Ohudhera 3
Yehova anonikavihera malabo amatene
‘Yehova aali ni Juze . . . , teto dhithu dhaye dhatedhene dhomweddela pama.’ — GÉN. 39:2, 3.
JHIBO 30 Mulugu aaga, mukwaga ni babi
DHITHU NNAAHUDHERIHU a
1-2. a) Mwahaya bwaddi nihitikinaga naafwanyiwaga makathamiho? b) Ohudhera wula nnaasuze ddi?
IYO ADHAARI a Yehova kannatikina naafwanyiwaga makathamiho. Ninga Bibiliya anawogiye nihinona wihina ‘negi nivolowe Mumweneni mwa Mulugu nnere ofwanyiwa mahoso manlubale.’ (At. 14:22) Teto nihinona wihina makathamiho mamodha enaamale mwilaboni exa Mulugu ‘avuda mitori dhatedhene mwintonimwiwa, amariha okwa, kutho ni widdela.’ — Apo. 21:4.
2 Yehova kananibarele wihina nahifwanyiwe makathamiho mwigumini mwehu. Mbwenye anonikavihera ovilelana. Kaasugweni madhu murumiwi Pawulo aalebenliye makiristawu ooRoma. Oliye ahileba wodhela makathamiho manlubale yanfwanya ni yafwanya makiristawu owinjhiva. Nuwindo oliye owoga egihina: ‘Ni makathamiho aatene yala, nnoogonjhiha, wodhela ole anidhivele.’ (Rom. 8:35-37) Eyo enoniha wihina Yehova podi wukavihera wafwanyiwaga makathamiho. Kabeni noone makalelo Yehova aamukaviheriye Juze ni makalelo anukaviheriye peeno.
DHITHUDHA DHASADDUWA MORURUMUSA
3. Nimakalelo baani egumi ya Juze esaddunwiwa morurumusa?
3 Jako ootonyihedha wihina omudhivela vanlubale mwanaye Juze. (Gén. 37:3, 4) Makalelo ayo oomudhivela mwanaye yahatotela ntxiga addibile. Vano labo dhaala egaali yekiwa omuguliha Juze, naakudda aMidiyanita. Aliwa omuthukulela elabo emodha, vano aliwa omugulihedha Potifare wihina akale mudhaari aye — aali namasogolela aanamasugwera a Farawo. Nimakalelo yayo egumi ya Juze osadduwa morulumusa, malabo a mundduli oliye aali mwaana oodhiveliwa a babe, vano aali mudhaari Wijipitu! — Gén. 39:1.
4. Makathamiho baani yanifwanye mwigumini mwehu?
4 Bibiliya anihina, ‘mudhidhi rulumusa, kunampaganya muthu.’ (Ecl. 9:11) Malabo mamodha nnofwanyiwa makathamiho ‘enaafwanyesa athu aatene.’ (1 Cor. 10:13) Malabo mamodha nnofwanyiwa makathamiho mwaha ororomeleya wehu. Motajhiha, athu amodha enoniharahara ni enoniteya mwaha wa dhithu nnarumedhihu. (2 Tim. 3:12) Mbwenye naarive ofwanyiwaga makathamiho obe oharahariwaga Yehova anere wukavihera. Yehova aamukavihere aavi Juze?
Yehova ahimukavihera Juze dhaye omweddela pama naarive agaali elabo Yowijipitu aagulihiwiyewo ninga mudhaari (Osugwe ddima 5)
5. Ethu baani Potifare ubuweliye nuumona Juze dhaye dhimweddelaga pama? (Génesis 39:2-6)
5 Omwileri Génesis 39:2-6. Potifare ahoona wi Juze aali muzombwe athotho ni ooviheyana mabasa. Ni ahinona ethu yamuthukulela okala ndo. Potifare owoona wihina ‘Yehova ooreeliha dhatedhene Juze eeriyena.’ b Nuuvira mudhidhi Potifare omuthoma Juze wihina akale namasogolela a nyumbaye. Potifare ohiya dhatedhene mmadani mwa Juze. Mwaha wa yeyo Juze wawakela mareeliho owinjhiva.
