TULUN-AN NGA ARTIKULO 3
Ginabuligan Ka ni Jehova nga Mangin Madinalag-on
“Si Jehova nangin kaupod ni Jose . . . , kag ginhimo ni Jehova nga madinalag-on ang tanan niya nga ginahimo.”—GEN. 39:2, 3.
AMBAHANON 30 Akon Amay, Akon Dios, kag Abyan
ANG BINAGBINAGON SA SINI NGA ARTIKULO a
1-2. (a) Ngaa wala kita natingala kon may problema kita? (b) Ano ang binagbinagon naton sa sini nga artikulo?
BILANG katawhan ni Jehova, wala kita natingala kon may problema kita. Kabalo kita nga nagsiling ang Biblia nga “dapat kita magsulod sa Ginharian sang Dios paagi sa madamo nga kabudlayan.” (Binu. 14:22) Kabalo man kita nga may mga problema kita subong nga sa bag-ong kalibutan sang Dios lang madula. Kay man, “wala na [didto] sing kamatayon, ukon paglalaw ukon paghibi ukon kasakit pa.”—Bug. 21:4.
2 Bisan pa ginatugutan ni Jehova nga makaeksperiensia kita sang mga problema, ginabuligan niya kita nga mabatas ini. Talupangda ang ginsiling ni apostol Pablo sa mga Cristiano sa Roma. Una niya nga ginsambit ang parte sa pila ka problema nga naeksperiensiahan niya kag sang iya mga kauturan. Dayon nagsiling sia: “Nadaug naton ini tanan nga butang paagi sa isa nga naghigugma sa aton.” (Roma 8:35-37) Ginapakita sini nga mabuligan ka ni Jehova nga mangin madinalag-on bisan pa may problema ka. Binagbinagon naton kon paano ginbuligan ni Jehova si Jose nga mangin madinalag-on kag kon paano ka Niya mabuligan.
KON GULPI LANG NGA NAGBAG-O ANG SITWASYON
3. Ano nga pagbag-o ang gulpi lang nga natabo sa kabuhi ni Jose?
3 Palangga gid ni Jacob ang iya anak nga si Jose. (Gen. 37:3, 4) Bangod sini, nahisa kay Jose ang iya mga magulang. Gani ginbaligya nila si Jose sa Midianhon nga mga negosyante sang may kahigayunan sila nga himuon ini. Gindala sini nga mga negosyante si Jose sa Egipto nga ginatos ka kilometro ang kalayuon. Dayon ginbaligya naman si Jose kay Potifar nga pangulo sang mga bantay sang Paraon. Gulpi lang nga nagbag-o ang kabuhi ni Jose. Ang isa ka anak nga palangga gid sang iya amay nangin isa ka makaluluoy nga ulipon sa Egipto.—Gen. 39:1.
4. Ano ang posible nga maeksperiensiahan naton nga daw pareho sa sitwasyon ni Jose?
4 Ang Biblia nagasiling nga ‘ang wala ginapaabot nga hitabo nagakatabo sa tanan.’ (Man. 9:11) Kon kaisa, makaeksperiensia kita sang mga problema nga ‘naagihan man sang iban’ ukon kinaandan sa tanan nga tawo. (1 Cor. 10:13) Ukon posible nga makaeksperiensia kita sang mga kabudlayan bangod disipulo kita ni Jesus. Halimbawa, posible nga yagutaon kita, pamatukan, ukon hingabuton bangod sa aton pagtuo. (2 Tim. 3:12) Pero bisan ano pa ang imo problema, mabuligan ka ni Jehova nga mangin madinalag-on. Paano niya ini ginhimo kay Jose?
