1-2. (a) Mwomwo ika katwatela kulikomokelako nge tuli nakumona ukalu? (b) Vyuma muka natushimutwila muchihande chino?

 ETU vangamba jaYehova katwalikomokelako nge tuli nakumona ukalu. Mbimbiliya yahanjika ngwayo, “Twatela kuhita muvihuli vyavivulu hakwingila muWangana waKalunga.” (Vili. 14:22) Twatachikiza nawa ngwetu ukalu wetu kaweshi kukuma wosenako palanga nomu natukapwa mukaye kakahya kaKalunga, muze kamweshi kukapwa cheka kufwako. Kaha nawa “kakweshi kukapwa cheka kulishona, chipwe miteto, chipwe kukolako.”—Kuso. 21:4.

² Yehova katukinga kuvyesekoko. Chipwe ngocho, eji kutukafwanga tumike nge tuli nakumona vyeseko kana. Talenu mazu aze kaposetolo Paulu ahanjikile kuli vaka-Kulishitu vaze vapwile nakutwama muLoma. Chatete, asonekele vyeseko vize ikiye navandumbwenyi vamwene. Kufumaho asonekele ngwenyi: “Tuli nakufungulula chikupu kuhichila muli ou atuzangile.” (Loma 8:35-37) Echi chalumbununa nge Yehova nahase kumikafwa mufukile numba tuhu muli nakumona ukalu. Tutalenu omwo Yehova akafwile Yosefwe afukile, nomwo nawa nahase kumikafwa nayenu.

3. Vyuma muka vyasolokelele Yosefwe mukukemwina chaliso?

³ Yakova azangile chikuma mwanenyi Yosefwe. (Kupu. 37:3, 4) Echi chalingishile vana vaYakova vakukola vaputuke kwivwila lwiso ndumbwavo. Kaha kutwala muze, valanjishile Yosefwe kuli vaMichane vaka-kusekasana. Ava vaka-kusekasana vatwalile Yosefwe kuEjipitu, kaha vakiko vamulanjishile nawa  kuli Potefwale muka-kulama kunganda yamwangana Fwalo. Chiyoyelo chaYosefwe chalumukile mukukemwina chaliso. Apwile mutu uze vazangile chikuma kuli ise, oloze aha jino ali ndungo muEjipitu.—Kupu. 39:1.

4. Vyuma muka vinahase kutusolokela vize vinahase kutulingisa tuhite muukalu ngana uze ahichilemo Yosefwe?

⁴ Mbimbiliya ngwayo, “vyuma vyavipi vyeji kuwananga vatu vosena.” (Kwambu. 9:11, Holy Bible—Easy-to-Read Version) Shimbu jimwe tweji kumonanga ukalu uze veji kumonanga “vatu vosena,” chipwe ngwetu vyeseko vize vatu vosena vali nakuhitamo. (Koli. 1, 10:13) Chipwe tunahase kumona ukalu mwomwo yakupwa tumbaji twaYesu. Chakutalilaho, vanahase kututoleka, nakutufumbukila chipwe vene kutuyanjisa mwomwo yalufwelelo lwetu. (Chimo. 2, 3:12) Yehova nahase kumikafwa mufukile chamokomoko nakala vyeseko namumona. Uno alingile ngachilihi ngocho kuli Yosefwe?

5. Vyuma muka akukulwile Potefwale kutalisa kukufukila chaYosefwe? (Kuputuka 39:2-6)

⁵ Tangenu Kuputuka 39:2-6. Potefwale amwene ngwenyi Yosefwe apwile himukweze uze apwile nauhashi chikuma kaha nawa samalikita. Atachikijile nawa ovyo vyalingishile Yosefwe apwenga ngocho. Potefwale amwene ngwenyi “Yehova alingishile vyuma vyosena alingilenga Yosefwe vifukile.” b Kutwala muze, ou kaEjipitu alingishile Yosefwe kupwa ngamba yenyi. Kaha nawa amutongwele kupwa muka-kulama zuvo yenyi. Vyuma muka vyafuminemo? Potefwale afukilililenga lika.

