1, 2. (1) ¿Jamüsü nnojotka ponuin waaʼin sülatüle wamüin kasa kapüleesü? (2) ¿Kasa wekirajaainjatka anain sünain ekirajaayakat tüü?

 WAYAKANA aʼyataashiikana nümüin Jehová nnojotsü ponuin waaʼin sülatüle wamüin kasa kapüleesü, süka süküjatüjüliain tü Bibliakat sülatajatüin tia. Anuu tü sümakat: «Eʼrüinjana waya wamüliala palajana süpülapünaa nuluwataain Maleiwa waaʼu» (Aluw. 14:22, TNM). Watüjaa aaʼu sajaʼttinneerüin waneirua kasa mojusü alataka wamüin nuluwataʼaleepa Maleiwa saaʼu tü Mmakat, nikeraajapa pütchikat tüü: «Müiria nnojolüin ouktaa, mojuu aaʼin, aʼyalajaa, je saalii ayuulii» (Alat. Map. 21:4).

² Mayaainjeʼe nuuʼulaain Jehová weʼrüin müliaa, nükatchinrüin waaʼin süpüla wachecherüin waaʼin soʼunnaa tia. Jülüja waaʼin tü nümakat chi aluwataaushikai Pablo namüin na anoujashii kepiakana chaa Roma. Anuu tü nüshajakat namüin süchikijee nüküjain tü müliaa niʼrakat namaa na nuwalayuukana: «Oʼttaapejeʼe waya süchikumüin süpüshuaʼa tia makalü sutuma wakaalinjünüin nutuma chi aikai apüla waya» (Roma 8:35-37, TNM). Wayaawata aaʼu sükajee tia eein süpüla anain wakuwaʼipa nutuma Jehová soʼunnaa müliaa. Wekirajaa süchiki tü naaʼinrakat Jehová nüpüleerua José süpüla anain nukuwaʼipa otta tü naaʼinrakat süpüla nükaalinjain waya maaʼulu.

3. ¿Jamüsü sülatalaʼa sümaka wanee kasa nümüin José?

³ Watüjaa aaʼu aishaatain José nüpüla Jacob (Gén. 37:3, 4). Aʼürülaanüshi José natuma na nuwalayuukana sutumajee tia. Neʼrapa waneinnua oikaalii chejeʼewalii Madián noiküin José namüin jee namaashi nia chaa Egiptomüin, wattasü tia mmakat. Nuikünaka nümüin Potifar, wanee aʼyataai nümüin faraón. Alatalaʼa müsü wanee kasa nümüin José. Anapuʼusü nukuwaʼipa  paala nümaa chi nüshikai, shiasaʼa jooluʼu achepchieeshi nia atumawaa chaa Egipto (Gén. 39:1).

4. ¿Kasa eeka süpüla sülatüin wamüin maʼaka sülatüin nümüin José?

⁴ Süküjain tü Bibliakat «eein süpüla sülatalaʼa sümüin kasa» wamüin (Ecl. 9:11). Eesü sülatüle wamüin tü kasa alatakat sümüin wayuu süpüshuaʼa (1 Cor. 10:13). Eeshiijaʼa süpüla waturaanüin, eesüjaʼa süpüla shiyoutunüin wapüleerua woushikajaain süchiirua nukuwaʼipa Jesús sümaa süpüleeruaanüin waaʼin saaʼujee tia (2 Tim. 3:12). Jaʼitairü kasain alatüin wamüin, eesü süpüla anain wakuwaʼipa nutuma Jehová. Wekirajaa süchiki tü naaʼinrakat nüpüleerua José.

5. ¿Jamüsü nütüjaaka saaʼu Potifar eein Jehová nümaa José? (Génesis 39:2-6).

