1-2. (a) Nama kebuah kitai enda tekenyit lebuh napi penanggul? (b) Nama deka dikerandauka kitai dalam artikel tu?

 KITAI enda tekenyit lebuh kitai napi penanggul. Baka ke dipadah Bup Kudus, “kitai patut napi mayuh pemerinsa ngambika ulih tama ngagai Perintah Petara.” (SKR. 14:22) Kitai mega nemu sekeda ari penanggul kitai semina ulih diputarka ba dunya Paradais. Ba dia, “pemati deka nadai agi. Nadai agi balat tusah ati, nadai agi nyabak, nadai agi pedis.”—Pem. 21:4.

² Jehovah enda ngelindung kitai ari penanggul. Tang, Iya nulung kitai tan napi nya. Peratika utai ti dipadah rasul Paul ngagai orang Kristian ke diau ba Rome. Terubah iya, rasul Paul nyebut sekeda penanggul ke ditapi iya enggau bala menyadi ba dia. Udah nya, iya nulis: “Ketegal kuasa iya ke rinduka kitai, kitai menang ngelaban semua utai nya.” (Rom. 8:35-37) Tu reti iya, Jehovah ulih nulung nuan tan agi napi penanggul ke benung ditapi nuan. Aram kitai meda chara Jehovah nulung Josep sereta baka ni Iya ulih nulung nuan.

3. Nama ubah ke enda memukai nyadi ba pengidup Josep?

³ Jakop nunjukka diri amat sayauka anak lelaki iya Josep. (P-kal. 37:3, 4) Ketegal nya, bala anak lelaki Jakop ke tuai agi kepapaska Josep. Lebuh sida bisi peluang, sida nyual Josep ngagai bala orang dagang ari menua Midian. Bala orang dagang  tu mai Josep penyauh beratus kilometer ngagai menua Ejip. Ba dia, iya dijual sekali agi—kali tu ngagai Potipar, kepala bala soldadu ke nyaga istana raja. Pengidup Josep berubah enggau jampat, ari nyadi anak ti dikesayauka apai iya ngagai siku ulun orang Ejip!—P-kal. 39:1.

4. Nama utai ke engka ulih nyadi ba kitai ke ngasuh kitai napi penanggul ti sama baka Josep?

⁴ Bup Kudus madahka: “Utai ti jai endang tau nyadi ba genap iku orang.” (P-jar. 9:11) Kitai kekadang napi penanggul “ke biasa ditapi orang.” (1 Kor. 10:13) Tauka kitai engka napi penanggul ketegal kitai nyadi murid Jesus. Ambika chunto, kitai engka disakal, dipechat, tauka diperinsa ketegal pengarap kitai. (2 Tim. 3:12) Enda ngira nama penanggul ke ditapi nuan, Jehovah ulih ngasuh nuan mujur. Iya mega bisi ngereja utai tu ke Josep. Baka ni chara iya?

5. Nama utai ke ditemu Potipar pasal pemujur Josep? (Pemungkal 39:2-6)

⁵ Bacha Pemungkal 39:2-6. Potipar beratika Josep nya siku lelaki ti amat landik sereta bagas. Iya mega nemu kebuah nya. Potipar ulih meda ‘Jehovah bisi enggau Josep, lalu ngasuh iya mujur dalam semua utai ti dikereja iya.’ b Nyau kelama, Potipar ngasuh Josep nyadi penulung iya. Lalu iya mega ngasuh Josep ngemataka rumah iya enggau semua reta tengkira iya. Nama asil iya? Potipar diberekat.

6. Nama utai ti engka diasaika Josep pasal situasi iya?

⁶ Uji gambarka asai ati Josep. Nama utai ti keran dikedekaka iya? Kati iya deka dipeda tauka diberi upah ti besai ari Potipar? Josep engka keran agi deka bibas ngambika iya ulih pulai baru ngagai apai iya. Taja pan Josep bisi mayuh berekat ba rumah Potipar, tang iya agi siku ulun ke siku tuan ti enda nyembah Jehovah. Jehovah enda ngasuh Potipar ngelepaska Josep. Lalu situasi Josep deka nyadi tusah agi.

