1-2. a) Samu na yinki beto ke pamuká ve ntangu beto ke kutaná na bampasi? b) Yinki beto ke zonzila na disolo yayi?

 BETO bisadi ya Yehova, beto ke pamuká ve ntangu beto ke kutaná na bampasi. Biblia ke zonzaka: “Beto fwana kutala mpasi mingi samu na kukota na Kimfumu ya Nzambi.” (Bis. 14:22) Beto zaba mpe ti ya ke na bamambu yina ke manisa kaka na yinza ya malu-malu, ntangu “bantu ke kufwa dyaka ve, ke vwanda dyaka ve na mawa, ke dila dyaka ve, to ke tala dyaka ve mpasi.”​—Luz. 21:4.

² Yehova ke bumbá ve beto na bampasi. Kasi yandi ke sadisá beto na kukanga ntima. Tala mambu yina ntumwa Polo zonzá na bakristo yina vandá zingá na Roma. Na manima ya kuzonzila bampasi yina yandi na bampangi ya yandi vandá kutana na yawu, yandi sonikaka: “Beto ke lutilaka na kununga na luve ya Nzambi yina ke zolaka beto.” (Rom. 8:35-37) Ya ke na lakisá ti Yehova lenda sadisa nge na kununga ata na ntangu nge ke na kati ya bampasi. Beto tala mutindu Yehova sadisá Yozefi mpe wa’ faso yandi lenda sadisa mpe nge.

3. Wa’ faso luzingu ya Yozefi sobá na mbala mosi?

³ Yakobi, tata ya Yozefi lakisá pwelele ti yandi vandá zolá mingi Yozefi. (Kub. 37:3, 4) Ya salá ti bayaya ya Yozefi vanda na musoki na yandi. Ntangu nzila funguká, ba tekak’ yandi na bantu ya mumbungu ya bwala ya Madiani. Bantu yayi natá Yozefi ntama na Ezipte, mpe kuna ba tekak’ yandi na Potifare, mfumu ya bantu yina vandá kengidilá Farao. Luzingu ya Yozefi sobá na mbala mosi. Yandi muntu vandá mwana ya ntima ya tata ya yandi kumá mundongo na Ezipte.​—Kub. 39:1.

4. Wapi bamambu beto lenda kutana na yawu?

 ⁴ Biblia ke zonzá ti ‘mambu ya kukondwa kukana ke kuminaka bantu nyonso.’ (Lon. 9:11) Bantangu ya nkaka, beto ke kutaná na bamambu ya mpasi yina “ke kuminaka bantu,” ya zola zonza bamambu ya mpasi yina ke kuminá bantu nyonso. (1 Ko. 10:13) Mpe beto lenda kutana na bampasi kaka samu beto ke bilandi ya Yesu. Na kifwani, ba lenda seka beto, ba lenda kwamisa beto to kunyokola beto samu na kiminu ya beto. (2 Tim. 3:12) Mpasi ni mpasi yina beto lenda kutana na yawu, Yehova lenda sadisa beto na kununga. Wa’ faso yandi salak’ yawu samu na Yozefi?

5. Samu na Potifare, yinki vandá sala ti Yozefi nunga? (Kubanda 39:2-6)

⁵ Tanga Kubanda 39:2-6. Potifare kwizá tala ti Yozefi vandá ntwenya ya mayela mingi mpe yandi vandá ngolo na kisalu. Yandi zabá mpe samu na yinki Yozefi vandá mutindu yina. Potifare talá ti ‘Yehova vandaka kunungisa mambu nyonso yina Yozefi vandaka kusala.’ b Na manima, yandi kumá kisadi ya ntima ya Potifare. Mpe Potifare tulak’ yandi na zulu ya bima nyonso ya yinzo ya yandi. Yinki ya salaka? Bimvwama ya Potifare vandá funa.

6. Ntangu ya nkaka, yinki vandá dikanisi ya Yozefi samu na mambu yina vandá kumina yandi?

⁶ Kana nge vandá Yozefi, yinki nge zolá vanda na yawu nsatu? Ti Potifare tala nge mpe tula nge na zulu ya bima nyonso ya yinzo ya yandi? Beto lenda kanisa ti kima yina Yozefi vandá na yawu nsatu ya kulutila vandá ti ba bika yandi, mpe yandi vutuka na tata ya yandi. Ata yandi vandá na lutumu mingi na yinzo ya Potifare, Yozefi vandá kaka mundongo ya muntu yina vandá sadilá ve Yehova. Yehova salá ve ti Potifare vutula Yozefi na bwala ya yandi, mpe na manima luzingu ya Yozefi bebá dyaka.

