IKPƐYI ƐLĀ Ō KLƆCƐ ƆMƐ 3
Ujehofa Géē Ta Uwɔ Abɔ Ku A Yɔ I Jɛ Gɔbu
“Óndú ā yɔ̄ mɛ́mla Ujósɛ̄fu, anɔ́ɔ ó cɛ̄ lɛ ɔ́ jɛ̄ gɔbū ipú ɔdā dóódu nōó lɛ abɔ̄ kwu ɔ́ ā.”—OHÚT. 39:2.
IJÉ ƆMƐ 30 My Father, My God and Friend
ƆDĀ NƐ ALƆ GÁĀ NWU A a
1-2. (a) Ɔdiya nōó gē hɛ alɔ idaago ku alɔ gē má unwalu ŋ ma? (b) Ɔdi nɛ alɔ gáā kɛla lɛyikwu ɔ ipu ikpɛyi ɛlā nyā a?
ABƆ alɔ wɛ ācɛ o gba Ujehofa ɛ̄gbā a, ó gē hɛ alɔ idaago eko nɛ alɔ yɔ i má unwalu ŋ. Alɔ jé ka Ubáyíbu da alɔ kahinii: “O ŋmá ōwē nɛ̄hi piíí ɛ́ɛ́ nɛ̄ alɔ géē gā ajɔ̄ɔ̄cɛ́ kú Ɔwɔicō glá á.” (Ācot. 14:22) Alɔ klla jé ka ōhī ku aunwalu nɛ alɔ yɔ i má babanya a, i gáā mɛ ŋ jaa gbeeko nɛ alɔ géē gā ipu ajɔɔcɛ ku Ɔwɔico, ɛga nɛ “ikwū í gáā yɔ̄ gɛ ŋ́, ācɛ í gáā yēkwu gɛ ŋ́, ācɛ í gáā jikwū gɛ ŋ́, ācɛ í kē gáā jɔ́ɔnɔ gɛ ŋ́” ma.—Mafú 21:4.
2 Ujehofa i gē ci unwalu ŋma ō ya alɔ ŋ. Amáŋ, ó gē ta alɔ abɔ ō lɔtu ku uwa. Leyi bi ɔdā nɛ ɔyikpo Upɔlu da Ācɛ O Yɛce Ukraist nōo yɔ Urom a. Aflɛyi, ó lɛ ɛjɛɛji unwalu nɛ anu mla ayinɛ ɔhá yɔ i má a kpo ka. Anu ó ta ɔkpá kahinii: “Ipú ɔdā dóódu nēe yá alɔ nēe bá ā kpɛ́mm ā, ɔ̄cɛ nōo yíihɔtū tá alɔ ā le yá kú ālɔ̄ le yálé.” (Uróm 8:35-37) Ɛnyā mafu peee ka Ujehofa lɔfu ta alɔ abɔ, ɔdaŋ nɛ alɔ kóō yɔ i lɔtu āhɔ̄ olɔnɔ naana. Alɔ má ɛgɛ nɛ Ujehofa ta Ujosɛfu abɔ, mla ɛgɛ Nɛ Ó lɔfu ta uwɔ abɔ duu a.