7. Baka ni situasi Josep nyadi tusah agi? (Pemungkal 39:14, 15)

⁷ Baka ke dipadah Pemungkal bagi 39, bini Potipar bisi minat ngagai Josep lalu mayuh  kali ngumbuk Josep tinduk enggau iya. Tang tiap kali iya diumbuk, Josep enggai ngereja nya. Ke pengujung iya, bini Potipar amat ringat ngagai Josep lalu nuduh Josep deka masung iya. (Bacha Pemungkal 39:14, 15.) Lebuh Potipar ninga pasal tu, iya ngejil Josep lalu Josep ba dia pengelama beberapa taun. (P-kal. 39:19, 20) Baka ni gaya jil nya? Leka jaku “jil” ke dikena Josep dalam jaku Hebrew mega ulih mai reti “telaga” tauka “lubang ti dalam.” Tu ngambarka utai ti ngelingi iya petang lalu iya nadai daya. (P-kal. 40:15) Pia mega, Bup Kudus madahka ba siti timpuh kaki Josep ditanchang ngena rantai lalu rekung iya dikungkung ngena besi. (Mas. 105:17, 18) Situasi Josep nyadi tusah agi. Ari nyadi ulun ti tau dikearapka, diatu Josep nyadi orang ke dijil.

8. Nama utai ulih diandalka kitai taja pan penanggul kitai majak balat?

⁸ Kala nuan napi penanggul ti majak balat taja pan nuan bebendar besampi? Nya ulih nyadi. Jehovah enda ngelindung kitai ari penanggul ba dunya ke dipegai Sitan tu. (1 Jhn. 5:19) Tang nuan agi ulih andalka tu: Jehovah nemu semua utai ke benung ditapi nuan lalu Iya ibuhka nuan. (Mat. 10:29-31; 1 Pet. 5:6, 7) Nambahka nya, Jehovah mega besemaya: “Aku enda sekali-kali ninggalka nuan, lalu Aku enda sekali-kali ngelengkaka nuan.” (Heb. 13:5) Jehovah ulih nulung nuan tan indah lebuh situasi nuan baka ke enda ulih diputarka agi. Aram kitai meda baka ni tu nyadi ba Josep.

9. Nama utai ke nunjukka Jehovah bisi enggau Josep lebuh Josep dijil? (Pemungkal 39:21-23)

⁹ Bacha Pemungkal 39:21-23. Indah ba maya ti tusah lebuh Josep dijil, Jehovah agi ngasuh Josep mujur. Baka ni Iya ngereja nya? Nyau kelama, kepala rumah jil nyau arap sereta bebasaka Josep. Nya mega utai ke nyadi ba Josep lebuh iya nyadi ulun ba rumah Potipar. Belubah-lubah, kepala rumah jil ngasuh Josep ngemataka orang jil ke bukai. Indah Bup Kudus madahka “kepala rumah jil nya enda agi ibuh ngemataka pengawa Josep.” Diatu Josep bisi pengawa ti manah ke ulih dikereja iya. Nya ubah ke enda dijangka! Baka ni siku orang ke dijil ke dituduh nguji masung bini siku pegawai istana ulih dikearap ngereja pengawa ti besai tu? Bisi siti aja kebuah utai tu ulih nyadi. Baka ke dipadah Pemungkal 39:23, ‘Jehovah bisi enggau Josep, lalu ngasuh iya mujur dalam semua utai ti dikereja iya.’