6. Monelo wawo Juze aali aavi vaari va makathamiho yanfwanya?
6 Karajhiha wipweha vamburoni va Juze. Ethu baani unleliye mudhidhi yole? Unlela wooniwa ni othithimihiwa ni Potifare? Podi wera unlela atapuliwe mudhaarini ni ahogolowele elabo yaababe. Mwaha naarive agaali namasogolela ni aroromeliwaga, oliye aali mudhaari a mulobwana ahimuroromela Yehova. Mbwenye Yehova kamwerihe Potifare omutapula Juze mudhaarini. Teto dhithudha dhere othabwa mwigumini mwa Juze.
MAKATHAMIHO YAATHABWAGA
7. Nimakalelo baani makathamiho a Juze yaathabwiliwa? (Génesis 39:14, 15)
7 Génesis kapitulu 39 anawoga wihina mwadha Potifare oomukalela munigwa Juze. Mbwenye mwaadha Potifare awoga ni Juze wihina egone vamodha, oliye eera okoodda. Mwaha wa yeyo mwaha Potifare otakaleliwa ofiyedha omwinkedha Juze wihina afuna amugonihe. (Omwileri Génesis 39:14, 15.) Potifare nuwiwa wodhela muselu yoyo onvokedha Juze mukambura muwari mwa yaka biili. (Gén. 39:19, 20) Mukamburamwa mwaali aavi? Madhu owi “kambura” aalabihedhe Juze ni ebarayiku enatapulela “muliddi wooddiha” obe “kambura ya vati,” eyo enatapulela wi wahithabwa okalawo yiihi ni kuwaali makalelo ookumamo. (Gén. 40:15; nota.) Ohiya eyenove, Bibiliya anowoga wihina manyalo a Juze yahimagiwa ni kurenti ni omuwariha mujhila mukohi. (Sal. 105:17, 18) Makathamiho a Juze yanna othabwave. Ohiya okala mudhaari oororomeleya vano okala munyakambura.
8. Podive makathamiho ethabwagave, ebaribari baani onahoweliwe okanna?
8 Onowabihaga ofwanyiwa makathamiho mwigumini mwawo vano we olobela vanlubale mbwenye dhegodha othabwagave? Eyo podi opadduwa. mwaha elabo enathongiwa ni Saddana teto Yehova kananibarela mwa makathamiho aamatene. (1 João 5:19) Naarive dhigaali ndo okanne ebaribari wihina Yehova ohunona dhatedhene dhinupadduwela ni onowuthuwathuwela. (Mat. 10:29-31; 1 Ped. 5:6, 7) Ohiya eyenove Yehova ohupaganya wihina: ‘Kagidha guhiya ni kagidha gunyanyala.’ (Heb. 13:5) Naarive ogaali vaari va makathamiho Yehova anere wukavihera. Kabeni noone makalelo Yehova amukaviheriye Juze.
Yehova ahimukavihera Juze mudhidhi agaali mukambura ni othomeliwa wasugwera anyakambura aatene (Osugwe ddima 9)
9. Ethu baani enoniha wihina Yehova oomuholela Juze agaali mukambura? (Génesis 39:21-23)
9 Omwileri Génesis 39:21-23. Yehova oomureeliha Juze mwa dhatedhene naarive agaali mukambura. Nimakalelo baani? Namaholela kambura oomuroromela vanlubale Juze ninga Potifare amuroromeliye. Bumwahaya nuuvira mwanamudhidhi Juze ovahiwa mutholo wowasugwera anyakambura. Teto “namasogolela kambura kathuwathuwela dhithu Juze aholeliye.” Vano Juze ahikanna ethu yowera wihina ahithabwege wubuwela dhithu dhampadduwela — mabasa apama. Masadduwo ala yereye mohujhehedha! Kuhukalaga nikavihero na Yehova kadhenyeye munyakambura inkedhiwe omugoniha mwaadha Potifare ovahiwa mutholo wa thima ninga yola. Bumwahaya Génesis 39:23 onihina ‘Yehova ali ni Juze, vano Yehova oweriha wi mabasa aatene apariye emweddelege pama.’
