BAROKUN KALANTA KAFO KƆNƆ 3
Jehova b’i dɛmɛ i ka koow ka ɲɛ i bolo
“Masaba be ni Yusufu ye, . . . n’a ko a be koo o koo kɛ, o be ɲa a fɛ.”—ZƐNƐZI 39:2, 3.
DƆNKILI 30 Mon Ami, mon Dieu, mon Père (N’ teri, n’ ka Ala, n’ Faa)
BAROKUN KƆNƆNAKOW a
1-2. a) Ni gwɛlɛyaw b’an kan, mun na o tɛ bari an na? b) An bena mun lo ye barokun nin na?
AN MINW ye Jehova sagokɛlaw ye, ni gwɛlɛyaw b’an kan o tɛ bari an na. I ko Bibulu b’a fɔ cogo min na, an b’a lɔn ko “wajibi lo fɔɔ an ka tɔɔrɔ kosɔbɛ ka sɔrɔ ka don Ala ka masaya la.” (Kɛw. 14:22). An b’a lɔn fana ko ni Ala ka duniɲa kura kɔnɔ tɛ, an ka gwɛlɛya dɔw tɛna ban pewu. O yɔrɔ la, “saya kɔni, o te yen tugu. Mɔgɔ tena sa, mɔgɔ tena kasi, mɔgɔ tena tɔɔrɔ tugu.”—Yir. 21:4.
2 Jehova t’an latanga gwɛlɛyaw bɛɛ ma, nka a b’an dɛmɛ k’u muɲu. A kɔrɔsi ciden Pol ye min fɔ Ɔrɔmu kerecɛnw ye. A fɔlɔ, a kumana gwɛlɛya dɔw koo la, ale n’a balima dɔw ye minw sɔrɔ. O kɔ, a ko: “An kɛra sesɔrɔlaw ye kosɔbɛ, Krista barika la, ale min y’an kanu.” (Ɔrɔm. 8:35-37). O kɔrɔ ko Jehova ka dɛmɛ barika la, i ka koow be se ka ɲɛ i bolo hali n’o gwɛlɛya b’a tan ni fila la. An k’a filɛ Jehova ye Yusufu dɛmɛ cogo min na ani a be se ka ele fana dɛmɛ cogo min na.
N’AN KA KOOW BARILA KA YƐLƐMA
3. Yɛlɛmani juman lo barila ka kɛ Yusufu ka ɲɛnamaya la?
3 Cɛmɔgɔba Yakuba tun y’a yira ka gwɛ ko a dencɛ Yusufu koo ka di a ye kosɔbɛ (Zɛnɛzi 37:3, 4). O y’a to Yusufu kɔrɔw tun b’a ɲangoya. O kama, tuma min na u ye sababu sɔrɔ, u ye Yusufu feere Madiyan jagokɛla dɔw ma. O jagokɛlaw tagara n’a ye Ezipiti jamana na, o min yɔrɔ tun ka jan kosɔbɛ n’a ka soo ye. O yɔrɔ la fana u ye Yusufu feere Farahuna ka garadiw ɲɛmɔgɔ Potifar ma. Yusufu ka ɲɛnamaya barila ka yɛlɛma! Ale min tun ye a faa ka dencɛ kanulen ye, yɔrɔnin kelen, a yɛlɛmana ka kɛ Ezipitika dɔ ka jɔɔn ye.—Zɛnɛzi 39:1.
4. An be se ka kɔrɔbɔli jumanw lo sɔrɔ minw bɔnin lo Yusufu taw ma?
4 Bibulu b’a fɔ ko “barinako be se [ka mɔgɔ] bɛɛ sɔrɔ.” (Waaj. 9:11). Tuma dɔw la, kɔrɔbɔli dɔw b’an sɔrɔ, minw “ɲɔgɔn delila ka adamaden” tɔɔw sɔrɔ (1 Kor. 10:13). Wala an be se ka kɔrɔbɔli dɔw sɔrɔ sabu an ye Yezu ka kalandenw ye. Misali la, n’a sɔrɔ u b’an lɔgɔbɔ, k’an kɛlɛ wala k’an tɔɔrɔ yɛrɛ an ka limaniya kosɔn (2 Tim. 3:12). I ka kɔrɔbɔli mana kɛ min o min ye, Jehova be se k’i dɛmɛ k’o muɲu ni jagwɛlɛya ye. A y’o kɛ Yusufu ye cogo di?
