1-2. (a) Étɛ́wú mǐ ɖo tagba lɛ́ mɛ gbɔn wɛ ɔ, é ma ka nɔ kpácá mǐ ǎ? (b) Étɛ́ lɛ́ mǐ ka ná gbéjé kpɔ́n ɖo xóta élɔ́ mɛ?

 ÐÓ MƐSƐNTƆ́ Jexóva tɔn lɛ́ wɛ mǐ nyí wútu ɔ, ényí mǐ ɖo wǔvɛ́ lɛ́ mɛ gbɔn wɛ ɔ, é nɔ kpácá mǐ ǎ. Biblu ɖɔ: “Ya gěgé wɛ mǐ ɖó ná ji, bo ná dó byɔ́ Axɔ́súɖuɖu Mawu tɔn mɛ.” (Mɛ. 14:22) Mǐ lɛ́ tuun ɖɔ wǔvɛ́ mǐtɔn ɖé lɛ́ kún ná vɔ bǐ mlɛ́mlɛ́ cóbónú mǐ ná byɔ́ gbɛ yɔ̌yɔ́ Mawu tɔn mɛ ó; ɖo gbɛ yɔ̌yɔ́ énɛ́ mɛ ɔ, “kú sɔ́ ná tíin ǎ, aluwɛ sɔ́ ná tíin ǎ, alěniná sɔ́ ná tíin ǎ, wǔvɛ́ mimɔ sɔ́ ná tíin ǎ.”—Nǔɖe. 21:4.

² Jexóva nɔ cyɔ́n alɔ mǐ jí bónú mǐ ná gɔn wǔvɛ́ mɔ ǎ. Amɔ̌, é nɔ d’alɔ mǐ bɔ mǐ nɔ dɛ ɖ’é nu. Ð’ayi nǔ e mɛsɛ́dó Pɔ́lu ɖɔ nú klisánwun e ɖo Hlɔ̌ma lɛ́ é wú. É tó slɛ́ wǔvɛ́ ɖěɖěe é kpó nɔví lɛ́ kpó mɔ é gěgé hwɛ̌. Énɛ́ gúdo ɔ, é wlán ɖɔ: “Loɔ, nǔ énɛ́ lɛ́ bǐ ɖo jijɛ wɛ, có Klísu e yí wǎn nú mǐ ɔ dó alɔ mǐ, bɔ mǐ ɖó ɖuɖéjí bǐ gbídígbídí.” (Hlɔ̌. 8:35-37) Énɛ́ xlɛ́ ɖɔ ényí a ná bo ɖo tagba ɖé ɖí xwi xá wɛ ɔ, Jexóva sixú d’alɔ we. Mi nú mǐ ní gbéjé lěe Jexóva d’alɔ Jozɛ́fu bɔ é ɖu ɖo tagba tɔn lɛ́ jí gbɔn é kpó lěe é sixú d’alɔ hwi lɔ gbɔn é kpó kpɔ́n.

3. Hǔzúhúzú maɖónukún tɛ́ ka wá xwetɔ́n ɖo gbɛzán Jozɛ́fu tɔn mɛ?

³ Tɔ́gbó Jakɔ́bu ɖe xlɛ́ nyi wɛn ɖɔ émí yí wǎn nú vǐ émítɔn Jozɛ́fu tawun. (Bǐb. 37:3, 4) Wǎgbɔ tɔn ɔ, Jakɔ́bu sín vǐ mɛxó lɛ́ jɛ wǔ hwan Jozɛ́fu jí. Hwenu e ali ɖé hun nú yě é ɔ, yě sa Jozɛ́fu nú ajɔ̌tɔ́ Madiáani ví lɛ́ sín gbɛ̌ta ɖé. Ajɔ̌tɔ́ énɛ́ lɛ́ zɔn ali dó Jozɛ́fu jí nú kilomɛ́tlu kanweko mɔ̌kpán yi Ejípu; fínɛ́ wɛ yě lɔmɔ̌ sɔ́ ɛ sa nú sɔ́ja ɖěɖěe nɔ cɔ́ Falawɔ́ɔn lɛ́ é sín gǎn Potifáa ɖe. Hazawun wɛ gbɛzán Jozɛ́fu tɔn húzú; éyɛ́ mɛ e nyí vǐ vívɛ́ nú tɔ́ tɔn é wá húzú kannumɔ gǔdo gúdo tɔn ɔ nú Ejípunu ɖé!—Bǐb. 39:1.