6. Uno Yosefwe pamo ashinganyekelenga ika kutalisa kuukalu apwile nakuhitamo?

⁶ Achishinganyekenu havyuma ashinganyekelenga Yosefwe. Vyuma muka apwile nakusaka vamulingile? Kutala alingilenga vyuma vimwe mangana vamumone nakumufweta kuli Potefwale tahi? Pamo Yosefwe asakile vamusokole mangana akinduluke kuli Ise. Numba tuhu Yosefwe apwilenga namilimo yayivulu chikuma kuzuvo yaPotefwale, oloze apwilenga lika ndungo yamutu uze kalemeselenga Yehovako. Yehova kalingishile Potefwale asokole Yosefweko. Kaha nawa ukalu waYosefwe wapwile nakuya nakutohwelako lika.

7. Mujila muka ukalu waYosefwe wapwile nakutohwelako lika? (Kuputuka 39:14, 15)

⁷ Ngana muze vasolola hali Kuputuka kapetulu 39, pwevo lyaPotefwale aputukile kwivwila Yosefwe peha yakusaka kulisavala, kaha atwalilengaho lika kuhanjika nenyi mazu achilembekeshi. Oloze lwola lwosena Yosefwe akanyinenga. Kutwala muze ou pwevo apihililile chikuma naYosefwe nakumuvangijikila ngwenyi namupiki. (Tangenu Kuputuka 39:14, 15.) Omu Potefwale evwile mujimbu kana, ambachile Yosefwe nakumuhaka mukamenga muze atwamine hamyaka yayivulu. (Kupu. 39:19, 20) Uno kamenga kana apwile ngachilihi? Lizu lyachiHepeleu azachishile Yosefwe kutalisa ‘kukamenga’ linahase kulumbununa “mulishima” chipwe “muwina,” kulumbununa nge muchihela muze apwile mwapwile milima, kaha nawa evwile nge ukalu wenyi kaweshi kukumako. (Kupu. 40:15; kwinyikila) Mbimbiliya yasolola nawa nge mahinji aYosefwe vawakashile mujikuli, kaha shingo yenyi vayihakile muvikungo. (Samu 105:17, 18) Ukalu waYosefwe wapwile nakutohwelako lika. Apwile hindungo uze vafwelelele chikuma, aha jino hifunge mukamenga.

8. Chuma muka mwatela kufwelela numba tuhu ukalu wenu nautohwelako lika?

⁸ Kutala mwahitaho lyehi muukalu uze wapwile nakutohweleko lika chamokomoko nakulomba chikuma tahi? Chuma kana chinahase kumisolokela. Yehova katukinga kuvyeseko vili muno mukaye kaze vali nakuyula kuli Satanako. (Yowa. 1, 5:19) Chipwe ngocho, tachikizenu chuma chino ngwenu: Yehova atachikiza ukalu muli nakuhitamo kaha nawa amizakama. (Mateu 10:29-31; Petu. 1, 5:6, 7) Ashika nawa ngwenyi: “Kangweshi kukakusezako, kangweshi kukakumbilako.” (Hepe. 13:5) Yehova nahase kumikafwa mupwenga vakumika nahalwola luze namumona ngwenu ukalu wenu kaweshi kuhasa kukumako. Tutalenu omwo chishina kana chazachile kuli Yosefwe.

9. Vyuma muka vyasolola nge Yehova apwilenga naYosefwe omu apwile mukamenga? (Kuputuka 39:21-23)

⁹ Tangenu Kuputuka 39:21-23. Nahalwola Yosefwe apwile nakumona ukalu mukamenga, Yehova amukafwile afukile. Mujila muka? Mukuhita chalwola Yosefwe vamufwelelele nakumuvumbika kuli mukulwane wakamenga, ngana muze chapwile nakuli Potefwale. Kutwala muze, mukulwane wakamenga ahanyine Yosefwe wata wakulama vafunge vosena mukamenga. Mbimbiliya yahanjika ngwayo, “Uze mukulwane wakamenga kalizakaminyine chuma numba chimwe kuvyuma alaminenga Yosefweko.” Yosefwe apwile jino namulimo wakuzata. Echi chapwile hikwalumuka chize chijile mukukasumuna. Achishinganyekenu funge uze vanavangijikila ngwavo asakanga kupika pwevo lyachilolo. Aha jino vanamuhane chihela chachinene mukamenga. Echi chapwile hikwalumuka, nyi mweka? Kuli kaha chuma chimwe chalingishile chuma kana chisoloke. Hali Kuputuka 39:23 hamba ngwavo, “Yehova apwilenga lika naYosefwe, kaha alingishile vyuma vyosena alingilenga Yosefwe vifukile.”

