ZIR TUR THUZIAK 3
Jehova Chuan Hlawhtling Tûrin A Ṭanpui Che
‘Lalpa chu Josefa hnênah a awm a; a thiltih apiang a hlawhtlintîr a.’—GEN. 39:2, 3.
HLA 30 Ka Pa, Ka Pathian leh Ka Ṭhian
THLIR LAWKNA a
1-2. (a) Engvângin nge harsatnate kan tawh hian mak kan tih loh? (b) He thuziakah hian eng nge kan sawiho vang?
JEHOVA mite kan nih angin, harsatnate kan tawh hian mak kan ti lo va. Bible-in a sawi angin, “hrehawm tam tak tuarin Pathian Ramah kan lût tûr a ni rêng a ni,” tih kan hria. (Tirh. 14:22) Kan harsatna ṭhenkhat chu ‘thihna te, lungngaihna te, ṭahna te, natnate awm tawh lohna’ Pathian khawvêl thara kan awm hma loh chuan chinfel vek a ni lo vang tih kan hre bawk.—Thup. 21:4.
2 Jehova chuan fiahnate lakah min vênghim lo. Mahse, tuar chhuak tûrin min ṭanpui a ni. Rom khuaa awm Kristiante hnêna tirhkoh Paula thusawi hi lo chhinchhiah ila. A hmasain amah leh a unaute’n an tawh fiahnate chu a sawi a. Tichuan, heti hian a ziak a ni: “Min hmangaihtu avâng hian, ropui taka ngamtu kan ni,” tiin. (Rom 8:35-37) Chumi awmzia chu harsatna i tawh lai mêk pawhin Jehova’n a hlawhtlintîr thei che tihna a ni. Jehova’n Josefa hlawhtling tûra a ṭanpui dân leh A ṭanpui theih dân che i lo enho vang u.
THIL A INTHLAK DANGLAM THUT HIAN
3. Josefa nunah beisei loh tak eng inthlâk danglamna nge thleng?
3 Thlahtu Jakoba chuan a fapa Josefa chu a hmangaih hle tih langsâr takin a tilang a. (Gen. 37:3, 4) Chuvângin, a fapa upa lamte chuan an nau chu an thîk a ni. Hun remchâng an han hmuh chuan Midian-ho sumdâwngte hnênah Josefa chu an hralh a. Chûng sumdâwngte chuan mêl za tam taka hla Aigupta ramah Josefa chu an hruai a, chutah chuan vawi khat dang hralh leh a ni a. Hemi ṭumah hi chuan Pharaoa vêngtu zînga hotu ber Potiphara hnênah a ni. A pa fapa hmangaih tak aṭangin Aigupta sal tlâwm takah a dinhmun a inthlâk a. Josefa dinhmun chu a va inthlâk rang tak êm!—Gen. 39:1.
4. Engtin nge Josefa tawh ang harsatna kan tawh ve mai theih?
4 Bible chuan “mi zawng zawng chungah thil ṭha lo a thleng” tih a sawi a. (Thur. 9:11, Holy Bible—Easy-to-Read Version) A châng chuan “mihring tuar theih” harsatna kan hmachhawn a, chu chu mihring zawng zawngin an tawh fiahnate a ni. (1 Kor. 10:13) Chu bâkah, Isua zirtîrte kan nih avâng ringawt pawhin kan tuar thei bawk. Entîr nân, kan rinna avângin nuihsawhna te, dodâlna te, leh tihduhdahna hialte pawh kan tâwk thei a ni. (2 Tim. 3:12) Eng fiahna pawh tâwk la, Jehova’n a hlawhtlintîr thei che. Engtin nge Josefa chungah chutiang chuan a tih?
Jehova’n Josefa chu Aigupta rama Potiphara hnêna sala hralh a nih laiin hlawhtling tûrin a ṭanpui (Paragraph 5-na en rawh)
5. Josefa hlawhtlinna chungchângah Potiphara’n eng thu tâwp nge a siam? (Genesis 39:2-6)
5 Genesis 39:2-6 chhiar rawh. Potiphara chuan Josefa chu ṭhalai fing tak leh taima tak a ni tih a hria a. Ani chuan a chhan pawh a hre bawk. Potiphara chuan “a thiltih apiang LALPAN a kutah a hlawhtlintîr tih” a hmu a ni. b A hnuah Josefa chu a chhûngte chunga hotuah a siam a. A neih zawng zawng Josefa kutah a dah bawk. Chu chuan eng nge a rah chhuah? Potiphara chu a lo hausa ta hle a ni.
