1-2. (a) Wa mek wi nuo se wi wudaana go chuu wol iip a prablem? (b) Wa wi a-go luk pan iina da lesn ya?

 KAA wi a sorv Jeuova wi nuo se wi wuda afi go chuu wol iip a prablem kaa a dat di Baibl se, it se: “Wi afi go chuu nof sofarieshan fi get iina Gad kindom.” (Aks 14:22) An wi nuo se rait ya nou ya, wi naa go get rid a aal a wi prablem dem til wi go iina Gad nyuu worl wich paat “nobadi naa go ded agen, so nobadi naa go ala ar baal. An nobadi naa go fiil no pien.”​—Rev. 21:4.

² Jeuova no tek we wi prablem dem fram wi bot im elp wi fi go chuu dem. Luk pan wa di apasl Paal did tel di Kristiyan dem we did a liv iina Ruom. Fos im taak bout som a di sitn dem we im an di breda an sista dem did a go chuu. Im did rait an se: “No mata we apm ar wa wi go chuu, Krais Jiizas, di wan we lov wi wi kaaz wi fi muor dan win.” (Ruo. 8:35-37) Dis mek wi nuo se aal wen wi a go chuu wi prablem dem, Jeuova kyan mek tingz wok out gud fi wi. Mek wi luk pan ou Jeuova did mek tingz wok out gud fi Juozif aal wen im did a go chuu im prablem dem an ou im kyan elp yu wen yu a go chuu fi yu prablem dem tu.

3. Aal av a sodn wa did apm tu Juozif?

³ Jiekob neehn aid it se im lov Juozif muor dan im ada  bwai pikni dem. (Jen. 37:3, 4) An kaa a dat, di ada bwai dem staat fi bad main Juozif. So wen dem get di chaans, dem sel Juozif tu som man fram Midiyan we bai an sel tingz. Dem man de tek Juozif an kyari im faar faar go a Iijip, an wen dem riich dong de dem sel im agen tu wan man we niem Patifa uu a did di baas fi di gyaad dem. Luk ou iina no taim Juozif laif ton opsaid dong. Wan minit im a did di wan we im faada lov di muos an nou im a sliev iina Iijip!​—Jen. 39:1.

4. Wa wi mait-a go chuu we komiin laik wa Juozif did go chuu?

⁴ Di Baibl mek wi nuo se “bad tingz apm tu di uol a wi.” (Iik. 9:11, Holy Bible​—Easy-to-Read Version) Som a di prablem dem we wi a go chuu a prablem we “evribadi els a chogl wid.” (1 Kor. 10:13) Ar wi mait-a sofa jos kaaz wi a du di sitn dem we Jiizas se wi fi du​—laik piipl mait-a laaf aafa wi, an fait gens wi, ar mek tingz aada fi wi kaaz a di sitn dem we wi biliiv iina. (2 Tim. 3:12) Bot no mata wa kain-a prablem wi av, Jeuova kyan mek tingz wok out gud fi wi. A ou Jeuova did du dat fi Juozif?

5. Wa Patifa did nuo se did kaaz evriting we Juozif du fi ton out gud? (Jenisiz 39:2-6)

⁵ Riid Jenisiz 39:2-6. Patifa did get fi si se Juozif did a wok aad an im kuda did du im wok gud tu. An im did nuo wa mek, im si se a kaaz “Jeuova did de wid im an evriting [Juozif] put im an tu Jeuova mek it ton out gud.” b So im mek im ton di sorvant we a im rait-an-man an im mek im inchaaj a im ous an evriting we im av. An kaa a dat, tingz did a gwaan gud fi Patifa.

6. Ou Juozif mait-a did fiil bout wa im did a go chuu?

⁶ Mek wi chrai fi luk pan tingz di wie ou Juozif did luk pan it. A wa yu did tingk Juozif did riili waahn fi apm? Yu tingk a fi Patifa si’im an gi’im big jab? Wa Juozif did waahn a fi dem frii im mek im go baka im yaad tu im faada. No mata di big jab we Patifa did gi Juozif, Juozif did stil a wan sliev fi wan man we neehn a sorv Jeuova. Bot Jeuova neehn mek Patifa frii op Juozif. An a neehn it dat, tingz did a get wos an wosa fi Juozif.