7. Wa’ faso bamambu ya Yozefi bebá dyaka? (Kubanda 39:14, 15)

⁷ Mutindu Kubanda kikapu 39 ke lakisak’ yawu, kento ya Potifare sepelá na Yozefi, mpe yandi vandá sosá kubasika na yandi. Ntangu nyonso, Yozefi vandá mangaka. Na nsuka, kento ya Potifare dasuká mingi, mpe yandi vuniná Yozefi ti yandi zolá vukisa nzutu na yandi na ngolo. (Tanga Kubanda 39:14, 15.) Ntangu Potifare kuwá mambu yayi, yandi tulá Yozefi na boloko, mpe yandi lutisá bamvula mingi kuna. (Kub. 39:19, 20) Wa’ faso vandá boloko yina ba tulá Yozefi? Samu na kuzonzila kisika yina yandi vandá na boloko, Yozefi sadilá nzonzolo yina zola zonza ‘dibulu ya maza,’ to “dibulu.” Ya ke na lakisá ti kisika yango vandá mpimpa, mpe Yozefi vandá ve na kivuvu ti yandi ke basika kuna. (Kub. 40:15; nyp.) Biblia ke lakisá mpe ti ba kangak’ yandi basinga na makulu, mpe kisengo na laka. (Nku. 105:17, 18) Bamambu vandá beba kaka samu na Yozefi. Yandi vandá dyaka ve kisadi ya ntima ya Potifare, kasi muntu ya mpamba na boloko.

8. Ata ti bamambu ya nge ke na bebá kaka, na yinki nge lenda vanda ya kundima?

⁸ Nge me kutaná kwandi na mambu ya mpasi yina ke na bebá kaka ata ti nge ke na sambilá mingi? Ya lenda salama. Yehova ke bumbá ve beto na bampasi ya yinza ya Satana. (1 Yoa. 5:19) Kasi nge lenda vanda ya kundima ti Yehova zaba mbote-mbote mambu yina nge ke na kutaná na yawu, mpe yandi ke na nsatu ya kusadisa nge. (Mat. 10:29-31; 1 Pi. 5:6, 7) Dyaka, yandi pesá nsilulu yayi: “Mu ke yambula nge ve. Mu ke bika nge ve.” (Ebr. 13:5) Yehova lenda sadisa nge na kukanga ntima ata na ntangu nge na talá ti nge ke kaka na mpimpa. Beto tala mutindu Yehova salak’ yawu samu na Yozefi.

9. Yinki ke na lakisá ti Yehova vandá na Yozefi ntangu yandi vandá na boloko? (Kubanda 39:21-23)

⁹ Tanga Kubanda 39:21-23. Ata na ntangu yina Yozefi vandá na boloko, Yehova vandá sadisa yandi na kununga. Wa’ faso? Malembe-malembe, mfumu ya boloko kwizá tala ti Yozefi vandá muntu ya mbote, mpe yandi bandá kutudila yandi ntima, kaka faso Potifare. Yandi pesak’ yandi lutumu samu na kutala bantu nyonso yina vandá na boloko. Biblia ke zonzá ti ‘mfumu ya nene ya boloko vandaka kutala ata kima mosi ve yina vandaka na yinsi ya kiyeka ya Yozefi.’ Yozefi kumá na kisalu ya kusala. Ya vandá mambu ya ngitukulu. Wa’ faso ba lenda pesa lutumu yayi na muntu yina ba tulá na boloko samu ba zonzá ti yandi sosá kuvukisa nzutu na ngolo na kento ya muntu ya nene? Ntembe ve, kaka ni Yehova lendá sala ti mambu ya mutindu yayi salama. Kubanda 39:23 ke zonzaka: ‘Yehova vandaka na Yozefi mpe Yehova vandaka kunungisa mambu nyonso yina yandi vandaka kusala.’

