1, 2. 1) ¿Keniuj tikmatij ke titajyouiskej? 2) ¿Toni ika titajtoskej itech nejin tamachtilis?

 TIITEKITIKAUAN Jehová, tikmatij ke tikpanoskej ouijkayomej. Porin Biblia kijtoua: “Moneki tikijyouiskej miak taman achto ke tikalakiskej itech iTaixyekanalis Dios” (Hech. 14:22). Uan no tikmatij ke seki ouijkayomej tein tikpanouaj amo tikpiaskejok hasta keman tinemiskej itech yankuik taltikpak, kampa “amo akin momikilisok, nion tayokoyas nion chokas nion tajyouis” (Apoc. 21:4).

² Jehová amo techajchiuilia ouijkayomej tein tikpanouaj, sayoj ke kemaj techpaleuia maj titaxikokan. Maj tikitakan tein tatitanil Pablo kinijkuilouilij tokniuan akin nemiaj Roma. Satepan ke ika tajtoj ouijkayomej tein kipanotoyaj tokniuan uan no yejua, kinijkuilouilij: “Porin techpaleuia akin techtasojta, titatankej itech nochi nejin” (Rom. 8:35-37). Nejin kijtosneki ke Jehová uelis techpaleuis maj kuali techyoui maski titajyouijtoskej. Maj tikitakan keniuj kipaleuij José maj kuali kikisa nochi tein kichiuaya uan keniuj axkan uelis techpaleuis.

3. ¿Keniuj niman mopatak kemej nemia José?

³ Nochin kimatiaj ke Jacob semi kitasojtaya ikoneuj José (Gén. 37:3, 4). Yejua ika iikniuan José akin tayekanayaj peuak kinexikoluiaj. Nejon kinuikak maj kinamakanij iniuan seki madianitas tanamakanij. Nejon  takamej kiuikakej José ompa Egipto, tein semi uejka moajsia uan ompa kinamakiltijkej Potifar, akin kinixyekanaya soldados akin kiyekpiayaj faraón. Niman mopatak kemej nemia José; amo yetoyaok iuan ipopaj akin kitasojtaya, axkan katka se takeual ompa Egipto (Gén. 39:1).

4. ¿Keniuj no uelis techpanos tein José kipanok?

⁴ Biblia kijtoua ke “nochin kinpanoua tein amo kuali” (Ecl. 9:11). Kemansa tikpiaj ouijkayomej tein oksekin no kipiaj (1 Cor. 10:13). Xa techkejkeloskej, techixnamikiskej oso hasta techtajyouiltiskej porin tiktojtokaj Jesús (2 Tim. 3:12). Maski tein yeski ouijkayot tein tikixnamiktoskej, Jehová uelis techpaleuis maj kuali kisa tein tikchiuaskej. Maj tikitakan keniuj kipaleuij José.

5. ¿Toni kiajsikamatik Potifar keman kiitak ke José nochi kuali kisaya tein kichiuaya? (Génesis 39:2-6).

⁵ (Xikonixtajtolti Génesis 39:2-6). Potifar kiitak ke José katka se telpoch akin tel tekitia. Uan kiajsikamatij keyej ijkon katka. Porin “kiitak ke Jehová iuan yetoya uan ke Jehová kichiuaya maj kuali kisani nochi tein José kichiuaya”. b Satepan, Potifar kiixtalij maj taixyekana ikalijtik uan kimaktilij nochi tein kipiaya ichan. Yejua ika, nejin takat kiselij miak taman tein kuali.

6. ¿Keniuj xa momachiliaya José?

⁶ Maj tiknemilikan keniuj momachiliaya José. ¿Teisa kinekia? ¿Kinekia maj Potifar kiitani tein kichiuaya para maj kimakani teisa? Xa semi kinekia maj kikajkauakan uan ijkon mokepas ikalijtik iuan ipopaj. Maski Potifar kimakaskia miak taman, kisentokaya kitekitiliaya se akin kinueyichiuaya tiotsitsin. Jehová amo kichiuak maj Potifar kikajkaua José. Uan no, tein yaya kipanoti satepan okachi ouij yeskia.

7. ¿Keyej okachi ouij tein kipanotoya José? (Génesis 39:14, 15).

⁷ Génesis capítulo 39, kijtoua ke isiuauj Potifar kiixuelitaya José uan miakpa  kitemoj iuan motekas. Sayoj ke yejua nochipa kiixtopeuaya. Siuat tel kualanik, yejua ika kiteluilij ke kinekia iuan mauiltis (xikonixtajtolti Génesis 39:14, 15). Keman Potifar kimatik, tanauatij maj kitsakuakan uan José tsaktoya seki xiujmej (Gén. 39:19, 20). ¿Keniuj katka kampa tsaktoya? Tajtol hebreo tein kikuik José keman ika tajtoj kampa tsaktoya uelis motajtolkepas kemej “tekoch”. Nejin kiteajsikamatiltia ke katka tayouayan uan ke ompa semi se motayokoltiaya (Gén. 40:15, nota). Uan no, Biblia kijtoua ke seki tonalmej José kimetsilpijkej ika teposmej uan kikechilpijkej ika cadena (Sal. 105:17, 18). Axkan okachi ouij tein kipanouaya, porin amo itech takuaujtamatiajok.

