1-2. (a) Beni n sɔi ti la ka eŋɛ to pakerɛ la yeledaaŋɔ n paari to la? (b) To wan sɔsɛ la bem zaseŋɔ wa poan?

 TOMAM n de Yehowa nereba la, la ka eŋɛ to pakerɛ la yeledaaŋɔ n paari to la. To mi ti Baabule la yeti, ‘to wan doose la mɛlesegɔ zo’e zo’e poan nyaŋɛ kɛ̃ Naayinɛ Na’am la poan.’ (Tm. 14:22) To le baŋɛ ti to yeledaaŋɔ ase’a wan maalɛ la Naayinɛ tinpaalega la poan. Bilam ti ‘kum kan le bɔna, susa’aŋɔ la kaasega la induma kan le bɔna.’​—Lil. 21:4.

² Yehowa ka gu’uri ti yeladaaŋɔ da paara tɔ. Ge a ni soŋɛ to mɛ ti to ta’an ŋmibe ze’ele de poan. Bisɛ tuuntuna Paul n yuun tɔɣɛ sɛla bo Arom Kristakɔma la. A yuun tɔɣɛ pa’alɛ yeledaaŋɔ n yuun paɛ eŋa la a mabiisi la se’em mɛ. A yuun gulesɛ yeti: ‘Yele ana woo poan, to kɔ’ɔn zabera nyaŋera mɛ doose la mina n nɔŋɛ to la poan.’ (Arom 8:35-37) Wana pa’alɛ ti Yehowa ta’an soŋɛ hɔ ti ho nyɛ nɛŋa tɔlega hali la ho yeledaaŋɔ la poan. Basɛ ya ti to bisɛ ya Yehowa n yuun soŋɛ Yosef se’em, la eŋa n wan ta’an soŋɛ hon me se’em.

3. Bem yele n yuun di’i Yosef?

³ Yakob yuun basɛ ti la niɛ peelumi ti a nɔŋɛ a dayɔa  Yosef mɛ paa. (Pin. 37:3, 4) Bala zuo la, Yosef keendoma nini yuun tɛ̃ti la en mɛ. Se’em ma’a ti ba yuun nyɛ yɔ’ɔ la, ba yuun koose Yosef bo la Media tiŋa leebegodoma. Leebegodoma la yuun dekɛ Yosef keŋɛ la mɛɛla zo’e zo’e ta paɛ Egypt. Bilam ti ba me yuun koose Yosef bo Potifar n de Faro soogɛpa nɛŋadaana la. Bisɛ Yosef bɔŋa zɛ’an n yuun tee kalam se’em! Eŋa n yuun de a sɔ bipũ’userɛ, nyaa ta lebege yameŋa bɔna Egypt tiŋa poan.​—Pin. 39:1.

4. Sodeni poan ti yeledaaŋɔ seko n yuun paɛ Yosef la, me wan ta’an paɛ tɔ?

⁴ Baabule la yeti, “yelebe’ero paari nɛra woo mɛ.” (Pa. 9:11, Holy Bible​—Easy-to-Read Version) Saŋa ase’a, yeledaaŋɔ paari nɛra woo mɛ. (1 Ko. 10:13) Namesegɔ ta’an paɛ tɔ, ton de Yezu podɔleba la zuo. Makerɛ, ba ta’an ɛ̃regera tɔ bii yaɛ tɔ, to sakerɛ la zuo. (2 Tim. 3:12) Ge la ka pakɛ la yeledaaŋɔ seto n paari tɔ, Yehowa wan soŋɛ tɔ ti to ta’an ŋmibe de poan. A yuun eŋɛ la wani soŋɛ Yosef?

5. Potifar yuun tɔɣɛ la bem, la Yosef n yuun nyɛti nɛŋa tɔlega se’em la? (Pin’ileŋɔ 39:2-6)

⁵ Kaalɛ Pin’ileŋɔ 39:2-6. Potifar yuun baŋɛ ti Yosef dela bunbilipaalega n mi tuuma ge me tuna la a paŋa za’a. A me yuun mi sɛla n sɔi mɛ. Potifar yuun nyɛ ti, ‘Yehowa n basɛ ti sɛla woo ti Yosef ita la, ita soŋa.’ b Egypt nɛra wa yuun ta basɛ ti Yosef dɛna la a tuuntuna. A yuun le basɛ ti Yosef sɔna a yire la za’a bisera mɛ. Bem n yuun ze’ele bim na? La yuun basɛ ti Potifar pãrɛ mɛ.