4. Nɛ̌ mǐ ka sixú mɔ wǔvɛ́ e Jozɛ́fu mɔ é ɖɔhun gbɔn?

 ⁴ Biblu ɖɔ ɖɔ “hwenu kpó nǔmaɖónukún lɛ́ kpó nɔ wá nú [mɛ] bǐ.” (Nǔt. 9:11, nwt) Hweɖélɛ́nu ɔ, tagba e mǐ nɔ mɔ é ɖěbǔ nɔ zɛ “éé gbɛtɔ́ nɔ mɔ é” wú ǎ; ɖo xógbe ɖěvo mɛ ɔ, tagba e gbɛtɔ́ lɛ́ bǐ nɔ mɔ é jɛ́n mǐ lɔ nɔ mɔ. (1 Kɔ. 10:13) Alǒ mǐ sixú nɔ se wǔvɛ́ ɖó ahwanvú Jezu tɔn e mǐ nyí kpowun é wútu. Ði kpɔ́ndéwú ɔ, mɛ lɛ́ sixú nɔ cá mǐ ko, klán gbe xá mǐ, alǒ tlɛ nɔ dó ya nú mǐ ɖó nǔ e mǐ ɖi nǔ ná lɛ́ é wútu. (2 Tim. 3:12) Nú é ná bo tlɛ nyí wǔvɛ́ ɖěbǔ ɖí xwi xá wɛ a ɖe ɔ, Jexóva sixú d’alɔ we bɔ é ná kpa we. Nɛ̌ é ka wa mɔ̌ nú Jozɛ́fu gbɔn?

5. Gbeta tɛ́ kɔn Potifáa ka wá dó lěe nǔ lɛ́ bǐ ɖo yiyi nú Jozɛ́fu wɛ gbɔn é wú? (Bǐbɛ́mɛ 39:2-6)

⁵ Xa Bǐbɛ́mɛ 39:2-6. Potifáa ɖ’ayi wú ɖɔ Jozɛ́fu ɔ, dɔ̌nkpɛvú e nyɔ́nǔi tawun é ɖé wɛ n’i, bo nɔ lɛ́ w’azɔ̌ syɛ́nsyɛ́n. É lɛ́ tuun nǔ e wú nǔ nyí mɔ̌ é. Potifáa mɔ ɖɔ ‘Jexóva nɔ bló bɔ nǔ e wa wɛ Jozɛ́fu ɖe lɛ́ bǐ nɔ ɖo yiyi n’i wɛ.’ b É wá yá é ɔ, nya Ejípunu énɛ́ sɔ́ Jozɛ́fu dó ɖó azɔ̌watɔ́ éɖésúnɔ tɔn. É lɛ́ sɔ́ xwé tɔn blěbú d’alɔ mɛ nú Jozɛ́fu. Étɛ́ mɛ é ka tɔ́n kɔ dó? Jexóva kɔn nyɔ̌ná dó Potifáa jí.