10. Terangka kebuah Josep enda ngasaika diri mujur ba semua utai.

¹⁰ Perundingka baru pasal asai ati Josep. Pengudah dituduh ngereja utai ti enda dikereja iya sereta dijil, ba runding nuan, kati iya ngumbai diri mujur dalam semua utai? Nama utai ti amat dikedekaka Josep? Kati Josep deka kepala rumah jil nya ngembuan runding ti manah pasal iya? Lebih agi ari semua utai, Josep deka bibas. Iya indah minta siku orang ke deka dilepaska ari rumah jil ngambika bejaku ngarika iya ngagai Firaun. Iya minta ngambika diri ulih dilepaska ari rumah jil ti balat ngenusahka ati iya. (P-kal. 40:14) Taja pia, lelaki nya enda bejaku ngagai Firaun tekala nya. Ketegal nya, Josep mengkang dijil pengelama dua taun agi. (P-kal. 40:23; 41:1, 14) Tang Jehovah terus ngasuh Josep mujur. Baka ni?

11. Nama pengelandik ti istimewa ke diberi Jehovah ngagai Josep, lalu baka ni tu nulung iya ngereja peneka Jehovah?

¹¹ Lebuh Josep ba rumah jil, Jehovah ngasuh raja menua Ejip bisi dua iti mimpi ti ngenusahka ati. Firaun keran deka nemu reti mimpi iya. Lebuh raja nya nemu Josep bisi  pengelandik nerang pasal mimpi, iya minta Josep betemu enggau iya. Enggau tulung ari Jehovah, Josep nerangka reti mimpi nya lalu meri sekeda jaku lalau ti penting ngagai Firaun. Tu ngasuh Firaun amat alit ati. Firaun nemu Jehovah benung nulung Josep. Nya alai, Firaun ngasuh Josep ngemataka semua utai ke bekaul enggau pemakai ba menua Ejip. (P-kal. 41:38, 41-44) Enda lama udah nya, lapar pungkang nyadi ukai semina ba menua Ejip tang mega ba menua Kanaan, alai sida Josep sebilik benung diau. Josep diatu ulih nyelamatka sida sebilik lalu tu nentuka peturun ke nuju ngagai Messiah dijaga.

12. Baka ni Jehovah ngasuh Josep mujur?

¹² Perundingka utai ke nyadi ba pengidup Josep. Sapa ke ngasuh Potipar beratika Josep, ke semina siku ulun? Sapa ke ngasuh kepala rumah jil ngembuan runding ti manah pasal Josep, ke semina siku orang ke dijil? Sapa ke meri Firaun mimpi ti ngenusahka ati sereta meri Josep penau nerangka reti mimpi nya? Sapa ke meransang Firaun milih Josep nyadi orang ke ngemataka semua utai ke bekaul enggau pemakai ba menua Ejip? (P-kal. 45:5) Endang amat, Jehovah ke ngasuh semua utai ti digaga Josep mujur magang. Taja pan bala menyadi Josep deka munuh iya, tang Jehovah ngubah situasi nya ngambika peneka Iya nyadi.

13. Kati Jehovah masuk champur ba semua utai ke nyadi ba kitai? Terangka.

¹³ Nama utai ke ulih dipelajarka kitai ari cherita pasal pengidup Josep? Kati Jehovah masuk champur ba semua utai ke nyadi ba kitai? Kati iya ngawal semua utai ke nyadi ba pengidup kitai ngambika semua utai ti jai ke nyadi nya manah ke kitai? Enda, Bup Kudus nadai ngajar baka nya. (P-jar. 8:9; 9:11) Taja pia, kitai nemu tu: Lebuh kitai napi sesiti penguji, Jehovah nemu utai ke ditapi kitai lalu Iya ninga sabak kitai ke minta tulung. (Mas. 34:15; 55:22; Isa. 59:1) Lebih agi ari nya, Jehovah ulih nulung kitai tan napi penusah nya enggau mujur. Baka ni?

