1-2. (a) Ịyẹ tị́ du kọọ lahị ẹbyẹbyị ụka kahị la akama ka? (b) Ẹlịyẹ ahị tị́ ka kụ ẹhị yẹ a-ang ọjẹ́jẹ ọlẹ?

 Ọ́ KAA lahị ahị angịnyị nya iJihova ẹbyẹbyị ụka ká akama á wẹ chịhị ọgụ ka. Ahị jẹ́ ká ịBayịbụụ ya nyori, “bwula akama ọyẹyẹ la datị-datị, ahị angị myị la Ohe Oluhye nyaa ka bwu jụ ka ẹpwụ nya ịpyị Adịrahụ nya Ohe Oluhye myị́ pyii lẹlẹ.” (Ụkụr. 14:22) Ahị myịmyị jẹ́ nyori akama nyahị ịhyẹ á ka jẹ́-ẹ myị́ gbanggbang ka gbee kahị ka pwụ odehe onyeewe nya Ohe Oluhye, ẹga ká “igu ogbugbu ọhẹ-lọhẹ á ka ji kaka, Lee, ida ọbaba bala ida ojeje ọhẹ-lọhẹ ọ-ka jiji kaka. Lee, ang ọjụjụ ọhẹ-lọhẹ, ọ ka ji kaka ịnyịnyị.”—Ọwụ. 21:4.

² IJihova-á chewu keehi hi akama ka. Ma, ọ kaa dahị ụbwọ nyọka bọhụ ẹ-ẹpwụ nyaa. Kụ ẹhị yẹ ẹla ọlẹ ká ọlẹrụ ịPọlụ byi angịnyị nya ịKịrayịsị ịla iRom lẹẹ wẹẹ. O gu ẹnyị nya akama ịdatị-datị ịlẹ ká ọwa bala aanamwụ wẹẹ chịpwụrụ bwu họhẹ-họhẹ. Ọọwa ọ yẹkẹẹ: “Ahị ri angị kụrụ kụrụ ma kụrụ ị-ịlahị nya ang ịwẹ wuu bwula ọngịrị nya ịKịrayịsị Ọngọlẹ kahị há lụmẹ.” (Rom. 8:35-37) Ẹlẹwẹ mẹjẹ nyori iJihova ka jẹ́-ẹ dang ụbwọ ụka ka dọmwụ juwa chịpwụrụ bwu ẹpwụ nya akama. Ahị yẹ jaabwọ ká iJihova da iJosẹfụ ụbwọ bala abwọlẹ Kọ ka dang ụbwọ ịnyịnyị wẹẹ.

3. Ẹlịyẹ à tị́ yẹda kpịraka ọ-ọhịhị nya iJosẹfụ?

³ IJekọbụ mẹjẹ gede-gede nyori iJosẹfụ ọnyị nyamwụ họ́ọ yẹẹyẹẹ. (Ọmwụ. 37:3, 4) Ọọwa du ká anyị alẹng nya iJekọbụ  ịgbahị dọmwụ nyọka yẹ ijiiji nya ọọnaa. Ụka ọlẹ kị la iwe, ị hu iJosẹfụ ra ha alọhị ịhyẹ bwu iMidiyan. Alọhị ịịwa kpa iJosẹfụ jẹ lụrụ-lụrụ ka ọpyị nya Ijipiti, myịmyị hwoo ra ha ịPọtịfa kọ ri olegbeju nya angịdẹwụ nya iFero. Ọhịhị nya iJosẹfụ yẹda kpịraka bwu ọnụ-ọnyị nya adamwụ o-riri kaka ri ọnyọhị nya ọla Ijipiti!—Ọmwụ. 39:1.

4. Ányị ụma nya akama ọlẹ ká iJosẹfụ la à tị́ ka chịhị ọgụ myị́?

⁴ ỊBayịbụụ ya nyori ‘ụka nya ụrụrụ ọbyịbyị kaa ji ha ọng myị ọng wuu.’ (Ọngọ. 9:11) Ụka ọhẹ ahị ka chịpwụrụ bwu akama ịlẹ kị “lala ịnya angịnyị nya Ohe Oluhye ịkịla,” kị ri ịmayẹ ịlẹ kịị chị angịnyị ehe wuu ọgụ. (1 Kọr. 10:13) Lee ahị ka yẹ akama ọọlajị nyori ahị ri angịjụgbẹyị nya iJisọsị myị́. Ọ-chụ pwokwita, ị ka kpahị họ, jahị dahị lee ọ-dọmwụ tụ́ụhị pyịpyị chajị nya ọmyịmyị ọlala nyahị myị́. (2 Tim. 3:12) Akama ọnyị myị́ ọnyị kọ chịng ọgụ, iJihova ka jẹ́-ẹ dang ụbwọ nyọka kịnyaa kịlahị. Ányị ọ tị họ ịnyị ha iJosẹfụ?