8. Maski se ouijkayot okachi techtajyouiltis, ¿toni kuali tikmatij?

⁸ ¿Tikpanouanij se ouijkayot tein semi techtekipachouaya uan okachi titajyouiayaj maski semi timotataujtiayaj? Nejon uelis techpanos. Jehová amo techajchiuilia ouijkayomej tein tikpiaj itech nejin taltikpak kampa taixyekantok Satanás (1 Juan 5:19). Sayoj ke, kuali tikmatij ke toTajtsin kiita nochi tein techpanoua uan ke toka motekipachoua (Mat. 10:29-31; 1 Ped. 5:6, 7). Uan no, yejuatsin motenkaua nejin: “Amo keman nimitskauas uan nochipa nimitspaleuis” (Heb. 13:5). Jehová techpaleuis maj tikxikokan tein yeski ouijkayot maski moitas ke amo uelis moyektalis. Yejua nejon tein kipanok José.

9. ¿Toni kinextia ke Jehová kipaleuiaya José keman tsaktoya? (Génesis 39:21-23).

⁹ (Xikonixtajtolti Génesis 39:21-23). Maski José tajyouijtoya, Jehová nochipa kipaleuiaya ika tein kichiuaya. ¿Keniuj? Ijkon kemej Potifar takuaujtamatik iuan José, no ijkon akin taixyekanaya kampa tsaktoya iuan takuaujtamatik, uan hasta kiixtalij maj kinixyekana akin no ompa tsaktoyaj. Biblia kijtoua ke “akin taixyekanaya kampa tsaktoyaj amo motekipachouaya ox kuali mochiuaya teisa”. Nejon kipaleuij José maj amo semi tanemili itech tein kipanotoya. Se kimoujkaita nejin porin maski kiteluilijkaj José ke kinekia ika mauiltis isiuauj se takat akin ueyichiujkej, axkan kiixtalijkej maj taixyekana. ¿Keyej? Génesis 39:23 kijtoua: “Jehová yetoya iuan José uan Jehová kichiuaya maj nochi kuali kisani”.

10. ¿Keyej José xa amo kiitaya ke Jehová kipaleuiaya?

¹⁰ Maj oksepa tiknemilikan keniuj momachiliaya José. ¿Kiitaya ke Jehová kipaleuiaya maski tsaktoya porin kitakajkayauilijkej? Maj tiknemilikan: ¿toni kinekia José?, ¿maj kuali kiitani akin taixyekanaya kampa tsaktoya? Xa kinekia maj kiitakan ke amo teyi kichiujka uan maj kikixtikan. Yejua ika, hasta kiluij se akin yaya kikixtitijya, maj kuali ika tajto keman yetoskia iuan faraón para maj kikixtikan (Gén. 40:14). Sayoj ke, kemej nejon takat amo niman kiluij faraón tein José kiluijka, monekik tsaktosok ome xiuit (Gén. 40:23; 41:1, 14). Sayoj ke, Jehová kisentokaya kipaleuiaya José itech nochi tein kichiuaya. ¿Keniuj?

11. ¿Toni uelik kichiuak José porin Jehová kipaleuij, uan keniuj tapaleuij nejin maj mochiua tein Jehová kiixtalijtoya?

¹¹ Keman José tsaktoya, Jehová kichiuak maj akin tekiuajtia ompa Egipto kikochitani ome taman tein kichiuak maj  semi motekipacho. Faraón kinekia kimatis toni kijtosnekia tein kikochitak. Yejua ika, keman kimatik ke José ueliskia kiluis toni kijtosnekia, tanauatij maj kikuitij. Jehová kipaleuij José maj kiluiani faraón toni kijtosnekia tein kikochitak uan no maj kiluiani toni monekia kichiuas. Nejin semi kimoujkaitak faraón. Yejua ika, keman kiitak ke Jehová kipaleuiaya nejin telpoch, kiixtalij maj kiixyekana keniuj motemakaskia takual itech nochi Egipto (Gén. 41:38, 41-44). Seki xiujmej satepan, amo semi onkayaok tein kikuaskiaj ompa Egipto nion Canaán, kampa nemiaj ichankauan José. Kemej José kiixyekanaya keniuj motemakaskia takual, ueliskia kinpaleuis ichankauan, akin mochiuaskiaj iuejkaujtatuan Mesías.

12. ¿Keniuj Jehová nochipa kipaleuij José?

¹² Xikonnemili nochi tein kipanok José. Potifar kiitak tein José uelia kichiuaya, maski sayoj katka se takeual. Akin taixyekanaya kampa kintsakuaj, kiixtalij José maj kinixyekana akin no ompa tsaktoyaj. Faraón kikochitak se taman tein kitekipachoj uan José uelik kiluij toni kijtosnekia. Uan no, kiixtalijkej maj kiita keniuj motemakaskia takual ompa Egipto. ¿Akoni kichiuak nochi nejin? (Gén. 45:5). Tikyekmatij ke Jehová yejua akin kipaleuij José para maj kuali kichiuani nochi. Maski iikniuan kinekiaj kimiktiskej, Jehová kipatak nejon para maj mochiua tein yejuatsin kinekia.

