1-2. (a) Tae-i ǃaroma da buru tama hâ ǃgomsiga da ga hōǃâ o? (b) Tae-e da nē ǁkhāǁkhāǃâs ǃnâ nî ǃhoaǃgao?

 JEHOVAB di khoen ase da ge buru tama hâ ǃgomsiga da ga hōǃâ o. ǂAn da ge a Elobmîs ra mîsa, ‘ǂgui ǃgomgu ǃnâts ǃkharu hâs khaoǃgâ ǀguits Elob Gaosib ǃnâ nî ǂgâ ǃkhaisa.’ (ǃNǃkh. 14:22) ǂAns tsîna da ge ī, ǀnî ǃgomsin hîna da ūhân Elob di ǀasa ǃhūbaib ǃnâ ǀgui a ǃgâiǃgâihe ǁkhāsa. ǁNāpa ī ge ‘ǁō-e ǃaruǀî hâ tide, ǃoa-i tamas ka io ā-i tamas ka io tsû-i xare-i ge hâ tide.’—J.ǂHa. 21:4.

² Jehovab ge sida di ǃgomsina xu sâu da tama hâ. Xaweb ge ra hui da, î da mâǀgai ǁkhā. ǃGaoǃgâ re apostel Paulub ge tae-e ǃgâsan hîna ge Romes ǃnâ gere hâna a mîbasa. ǂGuroseb ge ǁîb tsî ǁîb ǃgâsagu ge hōǃâ ǃgomsigu xa ge xoa. Tsîb ge ǁnāpaxū ge xoa: ‘Xawe da ge nēn hoan ǃnâ, dansa ǁnāb sada ǀnam hâb ǃnâ-u ūhâ.’ (Rom. 8:35-37) ǁNās ge ra ǂâibasen Jehovab ge a hui du ǁkhā. ǃGomsigu ǃnâ du ra mâǀgai hîna. Hā re î da kō, Jehovab ge mati Josefa a hui ǀgauba îb ǃgâiǃgâ. Tsîb mati sado a hui ǁkhāsa.

3. Mâ ǀkharaǀkharasensa Josefi di ûib ǃnâ ǃkhaese ge ī?

³ Jakobi ge ge ǁgau, ǁîb ǀgôab Josefab kaise a ǀnam ǃkhaisa. (Gen. 37:3, 4) Tsî ǁnās xa ǃaromahe hâse gu ge Jakob di nau ǀgôaga ǁîba ge suri tsoatsoa. ǃĒsa gu ge hō o, o gu ge Josefa Mîdiaǁîn di ǁamaxū-aogu ai ge ǁamaxū. ǁNā khoegu ge Josefa ǂgui kilometerga Egipteba ǃoa ge ī-ū. ǁNāpap ge ǁkhawa ge ǁamaxūhe.  Xawe nēsi Potifara ǃoa, Faraob di ǃûi-aob danakhoeba. Josefi di ûib ge ǃkhaese ge dawa. ǁÎb ǁgûb di ǀnamǀnamsa ǀgôaba xu, Egipteb ǃnâ ǃgāb ase.—Gen. 39:1.

4. Mati da Josefi ge hōǃâ khami ī ǃgomsina a hōǃâ ǁkhā?

⁴ Elobmîs ge ra mî, “ǁgai xūn ge hoa khoen ǀkha ra ī.” (Aoǁn. 9:11, Holy Bible—Easy-to-Read Version) ǀNî ǁaegu ai da ge ǃgomsiba ra hōǃâ, hîna “khoesib” xa ra hōǃâ-eba. (1Kor. 10:13) Tamas ka io da ge ǃgomsiba a hōǃâ ǁkhā Jesub di ǁkhāǁkhāsabe da a amaga. Aiǁgause da ge, mîǁgaiǁgaihe, ǃgôaǃgonhe tamas ka io ra māǃoahe sida ǂgoms ǃaroma. (2Tim. 3:12) Hōǃâ du ra ǃgomsin hoan ǃnâb ge, Jehovaba a ǃgâiǃgâ kai du ǁkhā. ǁÎba ǁnāsa mati Josefa ge dība?