⁵ (Paashajeʼera Génesis 39:2-6). Niʼrüin Potifar niain José wanee jimaʼai atüjakai maʼin otta tütükai maʼin, nütüjaa aaʼu eein Jehová nümaa José süka anain sukuwaʼipa süpüshuaʼa tü naaʼinrakat. b Eʼitaanüshijeseʼe nia nutuma Potifar «sünain aluwatawaa suluʼu tü nipiakat sümaa najapuluʼuin süpüshua tü kasa eekat nümaʼana». Anakalaka nukuwaʼipa Potifar nünainjee José.

6. ¿Jamüsüche naaʼin José sutuma tü alatakat nümüin?

⁶ Maa sülatakai wamüin tü alatakat nümüin José. ¿Kasache keeʼireeka maʼin naaʼin? ¿Shiache keeʼireeka naaʼin niyaawatüin saaʼu Potifar anain maʼin tü niʼyataainkat süpüla anain nukuwaʼipa nutuma? Nnojotsü shiain tia. Tü keeʼireekat naaʼin shia taashinjachin nia atumawaa suulia achepchiee jee nüleʼejüinjachin nüchikuaʼa eemüin chi nüshikai. Jaʼitasüjaʼa anain maʼin nukuwaʼipa nutuma Potifar, ayatüshia nüchepchiain nia wanee wayuu aʼwaajakai maleiwayaasü. Nnojotsü niʼitaain Jehová suluʼu naaʼin Potifar nüjütüinjachin nüchiki José. Jee müsia akooʼomüinraajeerü tü nümülialakat José.

7. ¿Jamüsü sükooʼomüinraaka tü müliaa niʼrakat José? (Génesis 39:14, 15).

⁷ Maʼaka süküjain Génesis kapiitulo 39, müliasü niiʼiree José tü nuʼwayuusekat Potifar, kojuyatua sünüiki nümüin shiiʼiree süinkaain  nümaa, nnojotpejeʼe naaʼinrüin tia José. Jashichikalaka shia nümüin sümaa süküjain nüchiki nütaüjaweein shia (paashajeʼera Génesis 39:14, 15). Naapapa Potifar süchiki tia, nüpüreesajitka José soʼu kojuya juya (Gén. 39:19, 20). ¿Jamapuʼusü sukuwaʼipa tü kaatset kaluʼujachikai José? Tü pütchi nüküjakat José suluʼu hebreo süpüla nüküjain sukuwaʼipa eejachire püreesain nia, «ishi» maluʼulu tia wayuunaikiruʼu. Antajaasü wekiiruʼu sünainjee tia, kojoin maʼin piʼyuushi suluʼu sümaa keemain maʼin shia (Gén. 40:15, noota, TNM). Süküjain tü Bibliakat wainmain kaʼi kapükalü oʼu atumawaa nuuʼui José otta kaleenaluʼushi nia nunutpünaa (Sal. 105:17, 18). Akooʼomüinraasia maʼin tü müliaa niʼrakat José, anapuʼusü nukuwaʼipa wanaa sümaa achepchieein nia, shiasaʼa jooluʼu süka püreesain nia mülialeeshia maʼin.

8. ¿Kasa anasü weʼraka mayaainjeʼe sükooʼomüinraain tü müliaa weʼrakat?

⁸ Eesüjaʼa sükooʼomüinraale tü müliaa weʼrakat mayaainjeʼe wachuntuin maʼin kaalinwaa nümüin Jehová. Nuuʼulaain Jehová müliain waya naʼaka na wayuu nuluwataakana aaʼu Satanás (1 Juan 5:19). Watüjaapejeʼe saaʼu jülüjain naaʼin chi Washikai Maleiwa tü kasa alatakat wamüin jee nümüliajüin waya (Mat. 10:29-31; 1 Ped. 5:6, 7). Anuu wanee pütchi nüpansaajaka wamüin: «Nnojoleechi taya oʼunüin jümaʼanajee. Nnojoleena tapütüin jia jümüiwa» (Heb. 13:5). Süka nükaalinjain waya Jehová, eesü süpüla wachecherüin waaʼin soʼunnaa tü müliaa weʼrakat, tü mepikat saaʼin wamüin. Tia shia tü naaʼinrakat nüpüleerua José.

