CIIN BWAAL CYA KULONG 3
Yehow Wendend ni Kukwambulwiish Bwiibuh Kwiikal ni Dyaakatook
“[Yehow] Mawej waakady ni Yozeefw . . . , byoos byaakadyey ulong byaakady byend teng bilengel.”—KBWA. 39:2, 3.
MUSAMBW A 30 Tatu wanyi, Nzambi wanyi, ne Mulunda wanyi
KADYOOSH a
1-2. a) Bwabiny kabiin bitukemesh hatuheehet makab? b) I biny bitwiiyiiy kukontonon mu ciin bwaal eecy?
BU MUTUDY baat ba Yehow, kabiin bitukemesh hady makab miitufikil. Tutaatal teng cileeleeb Bibl neey, “Bikaam ney tumon mal mavul bwa kutweel mu Bukaleng bwa Mawej.” (Yil. 14:22) Cikwaabw tudy bamanyik neey myand yoos yitudy naay kayakuhoh bend yoos teng ni mutwiikal mu bulongolody buhyaabuhy bwa Mawej, mwiin aam “lufw kalwiish bend lwiikalok. Kakwiish bend kuhing kwiikal kudil kwa lufw, ning kwaabakan, ning biitiit.”—Yis. 21:4.
2 Yehow kiin teng wiitulam ku makab moos mitufiifikil. Ki, wiitwambambulwiish bwiitut kwiimataatamen. Tal cyaakady mupostol Pool mwambil biin Krist ba mu Rom. Uleejel cya kuuhal makab mavul menmen mahetelobw ni baan baabw. Ni wiiyil kufund neey: “Ki ku myand yoos eey, tudy bacimun bacimwiinomw ku bukash bwa wiitukacil.” (Rom 8:35-37) Bwaal oobw bumvumvwiij neey Yehow udy mwa kukwambulwiish ning uw mwiikal utaatameen lutat. Tutalaay mwaakady Yehow mwambulwiish Yozeefw ni mudyey mwa kukwambulwiish byeeb.
HADY SHIKACIL USHINTULUK MUSANG UMW
3. I bwaal kaay bwaakady kabuy butakamin bufikil Yozeefw mu shikacil indiy?
3 Jakobw uleejel hatook mwaakadyey mukat bikasakan mwaan indiy Yozeefw. (Kbwa. 37:3, 4) Bu cihet, baan ba Jakobw baayaayend a Yozeefw bamumvwiil mukaw. Hahetelobw mushind umweekel, bahanyishil Yozeefw kudy bangend a mushing biin Madyan. Bangend a mushing aab balongel lwend lwa kilometel yivul batal nend mu Ejipit, cyaab cimuhanyishilobw—Ciisang aacy bamuhanyishil kudy Potifar, muut a Farawon ni mutam a basalaay bindiy ba mu cihang. Shikacil a Yozeefw ushintulukil lwang-lwang, waakady mwaan mwaan-mulum waakady taat indiy mukat bikasakan ni wiiyil kushaal muhik mwiin kwiihweekesh wa mwiin Ejipit!—Kbwa. 39:1.
4. I mushind kaay utudy mwa kutwiilangan ni makab ma mushind aakaabumw ni ma bwiin mahetel Yozeefw?
4 Bibl uleeleeb neey “Muut woos udy mwa kwend teng dyaakaby.” (Muleej 9:11, Sainte Bible—Bibl udy muheehel bwa kumubal) Misang yikwaabw tuheehet myand ‘ya bwiin yiheehet baat boos’—I bwiin kuleeb neey, makab maheehet baat boos. (1 Kor. 10:13) Eecy tudy mwa kukab bituh bwaal tudy biiyij ba Yeez. Cileejel, bady mwa kwiikal biitusek, biitulwiish, eecy biitumweeh cikwaabw mal bwa diitabij ditudy naady. (2 Tim. 3:12) Ning uw mwiikal utwiilangan ni makab ma mushind kaay, Yehow udy mwa kukwambulwiish bwiibuh kuhit naam bilengel. I mushind kaay ulongeley nook bwa Yozeefw?
