1-2. (a) Ngaˬ hui shoꞈ shaꞈ ve leh tuꞈ ve hkanˍ ve gʼa hpuˇ ve aˬ htoꞈ ma te anˇ tuˬ maˇ loˍ ve le? Leh awˬ lawn chi ve hkʼaw ngaˬ hui aˬ htoꞈ ma htaꞈ henˇ tuˬ le?

 Ngaˬ hui Yaˬhoˉvaˬ ve chaw hpehꞈ ve pa taw, shoꞈ shaꞈ ve leh tuꞈ ve hkanˍ ve gʼa hpuˇ ve anˇ tuˬ maˇ loˍ. Liꞈ hpu hkʼaw kʼoˆ ve, “ngaˬ hui lehˬ tuꞈ ve hkanˍ ve maˇ maˇ htaꞈ hkanˍ ve hkʼaw lo Gʼuiˬ sha ve mvuhˇ miˬ hkʼaw gʼa loꞈ˗e ve yoˬ.” (Tcuh yaˇ 14:22) Chi hkʼoˆ kaꞈ, shoꞈ shaꞈ ve teˇ ceuˬ ceuˬ kʼo, miˬ guiˬ awˬ suhˉ maˇ gaˬ la sheˍ ve ceh ceh ngaˬ hui gu maˇ gʼa tehꞈ shiˍ ve yoˬ. Miˬ guiˬ awˬ suhˉ hkʼaw gaˬ kʼo, “suh ve teˇ ceuˬ maˇ kʼawꞈ cawˬ. Dawˇ haˍ ve, paˆ hawˬ ve, naˬ ve, awˬ ceuˬ chi teˇ hpaˍ htawˇ maˇ kʼawꞈ cawˬ.”—Hpeuꞈ maˍ ve 21:4.

² Ngaˬ hui shoꞈ shaꞈ ve leh tuꞈ ve hkanˍ ve gʼa hpuˇ ve htaꞈ Yaˬhoˉvaˬ haꞈ shaˉ laˇ ve maˇ heˆ. Yaꞈ hkʼaˇ, ngaˬ hui yeunˇ hkanˍ gʼaˇ tuˬ yawˇ ga laˇ ve yoˬ. Tcuh yaˇ Pawˇluꞈ Roˉmaꞈ venˇ hkʼaw chehˇ ve awˬ viˉ awˬ nyi htaꞈ liꞈ bvuhꞈ piˇ htaˇ, yawˇ leh awˬ viˉ awˬ nyi gʼa hpuˇ ve shoꞈ shaꞈ ve leh tuꞈ ve hkanˍ ve laiˉ ceuˬ htaꞈ kʼoˆ ve yoˬ. Peuˬ leh yawˇ kʼawꞈ kʼoˆ ve, “ngaˬ hui htaꞈ haꞈ ve chaw teˇ gʼaˇ htaꞈ pa taw, chi hkʼa peu˗eˬ htaꞈ ngaˬ hui leuˉ leh gʼaˇ shehˍ hpaˇ hpehꞈ chehˇ taˍ peuˬ.” (Roˉmaꞈ 8:35-37) Chi lehˬ nawˬ shoꞈ shaꞈ ve gʼa hpuˇ chehˇ ve htawˇ, nawˬ hkʼa dehꞈ te gʼa tuˬ Yaˬhoˉvaˬ ga laˇ gʼa ve tehꞈ kʼoˆ gʼa ve yoˬ. Yaˬhoˉvaˬ Yoˇsehꞈ htaꞈ hkʼaˬ hkʼe ga piˇ ve leh nawˬ Yoˇsehꞈ hkʼa shuˍ hkʼa dehꞈ te gʼa tuˬ, Gʼuiˬ sha hkʼaˬ hkʼe ga laˇ gʼa ve htaꞈ teˇ geh henˇ tuˬ yoˬ.

3. Yoˇsehꞈ ve a shaꞈ teꞈ hkʼaˇ maˇ dawˇ maˇ gaˇ ve hkʼaw hkʼaˬ hkʼe pa kʼai ve le?

³ Yaˍkoˆ lehˬ awˬ nu ve yaˇ teˇ hpaˍ aꞈ kehˉ Yoˇsehꞈ htaꞈ haꞈ jaˇ ve yoˬ. (Awˬ hkuiˉ puiˍ 37:3, 4) Chi awˬ viˉ paˍ hui Yoˇsehꞈ htaꞈ hkawehˉ jaˇ tuˬ te piˇ ve yoˬ. Awˬ viˉ paˍ hui awˬ hkʼaˇ ca gʼa htaˇ, Yoˇsehꞈ shu ve awˬ ceˬ te tuˬ Iˉshaˍmeˍlaˆ chaw tanˇ kaˬ paˍ htaꞈ hawˇ piˇ ve yoˬ. Tanˇ kaˬ paˍ chi teˇ hpaˍ lehˬ Yoˇsehꞈ htaꞈ Eˇjiˇtuꞈ mvuhˇ miˬ lo shiˍ kʼai tuˬ vuiˇ jaˇ ve yoˬ. Eˇjiˇtuꞈ mvuhˇ miˬ lo gaˬ˗oˬ htaˇ, tanˇ kaˬ paˍ teˇ hpaˍ lehˬ Yoˇsehꞈ shu ve awˬ ceˬ te tuˬ Hpaˍrawˇ ve a maꞈ lonˉ  Pawˇtiˆhpaˍ htaꞈ hawˇ piˇ ve yoˬ. Leh Yoˇsehꞈ ve a shaꞈ teꞈ hkʼaˇ maˇ dawˇ maˇ gaˇ ve hkʼaw pa kʼai ve yoˬ. Awˬ pa haꞈ jaˇ ve yaˇ paˍ hpehꞈ ve htawˇ, Eˇjiˇtuꞈ mvuhˇ miˬ lo shu ve awˬ ceˬ gʼa te ve yoˬ!—Awˬ hkuiˉ puiˍ 39:1.