5. Ẹlịyẹ ịPọtịfa à tị́ ya u-uhye nya ịlahị ọkaka nya iJosẹfụ? (Ọmwụ Ọdada 39:2-6)

⁵ Wa Ọmwụ Ọdada 39:2-6. ỊPọtịfa wẹ ka jẹ́ nyori iJosẹfụ nyị jẹ́ ẹla yẹẹyẹẹ bala ọ-la kpịra-kpịra. Ọ tị myịmyị jẹ́ ang odudu kọ lịnyị. ỊPọtịfa yẹ nyori, “Ohe Oluhye ayịdang nyaa wẹẹ da iJosẹfụ ụbwọ du ká ang myị ang nya iJosẹfụ nyị wẹẹ kịlahị hiigu-hiigu ịnyị lẹ.” b Ọọwa lẹ, ọla Ijipiti ọwẹ a hu iJosẹfụ ri olegbeju nya anchẹ nyamwụ ịkịla wuu lẹlẹ. Ọ myịmyị tụụbwọ hi ẹpwa nyamwụ wuu jwoo ụ-ụbwọ. Ịyẹ à tị́ ri ocheju nyọọwa? Ohe wahị kụrụ ịPọtịfa yẹẹyẹẹ.

6. Ányị iwe-ahụrụ nya iJosẹfụ à tị́ ka lọọ myị́?

⁶ Kụ irya jaabwọ kọ ka la iJosẹfụ wẹẹ. Ịyẹ ọ tị́ ka tịtọ gụgụ wuu? ỊPọtịfa ọ-ka yọọ bala o-hwoo hwaa ịnyị? Ọ chịkpẹẹ myị́ nyori iJosẹfụ ka tịtọ nyọka lịlọmwụ, kọ ka jẹ́-ẹ tịrẹkpẹ ka ẹga nya adamwụ. Chajị jaabwọ myị́ abwọ kị hwoo hwaa ẹ-ẹpwa nya ịPọtịfa kaka ba, iJosẹfụ ri ọnyọhị e-ekpeleji nya ayịbaba ọlẹ kọ kaa gbịgba ha iJihova ka wẹẹ. IJihova á tị gu ịPọtịfa gbịla nyọka pehi iJosẹfụ kọ ka lịlọmwụ ka. Iwe-ahụrụ nya iJosẹfụ dọmwụ ja ka tịpyọ gụ ọọwa wẹẹ.

7. Ụ-ụgbẹyị oyina iwe-ahụrụ nya iJosẹfụ à tị́ tịpyọ gụ ọọwa? (Ọmwụ Ọdada 39:14, 15)

⁷ Ụpwụ nya Ọmwụ Ọdada egbeju 39 họ kahị jẹ́ nyori iJosẹfụ nyị ju ahụ nya ịPọtịfa ẹ-ẹhị lụmẹ gbee kọọ maga ugbabwọ ịmányị tị́ ká iJosẹfụ ka họ ụya tọọ. IJosẹfụ á tị myị jwoo kpong-kpong ka. Ụka ohyẹẹkpẹ, ọnyang ọwẹ ju agbama ta iJosẹfụ yẹẹyẹẹ du kọ chị ẹla bọọ nyori nyị maga nyọka họ ụya tọwa la agbụrụ. (Wa Ọmwụ Ọdada 39:14, 15.) Ụka ká ịPọtịfa wo ẹla ọọwa, o wu iJosẹfụ ju agba, ọ tị juwa lụka ọtata. (Ọmwụ. 39:19, 20) Ányị ube nya agba ọọwa à tị́ la? Etu nya omyi ẹla nya ala iHiburu ọlẹ ká iJosẹfụ kpa ya ẹla rụ ube nya agba ka ri “ịwẹẹlụ” lee “ụjẹ” myị́, mẹjẹ nyori ẹga ọọwa chowu bala o-ri ahị ọdahile gwọọ myị́. (Ọmwụ. 40:15) ỊBayịbụụ myịmyị mẹjẹ nyori ụka ọhẹ, ị ya agba ju iJosẹfụ a-ata bala ọ-ya oje dọọ ụ-ụkpụrọkọ. (Eje. 105:17, 18) Iwe-ahụrụ nya iJosẹfụ wẹẹ tịpyọ gụ ọọwa. O bwu ọnyọhị ọ-ju ọdahịhile oriri kaka ri ọlagba amamadiroko lẹ.