Yehow wambulwiishil Yozeefw bwa byoos byaakadyey ulong biy bilengel ning haakadyobw bamuhanyish bu muhik kwa Potifar mu Ejipit (Tal cikos 5)
5. Hakady myand yoos yaakady Yozeefw ulong yiiy teng bilengel, Potifar uleebel biny? (Kutang kwa Bwanjil 39:2-6)
5 Bal Kutang kwa Bwanjil 39:2-6. Potifar utadil neey Yozeefw waakady sangwiilum waakady ni meej mavul ni waakady ukal mudimw bikasakan. Waakady mumanyik cikwaabw cyaakady cimusak bwa kulong naak. Potifar utadil neey: “[Yehow] Mawej waakady ni Yozeefw bwaal byoos byaakady Yozeefw ulong byaakady byend teng bilengel.” b Hahitil mafuk, mwiin Ejipit umuheel mudimw a kutaley biit bindiy byoos. Cikwaabw, ni myand yoos ya mu nzubw indiy. Bu cihet, myand ya Potifar yiiyiil kuuhal.
6. I mushind kaay waakady Yozeefw mwa kumvw habitaatal shikacil indiy?
6 Lang ket bwa mushind utadil Yozeefw bwaal oobw. I biny byaakadyey mukat bikasakan? Byaakady bwa Potifar amwanyish ni amufut eeny? Nook, Yozeefw waakady mukat bwa bamulekelel bwa ahingomw kudy taat indiy. Kuunyim kwa byoos, ning mwaakadyobw bamwaakish dyaakatook bwa midimw yoos, Yozeefw ucyaakady teng muhik ku bukookesh bwa fumwend waakady kay uhambidil Yehow. Yehow kaakadyoh bend mulongesh ku makand Potifar bwa kulekeleley Yozeefw. Ni shikacil a Yozeefw waakady habwiih bwa kunyanguk menmen.
HADY SHIKACIL UNYANGUK MENMEN
7. I mushind kaay waakady shikacil a Yozeefw wend ni kunyanguk bikasakan? (Kutang kwa Bwanjil 39:14, 15)
7 Teng mudyeby bileej mu Kutang kwa Bwanjil shapitil 39, Mukaj a Potifar waakady mukat Yozeefw, waakady mumukokel micim ni waakady uyeelesh Yozeefw teng bwa ney amwangat bu mukaj. Ki misang yoos, Yozeefw waakady teng ulek. Ku bulekel kwa byoos, ufulwiil Yozeefw mund bikasakan ni umufundilomw neey waakady ukaam kumwangat bu mukaj. (Bal Kutang kwa Bwanjil 39:14, 15.) Humvwiil Potifar bwaal oobw, umbil Yozeefw mu nzubw a lukan, mushaadiley mukacy mwa mivw kaahand. (Kbwa. 39:19, 20) Mu nzubw a lukan mwaakady bu mu biny? Mwaak a mu ciin Ebreh ukadilobw nend mudimw bwa kuleeb bwa “nzubw a lukan” udy mwa kumvwiij “cind cya mwanz,” bileej neey ku butamb bwindiy kwaakady teng kufulul ni utadil neey kaakadyoh bend ni cyaakadyey mutakamin. (Kbwa. 40:15) Cikwaabw, Bibl uleeleej neey musang mukwaabw makas ma Yozeefw maakady maswiik ni minyolol ni bumbil shing indiy mu byaamw. (Mis. 105:17, 18) Shikacil a Yozeefw waakady wend teng ni kunyanguk menmen. Uyiil kwiikal muhik a kuteekel micim hakwiikal mwiin mu lukan mwiin-kwiihweekesh.
8. Ning makab mam miiy makasakan menmen, tudy mwa kwiikal ni kutwiishiibw kaay?
8 Waakadyok mu shikacil a mal ni makab waakady ubiih teng kubiih ning muwaakady usambil Mawej ni mucim woos eeny? Bidy mwa kulongek. Yehow kiin wiitulamoh bend ku makab moos mady mwa kwiitufikil mu bulongolody bwa Sataan oobw. (1 Jah 5:19) Cikwaabw, bikaam wiikal mutwiishibw neey: Yehow i mumanyik myand yoos yiwutaatatameen ni ukwaakwambulwiish. (Mat. 10:29-31; 1 Py. 5:6, 7) Cikwaabw, i mulay neey: “Ciishoh bend mukuvulamin, ni ciishoh bend nakushiy ning bicy.” (Ebr. 13:5) Yehow udy mwa kukwambulwiish bwiibuh kutaatameen ning hawutaatal neey bikaady bikasakan ni kwiin ni cya kutakamin. Tutalayaak mwaakadyeby bwa Yozeefw.
