SIRONGWA SELIRONGO 3
Jehova kuna kukuvatera yi ku tompoke
“Jehova kwa kere kumwe naJosefa . . . , kwa mu vaterere yipo nayinye eyi nga rugana yi mu tompoke.”—GEN. 39:2, 3.
RUSUMO 30 Guhyetu naKarunga naKaume gwange
ETWAROMO a
1-2. (a) Morwasinke ayi dilire kututetukisa apa atu ligwanekere nomaudigu? (b) Yisinke natu ka zogera mosirongwa esi?
NGOVANTU vaJehova, ayo kapi ayi tu tetukisa apa atu ligwanekere nomaudigu. Bibeli kuuyunga asi: “Mokuza moUhompa waKarunga, twa hepa kupita momaudigu gomanzi.” (Yirug. 14:22) Ose twa yi diva hena asi maudigu getu gamwe kapi ngaga kohonokerera po dogoro ngatu ka paruke mouzuni woupe waKarunga omu ngamu dira kukakara ‘nomfa ntani kuguva nomalirankali nokukora.’—Ehor. 21:4.
2 Jehova kapi a tu kondere tu dire kuligwanekera nomaudigu. Nye nampili ngoso, age kutuvatera tu ga lididimikire. Konekeni eyi mupositoli Paurusa ga tanterere Vakriste ava va tungire moRoma. Pomuhowo, age kwa tumbwire maudigu gongandi aga nage novapuli vakwawo va li gwanekerere nago. Makura yipo ga tjenge asi: “Ose kufunda mevatero lyogu ga tu hara.” (Rom. 8:35-37) Eyi kutanta asi Jehova kuvhura a ku vatere yi ku tompoke nampili ngomu ono kulididimikira maudigu. Tu zeni tu ka tare omu Jehova ga vaterere Josefa yi mu tompoke ntani nomu na vhura kukuvatera nove.
APA YININKE AYI LITJINDJI TWA HANA KUYINDINDIRA
3. Yisinke ya horokerere Josefa eyi ga dilire kundindira?
3 Jakopo kwa yi likidire nawa-nawa asi age kwa here po unene munendi Josefa. (Gen. 37:3, 4) Ano ngoyitundwamo, vana vaJakopo wovagara wovakondi kwa fililire mumbyawo mfudu. Apa va gwene mpito, awo kwa randesere Josefa kombunga zoVamidiyani. Varandi owo kwa twere Josefa koEgipite oku va ka mu randesere hena kwaPotifara, erenga lyomombara zaFarawo. Eparu lyaJosefa kwa litjindjire usimbu pokukara muna ogu va here po unene oguhwe noku ya kara mupika moEgipite!—Gen. 39:1.
4. Ngapi omu nampo natu ligwanekera noudigu wokulifana ngwendi ou ga li gwanekerere nawo Josefa?
4 Bibeli kuuyunga asi: “Yininke yoyidona kuhorokera nkenye gumwe.” (Muud. 9:11, Holy Bible—Easy-to-Read Version) Poyiruwo yimwe ose kuligwanekera nomaudigu “gaaga aga gwana vantu navenye,” kutanta asi maudigu aga ava li gwanekere nago vantu navenye. (1 Kol. 10:13) Ndi kuvhura tu hepe morwa ose varongwa vaJesus. Pasihonena, nampo kuvhura va tu swaure, va tu patanese ndi kuvhura va tu hepeke morwa epuro lyetu. (2 Tim. 3:12) Yi kare asi udigu musinke o li gwanekere nawo, Jehova kuvhura a ku vatere yi ku tompoke. Ngapi omu ga yi rugene oyo kwaJosefa?
Jehova kwa vaterere Josefa yi mu tompoke nampili apa va mu randesere kwaPotifara ngomupika moEgipite (Tara paragarafu 5)
5. Yisinke ga dimbwilire Potifara kuhamena Josefa? (Genesis 39:2-6)
5 Resa Genesis 39:2-6. Potifara kwa dimbwilire asi Josefa kwa kere mudinkantu gomugara ogu ga kere noudivi ntani gokurugana unene. Age hena ga divire konda zeyi Josefa ga karerere ngoso. Potifara ga mwene asi: “Jehova kwa vaterere [Josefa] yipo nayinye eyi nga rugana yi mu tompoke.” b Mwaza siruwo, Muegipite ogo kwa ninkire Josefa a kare erenga. Age hena kwa ninkire Josefa a kare mugendesi gembo lyendi nalinye. Yitundwamo musinke ya kere? Potifara kwa ngawopere.