5. Potifara tae-e ge mûǂan, Josefi gere ǃgâiǃgâ ǀgaub xa? (Genesis 39:2-6)

⁵ Khomai re Genesis 39:2-6 sa. Potifari ge ge mû, Josefi a gā-ai tsî ǃgarise ra sîsen ǂkham khoeb asa. ǁÎb ge nēsa ge ǂan-i. Potifari ge ge mû, ‘Josefi Jehovab xa hâǀkhāhe tsî i ǁîb ǀkha ǃgâise ra ǃgû ǃkhaisa.’ b Tsîb ge Egipteǁîba Josefa ǁîb di ǂhûnumā ǃgāb ase ge ǁgaumâi. Tsîb ge Josefa ǃereamsa ge mā, îb ǁîb omsa kōǃgâ. ǀAmǂoasa ge tae-i? Potifari ge ǃgâiba ge hō, ǁîb ge ge ǃgâiǃgâ.

6. Josefa ǁîb di mâsib xa mati ga tsâ hâ?

⁶ ǂÂis ǀguisa di re, Josefi ge ǀnîsi mati gere tsâsa. ǁÎba tae-e hoan ǃnâ gere ǂhâba? Potifari xa mûhe tsî matarehesa? Īǁkhā as ge, Josefi ge gere ǂhâba îb ǃnorakaihe. Tsî ǁîb di dadasaba ǃoa oa. Josefi ge Potifari oms ǃnâ ǂgui sîsenga ūhâ i xaweb ge Jehovaba ǃoaba tama khoe-i di ǃgāb ase ge ī-i. Jehovab ge ge dī tama hâ i, îb Potifara Josefa ǃnora kai. Tsî Josefi di mâsib ge ga ǁgaiǂoa hâ.

7. Josefi di mâsiba mati ge ǁgaiǂoa? (Genesis 39:14, 15)

⁷ Genesis di 39 ǃnâ ī ra mîhe khami  î ge Potifari di tarasa, Josefa gere ǂhâba. Tsî ǂgui ǁaega ǁîba gere ǁgoe-ū ǂgao. Xaweb ge Josefa hoaǁae gere ǂhā. ǁNāpaxūs ge Josefi ǀkha, ǁnātikōse ge ǁgaixa. Tsî ǁîba ǀgaiǃkhōs xa ge ǂgāri-am. (Khomai re Genesis 39:14, 15 sa.) Potifari ge nēsa a ǁnâu o, ob ge Josefa ǃkhōsis ǃnâ ge ao ǂgā. ǁÎb ge ǁnāpa ǀnî kuriga ge hâ i. (Gen. 39:19, 20) ǃKhō-omsa mati ge ī-i? Hebreǁî gowab mîs Josefi ge, “tronkes” ǃaroma gere sîsenūs ge “ǃkhō-oms”. Tamas ka io “ās” di a ǂâibasen ǁkhā. ǁGau rasa ǁîb ǂnāmipe i ge ǃkhaeb ǀguiba hâ isa. Tsîb ge Josefa ǃâubasen-e ūhâ tama hâse gere tsâsa. (Gen. 40:15) Elobmîs tsîn ge ra ǁgau, ǁaeroba i ge Josefi di ǂaidi tsî ǂhorob tsîna ǀurib ǀkha ge ǃgaehe hâ īsa. (Psa. 105:17, 18) Josefi di mâsib ge ǁgaiǂoas ǀguisa gere di. ǁÎb ge ǂgomǃgâhe gere ǃgāba xu ge, xū tama hâ ǃhōsabe kai.  

8. Mâsib ga ǁgaiǂoa xawe du tae-e a ǂgomǃgâ ǁkhā?

⁸ ǁGaiǂoas ǀguisa ra dī mâsib ǃnâ du hâ tsâ hâ, ǀgaisase du gere ǀgore xawe? ǁNā i ge a īǁkhā. Jehovab ge ǁGâuab xa ra ǂgaeǂguihe ǃhūbaib ǃnâ, ǃgomsina xu ǁkhaeda tama hâ. (1Jhn. 5:19) Xawe du ge nēsa a ǂgomǃgâ ǁkhā. Jehovab ge ǃkharuǃnâ du ra xūna a ǂan. Tsîb ge sadu ǀkha ǁae hâ. (Mat. 10:29-31; 1Pet. 5:6, 7) ǁNās xōǀkhāb ge ra mîmâi: “Tita ge tātsē ǁnāxū tsi tsî ǃharaxū tsi tide.” (Heb. 13:5) Sadu mâsib ga ǁgaiǂoa xaweb ge Jehovaba a hui du ǁkhā. Hā re î da kō, nēs ge mati Josefi ǀkha a īsa.