Yehow waakady ni Yozeefw ning haakadyey mu nzubw a lukan ni bamuteekel ku mut kwa biin lukan boos (Tal cikos cya 9)
9. I biny bileeleej neey Yehow waakady ni Yozeefw ciisang cyaakadyey mu nzubw a lukan? (Kutang kwa Bwanjil 39:21-23)
9 Bal Kutang kwa Bwanjil 39:21-23. Ning mu ciisang ciikeley mu nzubw a lukan, Yehow waakady ulong bwa byoos byaakady Yozeefw ulong biikal byend teng bilengel. Mushind kaay? Ha ciisang aacy, mutam a basalaay uteekel Yozeefw micim ni ulongel bwa baat biikal bamuneek, teng bu mwaakadyeby bilongek ni Potifar. Mu mafuk malondel, mutam a basalaay uteekel Yozeefw ku mut kwa bakwaabw boos baakady mu nzubw a lukan. Nook, Bibl uleeleeb neey: “mutam a biin lukan aaw kacyaakadyoh bend utat bwa kulondakany Yozeefw ku midimw.” Yozeefw waakady kaabaak ni bwaal kaahand bwa kulong—waakady ki ukaady ni mudimw waakady mwa kulong bwa kuhatul bihet bilengel. Ook i kushintuluk kwa myand kwaakady kakuy kutakamin! I mushind kaay waakady mwiin lukan ufundilobw mwa kuteet bwa kwangat mukaj a bend wa fumwend umuteekel micim hakumuteek ku mut kwa biit bindiy byoos ang? Kudy nteng dyumvwiij dyaakaabumw. Mu Kutang kwa Bwanjil 39:23 baleeleeb neey, “Mawej waakady ni Yozeefw. Byoos byaakady Yozeefw ulong, byaakady teng biy biy kuuhal.”
10. Umvwiij bwabiny Yozeefw waakady mwa kwiiyumvw neey kaakady mwa kwiikal ni musangal mu myand yoos.
10 Teetok bwa kulangil ha shikacil waakady nend Yozeefw. Kuunyim kwa baman kumudingilomw myand ni bamumb mu nzubw a lukan, ulaalangok neey uhetelok musangal mu byoos byaakadyey ulong eeny? I biny byaakady Yozeefw ukaam menmen? I mushind kaay waakady mutam a biin lukan mwa kumutalok mu diis? Cikwaabw, Yozeefw waakady mukat bwa bamulekelel. Wambil cikwaabw mwiin lukan mukwaabw bwa kumuleebeloh kudy Farawon bwa kumuhatulobw mu lukan mwaakady mutwaal kaakunying. (Kbwa. 40:14) Nook, kayiiloh bend musang umw bwa kambiley Farawon. Bu cihet, Yozeefw ushaadil mu lukan mukacy mwa mivw yihit a yibidy. (Kbwa. 40:23; 41:1, 14) Cikwaabw, Yehow utungunukil ni kulong bwa byoos byaakadyey ulong byend bilengel. Mushind kaay?
11. I bukash kaay bwa habwaah bwaakady Yehow mwaakish Yozeefw, i mushind kaay udy bwaal oobw bwambulwiish bwa kukumbaj kiihacil kaakady naak Yehow?
11 Hacyaakady Yozeefw mu nzubw a lukan, Yehow ulongel bwa mukaleng a mu Ejipit alot bilot bibidy byaakady mwa kwiitish meej mindiy. Farawon ukaakeel cya kulong ni ukaamin waakady mwa kumumvwiijeby. Hamanyikil Farawon neey Yozeefw waakady mwa kumvwiij bilot, utumin baat bwa biiy nend. Ku dyambulwiish dya Yehow, Yozeefw umvwiijil bilot ni Farawon ukemen bwa mibel ya meej yimwaakishiley. Hatadil Farawon neey Yehow waakady ni sangwiilum oow, ukacil bwa kuteek Yozeefw kumut kwa byaakudy byoos bya mu Ejipit. (Kbwa. 41:38, 41-44) Hahicil mafuk, ciyool cya nzal citweelel kiin teng mu Ejipit, citweelel cikwaabw mu Kanaan, cyaab cyaakady biin mu cisak cya Yozeefw bashikacil. Yozeefw waakady kaabaak ni mushind a kukuuley biin mu cisak cindiy, ni bwaal oobw bumvwiijil neey i mu cisak cyaakadyobw ni bwa kulam bwaal Mesih waakady mwa kuhatukil mu twiikulwiilwiil twa mu cisak oomw.