EKO NƐ ODEE KWU PIYABƆ ACIGILI
3. Opiyabɔ nyá ya ipu oyeeyi ku Ujosɛfu acigili a?
3 Ujekɔpu mafu peee ka ó yihɔtu ku ɔyinɔnyilɔ ku nu nōo wɛ Ujosɛfu a nɛɛnɛhi. (Ohút. 37:3, 4) Ohigbu ɛnyā, ayi nɔnyilɔ ku Ujekɔpu nōo wɛ anyakwɔcɛ a gbɔɔ ō mimalanyi ku ɔyinɛ uwa Ujosɛfu. Eko néē gáā lɛ ɛga má a, é kwu Ujosɛfu u je lá lɛ ígwu ku ācɛ Umidiyan nōo gē ta ɔhi a. Ācɛ o ta ɔhi nyā kwu Ujosɛfu u bi gā Ijipiti ɛga nōo ligbo nɛɛnɛhi a. Ipu ajɛ ku Ijipiti a, é klla kwu Ujosɛfu u je lá kpɔ, amáŋ babanya lɛ Upɔtifa nōo wɛ otrɛyi ku ācɛ o gbo aalagba a. Oyeeyi ku Ujosɛfu piyabɔ fiya fiya ibi. Ɔcɛ nɛ adā nu yihɔtu nɛɛnɛhi a, kwu piya ɔfiyɛ anca ipu ajɛ ku Ijipiti!—Ohút. 39:1.
4. Ɛgɛnyá nɛ alɔ lɔfu má unwalu bɛɛka ɛ̄nɛ̄ Ujosɛfu má a?
4 Ubáyíbu da alɔ ka “iyɔ̄nɔ ámáŋ ka iyaōolɔhí lɔfú yɔ̄ lɛ odúúdú [ācɛ] kpɛ́mm.” (Ɔ̄cok. 9:11) Ekoohi alɔ gē má “ɛdɔ kú ojámá ɔlamu nōo gē wā ī yá ɛjɛ̄ɛ̄jī ācɛ ā,” ɔɔma kē wɛ unwalu nɛ ɛjɛɛji ācɛ gē má a. (1 Ukɔ́r. 10:13) Amāŋ alɔ lɔfu má owe ohigbu ku alɔ wɛ ayikpo ku Ujisɔsi. Ocabɔ mafu, é lɔfu ŋmo alɔ okonu, bɛyikwu alɔ, amāŋ ya alɔ ŋmo ohigbu ɔtu okpoce ku alɔ. (2 Utím. 3:12) Ɛdɔ unwalu duuma nɛ a kóō yɔ i má naana, Ujehofa lɔfu ta uwɔ abɔ ku a yɔ i jɛ gɔbu ipu ɔdā doodu nɛ a gē ya a. Ɛgɛnyá nɛ ó ya ɔɔma lɛ Ujosɛfu a?
Ujehofa ta Ujosɛfu abɔ kóō yɔ i jɛ gɔbu ipu ɔdā doodu nɛ ó gē ya, eko néē kóō je ɔ je lá ɔfiyɛ lɛ Upɔtifa ipu ajɛ ku Ijipiti a (Má ogwotu ɔmɛ 5)
5. Ɛlā nyá nɛ Upɔtifa ŋmɛyi ipu ɔtu ku nu lɛyikwu ɛgɛ nɛ Ujosɛfu jɛ gɔbu ipu ɔdā doodu nɛ ó gē ya a? (Ohútu 39:2-6)
5 Jé Ohútu 39:2-6. Upɔtifa má ka Ujosɛfu wɛ ɔyipɛ oklobiya nōo jé odee lɔɔlɔhi klla wɛ ɔcɛ nōo gē yuklɔ lɔfu lɔfu. Ó klla jé ɔdā nōo ya a. Upɔtifa má ka “Óndú ā ɔ́ɔ yɔ̄ mla [Ujosɛfu]. Ka anú ɔ́ɔ yá ɛ́ɛ nɛ̄ ɔ́ɔ gē gɔbū ipú ɔdā dóódu nɛ̄ ɔ́ɔ gē yá ā á.” b Ohigbu ɛnyā, ɔcɛ Ijipiti nyā kwu Ujosɛfu i piya ɔcocɛhɔ ku nu. Ó klla kwu Ujosɛfu i piya otrɛyi ku ɔlɛ nu mɛmla ɛjɛɛji ɔdā doodu nɛ ó lɛ a. Ɔdi bɛɛcɛ ŋma anu a? Upɔtifa gɔbu yɔ i gba agbenu tōōtɔ̄ɔ̄.
6. Ɛgɛnyá nɛ ɔtu lɔfu ya Ujosɛfu lɛyikwu āhɔ̄ nɛ ó yɔ anu a?
