1-2. (a) Mayak mahkak ni hkrum ai shaloi hpa majaw n mau ai kun? (b) Ndai sumhpa hta hpa lam bawngban na kun?

 KARAI a masha ni gaw, mayak mahkak ni hkrum ai shaloi n mau ai. “Karai Kasang a mungdan de ru tsang ai law law hte shang” ra na ngu Chyum Laika hta tsun da ai hpe chye ai. (Kas 14:22) ‘Si hkrung si htan . . . sharung shayawt ai, hkrap ngu hkrap ngoi ai, hki si ba si ai n nga’ sana mungkan nnan du yang she, manghkang ni yawng tsep kawp n nga mat na hpe mung chye ai.​—Shr 21:4.

² Yakhkak ai lam ni n hkrum hkra, Yehowa makawp maga ya na n re. Raitim, hkamjan lu hkra karum ya ai. Roma mare na Hkristan ni hpe kasa Pawlu hpa tsun ai hpe sadi yu u. Shi hte hpunau nauna ni hkrum nga ai manghkang ni a lam shawng tsun ai. Dai hpang, “anhte hpe tsaw ra nga ai wa a majaw, ndai yawng hte hpe anhte grau nna hkap dang kau lu ai” ngu tsun ai. (Rom 8:35-37) Dai gaw, chyam dinglik hkrum ai aten hta pyi awng dang hkra, Yehowa karum ya lu ai hpe madun ai. Yosep awng dang hkra Yehowa gara hku karum ya ai lam, nang hpe mung gara hku karum ya lu ai lam yu yu ga.

3. Yosep a prat gara hku nna kalang ta galai shai mat ai kun?

³ Yaku gaw, kasha Yosep hpe grai tsawra ai. (Nin 37:3, 4) Dai hpe Yosep a kahpu ni chye ai majaw manawn ai. Ahkaw ahkang lu ai hte kalang ta, Midian hpaga la ni kaw dut sha kau ai. Dai hpaga la ni gaw, deng law law tsan ai Egutu mung de  shaga sa mat ai. Yosep a prat gaw, kalang ta galai shai mat ai. Kawa a tsawra hkrum ai prat kaw nna, Egutu mung a grit nem ai mayam prat de du mat ai.​—Nin 39:1.

4. Yosep zawn gara mayak mahkak ni anhte hkrum chye ai kun?

⁴ “Masha yawng gaw n myit mada da ai mabyin ni hkrum chye ai” ngu Chyum Laika hta tsun da ai. (Hpj 9:11, NWT) “Masha” ni hkrum chye ai, lam mi hku tsun yang, shinggyim masha yawng hkrum chye ai mayak mahkak ni hpe sha anhte kalang lang hkrum ai. (1 Ko 10:13) Kalang lang rai yang gaw, Yesu a sape byin nga ai majaw, manghkang hkrum ai rai chye ai. Ga shadawn, makam masham a majaw, jahpoi asawng ai, ninghkap ai, zingri zingrat ai pyi hkrum chye ai. (2 Tm 3:12) Gara mayak mahkak mi hkrum tim, nang awng dang hkra Yehowa karum ya lu ai. Yosep hpe gara hku karum ya wa ai kun?

5. Yosep awng dang ai hte seng nna Hputihpa hpa hpe chye ai kun? (Ningpawt 39:2-6)

⁵ Ningpawt 39:2-6 hpe hti u. Yosep gaw, grai ram nna, bungli shakut ai ramma re ai hpe Hputihpa sadi hkrup ai. Hpa majaw dai zawn ram ai hpe mung chye ai. “[Yosep] galaw ai amu yawng mayawng hta, Yehowa shaawng ya wu ai” ngu ai hpe Hputihpa chye ai. b Dai majaw, kam mai ai masha hku nna aya ap dat ai. Nta ting hpe mung yu ya na matu lit jaw dat ai. Akyu hku nna Hputihpa grai lusu wa ai.

6. Tinang a masa hte seng nna Yosep gara hku hkamsha chye ai kun?

⁶ Yosep a shara hta shang yu u. Dai masa hta shi hpa hpe ra sharawng htum rai na kun? Hputihpa a myi man lu na matu, kumhpa lu na matu kun? Mayam prat kaw na lawt nna, kawa hpang de bai wa na ahkang lu na matu sha rai na re. Hputihpa nta hta kade daram ahkaw ahkang ni lu da tim, Yehowa hpe n nawku ai Madu a lata npu kaw na lawt na matu, Yosep hpe Yehowa n karum ya ai. Yosep a masa grau naw sawng wa na re.