12. Teel mishind yileeleej neey Yehow ulongel bwa myand yaakady Yozeefw ulong yiikal yend bilengel.
12 Langoh ket bwa myand yaakady kayiy yanj kulongekoh mu shikacil a Yozeefw. I ngany ulongeeshel myand bwa Potifar atum meej mu mushind a habwaah kudy Yozeefw, muut waakady muhik bituh? I ngany ulongel bwa mutam a biin lukan atalok Yozeefw mu diis, mwiin lukan waakady ni kwiihweekesh? I ngany ulongel bwa Farawon a lot bilot byaakady bimwiitish meej ni waakish Yozeefw bukash bwa kwiibyumvwiij? I ngany waakady musak Farawon bwa kuteekey Yozeefw ku mut kwa biit bya mu Ejipit bwa kutal myand ya byaakudy? (Kbwa. 45:5) Cya biin, waakady Yehow ulongel bwa byoos byaakady Yozeefw ulong byend bilengel. Ning mwaakady baan baabw ni Yozeefw bakaam kumuzuh, Yehow ushintulwiil myand ni kiihacil ka kukumbajey lukat Lwindiy.
MUDY YEHOW ULONG MYAND BWA YIIKAL YEND BILENGEL
13. Yehow wiitwambambulwiish mu shikacil woos utufiifikil eeny? Umvwiij.
13 I biny bitudy mwa kulongel ku bwaal bwa Yozeefw? Yehow wiitwambambulwiish mu shikacil woos utufiifikil eeny? I yiy uloolongesh bwa myand yoos yitufiifikil mu shikacil iitut, bwa neey myand yoos yibiih yiloolongek i bwa kabingil kalengel eeny? Waakweeh, Bibl kiin ulongweesh nook. (Mul. 8:9; 9:11) Ki, tudy bamanyik neey: Hatuheehet makab, Yehow i mumanyik ni umvumvw may miitut hatumuloolomb dyambulwiish. (Mis. 34:15; 55:22, NWT; Ye. 59:1) Cikwaabw, Yehow udy mwa kwiitwambulwiish bwa kuhit bilengel ni makab. Mushind kaay?
14. I mushind kaay udy Yehow wiitwambulwiish mu biisang bya makab?
14 Mushind aakaabumw udy Yehow wiitwambulwiish i hadyey wiitukashish ku micim teng ha ciisang cilengel. (2 Kor. 1:3, 4) Ki mwaakadyeby bwa mwiin-kweet Eziz, mwiin-kweet mwaan-mulum wa mu Turkmenistan ufundilobw cibaw cya kulongey mivw yibidy mu bulok bwa diitabij dindiy. Uleeleeb neey: “Ku makuhacy diifuk dinahetel diiteet,” “mwiin-kweet mukwaabw uuleejel verseh wa Yeshaay 30:15, uleeleeb neey: ‘Diikand diinun i kubatamij micim mund ni kutakamin kunady.’ Verseh oow waakady uyambulwiish bwa kushaal ni micim yibatam mund ni bwa kuteekel Yehow micim mu myand yoos. Kulangil ha verseh oow kwaakady kuyambulwiish mu ciisang cyoos cinaakady mu nzubw a lukan.” Udy mwa kulangilok ha ciisang cidy Yehow mukwambulwiish mu shikacil iibuh hakukashish ku micim mu ciisang ciwaakady ukaam bikasakan dyambulwiish eeny?
15-16. Bwaal bwa Tori budyobw balond oobw bukuloolongweeshok biny?
15 Misang yivul, katwiin tumanyin mushind udy Yehow wiitwambulwiish bwa kutaatameen makab teng ni mudyem mah. Mwiin-kweet mwaan-mukaj udyobw babiikan neey Tori utadil neey bwaal oobw i bwa biin-biin. Mwaan indiy mwaan-mulum, Mason, ulwiil diivit ni lubeel lwa kanseer mukacy mwa mivw isambombw teng ni mwiiyiley kufw. Biin-biin,Tori umvwiil kaakunying menmen. Uleeleeb neey, “Ciin mwa kulang neey byaakady mwa kwiikal shikacil mukasakan menmen bwaamim teng bu mudy maam mwa kumvw.” Uleeleeb cikwaabw neey, “Nady mutwiishibw neey baledy bakwaabw bady mwa kwiiy kwiitab neey hadyobw batal mwaan aababw wend ukeng i bibiih menmen bishilangan ni mushind uwutaatal.”