Ginbaligya si Jose para mangin ulipon ni Potifar sa Egipto, pero ginbuligan ni Jehova si Jose nga mangin madinalag-on (Tan-awa ang parapo 5)
5. Ano ang nakita ni Potifar parte sa mga ginahimo ni Jose? (Genesis 39:2-6)
5 Basaha ang Genesis 39:2-6. Natalupangdan sang Egiptohanon nga si Potifar nga madamo sang ikasarang kag mapisan ang pamatan-on nga si Jose. Kag kabalo si Potifar kon ngaa. Nakita niya nga ‘ginhimo ni Jehova nga madinalag-on ang tanan nga ginahimo ni Jose.’ b Sang ulihi, ginhimo niya si Jose nga iya personal nga alagad. Ginpadumala man niya kay Jose ang iya bilog nga panimalay. Maayo ang nangin resulta sini kay Potifar kag nag-uswag pa gid sia.
6. Ano ang posible nga nabatyagan ni Jose sa iya sitwasyon?
6 Imadyina ang posible nga nabatyagan ni Jose. Ano ayhan ang gusto gid niya nga matabo? Gusto bala niya nga matalupangdan sia ni Potifar para mapadyaan sia? Posible gid nga gusto ni Jose nga hilwayon sia para makabalik sia sa iya amay. Kay man, bisan pa may mga benepisyo ang pag-alagad ni Jose sa panimalay ni Potifar, ulipon gihapon sia kag indi alagad ni Jehova ang iya agalon. Wala ginpahanabo ni Jehova nga hilwayon ni Potifar si Jose, kag naglala pa gid ang sitwasyon ni Jose.
KON NAGLALA PA GID ANG SITWASYON
7. Ngaa masiling naton nga naglala pa gid ang sitwasyon ni Jose? (Genesis 39:14, 15)
7 Suno sa Genesis kapitulo 39, naluyag kay Jose ang asawa ni Potifar kag sulitsulit niya nga ginasulay si Jose. Pero ginapangindian sia ni Jose. Sang ulihi, naakig gid sia kay Jose kag nagsiling sia nga gusto sia kuno luguson ni Jose. (Basaha ang Genesis 39:14, 15.) Sang mabatian ini ni Potifar, ginpapriso niya si Jose. Gani napriso si Jose sa sulod sang madamo nga tinuig. (Gen. 39:19, 20) Ano ayhan ang sitwasyon ni Jose sa bilangguan? Ang Hebreo nga tinaga nga gingamit ni Jose para sa “bilangguan” ginagamit man para sa “bubon,” ukon “buho,” nga nagapahangop nga madulom ang iya palibot kag pamatyag niya wala na sia sang paglaum. (Gen. 40:15; footnote) Ginasambit man sa Biblia nga may tion nga ginkadenahan ang mga tiil ni Jose kag ginbutangan sing talikala nga salsalon ang iya liog. (Sal. 105:17, 18) Gani naglala pa gid ang sitwasyon ni Jose. Ang isa ka ulipon nga ginsaligan sang iya agalon nangin isa ka makaluluoy nga priso.
8. Ano ang masigurado naton bisan pa naglala pa gid ang aton sitwasyon?
8 Naeksperiensiahan mo na bala nga naglala pa gid ang imo sitwasyon bisan pa hanuot mo ini nga ginpangamuyo kay Jehova? Posible ini matabo. Ginatugutan ni Jehova nga makaeksperiensia kita sang mga problema sa kalibutan nga ginagamhan ni Satanas. (1 Juan 5:19) Pero, ari ang sigurado: Kabalo si Jehova sang imo sitwasyon, kag nagaulikid sia sa imo. (Mat. 10:29-31; 1 Ped. 5:6, 7) Nagpromisa man sia: “Indi ko gid kamo pagbayaan, kag indi ko gid kamo pagpabay-an.” (Heb. 13:5) Mabuligan ka ni Jehova nga makabatas bisan pa pamatyag mo wala na sang paglaum ang imo sitwasyon. Binagbinagon naton kon paano ini naeksperiensiahan ni Jose.