7. Yosep a masa gara hku grau sawng wa ai kun? (Ningpawt 39:14, 15)

⁷ Ningpawt daw kaba 39 hta madun da ai hte maren, Hputihpa a madu jan gaw, Yosep hpe ra nna, chyahkring hkring gunglau ai. Raitim, Yosep lang shagu ningdang ai. Hpang jahtum, Yosep hpe masin pawt nna, shi hpe roi rip na matu shakut ai ngu mara shagun ai. (Ningpawt 39:14, 15 hpe hti u.) Dai hpe Hputihpa na ai shaloi, Yosep hpe htawng jahkrat kau ai. Htawng hta shaning law law Yosep nga ra ai. (Nin 39:19, 20) Htawng gaw hpa hte bung ai kun? “Htawng” ngu ga gale da ai Hebre ga si gaw, “hka htung” hpe tsun mayu ai majaw, grai sin ai nhkun langai rai chye ai. Karum shingtau lam n nga ai ngu Yosep hkamsha wa na re. (Nin 40:15) Yosep gaw, lagaw hte du hta hkanghkyi hkyang hte aten na na gyit hkrum ai ngu Chyum Laika hta tsun da ai. (Shk 105:17, 19) Yosep a masa grau sawng wa ai. Kam mai ai masha kaw na grit nem ai htawng masha byin nga sai.

8. Masa ni grau sawng wa yang pyi hpa hpe kam mai ai kun?

⁸ Akroi anoi akyu hpyi tim, tinang a masa grau sawng wa ai baw byin ga ai kun? Dai zawn byin chye ai. Satan mungkan a mayak mahkak ni n hkrum hkra Yehowa n makawp maga ya ai. (1 Yh 5:19) Raitim, tinang hpa hkrum nga ai hpe Shi atsawm chye ai, lanu lahku nga ai ngu ai hpe gaw kam mai ai. (Mat 10:29-31; 1 Pe 5:6, 7) Dai sha n-ga, “ngai nang hte teng teng n hka na nngai, gaja wa teng teng n kau da na nngai” ngu nna mung Karai Kasang ga sai jaw ai. (Heb 13:5) Tinang a masa gaw, myit mada lam n nga ai zawn raitim pyi, hkamjan lu hkra Yehowa karum ya lu ai. Yosep hpe gara hku karum ya ai lam bawngban yu ga.

9. Yosep htawng hkrat nga ai aten hta Yehowa rau nga ai lam hpa gaw madun ai kun? (Ningpawt 39:21-23)

⁹ Ningpawt 39:21-23 hpe hti u. Yosep htawng hkrat nga ai aten hta pyi, awng dang hkra Yehowa karum ya ai. Gara lam hku nna kun? Hputihpa kaw zawn sha, htawng agyi a kam ai lam, hkungga ai lam Yosep lu wa ai. Kade n na ai aten hta sha, htawng agyi gaw, kaga htawng masha ni hpe woi awn na matu, Yosep hpe lit jaw ai. “Htawng agyi wa gaw shi hte seng ai amu langai mi muk yu ra sai n rai” ngu Chyum Laika hta tsun da ai. Ya, Yosep gaw lu da ai lit hpe atsawm galaw na matu sha myit ai. N myit mada da ai galai shai lam re. Hkawhkam htingnu a ahkang aya kaba ai wa a madu jan hpe roi rip na matu shakut ai ngu mara shagun hkrum ai htawng masha gaw, kam mai ai masha gara hku byin mat ai kun? Mahtai gaw langai sha re. Ningpawt 39:23 hta tsun da ai zawn, “Yehowa gaw Yosep hte rau nga ai rai nna, shi galaw ai lam mahkra Yehowa shabyin ya” ai majaw re.