7. Ou di sitn dem we Juozif did a go chuu did get wosa fi’im? (Jenisiz 39:14, 15)

⁷ Jenisiz chapta 39 mek wi nuo se Patifa waif did lov ou Juozif luk so shi did wel waahn fi de wid im. So shi chrai muor dan wan taim fi de wid im. An evritaim shi chrai, Juozif bak ar aaf. An kaa a dat, shi get beks wid Juozif bad so shi go tel lai se im did a chrai fi riep ar. (Riid Jenisiz 39:14, 15.) So wen Patifa did ier se im did a chrai fi riep im waif, im fling Juozif iina prizn, an a kopl ier wel im did de de fa. (Jen. 39:19, 20) Wa da prizn de did komiin laik? Di Iibruu langwij wod we Juozif did yuuz fi ‘prizn’ kyan komiin laik wan big tangk ar wan wel. Dis mek wi nuo se im did de iina wan daak plies an im did fiil laik se im wudn kyan kom out de. (Jen. 40:15; ftn.) Di Baibl did aal mek wi nuo se som a di taim dem chien op im fut an im nek wid chien an aiyan chrap. (Sa. 105:17, 18) So wi si se wa Juozif did a go chuu did a get wosa. Fos im did a wan sliev we dem kuda chos an den im ton wan prizna.

8. Aal ef di prablem dem we wi a go chuu get wosa, wa wi kyan nuo fi shuor se?

⁸ Yu eva go chuu som rof taim an tingz get wos aalduo yu a prie aad aad? Ye man, dat kyan gwaan. Jeuova no tek we di prablem dem we wi a go chuu iina da worl ya we a Sietan a kanchuol tingz. (1 Jan 5:19) Bot yu kyan nuo fi shuor se Jeuova nuo aal a wa yu a go chuu an im kier bout yu. (Mat. 10:29-31; 1 Pii. 5:6, 7) An memba se Jeuova tel wi se: “Mi naa go lef unu non at aal. Nuo mi naa lef unu fi fen fi unuself.” (Iib. 13:5) Aal wen it komiin laik yu no av no wie outa yu prablem dem, Jeuova kyan elp yu fi go chuu an tan op chrang no mata wa. Mek wi luk pan ou Jeuova did elp Juozif.

9. Wa mek wi nuo se Jeuova did de de wid Juozif wen im iina prizn? (Jenisiz 39:21-23)

⁹ Riid Jenisiz 39:21-23. Aal wen Juozif did lak op iina prizn an a go chuu som rof taim, Jeuova did a mek tingz wok out gud fi’im. Wa mek wi se so? Wi se so kaa di man we did inchaaj a di prizna dem staat fi chos Juozif, so im gi im som impuotant wok fi du jos laik wa Patifa did du. So iina no taim im mek Juozif inchaaj a di ada prizna dem. Di Baibl mek wi nuo se ‘di man we did inchaaj a di prizna dem did mek Juozif tek kier a evriting fi’im.’ So nou Juozif did av som wok fi du fi kip im bizi. Yu kyan imajin se sumadi we dem kliem se did a chrai fi riep di baas fi di gyaad dem waif stil get wan wok fi du we shuo se dem chos im? Wa Jenisiz 39:23 se mek wi nuo wa mek dis kuda apm, it se: “Jeuova did de de wid Juozif, an kaaz a dat, evriting we im put im an tu ton out gud.”