4. Aˬ htoꞈ ma te ngaˬ hui shoꞈ shaꞈ ve Yoˇsehꞈ gʼa hpuˇ ve hkʼa shuˍ gʼa hpuˇ ve le?

⁴ Liꞈ hpu hkʼaw kʼoˆ ve, maˇ dawˇ maˇ gaˇ ve hkʼaw ngaˬ hui teˇ gʼaˇ le le kaꞈ teˇ ceuˬ ceuˬ gʼa hpuˇ puiˉ la ve yoˬ hehˉ. (Cuˇ yiˍ piˇ ve 9:11) “Chaw yaˇ hui gʼa hpuˇ jaw ve” hkʼa shuˍ, teˇ pawˆ pawˆ shoꞈ shaꞈ ve leh tuꞈ ve hkanˍ ve ngaˬ hui gʼa hpuˇ ve yoˬ. Chi ve hkʼa shuˍ chaw yaˇ teˇ gʼaˇ le le gʼa hpuˇ ve yoˬ. (1 Kawˇrenˍhtuˆ 10:13) Chi hkʼoˆ kaꞈ, ngaˬ hui Yeˍsuˆ ve awˬ laꞈ gʼawˇ hpehꞈ ve pa taw, tuꞈ ve hkanˍ ve gʼa hpuˇ ve yoˬ. Tawˇ pa haˉ te kʼo, shu ngaˬ hui htaꞈ kʼoˆ guiˇ gʼuiˬ guiˇ laˇ ve, tawˍ laˇ ve, maˇ heˆ leh fawˉ mehˍ laˇ ve, chi teˇ hpaˍ gʼa hpuˇ ve yoˬ. (2 Tiˆmoˉseˍ 3:12) Nawˬ shoꞈ shaꞈ ve leh tuꞈ ve hkanˍ ve hkʼaˬ hkʼe ve gʼa hpuˇ ve htawˇ, Yaˬhoˉvaˬ lehˬ nawˬ hkʼa dehꞈ te gʼa tuˬ ga laˇ chehˇ ve yoˬ. Yaˬhoˉvaˬ Yoˇsehꞈ htaꞈ hkʼaˬ hkʼe ga piˇ ve teˇ geh nyi sheˍ.

5. Yoˇsehꞈ aˬ htoꞈ ma teˇ ceuˬ te ve htawˇ hkʼa biˇ te gʼa ve pa taw Pawˇtiˆhpaˍ hkʼaˬ hkʼe dawˇ ve le? (Awˬ hkuiˉ puiˍ 39:2-6)

⁵ Awˬ hkuiˉ puiˍ liꞈ 39:2-6 gʼaw sheˍ. Yoˇsehꞈ lehˬ kaiˬ leh laiˉ ceuˬ te puiˉ ve htaꞈ Pawˇtiˆhpaˍ gʼa mawˬ ve yoˬ. Aˬ htoꞈ ma pa taw yawˇ chi hkʼe te gʼa ve htaꞈ shiˍ ve yoˬ. Awˬ lawn kʼo, “Gʼuiˬ sha lehˬ Yoˇsehꞈ geh chehˇ taˍ leh, yawˇ te ve kanˉ teˇ hpaˍ uiˍ la daꞈ la piˇ” ve tehꞈ Pawˇtiˆhpaˍ gʼa mawˬ ve yoˬ. b Peuˬ leh Yoˇsehꞈ htaꞈ yawˇ ve awˬ ceˬ te tcuh ve yoˬ. Chi hkʼoˆ kaꞈ, Yoˇsehꞈ htaꞈ yawˇ ve yehˬ hkʼaw ve mawˇ jeˬ hkʼa peu˗eˬ nyi haꞈ shaˉ tcuh ve yoˬ. Peuˬ hkʼawꞈ nawˉ Pawˇtiˆhpaˍ leuˉ leh kʼawꞈ paw sha la ve yoˬ.