10. Mwahaya bwaddi nigawoga wi Juze podi wera oona wi dhaye kadhamweddela pama?
10 Kipwehe mburo wa Juze. Nuumala winkedhiwa ni ovokedhiwa mukambura onoonamo wi Juze owonelamo wi dhaye dhanna omweddela pama? Ethu baani unlela Juze? Waali wooniwa ni othithimihiwa nnamasogolela kambura? Podi wera naari. Afuniye sowihina athu enone wihina kerilena ethu yabure ni akumihiwe mukambura. Ahifiyedha owoga ni munyakambura dhaala ahanle neena nuukumihiwa wihina amulobe Farawo wi amukumihe mukambura. (Gén. 40:14) Mbwenye munyakambura ole kawogile ni Farawo. Mwaha wa yeyo Juze okala yaka biili mukambura. (Gén. 40:23; 41:1, 14) Naarive dhigaali ndo Yehova odidelave omusamalela Juze. Nimakalelo baani?
11. Yehova amukavihere aavi Juze, ki nikavihero nno nakwanihedhe aavi efunelo ya Yehova?
11 Juze agaali mukambura Yehova omurohiha mwene oWijipitu. Farawo othuwathuwela onona dhotapulela dha dhoroha ndhe. Vano Farawo nunona wihina Juze owanda otapulela dhoroha omwithaniha. Nnikavihero na Yehova Juze wanda otapulela dhoroha dha Farawo teto wanda omudahinya murima ni dholaga anvahiliye. Farawo wonelamo wihina Yehova aanna omureeliha Juze, bumwahaya Juze othomiwa wihina asogolelege dhoojha dhatedhene dhoWijipitu. (Gén. 41:38, 41-44) Nuuvira mudhidhi okumelela dala enlubale elabo Yowijipitu ni elabo yoKanaa, elabo wakala makolo aye. Mwaha wa yeyo Juze eere wanda okavihera murala waye ni obarela nihimo waadhele Mesiya.
12. Yehova amukavihere aavi Juze dhaye omweddela pama?
12 Kubuwela dhithu dhipadduwile mwigumini mwa Juze. Eerihile wihina Potifare asugwege dhikalelo dhapama aanna Juze baani? Eerihile wihina namasogolela kambura amweeddihe Juze nuupama baani? Aamurohihe Farawo ni aamukavihere Juze otapulela dhoroha nde baani? Amuthukulele Farawo omuthoma Juze ninga namasogolela dhoojha elabo Yowijipitu baani? (Gén. 45:5) Mohanganyedha di Yehova amukavihere Juze dhaye omweddela pama. Naarive addibile egamonihe goyi Juze, Yehova osaddula dhithudha wihina aakwanelihe efunelo yaye.
YEHOVA ANUKAVIHERE AAVI DHAWO WUWEDDELA PAMA?
13. Yehova onosugwera dhatedhene dhinapadduwa mwigumini mwehu? Kawogamo.
13 Yopadduwa ya Juze enanihudhiha ddi? Yehova anonibarela mwa dhatedhene dhinapadduwa mwigumini mwehu? Yehova onoweddiha dhego dhatedhene dhinapadduwa mwigumini mwehu wihina osogolo dhereye dhego dhapama? Naari, kahi dhendho Bibiliya anahudhihiye. (Ecl. 8:9; 9:11) Mbwenye ebaribariya sowihina Yehova ohunona dhatedhene dhinapadduwa mwigumini mwehu ni ononivuruwana nahowelaga nikavihero. (Sal. 34:15; 55:22; Isa. 59:1) Ohiya eyo Yehova anonikavihera ovilela. Ananikavihera aavi?
14. Yehova ananikavihera aavi naafwanyiwaga makathamiho?
14 Yehova ononikavihera wodhela onlibiha ni onitodola, malabo owinjhiva ndho dhinapadduwa mudhidhi nahowelaga. (2 Cor. 1:3, 4) Siyeyo epadduwe ni ddibila Eziz ooTurkumenistawu. Mwaha wa nroromelo naaye oliye othomeliwa okala mukambura muwari mwa yaka biili. Eziz ohuwoga egihina: “Labo gadhonwimi otorihiwa ddibila dhaala ogoniha yolebela ya Isaías 30:15 enihina: ‘Kopolo dhenyu dhinadha mwaha okala oopwaseya ni oororomela.’ Yolebela ela ehigikavihera okala oopwaseyene ni omuroromela Yehova. Teto opendda yolebela ela ehigikavihera okala oopwaseyene mudhidhi gaalimi mukambura.” Onowubuwela labo wahoweliwe nikavihero vano Yehova wulibiha ni wukavihera mudhidhi yole wahoweliwe?