6. La yuun ta’an ana Yosef la wani a bɔŋa la poan?

⁶ Makɛ bisɛ la yuun ta’an ana Yosef se’em. A yuun wan bɔta la bem gana za’a? A yuun wan bɔta la Potifar pɛ̃ɣɛ en ge yɔ en? Daanse’ere Yosef n yuun boti sɛla dela, ba basɛ en ti a ta’an lebe a sɔ zɛ’an. La ka pakɛ la yɔ’ɔ seto woo ti Yosef yuun tara Potifar yire la poan, a yuun kelum dɛna la yameŋa, ti a kpɛ’ɛma kãabera baɣa. Yehowa yuun ka eŋɛ sɛla ti Potifar basɛ ti Yosef bɔna fai.  Yosef bɔŋa la yuun nyaa yeti la sa’am gaam la be’ero.

7. Sodeni poan ti Yosef bɔŋa la yuun gaam be’ero? (Pin’ileŋɔ 39:14, 15)

⁷ Wuu Pin’ileŋɔ a zuo 39 n pa’alɛ se’em la, Potifar pɔɣa yuun boti Yosef mɛ ge yuun tiregɛ sugumnɔɔrɛ zo’e zo’e ti a belege Yosef ti a gã’arɛ la en. Saŋa woo, Yosef yuun ni kɔ’ɔn zaɣesɛ en mɛ. Pooren, a sunsɔa n yuun nyie la Yosef ti a parum bo Yosef ti a yeti a zɛ eŋa mɛ. (Kaalɛ Pin’ileŋɔ 39:14, 15.) Potifar n yuun wum yele wa la, a yuun basɛ ti ba paɣɛ Yosef mɛ. Yosef yuun boi la sarega yuuma zo’e zo’e. (Pin. 39:19, 20) Sarega deo la yuun ani la wani? Hebru poan, Yosef n yeti ‘sarega’ la, vuurɛ ta’an dɛna ‘lua’ bii ‘boko.’ La pa’alɛ ti eŋa n yuun boi zɛ’an la yuun ani la ligam ti la ana wuu ŋmɛregerɛ zɛ’an ka boi. (Pin. 40:15) Leyɛ’ɛsa, Baabule la yeti saŋa kayima, ba yuun ba Yosef nama la a yugela la kuto. (Ym. 105:17, 18) Yosef yele la yuun gaam la be’ero. A yuun dela yameŋa ti a kpɛ’ɛma bisɛ nam en ge nyaa ta bɔna sarega.

8. To yeledaaŋɔ la san ba’ɛ gaŋɛ nu’usi, to wan ta’an tara sakerɛ la bem poan?

⁸ Hon tabelɛ bɔna yele poan ti la sa’am gaam be’ero, hali la hon zusɛ Yehowa se’em la za’a? Bala ta’an paɛ hɔ ge Yehowa kan gu, ti yeledaaŋɔ kan paɛ tɔ Sitaana tiŋa wa poan. (1 Yo. 5:19) Ge tɛ̃ra yeledena wa: Yehowa mi yelese’a n paari ho la mɛ ge me fabela ho yele. (Mt. 10:29-31; 1 Pe. 5:6, 7) Leyɛ’ɛsa, a pu’ulum biŋe ti: ‘Mam kan malum basɛ hɔ, n me kan malum zaɣesɛ hɔ.’ (Heb. 13:5) Yehowa wan soŋɛ hɔ ti ho ŋmibe ze’ele, hali ho bɔŋa la san puɣum ana wuu ŋmɛregerɛ zɛ’an ka boi me la. To bisɛ Yehowa n yuun soŋɛ Yosef se’em.

9. Bem n pa’alɛ ti Yehowa yuun soŋɛ Yosef mɛ, se’em ma’a ti a yuun bɔna sarega la? (Pin’ileŋɔ 39:21-23)

⁹ Kaalɛ Pin’ileŋɔ 39:21-23. Hali Yosef n yuun boi sarega ti la wuna en la, Yehowa yuun soŋɛ en mɛ. Sodeni poan? Yosef yuun dela mina ti sarega bisegadaana la yuun bisɛ nam en wuu Potifar n yuun geele en se’em yia la. Pooren, bisegadaana la yuun basɛ mɛ ti Yosef bisera sɛba woo n boi sarega la poan. Baabule la yeti, ‘kpɛ’ɛma la n dekɛ sɛla woo eŋɛ Yosef nu’usin la, a paleŋa ka ɛ̃ɣeri.’ Yosef yuun nyaa tari tuuma mɛ tuna ti a puti’irɛ za’a bɔna bim. Yele wa yuun dela yelesaanɛ. La wan eŋɛ la wani ti nɛra ti ba yeti a zɛ la nayire tuuntuna pɔɣa, nyaa ta tara kpe’eŋo bala? Nɛra ayina ma’a n wan ta’an basɛ ti wana wa eŋɛ. Pin’ileŋɔ 39:23 yeti, ‘Yehowa n boi la Yosef, ti sɛla woo ti a ita la, ita soŋa.’