6. Yoˇsehꞈ yawˇ gʼa hpuˇ ve awˬ ceuˬ htaꞈ hkʼaˬ hkʼe dawˇ ve le?

⁶ Yoˇsehꞈ hkʼaˬ hkʼe dawˇ ve htaꞈ teˇ geh dawˇ nyi sheˍ. Yawˇ te ve awˬ ceuˬ daꞈ jaˇ ve htaꞈ Pawˇtiˆhpaˍ gʼa mawˬ leh yawˇ htaꞈ laꞈ shawnˍ peꞈ laˇ tcuh gaˇ ve laˇ? Chi ve lehˬ yawˇ loˍ ve awˬ ceuˬ hpehꞈ ve laˇ? Maˇ heˆ. Yoˇsehꞈ loˍ ve awˬ ceuˬ lehˬ yawˇ ve awˬ pa geh kʼawꞈ˗e gaˇ ve yoˬ. Yoˇsehꞈ lehˬ Pawˇtiˆhpaˍ ve aˉ hkʼaw lo a yeˇ uiˍ ve chaw hpehꞈ ve htawˇ, Yoˇsehꞈ ve awˬ shehˍ hpawˇ maˇ heˆ heˆ ve gʼuiˬ sha htaꞈ oˉ kʼoˍ pui ve geh yawˇ awˬ ceˬ kaꞈ gʼa te sheˍ ve yoˬ. Yaˬhoˉvaˬ lehˬ Yoˇsehꞈ htaꞈ shu ve awˬ ceˬ te tcuh chehˇ sheˍ. Chi hkʼoˆ kaꞈ, yawˇ ve a shaꞈ teꞈ hkʼaˇ leuˉ leh haˍ jaˇ ve yoˬ.

7. Yoˇsehꞈ ve a shaꞈ teꞈ hkʼaˇ leuˉ leh hkʼaˬ hkʼe te kʼawꞈ haˍ jaˇ ve le? (Awˬ hkuiˉ puiˍ 39:14, 15)

⁷ Awˬ hkuiˉ puiˍ liꞈ kaˇ nanˉ uiˍ 39 hkʼaw Pawˇtiˆhpaˍ ve awˬ miˇ ma lehˬ, Yoˇsehꞈ htaꞈ hkʼawˇ faˍ jaˇ leh Yoˇsehꞈ geh gʼa zuhꞈ tuˬ te gʼa ve hkʼe teˇ ceuˬ le le te ve yoˬ. Yaꞈ hkʼaˇ, Yoˇsehꞈ lehˬ yawˇ geh maˇ zuhꞈ piˇ. Hkʼe te leh, Yoˇsehꞈ yawˇ htaꞈ nyiˉ pehˇ laˇ ve tehꞈ she pfuhˍ piˇ ve yoˬ. (Awˬ hkuiˉ puiˍ 39:14, 15 gʼaw sheˍ.) Awˬ lawn chi Pawˇtiˆhpaˍ gʼa kaˇ htaˇ, Yoˇsehꞈ htaꞈ htawnˍ hkʼaw lo laꞈ haˉ yuˬ keu piˇ ve yoˬ. Yoˇsehꞈ htawnˍ hkʼaw lo laiˉ hkʼawꞈ gʼa chehˇ ve yoˬ. (Awˬ hkuiˉ puiˍ 39:19, 20) Yoˇsehꞈ chehˇ ve htawnˍ hkʼaˬ hkʼe hpehꞈ ve le? Heˍbrehˇ hkawˇ “htawnˍ” kʼoˆ ve lehˬ “nanˍ dawˍ” maˇ heˆ leh “miˬ kʼoˍ” hkʼaw Yoˇsehꞈ gʼa chehˇ ve yoˬ. Chi lehˬ naˆ hoꞈ jaˇ leh dawˇ law kuiˬ maˇ cawˬ ve htaꞈ kʼoˆ gaˇ ve yoˬ. (Awˬ hkuiˉ puiˍ 40:15) Chi hkʼoˆ kaꞈ, Yoˇsehꞈ ve hkui sheh leh kʼawˍ peˍ htaꞈ sho caˆ yuˬ hpeh piˇ taˍ ve yoˬ. (Chiˇ mvuh ve 105:17, 18) Yoˇsehꞈ gʼa hpuˇ ve awˬ ceuˬ leuˉ leh haˍ jaˇ tuˬ te piˇ ve yoˬ. Shu yonˍ gʼa jaˇ ve awˬ ceˬ hpehꞈ jaw ve htawˇ, htawnˍ yaˇ gʼa hpehꞈ ve yoˬ.

