1-2. a) Poukisa sa pa ka sirprann nou lò nou ka jwenn éprèv ? b) Kisa nou ké wè annan sa artik-a ?

 KOU nou ka adoré Jéova, sa pa ka sirprann nou lò nou ka jwenn éprèv. Nou byen savé ki, kou Labib-a ka di, « nou ké gen pou pasé annan roun patché éprèv anvan nou antré annan rwayonm Bondjé-a » (Actes 14:22). Nou savé osi ki roun ran problèm nou gen pa ké fini jiktan monn nouvo-a rivé, lò « i pa ké gen lanmò ankò » é lò « i pa ké gen ni dèy, ni rélé, ni doulèr ankò » (Rév. 21:4).

² Jéova pa ka fè mirak pou protéjé nou di tout éprèv, mé i ka idé nou tchenbé. Gadé sa apot Pòl di krétyen-yan ki té Ròm. Pou koumansé i palé di plizyèr éprèv so frè ké sò-ya ké li menm té ka jwenn, apré sa i ékri : « Annan tout sa bagaj-ya, nou ka ganyen nèt gras a sa-la ki kontan nou » (Rom. 8:35-37). Sa lé di ki, gras a Jéova, to pouvé « ganyen nèt » menm si to an mitan éprèv-a. Pou nou palé di sa lidé-a nou ké wè kouman Jéova idé Jozèf é kouman i pouvé idé to.

3. Kouman lavi Jozèf chanjé rounsèl kou ?

³ Jakòb pa té pè montré ki i té kontan so pitit Jozèf bokou (Gen. 37:3, 4). Akoz di sa, gran frè Jozèf koumansé jalou li. Lò yé trouvé roun mwayen, yé vandé l’ pou marchan ki té ka vini di Madyan. Sa marchan-yan mennen li  lwen, lwen, di so kaz, an Éjip, é la yé vandé l’ ankò, sa maré-a, yé vandé l’ pou chèf kaz Faraon-an, Pitifar. So sitiasyon vréman chanjé rounsèl kou ! I té sa pitit so papa té kontan bokou épi rounsèl kou i divini ti èsklav roun éjipsyen (Gen. 39:1).

4. Ki kalité éprèv nou pouvé gen ?

⁴ Labib-a ka di ki « malò […] ka rivé tout moun » (Eccl. 9:11, Parole de Vie). Détan nou pouvé jwenn problèm tout moun ka jwenn (1 Cor. 10:13). Ouben ankò, détan nou ka soufri paské nou sa disip Jézi. Parèkzanp, yé pouvé ari di nou tèt, ouben yé pouvé éséyé baré nou chimen ouben menm pèrsékité nou akoz di nou lafwa (2 Tim. 3:12). Kèlkéswa éprèv nou ka jwenn, Jéova pouvé idé nou tchenbé ké kouraj. A sa i fè pou Jozèf. Annou wè kouman i fè sa.

5. Kisa Pitifar konprann asou Jozèf ? (Genèse 39:2-6).

⁵ (Li Genèse 39:2-6.) Jozèf té sa roun jennjan ki té vayan é ki té ka travay rèd. A sa Pitifar wè é i konprann poukisa. I randé so kò kont ki « Jéova té ké Jozèf. A pou sa Jozèf té ka rivé fè tousa i té ka fè b ». A pou sa Pitifar pran l’ pou i travay pou li. I bay li okipé di tousa i té gen. Kisa sa bay ? Zafè Pitifar té ka maché byen !

6. Kisa Jozèf pitèt rousanti ?

⁶ Imajiné sa Jozèf dèt rousanti. Kisa i té lé plis ? Ès i té lé Pitifar wè tout éfòr i té ka fè épi rékonpansé l’ ? Sa i té lé, a té soti di la épi routounen koté so papa, asiré pa pitèt. Paské menm si i té gen bokou rèsponsabilité, i té sa roun èsklav toujou, èsklav roun mèt ki té ka adoré fo bondjé. Jéova pa fè Pitifar libéré Jozèf. É sitiasyon Jozèf vin pi mal ankò.

