genesesi 39:21-23. Winsi fa sani á be makiliki gi Yowsefu a sitaafu-osu, toku Yehofa be e meke sani waka bun gi en. Fa a du a sani ya? Di a tan a sitaafu-osu te wan pisi, neen a edeman fu a sitaafu-osu bigin fitoow en leti enke fa Potifar be e fitoow en. Bakaten, a poti Yowsefu fu luku den taa sitaafuman. Beibel taki: ‘Aa be de fu a edeman fu a sitaafu-osu booko en ede anga den wooko di Yowsefu be e du.’ A so Yowsefu be fende wooko fu du aini a sitaafu-osu. A sani ya be e yeepi en fu aa pakisei den booko-ede fi en. A wan foondoo sani be pasa de, bika den be lei gi Yowsefu taki a be wani suwa anga a uman fu Potifar, a edeman fu den wakitiman fu Farao. Tei luku a sani di den be taki a du, da a edeman fu a sitaafu-osu á be mu gi en faantiwowtu. Ma a ná sosokaali a sani ya pasa. Genesis 39:23 e taki: ‘Yehofa be e meke ala san Yowsefu be e du, waka bun.’

10. San be sa meke Yowsefu fii enke ala sani á be e waka bun gi en?

¹⁰ Puubei fu si fa Yowsefu be e fii di a be de a sitaafu-osu. Di den be sooto en, i si enke a be e fii enke ala san a be e du be e waka bun? San a be sa wani tuutuu? I si enke a wani a be wani a edeman fu a sitaafu-osu fitoow en? A sani di be o meke Yowsefu moo piisii, a te a be o komoto a sitaafu-osu. A be akisi wan taa sitaafuman di be o komoto a sitaafu-osu fu a taki anga Farao gi en, fu a sa puu en a sitaafu-osu (Gen. 40:14). Ma a tyali taki a man ya be feegete fu taki anga Farao. Neen meke Yowsefu be abi fu tan ete tu yali a sitaafu-osu (Gen. 40:23; 41:1, 14). Ma toku Yehofa be e yeepi Yowsefu ete fu sani waka bun gi en. Fa a du a sani ya?

11. Sowtu koni Yehofa be gi Yowsefu? Fa a sani ya yeepi en fu du san Yehofa be abi a pakisei?

 ¹¹ A ten di Yowsefu be de a sitaafu-osu, Yehofa meke a kownu fu Egepte deen tu deen di be meke a feele. Farao be wani sabi san den deen ya wani taki. Di a yee taki Yowsefu poi puu deen, neen a sende kai en. Yehofa yeepi Yowsefu fu puu den deen ya gi Farao. A soi Farao san a be sa du tu fu sani waka bun aini a kondee. A sani ya be meke Farao bigin lesipeki en. A be man si taki Yehofa be de anga Yowsefu, neen meke a poti en fu luku den nyanyan sani fu Egepte (Gen. 41:38, 41-44). Bakaten wan gaan angiiten kon aini a kondee. A angiiten ya be doo te a Kaana-an, a kondee pe den famii fu Yowsefu be e tan. A so Yowsefu be abi a okasi fu yeepi den famii fi en fu den á dede fu angii. A sani di Yowsefu du ya be kibii den gaansama fu a Mesiyas tu.

12. Fa Yehofa yeepi Yowsefu fu sani waka bun anga en?

¹² Pakisei den sani di pasa aini Yowsefu libi. Sama na a sama di be meke Potifar poti pakisei a Yowsefu di a be de enke saafu aini en osu? Sama be meke a edeman fu a sitaafu-osu poti pakisei neen? Sama be meke Farao deen den tu deen di be meke a feele? Sama be meke Yowsefu sabi san den deen wani taki? Sama be meke Farao poti Yowsefu fu luku ala den nyanyan sani aini Egepte? (Gen. 45:5) We si kiin taki a Yehofa be e meke ala den sani di Yowsefu be e du waka bun. Winsi fa a wan gaan ogii den baala fi en be du di den seli en, toku Yehofa koboloiki a sani ya fu du san a be abi a pakisei.

13. Na ala yuu Yehofa e kibii u fu ogii a miti u?

¹³ San a toli fu Yowsefu e leli u? Na ala yuu Yehofa e kibii u fu ogii á miti u? Na ala den ogii di e pasa aini u libi Yehofa e daai toon bun? Nono, Beibel nai holibaka gi a pakisei ya (Peleik. 8:9; 9:11). Ma san u sabi, a taki te tesi e miti u,  Yehofa e si sai miti u. Ai yee te we begi en fu a yeepi u (Ps. 34:15; 55:22; Yes. 59:1). Ma san moo pelensipali, a taki Yehofa e yeepi u fu man holidoo te tesi e miti u. Fa ai du a sani ya?