10. Ntangu ya nkaka, samu na yinki Yozefi zolá tala ti yandi vandá nunga ve?

¹⁰ Kanisa dyaka ti ni nge ke Yozefi. Ba me vunina nge mambu. Ba me tula nge na boloko. Nge zolá tala kwandi ti nge ke na nungá mambu nyonso yina nge ke na salaka? Yinki Yozefi vandá na yawu nsatu ya kulutila? Yandi vandá kwandi na nsatu ti mfumu ya boloko sepela na yandi? Beto lenda kanisa ti Yozefi vandá na nsatu ba basisa yandi. Kilumbu mosi, yandi vandá na bakala mosi yina zolá basika na boloko na mwa bilumbu. Yandi zonzá na bakala yango na kuzonzila yandi na faso ya mbote na Farao, samu Farao basisa yandi na boloko ya mpasi yayi. (Kub. 40:14) Kasi ntangu yandi basiká, bakala yango zimbaná kuzonzila yawu na Farao. Ya salá ti Yozefi lutisa dyaka bamvula zole na boloko. (Kub. 40:23; 41:1, 14) Ata faso yina, Yehova vandá sala kaka ti Yozefi nunga. Yinki yandi salaka?

11. Wapi makoki Yehova pesá Yozefi, mpe wa’ faso ya sadisá na kulungisa dikanisi ya Yehova?

¹¹ Ntangu Yozefi vandá na boloko, Yehova salá ti mfumu ya Ezipte kuzwa bandosi zole  yina pesak’ yandi boma. Farao vandá na nsatu mingi na kuzaba yinki bandosi zole yayi vandá sosa kuzonza. Ntangu yandi kwizá zaba ti Yozefi vandá na makoki ya kubangula bandosi, yandi filisá bantu samu ba nata yandi. Na lubakusu ya Yehova, Yozefi lendá kubangula bandosi. Mpe Farao sepelá mingi na malongi yina Yozefi pesak’ yandi na mutindu ya kuyidika bamambu. Farao talá ti Yehova vandá na Yozefi. Na yawu, yandi pesak’ yandi lutumu samu na kukipe mambu ya madya na bwala nyonso ya Ezipte. (Kub. 41:38, 41-44) Na manima, nsatu ya ngolo kumá na Ezipte mpe na bwala ya Kanana, kisika yina dikanda ya Yozefi vandá vandaka. Na ntangu yina, Yozefi vandá na makoki ya kuvuukisa dikanda ya yandi, mpe kubumba kivumu yina zolá nata na Masiya.

12. Wa’ faso Yehova salá ti Yozefi nunga?

¹² Kanisa na bamambu nyonso ya ngitukulu yina salamá na luzingu ya Yozefi. Nani salá ti Potifare tula meso na Yozefi, mundongo ya mpamba? Nani salá ti mfumu ya boloko tula Yozefi, muntu ya mpamba na zulu ya bantu nyonso yina vandá na boloko? Nani pesá Farao bandosi yina yandi salá, mpe Yozefi makoki ya kubangula yawu? Nani vandá na manima ya mukanu yina Farao baká na kutula Yozefi mfumu samu na kukipe mambu ya madya na Ezipte? (Kub. 45:5) Ya ke na talaná pwelele ti ni Yehova vandá sala ti Yozefi nunga mambu nyonso. Na kubanda, bayaya ya Yozefi vandá sosa kufwa yandi. Kasi na manima, Yehova balulá mambu yayi samu na kulungisa dikanisi ya yandi.

13. Yehova ke kotá kwandi na bamambu nyonso yina ke kuminá beto? Zonzila yawu.

¹³ Yinki beto ke na longoká na disolo ya Yozefi? Yehova ke kotá kwandi na bamambu nyonso yina ke kuminá beto? Yehova ke salá kwandi ti bamambu ya mpasi kumina beto samu yandi ke na dikanisi ya kulungisa? Ve. Ni yawu ve Biblia ke longaka. (Lon. 8:9; 9:11) Kasi beto zaba ti ntangu beto ke kutaná na bampasi, Yehova zaba bamambu yina beto ke na yawu, mpe yandi ke kuwá balusambu yina beto ke salá samu na kulomba lubakusu. (Nku. 34:15; 55:22; Iza. 59:1) Mpe Yehova  lenda sadisa beto na kununga na kati ya bampasi. Wa’ faso?