8. Ngaˬ hui gʼa hpuˇ ve awˬ ceuˬ leuˉ leh haˍ jaˇ ve htawˇ aˬ htoꞈ ma htaꞈ yonˍ gʼa ve le?

⁸ Nawˬ Yaˬhoˉvaˬ ga laˇ tuˬ bon lawˬ ve htawˇ, nawˬ gʼa hpuˇ ve awˬ ceuˬ leuˉ leh haˍ jaˇ tuˬ te laˇ sheˍ ve yoˬ. Nawˬ chi hkʼe gʼa hpuˇ jaw˗aw laˇ? Ngaˬ hui kaꞈ chi hkʼe gʼa hpuˇ jaw ve yoˬ. Miˬ guiˬ hkʼoˆ lo Saˍtanˍ uˉ peunˍ ve awˬ yanˇ htaˇ, ngaˬ hui tuꞈ ve hkanˍ ve htaꞈ Yaˬhoˉvaˬ hpuˇ tcuh laˇ sheˍ ve yoˬ. (1 Yoˇhanˬ 5:19) Ngaˬ hui chi hkʼe gʼa hpuˇ ve htawˇ teˇ lawn htaꞈ yonˍ gʼa ve yoˬ. Chi ve lehˬ nawˬ aˬ htoꞈ ma gʼa hpuˇ chehˇ ve htaꞈ Yaˬhoˉvaˬ shiˍ leh yawˇ nawˬ htaꞈ dawˇ haˍ jaˇ ve yoˬ. (Maꞈhtehˍ 10:29-31; 1 Peˍtruˆ 5:6, 7) Chi hkʼoˆ kaꞈ, “ngaˬ nawˬ htaꞈ hkʼaˬ htaˆ kaꞈ maˇ hpaˆ, hkʼaˬ htaˆ kaꞈ maˇ baˬ” tehꞈ Gʼuiˬ sha ka tiꞈ te taˍ laˇ ve yoˬ. (Heˍbrehˇ 13:5) Nawˬ gʼa hpuˇ ve awˬ ceuˬ dawˇ law kuiˬ maˇ cawˬ leh gu gʼa tuˬ awˬ hkʼaˇ maˇ cawˬ ve tehꞈ shuˍ ve htawˇ, nawˬ yeunˇ hkanˍ gʼaˇ tuˬ Yaˬhoˉvaˬ ga laˇ tuˬ yoˬ. Yoˇsehꞈ ve awˬ lawn htaꞈ teˇ geh kʼawꞈ nyi sheˍ.

9. Yoˇsehꞈ htawnˍ hkʼaw lo chehˇ ve htawˇ, Yaˬhoˉvaˬ Yoˇsehꞈ geh chehˇ ve tehꞈ hkʼaˬ hkʼe hpeuꞈ maw laˇ ve le? (Awˬ hkuiˉ puiˍ 39:21-23)

⁹ Awˬ hkuiˉ puiˍ liꞈ 39:21-23 gʼaw sheˍ. Yoˇsehꞈ htawnˍ hkʼaw lo tuꞈ ve hkanˍ ve hkʼaw gʼa chehˇ htaˇ, Yaˬhoˉvaˬ lehˬ Yoˇsehꞈ kanˉ te ve awˬ hkʼaw lo uiˍ la daꞈ la tuˬ ga piˇ ve yoˬ. Yoˇsehꞈ lehˬ Pawˇtiˆhpaˍ yonˍ gʼa jaw ve hkʼa shuˍ, Yoˇsehꞈ htaꞈ htawnˍ awˬ hoˉ yonˍ gʼa leh yawˆ yan piˇ ve htaꞈ gʼa ve yoˬ. Peuˬ hkʼawꞈ nawˉ htawnˍ awˬ hoˉ lehˬ Yoˇsehꞈ htaꞈ awˬ nu ve htawnˍ yaˇ htaꞈ nyi haꞈ shaˉ tcuh ve yoˬ. Liꞈ hpu hkʼaw kʼoˆ ve, “htawnˍ awˬ hoˉ oˇ ve lehˬ, htawnˍ htaꞈ caˉ daꞈ ve kanˉ teˇ hpaˍ htaꞈ yawˇ maˇ gʼa kʼawꞈ nyi˗o.” Leh Yoˇsehꞈ htaꞈ nyi haꞈ shaˉ tcuh ve yoˬ. Yoˇsehꞈ kanˉ chi hkʼe gʼa te tuˬ tehꞈ maˇ dawˇ nyi jaw. Pawˇtiˆhpaˍ ve awˬ miˇ ma htaꞈ nyiˉ pehˇ ve tehꞈ she pfuhˍ piˇ leh htawnˍ hkʼaw lo gʼa chehˇ ve htawˇ, a yeˇ uiˍ jaˇ ve kanˉ gʼa kʼawꞈ te ve yoˬ. A yeˇ uiˍ jaˇ ve kanˉ chi hkʼe ve htaꞈ gʼa te ve lehˬ aˬ htoꞈ ma htaꞈ pa taw le? Awˬ lawn kʼo, “Gʼuiˬ sha Yoˇsehꞈ geh chehˇ taˍ leh, yawˇ te ve kanˉ teˇ ceuˬ le le ve htaꞈ uiˍ la daꞈ la piˇ chehˇ ve yoˬ.”—Awˬ hkuiˉ puiˍ 39:23.