Yusufu feerela jɔnya la Potifar ma Ezipiti. Nka o ma Jehova bali k’a kɛ a ka koow ɲɛna a bolo (dakun 5nan lajɛ).
5. Potifar labanna ka mun lo faamu Yusufu koo la? (Zɛnɛzi 39:2-6).
5 Zɛnɛzi 39:2-6 kalan. Potifar y’a kɔrɔsi ko Yusufu ye kanbele hakilitigi ye ani ko a be se baara la koɲuman! Ani a y’a faamu ko “Masaba [Jehova] be ni Yusufu ye, ko n’a ko a be koo o koo kɛ, o be ɲa a fɛ.” b Kɔfɛ, Potifar ye Yusufu kɛ a yɛrɛ ka baarakɛla ye, k’a bololafɛnw bɛɛ kalifa a ma. Mun lo sɔrɔla o la? Potifar ka koow tora ka yiriwa.
6. N’a sɔrɔ Yusufu dusukunnako tun ye mun lo ye?
6 Miiri k’a filɛ Yusufu dusukunnako tun ye min ye. A tun be mun lo fɛ n’a dusu bɛɛ ye? Yala a tun b’a fɛ Potifar k’a ka jijaliw ye ani k’a sara o kosɔn wa? A gwɛnin lo ko Yusufu tun be min fɛ n’a dusu bɛɛ ye, o ye ko Potifar k’a hɔɔrɔnya ka bɔ jɔnya la walisa a ka kɔsegi a faa fɛ. Tiɲɛn lo ko Yusufu tun be ni nɛɛma baara dɔw ye Potifar ka soo. Nka, a bele tun ye jɔɔn ye ani a matigi tun be ngalon alaw lo bato. Jehova m’a kɛ Potifar ka Yusufu hɔɔrɔnya ka bɔ jɔnya la. Yusufu ka koow yɛrɛ nana juguya tugun.
N’AN KA KOOW JUGUYARA TUGUN
7. Mun lo y’a to Yusufu ka koow juguyara tugun? (Zɛnɛzi 39:14, 15).
7 I ko Zɛnɛzi sapitiri 39nan b’a ɲɛfɔ cogo min na, Potifar muso ɲɛbɔra Yusufu fɛ. Ani a tun b’a ɲini a fɛ tuma o tuma ko a ka la n’ale ye. Tuma bɛɛ, Yusufu tun be ban. A laban, o muso dimina kosɔbɛ fɔɔ a ye Yusufu jalaki ko a tun b’a fɛ ka la n’ale ye fanga la (Zɛnɛzi 39:14, 15 kalan). Tuma min na Potifar y’o mɛn, a ye Yusufu don kaso la. Yusufu ye saan caaman kɛ yen (Zɛnɛzi 39:19, 20). O kaso tun be cogo di? Yusufu kumana “kaso” min koo la, eburukan na, o kumaden kɔrɔ ko “dingɛ.” O b’a yira k’o yɔrɔ tun dibinin lo ani ko Yusufu jigi tun tigɛnin lo (Zɛnɛzi 40:15). Bibulu b’a fɔ fana ko wagati dɔ la, u tun y’a seenw siri ni jɔlɔkɔ ye, k’a kaan don nɛgɛ la (Zab. 105:17, 18). Yusufu ka koow juguyara tugun. Ale min tun y’a matigi ka jɔɔn lannamɔgɔ ye, a yɛlɛmana ka kɛ kasoden gwansan dama ye.
8. Hali n’an ka gwɛlɛya juguyara, an be se ka la mun lo la?
8 Yala gwɛlɛya dɔ delila k’i sɔrɔ min juguyara k’a sɔrɔ i ye delili kɛ o koo la n’i dusu bɛɛ ye wa? O be se ka kɛ. Sutana ka duniɲa nin na, Jehova tɛ kabako kɛ k’an tanga gwɛlɛyaw ma (1 Zan 5:19). Nka i be se ka la a la ko Jehova b’a lɔn ka ɲɛ min b’i kan ani a b’a janto i la (Mat. 10:29-31; 1 Piyɛri 5:6, 7). Ka fara o kan, a y’a daa di ko: “Ne tena i to i kelen, n tena i bila abada.” (Eburuw 13:5). Jehova be se k’i dɛmɛ k’i ka gwɛlɛyaw muɲu hali n’a b’i ɲɛɛ na ko fɛɛrɛ foyi tɛ yen tugun. An k’a filɛ a y’o kɛ Yusufu ye cogo min na.