6 Gbɛla lɛyikwu ɛgɛ nɛ ɔtu lɔfu ya Ujosɛfu lɛ a. Ɔdi nɛ ó dɔka fiyɛ ɔdā doodu ɔhá a? O ya ɛɛ ku Upɔtifa kóō jé lɛyikwu ɔ klla cila ɔ ule nɛɛ? Á jé ŋ, Ujosɛfu dɔka ō le hɛta cɛɛ kóō le cigbihi gā ɛgiyi adā nu. Naana nɛ ó lɛ ɛnɛɛnɛ ɛga ɛyɛɛyɛyi ɔlɛ Upɔtifa a, Ujosɛfu wɛ ɔfiyɛ ku ɔcɛ nōó gē gba Ujehofa ɛ̄gbā ŋ kpɔ. Ujehofa i ya ku Upɔtifa kóō lɛ Ujosɛfu hɛta ŋ. Āhɔ̄ ku Ujosɛfu kóō gáā je bɔbi fiyɛ ɛ.
ƆDAŊ KU ĀHƆ̄ A KWU BƆBI FIYƐ
7. Ɔwɛ nyá nɛ āhɔ̄ ku Ujosɛfu je bɔbi tōōtɔ̄ɔ̄ a? (Ohútu 39:14, 15)
7 Ɛgɛ nɛ ɔkpá ku Ohútu ɛyi 39 ka a, ɔnyā ku Upɔtifa gbɔɔ ō hɔɔkɔ ku Ujosɛfu, ó kē ceyitikwu igbalɛwa ku Ujosɛfu kóō gwuta mla anu. Eko doodu nɛ ó gē ceyitikwu ō ya lɛ a, Ujosɛfu gē da ɔ ka ehee. Igbihaajɛ a, ó gáā kwu cɔnu mla Ujosɛfu, anu ó gáā lɛ ɛkɛmgbɛ ka ba ɔ ka Ujosɛfu ɔ dɔka ō hɛ ɔ baajɛ a. (Jé Ohútu 39:14, 15.) Eko nɛ Upɔtifa lɛ ɛlā nyā po a, ó kwu Ujosɛfu u ta agba ɛga nɛ ó yɔ ihayi ōhī a. (Ohút. 39:19, 20) Ɛgɛnyá nɛ inu agba ɔɔma lɛ a? Ɛlā ku Uhibru nɛ Ujosɛfu bi yuklɔ kwɛyi “inu agba” a, wɛ “obugā,” amāŋ “ɔgɔ,” ɛnyā kē mafu ka inu agba nɛ ó yɔ a le dobu nɛ ɔtu klla ya ɔ ka ó lɛ eyiyoce duuma gɛ ŋ. (Ohút. 40:15) Ubáyíbu klla mafu lɛ alɔ kpɔ ka ó lɛ eko néē lɛ agba kwu Ujosɛfu ikpo, klla lɛ agba ku oje kwu ɔ ɔkɔ. (Aíjē 105:17, 18) Āhɔ̄ ku Ujosɛfu yɔ i je bɔbi tōōtɔ̄ɔ̄. Āhɔ̄ a piyabɔ ŋma ɔfiyɛ néē lɔtuce gla gā alagba anca.
8. Ɔdaŋ ku unwalu nɛ alɔ yɔ i má a kwu bɔbi fiyɛ, ɔdi nɛ alɔ lɔfu jé kpɔcii a?