10. Tel wi wa mek Juozif mait-a neehn fiil se evriting we im put im an tu a ton out gud?

¹⁰ Chrai fi si ou yu wuda did fiil ef a yu did a Juozif. Memba ino, dem tel lai pan yu an put yu iina prizn. Yu fiil se yu wuda did tingk se evriting we yu a du a ton out gud fi yu? Yu tingk a dat Juozif did waahn fi a gwaan fi’im? Yu tingk im did waahn di man we did inchaaj a di prizna dem fi big im op an gi im big wok fi du? Yu no tingk im muor waahn dem frii im, an mek evribadi si se im neehn du wa dem did se im du? An wan ada prizna we im did nuo se dem suun did a-go let im go, Juozif aks im fi taak tu Fiero fi im so dat Fiero kuda mek im kom outa prizn. (Jen. 40:14) Bot di man did figat fi taak tu Fiero bout Juozif,  so kaaz a dat Juozif did afi stie iina Prizn fi tuu muor ier. (Jen. 40:23; 41:1, 14) Bot Jeuova did stil a mek evriting we Juozif du ton out gud.

11. A wa Jeuova did mek Juozif kuda du, an ou dis did mek wa Jeuova did waahn fi apm apm?

¹¹ Wen Juozif did iina prizn, Jeuova did mek di king a Iijip av tuu jriim we mek im fiil a wie. Fiero did wel waahn fi nuo wa dem jriim de miin, so wen im fain out se Juozif kuda tel piipl we dem jriim miin im sen fi im siem taim. Jeuova did elp Juozif fi tel Fiero wa im jriim miin an Juozif tel Fiero wa im fi du. An Fiero si se di wie ou Jeuova tel im fi diil wid tingz a did di bes wie fi im diil wid it so it mek im riet Im. Ye man, Fiero did si se Jeuova did de de wid Juozif an so im mek Juozif inchaaj a aal a di fuud fi di uol a Iijip. (Jen. 41:38, 41-44) Afta dat, wan torbl staavieshan did gwaan iina Iijip an iina Kienan wich paat Juozif fambili did liv. So Juozif did a du wan jab nou we kuda mek im siev im fambili, an dis did miin se im fambili wudn ded out we di Mesaiya did fi kom fram.

12. A ou an ou Jeuova did mek di sitn dem we Juozif du ton out gud?

¹² Tingk bout aal a dem sitn ya we did apm tu Juozif. A uu yu tingk mek Patifa nuo bout Juozif uu a did dis wan sliev? A uu did mek di man dem we did inchaaj a di prizna dem fi waahn big op Juozif? A uu yu tingk did jriim Fiero an mek Juozif kuda tel im wa di jriim dem miin? A uu yu did tingk mek Fiero mek Juozif inchaaj a aal a di fuud iina Iijip? (Jen. 45:5) Wi kyan si klier klier se a Jeuova did mek evriting we Juozif du ton out gud. Jeuova mek di bad sitn we Juozif breda dem du tu im ton out iina wan wie fi mek wa Im waahn fi apm apm.

13. Yu tingk se evriting we apm tu wi Jeuova a-go kom iin an du sitn bout it? Tel wi wa mek yu se so.

¹³ Wen wi luk pan aal a wa did apm tu Juozif, wa wi kyan lorn fram im? Yu tingk se evriting we apm tu wi Jeuova a-go kom iin a du sitn bout it? Yu tingk im a kanchuol evriting we a gwaan iina yu laif so  dat evriting bad apm ton out gud? Nuo sa, a no dat di Baibl se im a du. (Iik. 8:9; 9:11) Bot wa wi nuo a se Jeuova nuo wen wi a go chuu wi chraiyal dem an im ier wi wen wi a baal fi im elp wi. (Sa. 34:15; 55:22; Aiz. 59:1) Plos Jeuova kyan elp wi fi eng aan an go chuu wi prablem dem. Bot a ou im du dat?