6. Nɛ̌ nǔ ka ná ko cí nú Jozɛ́fu dó ninɔmɛ tɔn wú?

⁶ Dǒ nukún lěe nǔ ná ko cí nú Jozɛ́fu é mɛ kpɔ́n. Étɛ́ ba wɛ é ka ɖe hú nǔ bǐ? Potifáa ná ɖ’ayi wǔ tɔn bo d’ajɔ ɛ wɛ a? É cí ɖɔ nǔ e ba wɛ Jozɛ́fu ɖe é wɛ nyí ɖɔ é ní jɛ éɖée sí bá lɛ́ kɔ yi tɔ́ tɔn gɔ́n. È ná ɖɔ xójɔxó ɔ, Potifáa sɔ́ acɛ énɛ́ lɛ́ bǐ nú Jozɛ́fu ɖo xwé tɔn gbe có, kannumɔ jɛ́n Jozɛ́fu kpo ɖo nyǐnyí wɛ ɖo gǎn e ma nɔ sɛn Jexóva ǎ é glɔ́. Jexóva sísɛ́ Potifáa bónú é ní ɖe Jozɛ́fu nyi te ǎ. É nyɔ́ wa ɔ, ninɔmɛ Jozɛ́fu tɔn lɛ́vɔ́ ɖo nǎ nylá d’é jí wɛ.

7. Ali tɛ́ nu ninɔmɛ Jozɛ́fu tɔn fɔ́n ɔ, nylǎnylá d’é jí wɛ jɛ́n é ka nɔ ɖe ɖe? (Bǐbɛ́mɛ 39:14, 15)

⁷ Lěe è ɖɔ gbɔn ɖo Bǐbɛ́mɛ wěmata 39gɔ́ ɔ mɛ é ɔ, nǔ Jozɛ́fu tɔn jɛ Potifáa sín asi tɔn jí jɛ jí, bɔ é tɛ́n kpɔ́n azɔn mɔ̌kpán bo ná bló bɔ é ná kú temi n’i. Amɔ̌, nǎwe ɔ wa mɔ̌ hweɖébǔnu ɔ, Jozɛ́fu nɔ gbɛ́ bǐ gbídígbídí. Wǎgbɔ tɔn ɔ, xomɛ sin i dó Jozɛ́fu wú káká bɔ é dó hwɛ ɛ ɖɔ é jló ná hwlɛ́n kan xá  émí. (Xa Bǐbɛ́mɛ 39:14, 15.) Ée Potifáa se mɔ̌ é ɔ, é wlí Jozɛ́fu dó gankpá mɛ; fínɛ́ wɛ é nɔ nú xwe mɔ̌kpán. (Bǐb. 39:19, 20) Nɛ̌ gankpá ɔ mɛ ka cí tawun? Xókwín Ebléegbe tɔn e Jozɛ́fu zán nú “gankpá” é sín tínmɛ sixú nyí “sitɛ́nu,” alǒ “dotɔ,” bo ɖo xlɛ́xlɛ́ wɛ ɖɔ ablu gɔngɔn mɛ wɛ nyí fí ɔ, bɔ émí cí mɛ e ma sɔ́ ɖó nukúnɖíɖó ɖě ǎ é ɖɔhun. (Bǐb. 40:15.) Gɔ́ ná ɔ, Biblu xlɛ́ ɖɔ è dó gɛdɛ afɔ Jozɛ́fu tɔn lɛ́, bo lɛ́ dó kan kɔ n’i. (Ðɛh. 105:17, 18) Ninɔmɛ Jozɛ́fu tɔn fɔ́n ɔ, nylǎnylá d’é jí wɛ jɛ́n é nɔ ɖe. É gosín mɛsɛntɔ́ e wú è ɖeji dó é há jí, bo wá jɛ gantɔ́ gǔdo gúdo tɔn ɔ há jí.