10. Lumbununenu ovyo Yosefwe pamo kashinganyekele ngwenyi nafukila muvyuma vyosenako.

¹⁰ Achishinganyekenu cheka havyuma ashinganyekelenga Yosefwe. Hanyima yakumuvangijikila nakumuhaka mukamenga, kutala munashinganyeka ngwenu Yosefwe ashinganyekele ngwenyi nafukila muvyuma vyosena tahi? Vyuma muka Yosefwe apwile nakusaka vamulingile? Kutala apwile nakusaka vamwivwile uselewa kuli mukulwane wakamenga tahi? Pamo Yosefwe asakile vamusokole mukamenga. Alwezele namukwavo funge uze  vasokwele mukamenga akamuhanjikileko kuli Fwalo, mangana naikiye vamufumise mukamenga muze apwile nakumona ukalu chikuma. (Kupu. 40:14) Chipwe ngocho, uze lunga kahanjikile kuli Fwalo hahaze veneko. Ngocho Yosefwe atwamine mukamenga hamyaka yikwavo yivali. (Kupu. 40:23; 41:1, 14) Yehova atwalileho lika kulingisa Yosefwe afukile. Mujila muka?

11. Uno Yehova ahanyine Yosefwe uhashi muka wakulipwila, kaha echi chalingishile ngachilihi vyuma ajinyine Yehova vitesemo?

¹¹ Omu Yosefwe apwile mukamenga Yehova alingishile mwangana waEjipitu alote vilota vivali vyavikalu chikuma. Fwalo asakile kutachikiza mwalumbunukilile vilota kana. Omu mwangana atachikijile ngwenyi Yosefwe ali nauhashi wakulumbununa vilota, amusanyikile. Yehova akafwile Yosefwe alumbunune vilota kana, kaha nawa vyuma ahanjikile Yosefwe vyevwishile Fwalo kuwaha kumuchima. Omu Fwalo amwene ngwenyi Yehova apwile naYosefwe, ngocho amuhanyine wata wakutala kulya chamulifuchi lyaEjipitu lyosena. (Kupu. 41:38, 41-44) Kutwala muze, mulifuchi lyaEjipitu namuKanane muze mwapwile nakutwama tanga yaYosefwe, mwepukile zala yakalombolombo. Aha jino Yosefwe apwile namulimo waunene chikuma wakukinga tanga yenyi nakukinga chisaka chize mwakasemukila Meshiya.

12. Mujijila muka Yehova alingishilenga Yosefwe afukile?

¹² Achishinganyekenu havyuma vyasolokele mukukasumuna mukuyoya chaYosefwe. Uno iya alingishile Potefwale ahane chihela Yosefwe havangamba vosena? Uno iya alingishile mukulwane wakamenga evwile uselewa Yosefwe havafunge vosena? Uno iya alingishile Fwalo alote vize vilota vyavikalu vivali nakuhana Yosefwe uhashi wakuvilumbununa? Uno iya alingishile Yosefwe vamutongole kupwa mukulwane wakutala vyakulya mulifuchi lyaEjipitu lyosena? (Kupu. 45:5) Chakuzeneka kukakasana, Yehova ikiye alingishilenga vyuma vyosena alingilenga Yosefwe vifukile. Tunahase kukukulula ngwetu, Yehova alumwine chuma chachipi vajinyine kulinga vandumbu jaYosefwe, mangana atesemo mwaya kujina chenyi.

13. Uno Yehova eji kukumisanga kala ukalu tweji kumonanga tahi? Lumbununenu.

¹³ Vyuma muka tunalinangula kumujimbu waYosefwe? Mbimbiliya kayanangula ngwayo Yehova eji kufumisangako kala ukalu natumonako, chipwe kulingisa kala vyuma vyavipi tweji kumonanga vinehe vyuma vyamwazako. (Kwambu. 8:9; 9:11) Chipwe ngocho, twatachikiza ngwetu nge tuli nakumona ukalu, Yehova autachikiza, kaha nawa eji kwivwililanga kukawelele ketu. (Samu 34:15; 55:22; Isa. 59:1) Chuma chachinenenyi, Yehova eji kutukafwanga tumike mukala ukalu natumona. Mujila muka?