10. Tɔɣɛ pa’alɛ sɛla n sɔi ti Yosef yuun ta’an ti’isa ti eŋa ka nyɛ soŋerɛ sɛla woo poan.

¹⁰ Le ti’isɛ bisɛ la yuun ani Yosef se’em, ban yuun parum bo en ge paɣɛ en la. Hon ti’isɛ ti a yuun bisɛ ti eŋa nyɛ soŋerɛ a yɛla woo poan? Yosef yuun boti la bem gana za’a? A yuun wan bɔta la sarega kpɛ’ɛma la yeen nɔŋɛ a yele? Daanse’ere Yosef yuun boti la ba yeti a ka tari taalɛ ge yu’ɛ en basɛ. Ban yuun yeti ba yu’ɛ nɛra ayima sarega poan la, Yosef yuun yele en ti a keŋɛ ta tɔɣɛ bo Faro ti ba me yu’ɛ en basɛ. (Pin. 40:14) Ge ban yuun yu’ɛ buraa wa basɛ la, a yuun ka sɔsɛ la Faro. Bala zuo la, Yosef yuun yee sarega la poan le paɛ la yuuma ayi.  (Pin. 40:23; 41:1, 14) Ge Yehowa yuun kelum soŋera Yosef mɛ. Wani wani?

11. Yehowa yuun basɛ ti Yosef ta’an ita la bem n boi de to’ore ge bala yuun soŋɛ ti Yehowa puti’irɛ tum tuuma la wani?

¹¹ Yosef n yuun boi sarega la, Yehowa yuun basɛ ti Egypt naba Faro zaasum la sugumnɔɔrɛ buyi ti a suure sa’am. Faro yuun kɔ’ɔn bɔta la a baŋɛ zaaseŋɔ wa vuurɛ. Naba la n yuun ta baŋɛ ti Yosef ta’an pa’alɛ zaaseŋɔ vuurɛ la, a yuun tum mɛ ti ba yi en na. Yehowa yuun soŋɛ Yosef mɛ ti a ta’an pa’alɛ zaaseŋɔ la vuurɛ ge ka’am Faro. Faro yuun baŋɛ ti Yehowa n soŋeri Yosef. Bala zuo la, Faro yuun nyaa loe la Yosef ti a bisa Egypt tiŋa za’a dia yɛla. (Pin. 41:38, 41-44) Pooren, kom biɣelega n yuun sige Egypt tiŋa la Kanaan tiŋa n de tinsɛka ti Yosef yizuodoma yuun bɔna la. Nananawa Yosef yuun ta’an faaɛ a yizuodoma basɛ, la wan eŋɛ se’em ti Mɛzaaya la doose ba tuusum poan na.

12. Sodeni poan ti Yehowa yuun basɛ ti Yosef nyɛta nɛŋa tɔlega?

¹² Ti’isɛ bisɛ yelese’a n yuun eŋɛ Yosef vom poan. Ani n yuun basɛ ti Potifar puti’irɛ lebe Yosef n de yameŋa la poan? Ani n yuun basɛ ti sarega kpɛ’ɛma la nɔŋɛ Yosef n boi sarega poan la yele? Ani n yuun basɛ ti Faro zaasum zaaseŋɔ ti la daam en ge me bo Yosef mi’ilum ti a ta’an pa’alɛ zaaseŋɔ la vuurɛ? Ani n yuun basɛ ti ba loe Yosef ti a dɛna dia bisegadaana Egypt tiŋa poan? (Pin. 45:5) La niɛ peelumi ti Yehowa n yuun basɛ ti sɛla woo ti Yosef ita la, tɔla nɛŋa. La boi bim ti Yosef suurɔ la yuun boti la ba ku en ge Yehowa yuun doose la bala poan basɛ ti a puti’irɛ tum tuuma.

13. Yehowa ni kɔ’ɔn te’ele to mɛ sɛla woo poan? Tɔɣɛ pa’alɛ.

¹³ To zamesɛ la bem Yosef yele la poan? Yehowa ni kɔ’ɔn te’ele to mɛ sɛla woo poan? A ni basɛ ti yelebe’ero woo n paari to la, ta lebege la yelesonɛ? Aayi. Baabule la ka pa’alɛ bala. (Pa. 8:9; 9:11) Ge to mi ti, Yehowa mi gurebisɛ se’a woo  n paari tɔ ge me wuna ton kaaseri ɛɛra a soŋerɛ la. (Ym. 34:15; 55:22; Isa. 59:1) Ge daɣɛ bala ma’a. Yehowa wan soŋɛ tɔ ti to ta’an ŋmibe gurebisɛ woo poan. Sodeni poan?