16 Ning mwaakadyeby byaakish Tori kaakunying kavul haakadyey utal mwaan indiy ukab bikasakan, hahicil mafuk, ulangil bwa mushind waakady Yehow mumwambulwiish bwa kutaatameen. “Hanalaalang bwa ciisang aacy,” uleeleeb neey: “Nady mwa kutal mudy Yehow muuyambulwiish mu ciisang cyaakady mwaan aam ubeel. Cileejel, ning haakady Mason ubeel bikasakan bwa kutal baat baakady biiy kwiitukumbul, biin-kweet baan-balum ni baan-bakaj balongel lwend ni mashiny mu meeb mabidy bwa kufik ku lupitaady. Kwaakady teng muut waakady waak baat ha cyaab cidyobw baakil beeny—hiinaah, bakaakaam kumvw ni bwa kwambulwiish beeny bwa myand yidyobw naay. Cikwaabw, biin-kweet baan-balum ni baan-bakaj biitwambulwiishil ni biit bitwaakady naaby diikeng. Ning mu biisang bikasakan menmen, katwaakadyoh bend babul biit bitwaakady naaby diikeng.” Yehow waakishil Tori biit byaakadyey ukaam bwa kutaatameen, ni ki mum mulongeley bwa Mason.—Tal kazubw ka neey: “ Yehow i Mwiitwaakish Biin-biin Citwaakady Tukaam.”
KUVULAMINOH BEND MABENESH MA KUDY YEHOW MAWUDY MUHET
17-18. I biny biikal mwa kwiitwambulwiish bwa kumanyik ni bwa kwanyish dyambulwiish dya kudy Yehow mu biisang bikasakan? (Misambw 40:5, NWT.)
17 Bal Misambw 40:5, NWT. Kiihacil ka muut wendend ukil ha mulund i kakufik teng ha kasong-song. Ki, kudy byaab bivul mu njil bidyey mwa kwiimanok ni ubandilok biit bilengel bidyey utal. Bya mushind aakaabumw, iikalok ni ciibidil cya kwiimanok ni ulangilok ha mushind udy Yehow ulong bwa myand yiibuh yiikal yiy teng bilengel ning uw mwiikal utaatameen lutat kaahand. Ku bulekel kwa diifuk dyoos, iikal wiiyihanguj neey: ‘I mu mushind kaay unady mutal diibenesh dya Yehow leeloow? Ning mucidyok lutat, i mushind kaay udy Yehow wend uuyambulwiish bwa kutaatameen?’ Talok ciit cyaakaabumw cidy Yehow mulong bwa kukwambulwiish.
18 Cya biin, udy mwa kwiikal usambil bwa lutat luwudy naal luh. I byumvwiik ni i bikumban bwa kulong nook. (Fili. 4:6) Bikaam twiikal tumanyik cikwaabw mabenesh matudy bahet leeloow. Kuunyim kwa byoos, Yehow wiitulaalay bwa kwiitukashish ku micim ni bwa kwiitwambulwiish bwa kutaatameen. Nook iikal ufwiijok teng Yehow bwa mudyey ukwambulwiish. Ni wiiyiiy utal mudy Yehow ukwambulwiish bwa byoos biloolong biikal biy teng bilengel, teng mulongeley bwa Yozeefw, ning mu biisang bya makab.—Kbwa. 41:51, 52.
MUSAMBW A 32 Luaku ku luseke lua Yehowa
a Hatutwiitwiilangan ni shikacil mukasakan, katwiin mwa kulang tut kaayeet neey byoos bituloolong bidy “teng bilengel.” Tudy mwa kulang neey mwaak oow wiiyiiy kukumban teng diib diwaah lutat lutudy naal. Nook, myand yifikil Yozeefw mu shikacil yituloolongweesh bwaal bwa buseeb bwa neey—Yehow udy mwa kwiitwambulwiish bwiitut kwiikal ni musangal mu ciisang cya makab. Mu ciin bwaal eecy biiyiiy kwiitumvwiij mushind wiikaleby.
b Bibl i muleej myand yidy yishintuluk mu shikacil bwa kwiikal kwa Yozeefw mu buhik teng mu verseh yikeeh bituh, ki yidy mwa kwiikal yimweek mu ciisang cya mivw yivul.