8. Kori ká akama nyahị-ị́ tịpyọ gụ ọọwa wẹwẹ, ahị ọdahile oyina ahị tị́ ka la myị́?

⁸ À juwa ẹ-ẹpwụ nya iwe-ahụrụ olujwo ọhẹ ọlẹ kọ ja tịpyọ gụ ọọwa nanana nyori à wẹẹ raabwọ nyịlẹhị-ịlẹhị ẹnẹhẹ lẹ? Ẹla ọlịnyị ka họ tahị myị́. Ịlẹhị lẹ, iJihova á kaa chewu keehi hi akama ẹ-ẹpwụ nya odehe ọlẹ kọ ji ekpeleji nya Olegu Onyobyi lẹẹ ka. (1 Jọn. 5:19) Ma, à ka jẹ́-ẹ la ahị ọdahile ọlẹ: IJihova jẹ́ ang myị́ ang ọlẹ ká wẹẹ chịpwụrụ bwu, ọ tị kpahị jung ịnyịnyị. (Mat. 10:29-31; 1 Pit. 5:6, 7) Ọ myịmyị myọnụ yẹkẹẹ: “Am Ohe Oluhye á ka kpanụ anụ angịnyị nyam keji kpong-kpong ka lee ọ-tụụbwọ hiinu kpá ẹnẹnẹhẹ kaka.” (Hib. 13:5) IJihova ka jẹ́-ẹ dang ụbwọ nyọka bọhụ myị́ kori ká iwe-ahụrụ nyang á dọmwụ lala o-ri ahị ọdahile ọhẹ-ẹ́ ji kaka. Ahị yẹ jaabwọ kọ lịnyị ẹ-ẹga nya iJosẹfụ wẹẹ.

9. Ẹlịyẹ à tị́ mẹjẹ nyori iJihova juwa ta iJosẹfụ ụka kọ ju u-ube nya agba? (Ọmwụ Ọdada 39:21-23)

⁹ Wa Ọmwụ Ọdada 39:21-23. IJihova da iJosẹfụ ụbwọ nyọka kịlahị tụ́ ụka olujwo ọlẹ kọ dọmwụ juwa u-ube nya agba. Ụ-ụgbẹyị oyina tị́? Nyọlẹ kọ nọ pyịnyẹng, olegbeju nya ube nya agba dọmwụ nyọka dahịhile iJosẹfụ bala o-jwoo ihi jaabwọ ká ịPọtịfa họ ịnyịnyị. Ọọwa lẹ, olegbeju ọwẹ à hu iJosẹfụ nya ọngọ ka kpẹhị rịrị alagba ịkịla lẹlẹ. ỊBayịbụụ dọmwụ ya nyori “ụbwọ-lẹta nya olegbeju ọgbahị nya ube nya agba ọọwa-á juwa ẹ-ẹpwụ nya ụkụrwọ ọhẹ-lọhẹ ọlẹ kọ ya ju iJosẹfụ ụ-ụbwọ kaka.” IJosẹfụ la ụkụrwọ o-ju egbeju ọhẹ ka họ lẹẹlẹẹ lẹ. Ọyẹda ọlẹ kọ yahị me ka à wẹ lẹ! Ányị ọlagba ọlẹ kị chị ẹla ba nyori nyị maga nyọka họ ụya tọ ahụ nya olegbeju la agbụrụ à tị́ ka la iwe ọkpọnchị ọlịịwẹ? Ang okpokpo kene-kene à ka du kọ ka jẹ́-ẹ lịnyị lẹ. Ụpwụ nya Ọmwụ Ọdada 39:23 yẹkẹẹ: “[IJihova] kaa juwa ta iJosẹfụ ẹ-ẹga myị ẹga bala o-juwa kpa ang myị ang nyamwụ wuu kịlahị ụka wuu ịnyịnyị.”

10. Ịyẹ tị́ du kọ ka la iJosẹfụ lala o-ri ọ́ kịlahị ẹ-ẹpwụ nya ang myị́ ang ka myị́?