8 Ó lɛ eko duuma nɛ a má unwalu nɛɛnɛhi nōo gáā kwu bɔbi fiyɛ, naana nɛ a ceyitikwu gbɔɔkɔ lɛyikwu ɛlā ɔɔma ŋma ɔtu ɛ? Ɛnyā lɔfu ya gla. Ujehofa i gē ci unwalu ŋma ō ya alɔ ipu ɛcɛ nyā nɛ Usetan yɔ i lé ɔcɛ ku nu a ŋ. (1 Ujɔ́n. 5:19) Naana a, a lɔfu jé ɛnyā kpɔcii: Ujehofa jé ɔdā nɛ a yɔ i má a, ó kē lɛ ɛlá wu uwɔ. (Umát. 10:29-31; 1 Upít. 5:6, 7) Ó klla ce alɔ okonu kpɔ kahinii: “Ń gáā leyī gwū aá bónū ŋ́, ń kē gáā cīgbīhi kwu aá gbóógbóō ŋ́.” (Uhíb. 13:5) Ujehofa lɔfu ta uwɔ abɔ ō lɔtu, ɔdaŋ nɛ āhɔ̄ nɛ a yɔ anu a kóō lɛbɛɛka lɛ eyiyoce duuma ŋ ma. Alɔ má ɛgɛ nɛ ɛlā nyā wɛ ɔkwɛyi ipu āhɔ̄ ku Ujosɛfu a.
Ujehofa yɔ mla Ujosɛfu eko nɛ ó kóō yɔ inu agba, ɛnyā ya é kwu ɔ piya ɔcɛ nōo gē yɔ i leyikwu ɛjɛɛji aalagba a (Má ogwotu ɔmɛ 9)
9. Ɔdi mafu ka Ujehofa yɔ mla Ujosɛfu eko nɛ ó yɔ inu agba a? (Ohútu 39:21-23)
9 Jé Ohútu 39:21-23. Ɛpleeko olɔnɔ ɔɔma nɛ ó yɔ inu agba naana a, Ujehofa ya ku Ujosɛfu kóō yɔ i jɛ gɔbu ipu ɔdā doodu nɛ ó gē ya a. Ɛgɛnyá a? Abɔ eko yɔ i nyɔ a, ɛlā ku Ujosɛfu gbɔɔ ō he otrɛyi ku aalagba ɔtu ɛgɛ nōó lɛ eko nɛ ó yɔ mla Upɔtifa a. Igbihaajɛ, otrɛyi ku aalagba a kwu Ujosɛfu i piya otrɛyi ku aalagba ɔhá nōo yɔ inu agba a. Ku ɛlā ɔkwɛyi a ba, Ubáyíbu da alɔ ka “otrɛ̄yí kú aálagbá ā í gē leyīkwu ɛga dóódu nɛ̄ Ujósɛ̄fu gē leyīkwu ɔ́ ā ŋ́.” Babanya Ujosɛfu lɛ ɛnɛɛnɛ uklɔ lɛ ō yɔ i ya ɛ. Ɛnyā wɛ opiyabɔ nōo ya acigili! Ɛgɛnyá nōó tɔɔtɛ ō je ɛnɛɛnɛ ɛga nyā lɛ alagba néē kɛmgbɛ ba ɔ, ka ó gáā hɛ ɔnyā ɔkpani nu baajɛ a? Ohi ekponu foofunu yɔ a. Ɛgɛ nɛ ɔkpá ku Ohútu 39:23 ka a, “Ɔwɔicō le ɔhā hɛ́ ce ɛjɛ̄ɛ̄jī ɔdā dóódu nɛ̄ Ujósɛ̄fu yá ā.”
