1-2. (a) Pamodi ki nu ka ta fika dimiradu óras ki nu ta pasa pa prublémas? (b) Kuzê ki nu sta ben odja na kel studu li?

 DJA ki nos é povu di Jeová nu ka ta fika dimiradu óras ki nu ta pasa pa prublémas. Nu sabe ma Bíblia ta fla ma ‘nu ten ki pasa pa txeu difikuldadi pa nu entra na Reinu di Deus.’ (Atos 14:22) Nu sabe tanbê ma alguns di nos prubléma ta kaba sô óras ki nu ben vive na kel mundu novu di Deus, ki ‘ka ta ten más mórti nen ka ta ten más tristéza, nen txoru, nen dór.’ — Apo. 21:4.

² Jeová ka ta inpidi pa prublémas kontise ku nos, má el ta da-nu ajuda pa nu aguenta-s. Repara kuzê ki apóstlu Polu fla pa kes kriston ki ta viveba na Roma. Primeru el pâpia di un monti provason ki kes irmon staba ta pasa pa el. Dipôs el fla: ‘Nu sta ta ten un vitória konplétu, através di kel ki ama-nu.’ (Rom. 8:35-37) Kel-li krê fla ma Jeová pode djuda-u ten bons rezultadu, sikrê óras ki bu sta pasa pa un prubléma. Nu ben odja modi ki Jeová djuda Juzé ten bons rezultadu i modi ki el pode djuda-u.

3. Modi ki vida di Juzé muda dirapenti?

³ Jakó dexa klaru ma el ta amaba se fidju Juzé txeu. (Gén. 37:3, 4) Má kes fidju di Jakó más grandi fika ku siumis di Juzé. Nton kantu es tevi oportunidadi, es bende Juzé pa un grupu di bendedoris di téra di Midian. Es leba Juzé pa Ijitu, ki éra un téra lonji i es torna bende-l. Di es bês, Putifar, ki éra xéfi di guarda di  Faraó, kunpra-l. Vida di Juzé muda dirapenti. El éra kel fidju ki se pai gostaba más txeu, má di un óra pa kel otu el bira skravu na Ijitu. — Gén. 39:1.

4. Ki prublémas nu pode pasa pa el ki é sima kes di Juzé?

⁴ Bíblia ta fla ma ‘kuzas ki algen ka sta spéra ta kontise ku tudu’ nos. (Ecl. 9:11) Alvês nu ta pasa pa prublémas ki é normal ‘ómis pasa pa el’, ô prublémas ki tudu algen ta pasa pa el. (1 Cor. 10:13) Ô nu pode sufri sô pamodi nos é disiplus di Jizus. Pur izénplu, nu pode fazedu trósa, pasa pa opozison ô ti pirsigison pamodi nos fé. (2 Tim. 3:12) Nton, ka ta nporta ki prubléma bu sta pasa pa el, Jeová pode djuda-u ten bons rezultadu. Modi ki el faze kel-li ku Juzé?

5. Putifar da kónta ma Juzé staba ta ten bons rezultadu pamodi kuzê? (Génesis 39:2-6)

⁵ Lé Génesis 39:2-6. Putifar repara ma Juzé éra un jóven intilijenti i trabadjador. I el sabia pamodi. Putifar odja ma ‘Jeová ta poba tudu kuza ki Juzé ta fazeba ta tinha bon rezultadu.’ b Dipôs, Putifar skodje Juzé pa bira se ajudanti pesoal. Tanbê el poi Juzé enkaregadu di se kaza interu. Pur isu, Putifar tevi bons rezultadu.

6. Modi ki talvês Juzé xinti ku se situason?

⁶ Tenta imajina modi ki Juzé xinti. Kuzê ki el tinha más gana pa kontise? Éra pa Putifar reparaba na el i rekonpensaba el? É kuazi sértu ma Juzé krê fikaba livri i voltaba pa se pai. Pamodi sikrê ku tudu priviléjiu ki Juzé tinha na kaza di Putifar, inda el éra skravu di un ómi ki ka ta sirbiba Jeová. Jeová ka poi Putifar ta liberta Juzé. I situason di Juzé staba kuazi ta piora.