10. Aˬ htoꞈ ma te Yoˇsehꞈ lehˬ yawˇ teˇ ceuˬ le le hkʼa biˇ te gʼa ve tehꞈ maˇ dawˇ ve le?

¹⁰ Yoˇsehꞈ htaꞈ shu she pfuhˍ piˇ leh htawnˍ hkʼaw lo gʼa chehˇ peuˬ hkʼawꞈ nawˉ, yawˇ te ve kanˉ teˇ ceuˬ le le hkʼa biˇ te gʼa ve tehꞈ nawˬ dawˇ˗aw laˇ? Oˇ ve teˇ yanˇ Yoˇsehꞈ hkʼaˬ hkʼe dawˇ ve htaꞈ dawˇ nyi sheˍ. Nawˬ dawˇ kʼo, Yoˇsehꞈ gʼa gaˇ jaˇ ve awˬ ceuˬ aˬ htoꞈ ma le? Yawˇ htawnˍ awˬ hoˉ nyi ma cawˇ laˇ ve chaw hpehꞈ gaˇ˗aw laˇ? Maˇ heˆ. Yawˇ gʼa gaˇ jaˇ ve awˬ ceuˬ lehˬ htawnˍ hkʼaw hpehˇ laˇ ve htaꞈ gʼa gaˇ ve yoˬ. Htawnˍ yaˇ teˇ gʼaˇ htawnˍ hkʼaw lo tawˆ˗e te chehˇ ve htaꞈ Yoˇsehꞈ kʼoˆ piˇ ve, Yoˇsehꞈ yawˇ htaꞈ kaꞈ htawnˍ hkʼaw lo hpehˇ laˇ tuˬ, Hpaˍrawˇ htaꞈ a ciˉ ca kʼoˆ piˇ˗a tehꞈ kʼoˆ piˇ ve yoˬ. (Awˬ hkuiˉ puiˍ 40:14) Htawnˍ yaˇ oˇ ve teˇ gʼaˇ Hpaˍrawˇ geh haˆ maˇ kʼoˆ piˇ ve pa taw, Yoˇsehꞈ htawnˍ hkʼaw lo 2 hkʼawꞈ gʼa kʼawꞈ chehˇ ve yoˬ. (Awˬ hkuiˉ puiˍ 40:23; 41:1, 14) Chi hkʼe hpehꞈ ve htawˇ, Yaˬhoˉvaˬ lehˬ Yoˇsehꞈ  te ve kanˉ hkʼa biˇ te gʼa tuˬ ga piˇ ve yoˬ. Yawˇ Yoˇsehꞈ htaꞈ hkʼaˬ hkʼe ga piˇ ve le?

11. Yoˇsehꞈ daꞈ jaˇ ve awˬ ceuˬ htaꞈ te gʼa tuˬ Yaˬhoˉvaˬ hkʼaˬ hkʼe ga piˇ ve le? Leh chi Yaˬhoˉvaˬ ve a loˍ biˇ la tuˬ hkʼaˬ hkʼe hpehꞈ la ve le?

¹¹ Yoˇsehꞈ htawnˍ hkʼaw lo chehˇ htaˇ, Yaˬhoˉvaˬ lehˬ Hpaˍrawˇ htaꞈ zuhꞈ maˆ 2 ceuˬ mawˬ tcuh ve yoˬ. Zuhꞈ maˆ chi ve lehˬ Hpaˍrawˇ nyi ma maˇ sha tuˬ te piˇ leh tcuhˉ kuiˬ hkʼaˬ hkʼe kʼoˆ ve htaꞈ yawˇ shiˍ gaˇ ve yoˬ. Hpaˍrawˇ lehˬ Yoˇsehꞈ ga laˇ gʼa ve tehꞈ yawˇ shiˍ htaˇ, yawˇ ve chaw htaꞈ kʼai tcuh leh Yoˇsehꞈ htaꞈ htawnˍ hkʼaw lo haˆ ca shiˍ tawˆ la tcuh ve yoˬ. Leh Yaˬhoˉvaˬ kaꞈ Yoˇsehꞈ htaꞈ zuhˆ maˆ oˇ ve tcuhˉ kuiˬ yuˬ tawˆ gʼa tuˬ ga piˇ ve yoˬ. Awˬ hkʼoˆ kaꞈ, Yoˇsehꞈ lehˬ Hpaˍrawˇ htaꞈ daꞈ ve hpawˇ beˆ maˍ piˇ ve yoˬ. Yaˬhoˉvaˬ Yoˇsehꞈ geh chehˇ ve tehꞈ Hpaˍrawˇ mawˬ ve awˬ hkʼoˆ kaꞈ, Hpaˍrawˇ lehˬ Yoˇsehꞈ htaꞈ Eˇjiˇtuꞈ mvuhˇ miˬ hkʼaw caˇ tuˬ dawˬ tuˬ hkʼa peu˗eˬ gu teh tcuh ve yoˬ. (Awˬ hkuiˉ puiˍ 41:38, 41-44) Peuˬ hkʼawꞈ nawˉ, meuꞈ lonˉ kaˆ lonˉ gaˬ la ve yoˬ. Meuꞈ lonˉ kaˆ lonˉ gaˬ la htaˇ, Eˇjiˇtuꞈ mvuhˇ miˬ ceh tiˉ gʼa hpuˇ ve maˇ heˆ. Hkaˍnanˍ mvuhˇ miˬ lo Yoˇsehꞈ ve yehˬ kʼa htawˇ gʼa hpuˇ ve yoˬ. Chi ve htaꞈ pa taw, Yoˇsehꞈ yawˇ ve yehˬ kʼa htaꞈ ga piˇ tuˬ awˬ hkʼaˇ cawˬ ve yoˬ. Chi hkʼe te htaˇ yawˇ ve awˬ ceuˬ awˬ hkʼaˇ hkʼaw paw la tuˬ ve Meˍsiˉyaꞈ htaꞈ kaꞈ ga piˇ gʼa ve yoˬ.