Kaupod ni Jose si Jehova bisan pa ara sia sa bilangguan, kag sia ang ginpadumala sa tanan nga priso (Tan-awa ang parapo 9)
9. Samtang ara si Jose sa bilangguan, ano ang pamatuod nga kaupod niya si Jehova? (Genesis 39:21-23)
9 Basaha ang Genesis 39:21-23. Bisan pa napriso si Jose kag mabudlay gid ang iya sitwasyon, ginhimo ni Jehova nga madinalag-on si Jose. Paano? Sang ulihi, natalupangdan si Jose sang pangulo nga opisyal sang bilangguan. Nagdayaw gid sia kay Jose kag ginsaligan niya sia. Amo man ini ang ginbatyag sadto ni Potifar sang nagaalagad sa iya si Jose. Sang ulihi, si Jose ang ginpadumala sang pangulo nga opisyal sang bilangguan sa tanan nga priso. Ang Biblia nagasiling nga “ang pangulo nga opisyal sang bilangguan wala nagakabalaka sa tanan nga ginadumalahan ni Jose.” Bangod may mapuslanon na nga hilikuton si Jose, daw indi na niya mapensaran ang iya mabudlay nga sitwasyon. Wala gid niya ginpaabot ini nga pagbag-o. Napriso sia kay gin-akusar sia nga gusto niya luguson ang asawa sang opisyal sang palasyo. Pero subong, sia na ang ginsaligan nga magdumala sa tanan nga priso. Paano ini natabo? Isa lang ang sabat. Ang Genesis 39:23 nagasiling nga “si Jehova kaupod ni Jose kag ginhimo ni Jehova nga madinalag-on ang iya ginahimo.”
10. Ipaathag kon ngaa posible nagbatyag si Jose nga indi sia madinalag-on sa tanan niya nga ginahimo.
10 Imadyina liwat ang posible nga nabatyagan ni Jose. Sang ginpriso si Jose bisan pa indi matuod ang akusasyon sa iya, nabatyagan ayhan niya nga madinalag-on sia sa tanan niya nga ginahimo? Ano ayhan ang gusto gid ni Jose nga matabo? Gusto bala niya nga saligan sia sang pangulo nga opisyal sang bilangguan? Posible gid nga gusto ni Jose nga paguaon sia sa bilangguan. Ginpangabay pa gani niya ang isa ka priso nga malapit na paguaon nga sambiton sia sa Paraon para paguaon man sia sa bilangguan. (Gen. 40:14) Pero sang ginpagua na ini nga priso, wala niya dayon masambit sa Paraon ang parte kay Jose. Bangod sini, nagdugay si Jose sa bilangguan sing duha pa ka tuig. (Gen. 40:23; 41:1, 14) Pero, padayon nga ginhimo ni Jehova nga madinalag-on ang ginahimo ni Jose. Paano?
11. Ano nga pinasahi nga ikasarang ang ginhatag ni Jehova kay Jose, kag paano ini nakabulig para matuman ang katuyuan ni Jehova?
11 Samtang ara si Jose sa bilangguan, ginpadamgo ni Jehova ang hari sang Egipto sing duha ka beses. Indi gid mahim-os ang Paraon sa iya mga damgo, gani gusto niya mabal-an ang kahulugan sini. Sang nabal-an sang hari nga may ikasarang si Jose nga ipaathag ang kahulugan sang mga damgo, ginpatawag niya sia. Sa bulig ni Jehova, ginpaathag ni Jose ang kahulugan sang mga damgo sang Paraon kag nagdayaw sia sa panugda ni Jose sa iya. Narealisar sang Paraon nga ginabuligan ni Jehova ang pamatan-on nga si Jose, gani si Jose ang ginpadumala niya sa pagtipon kag paghatag sang pagkaon sa bilog nga Egipto. (Gen. 41:38, 41-44) Sang ulihi, may natabo nga grabe nga tiggulutom. Indi lang ang Egipto ang naapektuhan sini, kundi pati man ang Canaan nga ginaistaran sang pamilya ni Jose. Pero may ikasarang na subong si Jose nga luwason ang iya pamilya, gani indi madula ang kaliwatan nga halinan sang Mesias.