¹⁰ Maga ka kụ irya myịmyị u-uhye nya abwọlẹ kọ ka la iJosẹfụ wẹẹ. Nyọlẹ kị me ọnọọkịla bọ́ọ bala o-woo ju agba kpá, à me irya kọ ka lọọ lala o-ri ọ juwa kịlahị ẹ-ẹpwụ nya ang myị́ ang? Ịyẹ à tị́ ri ang ọlẹ ká iJosẹfụ tịtọ gụgụ wuu? Ẹla nyamwụ ọ-ka kpụ olegbeju nya agba ịpyọ ịnyị? Ọ chịkpẹẹ myị́ nyori iJosẹfụ tịtọ kị ka gbọọ kpehe kọ ka la ịlọmwụ. Ọ dọmwụ byi ọlagba ọkịla ọlẹ kị wẹẹ ka gba kpehe nyori nyị ya ẹla nyọwa je iFero chajị kị ka gbọọ kpehe bwu ube nya agba olujwo ọwẹ. (Ọmwụ. 40:14) Ma, ọlẹng ọọwa á ya ẹla nyamwụ je iFero ahyaahị ka. Lẹ, iJosẹfụ kịnyaa ẹ-ẹpwụ nya ube nya agba ọwẹ lala ẹka imiiye myịmyị  kịlahị nyọọwa wẹẹ. (Ọmwụ. 40:23; 41:1, 14) Kpọkpọọkpọ, iJihova tị kịnyaa la ọ-dọọ ụbwọ nyọka kịlahị. Ụ-ụgbẹyị oyina tị́?

11. Āhị ọnyịịla oyina iJihova à tị́ ya ha iJosẹfụ? Ányị ọọwa à tị́ dụbwọ nyọka họ irya nya iJihova jịra?

¹¹ Ụka ọlẹ ká iJosẹfụ juwa u-ube nya agba wẹẹ, iJihova họ ká adịrahụ nya Ijipiti la alaa imiiye ịlẹbyẹbyị ịhyẹ. IFero tịtọ kọ ka jẹ́ etu nya alaa ịịwa pyịị. Ụka ká adịrahụ jẹ́ nyori iJosẹfụ nyị la āhị nya o-bwuru etu nya alaa, ọ du ẹrụ kaka wụrwọọ. Bwula ụbwọ ọdada nya iJihova, iJosẹfụ bwuru etu nya alaa ịịwa bala ọ-ju iFero irya ọlẹ kọ kpọọ ịpyọ. IFero yẹ nyori iJihova nya-à wẹẹ da iJosẹfụ ụbwọ lẹ, ọowa o hwoo ri olegbeju ọ-kpẹhị rịrị ang iriri ọ-ọpyị nya Ijipiti wuu lẹlẹ. (Ọmwụ. 41:38, 41-44) Nyọlẹ kọ nọ chẹẹ, uhi ọtụka-ọtụka dọmwụ ọ-ọpyị nya Ijipiti bala ọpyị nya iKenan ọlẹ ká alugbiyegu nya iJosẹfụ kụ́ ịnyịnyị. Lẹẹlẹẹ, iJosẹfụ la iwe nyọka chị alugbiyegu nyamwụ da bala ọ-chewu ke ugbiyegu ọlẹ ká iMesaya ka bwu ị-ịlahị lẹ.

12. A-agbẹyị iyina iJihova à tị́ da iJosẹfụ ụbwọ nyọka kịlahị?

¹² Kụ irya nya ang ịdatị-datị ịlẹ kị họ ọ-ọhịhị nya iJosẹfụ wẹẹ. Owo à tị́ du ká ịPọtịfa dọmwụ nyọka yẹ abwẹla ịnyịịla nya iJosẹfụ ko ri ọnyọhị? Owo à tị́ họ ká ẹla nya iJosẹfụ ko ri ọlagba há olegbeju nya alagba? Owo à tị́ du ká iFero la alaa ịlẹbyẹbyị bala o-ya āhị nyọka bwuru etu nyaa ha iJosẹfụ? Owo à tị́ gu iFero gbịla nyọka hu iJosẹfụ nya olegbeju ọ-kpẹhị rịrị ang iriri nya ala Ijipiti? (Ọmwụ. 45:5) Ọ la gbagbịla nyori iJihova à da iJosẹfụ ụbwọ du kọ kịlahị ẹ-ẹpwụ nya ang myị́ ang ịlẹ kọ họ lẹ. Nanana nyori aanịna nya iJosẹfụ tịtọ kị ka nwọọ, iJihova ye iwe-ahụrụ ọọwa da chajị Kọ ka họ irya nyamwụ jịra.