9. Tae-e ra ǁgau Jehovab ge Josefi ǀkha hâ īsa ǃkhō-oms ǃnâ? (Genesis 39:21-23)

⁹ Khomai re Genesis 39:21-23 sa. Nē ǃgom ǃkhōsis di mâsib ǃnâs tsînab ge Jehovaba Josefa ge ǃgâiǃgâ kai. Mati? Josefi ge ǁaeb ǀkha mûǂam-aob di ǂgomǃgâsiba ge hō. Potifari ge ǂgomǃgâbi hâ i khami. ǁAeba ǃkharu tsîb ge mûǂam-aoba Josefa, ǃkhōsis ǃnâ hâ khoegu kōǃgâ-aob ase ge ǁgaumâi. Elobmîs ge ra mî: “ǃKhōsaben di mûǂamaob ge Josefab ǃereamsa māba hâ xū-eb nî kōǃgâ ǃkhais di ǂhâbasasiba ge ūhâ tama hâ i.” Josefi ge nēsi xū-e ge ūhâ i, ǁîb ǂâisab a ǂnûi-ai ǁkhā-e. ǁNā i ge dī ǁkhāb a sîsen-e dīsa. Nē ǀkharaǀkharanab ge ge ǃâubasen tama hâ i. Mati i khoeb hîna ge Potifari tarasa gere ǀgaiǃkhō ǂgaob ase ge ǂhomiǂgā-amhe ba, nēti i ǃereamsa ūhâ? ǀGui ǃereams ǀguis ge hâ. Genesis 39:23 ge ra mî: ‘Jehovab ge Josefi ǀkha ge hâ i tsî ǁîba dīb gere xūn hoan ǃnâ ge ǃgâiǃgâ kai.’

10. ǁGuiǃā re, tae-i ǃaromab ge Josefa gere tsâsa ǁîb hoa xūn ǃnâ ǃgâiǃgâ tamasa?

¹⁰ ǁKhāwa ǂâi re Josefi ge mati gere tsâsa. ǂHanu tamase ǂgāri-amhe tsî ǃkhōsis ǃnâ ǂgāhesa. ǂÂi i du ra Josefi gere tsâsa ǁîb hoa xūn ǃnâ a ǃgâiǃgâsa? Josefa hoa xūn ǂam-ai tae-e gere ôa? ǃKhō-oms mûǂam-aob di ǃgâiba hōsa? Amaseb ge Josefa gere ǂhâba îb ǁnāxuhe. ǁÎb ge ǃnorakaihe ge khoeba ge ǂgan, îb Faraob ǀkha ǃhoabahe ǁkhā. Îb ǃkhō-omsa xu ǃnorakaihe. (Gen. 40:14) Xawe ǁnā khoeb ge Faraob ǀkha sī ge ǃhoa tama hâ i. Tsî ǁnās xa ǃaromahe hâseb ge Josefa 2 kuriga ǃkhō-oms ǃnâ ge hâ i. (Gen. 40:23; 41:1, 14) Xawe Jehovab ge aiǃgû tsî ǁîb di daoba gere ǃgâiǃgâi. Mâ ǀgaub ǃnâ?

11. Jehovaba mâ ǀō-aisa ǁkhāsiba Josefa ge mā? Tsî nēsa mati ge hui Jehovab ǂâisa dīǀoaǀoas ǃnâ?

 ¹¹ Josefi ge ǃkhō-oms ǃnâ hâ io. Ob ge Jehovaba ge ǃaroma îb Egipteb di Gao-aoba 2 ǃaoǃaosa ǁhapode ūhâ. Faraob ge ǁîra di ǂâibasensa gere ǂan ǂgao. Gao-aob ge ǂanǂui o, Josefi ǁkhāsiba ūhâsa, ǁhapode ǁguiǃāsa. Ob ge ǁîba sī ge ū kai. Jehovab huib ǀkhab ge Josefa ǁnā ǁhapode ge ǁguiǃā. Tsîb ge Faraoba kaise ge buru Josefi ge ǁîba a mā ǀapemādi ǀkha. Mûb ge o, Jehovab nē ǂkhamkhoeb ǀkha hâsa. Ob ge Faraoba nē ǂkhamkhoeba ǂûn mûǂam-aob ase hoa Egipteb ǃhūb ǃnâ ge ǁgaumâi. (Gen. 41:38, 41-44) Ēga i ge ǃâtsūǀkhāba ge hâ i, hîna ge Egipteb ǀguiba tsâǀkhā tama hâ îba. Xawe i ge Kanani, Josefi omaris gere hâǃnâ ǃhūb tsîna ge tsâǀkhā. Josefi ge nēsi ǁîb omarisab a sâu ǁkhā mâsib ǃnâ ge hâ i. Tsî Mesiab ge hā xu daoba ge sâu.