Jehova tun be ni Yusufu ye k’a to kaso la ani tuma min na a bilara kasoden tɔɔw bɛɛ kun na (dakun 9nan lajɛ).
9. Tuma min na Yusufu tun be kaso la, mun lo b’a yira ko Jehova tun be n’a ye? (Zɛnɛzi 39:21-23).
9 Zɛnɛzi 39:21-23 kalan. Hali k’a sɔrɔ koow tun man nɔgɔ Yusufu fɛ kaso la, Jehova tun be n’a ye. Mun lo b’o yira? Wagati dɔ nana se, kasobon kɔrɔsibaga lara Yusufu la ani a tun b’a bonya i ko Potifar tun b’a kɛ cogo min na fɔlɔ la. A laban, a ye Yusufu bila kasoden tɔɔw bɛɛ kun na. Tiɲɛn na, a fɔra Bibulu kɔnɔ ko “ni kasobon kɔlɔsibaga tun ye min to Yusufu bolo, a tun te o filɛ tugu.” Sisan, Yusufu bolo tun degunnin lo baara nafaman dɔ la. O kɛra yɛlɛmani kura lo ye tugun! Jɔn tun be se k’a miiri k’o kunkanbaaraba ɲɔgɔn be se ka kalifa Yusufu ma? An k’a to an hakili la ko Yusufu tun ye kasoden ye ani u tun y’a jalaki ko a y’a ɲini ka la n’a kuntigi muso ye fanga la. O kunkanbaaraba kalifara a ma sabu i ko a fɔra Zɛnɛzi 39:23 kɔnɔ cogo min na, “Masaba [Jehova] tun be ni Yusufu ye, ka to ka koo bɛɛ ɲa a bolo.”
10. N’a sɔrɔ a tun tɛ Yusufu ɲɛɛ na ko a ka koo bɛɛ be ɲɛna a bolo. Mun na do?
10 Miiri k’a filɛ tugun Yusufu dusukunnako tun ye min ye. Tuma min na u ye ngalon tigɛ ka la a kan ani k’a don kaso la, yala a tun b’a miiri ko a ka koow bɛɛ be ɲɛna a bolo wa? Yusufu tun be mun lo fɛ n’a dusu bɛɛ ye? Yala a tun b’a fɛ k’a koo diya kasobon kɔrɔsibaga ye le wa? Siga t’a la a tun be min fɛ, o ye ko u ka jalaki bɔ a kan ani k’a bɔ kaso la. A yɛrɛ y’a fɔ kasoden dɔ ye ko n’a bɔra, a k’ale kofɔ Farahuna ye walisa a k’ale bɔ o kasobon dibinin kɔnɔ (Zɛnɛzi 40:14). Nka o cɛɛ ma sin ka Yusufu kofɔ Farahuna ye. O kama, Yusufu tora o kaso kɔnɔ saan fila kɔnɔ tugun (Zɛnɛzi 40:23; 41:1, 14). O bɛɛ n’a ta, Jehova tora k’a kɛ Yusufu ka koow tun be ɲɛna a bolo. Cogo di do?
11. Jehova ye see kabakoman juman lo di Yusufu ma? O y’a dɛmɛ cogo di ka Jehova sagonata dafa?
11 Ka Yusufu to kaso la, Jehova y’a kɛ Ezipiti masacɛ ye siko fila kɛ minw y’a hakili ɲagami kosɔbɛ. Farahuna tun b’a ɲinina n’a dusu bɛɛ ye k’o sikow kɔrɔ lɔn. Tuma min na a y’a lɔn ko Yusufu be se k’o sikow kɔrɔ fɔ a ye, a ye mɔgɔ bila ka taga a weele. Jehova ka dɛmɛ barika la, Yusufu y’o sikow kɔrɔ fɔ ani a ye ladili ɲuman minw di, o ye Farahuna kabakoya. Farahuna y’a ye ko Jehova be ni Yusufu ye minkɛ, a y’a bila Ezipiti jamana bɛɛ ka sumanw ɲɛnabɔko kun na (Zɛnɛzi 41:38, 41-44). Kɔfɛ, kɔngɔba dɔ donna Ezipiti ani Kanan jamana fana na, Yusufu somɔgɔw tun be yɔrɔ min na. Sisan, sababu tun dira Yusufu ma k’a somɔgɔw ani Masiya buruju kisi.