14. Fa Yehofa e yeepi u te tesi e miti u?

¹⁴ Wan fasi fa Yehofa e yeepi u, a te ai meke taa baala anga sisa gi u taanga-sikin na a yuu di wi abi en fanowdu (2 Kor. 1:3, 4). Luku a toli fu wan baala den e kai Eziz di e tan a Turkmenistan. Den be sooto a baala ya tu yali fu a biibi fi en ede. A baala ya taki: ‘Wan mmanten wan baala soi mi Yesaya 30:15, pe sikiifi taki: “Efu u wani taanga, u mu de pii, da u fitoow mi.” Ná pikin yeepi a tekisi ya yeepi mi. Ala yuu te mi pakisei en, ai yeepi mi fu fika ala sani gi Yehofa. A tekisi ya yeepi mi fu holidoo di mi be de aini sitaafu-osu.’ I man membee wan ten aini i libi pe Yehofa be yeepi i fu fende taanga-sikin a wan yuu di i be abi en fanowdu?

15-16. San a toli fu Tori e leli i?

¹⁵ Son yuu a baka te u pasa wan tesi fosi we si fa Yehofa yeepi u fu pasa en. Na a sani ya wan sisa den e kai Tori kon si tu. A boi fi en di den be e kai Mason be abi kanker. A dede di a be abi 14 yali. Ná pikin kusumi Tori kusumi di a boi fi en dede. A taki: ‘Mia denki wan moo ati sani de di sa miti wan mma. Ala mma anga dda be o piki anga mi taki a moo hati fu si fa wan siki e fooseli i pikin, moo enke te iseefi siki.’

¹⁶ Winsi fa a be hati Tori fu si fa a siki be fooseli a boi fi en, toku ai membee ete fa Yehofa yeepi en. A taki: ‘Te mi pakisei a pisiten di a boi fu mi be siki,  mi si taki Yehofa yeepi mi tuutuu. Son yuu Mason be e siki te, da sama á be e poi go luku en aini a kambaa pe a be didon. Ma toku baala anga sisa be e lei wan sani fu tu yuu langa go sidon aini a ati-osu fu holibaka gi u. Ala yuu wan sama be de kabakaba fu wakiti aini a ati-osu fu yeepi u anga san u be abi fanowdu. Den be e yeepi wi anga taa sani di u be abi fanowdu tu. Winsi fa sani be taanga a ten de, toku wa be e mankei nawan sani.’ Yehofa yeepi Tori fu fende san a abi fanowdu. Na aseefi sani a du gi Mason tu.​—Luku a faki di den e kai ‘ Yehofa gi u ala san u be abi fanowdu’.

17-18. San o yeepi u fu si fa Yehofa e yeepi u? (Psalm 40:5)

¹⁷ Leisi Psalm 40:5. Te wan sama e subi wan mongo, a maiki fi en a fu doo a tapu fu a mongo. Ma te ai subi a mongo a omen leisi ai taampu, da ai luku den moin peesi di ai si te a de a son pisi fu a mongo. A letiso a de anga u tu. Winsi tesi e miti i, i mu e teke ten e pakisei fa Yehofa e yeepi i. Ala neti fosi i go didon, akisi iseefi taki: ‘San Yehofa du gi mi tide? Winsi fa a tesi fu mia pasa ete, toku fa Yehofa yeepi mi fu holidoo tide?’ Luku efii poi membee winsi wan sani di Yehofa du fu yeepi i fu sani waka bun gii.

¹⁸ A tuu, te tesi e miti i, kande ye begi Yehofa fu a sa puu a tesi gii. A ná wan fowtu sani fu begi Yehofa a sani de (Filip. 4:6). Ma toku u mu meke moiti fu si den sani di Yehofa e du gi u a pisiten di wan tesi e miti u. Yehofa paamisi taki aw yeepi u fu holidoo. I mu e teke en fu bigi taki Yehofa e yeepi i. Efi ye du a sani de, yo si kiin taki leti enke Yowsefu, Yehofa e meke den sani di ye du waka bun winsi tesi e miti i.​—Gen. 41:51, 52.