12. Mâǀgaub ǃnâb ge Jehovaba Josefi gere dī xūna hoana ge ǃgâiǃgâ kai?

¹² Josefi di ûib ǃnâ ge ī mâsigu xa ǂâi re. Ham-e ge ǃaroma îb Potifara, Josefi khami ī ǃgāba mûǃā? Ham-e ge ǃaroma îb ǃkhō-oms di mûǂam-aoba Josefi khami ī ǃhōsabeb ǃnâ ǃgâiba mû? Ham-e Faraoba ǃaoǃaoxa ǁhapode ge mā? Tsî ge ǃaroma îb Josefa ǁîde ǁguiǃā ǁkhā? Ham-e mîǁguib ǃgâb ai ge hâ i, îb Josefa Egipteb ǃnâ ǂûn di mûǂam-aob ase ǁgaumâihe? (Gen. 45:5) Amase Jehovab ǀguib ge, Josefi gere dī xūn hoana ge ǃgâise gere ǃgûǁnâ kaiba. ǀAms aib ge Jehovaba, Josefi ǃgâsagu di ǁgai ǂâibasensa ge dawa. Î-i ǁîb di ǂâibasensa dīǀoaǀoahe ǁkhā.

13. Jehovaba sida ǀkha ra ī xū-i hoa-i ǃnâ ra mâǂgā? ǁGuiǃā re.

¹³ Tae-e da Josefi di ǃnaeǃkhaisa xu ra ǁkhāǁkhāsen? Jehovaba hōǃâ da ra mâsib hoab ǃnâ ra hui da? ǁÎba sida di ûib ǃnâ ra ī xū-i hoa-e ra dawa, în ǁgai xūn hoana ǃgâib ǃaroma ǀgui ī? Hî-i, Elobmîs ge ǁnāsa ǃkhō-am tama hâ. (Aoǁn. 8:9; 9:11) Xawe da ge nēsa a ǂan, ǃgomsiga da ra hōǃâ o. Ob ge Jehovaba nēna a ǂan tsî ra mû. Tsîb ge ǁîb ai da ra  ǂgan huiba ra ǁnâu. (Psa. 34:15; 55:22; Jes. 59:1) ǁNās xa ǃnāsaseb ge Jehovaba a hui da ǁkhā, î da ǃgomsiga ǃgâiǃgâ hâse ǃkharuǃnâ. Nēsab mati ra dī?

14. Jehovaba ǃgomǁaegu ǃnâ mati ra hui da?

¹⁴ ǀGui ǀgaub Jehovab ra hui dab ge ǁkhaeǂgaos tsî ǂkhâǃnâsa, ǂhâ da hâ ǁaeb ai mādasa. (2Kor. 1:3, 4) ǁNās ge ǃgâsab, Eziz ti ǀon hâb ǀkha ge ī. Hîna Turkmenistani ǃnâ ǁan hâba. ǁÎb ge 2 kuriga ǁîb di ǂgoms ǃaroma ǃkhō-oms ǁkharaba ge hō. ǁÎb ge ra mî: “ǁNâuǃgâǃkhaiba ǃoa ta gere ī ǁaeb aib ge ǃgâsaba, Jesajab 30:15 sa ge ǁgau te. Hîna ra mîsa: ‘Sadu ǃnōs tsî ǂgomǃgâs tsîn ge nî sadu ǀgai.’ Nē xoas ge hoaǁae gere hui te, î ta ǃnomsase hâ tsî Jehovab ai hoa xūn ǃnâ ǂgomǃgâ. Nē xoas ai ǂâiǃgâs ge ǃkhō-oms ǃnâ ta ge hâ i ǁaeb hoab ai ge hui te.” Jehovaba xu du ge sadu ûib ǃnâ ǁkhaeǂgaos tsî ǂkhâǃnâs tsîna ǂhâhâ i ǁaeb xa, du a ǂâi hō ǁkhā?

15-16. Tae-e du Toris di aiǁgausa xu ra ǁkhāǁkhāsen?