12. Yaˬhoˉvaˬ lehˬ Yoˇsehꞈ kanˉ te ve awˬ hkʼaw lo uiˍ la daꞈ la tuˬ hkʼaˬ hkʼe ga piˇ gʼa ve le?

¹² Yoˇsehꞈ a shaꞈ teꞈ kuiˬ hkʼaw gʼa hpuˇ ve awˬ ceuˬ htaꞈ dawˇ nyi sheˍ. Yoˇsehꞈ awˬ ceˬ ceh hpehꞈ ve htawˇ, Pawˇtiˆhpaˍ nyi ma cawˇ tuˬ a shu te piˇ ve le? Yoˇsehꞈ htawnˍ yaˇ ceh hpehꞈ ve htawˇ, htawnˍ awˬ hoˉ nyi ma cawˇ tuˬ a shu te piˇ ve le? Hpaˍrawˇ zuhꞈ maˆ mawˬ ve htaꞈ nyi ma maˇ sha tuˬ a shu te piˇ ve le? Zuhꞈ maˆ ve tcuhˉ kuiˬ Yoˇsehꞈ yuˬ tawˆ gʼa tuˬ a shu te piˇ ve le? Eˇjiˇtuꞈ mvuhˇ miˬ lo caˇ tuˬ dawˬ tuˬ hpawˇ Yoˇsehꞈ awˬ hoˉ te tuˬ a shu ga piˇ ve le? (Awˬ hkuiˉ puiˍ 45:5) Yoˇsehꞈ te ve kanˉ teˇ ceuˬ le le awˬ hkʼaw lo hkʼa biˇ te gʼa tuˬ Yaˬhoˉvaˬ ga piˇ ve tehꞈ hkʼa tawˍ lehˆ gʼa mawˬ ve yoˬ. Awˬ viˉ paˍ hui Yoˇsehꞈ htaꞈ maˇ daꞈ ve te piˇ ve htawˇ, Yaˬhoˉvaˬ lehˬ Yoˇsehꞈ htaꞈ daꞈ ve te piˇ ve yoˬ. Hkʼe te leh, Yaˬhoˉvaˬ lehˬ yawˇ ve a loˍ awˬ tehˬ hpehꞈ la tuˬ te ve yoˬ.

13. Yaˬhoˉvaˬ lehˬ ngaˬ hui a shaꞈ teꞈ kuiˬ hkʼaw teˇ ceuˬ le le htaꞈ uˉ peunˍ ve laˇ? Tawˇ pa haˉ kʼoˆ maˍ laˇ sheˍ.

¹³ Yoˇsehꞈ ve awˬ lawn ngaˬ hui htaꞈ aˬ htoꞈ ma maˍ laˇ ve le? Ngaˬ hui gʼa hpuˇ ve teˇ ceuˬ le le htaꞈ Yaˬhoˉvaˬ ga laˇ ve laˇ? Ngaˬ hui maˇ daꞈ ve awˬ ceuˬ gʼa hpuˇ ve htaꞈ daꞈ ve awˬ ceuˬ hpehꞈ la tuˬ Yaˬhoˉvaˬ teˇ ceuˬ le le htaꞈ uˉ peunˍ laˇ ve laˇ?  Maˇ heˆ. Liꞈ hpu hkʼaw chi hkʼe maˇ gʼa kʼoˆ laˇ taˍ. (Cuˇ yiˍ piˇ ve 8:9; 9:11) Ngaˬ hui tuꞈ ve hkanˍ ve gʼa hpuˇ htaˇ, ngaˬ hui gʼa hpuˇ ve teˇ ceuˬ le le htaꞈ Yaˬhoˉvaˬ mawˬ leh ngaˬ hui kuˬ ve awˬ hkawˇ yawˇ kaˇ ve tehꞈ shiˍ ve yoˬ. (Chiˇ mvuh ve 34:15; 55:22; Iˉsaˍyaˆ 59:1) Ngaˬ hui tuꞈ ve hkanˍ ve gʼa hpuˇ ve teˇ ceuˬ le le htaꞈ yeunˇ hkanˍ gʼa tuˬ yawˇ ga laˇ ve yoˬ. Leh Gʼuiˬ sha ngaˬ hui htaꞈ hkʼaˬ hkʼe ga laˇ tuˬ le?