12. Paano ginpahanabo ni Jehova nga mangin madinalag-on si Jose?
12 Hunahunaa ang tumalagsahon nga mga hitabo sa kabuhi ni Jose. Sin-o ang nagpahanabo nga matalupangdan ni Potifar ang isa ka ulipon nga si Jose? Sin-o ang nagpahanabo nga pakitaan sing kaayo sang pangulo nga opisyal sang bilangguan ang isa ka makaluluoy nga priso nga si Jose? Sin-o ang nagpadamgo sa Paraon kag naghatag kay Jose sang ikasarang nga mapaathag ang kahulugan sini? Sin-o ang nagpahanabo nga itangdo si Jose nga amo ang magdumala sang pagtipon kag paghatag sang pagkaon sa Egipto? (Gen. 45:5) Maathag nga si Jehova ang nagpahanabo nga mangin madinalag-on si Jose sa tanan niya nga ginahimo. Bisan pa gusto patyon si Jose sang iya mga utod, ginbag-o ni Jehova ang sitwasyon para matuman Niya ang Iya kabubut-on.
KON PAANO KA GINABULIGAN NI JEHOVA NGA MANGIN MADINALAG-ON
13. Nagapasilabot bala si Jehova sa tanan nga sitwasyon sa aton kabuhi? Ipaathag.
13 Ano ang matun-an naton sa kasaysayan ni Jose? Nagapasilabot bala si Jehova sa tanan nga sitwasyon sa aton kabuhi? Ginamaniobra bala niya ang tanan nga indi maayo nga nagakatabo sa aton kabuhi para mangin maayo ang resulta sini? Wala ini ginatudlo sang Biblia. (Man. 8:9; 9:11) Pero, ari ang sigurado: Kon may problema kita, nabal-an ini ni Jehova kag ginapamatian niya ang aton pagpangayo sang bulig sa iya. (Sal. 34:15; 55:22; Isa. 59:1) Pero labaw pa sa sini ang mahimo ni Jehova kay masarangan niya nga buligan kita nga mabatas ang mga kabudlayan. Paano?
14. Paano kita ginabuligan ni Jehova sa tion sang kabudlayan?
14 Ang isa ka paagi nga ginabuligan kita ni Jehova amo ang paghatag sa aton sang paumpaw kag pagpalig-on. Sa masami, ginahimo niya ini sa tion nga kinahanglan gid naton ini. (2 Cor. 1:3, 4) Naeksperiensiahan ini sang isa ka brother nga si Eziz nga taga-Turkmenistan. Bangod sa iya pagtuo, ginsentensiahan sia nga mapriso sing duha ka tuig. “Sang adlaw nga nag-atubang ako sa korte,” siling niya, “ginpabasa sa akon sang isa ka brother ang Isaias 30:15 nga nagasiling: ‘Mangin mabakod kamo kon magpakalinong kamo kag magsalig sa akon.’ Ini nga teksto nakabulig sa akon nga mangin kalmado kag magsalig pirme kay Jehova. Ginpamalandungan ko ini nga teksto kag nakabulig gid ini sa akon sang napriso ako.” Naeksperiensiahan mo na bala nga ginbuligan ka ni Jehova paagi sa paghatag sa imo sang paumpaw kag pagpalig-on sa tion nga kinahanglan mo gid ini?
15-16. Ano ang natun-an mo sa eksperiensia ni Tori?
15 Sa masami, indi naton makita kon paano kita ginbuligan ni Jehova kon wala pa masolbar ang aton problema. Naeksperiensiahan ini sang isa ka sister nga si Tori. Nagmasakit sing kanser ang iya bata nga lalaki nga si Mason. Anom ka tuig nga nag-antos si Mason asta nga napatay sia. Grabe gid ang kasubo ni Tori. Nagsiling sia, “Bilang isa ka iloy, wala na siguro sing mas masakit pa sangsa sini.” Nagsiling pa sia, “Sigurado ako nga magakomporme ang iban nga ginikanan nga masakit gid nga makita nga nagaantos ang imo bata, kag mas maagwanta pa namon kon kami na lang ang mag-antos.”