12. Cogo jumanw na Jehova tun b’a kɛra Yusufu ka koow be ɲɛna a bolo?
12 Miiri k’a filɛ koo minw bɛɛ barila ka kɛ Yusufu ka ɲɛnamaya kɔnɔ. Jɔn lo y’a kɛ Potifar y’a mako don Yusufu la, ale min tun ye jɔɔn gwansan ye? Jɔn lo ye kasobon kɔrɔsibaga lasun ka kunkanbaara kalifa Yusufu ma, ale min tun ye kasoden gwansan dama ye? Jɔn lo y’a kɛ Farahuna ye sikow kɛ minw y’a hakili ɲagami ani ka see di Yusufu ma a y’u kɔrɔ fɔ? Jɔn lo ye Farahuna lasun ka Yusufu bila Ezipiti jamana ka sumanw ɲɛnabɔko kunna? (Zɛnɛzi 45:5). Siga ta la, Jehova lo tun b’a kɛra Yusufu ka koow be ɲɛna a bolo. Hali ni Yusufu kɔrɔw tun b’a fɛ k’a faga, Jehova y’o koo yɛlɛma walisa k’a sagonata dafa.
JEHOVA B’I DƐMƐ KA MUƝULI KƐ NI JAGWƐLƐYA YE
13. Koo o koo b’an sɔrɔ, yala Jehova lo b’o kɛ wa? A ɲɛfɔ.
13 Yusufu ka koo b’an dɛmɛ ka mun lo faamu? Koo minw bɛɛ b’an sɔrɔ, yala Jehova lo b’o kɛ wa? Koo o koo be kɛ an ka ɲɛnamaya kɔnɔ, yala Jehova nɔɔ lo ani kɔrɔ b’o la wa? Ayi, Bibulu t’o fɔ (Waaj. 8:9; 9:11). Nka an be min lɔn, o ye ko gwɛlɛya minw b’an kan, Jehova b’o lɔn ani a b’a tulo malɔ an kasikan na ani k’an dɛmɛ (Zab. 34:16; 55:23; Ezayi 59:1). O dɔrɔn tɛ, a b’an dɛmɛ ka muɲuli kɛ ni jagwɛlɛya ye fana. A b’o kɛ cogo di do?
14. Jehova b’an dɛmɛ cogo di gwɛlɛyaw tuma na?
14 Jehova b’an dɛmɛ cogo minw na, u dɔ ye ko a b’an dusu saalo ani k’an jija wagati bɛnnin na (2 Kor. 1:3, 4). A y’o ɲɔgɔn lo kɛ balimacɛ Eziz ye. Ale be Turkmenistan ani u ye jalaki ben a kan k’a datugu kaso la saan fila a ka limaniya kosɔn. A ko: “N’ ka kitilon sɔgɔma, balimacɛ dɔ ye Ezayi 30:15 yira n’ na. A fɔra yen ko: ‘K’aw hakili sigi, ani k’aw jigi la ne kan, o le bena fanga d’aw ma.’ O vɛrise ye n’ dɛmɛ tuma bɛɛ n’ ye n’ hakili sigi ani ka n’ jigi la Jehova kan koo bɛɛ la. N’ ye wagati min bɛɛ kɛ kaso kɔnɔ, n’ tora ka miiri o vɛrise kan ani o ye n’ dɛmɛ kosɔbɛ.” I hakili be wagati dɔ la o min na Jehova y’i dusu saalo ani k’i jija tuma min na i mako tun b’o la kosɔbɛ wa?
15-16. I be kalan juman lo sɔrɔ Tori ka koo la?
15 Tuma caaman na gwɛlɛya dɔ tɛmɛnin kɔ le, an b’a ye Jehova ye koo minw bɛɛ kɛ walisa an ka se k’o muɲu. Balimamuso Tori y’o lo kɔrɔsi. Kansɛri bana y’a dencɛ Mason tɔɔrɔ saan 6 kɔnɔ fɔɔ ka taga a faga. An b’a faamu ko Tori dusu kasira kosɔbɛ. A ko: “Ne fɛ, fɛɛn si tɛ yen min be se ka denba dusu kasi ka se o ma.” A y’a fɔ fana ko: “N’ lanin b’a la ko bangebaga tɔɔw fana sɔnnin b’a ma ko k’i deen ye tɔɔrɔ la, o be digi i la ka tɛmɛ ni ele yɛrɛ lo be tɔɔrɔla.”