9. ¿Jamüsü watüjaaka saaʼu eejachin Jehová nümaa José soʼunnaa tü juya püreesakalü oʼu nia? (Génesis 39:21-23).

⁹ (Paashajeʼera Génesis 39:21-23). Anasü nukuwaʼipa José nutuma Jehová soʼunnaa niʼrüin maʼin müliaa. ¿Kasa anasü niʼiraka José? Maʼaka kojutuin nia nümüin Potifar, kojutushiaʼaya nia nümüin chi sülaülashikai tü kaatsetkat, chi eʼitaakai nia süpüla laülaain naaʼu na püreesashiikana. Süküjain tü Bibliakat nnojoluin nüshapataain aaʼin chi sülaülashikai tü kaatsetkat sooʼopünaa tü najapuluʼukat José. Süka wainmain maʼin niʼyataain José, nnojotsü naaʼinmaain maʼin tü kasa mojusü alatakat nümüin. ¿Jamakuwaʼipatche süpüla saapünüin laülawaa nümüin wanee wayuu alirajünakai sünain nütaüjaweein nuʼwayuuse wanee wayuu niʼipajachikai faraón sünain aluwatawaa? Niajaʼa neʼe Maleiwa makaʼa atuma nia. Müsü Génesis 39:23: «Niʼitaain Jehová sümaa anain sükuaippa süpüshua tü kasa naainjakat José, süka eein nia nümaa waneepia».

10. ¿Kasache eeka süpüla süntajaain nikiiruʼu José sutuma mojukuwaʼipalüin tü alatakat nümüin?

¹⁰ Maa sülatakai wamüin tü alatakat nümüin José. Sutuma laülaain nia naaʼu na püreesakana, ¿nnojotsüche kasajatüin nümüin nülirajünüin paala jee püreesain nia? Jülüjataa waaʼin tüü: ¿kasache keeʼireeka maʼin naaʼin José?, ¿shiache anain nüshoʼu nümüin chi sülaülashikai tü kaatsetkat? Nnojo, nnojotsü shiain tia. Eesüjaʼa keeʼireere naaʼin sütüjaanüin aaʼu maainjalain nia jee nüjütünüinjachin achiki. Nuchuntuin José nümüin wanee püreesashi ajütünüinjachikai achiki, naashajaain nüpüleerua nümüin faraón nüjütirüinjachin nüchiki suluʼujee tü kaatsetkat (Gén. 40:14). Alatüsü piama juya nnojoluin eein naashajaayaain chia wayuukai nümaa faraón nüchiki José (Gén. 40:23; 41:1, 14). Ayatüsia anain nukuwaʼipa José nutuma Jehová. ¿Kasa naaʼinraka Jehová nüpüleerua?

11. (1) ¿Kasa nuuntaka José nutuma Jehová? (2) ¿Jamüsü süpüla shikeraajüin tü keeʼireekat naaʼin Jehová sünainjee tia?

¹¹ Sümaʼinruʼu chajachin José püreesain, aʼlapüjaashi chi aluwataaikai saaʼu Egipto sümaa  piamasü lapü nutuma Jehová. Nütüjawee maʼin aaʼu jamaluʼuluin tü nüʼlapüinkat. Nütüjaapa saaʼu eein süpüla nüküjain José jamaluʼuluin tü nüʼlapüjaakalü amaa, nüsaajirüin nia. Süka nükaalinjünüin José nutuma Jehová, nuuntuin nüküjain jamaluʼuluin tü nüʼlapüjaakalü amaa faraón otta tü naaʼinrajatkat faraón. Ponusü maʼin naaʼin faraón niyaawatapa saaʼu eein Jehová nümaa chi jimaʼaikai. Niʼitaka nia laülaain saaʼu tü eküülü suluʼukat tü mmakat Egipto (Gén. 41:38, 41-44). Jee mapa maʼin, antüsü wanee jamü aisü maʼin suluʼumüin tü mmakat Egipto jee müsia suluʼumüin tü mmakat Canaán eejanale kepiain na nüpüshikana José. Süka laülaashin José, eeshii süpüla nükaalinjain na nüpüshikana, na nutuushinuuinjanakana chi Mesíaskai.