14. Baka ni Jehovah nulung kitai ba maya ti tusah?

¹⁴ Siti chara Jehovah nulung kitai, iya nya enggau nyediaka pengelantang sereta  peransang, kesuah iya ba maya ti ngena. (2 Kor. 1:3, 4) Nya meh utai ke nyadi ba Eziz, siku menyadi lelaki ba Turkmenistan ke dijil pengelama dua taun ketegal pengarap iya. Ku iya, “Kena pagi hari aku dipechara ba kot, siku menyadi lelaki bekunsika ayat Isaiah 30:15 enggau aku ti madah: ‘Panggaika pengarap kita ba Aku. Nya baru kita deka kering sereta likun.’ Ayat tu seruran nulung aku bepanggai ngagai Jehovah lalu mengkang tenang. Belematika ayat tu udah nulung aku sepemanjai aku dijil.” Ulih nuan berundingka siti maya ba pengidup nuan lebuh Jehovah nulung nuan enggau nyediaka pengelantang sereta peransang ba maya nuan ti amat begunaka nya?

15-16. Nama dipelajarka nuan ari pengalaman Tori?

¹⁵ Kesuah iya, semina pengudah kitai ngenang baru penusah ke ditapi kitai, baru meh kitai nemu baka ni Jehovah udah nulung kitai napi nya. Siku menyadi indu ke benama Tori ngasaika utai tu endang amat. Anak lelaki iya, Mason, nadai pengudah belaban enggau penyakit kanser pengelama enam taun. Tori amat tusah ati. Ku iya, “Ba aku ke nyadi siku indai, tu meh utai ke pemadu pedis ditapi aku.” Ku iya agi, “Aku pechaya mayuh apai indai ke bukai mega setuju, lebuh sida meda bala anak napi pemerinsa, nya pedis agi ari enti sida empu ke ngasaika nya.”

¹⁶ Tori balat tusah ati lebuh meda anak iya merinsa. Tang udah nya iya berunding pasal chara Jehovah udah nulung iya tan. Ku iya, “Lebuh aku berunding pasal maya nya, aku ulih meda chara Jehovah udah nulung aku sepemanjai timpuh anak aku ke sakit. Ambika chunto, ketegal balat sakit, bisi maya iya Mason enda ulih betemu enggau temuai. Taja pia, bala menyadi Kristian sanggup deriba pengelama dua jam ngagai sepital. Ba bilik  alai nganti seruran bisi orang ti sedia deka meri sukung. Pia mega, bala menyadi Kristian nyediaka utai ke diguna kami ninting hari. Indah ba maya ti balat tusah, kami seruran bisi utai ke diguna kami.” Jehovah meri Tori utai ke diguna iya kena tan, lalu Iya ngereja utai ti sama ke Mason.—Peda kutak “ Jehovah Meri Kami Utai ti Amat Diguna Kami.”

17-18. Nama deka nulung kitai nemu sereta beterima kasihka tulung ari Jehovah lebuh napi penanggul? (Masmur 40:5)

¹⁷ Bacha Masmur 40:5. Juluk ati siku pendaki gunung iya nya datai ngagai tuchung gunung ke ditiki iya. Taja pia, iya ulih ngetu lalu meda utai ti manah sepemanjai pejalai iya niki gunung nya. Baka nya mega, kena meh awak ngetu lalu berunding pasal chara Jehovah ngasuh nuan mujur indah lebuh nuan benung napi penanggul. Ba ujung tiap hari, tanya meh diri empu: ‘Nama berekat ke udah diberi Jehovah ngagai aku seharitu? Taja pan penanggul nya agi bisi, tang baka ni Jehovah nulung aku tan napi penanggul nya?’ Giga meh abis nadai siti utai ke udah dikereja Jehovah kena nulung nuan mujur.

¹⁸ Amat, nuan engka besampi ngambika penanggul nuan nadai agi. Kitai ulih meretika nya lalu nya endang utai ke ulih dikereja nuan. (Plp. 4:6) Tang kitai mega patut nemu pasal berekat ke dikembuan kitai diatu. Nambahka nya, Jehovah udah besemaya deka ngeringka kitai sereta nulung kitai tan napi penanggul nya. Nya alai, seruran beterima kasih laban Jehovah benung nyukung nuan. Enggau tu, nuan deka meda chara Jehovah nulung nuan mujur, baka ke dikereja Iya ke Josep, indah lebuh benung napi penanggul.—P-kal. 41:51, 52.