8. Nú é ná bo tlɛ nyí ɖɔ wǔvɛ́ lɛ́ fɔ́n ɔ jijɛjí wɛ jɛ́n yě nɔ ɖe ɔ, jiɖiɖe tɛ́ mǐ ka sixú ɖó?

⁸ A ka ko mɔ hwiɖée ɖo ninɔmɛ e nɔ ɖó adohu adohu nú mɛ é ɖé mɛ kpɔ́n, bo ɖo ɖɛ xo wɛ syɛ́nsyɛ́n có, nǔ lɛ́ ka fɔ́n ɔ, nylǎnylá d’é jí wɛ jɛ́n yě nɔ ɖe a? Nǔ sixú nyí mɔ̌. Jexóva nɔ cyɔ́n alɔ mǐ jí, bɔ mǐ nɔ gɔn wǔvɛ́ mɔ ɖo gbɛ élɔ́ e nu kp’acɛ dó wɛ Satáan ɖe é mɛ ǎ. (1 Jaan 5:19) É ɖo mɔ̌ có, a sixú ɖeji dó xó élɔ́ wú: Jexóva mɔ nǔ jɛ ninɔmɛ e mɛ gbɔn wɛ a ɖe é wú céɖécéɖé, bo nɔ kpé nukún dó wǔ we. (Mat. 10:29-31; 1 Pi. 5:6, 7) Hú mɔ̌ ɔ, é dó akpá ɖɔ: “Un ná jó we dó gbeɖé ǎ; un ná ɖe alɔ sín kan towe mɛ gbeɖé ǎ.” (Ebl. 13:5) Nú é tlɛ nyí ɖɔ ninɔmɛ e mɛ a ɖe é ɔ, nukúnɖíɖó ɖě kún sɔ́ ɖe ó ɔ, Jexóva hɛn ɔ, é ná d’alɔ we bɔ a ná dɛ. Mi nú mǐ ní kpɔ́n lěe nǔ nyí mɔ̌ ɖo ninɔmɛ Jozɛ́fu tɔn mɛ gbɔn é.

9. Étɛ́ ka xlɛ́ ɖɔ Jexóva ɖo kpɔ́ xá Jozɛ́fu hwenu e é ɖo gankpá mɛ é? (Bǐbɛ́mɛ 39:21-23)

⁹ Xa Bǐbɛ́mɛ 39:21-23. É ná bo tlɛ nyí ɖo hwenu vɛ́ wǔ e Jozɛ́fu zán ɖo gankpá mɛ lɛ́ é mɛ ɔ, Jexóva bló bɔ nǔ bǐ yi n’i ganjí. Gbɔn nɛ̌ é? É wá su hweɖénu bɔ gankpácɔ́tɔ́ ɔ ɖeji dó Jozɛ́fu wú, bo nɔ ɖó sísí n’i, lěe Potifáa lɔ bló gbɔn n’i é pɛ́pɛ́pɛ́. É sɔ́ lín ǎ bɔ gankpácɔ́tɔ́ ɔ bɛ́ gantɔ́ ɖěvo e kpo ɖo fínɛ́ lɛ́ é bǐ d’alɔ mɛ nú Jozɛ́fu. Nǔgbó ɔ, Biblu ɖɔ ɖɔ “gantɔ́ lɛ́ sín gǎn ɔ sɔ́ nɔ kpé nukún dó nǔ e é sɔ́ dó alɔ mɛ nú Jozɛ́fu lɛ́ ɖěbǔ wú ǎ.” Jozɛ́fu ɖó nǔ e jí é ná sɔ́ ayi tɔn ɖó é din lo, énɛ́ wɛ nyí azɔ̌ e nɔ jɛmɛ nú mɛ é ɖé. Hǔzúhúzú maɖónukún ɖé wɛ énɛ́ nyí. Nɛ̌ gantɔ́ e è dó hwɛ ɖɔ é hwlɛ́n kan xá axɔ́súzɔ́watɔ́ nukúnɖéjí ɖé sín asi é ka ná wá tɔ́n ɖo tɛn ɖejidéwú énɛ́ mɛ gbɔn? Tínmɛ ɖokpó géé jɛ́n xó énɛ́ ɖó. Lěe Bǐbɛ́mɛ 39:23 ɖɔ gbɔn é ɔ, ‘Jexóva ɖo kpɔ́ xá Jozɛ́fu, bo nɔ bló, bɔ nǔ e é nɔ wa lɛ́ bǐ nɔ ɖo yiyi n’i wɛ.’