14. Ou Jeuova elp wi wen wi a go chuu som rof taim?

¹⁴ Wan a di wie dem ou Jeuova elp wi a wen im push wi fi tan op chrang an wen im osh wi. An im aalwiez nuo di rait taim fi dwi’it. (2 Kor. 1:3, 4) An a dat did gwaan wid wan breda we niem Eziz, we kom fram Torkmenistan, uu dem did lak op iina prizn an sentans fi tuu ier kaaz a wa im biliiv iina. Im se: “Di maanin wen dem did a-go chrai mi, wan breda shuo mi di skripcha a Aizaiya 30:15, we se: ‘Wa a-go mek yu chrang a wen yu iizi yuself an shuo se yu chos iina [Jeuova].’ Da vors ya aalwiez elp mi fi iizi miself an fi gwaan dipen pan Jeuova fi evriting, an a dis elp mi fi go chuu di taim iina prizn.” Yu kyan tingk bout wan taim iina yu laif wen yu a go chuu wan rof taim an Jeuova osh yu an elp yu fi tan op chrang?

15-16. Wa yu lorn fram wa Tori did go chuu?

¹⁵ Nof taim a onggl wen wi don go chuu di prablem dem wi si se a Jeuova did elp wi fi go chuu, an a dat wan sista we niem Tori did si. Ar son we niem Mason did av kyansa fi siks ier bifuo im ded. Wi kyan si wa mek Tori did fiil sad iina ar aat. Shi se: “Mi no tingk se notn els kuda ata dan fi mi pikni sofa an ded.” An shi se: “Mi shuor se fi sumadi we a wan mada ar faada, dem wuda prefa fi sofa dan fi si dem pikni dem a sofa.”

¹⁶ Aalduo Tori did go chuu wan rof  taim, shi kuda luk bak an si ou Jeuova did elp ar go chuu. Shi se: “Wen mi tingk bout dem taim de, mi kuda si ou Jeuova did elp mi fi go chuu wen mi son did sik bad. Laik aal wen Mason did sik so bad das nobadi kudn get fi go si’im, di breda an sista dem wuda stil jraiv fi tuu owa fi kom a di aspital. Sumadi aalwiez de a di aspital fi elp mi, an eniting we wi niid dem wuda gi wi. No mata ou tingz get rof, wi aalwiez get di sitn dem we wi niid.” So wi si se Jeuova did elp Tori fi eng aan an tan op chrang. An Jeuova did elp Mason tu.​—Luk pan di paat we niem “ Jeuova Gi Wi Evriting We Wi Did Niid.”

17-18. Wa kyan elp wi fi tangk Jeuova an fi si se im a-go de de wid wi wen wi a go chuu wi prablem dem? (Saam 40:5)

¹⁷ Riid Saam 40:5. Wan sumadi we klaim mountn waahn fi riich a di tap a di mountn, bot yu av som ada paat bifuo yu riich op a di tap a di mountn we im kyan tap an luk an si ou di plies nais. A siem so yu fi aalwiez tap an tingk bout ou Jeuova a elp fi mek evriting we yu du ton out gud aalduo yu mait-a a go chuu som wol iip a prablem. Wen evri die don, aks yuself: ‘Wa a di gud sitn dem we mi si Jeuova du fi mi tide? Aalduo mi stil a go chuu wan rof taim, a ou Jeuova a elp mi fi eng aan an tan op chrang?’ Ye man, chrai an si ef yu kyan si iivn wan gud sitn we Jeuova du fi yu so dat wa yu a du ton out gud.

¹⁸ Ye, yu mait-a prie fi get rid a yu prablem dem, an notn no rang wid dat. (Fil. 4:6) Bot yu fi chrai an si di blesn dem we yu a get rait ya nou. Kaa memba ino, Jeuova pramis wi se im a-go gi wi di chrent we wi niid fi mek wi gwaan eng aan an tan op chrang. So aalwiez tangk Jeuova fi de de fi yu, an no figet se Jeuova aalwiez a-go de de fi yu, an a da taim de yu a-go si se Jeuova a elp yu fi mek evriting we yu a du ton out gud jos laik ou im did elp Juozif wen im a go chuu im prablem dem.​—Jen. 41:51, 52.