6. Josefa’n a dinhmun chu engtin nge a ngaih mai theih?
6 Dinhmun chu Josefa thlîrna aṭangin thlîr han tum chhin teh. A thil duh ber chu eng nge ni ang? Potiphara hriat hlawh leh a hnên aṭanga lâwmman dawn a ni ang em? Josefa chuan a pa hnêna a kîr leh theih nâna zalên chu a duh zâwk a rinawm. A chhan chu Potiphara inah chanvo hlu takte a nei chung pawhin, ani chu milem betu a pu sal a la ni reng si a. Jehova’n Potiphara chu Josefa a chhuah zalêntîr lo. Chu bâkah, Josefa dinhmun chu a hma aiin a chhe lehzual dâwn chauh a ni.
DINHMUN A CHHE LEHZUAL A NIH CHUAN
7. Eng kawngin nge Josefa dinhmun chu a chhiat zual sauh? (Genesis 39:14, 15)
7 Genesis bung 39-in a sawi angin, Potiphara nupui chuan Josefa chu a duh hle a, vawi tam tak amah mutpui tûrin a thlêm a. Mahse, a thlêm apiangin Josefa chuan a hnâwl a ni. A tâwpah, Josefa chunga a thin a rim êm avângin, amah pâwngsual tumah a puh ta a ni. (Genesis 39:14, 15 chhiar rawh.) Potiphara’n chu chu a lo hriatin Josefa chu tân inah a khung a, chutah chuan kum eng emaw tichhûng a awm a ni. (Gen. 39:19, 20) A tânna hmun chu eng ang nge ni? Josefa’n “rip” tih awmze nei Hebrai thu mal a hman avângin, a tânna hmun chu hmun thim tak a ni ang tih leh beisei bo takin a awm ang tih a târ lang a ni. (Gen. 40:15) Chu bâkah, Bible chuan Josefa keah kawl an buntîr a, a nghâwng chu thîr khaidiatin an hrêng tih a târ lang bawk. (Sâm 105:17, 18) Josefa dinhmun chu a chhe zual sauh va. Sal rin hlawh tak aṭangin mi tâng hnuaihnung takah a inthlâk a ni.
8. Kan harsatna tawh chu a zual a nih pawhin, eng nge kan chian theih?
8 Ṭhahnemngai taka i ṭawngṭai chung pawhin i dinhmun chuan chhiat lam a pan tawh ngai em? Chutiang thil chu a thleng thei a ni. Pathian Jehova chuan Setana kuta awm he khawvêla harsatnate lakah min vênghim lo va. (1 Joh. 5:19) Mahse, hei hi i chiang thei a ni: Jehova chuan i thil paltlang mêk chu a hre vek a, a ngaihsak bawk che tih hi. (Mt. 10:29-31; 1 Pet. 5:6, 7) Chu bâkah, heti hian a tiam che a ni: “Engtikah mah ka thlahthlam tawp lo vang chia, kal pawh ka kalsan tawp lo vang che,” tiin. (Heb. 13:5) Ani chuan i dinhmun chu beisei bo anga a lan hunah pawh tuar chhuak tûrin a ṭanpui thei che. Chutiang chu Josefa chunga a thlen dân i lo en ang u.
Josefa chu tân ina a tân lai leh tâng zawng zawngte hotua ruat a nih lai pawhin Jehova’n a awmpui reng (Paragraph 9-na en rawh)
9. Josefa tân ina a awm laiin, a hnênah Jehova a awm tih engin nge târ lang? (Genesis 39:21-23)
9 Genesis 39:21-23 chhiar rawh. Tân ina hrehawm taka a awm chhûng pawhin, Jehova’n Josefa chu a hlawhtlintîr a ni. Engtin nge? Josefa’n Potiphara rin leh zah a hlawh ang bawkin, chuta tâng vêngtu rin leh zah chu a hlawh bawk a ni. A hnu rei vak lovah, tâng vêngtu chuan Josefa chu mi tâng dangte hotuah a siam a. A nihna takah chuan, Bible chuan “tân in vêngtu chuan a kuta thil awm rêng rêng chu a en duh ta lova,” tiin a sawi. Tûnah chuan Josefa’n a ngaihtuahna luah khahtîr tûr hnathawh tûr ṭha tak a nei ta. Chu chu beisei loh inthlâk danglamna a va ni tak êm! Engtin nge hotu pakhat nupui pâwngsual tuma puh mi tâng hnênah chutiang mawhphurhna chu pêk a nih theih? A chhan ni thei pakhat chiah a awm. Genesis 39:23-in a sawi angin, “LALPA chu Josefa hnênah a awm a, a thiltih apiang chu LALPA chuan a hlawhtlintîr ṭhin” vâng a ni.