7. a) Poukisa sitiasyon Jozèf vin pi mal ? (Genèse 39:14, 15) b) Kisa ki rivé Jozèf ?

⁷ Kou Genèse chapit 39 ka di, madanm Pitifar té ka trouvé ki Jozèf té sa roun  bèl boug, é plizyèr fwa, i éséyé fala l’. A chak fwa, Jozèf di non. Pou fini, tèlman fanm Pitifar té faché, i akizé li. I di ki i té éséyé vyolé l’ (li Genèse 39:14, 15). Atò, Pitifar mété Jozèf lajòl, é a la i rété pannan plizyèr lannen (Gen. 39:19, 20). Annan ki kalité lajòl Jozèf té fika ? Lò Genèse 40:15 ka palé di « lajòl », pitèt a té roun sitèrn ouben roun gran trou. Donk sa lé di ki i té ka fè nwè é ki Jozèf dèt krè ki i pa té gen pyès èspwar ankò (gadé nòt-a ki ka alé ké sa vèrsé-a.) Labib-a ka di osi ki pannan roun tan, so pyé ké so kou té maré ké fè (Ps. 105:17, 18). So sitiasyon té vin pi mal : anvan sa, i té sa roun èsklav so mèt té ka fè konfyans, mé aprézan i té sa roun senp moun ki té lajòl !

8. Si nou sitiasyon ka vin pi mal, di kisa nou pouvé sir ?

⁸ Ès to ja trouvé to kò annan roun sitiasyon ki té rèd menm épi magré tout lapriyè to fè sitiasyon-an vin pi mal ankò ? A roun bagaj ki pouvé rivé. Kou nou ka viv annan roun monn koté a Satan ki ka dirijé, nou blijé jwenn éprèv, é Jéova pa ka fè mirak pou protéjé nou di sa éprèv-ya (1 Jean 5:19). Mé i gen roun bagaj to pouvé sir : Jéova byen savé sa to ka viv é i ka gadé pou to (Mat. 10:29-31 ; 1 Pierre 5:6, 7). Anplis di sa, i ka promèt to : « Mo pa ké jen lésé to, é mo pa ké jen lagé to » (Héb. 13:5). Jéova pouvé idé to tchenbé menm lò yé té ké di to fin bat. A sa i fè pou Jozèf. Annou wè kouman i fè sa.

9. Kisa ki ka montré ki Jéova té la ké Jozèf pannan tout tan i té lajòl ? (Genèse 39:21-23).

⁹ (Li Genèse 39:21-23.) Menm pannan sa lannen-yan ki té rèd lò Jozèf té lajòl, Jéova té la ké li. Kouman i idé l’ ? Piti piti, chèf lajòl-a fè Jozèf konfyans, menm fason Pitifar té fè l’ konfyans. Chèf lajòl-a mété l’ rèsponsab asou ròt moun-yan ki té la. Labib-a jis ka di ki « chèf lajòl-a pa té ka véyé anyen di sa Jozèf té ka fè ». Aprézan, Jozèf té gen pou mété so lidé asou rounòt bagaj ; i té gen roun travay pou fè ki té itil. I pa té ka antann sa chanjman-an ! Kimoun ki té ké di ki yé té ké bay sa kalité travay-a pou moun-an yé té di ki i té vyolé madanm roun grotchap ? I gen rounsèl èsplikasyon : kou Genèse 39:23 ka di, « Jéova té la ké Jozèf é […] té ka fè tousa i té ka fè byen maché ».

10. Èspliké poukisa Jozèf pitèt pa té ka wè ki Jéova té ka fè tousa i té ka fè byen maché.