10. Tínmɛ nǔ e wú Jozɛ́fu sixú lin ɖɔ nǔ lɛ́ bǐ kún ɖo yiyi nú émí wɛ ganjí ó é.

¹⁰ Lɛ̌ tɛ́n kpɔ́n bo dó nukún lěe nǔ ná ko cí nú Jozɛ́fu é mɛ kpɔ́n. Ée è dó hwɛ agɔ ɛ, lobo wlí i dó gankpá mɛ gúdo é ɔ, a ka lin ɖɔ é mɔ ɖɔ nǔ lɛ́ bǐ ɖo yiyi nú émí wɛ ganjí wɛ a? Étɛ́ ba wɛ Jozɛ́fu ka ɖe hú nǔ bǐ? Nǔ tɔn ní nyɔ́ gankpácɔ́tɔ́ ɔ sín nukúnmɛ wɛ a? É cí ɖɔ nǔ e ba wɛ Jozɛ́fu ɖe é wɛ nyí ɖɔ è ní ɖe hwɛ e dó è wɛ è ɖe é sín kɔ n’i, bo ɖe è tɔ́n sín gankpá mɛ. É tlɛ ɖɔ nú gantɔ́ ɖěvo e è ɖo nǎ ɖe tɔ́n sín gankpá mɛ wɛ é ɖɔ é ní ɖɔ xó émítɔn nú Falawɔ́ɔn, bónú é ná ɖe émí sín gankpá élɔ́ e mɛ è nɔ se wǔvɛ́ ɖe é mɛ. (Bǐb. 40:14) Amɔ̌, nya ɔ yá wǔ ɖɔ xó nú Falawɔ́ɔn dó mɛhwenu ǎ. Wǎgbɔ tɔn ɔ, Jozɛ́fu lɛ́ nɔ gankpá mɛ nú xwe we jɛjí. (Bǐb. 40:23; 41:1, 14) É ɖo mɔ̌ có, Jexóva kpo ɖo blǒbló wɛ bɔ nǔ e é nɔ wa lɛ́ é bǐ nɔ ɖo yiyi n’i wɛ. Gbɔn nɛ̌ é?

11. Nǔwúkpíkpé bǔnɔ tɛ́ Jexóva ka ná Jozɛ́fu? Nɛ̌ énɛ́ ka d’alɔ bɔ linlin Jexóva tɔn jɛnu gbɔn?

¹¹ Hwenu e Jozɛ́fu ɖo ganxó é ɔ, Jexóva bló bɔ axɔ́sú Ejípu tɔn kú dlɔ̌ e ɖó adohu nú mɛ é we. Falawɔ́ɔn ba ná tuun tínmɛ dlɔ̌ énɛ́ lɛ́ tɔn dó yǐyá mɛ. Hwenu e axɔ́sú ɔ se ɖɔ Jozɛ́fu kpé wú bo nɔ tín dlɔ̌ lɛ́ mɛ é ɔ, é sɛ́ mɛ dó ɖɔ è ní yi kplá ɛ wá. Kpó alɔdó Jexóva tɔn  kpó ɔ, Jozɛ́fu tín dlɔ̌ lɛ́ mɛ, bɔ wě e nyɔ́ zán bɔ é ɖe xá Falawɔ́ɔn lɛ́ é jí wǔ nú Falawɔ́ɔn tawun. Ðó Falawɔ́ɔn mɔ ɖɔ Jexóva ɖo kpɔ́ xá dɔ̌nkpɛvú énɛ́ e nɔ nyí Jozɛ́fu é wútu ɔ, é sɔ́ ɛ gǎn e xwe aza dó nǔɖuɖu nu ɖo Ejíputo ɔ bǐ mɛ é. (Bǐb. 41:38, 41-44) Nukɔnmɛ ɔ, adɔ syɛ́nsyɛ́n ɖé tɔ́n, é ka nyí Ejípu kɛ́ɖɛ́ wɛ se xɔxɔ tɔn ǎ, Kanáa lɔmɔ̌ se; to énɛ́ mɛ wɛ xwédo Jozɛ́fu tɔn ka nɔ nɔ. Tɛn e mɛ Jozɛ́fu ɖe din é ɔ, é hɛn ɔ, é ná hwlɛ́n xwédo tɔn, bɔ mɔ̌ mɛ ɔ, é ná cyɔ́n alɔ kúnkan e mɛ Mɛsíya ɔ ná tɔ́n sín é jí.