10. Lɛ ɔ teyi peee ɔdā nōo ya ɛɛ nɛ ɔtu lɔfu ya Ujosɛfu bɛɛka ó yɔ i jɛ gɔbu ipu ɔdā doodu nɛ ó gē ya a ŋ ma.
10 Ceyitikwu ku a gbɛla lɛyikwu ɛgɛ nɛ ɔtu lɔfu ya Ujosɛfu lɛ a. Igbihi néē lɛ ɛkɛmgbɛ ka ba ɔ kwu ɔ ta inu agba a, a gbɛla ka ɔtu ya ɔ ka ó yɔ i jɛ gɔbu ipu ɔdā doodu nɛ ó yɔ i ya a? Ɔdi nɛ Ujosɛfu dɔka fiya ɔdā doodu ɔhá a? O ya ɛɛ kóō teyi olɔhi ku otrɛyi ku aalagba a nɛɛ? Á jé ŋ, ɔdā nɛ Ujosɛfu dɔka a wɛ ō lɛ ohɛta. Ó kóō da alagba éyi néē gáā hɛta ŋma inu agba a kóō lɛ ɛlā ka lɛ Ufero kwɛyi nu, o ya ɛɛ kéē lɛ ɔ hɛta ŋma inu agba odobu nɛ ó yɔ a. (Ohút. 40:14) Amáŋ, ɔcɛnyilɔ a i kɛla lɛ Ufero boobu ŋ. Ohigbu ɛnyā, Ujosɛfu yɔ inu agba a gɔbu ihayi ɛpa kpɔ. (Ohút. 40:23; 41:1, 14) Naana kpɔ a, Ujehofa gɔbu ya kóō yɔ i jɛ gɔbu ipu ɔdā doodu nɛ ó gē ya a. Ɛgɛnyá a?
11. Ɛnɛɛnɛ ɛhi nōó lɛ ɛdɔ ŋ nyá nɛ Ujehofa je lɛ Ujosɛfu a, ɛgɛnyá nɛ ɛnyā kē ta abɔ ō ya ɔdā nɛ Ujehofa bi ɔtu a?
11 Abɔ Ujosɛfu yɔ inu agba a, Ujehofa ya ku ɔcɛ́ ku Ijipiti a kóō lɛ ɔna ɛpa nōo yɔ i junwalu lɛ ɔ nɛɛnɛhi a na. Ufero dɔka ō jɛyi ku ɔna nɛ ó na a piii. Eko nɛ ɔcɛ́ a gáā le jé ka Ujosɛfu lɛ ɛhi ō ka ɛyi ku ɔna a, ó lɛ ɛhɔ tu kéē lɛ ɔ bi gē lɛ ɔ. Mla otabɔ ku Ujehofa, Ujosɛfu lɛ ɛyi ku ɔna a ka, ɛnɛɛnɛ ukɔ́ ocɛgbá nɛ ó klla tu ɔ a lɛ abɔ kwu ɔ ɔtu nɛhi. Ufero gáā le jé ka Ujehofa yɔ i ta Ujosɛfu abɔ a, ohigbu ɛnyā, Ufero kwu ɔ u piya ɔcɛ nōo géē yɔ i leyikwu ɛjɛɛji ɔdole nōo yɔ Ijipiti a. (Ohút. 41:38, 41-44) Igbihaajɛ, ɔkpɛta nɛhi gáā gbɔɔ ō ŋmo ipu ajɛ ku Ijipiti mla ajɛ ku Ukenan nōo wɛ ɛga nɛ apɔlɛ ku Ujosɛfu lā a. Babanya Ujosɛfu lɔfu ō hɛ apɔlɛ ku nu ta, klla gbo ipɔɔma nɛ Umɛsayiya géē wa ŋma igbihaajɛ a.
12. Ɔwɛ nyá nɛ Ujehofa ya ku Ujosɛfu kóō yɔ i jɛ gɔbu ipu ɔdā doodu nɛ ó gē ya a?