7. Di ki manera ki situason di Juzé piora más inda? (Génesis 39:14, 15)

⁷ Sima sta na Génesis kapítlu 39, mudjer di Putifar kumesa ta gosta di Juzé i txeu bês el tenta poi Juzé ta deta ku  el. Má sénpri Juzé nega. Dipôs, el fika ku txeu raiba di Juzé i el fla ma Juzé tenta viola-l. (Lé Génesis 39:14, 15.) Kantu Putifar fika ta sabe di kel-li, el poi Juzé na kadia i Juzé pasa alguns anu la. (Gén. 39:19, 20) Modi ki kel kadia éra? Kel palavra na ebraiku ki Juzé uza pa ‘kadia’ pode krê fla “sistérna” ô “kóba”. Kel-li ta da ideia di un lugar sukuru i ma Juzé ta xintiba sen speransa. (Gén. 40:15, nóta di rodapé) Tanbê Bíblia ta mostra ma duránti un ténpu, pé di Juzé prendedu ku korenti i es pô-l féru na piskós. (Sal. 105:17, 18) Situason di Juzé staba ta piora más inda. El éra un skravu di kunfiansa, má dipôs el bira un prézu sen valor.

8. Si un prubléma piora, di kuzê ki nu pode ten sertéza?

⁸ Algun bês dja bu pasa pa un situason kasábi ki piora sikrê bu faze orason di korason? Kel-li pode kontise. Jeová ka ta proteje-nu di prublémas ki ta kontise na mundu ki Satanás sta ta governa. (1 João 5:19) Má simé, bu pode ten sertéza di kel-li: Jeová sabe dretu kuzê ki bu sta pasa pa el i el ta preokupa ku bo. (Mat. 10:29-31; 1 Ped. 5:6, 7) Alén di kel-li, el promete: ‘Nunka N ka ta dexa-u i nunka N ka ta bandona-u.’ (Heb. 13:5) Jeová pode djuda-u aguenta firmi na un situason ki ta parse ma ka ten soluson. Nu ben odja modi ki el faze kel-li ku Juzé.

9. Kuzê ki ta mostra ma Jeová staba ku Juzé kantu el staba na kadia? (Génesis 39:21-23)

⁹ Lé Génesis 39:21-23. Jeová djuda Juzé ten bons rezultadu sikrê duránti kel ténpu difísil ki el staba na kadia. Di ki manera? Ku ténpu, xéfi di guardas di kadia bira ta gosta di Juzé i ta ruspeta-l, sima dja kontiseba ku Putifar. Dipôs, kel xéfi di guardas di kadia poi Juzé ta toma kónta di kes otu prézu. Na verdadi, Bíblia ta fla ma ‘kel xéfi di guardas di kadia ka ta preokupaba ku nada ki Juzé ta kuidaba di el’. Nton, Juzé tinha un trabadju pa faze na kadia. Kel-li foi un mudansa ki el ka staba ta spéra. Modi ki un prézu ki akuzadu di tenta viola mudjer di un ofisial na palásiu pode dadu un trabadju di kel-li? Ten sô un splikason. Sima Génesis 39:23 ta fla: ‘Jeová ta staba ku Juzé, i Jeová ta poba tudu kuza ki el ta fazeba ta tinha bon rezultadu.’