14. Ngaˬ hui shoꞈ shaꞈ ve leh tuꞈ ve hkanˍ ve gʼa hpuˇ htaˇ Yaˬhoˉvaˬ hkʼaˬ hkʼe ga laˇ ve le?

¹⁴ Yaˬhoˉvaˬ ngaˬ hui htaꞈ ga laˇ ve awˬ hkʼaˇ lehˬ, ngaˬ hui loˍ ve awˬ yanˇ htaˇ awˬ gʼaˇ cawˬ tuˬ yawˇ ga laˇ ve yoˬ. (2 Kawˇrenˍhtuˆ 1:3, 4) Taˆmeˬniˬsa˗tanˬ mvuhˇ miˬ lo chehˇ ve awˬ viˉ awˬ nyi Heh˗seˇ kaꞈ chi hkʼe gʼa hpuˇ jaw ve yoˬ. Yawˇ yonˍ ve htaꞈ pa taw htawnˍ hkʼaw lo 2 hkʼawꞈ chehˇ tuˬ suhˉ jehˬ cheˆ piˇ ve yoˬ. Yawˇ kʼoˆ ve, “ngaˬ shaˉ nanˉ lo kʼai ve teˇ shawˉ htaˇ, awˬ viˉ awˬ nyi teˇ gʼaˇ Iˉsaˍyaˆ liꞈ 30:15 hkʼaw ngaˬ htaꞈ hpeuꞈ maˍ laˇ ve yoˬ. Oˇ kaˬ lo kʼoˆ ve, ‘ngaˬ htaꞈ gʼaˇ ca kʼawꞈ va la˗o. Oˇ hkʼe te ve kʼo, nawˬ hui awˬ gʼaˇ kʼawꞈ cawˬ la leh, gawˬ lehˍ gʼa chehˇ tuˬ yoˬ.’ Liꞈ hpu awˬ tawn chi ngaˬ nyi ma gawˬ lehˍ cawˬ tuˬ ga laˇ leh Yaˬhoˉvaˬ htaꞈ kaꞈ gʼaˇ va tuˬ ga laˇ ve yoˬ. Liꞈ hpu awˬ tawn chi ve ngaˬ htawnˍ hkʼaw lo 2 hkʼawꞈ chehˇ ve awˬ yanˇ htaˇ, hkʼa dehꞈ dawˇ nyi tuˬ te laˇ ve yoˬ.” Nawˬ a shaꞈ teꞈ kuiˬ hkʼaw loˍ jaˇ ve awˬ yanˇ htaˇ, Yaˬhoˉvaˬ nawˬ htaꞈ awˬ gʼaˇ peꞈ laˇ ve hkʼaˬ ve teˇ yanˇ le? Dawˇ nyi sheˍ.

15-16. Hto˗linˇ ve awˬ lawn nawˬ htaꞈ hkʼaˬ hkʼe maˍ laˇ ve le?

¹⁵ Peuˬ taˉ ve awˬ ceuˬ htaꞈ ngaˬ hui laiˉ pawˆ kʼawꞈ dawˇ nyi htaˇ, ngaˬ hui gʼa hpuˇ ve maˇ daꞈ ve awˬ ceuˬ htaꞈ yeunˇ hkanˍ gʼaˇ tuˬ, Yaˬhoˉvaˬ ga laˇ ve tehꞈ shiˍ ve yoˬ. Awˬ viˉ awˬ nyi Hto˗linˇ kaꞈ chi hkʼe gʼa hpuˇ jaw ve yoˬ. Yawˇ ve yaˇ paˍ Me˗shaˉ meh ve mvuhˇ haˉ caˇ ve a naˍ 6 hkʼawꞈ hpehꞈ leh suh˗e ve yoˬ. Hto˗linˇ nyi ma luˬ jaˇ leh yawˇ kʼoˆ ve, “yaˇ suh˗e ve lehˬ awˬ kaˍ awˬ nu ve aꞈ kehˉ awˬ e nyi ma luˬ jaˇ tuˬ te laˇ ve yoˬ. Ngaˬ hui naˬ ve aꞈ kehˉ yaˇ naˬ ve lehˬ awˬ pa awˬ e nyi ma luˬ jaˇ ve tehꞈ shiˍ ve yoˬ.”