12 Gbɛla lɛyikwu aɔdā obɔbi ɛyɛɛyɛyi nōo ya ipu oyeeyi ku Ujosɛfu a. Ɔnyɛ ya ku Upɔtifa kóō bi eyī olɔhi le má Ujosɛfu nōo wɛ ɔfiyɛ anca a? Ɔnyɛ ya ku ɛlā ku Ujosɛfu nōo wɛ alagba anca kóō he otrɛyi ku aalagba a ɔtu a? Ɔnyɛ ya ku Ufero kóō nɔɔna nōo yɔ i junwalu lɛ ɔ klla je ɛhi ɔɔma lɛ Ujosɛfu kóō ka ɛyi ku nu a? Ɔnyɛ lɛ abɔ kwu Ufero ɔtu kóō kwu Ujosɛfu i piya ɔcɛ nōo gē yɔ i leyikwu ɛjɛɛji ɔdole nōo yɔ Ijipiti a? (Ohút. 45:5) Ó teyi peee ka Ujehofa wɛ ɔcɛ nōo ya ku Ujosɛfu kóō yɔ i jɛ gɔbu ipu ɔdā doodu nɛ ó gē ya a. Naana nɛ ayinɛ ku Ujosɛfu dɔka ō ŋmo ɔ a, Ujehofa lɛ āhɔ̄ a piyabɔ o ya ɛɛ kóō lɛ ɔdā Nɛ Ó bi ɔtu a ya jila.
ƐGƐ NƐ UJEHOFA YA KU A YƆ I JƐ GƆBU A
13. Ujehofa gē hɛ alɔ ta ŋma ɛjɛɛji unwalu nɛ alɔ gē má a nɛɛ? Lɛ ɔ teyi peee.
13 Ɔdi nɛ alɔ nwu ŋma ɔ̄kā ku Ujosɛfu a? Ujehofa gē hɛ alɔ ta ŋma ɛjɛɛji unwalu nɛ alɔ gē má a nɛɛ? Ó gē piya aɔdā ɛyɛɛyɛyi nōo gē ya ipu oyeeyi ku alɔ abɔ, o ya ɛɛ ku ɛjɛɛji ɔdobɔbi nōo gē ya ipu oyeeyi ku alɔ a kóō wɛ ohigbu ɔdā olɔhi? Ehee, Ubáyíbu i nwu alɔ lɛ a ŋ. (Ɔ̄cok. 8:9; 9:11) Amáŋ alɔ jé ɛnyā: Eko duuma nɛ alɔ yɔ i má unwalu, Ujehofa jé lɛyikwu ɔ klla gē po ɔkɔ ku otabɔ nɛ alɔ gē gba a. (Aíjē 34:15; 55:22; Ayis. 59:1) Ofiyɛ duu a, Ujehofa lɔfu ta alɔ abɔ ō lɔtu āhɔ̄ olɔnɔ a gā ajaajɛ. Ɛgɛnyá a?
14. Ɛgɛnyá nɛ Ujehofa gē ta alɔ abɔ eko nɛ alɔ yɔ ipu āhɔ̄ olɔnɔ a?
14 Ɔwɛ éyi nɛ Ujehofa gē bi le ta alɔ a wɛ o ŋma lɛ ō je ɔtu ō tu lé mla ɔtu ō tu kwu ɔtu lɛ alɔ, igbalɛwa ó kē i ya ɛnyā eko kpaakpa a. (2 Ukɔ́r. 1:3, 4) Ɔdā nōo ya ipu āhɔ̄ ku ɔyinɛ alɔ Eziz nōo lā ipu Turkmenistan, néē je ta inu agba ihayi ɛpa ohigbu ɔtu okpoce ku nu a yɔ abɔɔ a. Ó kahinii: “Ɔcɔɔci ku ɛ̄cī néē yɔ i kɛpɔ ku um a, ɔyinɛ nɔnyilɔ éyi mafu ɔkpá ku Ayisáya 30:15 gā um nōo kahinii: ‘N géē lɛ ɔfú tū aá iyē ɔ́dāŋ nɛ̄ aá lɛ ɔtū kpóce um bá cíí.’ Ɛga ku Ubáyíbu nyā gē ta um abɔ eko doodu ō lɛ ɛbɔ ku ɔtu mla ō gbolo ce Ujehofa ipu ɛjɛɛji ɔdā doodu. Ō gbɛla lipu lipu tu ɛga ku Ubáyíbu nyā ta um abɔ ɛjɛɛji eko nɛ um yɔ inu agba a.” A lɔfu gbɛla tu eko duuma ipu oyeeyi ku uwɔ nɛ Ujehofa ta uwɔ abɔ, ŋma lɛ ō je ɔtu ō tu lé mla ɔtu ō tu kwu ɔtu gā uwɔ eko okpaakpa nɛ a cɛgbá nu fiyɛ duu a?