¹⁰ Éséyé imajiné sa Jozèf dèt rousanti. Apré yé manti asou li é yé mété l’ lajòl, ès to krè ki i té ka pansé ki Jéova té ka fè tousa i té ka fè byen maché ? Kisa i té plis anvi ? Ès i té lé chèf lajòl-a kontan so travay ? I té ké préféré yé di i té inosan épi yé libéré li, asiré pa pitèt. I jis doumandé rounòt moun ki té lajòl é ki yé té k’alé libéré, palé pou Faraon pou i té pouvé soti. I té ka èspéré ki sa moun-an té ké idé l’ soti di sa lajòl-a koté i té fika (Gen. 40:14). Mé, mouché-a pa palé pou Faraon di Jozèf lanmenm. Akoz di sa, Jozèf soti lajòl dé lannen pita (Gen. 40:23 ; 41:1, 14). Mé Jéova té ka kontinyé fè tousa i té ka fè byen maché. Kouman i té ka fè sa ?

11. Ki bagaj èspésyal Jéova pèrmèt Jozèf fè, é kouman sa idé pou so projè fèt ?

¹¹ Lò Jozèf té lajòl, Jéova fè Faraon fè dé rèv ki fè li réfléchi. Lò Faraon anprann ki Jozèf té pouvé fè moun savé  sa rèv-ya lé di, i voyé moun chaché l’. I té ka chaché toupatou roun fason pou i té savé sa sa rèv-ya té lé di. Gras a Jéova, Jozèf fè Faraon savé sa sa rèv-ya té lé di é konsèy i bay rwa Éjip-a fè rwa-a rété èstébékwé. Lò i wè ki Jéova té ké sa jennjan-an, Faraon bay li roun travay enpòrtan, a li ki té ka okipé di provizyon annan tout péyi Éjip (Gen. 41:38, 41-44). Pita, roun gro lafamin tonbé asou Éjip, mé osi asou Kanaan, koté fanmi Jozèf té ka rété. Aprézan, Jozèf té pouvé sové so fanmi é sa té lé di ki pita Mési-a té ké pouvé vini di so fanmi.

12. Poukisa nou pouvé di ki Jéova fè tousa Jozèf té ka fè byen maché ?

¹² Sonjé tout bagaj èspésyal ki rivé Jozèf. Kimoun ki fè Pitifar rémarké Jozèf lò i té sa roun senp èsklav ? Kimoun ki pousé chèf lajòl-a bay Jozèf roun travay enpòrtan alòr ki i té sa roun senp moun ki té lajòl ? Kimoun ki fè Faraon fè dé rèv ki fè li réfléchi épi kimoun ki bay Jozèf posibilité di kisa sa rèv-ya té lé di ? Kimoun ki fè Faraon mété Jozèf pou i okipé di provizyon-yan an Éjip ? (Gen. 45:5). A té Jéova, asiré pa pitèt : i té ka fè tousa Jozèf té ka fè byen maché. Frè Jozèf-ya té fè roun konplo pou tchwé li, mé Jéova fè sitiasyon-an chanjé nèt pou so volonté fèt.

13. Ès Jéova ka mété lanmen annan tousa ki ka rivé nou ? Èspliké.

¹³ Kisa istwè Jozèf ka anprann nou ? Ès Jéova ka mété lanmen annan tousa ki ka rivé nou ? Ès i ka jéré tout ti bagaj ki ka rivé nou annan nou lavi pou tout éprèv nou ka jwenn pa fèt pou anyen ? Non, a pa sa Labib-a ka ansényé (Eccl. 8:9 ; 9:11). Parkont, nou savé ki lò nou ka jwenn roun éprèv, Jéova byen savé sa é i ka kouté lò nou ka sipliyé l’ pou i idé nou (Ps. 34:15 ; 55:22 ; Is. 59:1). É i ka fè ankò plis ki sa : i ka idé nou tchenbé ké kouraj. Kouman i ka fè sa ?