12. Ali tɛ́ lɛ́ nu Jexóva ka bló bɔ nǔ e Jozɛ́fu nɔ wa lɛ́ é bǐ kpa ɛ ɖe?

¹² Lin tamɛ dó nǔ e ma nɔ jɛ mɔ̌ ǎ é ɖé jí ɖo gbɛzán Jozɛ́fu tɔn mɛ. Mɛ̌ ka bló bɔ Potifáa sɔ́ ayi ɖó Jozɛ́fu e nyí kannumɔ kpowun é ɖé jí sɔmɔ̌? Mɛ̌ ka bló bɔ gankpácɔ́tɔ́ ɔ nyɔ́ xomɛ dó Jozɛ́fu e nyí gantɔ́ ɖé kpowun é wú? Mɛ̌ ka bló bɔ Falawɔ́ɔn kú dlɔ̌ e ɖó adohu adohu n’i lɛ́ é, bo lɛ́ ná Jozɛ́fu nǔwúkpíkpé ɔ bɔ é tín dlɔ̌ lɛ́ mɛ? Mɛ̌ ka sísɛ́ Falawɔ́ɔn bɔ é sɔ́ Jozɛ́fu gǎn e xwe aza dó nǔɖuɖu nu ɖo Ejíputo ɔ bǐ mɛ é? (Bǐb. 45:5) É ɖo wɛn, Jexóva wɛ bló bɔ nǔ e Jozɛ́fu wa lɛ́ é bǐ kpa ɛ. Jozɛ́fu sín nɔví lɛ́ ba ná hu i có, Jexóva húzú ninɔmɛ ɔ, bónú linlin tɔn ná dó jɛnu.

13. Jexóva ka nɔ ɖ’acɛ dó nǔ e nɔ jɛ ɖo gbɛzán mǐtɔn mɛ lɛ́ é bǐ jí wɛ a? Tínmɛ.

¹³ Étɛ́ tan Jozɛ́fu tɔn ka sixú kplɔ́n mǐ? Jexóva ka nɔ wa nǔɖé ɖo ninɔmɛ e mɛ mǐ nɔ gbɔn lɛ́ é bǐ mɛ wɛ a? É ka nɔ ɖó nu ɖo nǔ e nɔ jɛ ɖo gbɛzán mǐtɔn mɛ lɛ́ é bǐ mɛ, káká bɔ mǐ ná ɖɔ ɖɔ nǔ nyanya e nɔ jɛ lɛ́ é ɔ, hwɛjijɔ ɖagbe ɖé wú wɛ yě nɔ jɛ wɛ a? Éǒ, Biblu nɔ gǔdo nú linlin énɛ́ ǎ. (Nǔt. 8:9; 9:11) Amɔ̌, mǐ tuun nǔ élɔ́: Ényí mǐ ɖo ninɔmɛ vɛ́ wǔ lɛ́ mɛ gbɔn wɛ ɔ, Jexóva nɔ tuun, bo nɔ lɛ́ se xó e mǐ nɔ sú dó byɔ́ alɔdó é. (Ðɛh. 34:16; 55:23; Eza. 59:1) Hú mɔ̌ ɔ, Jexóva sixú d’alɔ mǐ bɔ mǐ ná dɛ ɖo wǔvɛ́ lɛ́ nu, b’ɛ ná kpa mǐ. Gbɔn nɛ̌ é?