10. Pamodi ki talvês Juzé ka ta atxaba ma el staba ta ten bons rezultadu na tudu kuza?

¹⁰ Más un bês, tenta imajina modi ki Juzé xinti. Dipôs ki el akuzadu di un kuza ki el ka faze i ki el podu na kadia, bu ta atxa ma el xinti ma el staba ta ten bons rezultadu na tudu kuza? Kuzê ki Juzé tinha más gana pa kontise? Éra pa xéfi di guardas di kadia gostaba di el? É kuazi sértu ma Juzé kreba pa es traba el di kadia. Ti el pâpia ku un otu prézu ki staba kuazi ta sai di kadia pa pâpia ku Faraó sobri el, asi pa el pode saíba di kel kadia ki ta dizanimaba algen. (Gén. 40:14) Má, kel ómi ka pâpia ku Faraó lógu. Pur isu, Juzé pasa más dôs anu na kadia. (Gén. 40:23; 41:1, 14) Má simé, Jeová kontinua ta djuda Juzé ten bons rezultadu. Di ki manera?

11. Ki kapasidadi spesial ki Jeová da Juzé i modi ki kel-li djuda vontadi di Jeová kunpri?

¹¹ Timenti Juzé staba na kadia, Jeová poi rei di Ijitu ta ten dôs sonhu ki inkomoda-l. Faraó staba dizusperadu i el  krê sabeba kuzê ki kes sonhu siginifikaba. Kantu Faraó fika ta sabe ma Juzé tinha kapasidadi di fla kuzê ki un sonhu siginifika, el manda txoma-l. Ku ajuda di Jeová, Juzé fla kuzê ki kes sonhu siginifikaba i Faraó fika dimiradu ku konsedju ki Juzé da-l. Kantu Faraó odja ma Jeová staba ku Juzé, el skodje Juzé pa ser enkaregadu di kumida pa Ijitu interu. (Gén. 41:38, 41-44) Dipôs, tevi un grandi fómi na Ijitu i na Kanan, ki éra kel téra ki família di Juzé ta moraba na el. Pamodi trabadju ki Juzé tinha, el pode salvaba se família, asi Misías pode binha di se família.

12. Di ki maneras ki Jeová poi Juzé ta ten bons rezultadu?

¹² Pensa na kes kuza stranhu ki kontise na vida di Juzé. Kenha ki poi Putifar ta repara na Juzé, ki éra sô un skravu? Kenha ki poi xéfi di guardas di kadia ta gosta di Juzé, ki éra un prézu sen valor? Kenha ki poi Faraó ta ten kes sonhu ki inkomoda-l i da Juzé kapasidadi di fla kuzê ki kes sonhu siginifikaba? Kenha ki poi Faraó ta skodje Juzé pa ser enkaregadu di kumida na Ijitu? (Gén. 45:5) É klaru ki é Jeová ki poi tudu kes kuza ki Juzé faze ta ten bons rezultadu. Nbóra kes irmon di Juzé krê mataba el, Jeová muda kel situason pa El pode kunpriba Se vontadi.

13. Jeová ta kontrola tudu kuza ki ta kontise ku nos? Splika.

¹³ Kuzê ki nu ta prende ku stória di Juzé? Jeová ka sta nvolvidu na kada situason ki nu ta pasa pa el. I el ka ta kontrola tudu kuza ki ta kontise na nos vida, asi pa tudu kuza mariadu kontise pamodi un bon motivu. É ka kel-li ki Bíblia ta inxina. (Ecl. 8:9; 9:11) Má nu sabe kel-li: Óras ki nu ta pasa pa un prubléma, Jeová ta odja kuzê ki nu sta pasa pa el i el ta obi nos pididu di ajuda. (Sal. 34:15; 55:22; Isa. 59:1) Alén di kel-li, Jeová pode djuda-nu aguenta firmi i ten bons rezultadu. Di ki manera?