10. Galaw ai lam shagu awng dang ai ngu Yosep hkamsha na matu hpa majaw n mai byin ai kun? Sanglang dan u.

¹⁰ Yosep a shara kaw naw shang yu u. N tara ai hku mara shagun hkrum nna htawng hkrat nga ai aten hta, galaw ai lam shagu awng dang ai ngu shi hkamsha na kun? Dai masa hta, Yosep hpa hpe ra sharawng htum rai na kun? Htawng agyi a myiman lu na matu kun? Htawng kaw na lawt na matu sha rai na re. Htawng kaw na lawt sana kaga htawng masha ni hpe pyi shi a malai Hpara-u hpe tsun ya na matu Yosep hpyi shawn ai. (Nin 40:14) Raitim, dai wa gaw, Hpara-u hpe kalang ta n tsun ya ai. Dai majaw,  htawng hta 2 ning jan daram Yosep matut nga kau ra ai. (Nin 40:23; 41:1, 14) Dai pyi, Yosep awng dang hkra Yehowa matut karum ya ai. Gara lam hku nna kun?

11. Yosep hpe Yehowa gara atsam jaw wa ai kun? Dai gaw Yehowa a yaw shada lam hpring tsup na matu gara hku madi shadaw ya ai kun?

¹¹ Yosep htawng hkrat nga ai shaloi, Yehowa gaw, Egutu hkawhkam Hpara-u hpe myit shuk hpa yup mang 2 hpe mu shangun ai. Lachyum hpe Hpara-u grai chye mayu ai. Yosep hta yup mang ni a lachyum hpe tsun dan lu ai atsam nga ai hpe chye mat ai majaw, shaga shangun dat ai. Yehowa a karum shingtau lam hte yup mang ni hpe Yosep lachyum hpaw dan ai. Yosep jaw ai hpaji jaw ga hpe Hpara-u ra sharawng mat ai. Dai ramma hte rau Yehowa nga nga ai hpe Hpara-u sadi hkrup mat ai majaw, Egutu mung ting a malu masha hpajang ya ai wa hku nna aya ap dat ai. (Nin 41:38, 41-44) Hpang de, Egutu mung hta sha n-ga, Yosep a nta masha ni nga ai Hkanan mung hta mung, grai sawng ai hku hku lam byin wa ai. Ya, nta masha ni hpe hkye la lu ai masa hta Yosep nga nga sai. Dai majaw, Meshia a amyu matu n di mat hkra matut hkang da lu wa ai.

12. Yosep awng dang hkra Yehowa gara ladat ni hte karum ya ai kun?

¹² Yosep a prat hta n myit mada da ai galai shai lam ni hkrum wa ai hpe myit yu u. Hpa n re ai mayam langai hpe Hputihpa sadi hkrup na matu, grit nem ai htawng masha hpe htawng agyi myi man jaw na matu kadai shadut ya ai kun? Hpara-u hpe myit shuk hpa yup mang ni kadai mu shangun ai kun? Yosep hpe yup mang lachyum hpaw dan lu ai atsam kadai jaw ai kun? Egutu mung hta malu masha hpajang ai wa hku nna Yosep hpe lit jaw na matu Hpara-u hpe kadai shadut ya ai kun? (Nin 45:5) Yosep galaw ai lam yawng awng dang hkra Yehowa karum ya ai gaw dan leng nga ai. Yosep hpe sat na matu kahpu ni a hkalem ai lam hpe, Yehowa gaw shi a myit ra ai lam awng dang na matu galai shai dat ai.

13. Anhte hkrum ai masa shagu hta Yehowa lapran shang ya ai kun? Sanglang dan u.

¹³ Yosep a labau kaw na hpa chye lu ai kun? Tinang a prat hta hkrum ai n kaja ai lam yawng hpe  kaja ai maga de galai shai na matu, masa shagu hta Yehowa lapran shang ya ai kun? N re. Chyum Laika hta dai hku n tsun da ai. (Hpj 8:9; 9:11) Dai majaw, mayak mahkak langai hkrum ai shaloi, Yehowa chye ai lam, karum hpyi ai nsen hpe madat ya ai lam gaw anhte chye ai. (Shk 34:15; 55:22; Esa 59:1) Mayak mahkak ni hpe awng dang hkra hkamjan lu na matu Yehowa karum ya lu ai. Gara lam hku nna kun?