14. Nɛ̌ Jexóva ka nɔ d’alɔ mǐ ɖo hwenu vɛ́ wǔ lɛ́ mɛ gbɔn?

¹⁴ Ali e nu Jexóva nɔ d’alɔ mǐ ɖe lɛ́ é ɖokpó wɛ nyí ɖɔ é nɔ dó gbɔ nú mǐ, lobo nɔ lɛ́ dó wǔsyɛ́n lanmɛ nú mǐ, bɔ hwɛhwɛ ɔ, é ka nɔ nyí ɖo hwenu e nyɔ́ hú gǎn é. (2 Kɔ. 1:3, 4)  Lěe é nyí gbɔn nú Eziz é nɛ́; nɔví súnnu wɛ n’i bɔ é nɔ nɔ Turkménistan, lobɔ è dó hwɛ ɛ ɖɔ é ná sɛn gan ɖó nǔɖiɖi tɔn wú. É ɖɔ: “Zǎnzǎn gbe e gbe è ja hwɛ ce ɖɔ gbé é ɔ, nɔví súnnu ɖokpó xlɛ́ mì Ezayíi 30:15, fínɛ́ ɖɔ: ‘Hlɔ̌nhlɔ́n ɖokpó e ná kpo nú mi ɔ wɛ nyí ɖɔ mi ná cí xwíí, bo ná ɖeji dó wǔ ce.’ Hwebǐnu wɛ wěmafɔ énɛ́ d’alɔ mì bɔ un cí xwíí, bo ɖeji dó Jexóva wú ɖo nǔ bǐ mɛ. Tamɛ linlin dó wěmafɔ énɛ́ jí d’alɔ mì ɖo gankpá mɛ ninɔ ce bǐ hwenu.” Lin tamɛ dó hwenu e Jexóva dó gbɔ nú we, lobo lɛ́ dó wǔsyɛ́n lanmɛ nú we hwenu e a ɖó hudó tɔn hú gǎn ɖo gbɛzán towe mɛ é jí.

15-16. Étɛ́ kpɔ́ndéwú Tori tɔn ka kplɔ́n we?

¹⁵ Hwɛhwɛ ɔ, hwenu e mǐ xo mɛtɛ́nkpɔ́n ɖé zlɛ́ é gúdo jɛ́n mǐ nɔ wá ɖ’ayi lěe Jexóva d’alɔ mǐ bɔ mǐ dɛ ɖ’é nu gbɔn é wú. Nɔví nyɔ̌nu e nɔ nyí Tori é mɔ ɖɔ nǔgbó wɛ nyí xó énɛ́. Vǐ súnnu tɔn Mason ɖí xwi xá kansɛ́ɛzɔn sín hwenu e é ɖó xwe ayizɛ́n é, káká jɛ hwenu e é kú é. É ɖo wɛn ɖɔ Tori byɔ́ aluwɛ ɖaxó mɛ. É ɖɔ: “Ðó un nyí nɔ ɖé wútu ɔ, un sɔ́ lin nú wǔvɛ́ ɖě ná sɔ éyɛ́ e un mɔ é ǎ.” É ɖɔ gɔ́ ná ɖɔ: “Un kú d’é jí ɖɔ mɛjitɔ́ ɖěvo lɛ́ ná yí gbe ɖɔ ényí è mɔ bɔ vǐ mɛtɔn ɖo wǔvɛ́ se wɛ ɔ, é nylá tawun hú ɖɔ mɛɖésúnɔ ní se wǔvɛ́.”

¹⁶ Nǔgbó wɛ ɖɔ Tori ɖo aluwɛ ɖaxó ɖé mɛ, hwenu e é mɔ vǐ súnnu tɔn bɔ é ɖo wǔvɛ́ syɛ́nsyɛ́n se wɛ é có, nukɔnmɛ ɔ, é wá lin tamɛ dó lěe Jexóva d’alɔ ɛ bɔ é dɛ ɖ’é nu gbɔn é jí. É ɖɔ: “Ée un dó nukún hwenu e nǔ lɛ́ jɛ é mɛ kpɔ́n é ɔ, un mɔ lěe Jexóva d’alɔ mì gbɔn hwenu e vǐ ce ɖo azɔn jɛ wɛ é. Ði kpɔ́ndéwú ɔ, Mason sín lanmɛ gblé káká bɔ é sixú nɔ mɔ mɛ e nɔ wá kpɔ́n ɛ lɛ́ é ǎ có, nɔví súnnu lɛ́ kpó nɔví nyɔ̌nu lɛ́ kpó nɔ zɔn ali nú ganxixo we bo nɔ wá dotóoxwé ɔ. Hwebǐnu  ɔ, mɛɖé nɔ ɖo te ɖo fí e mɛ e wá mɛ kpɔ́n gbé lɛ́ é nɔ nɔ é jɛ́n wɛ, bo nɔ ɖo gbesisɔmɛ bá d’alɔ kpó jlǒ kpó. Gɔ́ ná ɔ, nɔví lɛ́ nɔ kpé nukún dó hudó agbaza tɔn mǐtɔn lɛ́ wú. É ná bo tlɛ nyí hwenu e nǔ lɛ́ wá vɛ́ wǔ bǐ é ɔ, hwebǐnu wɛ mǐ nɔ mɔ nǔ e sín hudó mǐ ɖó é.” Jexóva ná Tori nǔ e sín hudó é ɖó bá dɛ é, bo lɛ́ wa nǔ ɖokpó ɔ nú Mason ɖésú.—Kpɔ́n gbǎví “ Jexóva ná mǐ nǔ e sín hudó mǐ ɖó bá dɛ é pɛ́pɛ́pɛ́.”