14. Modi ki Jeová ta djuda-nu na situasons difísil?

 ¹⁴ Un manera ki Jeová ta djuda-nu é konsolu i nkorajamentu ki el ta da-nu, i txeu bês na óra sértu. (2 Cor. 1:3, 4) É kel-li ki kontise ku Izis, ki é un irmon di Turkomeniston ki dadu dôs anu di kadia pamodi se fé. El fla: “Na kel palmanhan ki N staba ta bai julgamentu, un irmon mostra-m Isaías 30:15 ki ta fla: ‘Pa nhos ten forsa nhos ten ki kontinua kalmu i ten kunfiansa.’ Kel versíklu li sénpri djuda-m mante kalmu i kunfia na Jeová na tudu kuza. Midita na kel versíklu li djuda-m duránti tudu kel ténpu ki N staba prézu.” Bu ta konsigi lenbra di un situason na bu vida ki Jeová djuda-u, ki el da-u konsolu i nkorajamentu na kel óra ki más bu staba ta meste?

15-16. Kuzê ki bu ta prende ku izénplu di Tánia?

¹⁵ Txeu bês, sô nu ta da kónta di modi ki Jeová djuda-nu aguenta un prubléma sô dipôs ki kel prubléma dja pasa. Un irman ki txoma Tánia odja ma kel-li é verdadi. Se fidju, Markus, tevi 6 anu ku kánser antis di el móre. Ta da pa ntende pamodi ki Tánia staba tristi dimás. El fla: “N ta atxa ma pa un mai ka ten dór más grandi ki kel-li. N ten sertéza ma otus algen ki ten fidju ta konkorda ma odja bu fidju ta sufri é piór di ki pasa pa kel sufrimentu abo.”

¹⁶ Má sikrê Tánia staba tristi dimás kantu el odja se fidju ta sufri di kel manera la, dipôs el ben pensa na modi ki Jeová djuda-l aguenta firmi. El fla: “Óras ki N ta pensa na kel ténpu la, N ta konsigi odja modi ki Jeová djuda-m  duránti tudu kel ténpu ki nha fidju staba duenti. Pur izénplu, mésmu kantu Markus staba duenti di tal manera ki el ka ta pode resebeba vizita, irmons ku irmans ta konduziba duránti dôs óra ti txiga ospital. Sénpri tinha algun irmon na ospital prontu i ku gana di djuda-nu. Tanbê, irmons ku irmans da-nu kes kuza ki nu staba ta meste. Mésmu kantu situason fika difísil dimás, nunka ka falta-nu nada.” Jeová da Tánia ku Markus tudu kel ki es staba ta meste pa es aguenta firmi. — Odja kuadru “ Jeová da-nu kel ki nu staba ta meste”.

17-18. Kuzê ki ta djuda-nu rekonhese i mostra gratidon pa ajuda ki Jeová ta da-nu na situasons difísil? (Salmo 40:5)

¹⁷ Lé Salmo 40:5. Obijetivu di un algen ki ta subi un monti é txiga la di riba. Má ten txeu lugar na kaminhu ki el pode para i odja kuzas bunitu. Di mésmu manera, tra ténpu sénpri pa para i pensa na modi ki Jeová sta ta djuda-u ten bons rezultadu, sikrê inda bu sta pasa pa un prubléma. Na fin di kada dia, pergunta bu kabésa: ‘Modi ki Jeová djuda-m oji? Sikrê N sta kontinua ku kel prubléma, modi ki Jeová sta djuda-m aguenta firmi?’ Tenta odja peloménus un kuza ki Jeová faze pa djuda-u ten bons rezultadu.

¹⁸ É verdadi ki bu pode sta ta faze orason pa bu prubléma kaba. Ta da pa ntende i kel-li é normal. (Fil. 4:6) Má tanbê nu debe sta sienti na modi ki Jeová sta ta djuda-nu gósi. Afinal, Jeová promete ma el ta da-nu forsa i ma el ta djuda-nu aguenta firmi. Pur isu, mostra gratidon sénpri pamodi Jeová sta ta djuda-u. Asi, bu ta odja modi ki Jeová sta ta djuda-u ten bons rezultadu, sima el faze ku Juzé, sikrê na situasons difísil. — Gén. 41:51, 52.