13. IJihova kaa yẹ iwe-ahụrụ nyahị ọnyị myị́ ọnyị da? Ịyẹ tị́ du kahị ya ịnyị?

¹³ Ẹlịyẹ ahị tị́ ka jẹ́ bwu oja nya iJosẹfụ? IJihova kaa yụbwọ ju ẹla myị́ ẹla ọlẹ kọọ họ tahị? Ọ kaa yẹ iwe-ahụrụ ọnyị myị́ ọnyị da ọ-ọhịhị nyahị chajị ká ang ịtịpyọ wuu ka yẹ ka ri ang ịnyịịla? Ehe, ịBayịbụụ á mẹjẹ ịnyị ka. (Ọngọ. 8:9; 9:11) Ma, ẹla ọlẹ kahị tị jẹ́ ri: Ụka ká ọmayẹ á chịhị ọgụ, iJihova kaa jẹ́, ọ tịị ke ụrụ wo lida nya ụbwọ ọdada nyahị ịnyịnyị. (Eje. 34:15; 55:22; Ayị. 59:1) IJihova myị́myị́  kaa họ gụ ọwẹ wẹẹ, ọọ dahị ụbwọ nyọka jẹ́-ẹ bọhụ ẹ-ẹpwụ nya akama. Ányị ọ tịị bwu họ ịnyị?

14. Ányị iJihova à tịị bwu dahị ụbwọ ụka nya akama?

¹⁴ Ụgbẹyị ọhẹ ọlẹ ká iJihova kaa bwu dahị ụbwọ ri o-bwula ọ-ya ẹjẹ ọkpụ́kpụ bala ọhụ ojuju hahị ụka kahị baba nyamwụ kpangga. (2 Kọr. 1:3, 4) Ịnyị ọ la ẹ-ẹga nya ọọnahị ọhẹ bwu Turkmenistan ká ẹnyị nyamwụ ri Eziz lẹ. Ị cheje nyọka yọọ du ka agba ẹ-ẹpwụ nya ẹka imiiye ọọlajị nya ọmyịmyị nyamwụ. Ọ yẹkẹẹ: “Lụtụrụ nya ahyẹẹnụ ọlẹ kị wẹẹ ka lam eje, ọọnahị ọlẹng ọhẹ wa ụpwụ nya Ayịsaya 30:15, jem. Ẹga ọọwa ya nyori: ‘Anụ ka ye ọngịrị bwula ọ-kụ kem bala ọ-dahịhilem.’ Ọgba nya ịBayịbụụ ọwẹ dam ụbwọ ụka myị́ ụka nyọka kụ kpọọ bala ọ-kpụnịrọ iJihova ẹ-ẹpwụ nya ang myị́ ang wuu. Irya ọ-kụ ju ẹla ọlụwa dam ụbwọ yẹẹyẹẹ ụka ọlẹ wuu kam juwa u-ube nya agba.” À ka jẹ́-ẹ kụ irya nya ụka ọhẹ ọlẹ ká iJihova dang ụbwọ ẹ-ẹpwụ nya ọhịhị nyang bwula ọ-ya ẹjẹ ọkpụ́kpụ bala ọhụ ojuju hang ụka ọlẹ kpangga ka baba nyamwụ gụgụ wuu?

15-16. Ẹlịyẹ a tị́ jẹ́ bwu oja nya Tori?

¹⁵ Ụka lụmẹ-lụmẹ, áhị kaa jẹ́ jaabwọ ká iJihova dahị ụbwọ nyọka bọhụ ẹ-ẹpwụ nya akama nyahị ka gbee kọ ka cheju ene. Ọọnahị ọnyang ọhẹ ká ẹnyị nyamwụ ri Tori yẹ nyori ẹlẹwẹ nyị ri ẹlịlẹhị. Mason, ọnyị nyamwụ yẹ akama ọọlajị nya ẹdụrụ nya ẹbẹ ọgọ́ja ẹ-ẹpwụ nya ẹka ịrwọnyẹ gbẹgbịlẹ ene kọọ gbu. Ọkịlẹtụ kpụ Tori enyi yẹẹyẹẹ, ọ tị kpụ ọọwa ịlẹhị. Ọ yẹkẹẹ: “Ḿ me irya iwe-ahụrụ ọhẹ ka lujwo gụ́ ọwẹ ham lala ịnịna kaka.” Ọ myịmyị yẹkẹẹ, “M̀ jẹ́ myị̀myị̀ nyori ịnịna bala adịda ịkịla ka myị jum nyori, ọ-yẹ ọnyị nyang juwa yẹ akama jụjụ gụ́ ọ-ka yẹ akama ọọwa lịlọng.”