10. Josefa’n kawng engkima hlawhtling nia a inngaih loh mai theih chhan hrilhfiah rawh.
10 Dinhmun chu Josefa thlîrna aṭangin thlîr han tum leh chhin teh. Dik lo taka puh leh tân ina khung a nih hnuah, ani chuan kawng engkima hlawhtling angin a inngaih i ring em? Josefa thil duh ber chu eng nge ni ang? Tân in vêngtu duhsakna dawn a ni ang em? Josefa chuan chhuah zalên nih chu a duh zâwk ngei ang. Ani chuan chhuah mai tawh tûr mi tâng dang hnênah, chu tân in hrehawm tak aṭanga amah chhuah tûra Pharaoa biaksak tûrin a ngên hial a ni. (Gen. 40:14) Mahse, chu pa chuan Pharaoa chu a biaksak nghâl lo. Chuvângin, Josefa chu kum hnih dang a tâng chhunzawm leh a. (Gen. 40:23; 41:1, 14) Amaherawhchu, Jehova’n a hlawhtlintîr chhunzawm zêl tho a ni. Engtin nge?
11. Josefa hnênah Jehova’n eng theihna danglam bîk tak nge a pêk a, chu chuan Jehova thiltum hlen chhuahnaah engtin nge a ṭanpui?
11 Josefa tân ina a tân laiin, Jehova’n Aigupta ram lal chu mumang mak tak pahnih a mantîr a. Pharaoa chuan chûng a mumangte awmzia chu hriat a châk hle a ni. Josefa’n mumang hrilhfiah theihna a nei tih lalin a han hriat chuan a kohtîr a. Jehova ṭanpuinain Josefa’n mumang chu a hrilhfiah a, a thurâwn ṭha tak pêkte chuan Pharaoa rilru a khawih hle. Jehova’n Josefa chu a awmpui tih a hmuh avângin Pharaoa’n ani chu Aigupta ram zawng zawnga ei leh in hotu berah a ruat ta a ni. (Gen. 41:38, 41-44) A hnuah, ṭâm nasa tak a tla a. Chu chuan Aigupta ram chauh ni lo, Josefa chhûngte chênna Kanaan ram pawh a nghawng a ni. Tûnah, Josefa chu a chhûngte chhanhim thei dinhmunah a ding ta a, chutiang chuan Messia lo lanna tûr thlah kal zêl chu vênhimin a awm thei a ni.
12. Eng kawngtein nge Jehova’n Josefa a hlawhtlintîr?
12 Josefa nuna thil danglam tak thlengte hi han ngaihtuah teh. Sal ve mai ngaihven tûra Potiphara chêttîrtu chu tu nge ni? Mi tâng hnuaihnung tak duhsak tûra tâng vêngtu chêttîrtu chu tu nge ni? Mumang mak tak Pharaoa neihtîrtu leh Josefa hnêna hrilhfiah theihna petu chu tu nge ni? Aigupta rama ei leh in hotu ber atâna Josefa ruat tûra Pharaoa chêttîrtu chu tu nge ni? (Gen. 45:5) Kawng engkima Josefa hlawhtlintîrtu chu Jehova a ni tih a chiang hle. A tâwpah, Jehova’n Josefa unaute ruahmanna râwng tak chu A duh zâwng hlen chhuahnaah a chantîr a ni.
JEHOVA’N A HLAWHTLINTIR DAN CHE
13. Jehova chu kan dinhmun tawh apiangah a inrawlh em? Hrilhfiah rawh.
13 Josefa nuna thilthleng aṭangin eng nge kan zir? Kan dinhmun hmachhawn zawng zawngah Jehova a inrawlh em? Thil ṭha lo, thleng zawng zawng chu chhan ṭha tak avânga thleng a nih theih nân, kan nuna thilthleng zawng zawng chu a thunun em? Chu thlîr dân chu Bible-in a thlâwp lo. (Thur. 8:9; 9:11) Amaherawhchu, hei hi kan hria a ni: Harsatna kan hmachhawn hian Jehova’n chu chu a hria a, ṭanpui dîla kan au thâwm chu a ngaithla a ni tih hi. (Sâm 34:15; 55:22; Is. 59:1) Chu bâkah, Jehova chuan harsatnate hlawhtling taka tuar chhuak tûrin min ṭanpui thei a ni. Engtin nge?
14. Engtin nge hun harsaah Jehova’n min ṭanpui?
14 Jehova min ṭanpui dân kawng khat chu a hun taka thlamuanna leh fuihna min pe ṭhîn hi a ni a. (2 Kor. 1:3, 4) Chu chu Turkmenistan rama awm, a rinna avânga kum hnih tân ina tâng tûra a chungthu rêl, unau Eziz-a chungah pawh a thleng a ni. Ani chuan heti hian a sawi, “Ka thu buai ngaihtuah a nih tûk chuan unaupa pakhatin Isaia 30:15: ‘Muang taka awm leh Pathian rinchhana awm chu in chakna a ni ang,’ tih thu hi min hmuh a. He châng hian muang taka awm ṭhîn tûr leh engkima Jehova rinchhan tûrin min ṭanpui a. Chumi chhût ngunna chuan tân ina ka tân chhûng zawngin min ṭanpui tak zet a ni,” tiin. I nuna i mamawh lai bera thlamuanna leh fuihna pe a, Jehova’n a ṭanpui dân che chu i ngaihtuah thei em?