6. Ngapi omu nampo ga lizuvhire Josefa kuhamena ukaro wendi?
6 Hetekera ko kugazara omu ga lizuvhire Josefa. Yisinke eyi ga here po unene? Age ngoso kwa here a divikwe ntani yipo Potifara a mu fute ndi? Josefa nampo kwa here va mu mangurure moupika yipo nga tengure koguhwe. Nampili ngomu Josefa ga kere noyitumbukira membo lyaPotifara, age simpe kwa kere mupika gomukareli ogu nga dili kukarera Jehova. Jehova kapi ga ninkisire Potifara a mangurure Josefa. Ntani ukaro waJosefa kwa ya donapere unene.
NSENE UKARO KUNA KUDONAPA UNENE
7. Monkedi musinke ukaro waJosefa wa ya donapere unene? (Genesis 39:14, 15)
7 Ngomu va yi tumbura mwaGenesis egaununo 39, mukada Potifara kwa here Josefa ntani nga hetekere ko kumukondjesa va rare kumwe. Josefa nkenye apa nga nyoka. Ano konyima, mukada Potifara kwa handukire nokurundira Josefa asi hambara a mu kwatere kononkondo. (Resa Genesis 39:14, 15.) Apa ga yi zuvhire Potifara oyo, yipo ga tulire Josefa modorongo omu ga kere nomvhura dongandi. (Gen. 39:19, 20) Ngapi omu za fene dorongo? Nkango zoRuhebeli “dorongo” ezi ga ruganesere Josefa kuvhura kutamba “ketope” ndi “ekero,” kulikida asi evango olyo kwa kere mundema ntani kwa mu ninkisire a lizuvhe asi kwato ehuguvaro. (Gen. 40:15) Bibeli kulikida hena asi nompadi daJosefa kwa di zwekere mokakunzu ntani nsingo zendi kwa zi menge nomalyenge. (Epis. 105:17, 18) Ukaro waJosefa kwa donapere unene. Pomuhowo age kwa kere mupika, ano konyima yipo ga ya kere munadorongo.
8. Ehuguvaro musinke natu kara nalyo nampili udigu wetu u donape unene?
8 Wa li gwanekera noukaro wokuguvisa ou wa ya donapere unene nampili ngomu ngo kanderere nelituromo ndi? Ayo kuvhura kuhoroka. Jehova kapi a tu kondere tu dire kuligwanekera nomaudigu mouzuni ou ana kupangera Satana. (1 Joh. 5:19) Nye ove simpe kuvhura o kare nehuguvaro mononkango edi asi: Jehova kumona eyi ono kupita ntani age kukupakera mbili. (Mat. 10:29-31; 1 Pet. 5:6, 7) Ntani age kwa tumbwidira asi: “Kapi ngani mu siga ndi asi ni mu zumbe.” (Heb. 13:5) Jehova kuvhura kukuvatera o lididimikire nampili ukaro woge u moneke ngwendi kwato ehuguvaro. Tu tareni omu Jehova ga vaterere Josefa.
Jehova kwa kere naJosefa nampili apa ga kere modorongo ntani apa va mu tulire a kare mukurona govanadorongo navenye (Tara paragarafu 9)
9. Yisinke ayi likida asi Jehova kwa kere kumwe naJosefa apa ga kere modorongo? (Genesis 39:21-23)
9 Resa Genesis 39:21-23. Nampili posiruwo soudigu esi Josefa ga kere modorongo, Jehova kwa mu vaterere yipo yi mu tompoke. Monkedi musinke? Mwaza siruwo, mukurona godorongo kwa huguvarere Josefa nokumufumadeka ngwendi moomu tupu Potifara ga huguvarere nokufumadeka Josefa. Ano moruhura, mukurona godorongo kwa tulire Josefa a kare mukurona govanadorongo. Bibeli kuuyunga hena asi “mukurona godorongo kapi ga kere nosinka kuhamena yininke eyi ga tulire momawoko gaJosefa.” Posiruwo esi, Josefa ga kere nosirugana esi ga hepere kurugana. Olyo kuna kara elitjindjo eli ga dilire kundindira. Ngapi omu munadorongo ogu va rundira asi ga kwatera mukadi kononkondo nava mu pa situmbukira sokuhura opo? Eyi kwa tompokere morwa mwaGenesis 39:23 kuuyunga mo asi: “Jehova kwa kere naJosefa ntani Jehova kwa tungikire nayinye eyi nga rugana.”
10. Faturura asi morwasinke nampo Josefa ga lizuvhilire asi kapi ya mu tompokere mwanayinye?
10 Hetekera ko hena kugazara omu ga lizuvhire Josefa. Konyima zapa va mu rundilire nokumutura modorongo, omu ono kugazara, age ga lizuvhire asi ya mu tompokere mwanayinye ndi? Yisinke ga here po unene Josefa? Age kwa here mukurona godorongo a mu hafere ndi? Nampo age kwa here va mu gusire po ntani va mu pwagese mo modorongo. Age hena kwa pulire munadorongo mukwawo ogu ga kere pepi nokumupwagesa modorongo a ka mu uyungilire po kwaFarawo yipo va mu pwagese mo modorongo zina zondona. (Gen. 40:14) Nye nampili ngoso, mugara gwina kapi ga ka uyungire naFarawo konyima tupu zapa va mu pwagesere modorongo. Ngoyitundwamo, Josefa kwa twikilire kukara modorongo nomvhura mbali dokukwama ko. (Gen. 40:23; 41:1, 14) Nye Jehova kwa twikilire simpe kumuvatera yipo yi mu tompoke. Monkedi musinke?