15-16. Ɔdi nɛ a nwu ŋma ɔ̄kā ku Tori a?
15 Igbalɛwa, alɔ i gē jé ɔwɛ ɛyɛɛyɛyi nɛ Ujehofa gē bi le ta alɔ abɔ a ŋ gbeeko nɛ unwalu nɛ alɔ yɔ i má a mɛ. Ɔyinɛ alɔ nɔnya nōo lé ka u Tori a má ka ɛlā nyā wɛ ɔkwɛyi. Ɔyi nu nɔnyilɔ nōo lé ka u Mason a nya mla ōcē ku ucansa ihayi ɛhili jaa gbeeko nɛ ó gekwu. Ó lɛ aafu ŋ, ɔdā nōo ya nyā biya u Tori ɔtu nɛhi. Ó kahinii: “Ń gbɛla ka ó lɛ āhɔ̄ olɔnɔ ɔhá duuma nōo géē kwu um iyē fiyɛ ɛnyā abɔ um wɛ ɛ́nɛ́ a gɛ ŋ.” Ó klla kahinii: “N jé ka aɛ́nɛ́ mla aadā ɔhá géē cɛ kóō má ɔyi uwa yɔ i má owe, kóō bɔbi fiyɛ ɔdaŋ ka uwa yɔ i má owe a.”
16 Naana nɛ ó kwu Tori iyē nɛhi ō má ɔyi nu yɔ i má owe nɛɛnɛhi a, igbihaajɛ ó gbɛla lɛyikwu ɛgɛ nɛ Ujehofa ta ɔ abɔ kóō lɔtu a. Ó kahinii: “Eko duuma nɛ um gbɛla lɛyikwu eko ɔɔma, n gē má ɛgɛ nɛ Ujehofa ta um abɔ ɛjɛɛji eko nɛ ɔyi um yɔ i doōcē a. Ocabɔ mafu, eko nɛ u Mason kóō yɔ i doōcē nɛɛnɛhi nɛ ó tɔɔtɛ lɛ ɔ ō miyɛ augbɔga ŋ ma, ayinɛ alɔ gē pɛ umoto awa ɛpa gā inɛci gáā má ɔ. Ó lɛ ɔcɛ éyi nōo géē yaajɛ eko doodu inu nɛ ācɛ gē gbeyi idɔkitɔ a nōo le tutu ō je otabɔ. Ayinɛ alɔ a klla lɛ aɔdā nōo ce alɔ ɛgbá a ya lɛ alɔ. Eko nɛ odee kóō le lɔnɔ naana, alɔ gē lɛ ɔdā nɛ alɔ cɛgbá a eko doodu.” Ujehofa lɛ ɔdā nɛ u Tori cɛgbá a je lɛ ɔ o ya ɛɛ kóō yɔ i lɔtu, ó kē ya ɔdā ekponu ɔɔma lɛ u Mason duu.—Má ikpati nōo kahinii: “ Ujehofa Lɛ Ɔdā Nɛ Alɔ Cɛgbá Yiili A Je Lɛ Alɔ.”