17-18. Étɛ́ ka ná d’alɔ mǐ bɔ mǐ ná ɖó ayi lěe Jexóva ɖo alɔ dó mǐ wɛ ɖo wǔvɛ́ lɛ́ hwenu gbɔn é wú, bɔ é ná lɛ́ sú nukún mǐtɔn mɛ? (Ðɛhan 40:6)

¹⁷ Xa Ðɛhan 40:6. Nǔ e gbé mɛ e nɔ fán só é ɖé nɔ nya é wɛ nyí ɖɔ, é ní yi só ɔ sín ahɔn mɛ. Amɔ̌, ɖo só ɔ fínfán hwenu ɔ, fí gěgé ɖe bɔ é sixú nɔ te ɖe, bo ɖu vǐví nǔ ɖagbe e é mɔ lɛ́ é tɔn. Ðo ali ɖokpó ɔ nu ɔ, nɔ ba hwenu hwɛhwɛ bo nɔ nɔ te, lobo nɔ dó nukún lěe a ɖo xwi ɖí xá wǔvɛ́ lɛ́ wɛ có, Jexóva ka ɖo blǒbló wɛ bɔ é nɔ kpa we gbɔn é jí. Ðo vivɔnu azǎn ɖokpó ɖokpó tɔn hǔn, nɔ kanbyɔ́ hwiɖée ɖɔ: ‘Ali tɛ́ nu un ka mɔ nyɔ̌ná Jexóva tɔn ɖe ɖo égbé? Nǔgbó wɛ ɖɔ tagba ɔ kpo ɖo ayǐ có, nɛ̌ Jexóva ka ɖo alɔ dó mì wɛ bónú má dɛ ɖ’é nu gbɔn?’ Kpɔ́n ɖɔ é hwe bǐ ɔ, émí ka sixú sɔ́ kɛ́n nǔ e Jexóva wa dó d’alɔ émí é tɔn ɖokpó vɔ́vɔ́ a jí.

¹⁸ Nǔgbó ɔ, a sixú ɖo ɖɛ xo wɛ ɖɔ wǔvɛ́ towe lɛ́ ní vɔ. Bɔ énɛ́ ka sɔgbe. (Filí. 4:6) Amɔ̌, mǐ ɖó ná lɛ́ ɖó ayi nyɔ̌ná ɖěɖěe mɔ wɛ mǐ ɖe din lɛ́ é wú. È ná ɖɔ ɔ, Jexóva d’akpá ɖɔ émí ná ná hlɔ̌nhlɔ́n mǐ, bo lɛ́ d’alɔ mǐ bɔ mǐ ná dɛ. Énɛ́ wú ɔ, gǔdo e nɔ nú we wɛ Jexóva ɖe é ní nɔ sú nukún towe mɛ hwebǐnu. Énɛ́ ɔ, a ná mɔ lěe Jexóva ɖo alɔ dó we wɛ gbɔn bónú é ná kpá we, lěe é d’alɔ Jozɛ́fu ɖo wǔvɛ́ lɛ́ hwenu gbɔn é é.—Bǐb. 41:51, 52.