¹⁵ ǂGui ǁaegu ai da ge Jehovab ǃgomsigu ǃnâ ra hui da ǀgauba. ǃGomsigu ga toa ǁaeb ai ǀgui a mûǃā ǁkhā. Tori ti ǀon hâ ǃgâsas ge ǁnā amaba ge mûǃā. ǁÎs di ǀgôab Masoni ge ǃnani kuriga kankersa gere ǃkhamǃoa, ǁōb nî kōse. ǁNâuǃāxases ge Torisa kaise ge tsûaǂgao hâ i. ǁÎs ge ra mî: “ǂGom tama ta ge hâ, ǁgû-i ase i nēs khami ī tsûaǂgaoxa mâsiba tita ǃaroma hâsa.” ǁÎs ge ǀaro tsî ra mî: “ǂGom ta ge ra nau ǁgûn nî ǃkhō-am ǃkhaisa. Sā ǀgôa-i tsûba ra ǃkharuǃnâsa mûs ge sats aitsama ra hōǃâs xa a ǁgai.”

¹⁶ ǁNā mâsib ge kaise ge ǁgai i. Xawes ge Torisa ge mûǂan, Jehovab ge mati nē  ǃgom mâsib ǃnâ a hui ǃkharusa. ǁÎs ge ra mî: “ǁNā ǁaeb xa da ra ǂâi o, o ta ge Jehovab di ǀnamxaǃnâ ǃoma. Ti ǀgôab di ǀaeb ǃnâ ra mû. Masoni ge ǁnātikōse ge ǀaesen hâ ī tsî khoen tsîna ge mûǁoa ī. Xawen ge ǃgâsana 2 īrga hospitalsa ǃoa gere ǃnari. Hoaǁae i ge khoe-e ǃâu-e ra kamers ǃnâ gere ǂnû. Tsî aiǂhumisase ge māsenxa i huis ǃaroma. Tsî sim di sorosi ǂhâsigu tsîn ge gere kōǃgâhe. ǁGai mâsigu ǃnâs tsînam ge ǂhâm hâ xūna ge ūhâ i.” Jehovab ge Torisa ǂhâs ge hâ i xū-e ge mā îs mâǀgai ǁkhā. Tsîb ge ǁkhā xū-i tsîna Masona ge dība.—Mû re boksisa “ Jehovab ge ǂhâm ge hâ i xūn hoana ge mā mî.”

17-18. Tae-e nî hui da mûǂan tsî ǃgôaǃgâsa Jehovab ǃgom mâsigu ǃnâ ra māda huib ǃaroma? (Psalmdi 40:5)

¹⁷ Khomai re Psalmdi 40:5 sa. ǃHommi ai ra ǂoa khoe-i di mîǁguib ge, ǃhommi ǀgapiga sīsa. Xawe i ge ǁnā daob ai ǂgui ǃēde ūhâ, hîna i stop tsî mû-i ra xūn di îsasiba a kō ǁkhāsa. ǁKhā ǀgaub ǃnâ, hoaǁae ǁaeba ǁamaǂui tsî stop tsî ǂâi re. Jehovab mati sado ra ǃgâiǃgâ kai ǀgauba, ǃgomsigu ǃnâ du ra mâǀgai hîna. Tsēs hoas ǀams ai, dîsen re: ‘Mâ ǀgaub ǃnâ ta go Jehovab di ǀkhaeba nētsē mû? ǃGomsin hâ xawe Jehovaba mati ra hui te î ta mâǀgai?’ Kō re, mûǃā ǁkhā du asa Jehovab ge tae-e a dība dusa hui dus ǃaroma.

¹⁸ Ama as ge ǀnîsi du ge ra ǀgore, î-i sadu ǃgomsiba toa. ǁNās ge a ǁnâuǃāxa tsî a ǃgâi. (Fil. 4:6) Xawe da ge nēsi da ra hōǃâ ǀkhaegu tsîna nî mûǂan. Nēn hoan ǃnâb ge Jehovaba ra mîmâi, ǁîb nî ǀgaiǀgai da sa. Tsî nî hui î da mâǀgai. ǁNās ǀkha ganganxa re Jehovab hoaǁae ra hui du ǃkhais ǃaroma. O du ge nî mû, Jehovab mati ra hui du ǀgausa î du ǃgâiǃgâ. Josefab ge ǃgom mâsigu ǃnâ a hui khami.—Gen. 41:51, 52.