14. Uno Yehova eji kutukafwanga ngachilihi nge tuli nakumona ukalu?

¹⁴ Jila yimwe eji kutukafwilangamo Yehova shina kutuvendejeka nakutukolezeza, chuma chize avula kulinga halwola lwakutamo. (Koli. 2, 1:3, 4) Omu mukiko chapwile nakuli ndumbwetu Eziz, wamuTurkmenistan uze vatomenenene kumukasa hamyaka yivali mwomwo yavyuma afwelele. Ambile ngwenyi: “Halikumbi lyakungusopesa nachimene, ndumbwetu umwe angutalishile chisoneka chaIsaya 30:15 chakwamba ngwavo: ‘Namukwata ngolo kachi nge namuunda nakungufwelela.’ Eyi vesi yinangukafwenga nguunde muchima nakupendamina hali Yehova muvyuma vyosena. Kushinganyeka havesi kana chinangukafwenga halwola lwosena ngunapunga mukamenga.” Kutala muli nakwanuka lwola luze Yehova amikafwile mukuyoya chenu hakumivendejeka nakumikolezeza halwola lwakutamo tahi?

15-16. Vyuma muka munalinangula kumujimbu waTori?

¹⁵ Kakavulu nge ukalu unahichi lyehi hakiko tweji kumonanga jino ngwetu, Yehova natukafwe muukalu kana. Omu mukiko chapwile  nakuli ndumbwetu wapwevo Tori. Mwanenyi walunga Mason, avijile musongo wakasa hamyaka 6 swi nomu afwile. Tori ahombele chikuma. Ambile ngwenyi: “Ukalu kana wangutohwelelele chikuma hakupwa nguchisemi.” Ambile nawa ngwenyi: “Ngunafwelela navisemi veka navetavila ngwavo kumona mwanove ali nakuyanda cheji kukolanga chikuma kumuchima kuhambakana kuhita muukalu kana ove ivene.”

¹⁶ Numba tuhu Tori amwene ukalu waunene, oloze kutwala muze aputukile kushinganyeka hajijila amukafwilililemo Yehova. Ambile ngwenyi: “Omu ngweji kwanukanga lwola kana, ngweji kumonanga ngwami Yehova angukafwile halwola ngwapwile nakuvijisa mwanami. Chakutalilaho, nahalwola Mason avijilenga chikuma nakuhona kutachikiza vaneza nakumumenekela, vandumbwetu vatambukilenga jiola jivali naminyau kwiza kuchipatela nakumutala. Lwola lwosena twapwilenga navatu vaze vapwilenga kwakamwihi nayetu mangana vatukafwe halwola natusakiwa kutakafwa. Kaha nawa vatuhanyinenga vyuma vyakulikafwa navyo. Nahalwola ukalu watohwelelengako chikuma, katwakalikijilenga chuma numba chimweko.” Yehova ahanyine Tori vyuma vyasakiwile mangana atwaleho kumika, kaha mukiko alingile nakuli Mason nawa.—Talenu lipwata lyakwamba ngwavo “ Yehova Atuhanyine Vyuma Twasakiwile.”

17-18. Chuma muka nachitukafwa tumone ngwetu Yehova ali nakutukafwa muukalu nakumusakwilila? (Samu 40:5)

¹⁷ Tangenu Samu 40:5. Chuma afwila muka-kukanduka jipili shina kuheta helu lyapili. Chipwe ngocho, kweji kupwanga lwola lumwe eji kwimananga nakuputuka kulivwisa kuwaha kutala vyuma. Chochimwe nayenu nawa, wanenungako lwola lwakutwama hamavu nakushinganyeka omwo Yehova ali nakumikafwa mufukile numba tuhu muli nakumona ukalu. Hakutoka chalikumbi, lihulisenunga ngwenu: ‘Mujila muka nangukiswilamo Yehova lelo? Uno Yehova ali nakungukafwa ngachilihi ngumike numba tuhu ukalu wami kawakumineko?’ Fwilenunga kuwanako jila numba yimwe yize namikafwilamo Yehova mangana mufukile.

¹⁸ Tunatachikiza ngwetu munahase kulomba ngwenu ukalu wenu ukume. Kulinga ngocho kachapihileko. (Fwili. 4:6) Oloze twatela kumonanga nawa omu ali nakutukisula Yehova oholyapwa. Yehova atushika ngwenyi, mwatujikijisanga nakutukafwa tumike. Lwola lwosena musakwililenunga Yehova hakumikafwa. Kaha echi nachimilingisa mumone omwo Yehova ali nakumikafwa mufukile, ngana muze akafwile Yosefwe, numba tuhu muli nakumona ukalu wakulisezaseza.—Kupu. 41:51, 52.