15-16. Tori-i thiltawn aṭangin eng nge i zir?
15 Kan harsatna tawhte kan paltlang hnuah chauh Jehova’n min ṭanpui dân kan ngaihtuah lêt ṭhîn a. Unaunu Tori-i chuan chumi dikzia chu a tawng a ni. A fapa Mason-a chuan a boral thlengin kum ruk chhûng cancer natna a tuar a. Tori-i’n chumi a tuar hle pawh chu a hriatthiamawm hle. Ani chuan, “Nu ka nih angin hei aia harsa zâwk hi a awm theih ka ring lo,” tiin a sawi a. “Mahni ngeiin hrehawm tawrh aiin fate hrehawm tuar hmuh chu a hrehawm zâwk tih nu leh pa dangte pawhin an pawm ngei ang tih ka chiang,” tiin a sawi belh bawk.
16 Chu a fiahna tawh chu lungchhiatthlâk hle mah se, a hnuah Tori-i chuan tuar chhuak tûra Jehova’n a ṭanpui dân kawngte a ngaihtuah a ni. Ani chuan, “Khâng hunte kha ka ngaihtuah hian ka fapa dam loh chhûng zawnga Jehova min ṭanpui dân ka hmu thei a. Entîr nân, Mason-a’n amah kantute hmu peih lo khawpa a dam loh lai pawhin, unaute chu damdawi in rawn panin dârkâr hnih lai motor-in an rawn kal a ni. Min ṭanpui inpeih leh inhuam tak tuemaw kan bulah an awm reng ṭhîn a. Chu bâkah, unaute chuan kan tisa lam mamawhte pawh min pe bawk. Dinhmun harsa berah pawh tlâkchham kan nei ngai lo,” tiin a sawi. Jehova chuan Tori-i leh a fapa Mason-a te chu tuar chhuak tûra an mamawhte a pe a ni.—“ Jehova’n Kan Mamawh Tak Min Pe,” tih bâwm chu en rawh.
MALSAWMNA I DAWNTE CHU CHHIAR RAWH
17-18. Harsatna tawh chhûnga Jehova min ṭanpui dân hre tûr leh ngaihlu tûrin engin nge min ṭanpui ang? (Sâm 40:5)
17 Sâm 40:5 chhiar rawh. Tlânglâwn mi thiltum chu a chhîp thlen a ni a. Amaherawhchu, a kawngah chuan châwl a, a chheh vêl a thlîr theihna tûr hmun tam tak a awm a ni. Chutiang chuan, hun harsa i tawh lai pawhin Jehova’n a hlawhtlintîr dân che ngaihtuah nân hun hmang ṭhîn ang che. Zan tin heti hian inzâwt rawh: ‘Vawiinah Jehova malsâwmna eng kawngtein nge ka dawn? Harsatnate chu la awm reng mah se, tuar chhuak tûrin engtin nge Jehova’n min ṭanpui?’ tiin. Hlawhtling tûra Jehova malsâwmna i dawn pakhat tal hriat chhuah tum ang che.
18 I harsatnate titâwp tûrin i ṭawngṭai mai thei a. Chu chu hriatthiamawm tak leh thil inâwm tak a ni. (Phil. 4:6) Chutih rualin, tûna kan malsâwmna dawnte pawh kan hre bawk tûr a ni. Jehova chuan min tihchak leh tuar chhuak tûra min ṭanpui a tiam a ni. Jehova’n a ṭanpui che avângin lâwm fo vang che. Chutiang chuan, Josefa chunga a tih ang bawkin, harsatna tâwk chung pawha hlawhtling tûra Jehova’n a ṭanpui dân che i hmu ang.—Gen. 41:51, 52.
HLA 32 Jehova Lamah Ṭang R’u!
a Fiahna khirh tak kan tawh hian “hlawhtling” angin kan inthlîr lo mai thei a. Chu thu mal chu fiahna kan paltlang hnuah chauh hman theih niin kan ngai mai thei. Amaherawhchu, Josefa nuna thilthlengte chuan thil pawimawh tak min zirtîr a ni—Jehova’n fiahna kan tawh lai pawhin hlawhtling tûrin min ṭanpui thei tih hi. He thuziak hian chutiang a nih theih dân min hrilhfiah ang.
b Bible chuan Josefa sal a nih laia hêng inthlâk thlengna tîr lam hi tlêm tê chauh a târ lang a; mahse, hêng inthlâk thlengnate hi kum rei tak chhûnga thilthleng a ni thei.