13. ¿Techajchiuilia Jehová ouijkayomej tein tikixnamikij?

¹³ Tein kipanok José techmachtia se taman. ¿Techajchiuilia Jehová ouijkayomej tein tikixnamikij? ¿Kichiua Jehová maj titajyouikan para techmachtis teisa? Biblia kijtoua ke amo (Ecl. 8:9; 9:11). Sayoj ke, kemaj tikmatij ke keman tikpanouaj se ouijkayot, Jehová kiitstok nochi uan techkaki keman tiktajtaniaj maj techpaleui (Sal. 34:15; 55:22; Is. 59:1). Uan no, Jehová nochipa techpaleuia maj tikixnamikikan ouijkayomej. ¿Keniuj kichiua?

14. ¿Keniuj techpaleuia Jehová keman tikixnamikij ouijkayomej?

 ¹⁴ Jehová techyolseuia uan techyolchikaua keman okachi moneki (2 Cor. 1:3, 4). Yejua nejon tein kipanok Eziz, se tokniuj akin kayot Turkmenistán, akin tekiuanij kiixtalijkej maj tsakto ome xiuit porin kiueyichiuaya Jehová. Yejua kijtoua: “Tonal keman kiitaskiaj ox nechtsakuaskiaj oso amo, se tokniuj nechnextilij Isaías 30:15, kampa kijtoua: ‘Nankipiaskej chikaualis komo nanyolseujtokej uan komo nantakuaujtamatij’. Nejon tajkuilol nechpaleuij maj amo semi nimotekipacho uan maj nitakuaujtamati iuan Jehová. Keman nitsaktoya, nejin tajkuilol semi nechyolchikauak”. ¿Tikelnamikij keniuj Jehová techpaleuij uan techyolchikauak keman tikpanotoyaj se ouijkayot?

15, 16. ¿Toni techmachtia tein kipanok Tori?

¹⁵ Miakpa amo tikitaj keniuj Jehová techpaleuia hasta keman amo titajyouiajok. Se tokniuj siuat akin motokaytia Tori kiitak ke ijkon panoua. Ikonetsin Mason kipiak cáncer chikuasen xiuit, uan satepan momikilij. Tori semi motayokoltij. Yejua kijtoua: “Se temomaj semi tajyouia keman momikilia se ikonetsin”. Uan no kijtoua: “Xa no ijkon momachiliaj okseki tetatmej kemej nejua. Keman tejuan titajyouiaj amo kualtsin timomachiliaj, sayoj ke okachi titajyouiaj keman tikitaj ke tokoneuj tajyouia”.

¹⁶ Maski Tori semi tajyouij, satepan tanemilij keniuj Jehová kipaleuij. Yejua kijtoua: “Keman itech nitanemilia tein nikpanok ueli nikita keniuj Jehová nechpaleuij keman nokonetsin mokokouaya.  Nikelnamiki ke keman semi mokokouaya, uan amo uelia kinseliaya akin yayaj kikalpanotij, tokniuan kisentokayaj yayaj maski kichiuayaj ome hora para ajsiskej hasta hospital. Yejuan amo keman techkaujkej toselti, nochipa moajsiaj touan. Uan no techpaleuijkej ika tomin. Nochipa tikpiayaj tein monekia, hasta keman tikpanouayaj tein okachi ouij”. Jehová kinpaleuij Tori uan Mason maj taxikokan (xikonita recuadro “ Jehová techmakak tein techpolouaya”).

17, 18. ¿Toni techpaleuis maj tikitakan uan maj tiktasojkamatikan ke Jehová nochipa techpaleuia? (Salmo 40:5).

¹⁷ (Xikonixtajtolti Salmo 40:5). Akin peua tejko itech se tepet kineki ajsis hasta takuapan, sayoj ke ijkon kemej pankistiuj, uelis motsakuilis uan kiitas nochi tein kualtsin tein onkak ompakauin. No ijkon, kemansa uelis tikxeloskej tiempo uan tiknemiliskej keniuj Jehová techpaleuijtok maj tikxikokan se ouijkayot. Keman tamis se tonal, maj timotajtanikan: “¿Keniuj nechtatiochiuij Jehová axkan? Maski niksentoka nitajyouia, ¿keniuj nechpaleuijtok Jehová maj nitaxiko?”. Maj mojmostaj tikitakan se taman kemej Jehová techpaleuijtok.

¹⁸ Xa tikontataujtijtok Jehová maj mitsonajchiuili se ouijkayot, uan nejon kuali yetok (Filip. 4:6). Sayoj ke no moneki tikitaskej keniuj techtatiochiuijtok. Jehová motenkaua ke techyolchikauas uan techpaleuis maj titaxikokan. Yejua ika maj nochipa tiktasojkamatilikan. Komo tikchiuaj, tikitaskej ke Jehová nochipa techpaleuia hasta keman titajyouiaj, ijkon kemej kipaleuij José (Gén. 41:51, 52).