12. ¿Kasa naaʼinraka Jehová süpüla anain nukuwaʼipa José?

¹² Jülüjataa waaʼin tü alatalaʼa makat nümüin José. ¿Jaraiche chi eʼitaakai suluʼu naaʼin Potifar süpüla naapüin laülawaa nümüin wanee achepchiee? ¿Jaraiche chi eʼitaakai suluʼu naaʼin chi sülaülashikai tü kaatsetkat süpüla niʼitaainjachin nia nooʼopünaa na wane püreesakana? ¿Jaraiche chi aʼlapüjeʼerakai faraón? ¿Jaraiche chi aküjakai nümüin José jamaluʼuluin tü nüʼlapüinkat? ¿Jaraiche chi eʼitaakai suluʼu naaʼin faraón süpüla laülaainjachin nia nutuma saaʼu tü eküülü suluʼukat tü mmakat Egipto? (Gén. 45:5). Niaʼala neʼe Jehová akaalinjakai José süpüla anainjatüin süpüshuaʼa tü kasa naaʼinrakat. Nuʼwanajeʼerüin Jehová tü kasa mojusü alatakat nümüin José natuma na nuwalayuukana süpüla nikeraajüin tü keeʼireekat naaʼin.

13. ¿Naaʼinmajüinche waya Jehová waneepia suulia sülanüin kasa mojusü wamüin?

¹³ Eesü tü watüjakat sünainjee tü alatakat nümüin José. ¿Naaʼinmajüinche waya Jehová waneepia suulia sülanüin kasa mojusü wamüin? ¿Alejatche nutuma Maleiwa sülatüin kasa mojusü wamüin süpüla anainjatüin wakuwaʼipa? Nnojotsü süküjain tia tü Bibliakat (Ecl. 8:9; 9:11). Anuu tü watüjaakalü aaʼu: soʼunnaa weʼrüin müliaa nütüjaa aaʼu Jehová tü alatakat wamüin otta eemaatüshi nia wachuntapa kaalinwaa nümüin (Sal. 34:15; 55:22; Is. 59:1). Jee müsia, nükaalinjain waya süpüla watüjain  süpüleerua wakuwaʼipa soʼunnaa weʼrüin müliaa. ¿Jamüsü sukuwaʼipa nutuma?

14. ¿Kasa naaʼinraka Jehová wapüleerua soʼunnaa müliaa?

¹⁴ Nütütüleʼerüinña waaʼin Jehová soʼu tü kaʼi choʼujaakalü oʼu shia wamüin (2 Cor. 1:3, 4). Tia shia tü niyaawatakalü aaʼu Eziz, wanee wawala chejeʼewai Turkmenistán. Aküjünüsü nümüin püreesainjachin nia soʼu piama juya saaʼujee nunoula. Anuu nünüiki: «Tamaanapa laülaapialuʼu naashajeʼerüin tamüin wanee wawala tü sümakat Isaías 30:15, tü makat: ‹Jüchechereerü jaaʼin müleka nnojorüle shapaain maʼin jaaʼin otta jiʼitaale jaaʼin tanain›. Jimatüsü taaʼin sutuma tia pütchikat otta teʼitaain maʼin taaʼin nünain Jehová. Katchinsü taaʼin soʼunnaa püreesain taya sutuma tia wetsiikulokot». ¿Sotojoosüche waaʼin wanee kaʼi eere nükatchinrüin waaʼin Jehová sümaa nümülialüin waaʼin soʼunnaa müliaa?

15, 16. ¿Kasa watüjaka sünainjee tü alatakat sümüin Tori?