14. Wa’ faso Yehova ke sadisá beto na ntangu ya mpasi?

¹⁴ Mosi ya bafaso yina Yehova ke sadisá beto, ni na kupesá beto ngolo mpe bukindi. Bambala mingi, yandi ke salak’ yawu kaka na ntangu yina beto ke na yawu nsatu. (2 Ko. 1:3, 4) Ni yawu salamá samu na Eziz, mpangi mosi ya bakala ya bwala ya Turkménistan. Ba tulak’ yandi na boloko samu na bamvula zole samu na kiminu ya yandi. Yandi me zonza: “Na suka ya kilumbu yina ba zengá mambu ya munu, mpangi mosi ya bakala lakisá munu Izaya 30:15, kisika yina ke zonzaka: ‘Beno ke vanda ngolo kana beno bikana swi mpe beno tula ntima.’ Verse yayi sadisá munu na kuvanda na kizunu mpe na kubika nyonso na maboko ya Yehova. Kuyindula na verse yayi sadisá munu ntangu nyonso yina mu vandá na boloko.” Nge na zabá dyaka ntangu yina Yehova pesá nge ngolo mpe bukindi kaka na ntangu yina nge vandá na yawu nsatu?

15-16. Yinki mambu yina kuminá Tori ke na longá nge?

¹⁵ Bambala mingi, ntangu beto ke vandá na mpasi, beto ke zabá ve mutindu Yehova ke sadisá beto. Kaka na manima ya mambu, beto ke kwizá tala ti yandi salak’ yawu. Ni yawu salamá samu na mpangi ya kento na nkumbu ya Tori. Mwana ya yandi Mason nwaná na cancer na kati ya bamvula 6, tii ntangu yandi kwizá kufwa. Ntima ya Tori lwalá mingi. Yandi me zonza: “Mu kanisa ve ti ya ke na mambu yina ke mpasi samu na mama kulutila yayi.” Yandi me bwela: “Mu zaba ti bibuti mingi ke ndima kutala mpasi na kisika ya bana ya bawu.”

¹⁶ Mambu yayi vandá mpasi mingi samu na Tori. Kasi na manima, yandi kwizá tala mutindu Yehova sadisak’ yandi na kati ya mpasi yina. Yandi me zonza: “Ntangu mu ke kanisá na bantangu yina, mu ke talá mutindu diboko  ya Yehova sadisá beto ntangu nyonso yina mwana ya munu vandá beela. Na kifwani, ntangu kimbevo ya Mason kumá ngolo mingi mpe bantu lendá tala dyaka ve yandi, ya vandá kaka na bampangi ya kento na ya bakala yina vandá katuka ntama samu na kukwiza na lupitalu. Ntangu nyonso, ya vandá na muntu yina vandá kuna samu na kusadisa beto. Dyaka, bampangi ya kento na ya bakala pesá beto bima yina beto vandá na yawu nsatu. Ata na ntangu ya mpasi mingi, beto kondwá kima ve.” Yehova pesá Tori yina yandi vandá na yawu nsatu samu na kukanga ntima. Yandi salá mpe yawu samu na Mason.​—Tala “ Yehova pesá beto yina beto vandá na yawu nsatu.”

17-18. Yinki ke sadisa beto na kutala yina Yehova ke na salá samu na beto na ntangu ya mpasi, mpe kuvutula yandi matondo? (Nkunga 40:5)

¹⁷ Tanga Nkunga 40:5. Ntangu muntu ke na tambulá na mongo, dikanisi ya yandi ke ni na kukuma na zulu ya yawu. Kasi, ntangu yandi ke na kwendá, ya ke na bisika yina yandi lenda telama mpe kutala bima ya kitoko yina ke kuna. Mutindu mosi mpe, ntangu nyonso baka ntangu ya kuvanda mpe ya kukanisa na mutindu Yehova ke na sadisá nge na kununga ata na kati ya mambu yina nge ke na kutaná na yawu. Na nsuka ya konso kilumbu, yufula: ‘Wapi mutindu Yehova me sakumuna munu bubu yayi? Ata ti mambu ya munu me manisa ve, wa’ faso Yehova ke na sadisá munu na kukanga ntima?’ Sosa kutala ata mambu mosi yina Yehova me sadisa nge na kununga.

¹⁸ Ntangu ya nkaka, nge ke na sambilá samu mambu ya nge manisa. Ya ke ve yimbi na kusala yawu. (Flp. 4:6) Kasi beto zolá tala mpe mutindu Yehova ke na sakumuná beto bubu yayi. Yandi zonzá na beto ti yandi ke pesa beto ngolo, mpe yandi ke sadisa beto na kukanga ntima. Na yawu, ntangu nyonso vutula yandi matondo na yina yandi ke na sadisá nge. Mpe nge ke tala ti Yehova ke na sadisá nge na kununga na kati ya bampasi, mutindu yandi salak’ yawu samu na Yozefi.​—Kub. 41:51, 52.