A HII JE MLANYI ƐJƐƐJI ƆDĀ NƐ UJEHOFA YA O YA ƐƐ KÓŌ TA UWƆ ABƆ A Ŋ
17-18. Ɔdi gáā ta alɔ abɔ ō jé ka Ujehofa yɔ i ta alɔ abɔ eko nɛ alɔ yɔ i má unwalu, ka otabɔ ɔɔma ka ó klla jɛ alɔ eyī a? (Aíjē Kú Ɛ̄gbā 40:5)
17 Jé Aíjē Kú Ɛ̄gbā 40:5. Ɔdā nɛ ɔcɛ nōo gē tu ico ɛfu bi ɔtu a, wɛ ō le yɛ fu ico ku ɛfu a. Amáŋ, ó lɛ ɛga alɛwa nōo yɔ abɔɔ nɛ ó lɔfu mahayi cɛɛ kóō jɔɔnyɛ ō má aɔdā oheyifuu ōhī. Ɔwɛ ekponu ɔɔma, bēē lɛ eko taajɛ eko doodu cɛɛ ku a gbɛla lɛyikwu ɛgɛ nɛ Ujehofa yɔ i ta uwɔ abɔ ō jɛ gɔbu ipu ɔdā doodu nɛ a gē ya, naana nōó lɛ unwalu éyi nɛ a kóō yɔ i lɔtu ku nu a. Oŋmɛyi ku ɛ̄cī doodu, da iyi uwɔ ɔka kahinii: ‘Ɔwɛ nyá nɛ um má ɛgɛ nɛ Ujehofa hɔha ce um icɛ ɛ ma? Naana nɛ unwalu a yɔ kpɔ a, ɛgɛnyá nɛ Ujehofa yɔ i ta um abɔ ō lɔtu a?’ Má ɔ ɔdaŋ ku a lɔfu lɛ abɔ kwu odee tɛɛcɛ nɛ Ujehofa ya, o ya ɛɛ kóō ta uwɔ abɔ a.
18 Ó wɛ kwɛyi, ku a lɔfu yɔ i gbɔɔkɔ ku unwalu nɛ a yɔ i má a kóō mɛ. Ɔɔma wɛ ɔdā o cɛgbá klla lɔhi nɛhi. (Ufíl. 4:6) Amáŋ, alɔ i cika ō je mlanyi ka ó lɛ aɔhā nɛ alɔ yɔ i jɔɔnyɛ nu babanya ŋ. Ɛgɛ nɛ alɔ kē jé a, Ujehofa cokonu ō lɛ ɔfu tu alɔ iyē mla ō ta alɔ abɔ ō lɔtu. Ohigbu ɔɔma, ka ó wɛ ɔdā nōo cika ō yɔ i jɛ uwɔ eyī eko doodu ka Ujehofa yɔ i ta uwɔ abɔ. Cɛɛ ó géē tɔɔtɛ gā uwɔ ō má ɛgɛ nɛ Ujehofa yɔ i ta uwɔ abɔ ō jɛ gɔbu ipu ɔdā doodu nɛ a gē ya, ɛgɛ nɛ ó ya lɛ Ujosɛfu naana nɛ ó kóō yɔ ipu āhɔ̄ olɔnɔ nɛhi a.—Ohút. 41:51, 52.
IJÉ ƆMƐ 32 Take Sides With Jehovah!
a Eko duuma nɛ alɔ yɔ i má unwalu bɔbi bɔbi, ó lɔfu ya alɔ bɛɛka alɔ i yɔ i “jɛ̄ gɔbū” ŋ ma. Alɔ lɔfu gbɛla ku ɛlā nōo wɛ ō jɛ gɔbu a lɔfu tɛɛma kwu alɔ eko nɛ unwalu nɛ alɔ yɔ i má a mɛ. Amáŋ ɛlā nōo ya ipu oyeeyi ku Ujosɛfu a nwu alɔ ɛnɛɛnɛ ɛlā éyi, Ujehofa lɔfu ta alɔ abɔ ō jɛ gɔbu ɔdaŋ ku alɔ kóō yɔ ipu unwalu. Ikpɛyi ɛlā nyā géē je ɛlā nyā ta alɔ eyi peee.
b Ubáyíbu kɛla lɛyikwu opiyabɔ nōo ya ipu oyeeyi ku Ujosɛfu eko aflɛyi nɛ ó yɔ i yuklɔ ku ɔfiyɛ nyā ipu aɔgba ligii foofunu, amáŋ opiyabɔ nyā lɔfu je ihayi alɛwa gbɔbu ɛɛ kóō ya.