¹⁶ Oˇ ve teˇ yanˇ Hto˗linˇ gʼa hpuˇ ve nyi ma naˬ  jaˇ ve htawˇ, peuˬ taˉ ve awˬ ceuˬ htaꞈ kʼawꞈ dawˇ nyi htaˇ, Yaˬhoˉvaˬ yawˇ htaꞈ ga laˇ ve tehꞈ gʼa mawˬ ve yoˬ. Yawˇ kʼoˆ ve, “oˇ ve teˇ yanˇ Yaˬhoˉvaˬ lehˬ ngaˬ htaꞈ haꞈ jaˇ ve tehꞈ gʼa mawˬ ve yoˬ. Tawˇ pa haˉ te kʼo, oˇ ve teˇ yanˇ lehˬ Me˗shaˉ naˬ jaˇ leh ca guiˇ la ve chaw htaꞈ mawˬ daꞈ maˇ gʼa ve yoˬ. Awˬ viˉ awˬ nyi kaꞈ ngaˬ hui geh naˆ tsuhˇ yehˬ lo ca guiˇ la tuˬ kaˇ 2 naˍ riˍ gʼaꞈ laˬ ve yoˬ. Oˇ ve teˇ yanˇ ngaˬ hui loˍ ve awˬ ceuˬ ga laˇ gʼa tuˬ naˆ tsuhˇ yehˬ, yehˬ miˉ hpeꞈ lo awˬ viˉ awˬ nyi hkʼaˬ htaˆ kaꞈ law mui taˍ ve yoˬ. Ngaˬ hui loˍ ve awˬ ceuˬ kaꞈ awˬ viˉ awˬ nyi ga laˇ ve yoˬ. Ngaˬ hui dawˇ maˇ tawˆ ve awˬ yanˇ htaˇ kaꞈ teˇ ceuˬ le le cawˬ ve yoˬ.” Hto˗linˇ yeunˇ hkanˍ gʼaˇ tuˬ Yaˬhoˉvaˬ ga piˇ leh Yaˬhoˉvaˬ lehˬ Hto˗linˇ ve yaˇ Me˗shaˉ htaꞈ kaꞈ ga piˇ ve yoˬ.—Awˉ ceˬ awˉ fa “ Ngaˬ hui loˍ ve awˬ yanˇ htaˇ Yaˬhoˉvaˬ ga laˇ ve” htaꞈ nyi sheˍ.

17-18. Ngaˬ hui tuꞈ ve hkanˍ ve gʼa hpuˇ htaˇ, Yaˬhoˉvaˬ ga laˇ ve htaꞈ awˬ bon uiˍ jaˇ kʼoˆ piˇ tuˬ aˬ htoꞈ ma te maˇ leunˇ cawˇ ve le? (Chiˇ mvuh ve 40:5)

¹⁷ Chiˇ mvuh ve liꞈ 40:5 gʼaw sheˍ. Haˉ hpawˇ hkʼoˆ gaˆ taˆ˗e ve chaw dawˇ teh taˍ ve lehˬ haˉ hpawˇ hkʼoˆ gaˬ tuˬ coˇ caˇ ve yoˬ. Haˉ hpawˇ hkʼoˆ gaˆ taˆ˗e ve chaw jehˇ kuiˬ lo gaˬ htaˇ, jehˇ leh daꞈ jaˇ ve awˬ ceuˬ htaꞈ nyi ve yoˬ. Chi ve hkʼa shuˍ shuˍ nawˬ shoꞈ shaꞈ ve leh tuꞈ ve hkanˍ ve htaꞈ gʼa yeunˇ hkanˍ ve htawˇ, nawˬ hkʼa dehꞈ te gʼa tuˬ Yaˬhoˉvaˬ ga laˇ ve htaꞈ hkʼaˬ htaˆ kaꞈ hkʼa dehꞈ dawˇ nyi ve yoˬ. Teˇ nyi le le a shu yawˇ awˬ to htaꞈ na nyi cawˇ ve, ‘yaꞈ nyi Yaˬhoˉvaˬ ngaˬ htaꞈ daꞈ ve awˬ ceuˬ aˬ htoꞈ ma peꞈ laˇ ve le? Ngaˬ shoꞈ shaꞈ ve leh tuꞈ ve hkanˍ ve gʼa hpuˇ ve htawˇ, ngaˬ yeunˇ hkanˍ gʼaˇ tuˬ Yaˬhoˉvaˬ hkʼaˬ hkʼe ga laˇ chehˇ ve le?’ Yaˬhoˉvaˬ nawˬ htaꞈ ga laˇ chehˇ ve tehꞈ mawˬ tuˬ dawˇ nyi sheˍ.

¹⁸ Nawˬ tuꞈ ve hkanˍ ve gʼa hpuˇ htaˇ, awˬ lawn oˇ ve peuˬ˗e tuˬ Yaˬhoˉvaˬ geh bon lawˬ ve yoˬ. Yaꞈ hkʼaˇ, nawˬ chi hkʼe te lawˬ ve maˇ yaꞈ. (Hpiˇliˇpiˆ 4:6) Chi teˇ hkui ngaˬ hui gʼa ve daꞈ ve awˬ ceuˬ htaꞈ kaꞈ dawˇ nyi cawˇ ve yoˬ. Ngaˬ hui awˬ gʼaˇ cawˬ leh yeunˇ hkanˍ gʼaˇ tuˬ Yaˬhoˉvaˬ ga laˇ tuˬ yoˬ tehꞈ ka tiꞈ te taˍ laˇ ve yoˬ. Yaˬhoˉvaˬ nawˬ htaꞈ ga laˇ chehˇ ve awˬ bon uiˍ jaˇ tehꞈ kʼoˆ piˇ tuˬ taˇ leunˇ sheˍ. Yaˬhoˉvaˬ Yoˇsehꞈ htaꞈ ga piˇ jaw ve hkʼe, nawˬ chi teˇ hkui hkʼa dehꞈ te gʼa tuˬ Yaˬhoˉvaˬ ga laˇ chehˇ ve tehꞈ gʼa mawˬ ve yoˬ.—Awˬ hkuiˉ puiˍ 41:51, 52.