15-16. Ohudhere ddi ni yopadduwa ya Tori?
15 Malabo owinjhiva nnona nikavihero na Yehova makathamihoya yavira. Enopadduwaga emodhave ni murogola dhaala anithaniwa Tori. Ahikanna mwanaye ithaniwa Mason, awannena oredda muwari mwa yaka 6. Mohanganyedha, Tori ahithabwa wukuuwa ofiyedha oliye owoga egi: “ginona wi kawo ethu enathabwa omuukula mayi opitha omuyelela mwaana.” Oliye onowogave egihina: “Gihikanna ebaribari wihina ababi enorumedha wihina valapena iyo naapogoya obulela ohiya anihu.”
16 Makathamiho yanfwannye Tori yahithabwa omuukula, vano nuuvira mudhidhi oliye wambela opendda makalelo Yehova amukaviheriye wavilelana makathamiho ala. Oliye onosoriha egihina: “Gasugwa mundduli ginowoona makalelo nlada na Yehova nigikaviheriwa wawanana makathamiho yanfwanya mwanaga. Motajhiha, naarive Mason agathambwe ni ahirumedhiwaga waredheliwa addibila yowedda olenddo wa mawora menddi ni karo wihina edhowe ospitale ni egikavihere ni ethu-siithu gahowelimi. Teto addibila yoonikavihera epaddi yomwilini. Naarive dhithudha dhigathambwe nokanna ndhe nahowelihu.” Yehova ahimukavihera Tori ni Mason ni ndhe yahoweliwa wihina evilele. — Osugwe kwaduru “ Yehova ohunivaha dhatedhene nahowelihu.”
KUDDUWALE DHITHU YEHOVA UWERELIYE
17-18. Enaanikavihere ddi woona makalelo Yehova ananikaviheriye ni otamalela dhithu dhatedhene Yehova ananereliye? (Salmos 40:5)
17 Omwileri Salmos 40:5. Efunelo ya namagwelela mwango fufiya onamutopi. Mbwenye oliye kanathamagela ofiya, oliye onowimela osugwaga dhithu dhapama anooniye. Nimakalelo mamodhave osayele mudhidhi wihina wubuwele makalelo Yehova anukaviheriye dhawo wuweddela pama, naarive ofwanyiwaga makathamiho. Omakuthulo wa kadda labo wikohege: ‘Yehova agikavihere aavi? Ebaribari wihina makathamihoya kimanle, mbwenye Yehova ananikavihera ni makalelo baani?’ Osayele woona makalelo Yehova anukaviheriye.
18 Podi wera onna olobela wihina makathamiho awo emale. Kahiyo yabure, teto siyeyo Bibiliya ananikongomedhiye werana. (Fil. 4:6) Mbwenye sapama wubuwela makalelo Yehova ananirelihiye ovanene. Mwaha Yehova anonipaganya onlibiha ni onikavihera wihina nidhowegeve nivilelaga. Bumwahaya otamalelege mwaha dhithu Yehova anuwereliye. Ndo onere wanda woona makalelo Yehova anukaviheriye mudhidhi wafwanyiwaga makathamiho ninga amukaviheriye Juze. — Gén. 41:51, 52.
JHIBO 32 Osakule epaddi ya Yehova!
a Malabo mamodha naafwanyiwaga makathamiho “kannanda woona” nikavihero na Yehova. Nnanda woona makathamihoya yavira. Mbwenye dhithu dhipadduwe ni Juze dhinowoniha wihina naarive nigaali vaari va makathamiho Yehova ononikavihera. Ohudhera wula nnere woona makalelo Yehova ananikaviheriye naafwanyiwaga makathamiho.
b Bibiliya kanathabwa owoga dhithu dhaapadduwe ni Juze mudhidhi agaali mudhaari, mbwenye podi wera dhithu ndha dhereye mwari mwa yaka dhowinjhiva.