14. Yehowa ni soŋɛ to la wani, la san wuna tɔ?

¹⁴ Sore deyima poan ti Yehowa soŋera to dela, a ni buɣelɛ la to suure, sansɛka n nari poan. (2 Ko. 1:3, 4) A yuun buɣelɛ mabia Eziz n ze’ele Turkmenistan tiŋa suure la bala. Ba yuun paɣɛ en la yuuma ayi, a sakerɛ zuo. A yeti, “bulika sɛka ti ba yuun yeti ba gãkɛ mam la, mabia ayima n yuun pa’alɛ mam Isaiah 30:15 n yeti: ‘Ya san sirum dekɛ yamea delum mam bãalam, n wan basɛ ti ya kpe’em.’ Gulesegɔ wa yuun soŋɛ mam ti mam ana la bãalam ge dekɛ n mea delum Yehowa sɛla woo poan. Mam n yuun ti’iseri gulesegɔ wa yele taɣesa la, yuun soŋɛ mam mɛ, mam n yuun boi sarega la. Hon tɛ̃ri se’em ma’a ti Yehowa daa buɣelɛ ho suure, sansɛka ti la wuna hɔ la?

15-16. Hon zamesɛ la bem Tori yele la poan?

¹⁵ Saŋa zo’e zo’e poan, wuŋerɛ la ni ta tole mɛ ti to nyaa ni baŋɛ Yehowa n soŋɛ to se’em. Mabipɔka ayima yu’urɛ n de Tori sakɛ ti yele wa dela yelemɛŋɛrɛ. A bia Mason ti ɔ̃berega bã’a yuun tara en yuuma ayoobi ge ti a nyaa yuun ta ki. Tori suure yuun sa’am mɛ paa. A yeti, “mam mi ti dɔɣereba basɛba me wan sakɛ ti ho bia san namesa, la wuni ho mɛ gana homea san namesa.”

¹⁶ La boi bim ti Tori suure yuun sa’am mɛ la a bia la n namesɛ se’em la ge pooren a yuun baŋɛ ti Yehowa n soŋɛ en. A yeti, “mam san ni tiɛ sankaŋa la, mam baŋɛ ti Yehowa soŋɛ mam mɛ, mam bia  la bã’a la poan. Mason yuun ba’ɛ bɛ̃’ɛra mɛ kan ta’an baŋɛ nɛra. Ge mabiisi la yuun ni ze’ele la zɛ’an n zãɛ keŋɛ asibitin la. Saŋa woo, ba yuun ni laɣum bɔna asibitin la poan mɛ ti ba soŋɛ. Leyɛ’ɛsa, mabiisi la yuun soŋɛ to mɛ ti to nyɛ yelese’a n pakɛ tɔ. Hali la yuun kpe’em bo to la, to yuun nyɛti sɛla n pakɛ to mɛ saŋa woo.” Yehowa n yuun soŋɛ Tori la a bia Mason ti ba ta’an ŋmibe.​—Bisɛ daka la zuo n de, “ Yehowa Yuun Kɔ’ɔn Bɔ’ɔra To La Sɛla N Pakɛ Tɔ.”

17-18. Bem n wan soŋɛ ti to baŋɛ Yehowa n soŋeri to se’em yeledaaŋɔ poan? (Yooma 40:5)

¹⁷ Kaalɛ Yooma 40:5. Nɛra san zɔna zoore, a puti’irɛ dela a zom ta paɛ zoore la saazuo sa. Ge zoore la tari la zɛ’ɛsi ti a wan ta’an teke ge bisɛ zɛ’ɛsi la n som se’em. Bala mea nɔɔ, ho san ŋmibera yele poan, nyɛta nɛŋa ti’isera Yehowa n soŋeri ho se’em. Dabeserɛ woo poan, ni soke homea yeti: ‘Yehowa soŋɛ mam la wani zina? La boi bim ti n yeledaaŋɔ la kelum bɔna mɛ ge Yehowa soŋeri mam la wani ti n ta’an ŋmibera?’ Ni tiregɛ ti’isɛ baŋɛ yelese’a ti Yehowa eŋɛ soŋɛ hɔ.

¹⁸ Yelemɛŋɛrɛ, ho ta’an zusa ti Yehowa soŋɛ hɔ ti yeledaaŋɔ la basɛ. Bala dela putɛsonɛ. (Flp. 4:6) Ge la nari ti to mina yelese’a ti Yehowa soŋɛ tɔ nananawa. Yehowa pu’ulum biŋe ti a wan bo to paŋa ge soŋɛ tɔ ti to ta’an ŋmibe. Bala la, kɔ’ɔn tara pupeelum la Yehowa n soŋeri ho se’em la. Bala wan basɛ ti ho baŋɛ Yehowa n soŋeri ho se’em ti ho nyɛta nɛŋa tɔlega wuu eŋa n yuun soŋɛ Yosef se’em a gurebisɛ poan la.​—Pin. 41:51, 52.