11. Evhuliko musinke lyokulikarera eli Jehova ga pere Josefa ntani ngapi omu ya sikisire mo sitambo sendi?
11 Apa Josefa ga kere modorongo, Jehova kwa ninkisire Farawo a rote nonzodi mbali dokutukukisa. Farawo kwa here kudiva eyi da tente. Apa hompa ga zuvhire asi Josefa ga kara nevhuliko lyokufaturura nonzodi, yipo ga mu tuminine va ka mu hare. Nevatero lyaJehova, Josefa ga fatwilire nonzodi ntani Farawo kwa tetukire mavyukiso aga ga mu pere Josefa gokuhamena kweyi ga hepere kurugana. Apa Farawo ga mwene asi Jehova kwa vaterere Josefa, makura Farawo yipo ga tulire Josefa a kare mukurona gweyi yonondya moEgipite nazinye. (Gen. 41:38, 41-44) Ano konyima yiyo pwa wizire erumbu lyenene mosirongo saEgipite ntani moKanani, sirongo omu lya tungire ekoro lyaJosefa. Posiruwo esi, Josefa ga kere nevhuliko lyokupopera ekoro lyendi ntani eyi kwa tente asi mekoro lyendi yimo ga ya tundililire Mesiyasa.
12. Mononkedi musinke omu Jehova ga vaterere Josefa yipo yi mu tompoke?
12 Gazadara ko koyihorokwa eyi ya horokerere Josefa meparu lyendi eyi ya dira kuhwa kuhoroka. Yilye ogu ga ninkisire Potifara a tare eho Josefa, ogu ga kere mupika? Yilye ogu ga ninkisire mukurona godorongo yipo a pe Josefa situmbukira, ogu ga kere asi nage munadorongo tupu? Yilye ogu ga pere Farawo nonzodi dokutukukisa ntani yilye ga pere Josefa evhuliko lyokudifaturura? Yilye ogu ga tumangedere Farawo yipo a ture Josefa a kare mukurona gweyi yonondya moEgipite? (Gen. 45:5) Jehova yige ga vaterere Josefa yi mu tompoke mwanayinye. Nampili ngomu vakuru vaJosefa va here kumudipaga, Jehova kwa tjindjire ukaro owo yipo a sikise mo sitambo sendi.
NGAPI OMU JEHOVA A KU VATERE YIPO YI KU TOMPOKE?
13. Ngoso Jehova kupangera nkenye eyi atu ligwanekere nayo ndi? Faturura.
13 Yisinke tuna kulirongera ko kosihorokwa saJosefa? Ngoso Jehova kurugana ko yuma mwankenye ukaro ou atu ligwanekere nawo ndi? Ngoso age kugendesa nkenye ukaro wemeparu lyetu yipo asi yininke nayinye yoyidona eyi a yi horoka kuhorokera nositambo sosiwa ndi? Hawe, oyo kapisi yiyo azi rongo Bibeli. (Muud. 8:9; 9:11) Nye nampili ngoso, ose twa yi diva asi apa atu ligwanekere nomaudigu, Jehova kuyimona ntani kuzuvha nkugo zetu. (Epis. 34:15; 55:22; Jes. 59:1) Nye unene po Jehova kuvhura kutuvatera yipo yi tu tompoke kulididimikira maudigu. Ngapi omu a yi rugana?
14. Ngapi omu Jehova a tu vatere moyiruwo yoyidigu?
14 Nkedi zimwe omu Jehova a tu vatere kuna kara pokutuhengagwida ntani noku tu korangeda, yikando yoyinzi age kuyirugana posiruwo souhunga. (2 Kol. 1:3, 4) Eyi yiyo ya horokerere munazinyetu gomugara Eziz gomoTurkmenistan, ogu va tomenene nomvhura mbali modorongo morwa epuro lyendi. Age kwa uyunga asi: “Mezuva eli va ka pangwire nge kongurangura, munazinyetu gomugara kwa likidire nge Jesaya 30:15, omu va uyunga asi: ‘Huguvara mwange nawa-nawa, makura ngomu nkondope tomu yoworoka.’ Velise ezi ngazi vatere nge nkenye apa ni kare nina litura ntani nokuhuguvara Jehova mwankenye eyi. Kuteda ko kovelise ozo, kwa vaterere nge siruwo nasinye esi na kere modorongo.” Kuvhura o gazadare ko siruwo meparu lyoge apa Jehova ga ku hengagwidire nokukukorangeda posiruwo souhunga ndi?