¹⁵ Eesüjaʼa wayaawatüle saaʼu tü naaʼinrakat Jehová süpüla nükaalinjain waya walatapa süchikumüin wanee müliaa. Tia shia tü alatakat sümüin wanee wawala kanüliasü Tori, Mason nünülia chi süchonkai. Anaajaashi nia aipirua juya süchikijee ayuulin nia sutuma kanset. Mojushaatasü saaʼin Tori sutuma tia. Anuu sünüiki: «Nnojotsü eeirüin wanee müliaa alataka tamüin makalü aka saaʼin tüü [...]. Aisü maʼin wamüin weʼrüle müliain wanee wachon suulialeʼeya müliain waya, eesüjaʼa süpüla wanaawain naaʼin tamaa na kachonshiikana, na alatakana amüin tia».

¹⁶ Mayaainjeʼe aishaatain sümüin Tori tü alatakat sümüin, jülüjasü saaʼin mapa tü naaʼinrakat Jehová süpüla nükaalinjain shia. Anuu sünüiki: «Sotopa taaʼin tü kaʼi ayuuikalü oʼu chi tachonkai, tayaawata aaʼu nükaalinjain taya Jehová. Wanaa sümaa mayein maʼin Mason,  oʼunushii na wawalayuukana pitaaraluʼu mayaainjeʼe nnojoliin nekerotinnüin eejachire nia. Yalashii waneepia na wawalayuukana süpüla nakatsüinrüin waaʼin mayaainjeʼe piamain oora noʼunajatka oʼu süpüla nantajanain wamaʼanamüin. Asülajüshiʼiya naya nneerü wamüin. Soʼunnaa tia nnojotsü kasain choʼujaain wamüin». Nükatsüinrüin Jehová saaʼin Tori nümaa Mason soʼunnaa tia müliaakat (paashajeʼera tü pütchikat « Nükaalinjain waya Jehová soʼu tü kaʼi choʼujaakalü oʼu shia wamüin»).

17, 18. (1) ¿Kasa waaʼinrajatka süpüla wayaawatüin saaʼu tü naaʼinrakat Jehová wapüleerua soʼunnaa müliaa? (Salmo 40:5). (2) ¿Kasa waaʼinrajatka süpüla kojutuin tia wamüin?

¹⁷ (Paashajeʼera Salmo 40:5). Eeshi wayuu kamalainkai amüin nüliikajaain saaʼu uuchi süpüla chain nia süraloʼumüin. Sümaʼinruʼu nüliikajaain, eeshi nüshaʼwalaʼawaire süpüla niirakaain sümüin tü jaʼyakat saaʼujee tü uuchikat. Tia müsü aka saaʼin jülüjawaire waaʼin tü naaʼinrakat Jehová wapüleerua soʼunnaa wanee müliaa. Sajaʼttapa wanee kaʼi, wasakira waaʼin sünain tüü: «¿Kasa anasü teʼraka soʼukaitpa nutuma Jehová? Mayaainjeʼe ayatüin teʼrüin müliaa, ¿kasa naaʼinraka Jehová süpüla nükatchinrüin taaʼin?». Jülüja waaʼin soʼukaiwai wanee kasa anasü weʼraka nutuma Jehová.

¹⁸ Nnojotsiaajeʼe mojuin wachuntule nümüin Jehová nüsünneʼerüin woulia tü müliaa weʼrakat (Filip. 4:6). Nnojotsü anain motule waaʼin tü kasa anasü weʼrakat maaʼulu nutuma Jehová. Nüküjain Jehová nükaalinjeenain waya süpüla wachecherüin waaʼin soʼunnaa müliaa. Waapa analuʼut nümüin soʼukaiwai saaʼujee tü kasa anasü naaʼinrakat wapüleerua. Waaʼinrüle tia, wayaawateerü aaʼu nükaalinjain waya Jehová maʼaka naaʼinrüin shia nüpüleerua José (Gén. 41:51, 52).