16 O koo ye Tori tɔɔrɔ yɛrɛ le! Nka kɔfɛ, a miirila k’a filɛ Jehova y’a dɛmɛ cogo min na k’o muɲu. A ko: “Ni n’ miirila n’ b’a ye Jehova ye n’ dɛmɛ cogo min na n’ dencɛ ka bana tuma na. Misali la, wagati dɔ la Mason ka bana juguyara kosɔbɛ fɔɔ dɔgɔtɔrɔw tun tɛ sɔn mɔgɔw be don k’a filɛ. O bɛɛ n’a ta, balimaw tun be mobili boli lɛri fila kɔnɔ ka na dɔgɔtɔrɔso la. Balimaw tun be n’an ye tuma bɛɛ ani u tun labɛnnin k’an dɛmɛ. U y’u janto an na fana bololafɛnw ta fan fɛ. Hali wagati gwɛlɛw na, an ma fɔn an makoɲɛfɛnw na ka ye.” Tori ni Mason mako tun be min na walisa ka muɲuli kɛ, Jehova y’o di u ma.—Koorilen nin lajɛ: “ An mako tun be min na, Jehova y’o lo di an ma jaatika!”
JEHOVA YE KOO MINW BƐƐ KƐ K’I DƐMƐ, KANA ƝINƐ O KƆ
17-18. Jehova b’an dɛmɛ cogo min na gwɛlɛyaw tuma na, mun lo bena an dɛmɛ k’o ye ani k’a waleɲuman lɔn o kosɔn? (Zaburuw 40:6).
17 Zaburuw 40:6 kalan. Ni mɔgɔ y’a latigɛ ka yɛlɛ kulu kan, a ka laɲinita ye ka se kulu kuncɛ la. Nka, o t’a tigi bali ka lɔ tuma dɔw la walisa ka yɔrɔ cɛɲumaninw filɛ. O cogo kelen na, to ka wagati ta ka miiri k’a filɛ tuma o tuma Jehova b’i dɛmɛna cogo min na, hali gwɛlɛyaw wagati la. Loon o loon, to k’i yɛrɛ ɲininga ko: “Jehova ye n’ duga cogo di bi? Hali ni n’ ka gwɛlɛya ma ban fɔlɔ, Jehova be n’ dɛmɛna cogo di k’o muɲu?” Banba k’i hakili jigi koo kelen ɲɔgɔn na, Jehova ye min kɛ k’i dɛmɛ.
18 N’a sɔrɔ i be delili kɛra walisa i ka gwɛlɛya ka ban. O be faamu ani o yɛrɛ bɛnnin lo (Filip. 4:6). Nka to ka miiri fana Jehova b’i dugara cogo minw bɛɛ la bi bi nin na. Kana ɲinɛ ko a y’a daa di ko a bena i barika bonya ani k’i dɛmɛ ka muɲuli kɛ. O la, to ka Jehova waleɲuman lɔn tuma bɛɛ a ka dɛmɛ kosɔn. N’i y’o kɛ, i ko Yusufu, i bena a ye ko Jehova b’i dɛmɛna walisa i ka koow ka ɲɛ i bolo.—Zɛnɛzi 41:51, 52.
DƆNKILI 32 Prends le parti de Jéhovah ! (An k’a yira ko an be Jehova lo kɔ!)
a Ni gwɛlɛyaba dɔ b’an kan, a be se ka kɛ an ɲɛɛ na ko Jehova t’an dɛmɛna. An be se k’a miiri ko n’o gwɛlɛya ma ban, an ka koow tɛna ɲɛ fewu. Nka koo minw ye Yusufu sɔrɔ, u b’an dɛmɛ ka koo kɔrɔtaninba nin faamu: Hali n’an ka gwɛlɛya b’a tan ni fila la, Jehova be se k’an dɛmɛ an ka koow ka ɲɛ an bolo. Barokun nin na, an bena a ye a b’o kɛ cogo min na.
b Yɛlɛmani minw kɛra Yusufu ka ɲɛnamaya la tuma min na a tun be jɔnya la, u lakalila vɛrise damanin dɔrɔn lo kɔnɔ. Nka n’a sɔrɔ o yɛlɛmaniw kɛra saan caaman lo kɔnɔ.