14. Kouman Jéova ka idé nou lò nou annan roun éprèv ?

 ¹⁴ Jéova ka idé nou parèkzanp lò i ka konsolé nou épi ankourajé nou é souvan a jiskont lò nou bézwen (2 Cor. 1:3, 4). A sa i fè pou Eziz, roun frè ki ka rété Tirkménistan é ki yé kondané pou i fè dé lannen lajòl akoz di so lafwa. Men sa i ka di : « Jou-a yé té pou jijé mo, roun frè li Isaïe 30:15 pou mo, sa vèrsé-a ka di : “Men sa ki ké sa zòt fòrs : rété kalm é fè mo konfyans.” Sa vèrsé-a idé mo pou mo rété kalm épi pou mo konté asou Jéova pou tout bagaj. Tout tan mo té lajòl, mo pran tan byen réfléchi asou sa vèrsé-a, é sa idé mo bokou. » Ès to ka sonjé roun sitiasyon annan to lavi koté Jéova soutni to, konsolé to épi ankourajé to lò to té vréman bézwen ?

15-16. Kisa sa Tori viv ka anprann to ?

¹⁵ Souvan, a lò éprèv-a fini nou ka randé nou kò kont di tousa Jéova fè pou idé nou annan sa éprèv-a. A sa roun sò yé ka aplé Tori konprann. So pitit, Mason, briga ké roun kansèr pannan sis lannen é finalman i mouri. Tchò Tori té krazé, é nou ka konprann sa. Men sa i ka di : « Mo pa krè i gen roun bagaj ki pi rèd pou roun manman. » I ka di ankò : « Mo sir ki ròt papa ké manman ké dakò ké mo pou di ki, wè to timoun soufri sa pi rèd pasé lò to menm to ka soufri. »

¹⁶ Tori té boulvèrsé akoz di sa éprèv-a ki té rèd menm. Mé pita, i sonjé kouman Jéova té soutni li. « Jòdla, lò mo ka réfléchi, mo ka wè ki Jéova aji pou nou pannan tout tan mo pitit té malad. Parèkzanp, menm lò Mason té tro malad pou moun vini wè l’, nou frè ké sò-ya té  ka fè dé lèr larout pou vini lopital. Lasal pou antann-an pa té janmen vid ; i té toujou gen roun moun pou soutni nou. Anplis di sa, nou frè ké sò-ya toujou idé nou pou nou gen sa nou té bézwen. Menm lò bagaj-a té rèd menm, nou pa janmen manké anyen. » Jéova bay Tori kouraj pou i tchenbé é i fè menm bagaj-a pou Mason (gadé ti karé «  Jéova bay nou èkzaktéman sa nou té bézwen »).

17-18. Kisa ki ké idé nou wè épi kontan ké sa Jéova ka fè pou soutni nou annan nou éprèv ? (Psaume 40:5).

¹⁷ (Li Psaume 40:5.) Lò roun moun ki gen labitid monté montangn ka monté asou roun montangn, sa i lé, a rivé asou tèt montangn-an. Mé toupannan i ka fè so chimen, i gen roun patché koté i pouvé arété pou wè kouman tout bagaj jòlòt a so lantou. Menm fason-an, pran tan réfléchi asou fason Jéova ka soutni to lò to annan traka. Lò chak lajournen fini, éséyé sonjé omwen roun bagaj Jéova fè pou idé to tchenbé ké kouraj. Doumandé to kò : « Kouman Jéova béni mo jòdla ? Mo éprèv pa disparèt, mé kouman Jéova ka idé mo tchenbé magré sa éprèv-a ? ».

¹⁸ Pitèt to ka priyè pou Jéova fè to éprèv fini. Sa nòrmal, é i pa gen anyen ki mové annan sa (Phil. 4:6). Mé sonjé osi tout bénédiksyon i ka bay to aprézan. Sonjé ki sa i ka promèt to, a bay to fòrs épi idé to tchenbé. A pou sa, a pou to toujou gen rékonésans pou sa i ka fè pou idé to. Atò, to ké randé to kò kont ki, menm lò to an mitan éprèv-a, Jéova ka idé to tchenbé ké kouraj, kou i fè l’ pou Jozèf (Gen. 41:51, 52).