15-16. Yisinke ono kulirongera ko kosihorokwa saTori?
15 Yikando yoyinzi ose kuyadimburura tupu omu Jehova ga tu vatera konyima zapa au pu udigu. Munazinyetu gomukadi Tori nage ga yi li monena eyi. Munendi gomumati kwa verere kankera nomvhura ntazimwe dogoro apa ga ya dogorokere. Tori kwa guvire unene. Age kwa tanta asi: “Ngazinya na si huguvara asi kwato sininke sokukoresa unene ngwendi ukaro ou.” Age kwa tanta hena asi: “Na si huguvara asi vakurona vamwe kuvhura va yi kwatese ko asi ayo kukoresa unene pokumona munoge kuna kuhepa, kupitakana kukora oku no lizuvha nyamoge nsene nyove ono kuhepa.”
16 Nampili ngomu Tori ga guvire unene apa ga mwene munendi kuna kuhepa unene, konyima ga ya gazadarere ko omu Jehova ga mu vaterere yipo a lididimikire. Age kwa tanta asi: “Apa ani gazadara ko kosiruwo oso, ame kudimburura omu Jehova ga vatera nge apa ga verere munange gomumati. Pasihonena, apa Mason ga verere unene nokudira kumona vagenda, vanavazinyetu ngava singi ure wonovili mbali va wize kosipangero. Nkenye apa monzugo zokundindilira nga mu kara muntu ogu ga liwapaikilire kutuvatera. Vanavazinyetu ngava tu vatere hena noyihepwa yetu yopanyama. Nampili moyiruwo yoyidigu, ose twa kere nkenye apa neyi twa hepere.” Jehova kwa pere Tori eyi ga hepere yipo a lididimikire ntani age kwa rugene hena yokulifana kwaMason.—Tara kakende “ Jehova kwa ku pere eyi twa hepere.”
WA HA DIVARA YININKE NAYINYE YOYIWA EYI GA KU RUGANENA JEHOVA YIPO A KU VATERE
17-18. Yisinke nayi tu vatera tu dimburure noku kara no rupandu kweyi a tu vatere Jehova moyiruwo yomaudigu? (Episarome 40:5)
17 Resa Episarome 40:5. Sitambo somurondi ogu ana kuronda ndundu zonde kuna kara asi a ka sike kondungu zondundu. Nye nampili ngoso, monzira zendi zokuronda ndundu, amo mwa kara mavango gongandi aga na vhura kusikama yipo a hafere yininke eyi ana kumona. Mokulifana, litulira po nkenye apa siruwo sokugazadara ko kuhamena omu ana kukuvatera Jehova yipo yi ku tompoke nampili ngomu ono kulididimikira udigu. Lipura nyamoge kehagero lyankenye ezuva asi: ‘Monkedi musinke nina limonene etungiko lyaJehova neina? Nampili ngomu udigu una kutwikira simpe, ngapi omu Jehova ana kuvatera nge yipo ni lididimikire?’ Tara nsene kuvhura o dimburure nampili uwa umwe wokutunda kwaJehova ou una ku vatere yipo yi ku tompoke.
18 Yosili, ove nampo kuvhura o kanderere yipo udigu woge u hage po. Ayo kapisi epuko kuyirugana ngoso. (Fil. 4:6) Nye twa hepa hena kudimburura mauwa aga tuna kara nago ngesi. Ano moruhura, Jehova ku tu tumbwidira asi ngatu nkondopeka ntani ngatu vatera yipo tu lididimikire. Kara no rupandu nkenye apa kweyi ana kukuvatera Jehova. Makura ove ngo limonena omu Jehova ana kukuvatera yipo yi ku tompoke, ngwendi moomu ga yi rugene kwaJosefa, nampili apa ga kere moyiruwo yomaudigu.—Gen. 41:51, 52.
RUSUMO 32 Hama kwaJehova!
a Nsene ose kuna kupita moudigu wounene kuvhura tu gazare asi yininke kapi yina ‘kututompoka.’ Ose kuvhura tu gazare asi yininke kuvhura kuyatutompoka nsene udigu una haga po. Nye nampili ngoso, yihorokwa eyi ya horokerere Josefa kuturonga sirongwa somulyo asi Jehova kuvhura kutuvatera yi tu tompoke nampili mompatakani zomaudigu tuna kara. Sirongwa esi nasi ka faturura omu Jehova a tu vatere yi tu tompoke.
b Bibeli kwa faturura malitjindjo aga ga horokerere Josefa apa ga kere mudinkantu monovelise tupu dononsesu, nye malitjindjo aga nampo kwa horokere monomvhura dongandi.