16 Grabe gid kabudlay ang naeksperiensiahan ni Tori, pero ginpamalandungan niya sang ulihi kon paano sia ginbuligan ni Jehova nga mabatas ini. Nagsiling sia: “Nakita ko kon paano ako ginbuligan ni Jehova sang nagmasakit ang akon bata. Halimbawa, may mga tion nga indi gid maayo ang kondisyon ni Mason kag indi niya masarangan nga mag-istorya sa mga nagabisita sa iya. Pero sa sini nga mga tion, may mga kauturan gihapon nga nagakadto sa ospital bisan pa kinahanglan nila magbiyahe sing duha ka oras. May ara gid pirme utod sa ospital nga handa magbulig. Ginbuligan man kami sang mga kauturan sa amon mga galastuhan. Gani bisan pa grabe gid kabudlay sang amon sitwasyon, wala kami ginkulang sa amon mga kinahanglanon.” Ginbuligan ni Jehova si Tori nga makabatas, kag amo man ini ang ginhimo Niya kay Mason.—Tan-awa ang kahon nga “ Ginhatag ni Jehova ang Amon Kinahanglanon sa Tion nga Kinahanglan Gid Namon Ini.”
DUMDUMA KON PAANO KA GINBULIGAN NI JEHOVA
17-18. Kon may mga problema kita, ano ang makabulig sa aton para makita naton nga ginabuligan kita ni Jehova kag mapasalamatan naton sia? (Salmo 40:5)
17 Basaha ang Salmo 40:5. Para sa tawo nga mahilig magtaklad sa bukid, gusto gid niya nga malab-ot ang putukputukan sang bukid. Pero samtang nagataklad sia, puede sia makadulog sa mga bahin sang bukid nga manami ang view ukon ang palibot. Sing kaanggid, dapat hatagan mo pirme sang tion ang pagpamalandong kon paano ka ginabuligan ni Jehova nga mangin madinalag-on bisan pa may ginabatas ka nga problema. Pagkatapos sang kada adlaw, pamangkuta ang imo kaugalingon: ‘Paano ako ginpakamaayo ni Jehova subong nga adlaw? Bisan pa ara gihapon ang akon problema, paano ako ginabuligan ni Jehova nga makabatas?’ Panikasugi nga makita ang bisan isa lang ka pagpakamaayo ni Jehova nga nakabulig sa imo nga mangin madinalag-on.
18 Posible nga ginapangamuyo mo nga kuntani madula na ang imo problema. Normal lang ini nga balatyagon kag nagakaigo ini nga himuon. (Fil. 4:6) Pero dapat man naton makita ang mga pagpakamaayo nga ginabaton naton subong. Kay man, nagapromisa si Jehova nga pabakuron niya kita kag buligan niya kita nga makabatas. Gani pirme gid pasalamati si Jehova kay ginabuligan ka niya. Kon himuon mo ini, makita mo nga pareho sa ginhimo niya kay Jose, ginabuligan ka ni Jehova nga mangin madinalag-on bisan pa may mga problema ka.—Gen. 41:51, 52.
AMBAHANON 32 Dampig kay Jehova!
a Kon may mabudlay kita nga problema, posible nga indi gid kita magsiling nga “madinalag-on” kita. Posible nga ginahunahuna naton nga masiling lang naton ini kon nasolbar na ang aton problema. Pero, may matun-an kita nga importante nga leksion sa kabuhi ni Jose. Ginapakita sang iya halimbawa nga mabuligan kita ni Jehova nga mangin madinalag-on bisan pa may mga problema kita. Binagbinagon ini sa sini nga artikulo.
b Ginlaragway sa pila lang ka bersikulo sa Biblia ini nga mga pagbag-o sa kabuhi ni Jose bilang isa ka ulipon, pero posible nga natabo ini nga mga pagbag-o sa sulod sang madamo nga tinuig.