14. Mayak mahkak hkrum ai aten hta Yehowa gara hku karum ya ai kun?

¹⁴ Yehowa karum ya ai lam langai gaw, aten dep n-gun jaw shalan shabran ya ai hku nna re. (2 Ko 1:3, 4) Takministan mungdan hta, makam masham a majaw, htawng 2 ning jahkrat hkrum ai hpunau Izit dai zawn hkrum wa ai. “Ngai hpe san jep na jahpawt hta, hpunau langai gaw, ‘asim sha nga let kam sham ai hte nanhte n-gun lagaw lu la na myit dai’ ngu ai Esaia 30:15 hpe hti dan ai. Dai chyum daw gaw anhte myit simsa na matu, hpa galaw tim Yehowa hpe kamhpa na matu galoi mung karum ya ai. Dai chyum daw hpe myit sawn sumru ai gaw, htawng hkrat nga ai aten laman, ngai hpe karum ya ai” ngu tsun ai. Tinang ra dik htum aten hta Yehowa n-gun jaw ya ai baw hkrum ga ai kun?

15-16. Tori a mabyin kaw na hpa chye lu ai kun?

¹⁵ Law malawng hku nna, mayak mahkak hkrum ngut yang she, Yehowa gara hku karum ya ai hpe chye wa ai. Nauna Tori dai zawn byin wa ai. Kasha Mesan gaw, mawng ana hpe 6 ning hkamsha wa nna si mat ai. Tori grai yawn ai. “Kanu langai a matu yawn htum aten re. Tinang a kasha machyi nga ai hpe mu ai gaw, tinang hkamsha ra ai hta grau sawng  ai hpe kanu kawa ni myit hkrum na re” ngu tsun ai.

¹⁶ Dai zawn yakhkak ni aten laman, Yehowa gara hku karum ya ai hpe Tori bai myit yu ai. “Bai myit yu dat yang, kasha hkam n kaja ai aten ni laman, Yehowa a tsawra myit lawm ai lata hpe hkamsha lu ai. Ga shadawn, manam ni hpe n lu hkrum ai du hkra hkam n kaja byin nga ai pyi, hpunau nauna ni gaw, kasha hpe hkrum na matu, hkying hkum 2 daram mawdaw gau nna tsi rung de sa wa ai. An nu hpe karum ya na matu, machyi masha sin ai gawk hta, langai ngai gaw galoi mung jin jin rai nga ai. Ra ai lam ni mung hpunau nauna ni karum ya ai. Yak htum aten hta pyi, ra ai lam galoi mung lu ai” ngu tsun ai. Tori hte Mesan, hkamjan lu hkra ra ai lam yawng Yehowa lajang ya ai.​—“ Anhte Ra Ai Lam Tup Hkrak Hpe Yehowa Jaw” ngu ai lawk hpe yu u. 

17-18. Mayak mahkak hkrum ai aten hta pyi, Yehowa madi shadaw ya ai hpe mu hkra, chyeju dum chye hkra, hpa gaw karum ya na kun? (Shakawn 40:5)

¹⁷ Shakawn 40:5 hpe hti u. Bum lung ai wa a bandung gaw, bum pungding de du na matu re. Raitim, lam ding yang chyahkring mi hkring nna, nam maling ni hpe yu chyai na matu hkring na shara ni nga ai. Dai zawn sha, mayak mahkak hkrum ai aten hta pyi, awng dang hkra Yehowa gara hku karum ya ai hpe chyahkring mi aten la nna myit yu u. Lani mi htum mat ai shaloi, ‘Dai ni Yehowa a shaman chyeju hpe gara hku hkamsha lu ai kun? Mayak mahkak nga tim, hkamjan lu hkra Yehowa gara hku karum ya ai kun?’ ngu nna tinang hkum tinang san yu u. Awng dang hkra Yehowa karum ya ai shaman chyeju ni kaw na yawm htum langai hpe mu hkra tam u. 

¹⁸ Mayak mahkak ni htum mat hkra akyu hpyi nga na re. Dai gaw n shut ai. Hpyi ging ai. (Hpl 4:6) Raitim, ya lu da ai shaman chyeju ni hpe mung sadi yu ging ai. Anhte hpe n-gun jaw na, hkamjan lu hkra karum ya na ngu nna mung Yehowa ga sadi jaw da ai. Dai majaw, madi shadaw ya nga ai hpe galoi mung chyeju dum u. Rai yang, yakhkak ai aten ni hta pyi, Yosep awng dang hkra Yehowa karum ya ai zawn, nang hpe mung karum ya nga ai hpe mu wa na re.​—Nin 41:51, 52.