¹⁶ Nanana nyori ọkịlẹtụ kpụ ọọnahị ọwẹ enyi jaabwọ kọ wẹẹ yẹ ọnyị nyamwụ juwa yẹ  akama nyịlẹhị-ịlẹhị, ma ọ kụ irya u-uhye nya abwọlẹ ká iJihova dọọ ụbwọ nyọka bọhụ myị́. Ọ yẹkẹẹ: “Ụka kam kụ irya kẹkpẹ, m̀ yẹ jaabwọ ká iJihova dam ụbwọ lụka nya ẹdụrụ nya ọnyị nyam ọwẹ. Ọ-chụ pwokwita, ụka ọlẹ ká ẹdụrụ chị wu Mason lụmẹ kpoye nyọka jẹ́-ẹ yẹ angịlẹ kị jwoo ụga, aanahị alẹng bala anyang kaa kụ́ ang ọrụnyẹ ẹ-ẹpwụ nya awa imiiye wẹ ube-utoji. Ọngọhẹ kaa juwa ụka wuu kọọ nwụlanọ bala ọ-tịtọ nyọka dahị ụbwọ. Aanahị tị kaa ya ang nya ugbinyịrọ ịlẹ kahị baba hahị ịnyịnyị. Ụka ọlẹ kọ dọmwụ lujwo nyịlẹhị-ịlẹhị wẹwẹ, ahị kaa la ang ịlẹ kahị baba.” IJihova ya ang ịlẹ ká Tori baba nyọka jẹ́-ẹ bọhụ myị́ họọ, ọ tị họ ịnyị ha Mason ọnyị nyamwụ ịnyịnyị.—Yẹ akpa ọlẹ ko ri “IJihova Ya Ang Ịlẹ Kahị Baba Kpangga Hahị.”

17-18. Ịyẹ à tị́ ka dahị ụbwọ nyọka yẹ abwọlẹ ká iJihova dahị ụbwọ lụka nya akama bala ọ-mẹjẹ nyori ọ myịhị lẹhị? (Eje Ọnyịịla 40:5)

¹⁷ Wa Eje Ọnyịịla 40:5. Ọ chịkpẹẹ ká ọngịnyị ka hu ang-ẹdịyẹ ka ẹga ọlụrụ-lụrụ myị́. Jaabwọ kọ wẹẹ jẹ, ọ ka chị godayị ụ-ụgbẹyị ụka lụmẹ-lụmẹ nyọka mwịịnyọ myị́ ene kọ ka pwụ́ ẹga ọlẹ kọ wẹẹ jẹ ka. Ụ-ụgbẹyị ọlịnyị-ịnyị, maga ka chị godayị ụka myị́ ụka bala ọ-kụ irya u-uhye nya abwọlẹ ká iJihova wẹẹ dang ụbwọ nyọka kịlahị tụ́ ụka ka dọmwụ juwa ẹ-ẹpwụ nya ọmayẹ. La ocheju nya ahyẹẹnụ ọnyị myị́ ọnyị, tịlọng wo nyori: ‘Ụ-ụgbẹyị oyina iJihova à tị́ wahị kụrụm alẹ? Nanana nyori m̀ juwa ẹ-ẹpwụ nya akama, ányị iJihova à tị́ wẹẹ dam ụbwọ nyọka bọhụ?’ Maga ka yẹ ang ọhẹ lee ọkịla ọlẹ ká iJihova họ nyọka dang ụbwọ.

¹⁸ Ịlẹhị lẹ, à ka juwa raabwọ ká akama nyang ka cheju myị́. Ọọwa á la ẹbyẹbyị lee ọ tịpyọ ka. (Filip. 4:6) Ma ahị tị ka kpịtịya nya ahị ọwawa ịlẹ kahị yé lẹẹlẹẹ ịnyịnyị. IJihova myọnụ nyọka juhi ọngịrị bala ọ-dahị ụbwọ nyọka bọhụ. Lẹ, mẹjẹ ụka myị́ ụka nyori ọ myịng lẹhị nyọlẹ ká iJihova juwa balang. Ọọwa a ka yẹ jaabwọ ká iJihova wẹẹ dang ụbwọ nyọka kịlahị ụka ká dọmwụ juwa ẹ-ẹpwụ nya akama jaabwọ kọ họ ha iJosẹfụ lẹlẹ.—Ọmwụ. 41:51, 52.